رواية خطأ طبي «عقاب الاماني» الفصل الثاني وثلاثون 32 - بقلم نورمـين

#خطأ_طبي «عقاب الاماني»

بقلــم : نورمين 🖤🦋

...

بالليل، جنة دنبـدل حتى نطلع.

عقاب: مستحييل!

اماني: شنو المستحيل حبيبي شبيك ترا عادي ولله!

عقاب: دروحي، لو تلبسني هالالوان ما البسها

اماني: ليش شبيها ولله الوان مفرحة ليش هيج لازك بالالوان الغامقة النكدية؟

عقاب: تذكرني بيج

عكدت حواجبي بأنزعاج..

اماني: هيج صارت يعني، بسيطة

عفته ورحت، لحكني وكمشني حضنني من ظهري وكال بمرح.

عقاب: مينلام قسورة من يكول العصبية تلوك الچن

اماني: اي ميخالف..

عقاب: لا تضوجين جنت اشاقة..

اماني: هيج شقة ماصخ ما احبه لتعيده!

عقاب: صار وغيـره؟

كلت ماكو فرصة احسن من هاي اطلب منه يلبس مثلي!

اماني: البس البلوز لكتلك عليه..

دار وجهه.. عافني وتنهد، رجعت حجيت بترجي.

اماني: عليك الله، حباب ولله يلوكلك متأكدة

عقاب: دكتورة لا تحاولين

صدمتني نبرة صوته، جافة تشبه طبعه مال قبل..

عافني وراح يدخن، مكلت شي بعد لان الظاهر قافل للاخير وكلما احاجيه يقفل ازيد.

واكيد للان حضرة الدكتاتور ما كال وين ماخذني وشنو السالفة.

عقاب: كملتي؟

هزيت راسي واني امشط بشعـري..

اماني: شسويله برأيك ارفعه لشعري لو شنو؟

عقاب: عوفي هيج

اماني: مو هوى عالي برا يثولني!!

عقاب: مهما يكن ميثولج مثلما ثاولني ..

اماني: ها؟

عقاب: جيبي المشط وتعالي

اخذته ورحت يمه، بدة يمشط وسوالي نفس التسريحة الي سواها بأول يوم خلاني اداوم بي بالمستشفى.

جتت لابسة قاط رسمي باللون السمائي الفاتح، وحاطة مكياج خفيف، فالتسريحة كلش لايكة وية الستايل جانت.

اماني: صايرة احب هالتسريحة.. شكرًا..

عقاب: تدلليـن انتِ..

ابتسمـلي وطلع يشغل السيارة، رشيت عطر واخذت جنطتي وتلفوني ولحكته.

اول مصعدت خابرتني ريما.

ريما: الوو، اكلج كملتي؟

اماني: اي كملت اني، وين صرتي؟

ريما: ما اجي بطلت شعندي جاية، ثنين متزوجين واني بنصهم ولله زحمة

اماني: ريما شحجينه احنه؟ مو كتلج طالعين نتعشة واريدج وياي؟

ريما: شصخمين بيه رب الحلو!!

اماني: لتخليني الغي مرة اللخ!!

عقاب جر التلفون من ايدي وكال بجدية.

عقاب: اقل العشر دقايق تلكينة بباب بيتج، تحبين تنزلين بكيفج لو غصب عنج؟ انتِ اختاري وبالحالتين انتِ جاية ترا فلا تعاندين احسن

ريما: تمام

سده وضحك..

عقاب: بنات الدكتور ميجن الا بالعين الحمرة

رفعت حاجبي بسخرية..

اماني: لا بلا؟

عقاب: ولله ..

اماني: هم كول هذا شقة؟

حرك السيارة وباوعلي وكال وهو يضحك.

عقاب: اي!

اماني: ترا حسابك ديزيد دير بالك

عقاب: ايبااه ..

اماني: قلد قلد بس اصيدك اصيدك وين تروح!

بتعجب ممزوج بالسخرية كال

عقاب: شو صار الحجي ثكيل؟

اماني: اعجبك اني ترا ..

