رواية خطأ طبي «عقاب الاماني» الفصل الأربعون 40 - بقلم نورمـين

#خطأ_طبي «عقاب الاماني»

بقلــم : نورمين 🖤🦋

....

عقاب: اريد الولد الي تخشخش بالبداية وعرفلنا ان الدكتورة سوت الخطا الطبي بعملية اختي

ليث: شتريد منه؟

عقاب: اخطبه لخالتي

ليث: ليش انت عندك خالة؟

عقاب: ليث سوي لكتلك بلا حجي زايد واني هسة جاي للمكتب

ليث: تمام بس الدكتورة طلعت؟

عقاب: لا

ليث: ليييش مو علساس هسة تطلعها!!

عقاب: جايكم وافهمكم شصار

ليث: ديلا منتظريك

سديته منه، ودعت زيد وطلعنا اني وضرغام.

خابرت المحامي واتفقت وياه يجي وراي للمكتب هم.

كلت ما لازم اضوج واعيش جو نهاية المطاف..

لان لازم استغل هالجهد والوقت بأن الكة حل واساعد دكتورتي وانقذها من هالورطة الوكعت بيها..

ضرغام: شنو ببالك؟

عقاب: الكة ادلة وشهود ع ان حازم سبب الفساد والدكتورة انجبرت توقع هيج ورقة سخيفة

ضرغام: اصلا واضح وقعتها مجبورة، وين اكو احد قاتل ومهمل فعلا ويوقع على ورقة تدينه تمامًا!!! يعني لو عدهم عقل ويفكرون جان عرفوا ان هاي ورقة ضغط وتهديد!!

عقاب: حتلو جانو يعرفون، مدامها قانونية وتدينها هذا هو المهم

ضرغام: اني مادري شوكت يتطور مستوى القانون وتنفيذه ببلدنا، من نبحث عن قاتل او نعتقل مجرم غير نعرف هو ليش قتل وشنو دفعه لهيج فعلة، نتاكد اذا فعلا هو سوة هيج او لا، مو عالعمياني نجيب ونعتقل مكيفين بروحنه

عقاب: دول عظمى موصلت لهالمرحلة، تريد العراق بامكانياته المحدودة يوصل؟

ضرغام: لا عمي اسفين..

عقاب: القانون فيطي الله وكيلك، ميفيد لو تحجي لسنة لكدام

ضرغام: اي بس شغلة تقهر يا اخي..

عقاب: عادي يابه هذا العراق العظيم، يمرض ولا يموت ..

وصلنا للمكتب، تلكوني الولد اخذتهم ورحنه يم الحجي..

سولفتلهم الصار ووجوههم انكلبت بغضب ..

قسورة: هذا اكيد امير الساقط هو السرب الخبر!!

شاهين: واضحة، حتى تصير عين الشارع عالموضوع ومنكدر نسده بمعارفنا

الحجي: زين انت شراح تسوي؟

عقاب: يابة اني قررت ادور ع كل الموظفين والموظفات الي اشتغلوا بذاك الوقت بالمستشفى، شهادة شخص واحد منهم تكفي تغير هواي امور بمجرى الدعوة.

الحجي: ميخالف، هسة اجيبلك جرد باسماء الموظفين بذيج الفترة وتحقق منهم واحد واحد

عقاب: اي ولله ياريت

انداريت ع ليث..

عقاب: جبتلي الكتلك عليه؟

ليث: موجود، ومنتظر مني رنة

عقاب: زين زين

ضرغام: شتسوي بي؟

عقاب: اريد اشوف منين جاب الاخبار بذاك الوكت، اكيد يفيدنا لان شي طبيعي الموظفين ميعترفون كبل الا تضغط عليهم

قسورة: لك انت عبقررري!!

ضحكت بخفة..

عاد همزين عقلي يشتغل حتى من اكون ضايج، والا جان انلاصت.

شوية واجة المحامي، سولفتله الوضع ..

وكعدنا اتفقنا وياه على كلشي.

