رواية خطأ طبي «عقاب الاماني» الفصل الثامن وأربعون 48 - بقلم نورمـين

#خطأ_طبي «عقاب الاماني»

بقلــم : نورمين 🖤🦋

...

اماني: شمس منو؟

ريان: بت دكتور توفيق شبيج، اخت امير

اماني: شنووو؟؟؟

ريان: مو علساس متستغربين بعد؟

اماني: لا ممعقولة ريان انت تشاقة!

ريان: لا..

مال براسه للجانب وخلى نظراته مستقرة عالكاع، الي ديشخبط عليها بالعودة الي بأيده.

ريان: انتِ تعرفين شكد شمس بنية تجنن.. وهي بعيدة كل البعد عن اطباع ابوها واخوها بحكم كون امها منفصلة عن توفيق

اماني: اي اعرف وهي اصلا اخته لامير من ابوه بس...

ريان: بس شنو؟

اماني: بس الي معجبني انت وين لكيتها وحبيتها؟

ريان: طبقنا سوة بنفس المستشفى لمدة شهرين

اماني: اهاا .. زين هي تحبك؟

شال راسه باوعلي بحزن واردف بنفس النبرة.

ريان: لو جانت تحبني، جان شفتي هذا حالي؟

معرفت شحجي، خليت ايدي ع كتفه وحاولت اهون عليه بالكلام.

اماني: ماعرف شلون اهون عليك او اواسيك، لان الموضوع مو سهل، بس كل الي اكدر اكولكياه، اني حاسة بأحساسك بهاللحظة.. والا ما يجي اليوم الي ينتهي بي هالالم ويطيب گلبك.

ريان: الله كريم، انتِ شلونج؟

اماني: اني... امممم سؤال صعب تدري؟

حجيت بمرح، زم شفايفه وحجة.

ريان: ارجع واعيدلج الكلام الكلتي الي، الا ما يجي يوم ينتهي بي ألمج ويطيب گلبج من اثار حب عقاب.

اماني: تؤ.. الاثار الي تركها عقاب بكلبي متروح لان محفورة وية النبضات حفر، وهنا ما اقصد المواقف الحزينة بس، لا اقصد اللحظات السعيدة هم لان عقاب انسان ما ينتسى بسهولة.

ريان: متحسين نفسج دتبالغين؟ خاصة هو طلكج

تنهدت بعمق دافعة كل المشاعر السلبية والغصات الي تهاجمني وية ما افتح موضوعه..

اماني: ابد مدا ابالغ.. الي يعيش الموقف مو مثل ليسمع عنه فصعب تفهم احساسي

ريان: بعدج تحبيه؟

جسمي قشعر من السؤال، بعده طاريه يخلق رعشة بخلاياي..

اماني: لا.

ريان: متاكدة؟

اماني: حاليا اي، هو عافني ودار ظهره الي واني مستحيل ابقى احب انسان تخلى عني او اطلب وصاله، الميريدني ماريده ريان.

ريان: بعد كل الصار، تخليتي عن حبج اله، معقولة؟

ابتسمت ساخرة وكلت..

اماني: بعد كل الصار؟ هه .. ليش هو الصار هيّن؟

ارتسمت الجدية ع ملامحي، خليت كوب الكهوة ع صفحة وخليت انظاري مرتكزة للامام وكملت كلامي.

اماني: انت تدري اكثر شي يجرحني شنو؟

ريان: شنو؟

اماني: على كولتك بعد كل الصار.. ريان بعد كلشي صار وياي اني وعقاب توقعته يحارب الدنيا علمودي مو يتخلى عني واني المتمسكة بي مثلما الجاهل يلزم ايد امه بالازدحام خاف يضيع منها..

ريان: شمدريج ميطلع مجبور على هالشي؟ ما معقولة هو كل هالفترة جان يمثل وميحبج!

اماني: انت متعرف عقاب زين مثلي.. عقاب انسان متناقض وعنده مية الف شخصية وكل وحدة متشبه الثانية، عنده قدرة فظيعة على الاقناع، تعابير وجهه الغاضبة طبعه الحاد كلامه وتصرفاته الباردة يقابلها كلب طيب وحنية وتفهم واهتمام، بس هذني الامور ثنينهن مجرد ادوات بالنسبة اله،  يستخدمها بأوقات متفاوتة، ومتعرف اذا هو صدك يحبك او يكرهك، يعيشك بمتاهة ودوامة متنتهي، وتظل تحلل ياهوه الاصح بروده لو حنيته، يحبني لو يكرهني؟!

