#خطأ_طبي «عقاب الاماني»
بقلــم : نورمين 🦋🖤
...
اماني
من الصبح متوجعة واحس بطني دتتملخ من الالم، ادور من طخت ببالي شنو السالفة متت بدمي من الخجل، يربي وهذا حاط حرس عالباب، حتى ما اكدر اطلع حيكلولي شتريدين احنه نجيبلج، وهاي طلابة ثانية!
ما احجيلكم شصار بيه، شفت الويل من الالم، ع ما اجة عقاب جنت ميتة حرفيًا، الم الدورة عندي فظيع!
من سألني جنت كلش مستحية احجيله، بس ما عندي احد غيره يساعدني!
فطلبت منه حب بروڤين مسكن للالام وفوط صحية، خطية هو يمكن استحة اكثر مني، لان وجهه كام ينطي الوان ومحجة شي كبل راح.
ادور اني احير بالوجع لو بالفشلة مالتي، الله ليخلي اي بنية بهيج موقف بايخ..!
....
عقاب
طلعت من البيت واني افكر بهالمصيبة الي اجتني وزيدت حياتي هم، اخخ شحجي عليك حجي.
تلكوني الولد.
شاهين: ها شو رديت طلعت؟
عقاب: اا اي نسيت شغلة بالمكتب اروح اجيبها وارجع
ضرغام: خو اخابرلك ليث يجيبها مظل شي ويخلص دوامه
انلاصت، كبل حجيت باندفاع.
عقاب: لا يابة عليمن، اني اجيبها واجي
شاهين: براحتك
ضرغام ضيق عيونه ممقتنع، عفتهم وصعدت سيارتي وسقتها لصيدلية قريبة.
نزلت اخذت الحب المسكن وردت اسأله ع فوط بس شو استحيت...!
جان ولد شاب ووياه بنية، ترددت اسأل وظليت اباوع ع الغراض، لمحتها بس ماكدر احجي، شلون موقف تعبان!
حجة الولد وهو يباوعلي.
-محتاج شي بعد عيني؟
بارتباك كتله.
عقاب: لا هذا هو شكرًا
حاسبته وطلعت، فكرت وين اروح وين اروح ... ماكو غير اروح لأسواق جبيرة!
وصلت لاسواق، نزلت تسوكت كلشي طلع كدامي واخذت الفوط وضميتهن بين الغراض، هو صح يم الكاشير هم حيطلعهن بس يلا ميخالف عالاقل تنحسب وتضيع وية الغراض.
وصدك هيج صار، يم الكاشير ظليت اسوي نفسي ممنتبه وهو يحسبهن لحد ما خلص، حاسبته وطلعت وبيدي علاليك كل وحدة شكبرها.
حطيتهن بالسيارة وطلعت للبيت، احس روحي احتريت هلكد ما تفشلت، شراح يصير بيك بعد عقاب من ورا هالدكتورة هاي!
وصلت وفتحت باب السيارة الحاط بجهتها الغراض، وجان يجون الولد.
شاهين: مو علساس رايح للمكتب؟
عقاب: اي بس من رجعت كلت خ اتسوك بطريقي.
شاهين مشت عليه بس ضرغام لا، خربحظه هذا اكثر واحد يفتهمني من نظرة.
غلست واخذت العلاليك اريد اطببهن بس هم اجو يريدون ياخذون مني.
عقاب: لا خليكم، اني اخذهن اصلا هن مو ثكيلات
ضرغام رفعلي حاجبه، وكال.
ضرغام: براحتك يابة بس انتبه
وغمزلي، باوعت بالاتجاه الي ديباوعله، وشفت العلاليك شفافة بحيث الي بنصهن مبين، جريت بوش واخذتهن وفلتت.
سودة بوجهج اماني ع هالسالفة التعبانه، طاح حظي من الفشلة، بلا ذولاك عالم ما اعرفهم ولا يعرفوني ميخالف، الا ضرغام شلون؟! كشفني السرسري.
