رواية خطأ طبي «عقاب الاماني» الفصل الحادي وأربعون 41 - بقلم نورمـين

#خطأ_طبي «عقاب الاماني»

بقلــم : نورمين 🖤🦋

....

عقاب

كاعد بالبيت ودا اشرب كهوة ..

راسي مسطور وحالتي حالة، الاكل ما اشتهي احطه بحلكي، مخلصها سوائل..

دك تلفوني، اخذته بلهفة.

عقاب: ها سجاد بشر!

سجاد: لتريده تم!

هو كال هيج واني ابتسمت بفرح وصحت..

عقاب: لك عاااااااااششششش!!!!

سجاد: تدلل، افتح واتس رح ادزلك التسجيل الصوتي

عقاب: يلا

سديته، طبيت للواتساب دزلي التسجيل الصوتي للدكتورة تيا وهي تكول..

سجاد: دريتي بسالفة الدكتورة اماني الي جانت وياج؟

تيا: اي لعد شلون، الدنيا كلها تحجي بيها

سجاد: مادري بس يكولون لزموها عن طريق ورقة مدونة بيها كل اعمالها واخطائها الطبية وموقعة عليها!

تيا: اي اعرف، هذا حازم مدير المستشفى مالتنا الي توفى من فترة هو الي جبرها توقع حتى متبلغ علينا.

سجاد: ليش هيج سوة؟

تيا: لان هي جانت عشتو من نوع متقبل بالغلط ودوم واكفتلنا سجينة خاصرة. واصلا تستاهل تنحبس، ما قصر بيها حازم الله يرحمه جان يدري بيها غبية، بحجايتين تتقشمر وتكت الاول والتالي وتورطنا

سجاد: ها يعني هي ما كتلت ولا سوت شي من هذا لموجود بالورقة؟

تيا: لا عيني وينها وين جروخها، هي مالها علاقة بس جان لازم نلبسها هيج تهم حتى متحجي عننا، والا هي حتى بحالة المريضة بيري، ما ارتكبت جريمة، لان بخطأها الطبي وبدونه هي جانت حتموت بالتسمم

سجاد: اهاا ولله عمي طلعتي مو هيّنة

تيا: شعبالك لعد، انت مو تدري بيه؟!

سجاد: اي ادري ادري..

انتهى التسجيل واني مكشر بملامحي، الحقيرة شلون تحجي عبالك مسوية انجاز!!!

بودي اخنكها هسة على هالحجي هذا!!

كتبتله لسجاد..

عقاب: عاشت ايدك، بس هيج وحده مو كافي تدري مو؟

اتصل، فتحت خط..

سجاد: شلونه الشغل؟

عقاب: مية مية، بس اذا هيج متمشي شغلتنا، تعرف التسجيلات ممكن تتفبرك وتالي تطلع حجتنا مو قوية

سجاد: اعرف ولذلك اسمع هذا التسجيل الي رح ادزه الك هسة.

عقاب: تمام

سد الاتصال وانتظرت يدزلي التسجيل الكال عليه.

قسورة كل شوية يدك وارفضه، ثولني.

شوية ووصل التسجيل، حملته وفتحته.

بلش بصوت دكتورة تيا تتوسل وتبجي..

تيا: لا سجاد الله يخليك تريدني اتدمر!!! امسحه فدوة اني وثقت بيك وكتلك كلشي يخصني تالي هيج تجازيني ع ثقتي بيك!

سجاد: حجي يفيدج هذا، تجيبين الوثائق الاصلية لو لا؟

تيا: لك يا وثائق شتحجي انت ماعرف ع شنو دتحجي!!!!!!!

سجاد: افاا، متعرفين؟

تيا: ولله ماعرف ع شنو دتحجيي ولله!!

