#خطأ_طبي «عقاب الاماني»
بقلــم : نورمين 🖤🦋
...
ريان
عالعشـا، جنة كلنا كاعدين دناكل بهدوء.
اوضاع البيت تحسنت وراح الجو المكهرب مال قبل ..
كلمن لشغله ودوامه، يرجع ياكل وينام لو يطلع ويرد للبيت.
ماما وبابا خففوا ضغط ع اماني لان شافوها هي تريد تبتعد عن عقاب.
اما اني، وضعي وية شمس بعده ع حاله.
ريان: يعني خلصتوا تحضيراتكم كلها؟
رياض: اي وان شاء الله الاسبوع اليجي تتم الانتخابات ع خير
ريان: خير ان شاء الله
ماما تنهدت وردت ..
سما: اخيييييرا الف الحمدلله يارب
ريما: شو عبالك انتِ المرشحة مو بابا
سما: غير روحي طلعت بشغله ومشاغله لتوالي الليل
ريان: لا هنا الحجي يختلف ..
انداريت ع بابا غمزتله وكتله بمرح..
ريان: ها يابة نكول عالخير؟
جنت كاعد بصف ماما، مادري شون اجتني الكفخة افتر راسي.
ريما: تستاااااهل وحيل بيييك هههههههههه
اماني تضحك بهدوء، بعد الي مرت بي صارت انسانة هادئة كلش.
ريان: هاي ليش هيج يمه حتى اذني كامت تطن
سما: حتى متحجي هيج حجي ماصخ
ريان: حتى الشقة ممنوع بهذا البيت، يابة احجيلك حجاية مو من وراك انضربت!
رياض: دسكت لا اجيبك براجدي ثاني
ريان: حتى انت!!!!!
رياض: رايي من راي امك، لا تشاقة وية ابوك مو صاحبك اني
باوعتله بضجر، ولله مو صوجكم..
ريان: تدرون شنو، مو صوجكم صوجي اني اريد اضحككم شوية
كمت عن الاكل وهم مصدومين.
ما ادري اذا اني صاير اتحسس زيادة عن اللزوم او هم فعلا ديبالغون بردود فعلهم المحبطة!
طلعت بالحديقة اتمشى وتذكرت شمس..
اول مرة شفتها بالتطبيق..
جنة ثاني اسبوع دنداوم بالمستشفى، رحنة للدكتور المسؤول حتى نسجل حضور.
جنت اني وولد ثنين اصدقائي.
طبينا لغرفته، لكيناها دتحجي وياه.
ريان: عفوًا استاذ، احنه ننتظرك تكمل ونرجع
-لا باباتي تفضلوا تفضلوا
طبينة كعدنه ع جهة وهي كاعدة بالكرسي المقابيل مكتبه وتكوله.
شمس: اي دكتور فدوة لعينك جانت حالة مستعجلة ومكدرت اداوم، الاسبوع كله وياها
-عادي باباتي مو مشكلة، اهم شي الوالدة شلونها صحتها تمام؟
شمس: اي احسن بهواي الحمدلله
-يلا لعد سهلة
جنت صافن بيها، تحجي وتستخدم ايديها بالتأشير وهالحركة تعبر عن انفعالها.
اضافة لتوترها وتلكؤها بالكلام، شكلت بنفسي فد علامة تعجب وخلتني مشدود الها.
شعرها تمرّي مموج وبي خيوط شكار خفيف، مميز ولونه غريب ماعرف اذا طبيعي او هي هيج صابغته بس عجبني.
شوكت تلتفت حتى اشوف شكلها شلونه!!
لحظات واستوعبت ان الدكتور ديحجي وياي، وهي ملتفتة عليه دتباوعلي..
-ريان اريد منك تاخذ زميلتك تدليها بالردهات وتعلمها شنو اخذتوا بالاسبوع الراح وتساعدها تكمل نقوصاتها وياكم
بلعت ريكي بتوتر، نظراتها عادية بس اني مدري شجاني توترت، وحرت اجاوب الدكتور لو اتمعن بيها.