غمز وابتسامته مزينة وجهه..

عقاب: كلش ولله..

استحيت فدرت وجهي عالجامة، للان مصدومة من التحول الغريب بشخصية عقاب..

سالفة ان يحبني ويتغزل بيه بكل فرصة شوية اشوفها هواي ع كلبي، خاصة بعد كل المآسي العشتها وياه..

وصلنا يم بيت اهلي.

عقاب: نزلي

اماني: هسة ارمش لريما وتجي عليمن تنزل

عقاب: نسلم ع اهلج، فشلة وصلنا للباب وما نسلم

اماني: هاا اي ولله صدك

ضحك ..
عقاب: دنزلي

طبينا للبيت، سلمنا ع ماما واخذنا ريما وطلعنا.
لان بابا وريان طالعين.

الطريق كله ريري ساكتة ومستحية، خاصة بعد اخر جفصة وية عقاب.

عقاب اشرلي بعيونه عليها وضحك، بادلته الضحكة وحجيت.

اماني: اي ريري شلونج؟ بعدج ضايجة لا؟

عقاب: هسة نونسها وتنسى الضوجة، مو بلا؟

ابتسمت بارتباك.

ريما: اي اي اكيد

وصلنا للمول، خلينا السيارة بكراج قريب وبلشنا نفتر.

المكان ازدحام كلش والناس كلها لابسة احمـر ومحتفلة وصوت الاغاني الرومنسية منتشر بالوسط، جانت اجواء تجنن رغم بساطتها.

بعدنا دنمشي نريد ندخل للمول صادفنة قسورة، مدري مو مصادفة!

عقاب: لك هلاا بالحبيب

قسورة انصدم من شاف ريما.

الظاهر هاللقاء تخطيط وتنفيذ عقاب، بس ليش ما كلي حيجي قسورة!

قسورة: هلا بيك، شو صاير تحتفل وكذا ما عرفتك

عقاب: حكـم الگلب بعد

قسورة: اذا هيج فما عليك عتب

احب سوالفهم فطول ما هم يحجون اني مبتسمة عبالك الحجي وياي.

نسيت ريما اصلا.

افترينا ولوين يلا انتبهتلها عافصة وجهها وضايجة، ادنيت عليها سألتها.

اماني: شبيج ضايجة؟

ريما: ما بيه بس هوسة دخت

اماني: هاا، اكولك عقاب خلي نكعد شوية

عقاب: يلا

كعدنا بكوفي بالطابق الثالث، بس هم جان هوسة، عبالك بغداد كلها جاية لهذا المول .

الكل شرب كهوة جكليتية، صدفة طلعنا كلنا عشاق للكهوة!

جنت اني كاعدة وعقاب بصفي ولكدامي ريما وقسورة كاعدة عالجانب.

همسلي عقاب.

عقاب: شحجي كولي اي

هزيت راسي بحماس، لان عرفته يريد يعوفهم وحدهم.

عقاب: قسورة دير بالك ع ريما بين منرجع

ريما: ليش وين رايحين؟

عقاب: عدنه شغلة نخلصها ونجي عالسريع

اخذت جنطتها وكامت
ريما: اي عادي اجي وياكم

قسورة دار وجهه وزفر بأنزعاج، ضجت عليه.

اماني: كعدي هنا وسكتي كنالج هسة نجي!

ريما: مو بكيفكم، شكو لحيتو عليه وجبتوني لعد اذا تعوفوني وتروحون؟؟؟

قسورة: من رخصتكم اني هم رايح

اهوو انلاصت..

عقاب كمشه وخزر ريما سكتت.

همستلها بحدة

اماني: نجبي عاد!

عقاب: استغفرك الهي، أئمن البنية يمه يعوفني ويترخص، صاحي انت؟

قسورة: مجنت صاحي من قبل، بكد ما هسة

كالها بجدية، اول مرة اشوف قسورة هيج متضايق.
دومه مرح وضحكته متفارك وجهه.

عقاب: ع روحك، اكعد دقيقتين ما اتعطل وانتِ هم ظلي بمكانج ترا مياكلج

خصمها لما حجة بجدية وعافهم وراح، لحكته واني اضحك.