طبيت حطيت الغراض بالمطبخ واخذتلها العلاكة الي تخصها، نطيتهيا وهي جانت مثلما عفتها، تون ومتألمة.
عقاب: تفضلي
رفعت راسها وباوعتلي بأمتنان، وهي بين الخجل والالم.
اماني: شكرًا زحمتك وياي
عقاب: كلش ولله
عفتها تباوع بصدمة وكمت عنها، رحت رتبت الغراض الجبتهن بالمطبخ وطلعت علبة كباب جاهز من ذني الجبتهن حتى اگليهن شو اشتهيتهن.
حطيت طاوة، حمى الزيت وبلشت احط الكباب بي واغطي ع ما يستون، شوية واجتي الدكتورة تمشي ببطء، مغيرة ملابسها والواضح بعدها متوجعة بس وضعها اشوى من قبل يجوز.
اهوو واني شكو هلكد مدقق، عيب عليك لك عقاب.
اماني: اني اكملهن عنك، عوفهن
عقاب: لا ماكو داعي اصلا خلصت
اماني: بس خلي...
قاطعتها: روحي ارتاحي انتِ، وينج وين هالسوالف
استحت وراحت كعدت بلا متحجي شي، ادور اني الغبي ما انتبهت ع روحي شحجيت! جان قصدي هي تعبانة وينها وين الشغل مو شي ثاني من الي اجة ببالها، خربحظك عقاب شلون جفصة.
كملت وصحت الولد يتغدون، وهي ع نفس كعدتها، ماعرف ليش كسرت خاطري فرحت يمها وكلت بصوت ناصي بس كله برود.
عقاب: تتغدين؟
التفتتلي والصدمة مبينة بملامحها، شوية وابتسمت وهزت راسها، ظليت محافظ ع ثباتي كدامها واشرتلها براسي يلا.
كامت وجانوا الولد موجودين، ضرغام يباوعلي من جوة لجوة وشاهين مبتسم.
خزرتهم بشكو، ضحكوا ومكالوا شي، الدكتورة محجت اصلا، اكلت شوية وراحت.
واستغلوا الفرصة فكاموا يبسمرون.
شاهين: شعجب صحتلها تاكل ويانه اليوم؟
ضرغام: يخوي تطورات انت شمدريك
حجاها بخبث، خزرته و ضحك.
شاهين: شقصدك، شصاير واني مادري؟
ضرغام: ميخصك
شاهين: لا بلا، تعال عقاب شنو بس هو تحجيله؟ ما احب التفرقة ترا كلنا واحد احجيلي يلا
عقاب: ابن الطرگة شوكت مصخم وجهي وحاجيلك اني؟
حجيتها لضرغام، ورجعت باوعت ع شاهين وحجيت بنفاذ صبر
عقاب: اصلا هو شكو حتى احجي!!
شاهين: لعد شيقصد ضرغام؟
عقاب: اسأله اله اني شكو
ضرغام: ها يعني تقبل احجي؟
عقاب: تاكلون وتسكتون لو احط روسكم بالطاوة
سكتوا بس ضرغام كوة ضام ضحكته وشاهين يندسه كل شوية يريده يحجيله وضايج، واني من غير شي متوتر، استغفر الله شون سالفة.
...
اماني
بعد الصار اليوم، عقاب كبر بعيني اكثر، ماعرف ليش ابسط تصرف منه يسعدني ويخليني فرحانة، رغم انو هو ممجبور خاصة انو الموضوع محرج بالنسبة اله بس هو نفذه الي!
بعدما بدلت وكملت، شميت ريحة طيبة طلعت اشوف، لكيته ديسوي الغدة، اني لان مريضة اليوم مكدرت اسوي شي، ردت اساعده بس اجابته خلتني اموت خجل، سحبت روحي وكعدت بعيد عنه، يمة مو لسان عنده رشاش، ما فد يوم حجيتلي حجايه لاما ردها الي بعشرة، بس يظل عنده جانب لطيف مخفي، يطلع بأوقات الحاجة، وهالشي لاحظته وياه بعد هالمدة القصيرة.
