رواية خطأ طبي «عقاب الاماني» الفصل الثاني وأربعون 42 - بقلم نورمـين

#خطأ_طبي «عقاب الاماني»

بقلــم : نورمين 🖤🦋

....

عقاب

لليل، اجو اهلها شافوها واطمئنوا عليها..

عفتهم وطلعت برة يم الولد.

سجاد وليث رح يبدون يحرسون البيت بوقت تواجدنا بي.

ورة ما جبتلهم عشا، اخذتلهم جاي وكعدنا برا.

عقاب: محتاجين شي بعد؟

سجاد: لا هذا هو عاشت ايدك

ليث: اني تدري بيه هالاكل هذا فلسين عندي، لل 11 هم ارجع اجوع

عقاب: شي يخصك اني العليه سويته

ليث: لا تنسى منو نقذ حياتك من ايد حازم

رفع اصبعه وحجة بتحذير، هزيت راسي ضاحك..

عقاب: شكد قديم انت يا اخي

ليث: جان صرت انت اقدم لو ما اني تدخلت بالوقت المناسب

عقاب: وعلّاني تنام بلهاتك، ذليتني مذلة لو عايفني اموت هواي اشرفلي

ليث: شسوي غير كلبي رهيف ما انطاني

درت وجهي وشربت رشفة من الجاي، سجاد رد عليه.

سجاد: دوختني واني مالي علاقة

ليث: محد حاجي وياك لتدخل

سجاد: نجب انت وكافي تعلف

ليث: ماكل بحلكك؟ ليش هلكد ضايج!

سجاد: اهوو بدة، عقاب امشينا

اشرتله براسي يلا، طلعنا للشارع وهو ورانة.

ليث: اي عيني سجودة اجت العصر واخذت القصر، بسيطة اني الك عقاب عود انت صاحبي قبله

عقاب: هاي سوالف الدكتورة شجابك عليهن؟
حجيت ساخر لان صدك اماني هيج تنكد.

ليث: وشدعوة عليك بس الدكتورة ماخذة تفكيرك، لعد واحنه مو جماعتك؟

سجاد: هههههاي يغار اخينا بالله

عقاب: كلمن معزته تختلف

ليث: المعنى؟

عقاب: ليث اطلع من راسي دخيل ربك شكد تلح

اخدتلي جكارة ورثتها ورجعت للبيت.

جانوا كايمين ديطلعون، ودعونا وراحوا.

بس جانت الجو مشحون بيننا، يعني واضح كلش متعاركين.

ورة مطلعوا، اجتي اماني سئلتني.

اماني: صاير شي مادري بي؟ ليش مكعدت ويانة؟

عقاب: البارحة صار بيننا نقاش حاد اني واهلج، ونتائجه شفتيها بعينج لا اني ولا هم طايقين بعض

عبست بملامحها و ردت..

اماني: اكيد بسببي

عقاب: مو مهم السبب

اماني: لا شلون مو مهم، عقاب اني متت يلا شفتك انت واهلي ع وفاق وعلاقتكم طبيعية كأي نسايب!

عقاب: الوقت يكدر يصلح كلشي لتهتمين

اماني: ان شاء الله

ابتسمتلها، بادلتني الابتسامة رغم واضح عليها مصطنعة بس ميخالف.

ورة شوية، رحت تمددت وهي بالصالة دتباوع فلم.

نعسان بس ما اكدر انام، محتاجها اريد احضنها وانام، مشتاقلها!!

تكلبت يمنة يسرة، ماكو متجي النومة وبالي يمها.

كمت رحتلها، جانت صافنة بتعاطف عالمشاهد الحزينة مال الفلم ..

اجيت شلت ايدها وخليت راسي بحضنها وهي صفنت ووسعت عيونها بنظرة عشوائية.

عقاب: نعسان اريد انام

اماني: متنام لعد؟

عقاب: غير تخلصين فلمج!

اماني: ليش اني شكو، انت نام

عقاب: مو هي هنا المشكلة، ماكدر اريدج بحضني يلا تغمض عيني

سكتت وظلت ترفرف باهدابها بنظرات مستغربة..

بست ايدها الكامشها وخليتها ع گلبي..

