رواية خطأ طبي «عقاب الاماني» الفصل الحادي والعشرون 21 - بقلم نورمـين

#خطأ_طبي «عقاب الاماني»

بقلــم : نورمين 🦋🖤

...

عقاب: هم بعد تغــــارين؟!

هزيت راسي بـلا ع كيف، ابتسملي ووخر، جان كلبي يدك بصخب لدرجة حسيت عقاب شرد عني من سمعه، بوسته بهذلت احوالي.. تصرفه صدمني لدرجة خلاني صافنة شصار وليش وشنو!!

ليش كلي لتغارين؟ وليش باسني؟ اكيد يحبني ما بيها نقاش!!

...

عقاب

لما حضنتني ميري وشفت بعيون الدكتورة نظرة غيرة، هنا تأكدت من حُبها الي!

ورغم انو اني اريدها تبتعد عني وماريدها تتعلق بيه، بس من شفتها ضاجت ما كدرت اظل واكف بدون ماسوي شي!!

اعترف انو اني دا اعيش صراع جبير مدا يخليني استقر ع السما او عالكاع، بس مستحيل توصل بيه المواصيل انو احبها..!

لعدة اسباب، هالبنية لازم متكون جزء من حياتي، حفاظًا عليها و على سلامتها، لان لا اني شخص ينعاش وياه ولا نمط حياتي المُرعب ممكن الواحد يتحمله.

كاعد بالحديقة افكـر بالصار وكلبي يصارع عقلي بلا نهاية، دك تلفوني وجان قسورة المتصل.

رديت بهدوء.
عقاب: ها بشر؟

قسورة: ماكو ما اجو لسة

عقاب: خاف من رجعت الدكتورة للبيت اجو؟

قسورة: لا يمعود، اصلا من رحتلها وصيت ليث بس يشوف ولد اثنين جايين عليك، يخليهم ينتظروني ليما ارجع

عقاب: يجوز بعدهم يفكرون دا اريد اتصدق عليهم

قسورة: صح ممكن، وممكن ديشتغلون وما لحكو؟

عقاب: ماعرف بعد يجوز هيج، بس علي وعمر عندهم عزة نفس عالية، يمكن اعتبروها نوع من انواع التصدق وما اجو،  ذكروني بينـا قبل!

قسورة: وين رجعتني انت.. عالعموم الله يحميهم ..

عقاب: امين، وصي الحرس هم اذا شافوهم

قسورة:  صار، محتاج شي بعد لو ارجع للبيت؟

عقاب: ارجع حبيب عاشت ايدك

قسورة: تدلل انت

عقاب: مع السلامة

قسورة: الله وياك

سديته ورجعت اباوع ع منظر الحديقة الحلو وشلون الورد طالع ومنطي جمالية للمكان، حسيت ع صوت مشي، التفتت جانت الدكتورة جاية باتجاهي وبايدها جاكيتي.

اول موصلت حطته ع جتافي وكالت.
اماني: باردة مو زين عليك تظل هيج بالبرد واكف

عقاب: متعود هيج ..

اماني: ميخالف اعودك اني ع العكس..

عقاب: متكدرين..

اماني: تؤ.. اكدر!

عقاب: شلون؟

اماني: تحب نجرب؟

عقاب: اي بلا؟

اماني: تمام بس مو هسة، الايام بيننا واذكرك بكل تصرف متعود عليه و تغيره بسببي

عقاب: الثقة الزايدة مشكلة ترا

اماني: صح! لذلك لتبالغ بيها.. اغيرك اغيرك

ابتسمت ع كلامها وشلون فرتها عليه، ورديت.
عقاب: نشوف

اماني: صدك حتاخذ مريم لأمها؟

عقاب: اي اخذها بس لازم اخذ الاذن من الحجي اول شي

اماني: واذا ما قبل؟

عقاب: اقنعه بطريقتي

اماني: تمام

سكتنا.. ورة شوية ورث جكارته وكال.

