#خطأ_طبي «عقاب الاماني»
بقلــم : نورمين 🖤🦋
...
عقاب
كلبي تكطع من عفتها ورايه تبجي وتصرخ..
يا ربي دخيلك انت انطيني القوة وصبرني ..
جنت اباوعلها من مراية السايق، واكعة بالكاع وتبجي.
عيوني احمّرت وكل روحي ناصبة عزاء و دتبچي بهاللحظة..
ردت انزللها واخذها لحضني لان خلص ما اكدر اماطل اكثر بعد!!
بس من شفت ريان اجة يمها تراجعت عن هالفكرة وكملت طريقي..
واصبر نفسي بحجاية هيج ولا غيـرها..
رجعت للبيت أجر بروحي جر ..
وية ما شمرت نفسي عالقنفة دك التلفون.
غلست لان اخر شي اريده هسة احجي وية احد..
عفته يدك ويدك وكمت سبحت.
طبيت جوة الدوش وظليت واكف وشريط ذكرياتي وياها كله انعاد بمخيلتي..
"انتِ اجيتي لهنا برجليج"..
"رح اكون عقابج القاسي دكتورة"..
"عقاب: بس اني ما اقبل تعيشين هيج، تستحقين حياة احسن وية رجال يحبج ويدور راحتج
اماني: ماريد رجال غيرك، تأكد بأن اني حتلو شفت الضوة بغيرك مستحيل يحلالي اختار غير ظلامك"
" عقاب: ريحتج تسطرني.
اماني: عادية بس انت گلبك رچيچ..
عقاب: تؤ، ماكو بخشونة گلبي اصلا، ومادري ليش بس يمج ينعم.."
"اماني: عود انت ليش هيج تسوي؟
عقاب: شمسوي؟
اماني: تخلي ايدك جوة حنچك وتصفن عليه!
عقاب: حتى اسند عيوني، لان وحدها متتحمل كل هالحسّن."
"اماني: وانت بدون ضواك شيصير بيك؟
عقاب: انطفي واموت من صدك هالمرة"
طلعت من دوامة افكاري، هزيت راسي وكلت متحسـر.
عقاب: وصدك متت..!
ورة ساعة تقريبًا..
اخذت التلفون شفت شكو ماكو.
لكيت كوم اتصالات من رقم غريب، استنتجت هذا الحيوان امير.
شمرته ع الميز وتمددت وخليت ايدي ع عيوني..
سارح بأفكاري وبحالة امنيتـي الي كسرتني..
وميروح من بالي جملتها..
اماني: ولو جان حبنا غلطة، خلينا غلطانين مدام اني احبك وانت تحبني شكو بيها؟
فركت وجهي ومسحت عيوني بقوة..
كوة مقاوم رغبتي بالبجي ولازم نفسي.
عقاب: الغلط الحقيقي وجودنا بهيج بيئة.. الغلط دخول امير ع حياتنا!!! امير هو اكبر غلط بهالقصة..
هزيت راسي ونظراتي محتدة وتنبعث منها شرارة الانتقام..
عقاب: وهيج نوع من الاغلاط تحتاج تنمسح حتى محد يرتكبها مرة لخ، واني بنفسي رح امسح هالغلط من الوجود!
ورة شوية، سمعت التلفون ديدك بشكل مستمر.
كمت اخذته ورديت.
عقاب: شعندك؟
امير: مشتاقلك شو مترد عليه ليش ليش
عقاب: ما فارغ لتفاهتك
امير: تفاهتك لو برتقالتك ههههههههههههههههههههه
وخرت التلفون عن اذني وجعدت ملامحي باشمئزاز..
ظل يضحك مثل الخبل، الى ان رجع وكال..
امير: اخخخخ يابة المهم، شلونك انت
عقاب: بس الكفك اصير كلش زين
امير: حرامات، لعد مطولة شغلتك
عقاب: مو هواي
امير: حلوة الثقة ها؟
عقاب: كلش وخاصة من يكون الشخص كدها
امير: نشوف عود ابو الثقة شيكدر يسوي
عقاب: وتالي شتريد؟
تغير صوته للجدية.