غيرت مسار نظراتي بعيدًا عنها وحجيت الي ديدور بخاطري..

عقاب: شايفة شلون دينبض هسة بقوة؟ ثقي بالله بدونج تسكت النبضة ..

اماني: اسم الله عليك ليش تفاول ع روحك!

ابتسمت بخفة واردفت موضح اكثر..

عقاب: ما مفاول هاي الحقيقة، اليومين الراحن اسوء ايام مرن بحياتي، حالهن حال الايام الاخذت مني اهلي ويتمتني، امنيتـي من كتلج انتِ عروگ گلبي مجنت دا اتغزل بيج بس والسلام، جنت اعنيها لدرجة وصلت مرحلة بغيابج وبعجزي عن مساعدتج حسيت كلبي يريد يوكف وروحي تريد تطلع مني!!

كمشت ايدي بقوة وهمست بحُب..

اماني: بس اني وياك هسة، الراح راح وكل شدة نوكع بيها تقوي حبنا اكثر واكثر!

تنهدت واعتدلت بكعدتي..

جريتها قريب عليه بحيث انفاسنا اختلطت ..

عقاب: امانيّي.. امنيتي الوحيدة.. امنياتي كلها ..

همهمت بصوت خافت وكالت..

اماني: روحها

عقاب: افدي روحها اني، دير بالج تفاركيني بعد كل هالحُب سامعة لو لا؟

اماني: بعيوني بس انت هم دير بالك!

هزيت راسي بخفوت ونظراتي استقرت على شفايفها..

ثواني قليلة مرت، خلالها  قررت شفايفنا ان تتحد بـبوسة هادئة كلها مشاعر حب واشتياق ..

..

قسورة

كاعد بالكهوة دا انركل والعب دومنة وية شباب منطقتي.

دكت عليه ريما، رفضته.

ردت اتصلت، طفيت الجهاز وكملت الكيم.

اخير شي ذبيت الصاي الي بايدي و نطقت بغرور..

قسورة: دومنت!!!

-ولله مچنص خربيومك

ضحكت نص ضحكة والتفتتله مجاوب.

قسورة: شغل هذا -نقرت ع عقلي بسبابتي- وعوف سوالف الچنص والحظ

اخذت نفس من نركيلتي، ورفعت حواجبي اباوعله بثقة.

رجعت للبيت، اخذتلي حمام وعلكت تلفوني وتمددت بفراشي.

اول ما اشتغل اجن اشعارات اتصالات ريما ومراسلاتها عالواتس.

فتحتهن.

-وينك

-ليش مترد؟

-طفيت تلفونك مو؟ خوش قسورة تتهنى بيها للماخذة وقتك بس اني الك، الا انتف شعرها واخليك تطفر منها

اقرة وفارط ضحك، هاي البنية شبيها وليش كل تفكيرها بالبنات؟!

بنفس الثانية اتصلت عبالك مراقبتني.

فتحت خط وحجيت بمرح..

قسورة: مراقبتني اعترفي؟

ردت بعدم تصديق..

ريما: يعني صدك جنت وية وحدة!!!!!

ضربت كصتي، هاي وين شمرت..

قسورة: لا مو ..

قاطعتني وحجت بتهديد.

ريما: ولعباس الا انتف شعرها واهلسها مثل الدجاجةةة اذا انت صدك تحبها انطيني عنوانهااااا

قسورة: منو كلج اني احبها؟

ريما: لعد تلعب عليها؟ اي اي تسويها ليش لا، مثلما لعبت عليه ووهمتني بحبك مو بعيدة تطلع تضحك عالبنية المسكينة همين!!

فكيت عيوني مصدوم..

قسورة: ادور!!! شو صارت مسكينة، منو قبل شوية تريد تهلسها لعد؟

ريما: ظلمتها، انت الي لازم تتهلس وتتعلك من رجليك مثل الذبيحة

قسورة: رحم الله والديج هي هاي تاليها، اهمداك يحظي

ريما: لا تسويلي روحك فقير وتتمسكن!

قسورة: خوش، ممكن اعرف ليش اتصلتي عليه وشعندج وياي؟

ريما: بسلا ازعجتك؟

قسورة: يا طلابتك يا ربي..