ريان:اااا اي.. اي دكتور سهلة
ابتسم وكللها
-تكدرين تروحين وياه هو يفهمج لان ريان طالب ذكي
شمس: تمام دكتور شكرًا لتفهمك
- واجبي هذا
كامت وصديقي محمود كال.
محمود: دكتور اجينه عالحضور
- هاا اي اي همزين ذكرتني، تعالوا وقعوا، وشمس انتِ هم تعالي وقعي
رحنه وقعنا وهي جانت واكفة اخر وحدة بينا.
كملنا يلا تقدمت وقعت.
-شمس توفيق رعد مو؟
شمس: اي نعم
انصدمت، هاي شمس الصغيرونة هيج كبرانة وصايرة حلوة، اخر مرة من شفتها مجانت هيج ابدا!! كلش كلش متغيرة.
-دكتور توفيق عضو حزب .... شيقربلج؟ والدج مو؟
حسيتها ارتبكت، هزت راسها بتوتر.
شمس: اي والدي
-اهاا جيد جيد، يلا براحتكم شباب
طلعنا واخذتها ويانه.
الولد راحوا ياكلون بالكافتريا لان ممتريكين.
وظليت اني وياها.
دليتها بالاقسام الاستشارية والباطنية، النسائية والرجالية وشرحتلها شنو اخذنة بالاسبوع الفات بشكل مختصر.
شمس: شكرا هواي، تعبتك ويايه اليوم
ريان: لا عادي تدللين
ابتسمت بخفة وسألتني..
شمس: عادي تنطيني ملاحظاتك الكتبتها؟
ريان: اي عادي.
شمس: شكرا
ريان: عفوا بس انطيني رقمج
فتحت تلفوني وحجيت بتلقائية، شو شلت راسي هاي جنها خازرتني مدري شبيها..
شمس: ياريت تحترم نفسك
ريان: عفوًا اني شسويت؟
شمس: الدكتور طلب منك تساعدني بحكم انك طالب متفوق عنده، مو تجي تستغلني وتطلب رقم تلفوني بكل وقاحة، ولله شنو ساعدتني وشرحتلي كم موضوع!
انصدمت بانفعالها وعصبيتها، وكلامها وطريقة تفكيرها ضحكتني، مدري شلون لكيت نفسي مبتسم بسخرية.
ريان: سويتيها دراما شطولها شبيج؟
شمس: اذا الموضوع بالنسبة الك دراما، فهو بالنسبة الي لا والف لا، وشكرا ماريد منك شي بعد احتفظ بملخصاتك وملاحظاتك لنفسك!
راحت بس ركضت صرت كدامها سديت طريقها.
ريان: هوووب هووب يمعوده
شمس: وخرررر شدتسوي!!!
ريان: انتِ الي شبيج؟ طلبت رقم تلفونج حتى ادزلج المحاضرات والملاحظات بشكل ملف لان اني اخذلهم صور واجمعهم بشكل ملفات بجهازي هم والشرح الخاص بيهم
شمس: صدك تحجي؟
ريان: لعد شعبالج ميت عليج مثلا واطلب رقمج؟
شمس: اااا لا .. بس صدمتني واني ما اعرفك ففهمتك غلط
ريان: مو مشكلة، اني هم جان لازم اشرحلج الموضوع حتى تفهميني صح
شمس: بس انت ليش تستخدم التلفون؟ ليش الاوراق والملازم بشنو مقصرة وياك؟
ضحكت وخليت ايدي بجيوب الصدرية الطبية.
طولها مقارب لطولي بشوية، فوكفتنا سوة مستقيمة ولطيفة.
ريان: ما احب الملازم، لان ما احب اشيل وانكل بيهن، التلفون وياي بكل مكان وملازمي كذلك
شمس: جديدة هاي
ريان: عصر التكنولوجيا بعد
ابتسمت.
ريان: هسة تنطيني رقمج لو لا؟
خزرتني، رديت موضح بانفعال.
