رواية خطأ طبي «عقاب الاماني» الفصل الحادي وثلاثون 31 - بقلم نورمـين

#خطأ_طبي «عقاب الاماني»

بقلــم : نورمين 🖤🦋

...

عقاب: متريدين بقلاوة؟

معدتي تحركت بحركات دائرية وحسيت مثل المغص، عقجت وجهي وكلت بهدوء ..

اماني: عقاب لا ..

من حالتي، عكد حواجبه وكال بتسائل..

عقاب: ليش، اكو شي؟

هزيت راسي بلا، كام وساعدني اكوم ..

كعدت، وسوة حركته الماخذة كلبي..

قرفص لمستوايه وكمش ايدي وكال بأهتمام..

عقاب: شبيج دكتورتي؟

اماني: ما بيه..

درت وجهي لان دا احس بتوتر فضيع وكلبي ينبض بجنون..

مد ايده رجعه لحتى تلتقي نظراتنا..

عقاب: هذا كله وما بيج؟ سولفي شعندج

اماني: ااا.. اني.. عقاب اني ...

رافع حاجبه بترقب منتظرني احجي، بس الحجاية متطلع، كلش مستحية منه..

عقاب: اي انتِ شنو؟

اماني: اني ما مستعدة..

اول شي انصدم، بعدين ابتسم..

جنت افرك بايدية بارتباك، كمشهن وباوعلي بنظرات متفهمة حتى اهدء..

باس ايدية بالسرة وكال..

عقاب: اني وياج مو ضدج..

ابتسمت بسعادة..

عقاب: اتفهم شعورج وحالة الصدمة الي عايشتها للان.. هههه اصلا اني لسة مصدوم من نفسي، شحال انتِ؟؟ فـ على العموم شوكت متكونين جاهزة يصير خير، تمام؟

دمعت بفرح مدري اني صايرة حساسة، مسح دمعتي وباس راسي..

عقاب: هذني ادوسين دكمة وينزلن؟ شنو هالقابلية هاي!

ضحكت..

اماني: مدريني عبالك خاتلات، ميصدكن يصير شي حتى يمدن راسهن بساع

عقاب: مو خوش شغلة هاي، ما احب البنية لتكون ام دميعة!

اماني: يعني هسة انت متحبـني؟

عقاب: يابة اني حبيت بيج كل الصفات الي مجنت احبها.. ملاحظة شكد انتِ مميزة بعيني لو لا؟

اماني: واني هم ولله نفس الاحساس .. حبيت بيك عيوبك قبل مميزاتك ..

عقاب: تدرين شنو

اماني: شنو؟

عقاب: العمق الحقيقي للعلاقات يبلش من تقبل العيوب وحُبها قبل حُب المميزات وتقديسها ..

ابتسمت..
اماني: كلش صح!

عقاب: فهذا معناتـه ان احنه واصلين مرحلة متقدمة بعلاقتنـا بدون منحس ع نفسنا..!

اماني: ولله اني حاسة ع نفسي، الظاهر انت مجنت حاس حضرة الدكتاتور

كلت بخبث..ضحك ادور تنهــد تنهيدة طويلة خلتني اتعجب ..

عقاب: اعترف انو اني حبيتج من اول مرة شفتج بيها.. ببيتكم جنتِ ملفتة للنظر، و بيني وبين نفسي كلت شكد مختلفة وانيقة هالبنية..
مجرد صدفة، واعترف حبيتج من الصدفة، ورغم كلشي مريت بي جنت ما اكدر اقسى عليج، بوقت جنت اتمنى اعذبج بس كلبي وكف ضدي بهواي مرات وخلاني اتهاون وياج..
هالصدفة هاي تعمقت بكلبي وخلتني احبج فوك الحُب حُبيـن..
الله يخليج الي بكدما حبيت الدنيا بسببج .. انتِ نعمـة أمنيتي..!

وية كل كلمة يكولها جسمي يقشعر، وكلبي ينبض بقوة لدرجة ضاع مني الكلام ومعرفت شحجي!

اماني: شخليتلي حتى احجي؟ ما عندي جواب مناسب ..

عقاب: لتكولين شي، يكفيني وجودج يمي..

حضنته بقوة ..

اماني: وعد مني اظل وياك لآخر نفس.. حتى بأكثر الظروف القاسية رح ابقى يمك ومراح اترك ايدك ابد ..

ما كال شي، حضنني بقوة اكبر، حسيته يريد يضمني جوة ضلوعه..

...