ريما: انووووب ما عاجبك وصرت اني طلابة؟؟ بسيطة قسورة بسيطةةةةة

نترت بنفاذ صبر..

قسورة: فضيني تحجين لو لا؟

سكتت شوية، ادور حجت بنبرة هادئة

ريما: ليش م جنت موجود ببيت عقاب؟

صفنت ع التحول الغريب، مو قبل شوية جانت تصيح جنها جعفر ابو المولدة الي بظهر بيتي، لعد شبساع صارت رقيقة وصوتها ناعم؟

قسورة: متاكدة هاي انتِ ريما؟

ردت بهدوء..

ريما: ليش هيج صرت؟ ما استاهل فرصة ثانية اني؟

تنهدت بحيرة وكعدت وربعت رجليه..

قسورة: مو بس فرصة، انتِ تستاهلين عمري كله

سكتت بفعل صدمتها واختفى صوتها لثواني..

قسورة: ها وين رحتي يمعوده؟

هم ماكو رد، قلقت هاي شبيها

قسورة: الو ريري حبيبتي وينج؟ شون بيها هالبنية يربي، لا من ازعل منها مرتاح ولا من اصالحها وتالي يعنيي؟؟!!

اجة صوتها مستنكر

ريما: هاي عليمن جنت تحجي؟

قسورة: ع فد وحدة، اخخخ لو الزمها

ريما: شتسويلها؟

جنها استلمت دا اقصدها، فأردفت بمكر..

قسورة: اكسر ضلوعها بحضنتي..

ريما: لهالدرجة مشتاقلها؟

قسورة: واكثر..

ريما: قسورة

قسورة: عيونـه الج..

ريما: اني.. اا.. احبك..

حجتها بتقطع، خلت گلبي يكمز بنبضاته المجنونة..

ابتسمت بسعادة، مثل الي جان يركض بسباق طويل واخيرًا وصل لخط النهاية وظفر بالجائزة!

قسـورة: احبج اكثر ولله..

ريما: اسفة ع كل كلمة قسيت بيها عليك، اسفة ع كل لحظة كسرت كلبك بيها، اسفة ع كلشي صار، خلي نبدي من جديد واوعدك اني رح اتغير

قسورة: صايرين يحلـوة

وظلينا نسولف لفترة طويلة، اندمجت وياها وحسيت فعلا بأنها تحبني وتريدني مثلما اريدها..

اظهارها للاسف واعتذاراتها المتكررة مني دون متكول يحبني يسامحني، هالشي كبرها بعيني هواي..

مدام حاولت وياي اكثر من مرة وداست ع كرامتها، معناها تحبني من صدك!

..

عقاب

مرت ايام هادئة وطبيعية علينا..

رجعت الدكتورة للمستشفى رغم شكد اصريت عليها متروح هالفترة.

بس ما رضت، تكول اذا ما اروح عبالهم خايفة واثبت صحة الكلام الطلع عني.

هو كلامها صحيح، بس اني خايف يأذوها بالحجي وهي حساسة.

قسورة وريما علاقتهم قوت اكثر واكثر وصاروا متفاهمين عكس قبل، جانوا دوم عرك.

ولو هسة هم بعدهم يتعاركون بس مو مثل الاول.

ليث وسجاد كاموا يحرسون بالليل وضرغام وشاهين بالنهار.

امير رد اختفى وكأنه ابرة بكومة قش..

شكد دورت عليه ماكو، حتى ببيته رحت وكلبته كلاب وابوه تعارك وياي بس ما درتله بال.

رجعت كلت خاف سافر، دورنة حجوزات السفر ماكو اسمه مموجود.

اذن بعده بالعراق، بس احتمال خاتل بمكان مهجور او طالع لغير محافظة.

وبهالحالة لازم نضاعف الجهد ونستغل كل معارفنا لحتى نكدر نوصل لأثر يدلنا عليه.

الظهر، جنت رايح للمستشفى اخذ الدكتورة حتى نرجع للبيت.

اخذتها وبالطريق جنة نحجي عن يومها.