سجاد: شالج الله يا جذابة

تيا: انت ليش مدا تصدكني!! اني معندي شي ولا اعرف وثائق ولا ابد

سجاد: خلي اعرّفج لعد، الوثائق والاوراق الاصلية الخاصة بالمرضى المتوفين بأخطاء طبية والي زورتوهن لحتى يطلع الموضوع موت فجائي نتيجة السكتات القلبية او الدماغية.. تذكرتي؟

تيا: لا انت ناوي تدمرني رسميًا!! شلون تريد اسلمهم الك، هاي الاوراق بيها حبل اعدامي!

سجاد: اعرف متشوفيني اريدهن؟

تيا: ما انطيكياهن وشتسوي سوي

سجاد: هيج صارت؟ اممم لعد لتلوميني ع الي رح يصير بعد هسة.. مو تجين تبجين هاي حذرتج من هسة

جان يحجي ببطئ مستفز وهي تبجي، اخير شي كلتله..

تيا: لك ماعرف وينهن ماعررررف مكانهن، مدري وين ضامهن حازم مادري بيهنننننن!!!!

سجاد: بلي تعرفين تعرفين، واحسلج تدزيهم قبلما انشر تسجيلج الصوتي بكل مواقع التواصل، وساعتها مو بس سمعتج تتدمر، مهنتج وحياتج كلها واحتمال حتى تاخذين مكان الدكتورة اماني المظلومة بالسجن، فشتكولين نخلي اللعب ع الهادي لو نلعب ع المكشوف؟ شيعجبج اختاري اني ماعندي مشكلة

تيا: الله ياخذكككككككك حيوواننننننن

صاح بيها بنفاذ صبر..

سجاد: اشششش دوختيني ليسمعج يصدك مظلومة، ميدري بيج حية رگطة من جوة لجوة تلدغين وتضمين راسج

انتهى التسجيل، لكيت نفسي مبتسم براحة..

كتبتله: ولله سبع، ممنونك هوااي

رد عليه: واجبي ولو

احس هم جبير مثل الجبل انزاح عن صدري، جان خانكني!!

هالحجي معناه التسجيلات والوثائق دليل كافي ع براءة امنيتي!

كمت دا اتصل ابشر الولد..

دكيت ع قسورة.

قسورة: لك صار ساعة ادك ليش ترفض!!

رديت براحة.
عقاب: لكيت الادلة الكافية حبيب!!!

قسورة: بعدين احجيلي، خ اكلك شي مهم

عقاب: اكله لكيت الادلة ورح اطلع اماني يكلي شي مهم، شنو الاهم منها هسسسسة!!!!؟؟؟؟

قسورة: اهلها

عقاب: شبيهم؟

قسورة: دروا..

فركت وجهي بضياع..

عقاب: ميخالف، مصيرهم يعرفون واصلا متفاجئ شلون هسة يلا دروا، والمواقع كلها تحجي بيها معقولة مشافوهن!

قسورة: مادري بس اني السبب

عقاب: شلون؟

قسورة: حجيت لريما وهي فلتتها كدامهم بالغلط

تنهدت بغضب مكتوم ..

عقاب: اني مو وصيتك متحجيلها شي؟ ليش حجيت؟

قسورة: كلتلي مختنكة مدري شبيه ..

عقاب: وانت كمت تتراجف وزعتلها الاول والتالي؟

قسورة: اي..

جان يحجي بنبرة متأسفة..

ملامحي الغضبانة اختفت وحجيت بسخرية.

عقاب: ابني شوكت تبطل من گلبك الرچيچ هذا مو رح يطيح حظك من وراه!

قسورة: شبيدي متكلي، هو يمها ويستسلم

عقاب: مغسل لفك ولفه

قسورة: تمون..

عقاب: غصبن، وهسة وخر عني فرحان لتخرب فرحتي

قسورة: لا اني شكو، دكتور رياض رح يجي يخربها عليك ع حسب الاصول

عقاب: ديلا ميخالف هي خربانة خربانة

سديته منه، شوية واندكت الباب دكة قوية.