-مبدئيًا نحتاج ادلة دامغة او شهود حتى يقوى موقفنا

عقاب: دا اشتغل ع هالشي وان شاء الله باقرب وقت احصلهن

-شد حيلك لعد واستعجل، المحاكمة مباقيلها يومين

عقاب: ان شاء الله

قسورة: زين شنو اسوء الاحتمالات الممكنة، في حال لو لا سامح الله ما كدرنا نثبت شي؟

خزرته، باوعلي بنظرة شكو..

-ممكن تنسجن، لان بقانون العقوبات العراقي اكو فقرة تتضمن عواقب المتهمين بالاهمال الطبي وعقوبتها مو هيّنة ابدا

رفعت حاجبي بتوتر..

عقاب: شلون يعني؟

-ممكن توصل للحبس لمدة 15 سنة مع فرض غرامات عالية وسحب رخصة مزاولة مهنة الطب

انصدمت بكلامه صدمة عمري..!

مجنت متخيل الموضوع جدي لهالدرجة!

طلع اصعب مما جنت متخيل!!!

كملنا، رافقته للكراج يم سيارته..

عقاب: شكرا ع جيتك لهنا، زحمتك وياي

-لا يابة صدك جذب، تدلل انت والعقيد

ابتسمت بخفة.
عقاب: تسلم

-انتظر منك خبر

عقاب: ان شاء الله

تصافحنا وراح ..

خليت ايدية بجيوبي وتمشيت بكراج المكتب لدقايق..

افكر بكل الصار وشلون جنة مكيفين بيوم العزيمة وفجأة انكلب كلشي ع روسنا بدون منستوعب حتى شصار!

بعدما عرفت العواقب، صارت المسؤولية عليه اضعاف قبل..

لا يمكن اسمح بأن اماني تتأذى، نتيجة شي هي اصلا مالها اي يد بي!!

رجعت للمكتب..

جابلنا ليث كهوة، شربتها واحس راسي مصدع..

بس مو صداع طبيعي، لا صداع الخوف والقلق على اماني..

اخذت رشفة منها..

الكهوة حارة، تذكرت من جانت تشرب كهوة ويحترك لسانها وتظل تعفص بملامحها بألم..

شكد شكلها لطيف، ابتسمت بحسرة..

وكمت طلعت برا، مختنك حيل وتاليها يا ربي..؟!

شوية وصاحلي ليث..

ليث: اجة الولد عقاب

عفت كلشي وطفرت متلهف..

ليث: هذا صاحبنا اسمه سجاد

صافحته..

عقاب: تشرفنا

سجاد: الي الشرف

كعدت وبديت ..

عقاب: ندخل بصلب الموضوع

سجاد: يلا

عقاب: من قبل، جبتلي خبر عن طريق واحد من جماعتي بأن الدكتورة سوت خطأ بعملية اختي رغم الموضوع جانوا متكتمين عليه حيل وحتى زوروا وثائقه ..

سجاد: اي تذكرتها، شبيها؟

عقاب: تكدر ترجع تتواصل ويه المصدر الي انطاك المعلومة؟

سجاد: تمام بس اكدر اعرف السبب؟

تنهدت.. منين ابديله هسه اكيد ينصدم اذا كتله الدكتورة زوجتي والي دا اسوي حتى انقذها من المحاكمة!

سولفتله كلشي، الولد عادي ما انصدم ولا سوة حركة ممكن تخليني اخذ موقف منه..

بالعكس جان يسمع بتفهم.

سجاد: ها افتهمت، تريد اساعدك والكة شاهد يفيدك بقضيتها؟

عقاب: بالضبط

سجاد: سهلة، بس تكلفك

عقاب: شتريد اني حاضر

سجاد: مو الي الله شاهد وليث يعرف اني ما اخذت فلس من قبل حتى اخذ هسة

عقاب: حق تعبك يابة

سجاد: لا انتوا بحسبة ليث، ماكو بيننا فلوس

عقاب: تسلم تسلم اخونا ان شاء الله

سجاد: ان شاء الله، بس هي علمود المصدر لان منهم وبيهم وشكلك يعني، عينها فارغة لو شكد متنطيها متقتنع واذا راويتها فلس تكت الاول والتالي

عقاب: هي هاي الادور عليها اساسًا!