ريان: الظاهر معيشچ بهيج دوامة مو؟

اماني: اوهوو ريان.. ما احب احجي بذيج الفترة بس الي اكدر احجيلكياه، اي عيشني بدوامة.. واي تعبنـي ودمرني بتناقضه بس بالمحصلة، حبنـي وعوضني عن كلشي راح، او لفترة ما يعني ..

ريان: الله يهدي النفوس، اني ابد ما عاجبني وضعكم وكلش ضايج عليج وعليه

اماني: ضوج ع روحك احسن عيني

كلتها بمرح وهو ضحك، واخذت كوب الكهوة اشرب منه.

اماني: اي سولفلي شكو وليش اليوم انفجرت ع بابا؟

ريان: ما انفجرت، اصلا جان كلام عادي بس هو الدكتور عنده ليجاوب معناته ادبسز وقليل ادب

اماني: يمعود هم الاباء كلهم هيج، بس تجاوبه يعتبرها تقليل من شأنه وانك دتتجاوز، حتلو كلامك جان عادي

ريان: شوفي لهالسبب بالذات، اني اول شغلة راح اعلمها لابني وبنتي بالمستقبل هي النقاش، مراح اخليهم يعيشون نفس الي عشته ويظلون خايفين ينطون رايهم، او يترددون يحجون وياي خاف عبالهم هالشي غلط او ميصير

اماني: اتفق وياك، لغة الحوار نفتقدها هواي بعوائلنا

ريان: اي ولذلك احنه لازم نزرعها بالجيل الجديد لان هم اساس التغيير الي نطمحله

اماني: صح الصح!

......

جنات

كملنا عشة وطلعت ملازمي دا اقرة.

ميقات جانت دتخابر شاهين وتسولف وتضحك وياه بصوت عالي.

ميقات: ههههههههههه لا بالله تحجي صدك؟

شمرتها بالمخدة.

جنات: اريد اقرة ممكن تسدين حلكج؟!!

ميقات: لا بالله ليش متكومين تطلعين منا مو احسن!

جنات: سمعًا وطاعة انسة تبن

ميقات: شاهيني سمعت شتكولي؟؟ تقبلها تصيحلي تبن؟

عزا لعزاها هاي البنية فضيحة فشلتني كدام الولد، اني دا احجي بصوت ناصي اصلا.
بس هي عمدا تكله شحجيت حتى تفشلني وياه.

ميقات: شنو متقصد، حبيبي اكلك تكلي تبن، تقبلها يكولون ع حبيبتك تبن؟؟ هااا اممم لا ولله انت العسل ..

جانت تحجي وسايحة من الدلع والخجل، كشت روحي منها..

همستلها بصوت ناصي واني احذر..

جنات: عسل ام حلك، اني الج اليوم الا املخ عطوبج بيدي وخل اشوف شاهينج شيسوييي

وسعت عيونها ضاحكة وردت كلتله ..

ميقات: استلم تريد تملخ شعراتي انوب وتكول عليهن عطوب! بربك شعري الاشكر الحرير عطوب؟؟!!

فكيت عيوني بعدم تصديق، هاي صدك بايعة المستحة.

ميقات: اووي استحي

جنات: ووجعوي تنام بحلكج كوميييييي برا

جبت المكناسة وركضت وراها شردتها من الغرفة وهي تصيح شاهيني الحكلي.

كلت هي خربانة خربانة واني تفشلت كدامه تفشلت، خلي اطردها واقرة عاد.

وصدك طردتها وكعدت.

اخذت شهييق وزفرته وهمست لنفسي.

جنات: يلا نفحط الحقوق

بعدني ما بديت بأول تعريف، دك التلفون.

ضرغام ديخابر، رديت بملل..

جنات: ادري اهج للسما يلا ارتاح واقرة بهدوء

ضرغام: بسم الله الرحمن الرحيم، هاي طردة علني!

انتبهت ع روحي شصخمت، عدلت كعدتي وكتله.

جنات: اا لا لا بس اقصد ميقات خبلتني مدتخليني اقرة براحتي، شافت نفسها تخرجت عبالها كلها مثلها

ضرغام: ولو مو هذا جان الواضح من كلامج، بس ميخالف اعديها

جنات: تدري اني احبك مو؟

ضرغام: ادري ادري..

جنات: شلونك شسويت اليوم شلونه دوامك؟

ضرغام: اذا احجي اطير وقت دراستج، فروحي ادرسي احسن وعود من تخلصين نتخابر

جنات: لا هسة تسولف معليه

ضرغام: ودراستج؟

جنات: فدوة الك

ضرغام: يروحي.. بس ميخالف ما اقبل اني حبيبتي تتكسل، ادرسي وتعاي اني منتظرج

جنات: لا مبين انت متريد تحجي وياي وتتحجج بالدراسة، احجي المن تريد تخابر ودترفسني؟!