عقاب: ليش متطبين جوة؟ مو كلتي باردة

اماني: انت ليش متطب؟

عقاب: اني عاجبني الجو

اماني: واني عاجبتني الوكفة وياك بهالجو

عقاب: ليش؟

اماني: ليش برأيك؟

تنهدت.. الظاهر غلطت غلط كلش جبير من بستها، لان بلشت تشطح زايد بتفكيرها، وهذا الي اخاف منه اصلا!

عقاب: دكتورة لا تتعلقين بيه اخذيها نصيحة

اماني: ليش.. شقصدك بما اتعلق؟

عقاب: اني وانتِ مستحيل تنجمع طرقنا بيوم، البيننا مجرد اتفاق لو نسيتي؟

ملامحها تبدلت وحجت بحزن.
اماني: ما نسيت، بس الاتفاق هذا الدتحجي عنه اني ما اعرف شنو هو وشنو شروطه! خليتني اكون جزء منه غصب عني ومتقبل تشرحلي وتوضح شنو سبب هالزواج ولا شنو نهاية هالاتفاق؟!

عقاب: عن قريب، رح احجيلج كلشي وتتوضحلج الصورة

اماني: زين نزل تحديث جديد بمصطلحاتك! جنت تكول بعدين هسة صارت عن قريب؟ واو تطور!

عقاب: اصدمج بتحديثاتي..

اماني: متكدر، لان اني خلص تدبغ جلدي بصدماتك وكمت ما اتفاجئ بأي شي تسوي او تكوله!!

عقاب: شنو مناسبته هالحجي هذا هسة؟

اماني: مناسبته انو انت شخص متناقض، متعرف شتريد ولا تعرف تخلي المقابل يفهم شتريد منه! ساعة تكرهني بعيشتي وساعة تطيرني بالسما، انت لوين تريد توصل وليش دتخليني هيج معلگة؟!

عقاب: كتلج عن قريب احجيلج وساعتها تفهمين، بعدين ماكو داعي تطيرين بالسما، هو شكو اصلا؟
تعمدت احجي بهالطريقة حتى اخليها تبتعد، اريدها تكرهني وتوخر، غلط تحبني وتتأذى بناري!

باوعتلي بأسف وخانتها الكلمات لثواني.

اماني: هم صدك.. هو شكو اصلا!! يعني الوضع كلش طبيعي، واذا الي مسوي نفسه رجال نظامي يبوسج اماني؟ عادي اتفاق! واذا هالرجال يكولج لتغارين ويهتم بمشاعرج؟ هم عادي!! اصلا انت كلشي يمك عادي ومشاعري كلش رخيصة بالنسبة الك.. بس تدري مو انت السبب.. المشكلة بيه اني الغبية الي مصدكتك وحاطتلك اعتبار اكبر مما تستحق.

ببرود كلت.
عقاب: خلصتي؟

هزت راسها مستحسفة.
اماني: انت انسان ميؤوس منك!

عقاب: اي ولله فلا تحاولين وتتعبين روحج وياي..

عافتني وراحت.. تكابر ع دموعها حتى متنزل، بس اني صرت اعرفها من نظرة وحدة، واعرف شتحس وبشنو تفكر، صح يصعب عليه اخليها بهيج وضع بس هذا هو الاحسن الها، لمصلحتها تبتعد عني.

...

قسورة

تعشيت وعمرتلي نركيلة وفتحت تلفوني وكعدت اكلب بي، فتحت الانستا وكليبي رجف من شفت دائرة الستوري مال ريما.

طبيت عليه متلهف واشوفها حاطة صورة الها، وكاتبة اول يوم دوام، جانت لابسة بلوز وتنورة قصيرة للركبة وحاطة عليها الصدرية الطبية البيضاء..

ظليت موكف الستوري وعيوني مترمش، وكفت الصورة يمي وصدى نبضات كلبي العاشقها يتعالى بالجو.