سجاد: سهلة، دكتورة تيا اكيد تعرفها زوجتك لان جانن زميلات بذاك الوقت

عقاب: ماعرف ما اتذكر حاجيتلي عنها..

سجاد: اي مو مشكلة، اني احجيلك

عقاب: تفضل

سجاد: تيا جانت دكتورة زميلة للدكتورة اماني، هي اختصاصها باطني وجانت شاهدة على هواي مواقف وحالات وفاة باخطاء طبية لاطباء هواي، بس جانت تسكت بتحريض من حازم وهم لان عدها الموضوع عادي مو فد شي مهم

عقاب: شمدريك بكل هالحجي انت؟

سجاد: تقربت منها، وهي من النوع لتنطي مجال خاصة اذا المقابل حليو وشخصية

كالها بغرور ابتسمت..

عقاب: ما شاء الله عليك، اي كمل

سجاد: وكلتلي ان اماني اضطرت تسوي هواي عمليات خارج تخصصها بسبب طيبة گلبها وهم لان حازم جان يجبرها بحجة الدكتور الاختصاص ماكو انتِ بداله

عقاب: الله يحرگه بكبره بجاه كل من عنده جاه..

سجاد: اميييين

عقاب: كمل حبيب..

سجاد: وحدة من هالمرات صادفت حالة اختك وماتت الله يرحمها، حازم هو الي زور التقارير مو والد الدكتورة لان ما راد تجي حجاية ع مستشفاه

عقاب: استغفر الله.. هالحجي هذا ليش ما كلته من البداية؟

سجاد: ليث مطلب تفاصيل، كال اعرفلي اذا هي خطأت بالعملية لو لا

عقاب: بس اني اتذكر قسورة هو الي كلي

سجاد: اي جنت ع اتصال مباشر وياه لان ليث برة الصورة

عقاب: اهاا تمام

سجاد: اي، ولحسن حظك اني لسة على اتصال وياها واكدر اخذ منها الادلة الي تحتاجها بالدعوة

عقاب: لك عااش!!

سجاد: ولو

عقاب: بس استعجل فدوة لعينك

سجاد: شغلة ساعات والدليل يمك لتهتم

طلع واني مكيف، اي يا رب افتحها بوجهي فدوة لاسمك..

حجيت للولد التطورات، وطلعت للبيت..

اول ما طبيت حسيت خنكتني العبرة..

نفس الاحساس الي مريت بي بيوم وفاة بيري..

نفس الخنكة نفس الالم نفس الاحساس بالضبط..

خليت السويج عالطاولة وكعدت عالقنفة ورجعت راسي لورا بتعب..

عقاب: مو بس البيت، حتى حياتي فارغة من دونها..

كمت سبحت وبدلت وكعدت انتظر مكالمة من الولد او من سجاد ..

.....

اماني

كاعدة بالكاع..

لامة رجلية لصدري ومدنكة راسي عليهن..

ولافة ايدية داير مداير نفسي واهز بجسمي ..

التفكير ذبحني والدقيقة هنا تمر بسنة ..

ادور ما اعرف مصيري شنو ولا اعرف عقاب شديسوي ..

خايفة عليه يتورط بسالفة وهو ديحاول يلكالي حل..

جابو الاكل، باوعتله وحطيته ع صفحة ..

نفسيتي مسدودة ومن اجيت لهنا ولسة محاطة بحلكي لكمة ..

لعبانة نفسي من كلشي وحتى من روحي!

شوية وسمعت صوت ضحكة عايقة وفضيحة فد مرة..

غلست كلت شعليه، ادور الصوت بدة يقترب ووياه صوت خطوات..

ثواني وتوضحت الصورة كدامي، شرطي جاب وحدة استغفر الله من وجهها تشع الرذيلة..

تطك بالعلج وحمرتها شاطحة وهذا لوياها رايح منتهي، اييع الاصوات السمعتها منهم!!

لميت ملامحي بقرف ودرت وجهي ..