ضرغام: دخيل الله، صاحية لروحج يابه ؟

جنات: لا تلف وتدور احجي خليك صريح وياي!

ضرغام: خوش رح اكون صريح وياج بس مو تزعلين مني..

هو كال هيج وكلبي وجعني..

ضرغام: متفقييين؟؟ الوو وين رحتي؟

رديت بصوت مهزوز..

جنات: يعني صدك طلعت عندك وحده غيري؟!!

ضرغام: شوف الله.. هاي بسلا بجيتي؟

جنات: انت ليش تغير الموضوع ومتجاوبنييي؟

ضرغام: لج بابا انتِ كل عقلج تحجين، اكو واحد بين ايديه الجنة ويعوفهاا؟؟

لميت شفايفي بتوتر، بس بعدني ممتاكدة رجعت كتله..

جنات: شوف هذني السوالف طكطكهن ع وحدة غيري ترا ميعبرن عليه، احجي شردت تكلي قبل شوية وكتلي بس لتزعليين شضام عليه ضرغام؟؟!!!

ضرغام: جاهزة تسمعين شريد احجي يعني؟

جنات: اكيد بس اهم شي لتلف وتدور وتجذب

ضرغام: انجبي لج اني جبتها وياج كله سيدا -گبل او عدل-  يا يوم لفيت ودرت!!

جنات: شوف بيمن يحجي واحنه شنحجي!

ضرغام: وج *** مو اجيج!

جنات: غلط لتغلط افتهمت لو لا

ضرغام: جنج ناويتها من الله ع الله

جنات: ضرغام من الاخير تحجي لو لا؟ ترا ما بيه حيل

ضرغام: يالعجوزية يالما بيج خير

جان يحجي بشقة، بس اني ضجت شبي هذا يقلد عليه ششايفنيي..؟؟؟

جنات: غير يكعد الفهيم

ضرغام: ولللللج

صاح بيه، رديت ببرود وبتقطع..

جنات: تحجي لو لا؟

ضرغام: لج *** اريد نتزوج بس تخلصين هالسنة شيصبرني لتخرجج!!

صدمني بكلامه لان جنة متفقين نتزوج ورة ما اخلص دراستي، واني بعدلي سنة.

ضرغام: ادري انتِ ببحر وكلشوي تغطين، وينج جنـاتي؟!

جنات: وياك حبيبي..

ضرغام: ها يـروح حبيبج شكلتي؟!

جنات: مادري فاجئتني.

ضرغام: مو مشكلة فكري ورديلي خبر

جنات: تمام

سكتنا شوية، كال بهيـام..

ضرغام: انفاسج المتوترة هاي تخليني افكر بشغلات ثانية ..

رديت بعدم فهم.

جنات: شنو من شغلات؟

ضرغام: اذا وافقتي نتزوج اكلج بيهن

طخت ببالي فرديت بغضب..

جنات: انت متجوز من سوالفك التعبانة عيب عيببب!!!

ضرغام: العيب بالجيب وانتِ خطيبتي هاي اولا، ثانيًا حسابج عسير ع كلمة سوالفك التعبانه، وبس الزمج فنج تخلصين مني وبسيطة

جنات: شو انت تهدد ومصدك بروحك، ترا هسة اعوفك وارجع ادرس!!!

ضرغام: مترجعين منو لازمج، مو كتلج ولي ادرسي ما رضيتي

جنات: ها ضرغام تطردني يعنيي!!!!

ضرغام: اي لمصلحتج

جنات:جذاب وانت تريد تحجي وية غير وحده ودتاكل بعقلي حلاوة عبالك مافتهم اني

ضحك ضحكة جبيرة كام يكحكح من وراها واني افور وضحكته ضغطتني!!

جنات: انوب تضحك عليه؟؟

ضرغام: اكلج شغلة وحدة بس وانتِ حرة بعد

جنات: بس بدون جذب؟

ضرغام: بت ال*** شوكت مجذب اني عليج؟

جنات: لتغلط ع بابا متوفي ما اسمحلك!!!!

ضرغام: اسف بالغلط بس انتِ جفصتي ببطني بسوالفج شنو تجذب اجي اسحلج هسة؟

جنات: ديلا سكتت اكعد يـ الساحول

ضرغام: شو عبالك معاجبج؟

جنات: لا يابة هو اني اكدر؟ سولف سولف

ضرغام: اذا هيج تمام

تنهد وحجة بصوت خلى كليبي يرجف مثل السعفة..

ضرغام: كل الناس تنتظر تموت يلا تظفر بالجنات وتفوز بالنعيم، الا اني حصلتها من هسة ومستعد اموت ولا افاركها لحظة وحدة!

جنات: اسم الله عليك حبيبي لتكول اموت ..