اماني: طلع حتى قسورة ميجي الا بالعين الحمرة

عقاب: ههه هي العالم كلها ع هالرنة

اماني: بس ولله عاشت ايدك خوش خطة

عقاب: اريدهم ينهون هالمهزلة، واضح هي تحبه عليمن تحرك بكلبه؟ شفتي شلون وجوههم انكلبت من التقوا؟

اماني: صراحة غير، ريري مال احطها واكتلها لان خطية مرمرته وهو مسكين

باوعلي بتك عين ..

اماني: شبيك ترا دا احجي الصدك

عقاب: ادري بس استغربت ..

اماني: ليش؟

عقاب: لان هاي اختج يعني، توقعت تنحازين الها وتطلعيلها اعذار

اماني: اني وية الحق حبيبي

عقاب: واضح واضح ..

كمش ايدي قوي لان صرنة بنص هوسة.

عقاب: بالج من تمشين لضيعين

اماني: ليش محسسني اني طفلة؟

عقاب: لان انتِ هيج بعيوني

سكتت .. صدمني برده بس ما حبيت اسكت.

تلعثمت وكملت كلامي معترضة.

اماني: حتلو اني جبيرة واكدر اعتمد ع نفسي، بعدين اكو اختراع اسمه تلفون بس تتصل عليه تعرف اني وين

عقاب: حتى لو !

...

قسورة

كلش جنت ضايج من رد فعلها لريما.

كلش جان واضح عليها انو هي متريدني ولا تطيق تكعد وياي.

فكلت اختصرها عليها واعوفهم وارجع لبيتي اشرفلي.

بس عقاب ما خلاني.

اصلا حسيت عنده سالفة من لح عليه اجي للمول بهالوكت بس ما توقعت ريما!

ظلينا ساكتين ورا ما راحوا، سويت نفسي اكلب بالتلفون وهي تباوع عالعالم.

جنت اخطفلها نظرات من جوة لجوة بدون متنتبه..

حلوة طالعة بنت الاوادم!

اخذت جنطتها وكامت، كمت وكفت وحجيت.

قسورة: وين؟

ريما: وانت شعليك؟

قسورة: خلوج امانة يمي لبينما يرجعون، اذكرج خاف نسيتي

ريما: مناسية، وبعدين اني مو طفلة ويأمنوني يمك، الحمدلله والشكر واعية واكدر اتحمل مسؤولية نفسي

قسورة: اذا خلصتي لغوتج، اكعدي

ريما: احترم نفسك واحجي عدل!!

قسورة: اي ميخالف ..

دارت وجهها وراحت، لزمت ايدها وكفتها، اندارت خزرتني.

ريما: شلون تتجرئ تكمشني!!

قسورة: عادي ميرادلها شي

رديت ببساطة، وكوة لازم ضحكتي لان طريقة كلامها حسستني مسوي فد جريمة.

جرت ايدها مني وكالت.

ريما: هالموقف هذا خلي ببالك واحفظه كلش زين، حتى مرة ثانية متلومني اذا رفضتك او اذيتك بكلامي! وها.. رايحة للحمام مو لمكان ثاني.

حجت كلامها بحدة وراحت، وخلتني اتلاطم من الصدمة..

معقولة اسلوبي وياها والشقة الي بيننا يضوجها لدرجة ترفضني؟ 

كعدت وورثتلي جكارة..

ولله وطلع حجي عقاب صحيح، من كلي لتشاقيها تكوم تضوج منك..

....

اماني

طلعنا من المول وصعدنا بالسيارة، هذا كله وعقاب ميرضى يحجي.

اماني: عود ليش متكلي لشنو دتخطط؟

عقاب: اسمها مفاجئة، شلون اكلجياها؟ تخرب يابة فـأصبري

اماني: شيصبرنيي الفضول صعد!!

عقاب: مظل شي وينزل

اماني: زين انت مو كلتلهم دقيقتين ونرجع؟

ضحك وخلى ايده ع الستيرن.