امير: الظاهر يا صديقي انت ما تفتهم بالعيني والاغاتي، ولا تفيدك لغة التهديد، الفعل الواقعي هو الوحيد الي يمض بيك
عقاب: ليش متنجب وتحجي حجي مال اوادم حتى اكدر افتهمه؟
امير: بسيطة اقربها الك، شجنت تسوي وية الدكتورة اليوم؟
غمضت عيوني وبلعت ريكي بتوتر، شلون مصيبة ادري خاتل بجيبي وين ماروح يدري.
عقاب: ما فهمت قصدك شبيها الدكتورة ؟
ضحك ورد..
امير: اموت عـ اليبدل بساع ويغشم روحه
عقاب: مدا افتهمك شدتحجي!
زمجر بقوة تنطوي عن عصبيته من برودي.
امير: لتغشم روحكككككك شجنت تسوي وية الدكتورة اليووم؟؟ اني بشنو حذرتك وانت شدتسوي؟ ليش تخليني اسوي شي ماريد اسوييييه؟؟ ليش متخليني محترمككك؟؟
عقاب: هووووب هوووب حدك لك!!!!!
امير: لا تبيعهن عليه ذني اعصابك، امحيك وامحيها وللله!!!
عقاب: شحدككك ادفنك وعلييي
امير: دظل عايش اول مرة وبعدين هدد!
عقاب: الحجي نفسه موجه الك، دير بالك وحسك عينك تسوي شي للدكتورة ادفنك بكاعك وحق الحق واخلي الرايح والراد يتفل ع كبرك!
امير: هه.. خوش تسفط حجي عجبتني
عقاب: بالفعل هم اعجبك، جرب وشوف
امير: حاليا ماريد تسلم، بس يفضل تحتفظ بافعالك لوقت الحاجة، تدري يعني ع ساعة تنكلب الدنيا ويتخربط الوضع ضملك كم فعلاية تفيدك
عقاب: نهايتك عسيرة امير اخذها مني، وهذا شاربي مو عليه اذا ما خليتك تتوسلني حتى اكتلك واريحك!!
امير: هاي احلام العصر، فـاعذرك.
عقاب: كل الاحلام عدها فرصة التحول للحقيقية!
امير: حتى المو واقعية؟
عقاب: اكيد، المعجزات تصير بكل وكت.
امير: ليش حضرتك نبي مُنزل واني مادري شيخ عقاب؟
ابتسمت ساخر..
عقاب: مو بس الانبياء تصيرلهم المعجزات، الله سبحانه وتعالى موجود .. وبس يكول لاي شي كُـن فيكون، لذلك ماكو وياه شي اسمه مستحيل!
امير: بركاتك شيخي
عقاب: انچب ***
امير: لا شيخ لا، هاي ما مرجية منك ابد، مو دينك يكول لا تنابزوا بالالقاب شلون هيج ترميني بالفاحشة له له له!
عقاب: الدين والاسلام ورب العالمين بريئين منك يا حثالة!
امير: حثالة مال چاي ههههههههههههههههههههههه
ع اعصابي كاعد واسمعله، اخخ لو المخترع التلفون مخترعلنا طريقة نكدر من خلالها نطب لاي شخص ونطيح حظه.
امير: اوف يا يمة ههههههه
عقاب: خلصت؟
امير: اي ولله بس بعد بيه ضحكة
عقاب: لو ما ادري ايامك معدودة جان كتلك عندك مستقبل فني حلو بمجال الكوميديا
امير: ولله تريد الصراحة اني هم ردت اصير ممثل بس العينتين دكتور توفيق وكفلي سجينة خاصرة لو دكتور لو متصير
عقاب: شلون دكتور علساس
امير: اندري، مو اكله اني دكتور كلك كلشي مافتهم ما يقبل، عاجبه الصيت على ابوه ابنه دكتور
عقاب: حرامات لو يدرون بيك مطي جان راحن فلسين صيتات الوالد
امير: يمعود خليهن ساترات علينه هن بطركهن ظليت
عقاب: كون الله يطيح حظك ع هالحجي ولو شظال بيك مغسول غسل
امير: مو جنك شطحت وكمت تتجاوز هواي؟
عقاب: لا هاي حقيقة مو تجاوز
امير: ها يلا لعد استودعك الله الذي لا تضيع عنده الودائع شيخي العزيز دمت بخير والف عافية كثر الله من امثالك وحفظك الله ورعاك
حجيت مقاطع الرطين مالته.