ريان: للملاحظات شبيج مو تريديهن!!
اختفت خزرتها وتحولت لابتسامة، ابتسمت وياها.
شمس: جيب تلفونك
انطيتهيا، سجلت رقمها ودكت.
طلع رقمي يمها، رجعتلي تلفوني.
وراها، بنهاية الدوام من دنطلع.
شمس: شكرا الك ريان، تعبتك ويايه اليوم كلش
ريان: لا تدللين غير بنت عمو توفيق انتِ
ردت باستغراب..
شمس: وانت منين تعرف ابوية؟
ريان: اني ابن دكتور رياض
شمس: عمو رياض الرحمن ابوووك؟!!!!
ابتسمت وهزيت راسي بالايجاب، وسعت عيونها مصدومة بفرحة.
الظاهر تعرف ابوية وتحبه هم!
طلعت من ذكرياتي لهاليوم وكعدت يم الورد.
تنفست بعمق وببالي الف شغلة ..
وبين هالوقت، سمعت صوت شي انشمر عالبيت من ورة السياج ووكع بصفي!
باوعتله بتردد، كلت خاف عبوة شو شنو لان بهالفترة اكو تواجه سياسي حاد وية بابا.
شفته طابوكة ملفوفة بورقة ومحطوطة بجيس صغير..
فتحتها، جان اكو رصاصة بالجيس!
عكدت حواجبي بصدمة، معناها تهديد بالتصفية!!
وخرت الورقة عن الطابوكة وقريت المكتوب..
" تلقى وعدك دكتور "
ومكتوبة بدم والورقة ملطخة بي، عقلي كام ميربط وخفت ع ابوية كلش.
رجعت للبيت وضميت الورقة والرصاصة بجيبي، والطابوكة شمرتها.
ريان: بابا وين؟
جانت ماما وريما كاعدات.
سما: شبيك ماما شو معصب؟
ريان: ما بيه بس كليلي بابا ويييين؟؟!!!!
ريما: بابا بغرفته يريد يطلع للحجي
هي كالت هيج واني ركضتله وكلبي يمشي قبل رجليه يريد يوصله.
وية موصلت لغرفته، فتحت الباب وطبيت چفت ظل يباوعلي متفاجئ.
اخذت نفس وتقدمت منه.
رياض: شبيك بابا؟
طلعت الورقة والرصاصة من جيبي، عكد حواجبه ..
رياض: هايشنو ذني؟؟ ريان مو وياك؟
فتحتله الورقة، اخذها قراها وغمض عيونه متنهد.
خليت الرصاصة بأيده وسألته.
ريان: هذا شنو؟ بابا انت بشنو متورط وليش ديهددوك؟؟!!
رياض: سالفة طويلة حبيبي واني هسة مستعجل اريد اطلع
رديت بانفعال.
ريان: ماكو طلعة متطلع!!!!!!!
رياض: نصي صوتك ليسمعن امك وخواتك!!!
ريان: منو الي ديهددك احجي؟؟ وليييش؟؟ سنين انت بالسياسة شو مصار هيج وياك شمعنى هسةة؟؟
رياض: الموضوع جبير حبيبي، ومو من اليوم لا هذا من سنين بس اني ضامه عنكم وجنت مسكتهم!
ريان: موضوع ايش؟ والمن انت مسكت؟؟ شدتحجي بابا شكووو!!!!
تنهد وجاوبني جواب، خلاني مصدوم صدمة عمري!!
.....
عقاب
ما صدكت شوكت اوصل لبيت الحجي.
نزلت لكيت سجاد وقسورة وليث موجودين.
عقاب: شكو شصاير شبي الحجي؟!!!
قسورة: لك انهبنا علنييي!
عقاب: شنو انهبت شكوو؟
سجاد: بايكين مخزن الاسلحة كله
وسعت عيوني بصدمة..
عقاب: جذذذذب!!!!
سجاد: ولله والحرس كلهم ميتين ومندري شنو ولا منو
عقاب: هاي شوكت ومنو اله مصلحةة ويانه يسوي هيج؟!!!