عقاب: اي وشنو يعني، اكيد ما جبتهم لهنا بهيج يوم حتى واحد يشوف الثاني وخلص كلمن يرجع لبيته

اماني: ترا انت كلش متغير!! و كل شوية دا انصدم بسالفة جديدة!

عقاب: صحيح كلامج اني هم مصدوم بنفسي، لان دا احاول اتغير للأحسن طبعا، وهذا كله علمودج ..

خانتني التعابير وما عرفت شحجي.. كلمة علمودج هزت گليبي هز.

بحيث مطلع مني غير هالحجاية..

اماني: احبك ..

عقاب: اني هم احبج أمنيتـي ..

دموعي تجمعت بعيني وفرحتي هسة متنوصف..
بكد فرحة العالم بيوم الحب واكثر يجوز!!

وكف كدام استوديو تصوير ..

اماني: وصلنا؟

عقاب: اي

نزلنا واني بعدني بحالة صدمة، كامشة ايده وامشي وراه بكل ثقة.

طبينا للاستوديو، الكادر كله بنات.

سلم عليهم عقاب وهن ردن عليه بحفاوة، عبالك يعرفهن.

اخذتنا وحدة منهن لغرفة التصوير وجانت تحجي وياه تسئله عن حاله وهو يكوللها الحمدلله انتِ شلونها امورج، اني هنا ورثت!!

ضجت وهمستله.

اماني: منين ذني ادور؟

ضحك..
وكال للبنات يطلعن.

عقاب: من رخصتجن بس شوية

-اي تدلل

عافنة وطلعن، باوعلي وكال.

عقاب: مصورات

اماني: يااا صدك واني عبالي مضيفات طيران!!

باوعلي بعدم تصديق.

عقاب: بـ هداي (بهدوء) يابة شجاج؟

اماني: منين تعرفهن؟

عقاب: لا اله الا الله

اماني: احجيي!!!!!

عقاب: صوتج!

اماني: احجي لعد فضني!

عقاب: تعاملنا وياهن بوحدة من حملاتنا الانتخابية، ارتاحيتي؟

اماني: هاا، لا ليش تتعاملون وي استوديو نسائي، شنو الزلم ما مكفين؟ احسن واريحلكم بالشغل.

عقاب: صدك لو كالوا المرأة هي عدو المرأة الاول

اماني: لا ولله مو هذا قصدي بس...

ضجت من حجايته، عباله استنقص من البنات.

دنكت راسي بانزعاج، رفعه بايده وكال وهو يباوع بنص عيوني..

عقاب: اشاقيج ولج لتعبسين تصيرين مو حلوة ..

اماني: صدك عود؟

عقاب: اي ولله لعد ما تعودتي ع الشقة مالتي؟

اماني: مو هاي قصدي، الوراها

عقاب: ياهية؟

اماني: مال تصيرين مو حلوة من تعبسين

ضحك وكال..

عقاب: هااا ع هاي تقصدين.

هزيت راسي.

عقاب: اي صدك، لان ملامحج الحلوة تخرب

اماني: هااا..

عقاب: اييي

اماني: زين اذا صرت عجوز وملامحي خربت تبطل تحبني؟

ضحك ضحكة طويلة، من كل عقلي دا افكر اذا كبرت وصرت عجوز محلوة خاف يكوم ميحبني!

اماني: شبيك تضحك، كلت شي يضحك اني؟

عقاب: لا يابة العفو منج..

اماني: هسة كلي اذا كبرت وصرت عجوز وبشرتي تجعدت، متحبني؟

عقاب: راح ابقى احبج بكل مكان وزمان وشلون ما جنتي، بحالاتج الي متحبيها قبل الي تحبيها، شابة او عجوز او عسى ما حجية معقچة وخلصانة، تبقين بعيني دكتورتـي وامنيتـي الرجعتلي واهسي بالحياة..

اماني: انت ليش هيج تحجي حلو بحيث تكسر عليه وتخليني امتمت؟؟

ع كد ما فرحت بكلامه، ضجت لان ما عندي رد مناسب ..