عقاب: انكلع!
امير: صار بس ولله جان بودي نطول اكثر بالحديث شيخنا بس شسوي مستعجل، عندي كم سالفة تخص الدكتورة اماني واهلها لازم احلهن باسرع وقت!
هو كال هيج واني عروكي نطت.
عقاب: شتقصد شتريد تسوي اميررررررر!!!
امير: سربرايز!!! متاكد انت مراح تحبها ابد، بس هاا دير بالك المحك جاي بشارعهم لو شايف واحد منهم ومسويلي سوالفك التحذيرية، ترا تعم عليهم وساعتها حتكون العواقب وخيمة شيخي!
عقاب: امير وحق الله ادميييييك اشرب من دمك بس تدنالهم، سامعنييييييي؟؟ انتقممممم منك واشرب من دمك وللللله!!!!
ظل يقهقه بضحكة شريرة ادور سد التلفون..
خبلني وظل بالي هذا لشنو ديخطط؟؟؟؟!!!!!!
...
شاهين
اليـوم موعد اخذ صورة التخرج، الخاصة بخطيبتي ميقات.
الصبح كعدت نشيط، بدلت لبست قاط اسود وتعطرت وطلعت.
عفت ضرغام هستوه كعد للدوام.
رحت ع بيت ميقات، بس بالاول شفت عقاب ديطلع من البيت.
شاهين: صباح الخير عقاب
انتبهلي فأبتسم ورد..
عقاب: صباح النور شكو شو هنا اليوم؟
شاهين: ايي مو اليوم صورة التخرج مال ميقات ورح اروح وياها
عقاب: اهاا الف مبروك عود باركلها بمكاني
شاهين: تسلم يوصل حبيب
راد يروح بس رجع باوعلي بتك عين وحجة.
عقاب: جاي هيج؟
شاهين: لعد شلون اجي؟ شنو مو حلو؟ ما مرتبة ملابسي؟
عقاب: لك لا مو هذا قصدي
ادنة عدل الفتحة مال القميص وخلى سويچ سيارته بأيدي.
شاهين: هايشنو؟
عقاب: متعرفه شنو؟ هذا سويچ سيارتي حبيب
شاهين: اعرف بس ليش انطيتنياه!
عقاب: شاهين شمتريك من الصبح مركة ثول؟ انطيتك سويج السيارة غير تاخذها وتروح انت وخطيبتك شبيك مفهي؟؟
شاهين: هاا هييج
قلد نبرة صوتي..
عقاب: ايي هيييج
شاهين: بس ماكو داعي، ناخذ تكسي عود
عقاب: نفذ وانت ساكت لا بطراك اغير تضاريس وجهك
شاهين: بيك شي شو معصب؟
عقاب: ماكو، ضرغام وينه؟
شاهين: بالبيت عفته ديبدل حتى يطلع للدوام
عقاب: زيين، يلا مع السلامة عود تونس
شاهين: تمام .. الله وياك
راح، ظليت واكف اباوعله مبتسم واهز بالسويچ بايدي.
اخذ تكسي وطلع، رحت لبيت ام جنات.
دكيت الباب رئسن اجتني ميقات ووجهها ميتفسر.
لابسة تيشرت بيتوتي وبنطرون اسود مال قاط.
خمطت كلبي.
ميقات: هذا انت تعالل
جرتني من ايدي وسدت الباب.
شاهين: شكو شبيج يمعودههه
ميقات: راح اموتتتتت ولله اني انتهيييت
شاهين: اسم الله ولج شهالحجي شبيج!!!
طببتني لغرفتها، امها واختها ماكو والغرفة صايرة سوك هرج من كد هوسة الملابس المطشرة.
ميقات: وكع جاي ع قميصي ادمررررر ومعندي غيره!!!!
باوعتلها بحدة وهسهست..
شاهين: اذا اجيبج براجدي هسة احد يكلي ليش؟
ميقات: ليش؟
شاهين: لج بابا انتِ صاحية؟ اكو عقل براسج؟ اكو وحده تستقبل خطيبها بهالطريقة ولله عبالي صاير شي خطير!!