ضرغام: احبج جنـات .. بكد حُب المؤمن وشوقه لرحمة الرب وجناته..

ابتسمت ورديت بمزح..

جنات: عبالك عبرت عليه هاي كلاواتك، تؤ متكدر!

ضرغام: اليوم تريديني امرعدج تمرعد

ضحكت ضحكة جبييرة ورديت بدلع.

جنات: شوية اشاقيك شنو ميصيرر؟

ضرغام: ع كولة قسورة شقاج جايف.

جنات: هاي عليمن؟

ضرغام: اهوووووو

جنات: اهو؟ يعني مليت مني يعني اني مملة وادور مشاكل مو؟

ضرغام: ساعة السودة لخابرتج بيها لو ظال مكابل شاهين هواي اشرفلي

جنات: ادور صرت ساعة سودة؟ بسيطة ضرغام بسيطة

ضرغام: يطلابة الما تفض، ربيييي دتشششوووف!!!!

جنات: اتحسب عليه فد مرة!!!

ضرغام: اعقلي باباتي وكبري عقلج كافي نكد

جنات: يعني هسة اني نكدية وادور مشاكل؟

ضرغام: استغفر الله يا ربي ..

جنات: احجيها شبيك ساكت احجي ظلت ع هاي مثلاا، احجييييييها ريح گلبك خاف مضايقتك وخانكتك الكلمة واني مادري

ضرغام: جناااااااااااااااااااااااااااات!

صاح بيه صوت خلاني مصفصفة بمكاني مثل الصنم.

رديت بهدوء كلت امتص غضبه.

جنات: عيونها، تفضل حبيبي

ضرغام: انعل ابو حبيبج لابو الجابه!!!!!!!!

..........

عقاب

رجعت للبيت بوقت متأخر..

كمت اكره البيت واكره طبته.

خالي ما بي حياة، ويتراوالي بي طيوف الناس الاحبهم تودعني..

ينكسر كلبي فوك كسرته واظل اتصفن بحسرتي.

لكيت ورقة معلگة ع باب الغرفة ومكتوب بيها..

" هواي حذرتك تبتعد عنها بس انت مو راضي تقتنع وتبتعد، عبالك دا العب وياك وما اكدر انفذ تهديدي؟!
انتظر عقابك المُـبكي يا عقاب.. "

جريت الورقة، شكيتها وصرخت بألم مخلوط بالعصبية..

عقاب: شسوي يعني شنو هالنارررر يا الللللله!!!!

جريت تلفوني اتصلت ع ريان.

ريان: ها عقاب تفضل محتاج شي؟

عقاب: ريان اسمعني شراح احجي كلش زين

ريان: تمام اسمعك

عقاب: دير بالك ع اخواتك وامك وابوك، خلوا وياكم حرس دوم ولتروحون لمكانات ما عليها عين، حاول تظلون بمناطق بيها انتشار امني كثيف وهواي عالم

ريان: ليش شكو؟ شصاير احد مهددك بشي؟

عقاب: بدون اسئلة، بس نفذ فدوة لعينك وانتبه كلش زين واذا متكدر كلي ادبرلك زلم يحرسون البيت وكل واحد بيكم

ريان: عدنه حرس منحتاج، بس خليت بالي وقلقتني

عقاب: لا تقلق، سوي لكتلك عليه وان شاء الله ميصير شي

ريان: امير اله ايد؟

عقاب: مع السلامة ريان

رد بقلة حيلة.

ريان: الله وياك ..

سديته ورجعت طلعت افتر بالشوارع وادخن والذكريات محاصرتني..

فوكاها القلق والخوف ع الدكتورة دياخذ من حيلي حيل!

...

قسورة

دا اسوي عشا بالبيت واحجي وية ريما بالتلفون.

ريما: شدتسوي؟

قسورة: دا اطبخ جوعان

ريما: ياااي فديت الشيف قسورة

قسورة: هي طماطة وبيض استقري

ريما: لعد شبيها الطماطة وبيض مو اكل؟

قسورة: ديلا ميخالف

ريما: شو جنك دتاخدني ع كد عقلي؟

حطيت الجفجير ع صفحة وحجيت بنفاذ صبر.

قسورة: بدينا اسطوانة النكد اليومي؟

ريما: نكد يومي؟ ليش اني شوكت منكدة وشمسويتلك؟

قسورة: لا سلامتج ممسويه، اني الاسوي ويومية اخلق مشكلة من لا شيئ

ريما: هاي انت تقصدني؟

قسورة: لا حبيبتي دا احجي ع نفسي، ركزي كتلج اني الاسوي

ريما: هاا اي اي، اصلا ولله حبيبي وبدون زعل انت هواي تسوي مشاكل بلا سبب ومادري شبيك تتمزعل ع اقل حجايه حسرة عليه اشاقيك بحجاية

ظليت فاك حلكي هاي البنية كل عقلها تحجي؟؟!
لا ومصدكة روحها ودتصارحني بالمشكلة علساس!