عقاب: ع كولتج، وحدهن يجن

ضحكت وشبكته.

اماني: احبك يااابة

عقاب: هاي الـ 'يابة' بيها حقوق لتبوكيها

اماني: ماكو صارت الي بعد

عقاب: خو ماكو شي؟

اماني: اكو

عقاب: لا عيني هاي مالتي

اماني: بس اني وياك واحد !

سكت وغاص بنظراته بعيوني..

عقاب: شلون بيه ويه لسانج؟

رفعت اكتافي بحركة معناها مادري وضحكت ..

باوعلي بنظرات ذايبة وبلش يخلي المسافة بيننا معدومة..

شلت كذلتي عن وجهي بحركة لا ارادية بسبب التوتر..

خلا راحة ايديه ع خدودي وباس كصتي بهدوء..

كلبي لحظتها راد يطلع من مكانه والارتباك زار كل حواسي دون استثناء.

ابتعد شوية..

عقاب: اهدأي..

من لاحظ توتري، كال هيج واني ابتسمت بتزييف وهزيت راسي .

صاحلهن للمصورات، اجن .

وحدة منهن انطته علبة حمرة جبيرة مال اكسسوارات وراحت.
عقاب: شكرا

-العفو

وحدة منهن شغلت الكاميرا والثانية جانت تعدل بالاضاءة.

عقاب: عينج يمـي امنيتـي..

باوعتله، فتح العلبة طلع منها كلادة بشكل انفنيت وبنصها اكو مثل شعاع او كلوب ..

كلش حلوة وناعمة!

فرقت شفايفي وملامحي ارتخت..

عقاب: عجبتج؟

وسعت ابتسامتي وباوعتله..

اماني: اكييييد!!

عقاب: خلي البسجياها

هزيت راسي وافتريت، اخذت شعري للجانب..
لبسني الكلادة وباس ركبتي ..

كزبر جلدي واستحيت من البنات، بس هن عادي ما كالن شي مبتسمات ويصورن.

الظاهر عقاب يريدها جلسة عفوية.

اخذنة بعد صور بهواي وضعيات، بس طول الجلسة جنت خجلانة من نظرات عقاب، الا انو فرحتي بي كلش جبيرة..

كملنا وطلعنـا، صعدنة بالسيارة .

جان بيده بوكس جبير، قدمه الي..

فتحته وجان بي باقة ورد ابيض، شكلهم و ريحتهم ترد الروح..

خانتني الحروف هالمرة من صدك..

ظليت بس اباوعله ومبتسمة.

عقاب:جنت متردد انطيج الوردات ..

اماني: ليش؟ ترا اني كلش احب الورد

عقاب: اعرف حبيبتي، بس بصراحة ورد كل الدنيا يخسر ويفقد قيمته يم جمال عيونج وضحكتج، فـ استخطيته..

ضحكت بعدم تصديق..

اماني: لك شنو انت شنو!!

عقاب: اني عقاب..

اماني: احلى عقاب ولله، عقابي ومالتي اني وبس

ابتسملي وشغل السيارة.

عقاب: خ نشوف ذولاك الرويسية وين صفة بيهم الدهر ..

من كال هيج ذكرني بيهم، اني نسيتهم عالاخير!

اماني: هسة تلكاهم صايرين من الروس

عقاب: ما استغرب ولله هههه..

ضحكت وانطلقنا الهم.

...

قسورة

تأخرت بالحمام بالربع ساعة، كمت اشوفها.

كلبت الطابق الثالث كلاب عليها ملكيتها، نزلت للطوابق الجوة افتريتهن ماهية.

طلعت برا لكيتها واكفة تسولف وية ثنين ولد.

عكدت حواجبي والنار شبت بگلبي.

رحت عليها بسرعة.

قسورة: وين صرتي!!!

خزرتني ومحجت شي. رجعت تسولف وياهم ولا كأن واحد يحجي وياها.

ريما: اي ومثل مكتلكم، هو بس هالمريض الصارت عنده الخربطة ورجعت عدتله التحليل وكلشي تمام

تنهدت وحجيت بحدة..