ميقات: لعد الي كتلك عليه مو خطير؟
شاهين: لا بلا انتِ تشاقين مو؟
ميقات: قصدك اني سخيفة وسوالفي تضحك مو؟
شاهين: اني حجيت هيج؟
ميقات: لا محجيت بس هذا قصدك كلش واضح
شاهين: غلطانة واصلا اني مو هاي سالفتي
ميقات: مو مهم بعد، اني عرفت هسة انو انت متحبني
وسعت عيوني بتفاجؤ هاي شجاها طكن فيوزاتها!!
شاهين: شنوو؟؟
ميقات: انت شنو شبيك متسمع؟؟؟ كلما احجيلي حجاية والثانية وكمت اسويلي شنو وشنووو، اني احجي حجايتي مرة وحدة ما اظل كلساع اعيدها فأفتح اذاناتك عدل منا وهيج!!
رفعت حاجبي مصدوم وابتسمت باعجاب..
شاهين: لسانج طولان.. ويرادله كص مو بلا حبيبتي؟
اقتربت بخطواتي منها وهي كامت ترجع لورا لان حست ع نفسها جفصت..
ميقات: اسفة مو قصدي بس اني معصبة وانت تقلد، واحد شيصير اكيد ينفجر
شاهين: اي من حقج، تصيحين وتتجاوزين ميخالف لحظة عصبية قابل شكو الدنيا انكلبت؟
ميقات: مو بلا حبيبي، شفت هسة ليش اني احبك
هزيت راسي ضاحك بمكر..
شاهين: بلي شفت شفت..
صار وراها الكنتور، ولان بابه مفتوحة ظلت ترجع لحد ما طبت بي.
شهكت بخوف ووكعت عالهدوم، جريتها من خصرها وكومتها..
وكفت واحنه بعدنا ع نفس الحال..
توترها واضح ونظراتها المرتبكة والخايفة تفضح شعورها..
الا اني لكيتها خوش فرصة!
وخرت كذلتها عن وجهها، وحجيت بهمس، بما ان المسافة بين وجوهنا تقريبًا معدومة!
شاهين: امج واختج وين؟
ميقات: راحـ ... ن راحن للدوام تأخرن ..
شاهين: اهاا وشعجب محد بيهم تجي وياج للصورة؟
ميقات: مو.. مو ماما عندها امتحان مهم اليوم بالمدرسة واكو لجنة اشراف جايتهم، وجنات عندها فاينل همين
جانت تحجي بتوتر، ونظراتي وكل تركيزي منصب على شفايفها شلون تتفرق وترجع تلتقي بنعومة وهي دتسولف..
شاهين: ياريت لو دوم عدهن امتحانات..
ميقات: هاا.. ليـ..
بعدها مكملت حجايتها، اخذت شفايفها بين شفايفي ببوسة..
ابتعدت عنها بعد فترة، وهي محمرة بخجل..
ابتسمتلها بمكر..
شاهين: عجبتج؟ تريدين نكمل؟
وسعت عيونها بصدمة و فلتت راحت للحمام.
ظليت اضحك وحاط ايدي ع شعري، ابعثر بي بعشوائية.
شاهين: تعالي يمعوده مالي علاقة بيج بعد، بدلي خلي نروح رح تتاخرين ع صورتج
اجتي تركض مخبوصة.
بوجهها ركضت للكنتور الثاني، الي اتوقع مال جنات.
نفشته نفش وطلعت منه قميص.
ميقات: لكييييييييته اخييييرا
شاهين: ديلا لعد بدلي بساع
ميقات: اي تمام
اخذته واندارت دتروح للحمام تبدل.
وكفت كدامها وسديت عليها الطريق..
شاهين: وين رايحه الحلوة؟
ميقات: عفيه وخر من غير شي متاخرة
شاهين: هممممم كسرتي خاطري
ميقات: همزين، وخر حباب شاهين
شاهين: تمام بس بشرط!
اول شي فرحت بس من سمعت بشرط، تبدلت ملامحها لضجر..
ميقات: وهو؟
شاهين: تبوسيني
ميقات: يووه انت متشبع مو هستوك بستني!