قسورة

تعشيت وغيرت الضماد مال ايدي، تحسنت وميحتاج اروح للدكتورة بعد.

دك عليه ليث.

قسورة: شجابني ع بالك بهالوقت؟

ليث: تستقبل ضيوف؟

قسورة: حسب

ليث: يعني اني متستقبلني؟

قسورة: لا مالي خلكك

ليث: عليك الله مو جوعان ومشتهي اكل من ايدك الطيبة

قسورة: امك يمك وخلي تطبخلك، الاكل من ايدها اطيب

ليث: هاا.. مو هي كلتلي وخطية طبخت بس اني كتلها لا ماريد، رايح يم قسورة عازمني

قسورة: ايبااه، كول اكلت هناك واريد اكل هنا بعد

ليث: خربعقلك شلون لكفتها

قسورة: مو صعبة لان ادري بيك جوعي

ليث: اهووو، يابة جوعاااان

قسورة: يطبك مرض

ليث: لتظل تجر بركبتك، جايك وغصبن عليك اكل وفنك تفك حلكك!!

ضحكت ..

قسورة: الله يشبعك ..

ليث: الله يطيح حظك، بيش طالبنييي؟؟

قسورة: اريدك تشبع مو زينه هالدعوة يعني؟

ليث: اكيد مو زينة!! اذا شبعت بعد وين اكدر اكل!

قسورة: ها هيج رايك؟

ليث: اي لتعيدها بعد

قسورة: هههه هاهيه

ليث: شمسوي عشا؟

قسورة: تجي وتشوف

ليث: افتحلي الباب وطش ورد، هياتني رح اوصل

قسورة: ديلا ولي

سديته ضاحك، عفية بطن شايل ولا تنترس!

النهار كله ياكل ويصيح جوعان.

زين هو شوكت تفرغ بطنه اذا دومه ياكل؟

وشوكت يلحك يجوع؟ عجيب

حميت الاكل وعمرتلي نركيلة ..

شوية ودك الباب، فتحتله.

ليث: يا هلا بالعزيز

قسورة: لا هلا

ليث: حبيبي ولله اني الاشوق

قسورة: ههه صدك بلا؟

ليث: اي اتفضل ليش لا

دفعني وطب، سديت الباب ولحكته.

ركض للمطبخ يدور بالكدور.

ليث: ولك ولله بيك من ريحة امي

قسورة: شنو عطرها للحجية؟

ليث: اقصد الطبع الطبع حبيب

قسورة: ادري

عفته يصب ورحت انركل بالصالة.

كمل واجة.

ليث: ما ردتلك خبر؟

قسورة: لا لسة

ليث: شمتانية هاي

قسورة: اندري يخوي..

ليث: خطيه انت.. باع صفنتك مال عجايز

قسورة: نجب لا ع حلكك اطبب الخاشوكة للهاتك

ليث: صاير قاسي

قسورة: استغفر الله

ليث: هل صليت على محمد وال محمد اليوم؟

باوعتله بنفاذ صبر..

ليث: شبيك صلي عالنبي خفة لهالخشة اليابسة

قسورة: انت اخر واحد يحجي بالخشوم خشمك جنة كباية

ليث: وشبيها الكبة يمه شو تخبل

قسورة: تلعب روحي منها حشة نعمة الله

ليث: بالعباس انت ما تفتهم !!

قسورة: متشوفني مصادقك..

ليث: دنجب، اكو زمال يكره الكبة؟ ولك هاي الكككككبةةةةة هاااي!!

قسورة: ليش محسسني انو هي قوزي، ترا هو تمن معجن مادري شيحس الاخترع هاي الاكلة!

ليث: اصلا انت مادري شتحس، المهم عوف التمن المعجن الي وسولفلي شراح تسوي ع ريما؟

قسورة: ما اسوي بعد، انتظر منها رد

ليث: يعني انت بالله العظيم حتخبلني، لو تروح لبيتها وتلزك لو تبطل وتعوف كلشي تايه؟

قسورة: خليها يم ربك هي تصفى

ليث: امنت بالله، بس الله كال اسعى يا عبدي واني اعينك

قسورة: سعيت بما فيه الكفاية وانطيت اكثر من طاقتي لحدما صارت مشاعري تافهة وينضحك عليها

ليث: يعني انت مشكلتك لان كلتلك رفضت مكالمتك اجيت لبيتي، شتسوي لو رفضتك الك؟

اخذت نفس من النركيلة.. وهزيت راسي بصمت.