قسورة: وياج دا احجييي!!!!!

ريما: لتصييح!!

قسورة: اصيح وراسج اكسره اذا تعيدين هالتصرف، عندج اعتراض؟؟؟

ريما: انت ششايف نفسك وهيج تحجي ويايي؟؟

ادخلوا الولد الوياها..

-ريري منو هذا؟؟ تعرفيه؟

-ريما ديضايقج هذا؟

باوعتله بتك عين بنظرة مستصغرة..

قسورة: واذا دا اضايقها شتسوي ها؟

-اخلي دمك بطولك ولله لا عبالك بنية وتستقوي عليها!!

ضحكت ودنكت راسي .. وغفل ضربته بوكس خليت خشمه يجري دم.

حاول يردها دفعته وكع بالكاع، صديقه كومه وريما كمشت بيه وصارت بيني وبينهم.

ريما: لك انت شسويتت!!!

قسورة: الواجب وبس، وهسة وخري لتوكفين بيناتنا

ريما: ما اوخر وكف هالمهزلة، مو صغير انت وتتعارك!

-ريما احجي شيعودلج هذا؟

ريما:اااا... هذا كرايبي، اسفة معاذ امسحها بوجهي هو شوية عصبي

قسورة: لا يمسح ولا ينشف، عده حجاية يحجيها وياي اني، خير حبيب محتاج شي بعد؟ جلاق دفرة حاضر اني بالخدمة

ريما: قسورة لخاطري كافي

حجت بلهجة ثلجت كلبي المجمر ..

تنهدت ولعنت الشيطان، كمشت ايدها وجريتها وراية.

كعدنة ع مسطبة بنص حديقة قريبة ع المول..

ريما: عود انت ليش هيج؟

كالتها بهدوء، باوعتلها وصفنت بيها واني افكر بسؤالها..

قسورة: شنو هيج مفهمت؟

ريما: تدوس ببطن الواحد!

قسورة: طبع..

ريما: مو حلو هيج، يكرّه العالم بيك..

قسورة: ليحبني يتحملني..

ريما: بس محد مجبور يتحمل احد بهالوكت، كلمن همه كافيه!

قسورة: اذا ميتحملني وديواجه صعوبة بالتعامل وياي بسبب اطباعي، يكدر بكل بساطة يطلب مني اتغير، وساعتها رح اتقبل طلبه وانفذه واني الممنون لان صارحني بالاشياء التضوجه.

ريما: زين ليش ما انت تحس ع نفسك وتبطل هالاطباع؟

قسورة: ها.. سؤال حلو

ريما: شنو

قسورة: زين انتِ ليش هيج؟

ريما: اني سالتك اول شي!

قسورة: واني جاوبتج، هسة صار دورج تجاوبيني

ريما: شجاوبك اذا اني مفهمت شتريد اصلا؟!

ضحكت بسخرية.. كال مفهمت شتريد كال..

كمت تمشيت كم خطوة لكدام ورجعت..

صارت بيني وبينها مسافة متر تقريبًا..

وكفت كدامها وعيوني صارت بعيونها وكلت بنبرة هادئة تنطوي عن اوجاع مكتومة.

قسورة: گلبي يدگلج مثل جرس الكنيسة، وگلبج مُسلم ميدير بال اصلًـا، ليش هيج ها؟!

سكتت وع وجهها ضاعت ملامح الحزن والتوتر ..

رجعت كعدت بصفها وكملت كلامي.

قسورة: مجنت اعرف انو شقاي وياج يضوجج مني لهالدرجة ويخليج تنفرين مني، اعتذر اذا زودتها بالشقة وياج ومنا وهيج مراح اكررها بعد

ريما: ليش جنت تشاقيني هيج لعد؟ متعرف انو هالاسلوب مو حلو!

قسورة: تصدكين اذا اكلج اني ما احسب للموضوع هيج حساب؟

ريما: لعد شتحسبه؟

قسورة: اعرف الموضوع غريب بس اني احب اعصبج لان تصيرين حلوة كلش..

وسعت عيونها بصدمة ..