ادور مبتسمة ورافعة شعرها بأيدها، بنت اللذين شعلت صفحة الخلفني، ادري هاي ليش هيج تطلع للعالم؟!!!

سودة بوجهك قسورة ع هالاختيار المعلعل، لا من ثوبك ولا من نفس اطباعك، عبالك اقطاب مختلفة و متنافرة متنجذب ابد..!

صفنت شوية.. لا اصلا الاقطاب المختلفة تتجاذب ما تتنافر، فـ اي اكو فرصة!

كلبت ع الستوري الوراه، جان وياها واحد مصورته وتضحك هي وياه، تكوله نورت عيادتك وهو يكولها اي بلاجكتور انتِ، الظاهر يشتغل وياها، هنا حسيت حرارة صعدت لمخي!!

اعيد بالستوري وعاكد حواجبي بغيض، منو هذا وهيج عدها ميانة وياه!!!

ظليت افكر شسوي شسوي .. اي ارد ع ستوريها.
رديت عليه وكتبت ' تحشيشته قديمة ومتضحك اصلًا'

انركل وكامش التلفون وانتظر شوكت ترد!!

ورة نص ساعة يلا ردت .

- 'محد طلب منك تضحك '

ابتسمت ..
- 'مدامـج ناشرته فمن حقنا ننطي رأينا'

-'غلطان، هذي حياتي والحساب حسابي ومحد اله حق يتدخل ويفرض رأيه، اكو انفولو تكدر تسوي وتريح راسك'

-'شدعوة عليج هيج متطرفة برأيج؟'

-'لان هاي اني باختصار، معاجبك اكو بلوك او انفولو، تريح نفسك وتريحني'

-'واذا مجنت اريد اسويهن؟'

-'اذًا تباوع وتتقبل شـ نشر بلا تعليقات ماصخة'

-'مو بكيفج'

-'دا تجبرني ابلكك ترا؟'

-'حتى اجي اهد ع عشيرتج وانعل جده للدكتور'

-'منو انت؟ منين تعرفنا؟'

-'معجب سري تكدرين تكولين'

شافتها وما ردت بعد، جنت فرحان بـحرب المسجات السريعة هذا، حتى عصبيتي وغيرتي من ذاك الولد اختفت بس بدت ترد عليه.

لعد شكد متمكنة بگلبي هالبنية!!

ظليت اطب واطلع للمحادثة كلشوية اقراها وابتسم..

...

ريمـا

عقلي تعبان من الشغل اصلا، وادور اجاني هذا المعجب السري، خلاني اتصفن واحلل منو هو..

رحت ع ريـان، جان ديقرة حجيتله.

ريان: انطي بلوك

ريما: مو اريد اعرف منين هذا وشمعرفه بينا!

ريان: خيولي تلكي واحد فارغ

ريما: يجوز

ريان: يلا تكسحي منا خ اكمل وراي امتحان

ريما: كايمة كايمة ..

عفته ورجعت لغرفتي، الفضول الي بداخلي منعني انطي بلوك، كلت خليه حتى اشوف شيسوي وشيحجي، بلكي اكدر اعرفه واذا تمادى ساعتها احظره.

دكيت ع اماني.

ريما: هلاو يالبـذاتة

اماني: هلا ريري شلونج

ريما: زينه وانتِ

اماني: حمدلله

ريما: شكو ماكو شلونها الاوضاع يمج، باتمان شلونه؟

اماني: كلنا زينين، انتِ شكو ماكو يمج؟ ماما وبابا وريان شلونهم؟

ريما: هم زينين، بس ترا متنقصين اذا خابرتيني، لو اخابرج لو ماكو متحاجيني، ع كيفج ويانه عيني دكتورة

اماني: حقج عليه بس النهار دوام ارجع تعبانه، الف راسي وانام والليل ضايع شغل

ريما: روتين سخيف، اموت ولا اصير ام بيت

اماني: دخـلي تحصلين اليرضى بيج وبعدين تبطري

ريما: هه مسطرين كفيلج الله، بس أأشر اجيب 5 عرسان بس غير اني ما اريد

اماني: خفي عليه يـ نانسي

ريما: هذي الحقيقة للاسف يا اختااه

اماني: نجبي نجبي

ريما: مشكورة خيتوو

اماني: كلبت سورية الاخت

ريما: لا يـحبيبتي بالراحة علية مش كده، هي أونطى ولا ايه!