ليث: اسمحلي اكلك الله يطيح حظك

قسورة: ميخالف بس ليش؟

ليث: واضحة دتشاقة وياك، هسة اني ماعرفها للبنية وفاهم قصدها، انت المطي عود تحبها وهيج ماخذ موقف؟

تنهدت ورديت ..

قسورة: ليث انت حقك متفهم احساسي لان ما مجربه، انت متعرف شنو يعني تحب شخص وتتمناه وتظل تدعي بكل وكت الله يخليه من نصيبك! متعرف شنو يعني يكون اكو بنية مسيطرة ع تفكيرك بحيث حتى وانت نايم يجيك طيفها بالحلم.. اني احبها لريما حب جبير لدرجة حتى اتفه كلمة منها تجرحني، لهالمرحلة واصلة مشاعري بعمقها!

ليث: مادري بس الواضح مو سهلة السالفة..

قسورة: ابد..!

...

اماني

الصبح، كعدنا ع صوت تلفونه يدك..

جان حاضني، كام واخذ التلفون رد بصوت خشن..

عقاب: الوو .. اي اي جاي

سده وراح للكنتور طلع ملابس..

اماني: صباح الخير

عقاب: صباحي انتِ يعني؟

ابتسمت بخجل..

عقاب: كومي بدلي بساع حتى اوصلج لان مستعجل كلش

اماني: ليش شكو؟ منو هذا الخابرك وهيج خلاك تركض؟

عقاب: شاهين كال الحجي بالمكتب

بصدمة رديت..

اماني: هاي من شوكت اجة!!!

عقاب: ماعرف بس اكيد علمود موضوع حازم

اماني: اي صحيح

عقاب: استعجلي گلبي

اماني: كايمة حبيبي

بدلنا وطلعنا، وبالطريق اشترينا لفات اكلنا.

وصلني للمستشفى وانطاني التوصيات المعتادة.

عقاب: بالج ع نفسج حبيبتي مو تنسين شحجينه

اماني: بعيوني لتخاف

عقاب: يــ بعد عيوني انتِ

اماني: انت هم بالك ع نفسك

عقاب: صار، يلا روحي

راح واني طبيت للمستشفى.

لاكتني دكتورة زينب، افف شون شكول من الصبح.

زينب: صباح الخير دكتورة شلونج

اماني: هلا دكتورة تمام الحمدلله

اكره الرسميات وما احب اجامل احد اضوج منه، فـ ترخصت وعفتها.

لبست صدريتي واخذتلي فرة عالمرضى.

طبيت ع اصغر مريضة قلب تعاملت وياها بحياتي..

عمرها ست سنين اسمها  بسملـة.

حليوة وشعراتها كيرلي وخدودها كبار جنها لعابة، هيج تنكرط كرط.

امها وابوها يمها، الخوف عليها واضح بعيونهم بس يحاولون يحسسوها انو ماكو شي.

اماني: سلاام شلونها الحلوة مالتنه اليوم؟

امها وابوها ردوا : اهلا دكتورة

كعدت يمها ..

اماني: شلونج بسبوسة؟

بسملة: زينة بس اريد اطلع منا ضجت

اماني: يلا مظل شي ان شاء الله وتطلعين وتخلصين مني بعد

ضحكت ضحكة ترد الروح وسنيناتها الحلوات زايداتها ظرافة.

بسملة: لا انتِ احبج ما اخلص منج، بس اريد اطلع ما احب المستشفى

اماني: يروحي ولله حقج

ظل وياها ابوها واجتي امها حتى اتفاهم وياها..

اماني: هسة تجي الممرضة تحضرها للعملية، حاولي متحسسيها بشي كوليلها لعبة اي شي بس لتخوفيها

-ميخالف بس دكتورة الله يخليج، بنتي عدها فرصة تعيش؟

اماني: مدام اكو نفس فأكو فرصة

-هالحجي اعرفه دكتورة، اني اريد حجي واقعي طبي!!

تنهدت بأسى ع حالة الام..

اماني: عملية القلب المفتوح من العمليات الكبرى، خطورتها عالية جدًا، بس بنفس الوقت نسبة نجاحها هم عالية، وتتراوح من 80% الى 95% يعني الامل جبير وان شاء الله بسملة تتعدى هالمرحلة وترجعلج بسلامة 

-ان شاااء الله يا رب..

رحت لغرفة العمليات ولاكاني دكتور ساري..

ساري: شلونها المعنويات؟

اماني: عال العال بس خايفة عالطفلة

ساري: قوي گلبج وان شاء الله سهلة

ابتسملي فبادلته، اني وياه حنسويلها العملية لان وضعها خطير ويحتاج اكثر من اخصائي..