ريما: ش..شنووو؟؟

قسورة: مثلما سمعتي..

ريما: انت واحد مو صاحي!

قسورة: ليش ليحبج هم تحسبي صاحي وعنده عقل؟

ريما: شقصدك!!

قسورة: اقصد ليشوفج تاخذين عقله فيصير مو صاحي

ريما: بس انت مو هيج جنت تقصد!

قسورة: هيج ونص.. ومعليه انت شفكرتي، بينج وبين نفسج حليها اني معليه

ضيقت عيونها بعدم تصديق، ضحكت ودرت وجهي لكدام، اباوع عالناس والهوا الي يلعب بالشجر ويحرك اوراقها منا ومناك ..

شعرها جان طويل ولان اني كاعد بصفها، طارت خصلة منه ع وجهي بسبب الهوا العالي..

غمضت عيوني مبتسم وتذكرت اغنية ..

قسـورة: بالهوا طاير.. شعـرج سواد الليل .. بالهوا طاير..

جرته للصفحة الثانية ولمته.

ريما: ا..اسفةة ..

قسورة: عادي يابة شصار قابل.

خـيّم الصمت عالاجواء وظلينا هيج فترة طويلة..

لحد ما هي حجت وسألت.

ريما: ليش بطلت تراسلني وتتواصل وياي؟

تنهدت ورديت ..

قسورة: اني احبج ريما.. و مستعـد اسوي كلشي علمودج بدون مقابل، بس صعب ابقى هيج اقدم بدون تقدير لهالشي حتى ..

صفنت بعيوني شوية وكالت..

ريما: منو كلك ما مقدرة مشاعرك؟

قسورة: تصرفاتج.. والاسوء منها حجاياتج الي داگات بگلبي..!

ريما: بس اني ما اقصد، بلحظات العصبية الحجي يطلع مني بدون وعي، ماريد اجرحك اني قسورة!

قسورة: بس جرحتينـي ريما! وهواي هم..

ضحكت بخيبـة امل ..

قسورة: ولج سميتـج گلبي واني ماكو شي يوجعني بالدنيا هاي مثل گلبي..

نزلت دمعتها وحجت بقهر..

ريما: اني اسفة ع كلشي سويته ..

قسـورة: اعتذارج مقبول.

ريما:  وعرضك الي بعده قائم؟

باوعتلها وابتسمت بسعادة..

قسورة: كتلج عندج العمر كله وقت ..

ريما: زين اني موافقة .....

منتظرها تكول احبك بس مدتطلع منها!!

قسورة: اي كوليها؟

ريما: ااا .. مدا اكدر.. مو وكتها بعد، تكدر تنتظرني؟

قسورة: شعندي غيرج يابة، انتظر شكو ورايه

ريما: شكرًا

قسورة: هلا بيج..

ريما: ما طابة لمحلك مشترية شغلة وتكلي هلا بيج!

قسورة: افـا وكلبي مو بالعين؟

سكتت هي.. ضحكت وكلتلها.

قسورة: ممتعود عليج تسكتين، لسانج وين راح؟

ريما: موجود بس ماعرف شحجي..

قسورة: يعني هالمرة ربحت اني!

ريما: صراحة .. اي.

ضحكت وكمت.

قسورة: كومي يابة كومي هسة يجون وميلكونا.

لحكتني وتمشينـا للمول لان قريب..

صادفنا ولد صغير يبيع ورد، فات من يمي وكال.

-عمو اشتري للحلوة هاي وردة

قسورة: يبعد عمك اني اغار عليها لتكول الحلوة

ضحكت ريما وهو هم.

-خوش، زين اشتري لزوجتك وردة؟

قسورة: بس هي مو زوجتي ..

-لعد ان شاء الله تصير!

قسورة: الله يسمع من حلكك

-دخذلها وردة حتى الله يستجاب دعائك

قسورة: ليش وردتك هاي بخيتـة واني مادري؟

ريما: شلعت كلبه كافي، اذا متشتري عوفه

قسورة: خو كولي اريد وردة حتى اشتريلج، عليمن هالحجي

ريما: علساس اني بحالك!