-ديلا فوتي عاد

-ليش متفوت ويايه نتونس؟

-بعدين بعدين، يجوز لليل اجيج

-خوش لعد انتظرك يحلووو

جرته من ياخته وحجت، نبرة صوتها تجيب القيئ من كدما تتماوع بيها..

الله يعينني عليها شلون رح اتحمل هيج شكول!

طبت وسد الباب وراح..

وكفت باوعتلي، يمكن من كد طيحان حظها ما انتبهت لوجودي.

-سلام يحلوة

درت وجهي عنها

كعدت ع صفحة وكالت ..

-السلام لله لو هاي متعرفيها

اماني: اعرفها شبيه ما اعرفها

-عبالي خرسة

اماني: اطمني لعد

- زين

كالتها بسخرية، اطك بعلجها لعبت نفس نفسي!

وكلشوية تحجي تحاول تفتح موضوع وياي بس اني منطيتها الاذن الطرشة..

اخير شي جابولها اكل، كعدت تاكل يلا شوية سكتت عني..

وراها بساعة تقريبًا ..

-اكلج انتِ شنو تهمتج؟

اماني: ميخصج

-اهووو هم مجرمة وهم تفيك براسي، يابة مو كلنا بالهوا سوا عليمن هالخشم اليابس يا عيني

اماني: لا بالهوا ولا بالمي، انتِ وين واني وين رحمة لربج شهالشكل هذا!!!

كامتلي، اخذت نفس قويت روحي ..

اني شحجاني، تورطت وياها وهي مبينة وحدة شرانية..

بس ولله لعبت روحي منها هلكد ما لغت براسي!

وكفت كدامي وحجت بجدية ..

- شبي شكلي؟ ميعجب؟

اماني: مو هذا قصدي، بس اسلوبج ..

ضحكت باستهزاء..

-اهلج عايشين؟

اماني: اي الحمدلله

-حلو، زين انتِ شتشتغلين؟

اماني: ليش دتسئلين؟

-جاوبي!

اماني: اني دكتورة

-واهلج شيشتغلون؟

اماني: اطباء

سوت حركة تعجب وكالت ..

-هه.. حقج تشوفين روحج عليه وميعجبج شكلي لعد، اذا اهلج كلهم دكاترة

اماني: بس اني مو هذا لقصدته..

-حتلو، دكتورة خلي اكلج شغلة وخليها ترچية بأذنچ..

ظليت اباوعلها بترقب، ملامحها اللعوبة تغيرت لاخرى حادة..

-مو الكل عنده حظ مثلج، ينولد ويعيش حياته بنص عائلة محترمة، ترعاه وتكبره وتعلمه الصح والغلط، اني والمثلي انجبرنا ع هالحياة و ع هالاطباع والاشكال الي معاجبتج.. اي ممكن تباوعيلي بنظرة دونية، بس فنچ تجين تعيشين ربع العشته.. اني عشت ظروف صعبة اذا مرت عليج متاكدة تدمرج بس اني جنت اقوى من كلشي، صح عايشة بمستنقع قذر بس هذا الي فرضته عليه الدنيا، فلا انتِ ولا غيرج يحقله يحجي او ينطي رايه عديم النفع بينا ..

جانت تحجي بحرگة.. انقهرت عليها من صدك..

الواضح عايشة ظروف حيل صعبة..

وصدك هو الانسان ينحط بظروف قاسية

اكبر مما يكدر يتحمل وينجبر يختار الغلط مرات ..

رجعت كعدت وظلت هادئة..

عرفت انو هاللسان والطبع القوي وراه جروح واهات..
ضامتها بقناع اللعوبة وبنت الليل..

حسيت بالذنب..

فحجيت بهدوء واني اباوع ع الكاع..

اماني: اسفة اذا ذكرتج بشغلات قديمة، مجان قصدي اضوجج بس اني تعبانة واعصابي تالفة..

رفعت راسي باوعتلها، لكيتها تباوعلي فكملت..