طبيت لصالة العمليات، صعدت الكمامة ولبست جفوفي.

يا رب تنجح العملية وتعيش بسملة!

بلشنا بالعملية، خدرناها بشكل كامل بمساعدة دكتور التخدير المختص.

ادور فتحت شق بنص صدرها وبنفس الوقت سويت شق بالجزء العلوي من عظم القص حتى اكدر اوصل للقلب.

بعدما وصلنا للقلب، دكتور ساري ركب جهاز القلب -رئة اصطناعية-

  حتى يؤدي وظيفة القلب المتمثلة بضخ الدم لاجزاء الجسم، بينما نشتغل ع قلبها.

وبلشنا نشتغل ع تغيير مسار شرايينها التاجية..

العملية دقيقة جدًا والاعصاب مشدودة.

كل حركة هي بمثابة مخاطرة، فأنت ملزم تسويها بالطريقة الصحيحة.

مر الوقت والساعة صارت ساعتين وهيج ما حسيت الا مرت 5 ساعات..

ركبتي اتشنجت هلكد ما مدنكة، دكتور ساري كذلك!

قلب بسملة تعبان بشكل، خاصة انو هي تعاني من مرض عدم انتظام دقات القلب..

ولهالسبب، هي دتكرر عملية القلب المفتوح..

يعني هاي مو اول مرة تسوي هالعملية، سوتها من قبل بعمر 4 سنين بس رجعتلها المضاعفات الخاصة بالمرض!

ساري: الحمدلله .. تمت العملية بنجاح!

هو كال هيج واني دموعي نزلت..

اعصابي كانت مشدودة وما صدكت شوكت يوخر الجهاز ويرجع قلبها وينطق هالكلمة!

اماني: الف الحمدلله..

فرحـانة بكد تعبي الي تعبتـه والاجهاد الي حسيت بي..

ذبيت ملابس العملية، ووكفت اغسل واعقم ايدية.

اجة دكتور ساري، هم غسل وعقم ايديه.

ساري: مبروك نجاح العملية

اماني: مبروك علينا ثنينـا دكتور

ساري: بس انتِ جنتِ الطرف الي تعب اكثر

اماني: مو مشكلة، المهم تشاركنا النجاح وبسملة بخير هسة

هز راسه مبتسم..

حسيته يريد يكول شي ومتردد ..

اماني: من رخصتك

درت وجهي بس هو حجة.

ساري: لحظة اماني

التفتت وكلت.

اماني: تفضل دكتور اسمعك

ساري: اتمنى تعذريني على الموقف السخيف الي صار ذاك اليوم وتنسيه، وياريت لو توصلين اعتذاري لزوجج وتبينيله جهلي بالموضوع.

اماني: اعتذارك مقبول، شكرا الك دكتور

ساري: لا ولو، اصلا جان لازم اعتذر من زمان بس جنت فشلان منج

اماني: يلا مصار شي

ابتسمتله حتى يهدئ من نفسه، لان خطية كلش متوتر ..

بادلني الابتسامة، ادور طلعنا.

تلكونا امها وابوها لبسملة.

-شلونها بنتنا دكتورة؟

اماني: بخير لتقلقون والعملية الحمدلله نجحت..

امها سجدت بالكاع وبجت من الفرحة..

ابوها تشكر مننا وكال..

- شكرا الكم ماعرف شكول، الله يخليكم يا رب..

ساري: واجبنا هذا.. الله يشفيها

اماني: الله يشفيها، من رخصتكم

-براحتكم عينـي

مشيت وساري ورايه.

ساري: الله يساعد كلوبهم مو هيّنة

اماني: اي ولله شي صعب، الطفل قطعة من الروح، الله لا يراوي احد هالموقف..

ساري امين.

عبرنا ردهة العمليات، طلع بوجهي عقاب.

احتدت نظراته من شاف ساري.

خرب مو وكته هالموقف!

حجة بعصبية
عقاب: اني شكتلك، مو كتلك ابتعد عن مرتي؟؟

ساري: بس اهدئ اخي اكو سوء فهم، الموضوع مو مثلما فهمته

نتر بي
عقاب: ولا حرف!!!

بلعت ريكي بارتباك، هاي شلون سالفة.

اماني: من رخصتك دكتور

عفته واخذت ايد عقاب، اجر بي ماكو مينجر!

عيونه ع ساري عبالك يريد ينتقم منه!