ليث: قبل شوية لان سامعين دوريات رايحة لهناك، والحجي يعرف منو وراها يمكن لان ما استغرب ومعصب جنه يدري
عقاب: وانتوا ليش واكفين هنا متفوتون جوة؟
قسورة: فلتت لان صاير اعصاب وكلت خاف يطلع حرگته بيه
سجاد: اني مثله
ليث: واني هم
عقاب: لا هايهيه، دوخروا.
هزيت ايدي وطبيت.
سلمت ع الحجي وكعدت.
عقاب: ها يابه شنو هالحجي لسمعته صدك عود؟؟؟
الحجي: للاسف اي..
عقاب: منو وراها لهالسالفة؟؟ منو اله مصلحة يسوي هيج وياننننه؟
الحجي: هو واحد ماكو غيره
عقاب: قصدك امير؟
الحجي: الراس الجبير، توفيق!
عقاب: وهذا الفارغ هم تصدك يطلع منه هيج شي!! ما اتوقع
الحجي: لعد منو ماكو غيره عدنه عداوة وياه!!
عقاب: تبين تبين.. الا كلي ماكو واحد من الحرس عايش؟
الحجي: ماعرف، دزيت ضرغام وشاهين يشوفولي الوضع ويكلولي
دك تلفون الحجي، رد عليه.
الحجي: ها رياض وين صرت؟ ليش متجي؟ هاا لعد انتبه وباجر الصبح اني امرلك انت هم لازم تختفي فترة، اي اي يلا مع السلامة
سده، سألته بفضول.
عقاب: شبي انوب رياض؟
الحجي: هذا هم سالفته عويصة، اففف شلون كراوي تعبانة دتجيييي!!!
عقاب: خير يابة شكو شو اني مدا افتهم!
الحجي: عقاب دكتور رياض متورط بقضية تجارة اعضاء وادوية منتهية الصلاحية وديضغطون عليه بسببها
انصدمت، معقولة هذا الانسان النزيه ايديه ملطخة بدم بشر تحت مسمى تجارة الاعضاء؟!!!!
وفوكاها يبيع للعالم ادوية تضرهم ما تنفعهم!
عقاب: لا بلا هاي من شوكت!
الحجي: من زمان كلش، وجان يدفع فلوس لهاي الجهة حتى يسكتهم بس هسة تمردوا عليه وبدوا يطلبون مبالغ اكبر، من رفض ينطيهم الي يريدوا بدوا يهددوا
عقاب: استغفر الله حتى هذا الي عبالي نزيه هم طلع فاسد!!! لا وتجارة اعضاء بشرية؟؟ هه .. عيش وشوف
الحجي: كلمن وميدانه، احنه مو احسن منه ترا
عقاب: شلون مو احسن منه؟!!! يابة احنه وين وهذا وين!!!
الحجي: وتجارة السلاح؟ نسيتها شو
عقاب: يابة احنه نهرب اسلحة ما نقتل بشر وناخذ اعضاءه!!
الحجي: المبدأ واحد وهو السرقة
عقاب: لا ابدا مو صح، سرقة عن سرقة تختلف، ع الاقل احنه دنشتري بفلوسنا اسلحة ونهربها لدول ثانية
الحجي: مو هذا موضوعنا هسة، خلينا بمصيبتنا الدفعة كلها انمسحت مسح مالها اثر واحنه مطالبين نسدد فلوسها!!
عقاب: اكوم اشوف شكدر اسوي واردلك خبر
الحجي: تمام وبالك ع نفسك وليدي
عقاب: بعيني يابه انت هم بالك ع نفسك وخليك مختفي هالفترة، تعرف الانتخابات اقتربت وديسوون بلبلة
الحجي: نشوف شيصير
عقاب: يلا لعد، اودعناكم
طلعت بعدما كلت للولد شسولفلي.
قسورة وليث رادوا يجون بس اصريت عليهم يظلون يم الحجي.