شاهين: لازم ننتبه للكلام ها حبيبي؟
جعدت ملامحها بتفهم وكملت..
ميقات: تمام تمام بس اول شي غمض
شاهين: ليش عود؟
ميقات: لان عيونك هاي بنظراتها توترني، ماعرف اسوي شي
شاهين: هسة قابل دتصنعين صاروخ هي بوسة!
ميقات: معليه، غمض
شاهين: استغفر الله..
غمضت عيوني بطواعية..
شاهين: غمضت عيني فضيني، خلي نشوف قدراتج تسوة لا ..
ميقات: اي عفيه
تمتمت بغير رضى..
شاهين: اذا من هسة غمض لعد منا لذاك اليوم شلون؟
ما احس الا شي ضرب رجلي، اكيد داست ع رجلي هالفصعونة وشردت!!!
فتحت عيوني لكيتها شاردة وتضحك بنصر.
شاهين: اني الججججج!!!!!
....
اماني
بعد مرور اسبوع..
كعدت الصبح بيه ما بيه بدلت وطلعت للمستشفى، ريان وصلني.
ريان: شلون صرتي اليوم؟
اماني: كلش زينه لتخاف
ريان: اكيد؟
اماني: طبعًا..
ابتسمتله بودية وفتحت باب السيارة دا انزل..
تذكرت شغلة، التفتت عليه وكتله..
اماني: اوراق الطلاك وقعتهن، تلكاهن فوك الجرباية مالتي، اخذهن وانطيهن للمحامي خلي يشوف شنو اكو اجراءات بعد
حجة من بين انفاسه مصدوم..
ريان: وقعتيي؟
رديت بثبات..
اماني: وليش ما اوقع؟ المن جبتوهن لعد؟ وشبيك متفاجئ؟!
ريان: اا لا لا بس.. ما توقعت تنهين كلشي بسرعة!
اماني: الي ميريدني ماريده ريان.. ركضت وراه هواي وما قدّر، هسة صار لازم التفت لنفسي واكمل حياتي بعيد عنه.
ريان: الله يوفقج حبيبتي ..
اماني: اخويـه الحلو.
كرصت خده ونزلت.
اختفت ابتسامتي، ورجعت ملامحي الجادة .
اي نعم اني وقعت اوراق الطلاق..
و قررت ادوس ع كلبي واكمل حياتي بس اني تعيسة!
اصعب شي بالدنيا من تنطرد من المكان الوحيد الي انت تريده، من يكون مالك قيمة وتضحياتك تتسفه..
هنا تحس بنفسك غبي، مستضعف، ومالك اي داعي..
شعور كلش مؤذي!
ولان الحياة لازم تستمر مهما يكن، تضطر تمثل السعادة لحتى تكدر تتعايش وية الوضع الجديد.
طبيت للمستشفى.
صادفت شهد دتفتر هي والممرضات.
سلمت عليها.
اماني: صباح الخير شهودة شلونج
شهد: صباح الخيرات دكتورة، الحمدلله وانتِ؟ شلون صارت ايدج؟
اماني: زينة واصلا اجيت افتح الجبس مالتها وابلش شغل
شهد: بس هيج تتعبين! لو مخليتها لباجر ومداومة احسن
اماني: لا لا اريد اشتغل تعبت ومليت من كعدة البيت!
شهد: ولله لاحكة ع شلعان الكلب بس براحتج
اماني: حبيبتي شكرًا لاهتمامج
عفتها ورحت لغرفة الدكتورات، لبست الصدرية واخذت تلفوني وطلعت.
رحت للطوارئ، شفت كومة حالات ترجف الكلب..
من اشوفهم اكول الحمدلله ع حياتي.
واني حاسة روحي بس اني المتعذبة، من اشوفهم تهون عليه مصيبتي.
رحت فتحت الجبس مال ايدي، خدرانة بس شوية شوية رجعت لطبيعتها.
قريب الظهر، جنت واكفة دا احجي وية استاذ ساري ع وضعي.
ساري: وهسة شلون صرتي؟
اماني: احسن الحمدلله
ساري: الحمدلله، بس ممكن اسألج سؤال؟
اماني: حسب نوع السؤال.