اماني: نعم؟

ريما: عارفـاكي بتكرهيني، نيني نيني نيني نينيييي، عاملالك ازمة يعيني.. عيني عيني عيني عيني عينيييييي

اماني: الهي بس العقل لاختي، ماريد منك شي بعد.

ريما: ويعقـلج باتمان هم لتنسينه

اماني: ويكصرلج لسانج ويكبر عقلج

ريما: اللهم امين

سدته بوجهي وراحت، متت ضحك عليها، احب اشاقيها وهي البومة مخلصتها ضايجة ودايخة.

...

عقاب

ساعة 10 بالليل، كلمن بصفحة كاعد، مريم نايمة كالعادة بعد نوبة بكاء فقدت بيها طاقتها.

الدكتورة كاعدة بالمطبخ واني بالصالة.

عالعشـا كوة اكلتلها لكمتين، الظاهر مغثوثة مني لدرجة حتى نفسيتها انسدت، واني مو بوضع احسن منها، بس شسوي.. لمصلحتها.

اخذت جاكيتي وطلعت، كعدت بالسيارة مادري وين اروح ولا شسوي، مخنوك كُلش وما اتحمل اظل كاعد واشوفها هيج ضايجة مني.

خابرني قسورة.

عقاب: ها يابه

قسورة: شلونهم

عقاب: كلش مو زينين

قسورة: مثلنا..

سكت شويه، تنهد وكال.

قسورة: شبيك صاحبي؟ شو مو ع بعضك صار كم يوم لا عبالك ما ملاحظك

تنهدت واخذت نفس قويت نفسي .. وحجيتله اعتراف الدكتورة عن عملية بيري كلش انصدم، ورجعت حجيتله لخبطاتي وياها.

قسورة: وهسة شنو؟

عقاب: قراري واحد ما تغير

قسورة: لك لييييش!!

عقاب: احسن

قسورة: احسن لمنو لك غبي انتت!! انت تريدها وهي هم تريدك بعد شكو؟!!

عقاب: منو كلك اريدها؟

قسورة: عقاب لتبيعهن عليه ذني، عاجنك وخابزك وادري بيك متعذب لان تحبها، ومو من هسة، من اول ما شفتها وبديت تناقض روحك بتصرفاتك!

عقاب: مجرد حجي فارغ ..

قسورة: لك ولله ماكو واحد فارغ غير عقلك هذا!! لك بابا اصحى ع نفسك، ليش تعذبها وتعذب نفسك؟

عقاب: وبيري؟

قسورة: شبيها؟

عقاب: واكفة بيني وبينها، كلما اشوف الدكتورة اتذكرها! ما اكدر اني مستحيل احب وحدة ايدها ملطخة بدم اختي!!

قسورة: مو هستوك كتلي بيري بالحالتين مـيتة؟ بعد شكو ليش دتصعبها؟

رديت بحدة
عقاب: هي صعبة قسورة!!!! صعببببببببةةةةة... حاول تخلي نفسك بمكاني وشوف شكد الموقف صعب!!

قسورة: الحجي ع التلفون هيج ميفيد، تجيني لو اجيك؟

عقاب: لا هاي ولا هاي، خليك بمكانك مالي خلك

قسورة: اصيدك باجر

عقاب: عود الله كريم.. مع السلامة

قسورة: الله وياك ابو راس يابس

سديته وحطيت راسي ع الستيرن، احس شايل الكون كله ع راسي هلكد ما ثكيل والافكار تتصارع بداخله..