قسورة: رحم الله والديج

ريما: اي فلا تضوج حبيبي، اني متفهمتك بس انت هم ع كيفك وياي هالله هالله بـ ريري

قسورة: صدك جذب تدللين

طفيت الطاوة وحطيتها بصينية عالطاولة وجبت الخبز حتى اكل.

ريما: فدوة لكلبك، شكد متفهم وتحب نتحاور بصراحة

قسورة: واجبي ولو، خ اتعشة وارجعلج

ريما: شنووو؟

قسورة: اريد اكل بعد شنو شنو؟ اكمل واحاجيج

ريما: يعني الاكل اهم من عندي؟!!!! تعوفني علمووووده!!!

فركت وجهي بقلة حيلة..

قسورة: يابة انتِ الروح والرية بس غير اتزقنب لو تريديني اظل جوعان؟

ريما: لا انت واضح مفضل الاكل عليه، عالعموم الف صحة وهنا اني رايحه انامممم

قسورة: يا مصيبة ربي..

ريما: شنو شنووو؟؟

قسورة: دا اكلج تصبحين ع خير

ريما: اتجذذذب؟؟ عبالك ما سمعتك تكول عليه مصيبة؟؟ عبالك اني طرمة ما اسمعك شتحجي موو؟؟

قسورة: طرمة لو صالة

ريما: لا وانوب يحششششش!!!!!

خليت التلفون ع الطاولة وفتحت مكبر صوت.

جبت الخبز كمت اكل واسمع شتحجي وترطن.

ريما: تحشش عليه تضحك ع جروحي؟؟ تريد تجرحني حضرتك تعوفني وتروح تاكل؟؟ لهالدرجة اني ما اهمك ولا اعنيلك شي تعوفني علمود اكل!!! لا وانوب تكول عليه مصيبة؟؟؟ معقولة هالملاك يكون مصيبة!!!

هنا كورت حلكي بصدمة واخذت بعد لكمة افكر بجدية، هاي شتحس؟؟

.....

اماني

بعد مرور فترة~

طلعت من الدوام من وكت لان اخذت اجازة، وصعدت بسيارتي.

اشتريتها بالجديد وعقاب جان معلمني اسوق، فجان الموضوع سهل مجرد طلعت اجازة.

شغلتها وانطلقت للبيت، ميتـة تعب واليوم جان مزدحم وكله عمليات وهوسة المرضى.

عصيت بالازدحام، تأفأفت بضجر..

اماني: بعد ميفض هالازدحادم منا لنص ساعة افف..

فتحت تلفوني الهي روحي بي، اتصلت ريما.

اماني: ها ريري

ريما: وينج مون؟

اماني: بـ .... عاصية بالازدحام

ريما: مو بالمستشفى يعني؟

اماني: اخذت اجازة

ريما: ليش خيرج؟

اماني: تحقيق خو ما تحقيق هو؟

ريما: لا بس استغربت مو من عوايدج

اماني: المهم شعندج اتصلتي شتريدين؟

ريما: مدامج ب.... يعني قريبة عليه، تكدرين تمريلي؟

اماني: تمام بس شعجب شو من وكت ودوامج؟ 

ريما: تحقيق خو ما تحقيق هو؟

ضحكت، ضحكتلي.

اماني: لتقلديني

ريما: دتعالي عليه يلا منتظرتج

اماني: تمام

سديته ولوين يلا مشى السير، طلعت روحي.

وصلتلها ورة تلث ارباع الساعة، لكيتها عالشارع وملامحها مغضبة.

صعدت وكالت بضجر..

ريما: بعد وكت لو جاية باجر

اماني: كتلج ازدحام مو زين وصلت

ريما: لا عيني خلف الله عليج

اماني: تنجبين لو انزلج؟

ريما: اهووو كامت تنعثل، عود شوفوني عندي سيارة ترا اني هم بس اتعلم سياقة اشتريلي وحدة ولا خلفة الله عليج

اماني: دولي نزلي لعد

ريما: من اتعلم مو هسة

اماني: لعد نجبي وسكتي

ريما: الحاجته يم الچلب شيكوله؟!

وسعت عيوني متفاجئة وصحت بيها

اماني: نزلي حيوااانة!!!

ريما: غلط لتغلطين اختي العزيزة

اماني: عزا لعزاج كولي امين

ريما: مو امين

اماني: ريمااااااا!!!!!

ريما: عوفي صخيمة ويلا ودينا لمطعم ...... مواعدة قسورة

باوعتلها بعدم تصديق..