الجهة المجهولة هاي الي نفذت هالاعتداء مو خالية، واكيد تعرف بيمن اندكت فالشغلة بيها النة!
ما اتصور توفيق اله يد بالموضوع لان هذا فد واحد جبان.
بس امير؟
شنو مصلحته يخرب شغل الحجي؟
مشكلته وياي اني!
دكيت ع ارقامه الي جان يخابرني منهن ماكو كلهن مغلقات.
هو اني ادري بي يستخدم الرقم مرة وادور يشمره بس كلت اجرب حظي بلكي.
وصلت للمخزن بعد ساعة ونص كاملة سياقة لان المخزن باطراف بغداد.
شفت ضرغام وشاهين ووياهم شباب من جماعتنا دينقلون الجثث.
انعصر گلبي ع منظرهم شلون ممدودين بالكاع وكلهم ميتين..
تقدمت الهم شافني ضرغام اجة.
ضرغام: ها حبيب
عقاب: شنو الاخبار؟
ضرغام: مو زينة كلش
عقاب: والولد؟
ضرغام: عشرتهم ماتوا، محد بيهم ظال بي نفس ..
عقاب: لا اله الا الله..
تنهدت وانداريت بعيد عنه.
اختنكت حيل، كلهم اعرفهم وعلاقتي بيهم طيبة.
الي بيهم عنده عائلة والي متزوج والي خاطب والي والي..
طكت روحي اني كلشي ولا الظلم اتخبل منه!!!
اعصابي نطت بغضب، رجعت للمخزن طبيت كلبته كلاب ادور دليل صخام اي شي.
شاهين وضرغام جانوا يكلولي دورنا قبلك ملكينا شي.
ويريدون اطلع بس ظليت مغلس اريد اشوف شكو كلبي حاسني اكو شي مهم هنا رح الكاه!
وفعلا، ورة شوية لكيت كارت واكع لجوة، تابع لمحامي معروف اسمه "صلاح مهيمن جبر"..
ضيقت نظراتي محاول اتذكر هذا منو وين سامع اسمه وييين..
تمتمت بتفكير.
عقاب: وين سامع باسمك؟ صلاح مهيمن جبر.. وين وين ويييين..
هذا المحامي داخل بسلك السياسة وعليه شبهات فساد والتفاف ع القانون هواي.
اخذت الكارت وطلعت لبرة امشي وامرر بي ع لحيتي بتفكير..
ضرغام: هذا شنو شمكتوب عليه؟
عقاب: المحامي صلاح مهيمن جبر ..
شاهين: اي واذا؟ مو شرط الي نفذوا الهجوم تابعين اله، يجوز الكارت لواحد منهم او لواحد من ولدنا و وكع منهم بالغلط والرجال المحامي لا بيها ولا عليها و ماله علاقة بيهم اساسًا
ضرغام: وجهة نظر!
عقاب: تؤ تؤ تؤ..
شاهين: لعد شنو؟
ابتسمت بسخرية، عرفته!
اخيرا تذكرت وين سامع بأسمه!!
انداريت عليهم وكلت بترقب..
عقاب: تعرفون هذا منو؟
شاهين: لا منو؟
ضرغام: لا ماعرفه، منو؟
ابتسمت بثقة ورديت.
عقاب: محامي قحطان الكلب!!
ملامحهم تغيرت بصدمة..
ضرغام: قحطاان؟؟ شنو مصلحته ويانه مو انسجن؟!!! لو هم منخلص من سمه!!!!
شاهين: ومحامي قحطان هيج سبع يندك بينه؟!
عقاب: من ورا هالدكة، الواضح كلش سبع
ضرغام: اموت ع الثكيل
عقاب: اني هم صاحبي.. اني هم!
...
اماني
بالليل، كاعدة اكلب يوتيوب واسمع محاضرات تنمية بشرية احاول اغير من نفسيتي.
اجتي ريما.
سولفتلي شصار وياها وية قسورة.
اماني: وهاي انتِ فضحتي فضيحة بدون متفتهمين؟!!