قسورة: لا يلا خطية رح اشتريلج خاف تبجين

ريما: قسورة!!

قسورة: احااا.. عيونـه وسنونـه؟

استحت وخزرتني، الولد ضحك.

-عمو مبين شغلتك داچة

ضحكت وكتله.

قسورة: كلش ولله، اطيني وردة بلكي الله تفرج عليه صدك

ضحك وطلعلي وردة من الباقة الشايلها.

قسورة: لو اكلك، جيب الورد كله اني اشتري

-صددددكككك؟؟

قسورة: اي حبيبي، هاك.
طلعت فلوس ونطيته.

-بس هذا هواي!

قسورة: اعتبرها هدية مني بعيد الحب

-شكرا عمو الله يوفقك ويزوجك هالحلوة

قسورة: يابة مو كلنا نغااار!

-اسف اسف ، الله يزوجك هالبنيةةة!

قسورة: هيج حلوين.

راح، انطيت الورد لريمـا وهي بين التضحك وبين الخجلانة.

قسورة: اعرف انو ميصير ورد ينطوه ورد، لان بهالحالة حيصير اختلال بنظام التوازن الارضي، بس عادي انتِ تستاهلين!

ابتسمت ..

ريما: شكرًا

قسورة: ما عندج غيرها؟

ريما: لا

قسورة: انتظر التحديث الجديد لعد

ريما: احسن

رجعنا للمول، صعدنا للكوفي لكينة عقاب والدكتورة موجودين.

قسورة: شوكت اجيتوا؟

عقاب: صار شششككككد!!

اماني: لا يشاقة هستونة وصلنه

عقاب: اي وين جنتوا؟

غمزلي وحجة بخبث..

قسورة: شعليك، اني سئلتك وين جنتو؟

عقاب: وانت شعليك وتسال؟

قسورة: لعد انت هم شعليك وتسأل؟

عقاب: البنية بأمانتي فلازم اعرف

قسورة: خاب دكووم، بأمانته ابو حلك وهو عافها وراح مدري وين طمس.

عقاب: مو صوجك، صوج ليريد يفيدك بس ولله انت ما تستاهل!!

قسورة: حبيبي ولله عـ راسي..

اماني: اذا خلصتوا مناگر، ممكن نتعشا بطني كامت تزقزق؟!

عقاب: يلا قسورة نجب

قسورة: صايرين

كمنا رحنة لمطعم، الدكتورة و ريما جانن حايرات بباقات الورد، ورغم نريد ناخذهن من عدهن بس ما يقبلن.

عبالك يريدن يغورن البنات عود شوفنة جايبيلنا ورد هههه.

تعشينـا وكملنا باجواء حلوة وكلها فرح، صار هواي ما حاس بشعور السعادة من عمق كلبي..

وصل عقاب ريما لبيتها، وادور وصلني وراح.

...

اماني

وصلنا للبيت، اخذت باقتي مال الورد ونزلت وعقاب وراية.

حطيتها بمي حتى ما تذبل وكعدت عالقنفة ومددت رجلية للجانب بتعب..

 
عقاب: تريدين كهوة؟ احس روحي دايخ

اماني: اشرب وياك

هز راسه وسوة، واني كمت بدلت لبست تراك شتوي ورجعت.

لكيته عالك الصوبة وصاب الكهوة بالاكواب وكاعد.

كعدت كباله واخذت كوبي.

عقاب: بالج ترا حار

اماني: تمام

نفخت عليه شوية وشربت، دفى شوية.

اماني: شو جنك بردان ؟

عقاب: اي الجو بارد برا

اماني: كتلك البس البلوز السمائي ما سمعت مني!

عقاب: هو هذا كله منج، خليت روحج وياي والا اني اول تالي ابرد!

اماني: ليسمعك يكول جاي من غير كوكب

عقاب: ليش لعد، وهسة تعالي

اماني: وين؟

عقاب: بحضني، اريد اتدفى

...

انتهى..

لا تنسون التصويت والتعليق 🦋🖤

#الكاتبة نورمين