عرفت هذا رياض، رحت فتحته وطب هو ومرته وريان مثل الاعصار يغلون من الغضب والاعصاب.

ريان: عقاب شديصير اختي ليش محبوووسة؟؟

رياض: بنتتتتييييي ووووويييييينننننن!!!!!!!

عقاب: اتصور تدري وين، ليش تسأل؟

كمشني من ياختي وجرني، حجة بتهديد..

رياض: تدري اذا اماني صارلها شي شسوي بيك؟

رديت ببرود..

عقاب: شتسوي؟

رياض: اشرب من دمك ولله لا عبالك سكتت ع زواجكم معناها مسترخص حياة بنتي ادمرك ولله عقاااب!!!!!

وخرت ايديه عنّي، نكثت ملابسي وعدلت ياخة قميصي وكلت..

عقاب: الحجي هذا اني اكوله الك يا سيادة الدكتور لان انت سبب الي ديصيرر!

رياض: انت صاااحي لروحك شدتحجييي؟

خزرته بنظرة شرارية، فوك ما بسببه موقعة ع هيج ورقة وحضرته جاي يهدد!

ريان: عقاب شبيك لخاطر الله!

سما: شدتحجي انت هاي فوك ما مدرت بالك عليها ولا كلتلنا بالصار جاي بكل عين صلفة تذب الصوج بينااااا

عقاب: اي انتو السببب!!! وين جنتو من وقعت هالورقةةةة؟؟؟ ويييين جنتو من حاولت تشيل تهم مالها علاقة بيهن بس في سبيل متشوه سمعتكم؟؟ وين جنتو بوقت ضغط عليها حازم وهددها بيكم وراد يفضحها؟؟؟؟؟؟؟ وييييييننننننن جنتوووو كوووولوااا!!!!!!!!

ظلوا الوجوه مصدومة وكل حجايه مطلعت منهم..

عقاب: لو شاطرين من يوكع الفاس بالراس تجون تلومون عقاب؟ بس خلي اكولكم شغلة، ما دام خشمي يشتم الهوى اماني حتكون بألف خير، واهتمامكم المزيف هذا خلوه من تطلع لان اني خلص لكيت طريقة اكدر اطلعها بيها من السجن الي ذبت نفسها بي علمودكم!

امها تمتمت ..

سما: صدك؟ يعني بنتي حتطلع الله يخليك احجي شي!

هزيت راسي وتنهدت..

عقاب: اي حتطلع

ريان: شلون؟

عقاب: هاي خليها عليه، يجيكم الصافي عود

باوعت لرياض بطرف عيني وعبرته، اخذت جاكيتي وطلعت ..

امشي وبين ابتسامتي اكو خيوط حزن..

بس اصبر روحي بكلمة الميخالف وتهون..

...

اماني

صار الليل والسجن اظلم عدا عن كم ضوة خافت..

شعور الاشمئزاز والقرف يزيد بداخلي تجاه هالمكان دقيقة ورة اللخ ..

ووياها يتضاعف الخوف والقلق من الجاي..

اني صح اكول لعقاب عوفني اخذ عقابي الي استاهله بس بيني وبين روحي خايفة وما اتمنى انحبس ابد..

بس هيج من لاجارة احجي حتى بلكي يعوفني ويلتفت لنفسه.

جانت هاي الوياي دتتعشى..

اني اكلي ركنته ع صفحة كالعادة.

-ليش متاكلين؟

اماني: ما اشتهي

-وليش متشتهين دباعي الاكل شون طيب

اماني: اكلي انتِ بالعافية

-يعني اخذ حصتج؟

اماني: اخذيها

جرتها من يمي بسعادة ..

للحظة حسيتها طفلة وانطاها احد حلويات، تكيف بيهن وتفرح..

ما خلت تفكيري عنها بلطف يستمر، لازم تكطعه بسوالفها الماصخة.