ريما: شفتهم الله يخليج شفته طاب بوجهها وعقلي طار
اماني: بس غير تسألي اول مرة تفتهمين شنو السالفة!
ريما: ولله عاد اذا انتِ تنتظرين توضيح شفهي، اني ما انتظر اطب چفت وشيصير خ يصير
اماني: تظلين طول عمرج خبلة
ريما: ديلا هسة لو هاي انتِ وشفتي عقاب لازك وجهه بوجه وحدة شتسوين؟
طاريه خلاني اتوتر..
اماني: واني منو حتى اسوي او ما اسوي، ما الي علاقة عسى ما مكعدها بحضنه
حجيت بحزن فهي هم سكتت.
اخذت نفس وحجيت بهدوء.
اماني: تدرين شفته اليوم ورا ما وصلتج
اجت كعدت كدامي وردت بتفاجؤ.
ريما: جذذب!!! وشصار
باوعتلها ورديت ببساطة ..
اماني: جانت وياه وحدة..
ريما: منو هالوحدة؟
اماني: شمدريني كال ام الاستوديو مدري شنو
حجت بصوت عالي وبانفعال .
ريما: ليش انتِ حجيتي وياااااااااا؟؟؟؟؟؟؟
اماني: نصي صوتج ولجج
ريما: اا.. اسفة نصدمت، كوليلي شحجيتوا؟
اماني: محجينا شي مهم.
ريما: ميخالف حتلو مو مهم احجي رح اطك
سولفتلها شدار بيننا من كلام وشلون جنت ابجي..
تعاطفت وياي وكالت.
ريما: وهسة انتِ بعدج ضايجة، شلونج؟
اماني: مادري ريري، صار فترة كلش طويلة واني مو زينه، احس نفسي بس جسم وروحي مسلوبة مني
ريما: انتِ تدرين بيه احبج واريد مصلحتج مو؟
اماني: ادري بس انتِ تجفصين وتعبرين حدودج حيل
ريما: شسوي غير خايفة عليج، بعدين صدكيني هيج حب كله مشاكل مينراد مراح تكونين سعيدة وياه
اماني: ع حجيج هذا، انتِ وقسورة مصيركم مثلنا؟
ارتبكت وملامحها تغيرت..
ريما: لـ... لييش؟ احنه شكو شعلينا بيكم؟
اماني: ماريد اضوجج بس ترا قسورة وعقاب نفس الطبع ونفس الشغل، والخطر واحد عندهم
ريما: يعني شنو؟!
اماني: يعني احتمال اذا طلبج من بابا هم ميوافق، واذا وافق وتزوجتوا فما استبعد قسورة يطلكج بحجة مصلحتج
ريما: بس قسورة مو من هالنوع!!! مستحيل يتركني ميسويها
اماني: عقاب هم مو من هالنوع بس سواها!!
ريما: مون عفيه لا لتحجين هيج..
حجت بحزن ودموعها غرغرت بعيونها..
اماني: لعد شلون انتِ تحجين وياي اضرب من هالحجي وتكولين لمصلحتج؟ شنو احساسي من انتِ واهلي والدنيا كلها واكفين ضدي وكلكم تكلولي انسي وابتعدي عنه واتركيييي؟ حسيتي بأحساسي هسة ريري؟
دنكت راسها ولعبت بأصابعها وكالت بنبرة مليانة ندم ..
ريما: اني اسفة .. اسفة كلش مون
اماني: لا تتأسفين، يكفي عرفتي غلطج وين
ريما: اي اي وبعد ما اعيدها ولله
ابتسمتلها، ضحكت من بين دموعها وحضنتني..
مصيبة الاخت، لو تدوس ببطني هم ماكدر ازعل منها.
ورة وقت، سمعنا صوت صياح قوي برا.
طلعنا اني وريما نركض.
لكينا ريان واكف بالباب ميخلي بابا يطلع وماما بيناتهم تريد تفتهم شصاير.
وبابا يعيط ع ريان وكلشي ما افتهمنا.