اماني: انتِ قوية، يكفي كدرتي تعيشين وتكافحين بنص هالمستنقع، وحدة غيرج جان استسلمت وانتحرت وخلصت .. ولا عبالج دكتورة واهلي اطباء وواصلين يعني معدنا هموم، ثقي بالله كلمن همه شكل ومحد مرتاح بهالدنيا.. اكو شغلات انتو متشوفوها بحياتنا، تأذينا وتاخذ من طاقتنا .. اني مثلج، الحياة هم فرضت عليه خيارات صعبة، وخلتني امشي بطريق اني اصلا ما اريده.. وجبرتني اتعايش وياه..

- شسويتي وليش محبوسة؟

اماني: قتلت مريضتي بالخطأ.. ورفعوا ضدي قضية اهمال طبي وهياتني كدامج .. لا تفيد دكتورة ولا يفيد اهل واصلين!

باوعتلي بحيرة، جنها هم انصدمت، عبالها بس هي الي الدنيا عاكستها..!

....

عقاب

لليل رحت لعقيد زيد..

زيد: شطلعت هاي كلساع هي!!

عقاب: شنو كلساع غير مرتي شبيك انت

زيد: افتهمنا بس مو هيج كلسا مسيرلها شجاك!

عقاب: اريد اشوفها زيد شتحجي انت شنو كلساع!!

زيد: عقاب ترا مو بيت ابوية وبكيفي اطببك واطلعك، سجن وضباط ودنية!

عقاب: مالي علاقة، عسى ما ادفع فلوس الدنيا كلها انت حلها

تنهد ورد من لا چارة.

زيد: دمشي كدامي

طلعنا للمركز ..

صدك رهمت برشوة لان الجماعة عينهم جوعانة، بس تورقلهم يبيعون الاكو والماكو.

اكو وياها وحدة بعد شكلها مو راحة ..

جانت تعبانة مو مثل البارحة من شفتها ..

كمشت ايدها واخذتها ع صفحة.

عقاب: شلونج امنيتي؟

اماني: الحمدلله وانت، شو وجهك اصفر بسلا متاكل؟

عقاب: عوفج مني، انتِ شبيج ذبلانة؟

اماني: ما بيه، عادي

جانت تتهرب بنظراتها..

كمشت حنجها وخليت عيونها بعيوني

عقاب: لتحرميني من شوفتهن بهل كم ثانية..

جعدت ملامحها بضيق..

عقاب: اعرف المكان هنا مو مريح واعرف انتِ دتنطفين ببطئ بين هالحيطان، بس وداعتج دا اتحرك بكل طاقتي واكو بشاير خير جاية

اماني: اني كتلك الموضوع يمي انحسم، سواء بشاير خير او شر، عادي ما اتاثر شيصير خ يصير

عقاب: شهالحجي شبيج بنيتي اني ع شنو دا اركض لعد!

اماني: لتركض ولتسوي شي علمودي، كتلك عوفني اخذ عقابي وهذا هو خلص!

عقاب: مالج عقاب غيري ، خليها ببالج متروحين من ايدي لو ع كص ركبتي!

حجت هاي المسجونة..

-ديلا عيني ما خلصو جاك و روز مشهدهم الرومنسي؟

رديت بنترة..

عقاب: وانتِ منو داسلج ع طرف؟

-اووخ، قاسي .. هنيالج علي دكتورة، بس ترا اني احب القسوة..

غمزت وسوت حركة بوجهها، لعبت نفسي منها..

همستلي..

اماني: عوفها تولي..

عقاب: شنو هالقذارة هاي لا تدنيلها!

اماني: علساس عندي حل ثاني

عقاب: حتلو، ختولي احجي ويه الحايط ولتحجين وياها مبينة مو راحة

اماني: ميخالف

عقاب: عفيه بنيتي ..

بست كصتها وهمستلها..

عقاب: بالج ع نفسج يـنَفسي..

همهمت بموافقة، طلعت واني رجل لورا ورجل لكدام ..

افرجها عاد يا ربي ..

...

اماني

بس طلع عقاب، دموعي نزلت برهاوة ع خدي.