اماني: اكو عقل براسج انتِ؟!

ريما: اي ولله ليش؟

اماني: ما اوديج ولا اوصل

ريما: ترا ما كتلج عقاب، قسورة هذا!

حجيت محذرتها بحدة.

اماني: ريما انتبهي لالفاظج!

ريما: هسة اني شحجيت!

اماني: تعرفين

ريما: تمام اسفة، ممكن توصليني لهناك وبعدها روحي عود اني ارجع وحدي

باوعتلها من فوك لجوة معاجبني، بس هي جانت تتودد بنظراتها..

ريما: ها شكلتي؟

اماني: امري لالله

ريما: اييي من الاول ولتظلين تنعثلين

التفتتلها وكلت.

اماني: تحبين تنزلين؟

ضربت ع حلكها بحركة معناها السكوت.

اماني: هيج احسن

وصلتها للمطعم.

ريما: متريدين تجين وياي؟

اماني: لا ابقوا وحدكم احسن

ريما: لخاطري! ما ارتاح والعالم تظل عيونها علينا

اماني: علساس شلون تهتمين للعالم انتِ، يلا نزلي نزلي

نزلت وراحت وهي معبسة وتباوعلي بغيض، لان ما اجيت وياها.

هو قسورة ماله علاقة، بس اني ماريد اشوفه لان يكوم يتراوالي عقاب واني ماريد افكر بي..

فريت السيارة ورجعت، شفت السينما الي رحنالها اني وعقاب..

كلبي عصرني وضجت اكثر من شفت محل الحلويات الي اشترينا منه..

حسيت الذكريات مثل الزنجيل الحديد وتنلف ع ركبتي وتخنكني..

مشيت لكدام شوية، تعبت عبالك بطارية كلبي خلصت.

ادور الجو حار، واني منا تعبانة اشتهيت موطةة وحلا.

طبكت يم مطعم ونزلت.

طلبت موطة وحلا اللوتس واكلتهن كلهن، طلعت حرگتي بيهن.

من خلصت حسيت بانتعاش وطاقتي ردتلي.

اماني: اممم اطيب شي بالدنيااا

حاسبت وطلعت لسيارتي.

من دا اروحلها لمحت عقاب ووياه بنية، شكلها مو غريب مدري وين شايفتها..

كلبي كام يدك سريع ودموعي تجمعت بعيني.

صعدت بسيارتي وكمت اضرب بالستيرن واغلط عليه..

اخير شي خليت راسي عالستيرن وكمت ابجي..

وكل الطاقة والمحاولات الفاشلة الي اجذب بيها على نفسي واكول تخطيته، طلعت هسة وبينتلي شكد اني احبه ومستحيل اتخطاه بيوم...

اندكت الجامة اليمي، بالاول كلت اغلس لان عيب هسة اذا اشيل راسي يخترع الي ديدك.

مسكارتي سايحة وحال الضيم حالي.

مسكين شنو ذنبه او ذنبها يخترعون بهيج شوفة!!

لح هواي وكام يدك بقوة اكبر.

ضجت بس ظليت مصرة اضم راسي، يعني السيارة بعيد عن مكان العبور ومو يم احد، شعنده هذا لزك لعد؟!!!!

نزيت وكلبي انخمش من سمعت نبرة الصوت ..

عقاب: دكتووووورة!!!!

شلت راسي ببطء شفته!

وسعت عيوني مصدومة وحروفي ضاعت..

دك عالجامة، نزلتها.

عقاب: شبيج ليش دتبجين منو وياج؟

بلعت ريكي ورديت عليه.

اماني: وانت شعليك؟ روحلها للمدام ليظل بالها عليك

رفع حاجبه وكال بشك..

عقاب: المدام؟ يا مدام هاي؟

اماني: الي اجيت وياها هسة شبيك بساع نسيت لو دتغشم روحك؟

ابتسم وحك مؤخرة راسه..

عقاب: هااااااا

اماني: ايي تذكرتها؟

عقاب: هاي مديرة الاستوديو الي تعاقدنا وياها علمود البوسترات الانتخابية، سلمتها حق اتعابها ووصلتها لهنا لان منتظرة صديقة الها

اماني: بس انت نزلت وياها وجنتوا طابين للمحل سوا!!

عقاب: لحت عليه تعزمني فما حبيت افشلها وارفض

اماني: ها..
لميت شفايفي بتوتر.. ورجعت حجيت..

اماني: اي واني شعليه ودتحجيلي وتبررلي؟؟ شتسوي سوي انت حُر بنفسك

عقاب: اعرف ميحتاج تكليلي

اماني: شدتسوي هنا يمي لعد متروحلها مو عازمتك؟

عقاب: خلص انسدت نفسي ماريد لا عزيمة ولا غيرها

اماني: اهاا.. مع السلامة لعد

عقاب: كوني بخير دكتورة.