دخنتلي جكارة وكعدت اسمع أنا وليلـى لكاظم الساهر، مادري ليش الاغنية داخلة مزاجي.

رجعت للبيت، الدكتورة نايمة عالقنفة، شكد عنيدة اخخ، غطيتها ورحت نمت بمكانها عالكاع.

كعدت الصبح، ضلوعي منعنعة من النومة هاي، شلون تنام الدكتورة هيج مادري، ولو البنية مجبورة مو بكيفها.

دك تلفوني وجان الحجي ديخابرني.

رحت للصالة،  جليت صوتي وخلخلت ايدي بعشوائية ورديت.

عقاب: صباح الخير يابة شلونك

الحجي: يا هلا صباح الخيرات بخير انت شلونك ميري شلونها؟

عقاب: ع حالتها، شوكت راجع؟

الحجي: اني ببغداد

بصدمة.
عقاب: صدك!!! ليش مكتلي لعد جان رحت جبتك من المطار!!

الحجي: ماكو داعي، خابرت قسورة اجاني

عقاب: اذا هيج ميخالف

الحجي: المهم جهزلي بيري حتى اخذها لگبر امها ومناك اسفرها

عقاب: صار يابه

الحجي: يلا ساعة واكون يمك

عقاب: هاهيه

سده، غسلت ورجعت اريد اخذ مي شفت الدكتورة كامت.

غلست عليها ورحت كعدت ميري.

عقاب: ميري حبيبتي.. ميري .. مريومة

كعدت ترفرف بجفونها بتعب، ابتسمتلها وكلت.
عقاب: بابا اجة حتى ياخذج لماما، تكومين؟

كعدت ع حيلها بلهفة وكالت بحماس.
مريم: اكييييد!!

عقاب: يلا لعد كومي

كامت من الفراش بساع، وصلت لباب الغرفة ورجعتلي.

مريم: نسيت اكولك صباح الخير

عقاب: ميخالف، صباح الانوار
ضحكت وراحت، لكيت نفسي مبتسم لا اراديا، اني اكثر واحد حاس بيها وبشعورها.

فقدان الام مو شي سهل، يفطر الگلب ويشيب الراس، هاي واني رجال طول بعرض ما متحمله، هي شلون؟!

مشيت صادفتني الدكتورة وعلى وجهها ملامح عابسة، تجاهلتها وعبرت .. اليوم جمعة فماكو دوام وهالشي معناته حـ نظل واحد مكابل اللاخ اليوم بطوله.

كعدنا نتريك، وميري نوعًا ما احسن من قبل، الاجواء هادئة ولو نظرات الدكتورة متبشر بخير، بس احسن حل اتجاهلها ونشوف شلون تصفى.

الدكتورة لبست ميري من عدها، استغربت انو يتلابسن، الظاهر اني ما منتبه لسالفة أنو الدكتورة ناعمة زيادة عن اللزوم، مدري بيري اخشن من عمرها!!

هسة اني شعليه وهيج مركز!؟

المهم ورة شوية اندكت الباب، واجوا قسورة والحجي.
الحجي جان يباوعلي بغضب مكتوم، لان مكتله جبت ميري للبيت والدكتورة تدري، يمكن قسورة سولفله.

اول مشافته ميري حضنته وكامت تبجي، شالها وكعد بالصالة، وظل يهدي بيها وهي تزيد ما تنقص.

اخير شي كللها اذا متسكتين ما اوديج لأمج، فسكتت. الدكتورة جانت متاثرة بالموقف بس مكتفية بالصمت، محجت ولا حاولت تلفت نظر.

قسورة اجة يمي وهمس.

قسورة: ليلتك سودة

عقاب: ادري ادري

قسورة: من شافني اجيت من طريق بيتك، سألني فجاوبته ببساطة عبالي كايله ويدري، شو طلع ميدري واكلتها بدالك

عقاب: يلا ميخالف تكبر وتنسى..