عقاب: واليوم شلونه؟ خو ما ضايقج احد بعد؟

اماني: زين، محد يكدر يفك حلكه اصلا، بس يتبسبسون عبالهم ما ادري اني موضوعهم وبس اصير كدامهم يسكتون، ويكلولي مبروك على ثبوت برائتج! هه ولله عجيب هالبشر

عقاب: مدام ميحجون الا ورا ظهرج، خليهم ورا هو هذا مستواهم لتهتميلهم ولتضوجين نفسج عليهم

اماني: هو هيج، تعبت اشيل هم واحسب حساب راي فلان وعلان، خليني حايرة بروحي احسلي بهواي

ابتسمت وكلت بثناء..

عقاب: اي من الاول هيج!! عفيه عفيه هيج اريدج

ابتسمت وريحت راسها لورا ع الكشن.

طبكت يم مطعم ونزلنا نتغدة.

اماني: شعجب جبتنا لهنا

عقاب: اصدمج؟

ردت باستغراب.
اماني: شكو؟

عقاب: حتى نتغدة

رديت ببساطة وهي ضربت كتفي بقبضة ايدها الناعمة..

حجيت بتذمر واني اتصنع الالم وكامش كتفي..

عقاب: ويكلك جنس ادم عنيفين وجنس حواء هو الجنس اللطيف، خلعتي جتفي شبيج؟!!

اماني: حتى لتحشش، وكعت كلبي عبالي شو شكو

وخرت ايدي عن كتفي، ورجعت طبيعي ورديت بسخرية.

عقاب: يعني بربج جايبج نتغدة بالمطعم تكليلي شعدنا جايين؟ عقلج وينه حبيبتي؟

اماني: هاي الحركات مو عليه، لتغشم روحك انت فاهم قصدي شنو

عقاب: خلي نطلب هسة وبعدين ندور بقصدج ومقصدج، عصافير بطني كامت تزقزق

اجة الولد، وصينا ع اكل شوية واجة.

عقاب: اعرف قصدج بس اختنكت من التشدد العايشين بي، شوية نغير جو مو احسن؟

اماني: اكيييد، اصلا كلما اريد اكولك خ نطلع نغير جو واتراجع، اكول هو ديسوي هيج لمصلحتنا

عقاب: أفدي اليعرفني.. شفتي شلون طلعت الكلوب سواجي؟

هزت راسها مبتسمة..

اماني: اييي شفت!

اكلنا وكملنا، دفعت الحساب وطلعنا واني كامش ايدها.

دنريد نصعد السيارة وما احس الا دراجة عبرت من يمنا، رموا ع جهة الدكتورة بس.

وكأنهم متقصديها الها!!

تصاوبت ووكعت بظرف ثانيتين، بحيث حتى من ركضت عليها ما لحكت احميها!

طلعت سلاحي رميت عليهم بس ابتعدوا وما لاحهم شي!!

رجعت لأماني وكلبي مقبوض بوجع عالصارلها..

عقاب: اااااخ، اماني تسمعيني حبيبي احجي شي؟

جانت بين الصاحية وبين الغايبة عن الوعي..

باوعت مكان الطلقة بجتفها..

اماني: ايدي عقاب.. مدا احس بيها..!

تبجي من الالم وكوة تحجي، حسيت كل الالم الي بالدنيا استوطن كلبي!!

اماني: جتفي يوجعني عقاب..

عقاب: سوده عليه بيه ولا بيج، هسة اوديج للمستشفى انتِ بس اتحملي

كلشي ولا هالانسانة يا ربي، ليش دوم تمتحنني بيها؟!!

شلتها حطيتها بالسيارة وانطلقت للمستشفى.

الناس التمت وخابروا الشرطة بس بعديش!

الطريق كله تبجي وتون، وتصيح ما احس بايدي.

اجيت اتخبل واني احاول اوازن بين الطريق وبين انتبه عليها واحاول اهديها ..

الطريق كله ايدي ع الهورن ومستعجل حيل بس اريد اوصل.

اماني: ايديييي يا اللله!!!!!!

تنحب ببكاء، كمشت ايدها السليمة بقوة.

عين ع الشارع وعين عليها..

عقاب: لا تبجين يروحي ما بيها شي ولله

اماني: عقاب ما احس بيها ما احس بيهااااا، ايدي انشلت يمكننن !!!!