-اكلج انتِ عايشة حياة زوجية مستقرة؟

سألتها باستغراب..

اماني: ها؟

-شنو ها، دا اقصد حياتج الزوجية زينة؟

طخ ببالي شتقصد..

اماني: بشنو يهمج تعرفين؟

-ما يهمني بس خلي انطيج كم نصيحة لان الواضح انتِ مطفية وهذا الحليوة يطفر منج اذا تظلين هيج وياه

اماني: ياريت تحجين بادب شوية

-ديلا هسة حمدي ربج مدا افشر، زين من اجت بس ع الحليوة

مدري ليش ضحكت، يربي هاي متنكره بس بنفس الوقت لسانها زفر متنحزر سوالفها!!

-دباع الضحكة تسطر منجرمن الاخ مسيس بيج

اماني: شنو مسيس؟

غمت كصتها..
-مسيس ما تعرفيها، هنيالي

اماني: هسة غير تحجي

-يعني غركان هيج شي

اماني: هاااا هيج

-اي اي هيج، وهسة مكتيلي شلونها الاحم احم؟
وغمزت..

استغفر الله، اني امي محاجيه وياي بهيج موضوع ولا حتى اختي، وهاي تريد بالقلم العريض تحجي!

اماني: زينة زينة

حطت اصبعها السبابة والابهام ع حنجها بوضعية تفكير وحجت بشك..

-من حجيج مبين مو كلش زينة، بس ميخالف مبينة فطيرة انتِ تعاي اعلمج كم شغلة تفيدج تخلي ميشوف غيرج ويبوس الكاع لتمشين عليها

ظليت مصفصفة من التعبير، خاصة هي تحجي وتأشر بايديها.

اماني: شحده يشوف غيري اصلا!

-ع فهاوتج هاي، يشوف وحادي مو وحده

اماني: عود صدك؟

-اي لعد شنو، هم الزلم يحبون المرة الفاهمة مو المطفية

اماني: بس عقاب مو هيج!

-شمدريج؟

اماني: ادري، غير معاشرته واعرفه!

-هسة اني حعلمج كم سالفة، طبقيهن اذا شفتي جابن نتيجة كان بها واذا مجابن عوفيهن، مو اجباري الشغلة.

اماني: تمام بس اكدر اعرف ليش هيج مهتمة بهالموضوع انتِ؟

-حبيتج بصراحة، تذكريني بفطاريتي مال قبل

حجت وهي سارحة بنظراتها بغير اتجاه، مدري ليش تعاطفت وياها، اففف..

بدت تحجي بالخط العريض وتفصل وتكلي سوي هيج ولتسوين هيج، واني صرت حمرة من الخجل..

وكلما اكول هذا هو متعبر اكثر، تفاجئني وتطلع ترابي!!

.....

عقاب

ثاني يوم الصبح، بحدود ساعة 10 الصبح ..

جنت طالع للمكتب حتى التقي بالمحامي ومنها استلم الوثائق من سجاد.

بس الصدمة من اندكت الباب..

فتحتها وعيوني مو يمها، جنت دا البس بجاكيتي بس خلست من سمعت الصوت..

اماني: عقااب..

الصدمة سيطرت ع ملامح وجهي وعيوني توسعت بصدمة..

ومطلع مني غير كلمة..

عقاب: اماني!!!

هزت راسها مبتسمة .

شلون صار هيج شلون طلعت!

اماني: حاسب ابو التكسي دينتظر بالباب

كلت بشرود..

عقاب: تمام

رحت حاسبته ورجعت، وببالي مية سؤال اهمها شلون طلعت من السجن!!!!

جانت واكفة تشرب مي..

عقاب: شلون طلعتي ولج شجابج لهنا!!!

اماني: ارجع يعني؟

كالتها بضوجة، كمشت ايدها ..

عقاب: مو هيج قصدي حبيبتي، بس متفاجئ شلون طلعتي من السجن!