ريان: يابة كتلك متطلع!!!!
رياض: ريان كتلك وخر ليش تخليني امد ايدي علييييك!!!!؟؟؟
ريان: بس تطلع احجيلهم كلشي!
اني وريما وحدة باوعت للخ وماما سئلتهم.
سما: شتحجي شعندكم رياض؟؟ وين تريد وليش ميخليك ريان تطلع احجيي!!!!
بابا مثل الي لزموه من ايده التوجعه، محجة شي بس خزر ريان وصعد لغرفته.
ماما ظلت تحجي وية ريان تحاول تاخذ منه حجي بس عبث.
سما: احجي ماما ريان شبيكم انت وابوك ع شنو ردت تحجي؟!!!
ريان: ماكو شي ماما ليظل بالج هيج شغلة بسيطة
سما: عليمن تضحك انت؟ بسيطة، وكل هالعرك والصوت العالي المن لعد؟!!!
ريان: كتلج ماكو شي لتلحين عاد!
عافنا وصعد لغرفته هو هم.
سما: بسيطة ريان تبين خو ما تظل مضمومةةة!!
غلس و حتى مدار وجهه علينا.
راح وظلينا وحدة صافنة بوجه اللخ ندور ع اجوبة تشفي غليلنا وترضي فضولنا.
ورة شوية، غافلت ريما ورحت لريان.
دكيت الباب ع كيف، رد بهدوء.
ريان: تفضل
فتحت الباب ومديت راسي منه وكلت بأبتسامة
اماني: تستقبل ضيوف يحلو؟
ريان: اذا تظلين تسألين مثل امج لتجين، راسي انفخ منها هستوها تعبت وراحت، مو ادور عليه انتِ!
سديت الباب وطبيت كعدت يمه.
اماني: لا صدك هو شكو شبيكم انت وبابا؟
ريان: مون مالي خلكج ولله، طلعي خ انام
اماني: يعني مُصر متحجي شي؟
ريان: اي
اماني: متاكد؟
ريان: اكيد ومتحصلين مني شي ابد
اماني: زين بس كولي الوضع خطير؟
ريان: نوعًا ما
اماني: اففف شوكت نرتاح احنه من سالفة لسالفة يربي!!!
ريان: هاي بعد
تنهدت بقلة حيلة، ظل بالي شنو من مصيبة منتظرتنا ادور؟!
........
عقاب
رجعت للبيت ورة مشوار.
ذبيت السويج ونزعت القميص وطبيت سبحت.
تعبان حيل وبالي ما دا يصفى من مصيبة لمصيبة!
طلعت ولفيت الخاولي ع خصري.
نشفت شعري بخاولي صغير ووكفت كدام المراية.
باوعت لروحـي متنهد ..
تذكرت من جنت اطلع بالخاولي وتخجل الدكتورة وتكلي لتطلع هيج..
مفتقدها حيييل يـربي..
لبست تراك وكعدت، دك التلفون وريان المتصل.
فتحت خط وكتله.
عقاب: الوو
ريان: شلونك عقاب شخبارك
عقاب: الحمدلله انتوا شلونكم شخباركم؟
ريان: بخير، حاليًا ع الاقل ..
عكدت حواجبي ورديت بقلق.
عقاب: ليش صاير شي؟
ريان: عقاب اجانة تهديد
كلبي انقبض ورديت بأنفعال..
عقاب: تهديد شنو؟؟؟ الدكتورة شبيها شعندهم وياهاا؟!!!
ريان: مو اماني، هددوا ابوية
عقاب: شلون احجي ريان شبيك تنكط عليه تنكط!!!!
سولفلي ظليت مصدوم.
ورئسن عقلي ربط سالفة الحجي مال تجارة الاعضاء والادوية منتهية الصلاحية!
بس مكتله شي، وهو ما ذكر غير التهديد.