عقاب: لا لا باباتي منيلج هالحجي، هاي لان اجت بيها الطلقة هيج تحسين، هسة بس يشوفوها وينطوج علاج تصير زينة وداعتج بس لتبجين وتحركين بروحج!

قويت ع لزمتي لايدها، باوعتلي بضعف ودموعها متخذة مسارات ع خدودها ..

وجهها احمر واعصابها بارزة هلكد ما تضغط ع نفسها وتأن من الالم..

كلبي ينزف من الالم، عسى بيه ولا بيها!!

وصلنا للمستشفى الي تشتغل بيها لان جانت اقرب شي علينا، شلتها ونزلت وديتها للطوارئ.

اغلب الموجودين يعرفوها فتفاجئوا من شافوها تنزف ومتصوبة.

-شلون صار الحادث شبيها الدكتورة؟

عقاب: دشوف شغلك هسة!

نترت بي، هي تنزف والاخ حاير شلون صار

طلعوني لبرا وبلشوا يشوفون شغلهم.

روحي تلوب واحس بنار شاعلة بروحي، حركتني حرك!!

دموعي كوة مقاومها ومخليها متنزل..

كعدت ع كراسي الانتظار، اهز برجلي بتوتر والخوف عليها ديتضاعف بكل لحظة تمر وماكو خبر.

عقاب: كله مني، كله منييييي!!!!

رفرت بضيق وكمشت راسي بقوة!

اي كل الي صارلها بسببي، اني نار ناااار كبرة وحركتها!

مجان لازم اتخطى كل العقبات واتمسك بيها..

من الاول جان لازم اعوفها وما اخليها تتأمل بيه..

بس شسوي لگلبي الي عاند ورادها رغم كلشي؟!!!

دك تلفوني، رقم غريب..

شرار الغضب انعلك فتيله بيه، نظراتي احتدت انذارًا بسوء ما هو قادم..

رديت بثبات..

عقاب: موتك ع ايدي!!

اجاني صوته المتهكم بسخرية وهو يكول من بين قهقهاته المتشفية بحالتي..

امير: دسلم اول مرة شجاك مستعجل؟

كمت طلعت برا ..

عقاب: الحيوانات متسوي سوايتك يا ساقط يا ***** الا اشرب من دمك وعلي بس الزمك، اذا انت زلمة واجهنييي مو تدز چلابك عليه وضام روحك مثل الجرو!!

امير: السالفة بيها مراحل، خو مو من اولها تريد نتواجه ونقتل المتعة؟ لا عيني نصعد باية باية والعافية تداريج لا تستعجل ع رزقك

عقاب: هاي مرتين ضربتني بأعز بشر عندي، واني اؤكدلك عواقب هالشي مراح تكون سليمة!!

اختفى صوته شوية..

ادور رجع حجة بنبرة جادة ممزوجة بالتهديد المبطن..

امير: المرتين ذني جانن هيج لعب جهال .. مو يكولون الثالثة ثابتة؟ صدكني اذا مسويت الشي الاريده منك حتكون الثالثة ثابتة هالمرة.. وها متجي رصاصة بجتفها لا بنص راسها وساعتها نشوف حضرة عقاب رامبو شيكدر يسوي بعد! 

اسمعله وممصدك الي ديصير، صوبوها بجتفها عمدن!!

اذا هذا المرينا بي كله تهديد، لعد التنفيذ شلون؟!!

شلون بيه اذا فعلا بالثالثة كتلهاااا؟؟!!!

امير: ها شو سكتت.. بشنو دتفكر؟

بلعت ريكي واردفت بحزم.

عقاب: شنو المطلوب مني وتعوف الدكتورة؟

امير: بسيطة، تعوفها وتطلكها ومتلتقي بيها ابد!!

عكدت حواجبي مستنكر..

عقاب: لك انت شدا ترطن!!!!! كل عقلك انتتتت؟؟!!!

امير: لعد نصه؟

عقاب: مستحيل ع جثتي اتركها!!!!! تسمعني لو لاا ما اعوفها!

امير: لعد اقرة الفاتحة ع روحها

عقاب: لك حيووووواااننن!!!!!!!!