التمست بصوته شوق وحنية، بس سرعان ما اختفى من كدامي وركب سيارته وراح..

تمتمت لنفسي..

اماني: ضعفاااان حيل ومتغير عبالك مريض..

سكتت بالعة غصتي..

اماني: واني ليش هيج مهتمة، شعليه يضعف لو يسمن ليش بعدني اهتم بي؟!!!

.....

قسورة

جنت كاعد انتظر ريما تجي حتى نتغدة.

اجت بنية شابة سألتني.

-العفو انتَ مو غسان ابن ست كريمة؟

قسورة: لا عيني متوهمة

-ها العفو اسفة

قسورة: لا ولو تصير

-زين شنو اسمك؟

قسورة: عفوًا؟

-اسمك مو غسان، لعد شنو اسمك؟

قسورة: و ليش دتسألين؟

-نتعرف شبيك ضجت

طخت براسي هاي شنو طينتها..

كمت وكفت، خليت ايدية بجيوب بنطروني ورديت بثقة.

قسورة: اني ما احب اتعرف ولا اعرّف نفسي ع احد، توكلي منا حبابه متحصلين شي يمي

-ليش بسلا اخوك الجبير ميقبل ههههههههههه؟

ابتسمت ساخر وتقدمت باتجاهها وكلت بصوت مشمئز..

قسورة: تؤ.. اكره القذارة ما احب ادنالها .. اقرف منها

احتدت ملامحها بكره.

سمعت صوت ريما، التفتت عليها شفتها تباوعلنا و تصفك.

ريما: الله خوش مسرحية هاي، شتحب نسميها عشق المطعم لو حب من اول عزيمة؟

ضحكتلها ورديت باوعت لهاي الكدامي، خزرتها واشرتلها تروح.

عافتني وراحت شايطة غضب.

اجتي ريما مثل الاعصار تغلي..

ريما: تعزمني اني وحبيباتك بنفس المكان؟ شنو من قابلية عندك انتتتت؟؟!!!!

قسورة: صوتج لج!! كعدي خلي الغي

ريما: لا اكعد ولا تلغي، باي ويفضل لو متخابرني او تحاول تتواصل وياي بعد!!!

رادت تروح كمشت ايدها، جرتها مني بس ثبتتها بقبضتي كلش زين.

ريما: شيلللل ايدك عنييي!

قسورة: صمي حلكج وكعدددي الموضوع مو مثلما فهمتي!!

ريما: قسورة لتخليني اطلع خبالاتي عليك هسسسسة، عوفني كتلك!!!

قسورة: لج بابا هاي وحدة هيلك، صارلها ساعة تزلغ بروحها واني لابسها!!!

ريما: واضح كلش لابسها، ولا جنك عوزك اصبعين بعد وتلزك بجهرتها!!!!

ابتسمت بحب من شفت غيرتها..

قسورة: تغارين ولج؟

ريما: اكيد لا بس ما احب احد يستغفلني!!

قسورة: عليه ولج غير كلبج راح يوكف من الغيرة دباعي روحج حمرة طماطة

ريما: من العصبية مو من الغيرة

قسورة: زين اجي وياج، العصبية شنو سببها؟

ريما: قسورة عوفني كتلك

ضحكت وجريتها كعدتها.

رادت تكوم، خليت ايدي ع جتفها ثبتتها.

قسورة: كافي فضايح، العالم عيونهم علينا كعدي عاد فحطتيني

ريما: مشكلتك هاي، وها لا عبالك عبرن عليه سوالفك ترا ما صدكتك وهسة تكلي منو هاي الصخلة وشعندك وياها!!!

ضحكت بصوت عالي ع كلمة صخلة.. البنية صح ملطلطة بس جانت جميلة بشكل! 

والاخت هنا تكول عليها صخلة، لا واضح ابد ما غيرانة!

قسورة: صخلة؟ حرام عليج حبيبي

ريما: ها ظلمت الصخلة مو؟

كوة لزمت ضحكتي، مو طبيعية هالبنية ولله.

قسورة: اي اي

ريما: ديلا لعد، كلي شعندك وياها

قسورة: مو كتلج هي زحفت!!!

ريما: شكلتلك؟

تنهدت وحجيتلها كلشي من الالف للياء.

شو هاي زادت عصبيتها ما نقصت..

ريما: يعني انت مكيف بروحك تجاوبها؟ ليش ما لبستها جان عرفت روحها ممرغوب بيها وولت؟ ليش تكبر راسها وتحجي وياها هسة عبالها بيك مجال!!!