اماني: لتتفاجئ لعد

عقاب: ليش؟

اماني: لان الي رح اكوله ممكن يصدمك ويفاجئك اكثر

رفعت حاجبي بترقب..
عقاب: وهو؟

اماني: امير هو الي طلعني

وهنا جانت الصدمة الاكبر!!

ليش طلعها من السجن؟

مو ساومني اتركها يلا يتصرف ويبرئها!!

لعد شديصيررر؟!!

عقاب: ش.. شلون شسوة؟

اماني: مادري، وميهمني اعرف بصراحة اهم شي طلعت بس الظاهر انت ممكيف بطلعتي؟

ضيقت نظراتي بعدم تصديق وحجيت متعجب..

عقاب: حبيبتي لتخلين هاليومين الي بالحبس ينسوج عقاب منو وحبه الج شنو، تمام؟

اماني: بس كلامك وتصرفاتك متكول هيج

جريتها لحضني..

عقاب: ولج اووف...

حضنتها قوي واتنفست عطرها..
حسيت ردتلي روحي وتلقائيا الدوخة والتعب الي جنت اعاني منهم، اختفوا!

عقاب:  جان ناقصني وطن، وبحضنتج هسة يلا لكيته..

ظليت حاضنها لمدة..

حسيت نفسي محتاج احضنها محتاج احس بوجودها يمي ولو لدقائق بدون ما افكر بشلون وليش وشوكت..

بس اني وهي وگلوبنا...

ورة شوية..

عقاب: متريكة؟

هزت راسها بلا..

عقاب: مو مشكلة تتريكين هسه

اماني: ماريد

عقاب: ليش يمه؟

اماني: ماشتهي

عقاب: ميمشي عندي هالحجي، تاكلين يعني تاكلين

اماني: كوة هي كتلك ماريد يا حبيبي

عقاب: ميصير هيج وانتِ منا مصوفرة، تعاي حتلو لكمتين لخاطري

اماني: تمام بس اسبح واجي

عقاب: يلا بس لتتأخرين

اخذت ملابس وراحت تسبح، حميت الجاي وحط الاجبان غ الطاولة.

دك تلفوني، كلت هذا اكيد قسورة يسالني وينك شو تعطلت..

اخذته، طلع صدك هو.

جاوبت.

عقاب: الو

قسورة: وعلّو حتى علّو تنام بحلكك، شاتل العالم من الصباحيات وينك لسة؟؟

عقاب: بالبيت حبيب

قسورة: شتصخم بالبيت، مو سجاد وهذا الولد المحامي ينتظروك، باجر محاكمة حبيبة الگلب لو نسيت؟

عقاب: لا مناسي اصلا

قسورة: لعد اكيد بالع لو شارب شي، الهدوء الي انت بي غريب

عقاب: لا بلا؟

قسورة: وعلا من الله، فظها تعال البنية معتمدة عليك مو وكت شقاك الجايف!!

عقاب: ولك اماني طلعت يالجاييف!!!!

ضحك يقلد عليه ..

قسورة: اي اجة حازم من كبره، وكللهم عوفوها تروح بحال سبيلها اني خليتها توقع غصب، وهي مالها علاقة مو؟

عقاب: هيج شي

قسورة: لتخبلني يمعود شجاك اليوم شارب نفط ها كلي؟!!

عقاب: هيّ زمال شبيك متصدك، مشاقي وياك اني!! الدكتورة طلعت من السجن وامير هو لمطلعها بدون مادري، وهسة هي يمي والولد اصرفهم عود بعدين اشوفهم، ها ولتسألني شنو ومنو لان اني مادري، عود من ادري اكلك، يلا معسلامة

ما خليته يحجي حجايه، كلما احس بي يريد يحجي اغلبه.

سديته ورجعت للمطبخ.

بعدني موصلت، دك مرة اللخ.