قسورة: كول لروحك، اليوم يسوي رزالتك عمل شعبي

عقاب: يمـون ..

قسورة: غصبن حبيب ..

ضحكنا وورة شوية رجعنا اندمجنا بجو المشاعر الابوية.

الحجي: يلا باباتي امشينا ..

كامت وياه وصلوا للباب، باوعتلي وردت باوعت للدكتورة وكالت بتعجب.

مريم: شنو بابا عقاب واماني ميجون ويانه؟

انصدمنا، حتى الدكتورة استغربت.

الحجي: شيسوون جايين حبيبتي هو احنه رايحين لامج

مريم: واذا؟
التفتت ع عقاب وكالت بتأنيب.

مريم: عقاب مو وعدتني تاخذني انت واماني البارحة؟

هزيت راسي وانحنيت الها.

عقاب: صحيح، بس بابا اجة وهو رح ياخذج بدالي، مو بلا دكتورة؟

ردت بتوتر.

اماني: ها.. اي اي صح

مريم: معليه، لتجذبون ونفذوا وعدكم الي يلا

باوعت للدكتورة بقلة حيلة، ادور رجعت باوعت للحجي، هزلي راسه بمعنى أقبل، هزيتله راسي بالموافقة.

باوعت لميري وكتلها.
عقاب: مثل متريدين، نجي وياج!

مريم: ايييي ونزور بيري هم حباب؟
كالتها برجاء، بس لحظتها انخطف لوني..

مريم: فدوة وافق، مشتاقتلها هي هم

قويت نفسي ودفعت مشاعري ع جهة ورديت مبتسم.
عقاب: صار، بعد شتريدين؟

مريم: لا هذا هو كلشي ماريد بعد.

اشرت للدكتورة بحضري نفسج، جبت جاكيتي وهي هم، وانطلقنا وية قسورة والحجي للنجف.

الطريق طويل بس ما حسيت عليه لان خلصته صفنات .. ما ظل شي واطب للكاع الي تحتضن اهلي جواها وتحت ترابها..!

باوعت من المراية، جانت الدكتورة ساندة راسها عالشباك وتباوع بنظرات فارغة، مبينة دتفكر وبالها مو يمنا.

وكفنا، جبت بطلين مي وعصاير وكيك لليريد، صعدت انطيتهميا، ظلت بايدي كيكة وعصير، والدكتورة فاصلة عن الجو تمامًا.

اشرت لميري تندسها، نفذت فالدكتورة فزت.

عقاب: الماخذ عقلج يتهنى.  هاج

باوعتلي بأنزعاج وردت.
اماني: شكرًا ماريد منك شي

عقاب: اخذيهم وسكتي

بعناد ردت
اماني: كتلك ماريد!

خزرتها وهسهست ع اسناني بحدة.
عقاب: يلا حبابه

اخذتهن مجبورة لان العيون علينا، شربت مي وكملنا الطريق لحدما وصلنا وادي السلام..

نزل الحجي وميري اول شي، ووراهم قسورة والدكتورة، واني حسيت رجليه ثگال، ما بيه احركهن وانزل..

قسورة: عقاب انزل يلا شمتاني

عقاب: جاي

فتحت الباب، اخذت نفس واستمديت القوة من ذكرى اهلي وطلعت.

مشينا لكبر ام ميري، الحجي وميري بالبداية، والدكتورة تمشي لورا واني وقسورة كدامها.

التفتتلها وجريتها من ايدها.
عقاب: امشي وياي، لتدوسيلج ع شي وابتلي

جرت ايدها مني وكالت بحدة.
اماني: اشوف اني مو عمية

عقاب: اشك بهالشي

اماني: لازم مار بي؟

عقاب: دكتورةة!!!
نترت بيها.

قسورة: هووب هوووب يمعودين صلوا ع محمد

...

انتهى!

لا تنسوا التصويت 🦋🖤

#الكاتبة نورمين