ساري: رح اسئلج وانتِ بكيفج اذا تحبين تجاوبين او لا
اماني: تمام متفقين
ساري: شغل زوجج وموقعه الحساس اله علاقة بالمشاكل الي دتصير وياج اخر فترة؟؟
عكدت حواجبي مستغربة حشريته وجرأته!
اماني: ما احب احجي بخصوصياتي لاحد
ساري: اسف بس لكيت الموضوع غريب، ولان زوجج موقعه حساس ويشتغل بسلك الاحزاب فتوقعت يكون هو سبب الي ديصيرلج
اماني: توقعاتك غلط، كل الي صار مجرد صدفة لا اكثر
ساري: تمام واسف مرة ثانية اذا ازعجتج
ابتسمت بتصنع وعفته ورحت..
اماني: من رخصتك دكتور
ردت اروح للحديقة بس صادفتني حالة مستعجلة لطفلة عمرها ميطلع 4 سنين.
رحت عليهم وسألت بهلع.
اماني: شكو شبيهااا؟
-حادث سيارة دكتورة، انضربت هسة كدام باب المستشفى وجبناها!
اماني: يا ربي دخيلك!!
وديناها للطوارئ، ابوها جان ويانه.
حالته تكسر الكلب وبس يبجي ويسأل عنها شلونها دكتورة وبنتي شلون صارت وخو ما بيها شي.
لحد ما اخير شي، ضمدنا جروحها لان متأذية بكصتها وبأيدها اكو كم جرح.
بس الحمدلله حالتها مستقرة وما عندها اعراض او مضاعفات ثانية خطرة.
طلعت بشرته.
-ها دكتورة بشريني فدوة شلونها بنتي؟
اماني: كلش زينة، هسة بس تكمل الممرضة تجي تاخذك الها
-الف الحمدلله والشكرررر، الله يبارك بيج دكتورة شكرا شكرا الله يوفقج!!
ابتسمت بفرح..
اماني: ولو هذا واجبي.
رحت لغرفة الدكتورات، بس قبلها جبت كهوة وكعدت.
راسي صدع، لا ريوك لا اكل وعلى فد وكفة من الصبح ولسة.
اجتي زينب، رفعت تك عين ورجعت درت وجهي عنها.
من يوم كامت تتودد لعقاب لبستها وعلاقتنا ببعض خربت.
اجت يمي.
زينب: شلونج كالوا متصوبة مو؟
رديت من ورة خشمي.
اماني: الحمدلله، احسن بهواي
زينب: اهاا دومج دكتورة
سويتلها حركةة ممتنة بوجهي، بس مبينة ذيج وينها مصطنعة، واصلا اكص ايدي اذا مطلعت تدري بيه اشمئز من وجودها داير مدايري.
زينب: زوجج عقاب شلونه؟ شو ميبين شنو بعد مياخذج ويرجعج للدوام؟؟
اماني: وانتِ ليش هيج مهتمة بي؟
زينب: لا العفو، مجرد سؤال
اماني: لعد لتسأليه بعد
زينب: ميخالف بس انتِ شبيج مفورة علينه اليوم؟
اماني: دكتورة راسي دايخ، يرحم اهلج سكتي عني
زينب: لا وصايرة تنعثل بعد، شكول شكول
غمتني وراحت معاجبها، باوعتلها هسة هاي شتحطلها وتطيب!!
شو لا خلقة لا اخلاق لا اسلوب لا شخصية، اييع!!
انتبهت لنفسي لسة لابسة الحلقة مال الزواج الي جابلياها..
خليت الكوب ع صفحة ومديت ايدي ع ركبتي..
الكلادة هم بعدني لابستها..
تنهدت والافكار بلشت تزحف لمخي بالتتابع.
اي اني لازم ارجعهن اله.
كملت دوام ووكفت برة عالشارع انتظر تجي سيارة تكسي.
مر الخط مال دكتورة زينب، من شفتها تنهدت بضجر.
اماني: اهووو هسة وكتج!!
وكفت الخط ونزلت الجامة وكالت.
زينب: دكتورة تريدين اوصلج بطريقي خاف زوجج يتاخر
اماني: شكرا ماكو داعي
زينب: براحتج
راحت، هزيت راسي وكلت..