عقاب: اهووو اني شورطني وية هيج صديق مطي مادري

رجعت اخذته، رقم غريب.

رديت بثبات.

عقاب: الو

رد الطرف الي جنت متوقعه ..

امير: هلو يحلو ولله..
كالها باستهزاء وهو يجر الكلمة جر ..

عقاب: هلا يابة، عزرائيلك مشتاقلك هواي هواي

امير: يا عيني، اني الاشوق ولله بس ما كتلي هو هسة مكيف مو؟

عقاب: ليش طلعتها من السجن بهالبساطة؟

امير: انكسر گلبي عليك

عقاب: لوين تريد توصل انت اختصر!

امير: لراس الشارع هههههههههههههه

ضحك بعلو، اخذت نفس وروحي بخشمي..

بودي اطبله من التلفون اطيح حظ حظه.

امير:  يا يمه.... اححح ولله جانت قوية

عقاب: اسخف منك

امير: ولله تضحك بس انت نفسية مدري شبيك مبوز

عقاب: بيك ما بيك تشرد، لان منا وهيج اني ممسؤول ع الي حيصيرلك!

امير: ترا انت تخوف، جنك هاي السعلوة الي جانت امي تخوفني بيها حتى اقرة من جنت صغير

ضحكت ساخر..

عقاب: ديربالك ترا ع لحظة تلكاها مچلبة بركبتك وماخذة روحك الرخيصة ومخلصة هالدنيا منها

امير: نشوف.. بس ها لتفرح زايد، ترا ضاملك مفاجئااات حتخليك تبجي دم!

عقاب: اني ابّجي ما ابجي ..

امير: متاكد؟ مو بعدين تكسر كلمتك هاي من هسة نبهتك، تدري الزلمة كلمته وحدة ما تتثنى

عقاب: وشمعرف الخنيثين امثالك بسوالف الزلم؟

امير: اوووخ قوية هاي! بس اني اعرف شلون اردها، يلا چااااااو

سده، عكرلي مزاجي هالأبن الكلب هذا!!!

طلعت اماني شافتني معصب.

اماني: خير حبيبي شبيك؟

عقاب: ما بيه بس تاخرت عالشغل وديخابروني كلساع

اماني: اي روح

تقربت منها، وهمست..
عقاب: تؤ.. اليوم بس الي اني وياج!

اماني: بكيفك مو تكول بعدين عطلتك عن شغلك، انت مدترضى تروح

عقاب: حاجي اني من قبل؟

اماني: لا بس يعني، خاف..

كعدتها ع الكرسي..

عقاب: دكعدي اكلي يلا الله يخليج..

اماني: امممم وك

كعدت كبالها، اباوعلها وهي تاكل..

مشتاقلها موت، ولا عبالك جنت اشوفها باليومين الراحوا

كأن صار سنين مشايفها..

اماني: عاد تصدك، كتلك ما اشتهي بس من شفت الاكل انفتحت نفسي

ابتسمت ..

عقاب: عادي تصير

باوعتلي بعمق شوية ادور كالت..

اماني: مشتاقتلك

عقاب: مو بكدي..

اماني: ليش يمة شكد شتاقيتلي انت؟

عقاب: ماعرف بس هواي

اماني: لعد لتكول مو بكدي، مدامك متعرف

عقاب: بس مو حلو من احبج واشتاقلج واعرف شكد..

سكتت..

عقاب: ها فزت هالمرة همين مووو؟

كلت بنصر، عبست وكالت..

اماني: وين الحكك اني ..

عقاب: متكدرين!

اماني: بهاي صدك، بس ترا اني هم اعرف اسكتك بالحجي، مو بلا اعترف!!

هزيت راسي ضاحك..

اماني: ها شفت شلون هه، هي الحياة يوم الك يوم عليك فميخالف يوم تسكتني يوم اسكتك

عقاب: صايرين

للظهر، جانت اماني بالغرفة نايمة.