ريان: وهذا الصار
عقاب: باجر الصبح احنه يمكم اني والحجي ونتفاهم اكثر
ريان: تمام بس عندي سؤال
عقاب: تفضل
ريان: من حذرتني ذاك اليوم وكتلي ديربالك ع اهلك، جنت تقصد هاي الجماعة مو؟ جنت تدري بيهم ديمشون ورانا؟
عقاب: هاا لا.. مجرد اجراء احترازي لان الوسط متوتر
ريان: اهاا
عقاب: اي يلا مع السلامة يابة
ريان: الله وياك
حسيته ما مقتنع، بس يلا شسويله مالي خلك احجيله شي هسة.
تمددت وبين زحمة افكاري ومن كثر التعب غفيت.
ثاني يوم.
بدلت وطلعت لبيت الحجي، اكو طاقة غريبة عندي.
يمكن لان عندي امل اشوفها!!
بالطريق خابرني قسورة.
قسورة: صباح الخير حبيب
عقاب: صباح النور
قسورة: وين صرت حبيب
عقاب: بالطريق جايكم
قسورة: لا لتجي، اطلع لبيت دكتور رياض بوجهك
عقاب: تمام
سديته وفريت السيارة.
وصلت لهناك، نزلت لكيت سيارة الحجي موجودة وقسورة هستوه ديطبكها برا.
عقاب: ها ولك
قسورة: ها ها ها
عقاب: ووجعا امشينا
عقاب: يلا يلاا
مشيت وياه طبينا لجوة، تلكانة ريان.
ريان: هلا بالشباب شلونكم
عقاب: الحمدلله
قسورة: بخير انت شلونك
ريان: ماشية، كاعدين بالحديقة برا
عقاب: اي نروحلهم
هز راسه ومشى كدامنا، لحكناه.
قسورة جان يباوعلي بنظرة شكو لان ريان كالب خلقته.
اشرتله بمادري، سلمت ع رياض بس سلامنا بارد.
كعدنا نحجي بالموضوع، وهو نفسه الي الحجي حجالياه.
بس هالمرة بدة يحجي بتفاصيل اكثر وتواريخ.
الحجي: والتهديد اكيد منهم
رياض: اي لان البارحة بالليل خابروني رادوا نتفاهم بس استاذ ريان وكفلي وما قبل اطلع
عقاب: زين يسوي، شلون ردت تروحلهم برجليك وهم يريدون يكتلوك؟؟؟
رياض: نتفاهم احسن مما تظل الامور هيج
عقاب: خوش اسلوب تفاهم، والدليل البارحة انطوك رصاصة تلوك لهالحلك
رياض: عقاااب!!
خزرني الحجي سكتت.
درت وجهي لمحت الدكتورة واكفة تباوعلنا من شباك غرفتها.
نظراتي استقرت عليها وهي هم ظلت شوية تباوعلي وبعدين وخرت..
حسيت روحي العطشانة شوق الها ارتوت بشوفتها، حتلو من بعيد ميخالف..
رجعوا يسولفون بس بالي مو يمهم ابد.
بالي وعقلي وكلبي كلهن راحلها بحيث ظليت كاعد يمهم بس جسد!
ورة دقايق من النقاش الحاد..
رياض: اخذتنا السوالف ونسيت اسألكم انتوا متريكين؟ تشربون شي؟
الحجي: بس جاي
رياض: وانتوا؟
قسورة: هم جاي
عقاب: شكرا اني ماريد شي، بس اريد اروح للحمام
ريان: دكوم وياي لعد
كمت وياه.
ريان: انت تندل الحمام وين روح، اني رح اسوي الچايات
عقاب: تمام
مشيت خطوتين ورجعت، شفته راح للمطبخ واني صعدت لغرفة الدكتورة.
ماعرف ليش هيج داسوي، بس رجلية وحدها مشت مو بسيطرتي، اريد اشوفها ميت عليها!!
شتّان ما بين عقل يرفض بقوة وفؤاد يريدُ بشدة ..
فأيهمـا سيكون الرابـح في النهاية؟
-بقلم : نورمين
...
انتهى
لا تنسون التصويت والتعليق 🖤🦋
#الكاتبة نورمين
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!