اماني: شكد غثة، عفيه اني شلون جنت مصادقتها، مدري شجنت احس ولله، بس هم ما انلام جانت لابستلي قناع اللطافة شمدريني تطلع حية بواكة الزلم!!
امتمت وية روحي وما احس الا صوت هورن عالي دك فززني!
...
شاهين
واكفين الطلاب بوضعية المسطرة وديرتب بيهم المصور.
حتى ياخذون اللقطة، ميقات جانت بالوسط.
مسرحة شعرها من الصبح يم ام الصالون ومسوية تسريحة بسيطة، حاطة مكياج نازك بارز جمالها التركماني الفريد.
يعني بدون مبالغة وبكل صدق، هي احلى وحدة بكل الطلاب!
العيون جانت عليها، حسيت روحي صرت تنور من الغيرة بس شسوي اتحمل واشوف شوكت تخلص.
واكفة بمكانها وتصفك وتغني وتأشرلي.
ساعة ابتسم ساعة اصورها ساعة اخزرها وهيج لحد ما كلت الف يا علي يلا خلصت!!
حطت القبعة مالتها ع راسي وكالت بفرح..
ميقات: انتَ والتخرج احلى شي صارلي بهالسنـة.
ابتسمت وكمشت ايدها الي مثبتة بيها القبعة ع راسي.
شاهين: انتِ الشي الوحيد الحلو الصارلي بكل حياتي!
باوعتلها بحُـب وثواني.. سمعنا صوت التقاط صورة.
التفتنا لكينا المصور مالتهم دياخذلنا صور.
حجة بحماس..
-استمروا استمروا خوش لقطات بيكم
ضحكت وجريت ميقات المرتبكة عليه، شلت القبعة خليتها ع راسها وبست كصتها بهدوء.
هي بين توترها وفرحتها، جانت ساكتة ومبتسمة بخجل..
اما اني، جنت كلش فرحان علمودها وفخور بيها..
.....
اماني
فزيت من سوالفي ع صوت دكتور ساري يدكلي هورن ويكول.
ساري: دكتورة ليش واكفة هناك تحتاجين توصيلة؟
لعنت نفسي ع هالحالة، ساعة زينب ساعة ساري شلون سالفة كشرة هاي!!
اماني: لا شكرا هسة تجي تكسي
ساري: منين تحصلين تكاسي بهيج وكت، دصعدي اني اوصلج
اماني: ماكو داعي ابقى انتظر عادي ما مستعجلة
ساري: شكد عنيدة، ترا مراح اسويلج شي مجرد اوصلج وانتِ اصلا زميلتي بالشغل بعد شكو هالتحفظ؟!
حسيت روحي انجعصت بالزاوية، ما عندي رد مناسب بعد.
فتحت باب السيارة الخلفي حجة معترض.
ساري: دكتورة الله يخليج اشتغل عندج اني؟ تعاي بالصدر
اماني: مو ..
ساري: ما اكل بشر ولله شجاج؟ ..
تأفأفت داخليًا.. شلون طلابة يررربي!!
سديت باب الورة وصعدت يمه بالصدر.
بس جنت متوترة، ابد ما مرتاحة وياه رغم هو كلش محترم بس اني هيج من الله ما ارتاحله ابد!
علك راديو، طلعت اخبار عن البلد ..
حجة بضجر..
ساري: مادري شوكت يصير براس بلدنا حظ، دوم هالاخبار السيئة شوكت يتطور البلد شوكت نصير مثل باقي الدول!!
اماني: بلدنا هستوه طالع من حرب دموية، حربنا وية داعش خسرتنا هواي ارواح واستنزفت منا طاقات وماديات وسنين من التطور والتقدم.
ساري: صحيح بس الحكومة لو بيها خير، جان كدرت تعوض النازحين وترجع تعمر الموصل والمناطق المحررة، ترا كومة مليارات دتوصل للعراق كمساعدات انسانية من مختلف دول العالم
اماني: معلوم، بس هي مدتروح للشي الصح، كبل تجي لجيوب الفاسدين وبالتالي مدنشوف غير ارقام خيالية مقابل واقع مدمر ومزري.