اماني: عقاب!!

عقاب: اني شكتلج؟؟ مو كتلج بس تشوفي يمشي بدرب روحي من غير واحد!!

اماني: عقاب شهالحجي غير هذا زميلي وجنت بعملية مشتركة ويااه!!

عقاب: مشتركة؟

تنهدت.. ملامحه ارتخت وعصبيته قلت نسبيًا

اماني: تعال برا نحجي مو هنا

كعدنا بالحديقة.

اماني: اي وهي هاي السالفة وما بيها

عقاب:ما خرطت مشطي سالفته

اماني: ليش يا حبيبي مو اعتذر الرجال؟! بعدين صدكني ساري انسان اكابر ومحترم، يكفي انت ضربته ومكال شي، لا ومن عرف نفسه غلطان اجة واعتذر،  مو مثل زينب الملطلطة

باوعلي بعدم تصديق وعكد حواجبه..

عقاب: استغفر الله يا ربي.. شجاب تبن بالنص!!

اماني: دا اراويك الفرق بس

عقاب: بعدين نتحاسب مو هنا

اماني: اني هم اكول هيج لان اذا ظلينا هيج ننفضح بكل المستشفى

عقاب: اي ولله

اخذت غراضي ولحكته للسيارة، طول الطريق ساكتين والاجواء مشحونة.

ماعرف شلون افهمه ان هذا شغل، يعني خو ما ادير وجهي واروح واعوف العملية!

ولله شنو زوجي ميقبل اتعامل وية دكتور ساري، هههه.

وصلنا للبيت، نزلت وعفته.

اخذت ملابسي ورحت اسبح.

احس بنفسي محترة هم من الجهد مال العملية وهم من الاعصاب.

طلعت انشف بشعري، لكيته كاعد رجل ع رجل ومكتف ايديه منتظرني.

اماني:  شدتسوي؟

عقاب: كعدي

اماني: جوعانة اريد اتغدة

عقاب: تلحكين، اكعدي

كعدت من لاچارة.

اماني: وهاي كعدت، سولف شعندك

باوعلي بطرف عينه.

عقاب: اولًا لا تحجين وياي بهالاسلوب

اماني: وثانيًا؟

عقاب: اريد منج تجاوبيني بصراحة وبدون جذب

اماني: بخصوص شنو؟

عقاب: ساري

عقجت وجهي بأنزعاج.

عقاب: اكيد مدا يضايقج واعتذرلج؟

اماني: وداعت عيونك الاحبها اكيد

سكت شوية ادور كال...

عقاب: اذا هيج تمام، بس عندي طلب

اماني: عيوني الك

عقاب: روحي هن ..

ابتسمت ..

عقاب: ما تتعاملين وياه او تحجين شي خارج نطاق شغلكم وبس

اماني: ولو هو اني اصلا هيج اسوي، بس تدلل

ابتسم وكمش ايدي ..

عقاب: نكوم نتغدة؟

اماني: يلا

ورا ما خلصنا غدة، دكت عليه ريما.

اماني: ها ولج وين هالغيبة

ريما: موجودة بس مالي خلك شي

استغربت نبرة صوتها ..

اماني: خير بيج شي؟

ريما: ضايجه ومتكئبة كلش

كعدت يم عقاب الي جان ديباوعلي بشكو وفتحت مكبر صوت.

اماني: هاي شكو ريري اول تالي انتِ تتكئبين؟؟!

ريما: ليش مو بشر ؟

اماني: مو هيج ولج، بس انتِ دوم مودج حلو وتلكين شي يشغل وقتج

ريما: الجان شاغله ماهوه

عقاب ضحك وحرك شفايفه بـ "قسورة" ضحكت..
هاي يمكن صدك تحب قسورة!!  

اماني: منوة هذا ولج؟

ريما: ااا.. شغل وهاي يعني مو شي

ما اقتنعت.
اماني: اهاااااا

عقاب همسلي: كوليلها تطلع ويانه اليوم بالليل؟

بعدم فهم سئلته: ليش شكو بالليل؟

عقاب: كوليلهه ومعليج

ريما: انتِ شلونج؟ باتمان شلونه بعده ثلج لو ماع؟ الوو وينج

عقاب فك عيونه بصدمة من كلامها واني كمت انطي الوان، عزة بعينج ريما اطشر العرض.

اماني: ها ها وياج

ريما: باتمان شلونه وضعكم شلونه؟

اماني: حمدلله وانتوا، ماما وبابا وريان شلونهم

ريما: لا تغيرين السالفة، باتمان شلونه وياج؟

بلعت ريكي بقلة حيلة، شيسكتها هاي.