واني اخابر الحجي بالصالة، سولفتله كلشي صار.

عقاب: وهاي هي السالفة

الحجي: ديربالك منه لعد، هذا مو قليل وابوه واحد كلب وايده واصلة ليروح يسويلك شي

عقاب: شيسوي خ يسوي، مصيره يوكع بأيدي

الحجي: حبيبي وليدي هي مو كلها مزامط، اسمع مني وخلي وقت الحساب لغير وكت، واني حدزلك الولد يظلون وياك يحرسون البيت

عقاب: شيحرسون كل عقلك يابة

الحجي: لعد شنو، شبيك مستخف ترا الحبس زوجتك يكدر يسوي كلشي!

عقاب: ميخالف بس مو لهدرجة

الحجي: معليك، شوية وتلكاهم ببابك

عقاب: يابة وداعتك ماله داعي، خطية تشتلهم بالشارع طول الوكت

الحجي: مالك علاقة انت

عقاب: ع راحتك

سديته، كمت للغرفة.

جانت نايمة وملامحها تنكرط من الظرافة..

تمددت بصفها وظليت صافن بيها اباوعلها واتأمل عظمة ابداع الخالق...

كلشي بيها متناسق، كلشي بيها يجذبني ويأسر گلبي..

ورة ساعة ونص تقريبًا..

رفرفت بجفونها بنعاس، ادور كعدت..

باوعتلي بخجل ممزوج بالصدمة وكالت..

اماني: هاي جنت تباوعلي؟

هزيت راسي بأبتسامة خفيفة..

اماني: جذب!!

كامت ع حيلها، عدلت كعدتي وحجيت ضاحك..

عقاب: شبيج انرعصتي؟

اماني: ليش تباوعلي واني نايمة متستحي؟

عقاب: ليش محسستني جنت اباوعلج وانتِ مصلخة؟

فكت حلكها بدهشة، وخدودها تلونن بحُمرة الخجل..

اماني: انت صدك واحد منحرف و فاسد ومتستحي

شردت للصالة، ركضت وراها لزمتها، حضنتها من ظهرها..

ظهرها يلامس صدري، وقيدتها بأيدية بحيث متكدر تتحرك بعد..

اماني: هدني!

عقاب: تؤ..

اماني: عقاب وخر بربك شنو هالاحراجات!!

عقاب: شمسوي قابل!

اماني: لتباوعلي من اكون نايمة

عقاب: ليش؟
حجيت وملت براسي ع ركبتها ..

اماني: لان استحي، افرض جنت اشخر مثلا؟

عقاب: واذا؟ احلى من يشخر

اماني: عقااب!!!

عقاب: اصلا تدرين، انتِ جنتِ تشخرين من التعب بس حتى شخيرج جان حلو، عبالك مقطوعة موسيقية مدامه طالع من حنجرتج العسل..

تحمحمت ودارت وجهها لكدام بخجل..

فريتها عليه، صرنه وجه بوجه..

حطيت ايديه ع خدودها، باوعتلي بتأثر..

عقاب: مشتاقلج چني ما شفتج من قبل..

رمشت بحب، تقربت بست عيونها برفق..

ادور ارنبة خشمها، وراهن خدودها..

واخير شي شفايفها بس ذني طولت وياهن..

ابتعدت اخذ نفس..

ملامحها وحالتها الذايبة هاي تخطفني كلي تخليني احير شسوي ووين اضمها ..

وخرت شعرها عن رگبتها..

طلعن الشامة الي معلعلة حالي من اولما شفتها لليوم..

دنكت بستها ..

ادور باوعتلها وكلت ..

عقاب: عمري ما طخيت هامتي لاحد ولا دنكت راس لبشر، وبس يم شامتچ دنكت راسي ..

.....

انتهى!

لا تنسوا التصويت والتعليق 🖤🦋

#الكاتبة نورمين