ساري: صوج الشعب، هم ساكتين وسامحيلهم يتمادون بفسادهم، يكدرون بثورة موحدة يكلبون الوضع ويغيرون من حالة البلد وينتشلوه من بؤرة الفساد
اماني: دكتور الظاهر انت ابد ما مطلع عالوضع السياسي العراقي ولا عندك علم بالاطراف الاساسية المسيطرة عالحكم وكل مفاصل الدولة بالبلد
ساري: لا بالعكس جدا مطلع وفاهم اللعبة، بس ارجع واكولج الشعب هو الاداة الوحيدة والضاربة الي تكدر تنهي هالمهزلة
اماني: من غير الصائب ان تحمل الطرف الاضعف والي بلا حول ولا قوة الذنب بمعركة هو ما اختار يكون طرف بيها اساسًا!!
ساري: شلون مو طرف، لعد منو انتخب هاي الوجوه منو لجابهم وصعدهم دورة انتخابية بعد دورة!!
اماني: تعرف المشكلة الحقيقية وين؟
ساري: وين؟
اماني: بتركيبتنا العاطفية كـ شعب!
ساري: ما فهمت شتقصدين
اماني: شعبنا عاطفي بدرجة امتياز، كلش طبيعي الي فخخ وفجر اليوم يطلع باجر بالتلفزيون يذبله دمعتين ويعتذر علساس نادم وتلكه هواي ناس تسامحه وتصدكه
ساري: مستحيل! المتأذين منه ميسامحوه ابد!
اماني: بالضبط، هو هذا الي اريد اوصله، الشعب العراقي مقسوم قسمين
ساري: والي هم؟
اماني: القسم الاول هذا العاطفي والي يسامح او ميدير بال اصلا لان ما فقد احد، باختصار عايش تحت مبدأ اني شعليه، القسم الثاني هذا القسم الثائر والمضحي الي يقدم نفسه فداء لهذا البلد وغالبية هالفئة تكون من الناس البسطاء والفقرة، هاي الفئة هي نفسها الي متسامح، ليش؟ مو لانها اقل عاطفية من الفئة الاولى لا ابدا، بس لان بكد طيبتهم يجي الجرح جبير فما يكدرون يغفرون ويسامحون لان خسارتهم تكون متتعوض
جنت مندمجة واسولف..
التفتتله لكيته يباوعلي بعيون تلمع وكوة مسيطر ع سياقة السيارة لان تركيزه كله يمي.
ارتبكت ومن الفشلة درت وجهي رئسن، افف شلون بيه شوكت ابطل اتحمس من اسولف بالسياسة!!
حجة بأعجاب.
ساري: الظاهر انتِ تفهمين بالسياسة هم، مو بس بالطب
اماني: مو لهدرجة، يعني عندي اطلاع
ساري: لا، انتِ فاهمة وواعية مو مجرد مطلعة.
محجيت شي بعد، شوية وكلي..
ساري: من هذا الفرع مو؟
اماني: اي منا واول متخلص الفرع لوف ع ايدك اليسرة.
ساري: صار
وصلني واول ما نزلت، صادفت سيارة تكسي طلع منها عقاب.
وية مشافني بهتت نظراته.
ادور من طلع ساري وشافه وراي، احتدت تعابير وجهه واجة باتجاهي والغضب يتطاير من هيئته المعصبة.
عقاب: شنو هالمهزلةةةة هااااي!!!!!!!
-ماذا لو كنتِ شعاع الأمل الوحيد لرجل غارق في الظلام والوحدة؟!
ماذا لو أحبكِ مظلمٌ واصبحتِ ضيائه؟!
ماذا لو أحبكِ عقاب واصبحتِ غفران خطاياه؟!
ماذا لو احبكِ شُتات وكنتِ لمّ شمله؟!
ماذا لو احبكِ يتيـم واصبحتِ كل عائلته؟!
ماذا لو لم يحدث كل هذا؟!
ماذا لو عطفت علينا الدنيا وتركتنا نعيش حُبنا بسلام؟!!
أيُعقل بأننا ادنى من ان نستحق ذلك؟
-بقلمي : نورمين
.....
انتهى!
لا تنسوا التصويت والتعليق 🖤🦋
#الكاتبة نورمين
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!