عقاب: يسلم عليج، رايدة شي ام لسان؟

سمعت صوته رئسن سدت الخط، متت ضحك اتخيل شكلها هسة.

عقاب يباوعلي بفراغ واني مستمرة اكركر..

عقاب: كملتي؟

اماني: لا عندي ضحكة شوية بعد

عقاب: يلا خلصيها

اماني: تمام ههههههههه

ضحكت ضحكة جبيرة، ملامحه وتعابير وجهه المنزعجة تضحكني!

اماني: خلصت

عقاب: زين، ضحكة خير گلبي

اماني: يا رووحي..

عقاب: اجة الحجي اليوم وحجينة بسالفة حازم

تذكرت، نسيت اسئله شسوو!!

اماني: اي ولللله!! نسيت اسئلك شصار؟

عقاب: من وصلتج للمستشفى طلعت للمكتب، لكيت الولد كلهم هناك.

قسورة جان واكف يعاتب الحجي.

قسورة: يابة غير تحجي تكول! يصير هيج تجي وحدك، متكول خاف يتعرضولك؟!!

انضميت اله وكلت..

عقاب: يابة اعذرني بس الصار ممقبول ابد، افرض سوولك شي؟

الحجي: اكلتوني حاصل فاصل، ماصار شي وهذا المهم، هسة كعدوا خ نتفاهم

كعدنة كلنة سوة وحجينة هواي، اخير شي الحجي اقترح نحاول نحل الموضوع بودية ونمدلهم ايدنا.

عقاب: يابة تحجي صدك! ذولة قتلوا بنية بريئة حركووها وهي عدلةة!! شتتفاهم وياهم؟

الحجي: نحاول منخسر شي، خلي نهدي الجو بعدين من تنسي السالفة نشتغله

قسورة: خوش حل

ليث: بس منو يكول يقبلون؟

الحجي: يقبلون لان ميريدون سمعة الولد تتشوه

ضرغام: بس يابة هم وكفوا الدعوة ويكدرون حتلو ترجع تنرفع ضدهم يلكولهم فد حل او واحد يشيل التهمة عنهم، مو صعبة

شاهين+ ليث: صحيح

قسورة: حجيك مضبوط بس اكو حل لهالحالة

الحجي: وهو؟

قسورة: نهددهم بأن اذا ما رضخولنا نحول قضية زهرة لقضية رأي عام ونطيح حظ سمعتهم بين الناس

شاهين: علساس هم شلون سمعة عليهم

ليث: اندري شو كلها تصيح كش وبرة منهم!

الحجي: كافي يابة، اني اخذت قراري رح اتصل ع حازم واحاول احلها بالحسنى، اجة للدرب كان بها، ما اجة فهو يتحمل عواقب الي رح يصير، اني لعليه سويته

هزيت راسي برضوخ..

عقاب: لتشوفه يابة

والبقية همين وافقوا ع كلام الحجي.

خابره الحجي لحازم ورحب بالفكرة.

واتفقوا باجر نجتمع عالغدا ويجيب ابن اخوه حتى يلطف العلاقة بيننا عود.

اماني: بكل هالبساطة عقاب؟ وزهرة؟!!!!

عقاب: زهرة حقها محفوظ يمي لتخافين

اماني: بس انتوا رح تتصالحون وياه!

عقاب: حتلو، ثقي وصدكي هالصلح مجرد شكليات حتى الحزبين ميتضررون من ورا العداوة هاي، خلي يهدئ الجو واني اخذ حق زهرة مربع

كلامه طمأنني، عبالي خلص زهرة انست وراحت.

اماني: اثق بيك اني ومتاكدة مراح تخيب ثقتي بيك

عقاب: ليش هو اني اكدر؟!

كالها بمرح، ابتسمت ..

اماني: زين وين كلت نروح بالليل؟

ضحك وكال.
عقاب: اليوم عيد الحُب أمنيتي

ملامحي ارتخت بتأثر.. عيد الحُب ؟ واني وعقاب؟ يربي هواي هيج ع كلبي الصغير..

اماني: كل عام وانتَ...

قاطعني: اششش مو هسة تعايديني، بالليل عود

اماني: ليش شكو بالليل؟

عقاب: مفاجئة!

....

انتهى.

بارت قصير ادري بس باجر هم اكو بارت!😍

-لا تنسوا التصويت 🦋🖤

#الكاتبة نورمين