نترت بيها.

قسورة: هووووب لج!! مجال شنو شو كمتي تجفصين!

ريما: لا تدقق كلش، لو بمكاني متضوج؟

قسورة: اضوج طبعا بس ما اذب الصوج بيج مثلما دتسوين هسة بيه، اعرف ان الطرف الثاني هو الما بي حظ!

سكتت شوية وردت..

ريما: تمام اني اسفة ما قصدي اذب الصوج بيك، بس ما تحملت اشوفك ويه وحدة غيري، صخنت وكلبي اجة يوكف

قسورة: فدوة للتغار، اسم الله ع كلبج حبيبي

ردت مستنكرة.

ريما: ومنو كلك اني اغار؟

قسورة: لعد ليش صخنتي وضجتي من شفتيني احجي وياها، غير تغارين؟؟

هزت راسها بلا.

ريما: لا عيني اني ضجت ع روحي، كلت انغبنت وانطعنت بظهري ما غرت عليك

قسورة: متاكدة بس هيج؟

ريما: طبعا لعد شنو

قسورة: هاهيه

درت وجهي عنها كوة ضام ضحكتي وهي متوترة ووجهها ينطي الوان.

ادري لهالدرجة صعبة تكول اغار عليك!

لو هم لازم تشلع كلبي يلا تكولها مثل كلمة احبك؟!!

قسورة: ابو الشباب، ممكن المينيو

-صار تدلل

باوعتلها وضحكت..

....
عقاب

بعد مرور كل هالفترة بدون اماني ..

اتضحلي انو خسارتها متقل الم عن خسارة اهلي.

لا بل الم فراكها اقوى، لانها كدامي وما اكدر اوصللها.

هواي مرات اسمع قسورة يحجي وية ريما واضوج..

لان اعرف هو وياها نهايتهم مثلنا اني واماني بس موضوعهم يحتاجله شوية وقت بس وتجي نهايته المتوقعة..

من جنت رايح وية المصورة التفتت بالغلط شفتها دايرة وجهها وجنها دتبجي، ادور صعدت سيارة وكامت تضرب بالستيرن والواضح عليها معصبة.

اترخصت من البنية ورحت وكفت قريب عليها.

انتبهتلها دتبجي، كلبي كام يدك بسرعة وبالي كلش انشغل عليها.

شنو سبب حزنها وليش هيج دتبجي؟

بين الخطوة والخطوة كلبي يكول اي وعقلي يكول لا.

وظليت متردد اروح احاجيها لو لا؟

لحد ما وبطريقة عجيبة لكيت نفسي يمها دا ادك جامة سيارتها.

نفظت افكاري ورجعت للواقع..

وبين كومة الشغل والامور المستعجلة الي لازم تتنفذ بسرعة بسبب قرب موعد الانتخابات، عقلي يسولفلي بيها.

حليانة هواي ومشترية سيارة يعني معتمدة ع نفسها..

صافن وحاط ايدي ع راسي افكر بالي ديصير..

التهديد مال امير ما نفذه، وصارله فترة مختفي.

يا رب يكون اختفاءه ع خير وميكون هو الهدوء الي يسبق العاصفة!

صفنت شوية اكثر..

وتذكرت من كلتلي الدكتورة ان شاء الله تلكه ضوة روحك من صدك بس كون تبقى وياها للنهاية، حسيت بروحي شكد تافه ومنحط..

اي نعم اني انجبرت اتركها بس شعور الدونية الي دا احس بي دمرني!

ورغم ان الموقف مر عليه هواي بس لسة يرن ببالي كأنه شريط ومشغليه بنص عقلي.

دك تلفوني، الحجي.

استغربت شكو بهالوقت يخابر مو من عوايده.

عقاب: ها يابه خيرك؟

الحجي: مصيبة ووكعت ع راسنا عقاب.. مصيبة!!

عقاب: شكو خوفتني ترا يابةة!!

الحجي: تعال لبيتـي خلي نتفاهم

عقاب: جايك جايك..

اماني : كاذبٌ من قال أن البُعد يقتل الحب! فـبعدك عني لم يزدني سوى شوقًا لك..

عقاب: اعلم ذلك جيدًا، أنه يزيد لوعة الحُب لذة لا غير ..

اماني: أذن، هل ما زلت تحبني؟

عقاب: أيجوز السؤال حتى؟ أينسى القمر وقت ظهوره؟ أم هل يتخلى الأب عن حُب صغيرته؟

اماني: افهم بأنك ما زلت تحبني!

عقاب: اجل.. سأحبك حتى الأبد يا ضوء روحـي..

-بقلم: نورمين

....

انتهى!

لا تنسوا التصويت والتعليق 🦋🖤

#الكاتبة نورمين