-لتبجين، هي هالكم يوم صعب بعدين تتعودين

اماني: شـ تعود هي سهلة!؟

-لا مو سهلة بس التعويد يقلل صعوبتها لتظلين تتعايرين

باوعتلها باستنكار ..

اماني: انتِ شبيج!

-ما بيه بس مو جنج تتعايرين زايد ع الزلمة؟ اوووف شلون زلمة هو، بشرفج شلونه ب..

قاطعتها وكلت بغضب..

اماني: اشششش حرف واحد ما اسمع منج شهالحجي شكد سخيفة!!!

-اوي عيني شبيج هديتي عليه، شكلنه هو بس سؤال

اماني: لتسئلين لعد ولتحجين وياي البيه مكفيني ما ناقصتج!!

-وهاي كله لان كتلج شلونه؟ هه الواضح رب الزين مدام هيج انكرصتي

ظليت فاكة حلكي هاي ليا مرحلة من الوقاحة توصل بعد!

-ولج تحبي مووو؟

اماني: وانتِ شكو ليش تدخلين بشي ميخصج؟!

-لعد شلون نكضي الوكت، تسولفيلي مغامراتج واسولفلج مغامراتي وهيج نتونس وناخذ خبرة من بعض شبيييج يحظييي

تحجين بطريقة تثير الشبهة، كشت روحي منها ..

اماني: اصفن بالحايط احسلي بهواي من الحجي وياج

-وشبيه يمه ومتحاجيني ابزز لو مو من مستواج يالدكتورة؟

اماني: شوفي اسلوبج تعرفين ليش

-وشبي يمه اسلوبي، شو فري وشحلاتني بس انتِ مدلغمة جنج بومة، بسلا هيج تظلين كدام رجلج الحليو؟! يبووو عليج اذا صدك

اماني: الحجي بيج ضايع!

خزرتها ودرت وجهي عنها، عفيه بشر شنو هالقابلية شنو هالسخافة هاي!!!

ولو شتتوقع منها وهي واحدة بايعة ومخلصة، اكيد عدها السوالف ذني زلاطة.

....

ريما

بعد مكالمة البارحة وية قسورة..

ظليت ع اعصابي اتحرك وكلشوي اشوفه اذا اختي طلعت لو لا..

كوة كدرت اضم السر عن اهلي، ممتعودة اضم عنهم شي مو ادور هيج شغلة جبيرة وتخص اختي!

للعصر..

خابرت قسورة لان بعد ما اكدر انتظر اكثر، كلبي خلص من الانتظار وعقل مظل براسي كمت امشي واحجي وية روحي..

رد عليه..

قسورة: ها ريما

ريما: اختي وينها شو اخابرك مترد، طلعت لو لا؟

قسورة: جنت مشغول ومشفت التلفون

ريما: مو مشكلة هسة، اختي وينها؟

قسورة: بالسجن بعدها

الصدمة احتلت ملامحي..

ريما: شنو بعدها انت مو كلت الصبح تطلع؟

قسورة: ما رهمت ..

ريما: شنو ما رهمتتتت لكك اختتتي!!!!!

قسورة: لصيحين ! دنشتغل حتى نطلعها والشغلة مو سهلة قضية اهمال طبي والمواقع كلها تحجي بيها مشفتي الانستا ترا محترك!!

ريما: لك يا انستا اني بيا حال، من بارحة واليوم اكل بروحي ومنتظرة منك خبر يفرحني تالي تكلي اختج لسة بالسجن، تلعب عليه لو شنو!!!!

قسورة: يابة لا بس اسمعيني ..

ريما: شسمع انت شخليتلي، لك حتى تخليني بعد ما اصدكك!!! انت مو البارحة كتلي الصبح تطلع ليش تجذب عليه، ليش ما طلعت وهذا عقاب افندي وييين ليش ميسوي شي لو عاجبه شكل اختي بالسجننن؟؟

جنت احجي بحركة واعصابي تلفت..

وما احس الا صوت بابا اجة من ورايه وهو يحجي بصدمة..

رياض: اماني بالسجن؟!!!!!

......

انتهى!

لا تنسوا التصويت والتعليق 🦋🖤 ..

#الكاتبة نورمين