صحت بعصبية، يعرف ايدي التوجعني ياهيه فيلزمني منها الكلب!!!

امير: المعادلة بسيطة، تريدها تكون بخير؟ ابتعد عنها. تريدها تودع هالدنيا وتموت برمشة عين؟ ابقى وياها

حاولت استجدي عطفه، اذا جان يحبها مثل ميكول، اذن اكيد متهون عليه!

عقاب: متسويها..

امير: منو يكول؟

عقاب: لان ماكو انسان يحب شخص ويكدر يأذي ويكتله!

ضحك ضحكة شريرة ..

امير: بس اني اذيتها!

عقاب: مو عبنك حيواان!!! ردت اسويك بشر واحجي وياك مثل الاوادم بس الكلب يبقى كلب!!!!

امير: اششش لدوخني.. خليني مستمتع بلحظات انتصاري!

عقاب: منو كلك انت انتصرت؟!

امير: حدسي يكول..

عقاب: هه، لتصدك كلشي يكوله احساسك لان مرات الاحساس يخيب!

امير: الا احساسي، عمره ما خاب

عقاب: مو چنك واثق زيادة؟

امير: صح

استفزني غروره، اردفت بحدة..

عقاب: الدكتورة ما اتركها، وخلي ثقتك وحدسك يحتركن سوة!

رد بصوت مثل فحيح الحية من كد السمانية الي بي..

امير: وحق الحق يا عقاب، اذا ما طلعت من المستشفى بهالساعة، حضر جنازة اماني واقرة الفاتحة من هسة خاف بعدين تضوج وتلتهي تلوم بروحك وتنسى!!

صرخت بصوت مقهور و ركعت التلفون بالكاع والشرار ديتطاير من كل جزء بجسمي..

الا هي..
الا سلامتها ..
الا حياتها..
الا الدكتورة..
الا اماني!!!!!

كل الدنيا خ تحترك وتوج بنار الا هي!!!!!

اخذت التلفون لكيته شاشته مكسورة..

باوعت داير مدايري، انفاسي متسارعة نتيجة حالة الغضب الشديد الي دا امر بيها..

اجول نظراتي ادور ع شخص ممكن يكون يساعد امير ..

اي هو كال اكتلها هسة اذا مطلعت وعفتها، اذن اكيد عنده احد ديراقبني!!!

شفت عامل نظافة واكف من بعيد يباوعلي ..

تنفست بغضب، شديت ع قبضة ايديه بحزم وانطلقت امشي باتجاهه بخطوات متسارعة..

اول موصلت يمه ضربته بوكس وكع بالكاع، نمت فوكه شبعته دك تالي العالم التمت والامنية طلعوني برا!

بالبداية، جنت مثل الداخل بغيبوبة ما حاس ع نفسي شسويت وليش؟

ما فكرت للحظة بأن هالشخص يمكن ماله علاقة واني ظلمته!!

بحيث من جروني عنه يلا حسيت بشعور الذنب..

باوعتله بنظرات متأسفة، شلون كل جزء بجسمه يجري دم..

شو هذا ابتسملي بتشفي وكأنه ديكلي وكعت بالفخ!!

انتفضت من ايدين زلم الامن الي كامشيني بس ما فلحت!

طلعوني برا و وصوا الحرس ميفوتوني بعد!

وكفت اباوع للمستشفى من برا..

همست بحزن والقلق ينهش بعافيتي..

عقاب: بعدني ما اطمنت عليهااا يا الله....

الحيوان استخسر عليه هالكم دقيقة حتى اتطمن عليها!

اكدر افوت مرة لخ، عندي مية طريقة وطريقة بس ما اريد اجازف بحياتها..

ابتعدت ورحت لسيارتي..

نزلت دمعة يتيمة من عيني، اخذت قرار اني ما اريده..

دست ع گلبي وروحي وكل حواسي، وقررت ارضخ لامير السافل..

بس علمودها!

علمود تكون بخير، ولو بشكل مؤقت لبينما انهي حياته!

.....

انتهى!

احداث مفاجئة مو 🌚💕

لا تنسون التصويت والتعليق، خطأ طبي على اعتاب النهاية..

#الكاتبة نورمين