استغربت من اجة كلي تتغدين، هاي اول مرة يكولي هيج! حسيته مهتملي .. فرحت وكمت، بس ما اكلت عدل لان استحي منهم، هم حبابين كلهم ومعندهم نظرات او تصرفات مزعجة بس مادري ليش مجنت مرتاحة رغم كلش جوعانة.
من وخرت عنهم سمعتهم يتبسبسون، ضجت.. معقولة ديحجون عني؟!
اخير شي على صوت عقاب لمن صاح بيهم يسكتون وعم الهدوء، مدري ليش ضحكت، زين يعني مو بس اني اخاف منه، جماعته هم نفس الشي، عفية عقاب جنه بعبع كلها ترجف منه اذا عصب او على صوته هههه.
...
عقاب
حطيت المواعين بالغسالة مالتهن ورحت تمددت، استرجعت الموقف مال اليوم، شلون جانت متألمة وتبجي، شون استحت ومن اكلت قليل وعافتنا، زين هي غير بهالفترة تحتاج راحة وتغذية زينة، ليش ما مهتمة لنفسها؟ لا وكاعدة بالصالة بلا تدفئة، شلون متريد تتوجع لعد، غير تدفي نفسها!
واني شكو، هي حُرة بنفسها، شتسوي خ تسوي اني شعليه.
مكدرت انام ظليت اتكلب وحسيت عليها دتمشي بخطوات خافتة حتى متكعدني، غمضت عيوني وسويت نفسي نايم.
اماني: ليشوفك وانت نايم ميكول هذا نفسه عقاب العصبي
همست لنفسها، سمعتها فـحجيت بلا ما افتح عيوني.
عقاب: شيكول لعد؟
ظلت تباوع بصدمة، فتحت عيوني وكعدت.
اماني: انت مو جنت نايم؟
عقاب: شتكولين انتِ ؟
اماني: مادري عبالي نايم
عقاب: وشطلع؟
اماني: اهوو خ ارجع اطلع احسلي
عقاب: سدي الباب وراج
طلعت ضايجه، مدري ليش احب انرفزها واعاندها، رغم جنت اريدها تنام وترتاح لان اكيد تعبت من كدما توجعت وبجت اليوم بس لساني يحجي شي، والي ببالي شي ثاني مختلف تمامًا.
صفنت .. ها عقاب ردينا؟ احنه شحجينه؟!
مو كلنه لتنسى مهمتك شنو!
تنهدت بضيق ممزوج بالتعب وظليت صافن بالسكف، مدري شلون دخت وغفيت.
...
اماني
اريد افوت انام بس استحي منه، انطيته مجال يغفى وطبيت، شفته نايم بهدوء وملامحه هادئة، واهم شي ماكو عكدة حاجب تخوف ولا نظرة تجدح.
مدري شجاني وهمست بهالشي، جاوبني!
ظليت لا اخذ ولا انطي، حتى ما جان عندي جرأة اناقشه، كبل فلتت.
رجعت للصالة المملة، شسوي شسوي..
اجو ببالي اهلي، بابا وماما وريما وريان، افففف شكد مشتاقتلهم، اريد اشوفهم احجي وياهم!
قررت بس يكعد عقاب افتح الموضوع وياه، ما طلعت هاي حابسني عبالك بسجن لا طبة لا طلعة لا دوام لا اهلي اشوفهم لا تلفون اتصل عليهم، مو وضعية هاي!
واني سكتت وتحملته هواي، لازم اراوي انو اني مو ضعيفة ويمشيني ع كيفه، حتلو متفقين احنه ع هالشي بس لازم اخلي مجال يسمعني بي ويحترم الاريده.
اندكت الباب، استغربت لان من اول ما اجيت لليوم ما تندك باب البيت ابد، لو عقاب موجود منتظر واحد من جماعته هو يفتحها لو ماكو، اممم لعد اكيد شاهين لو ضرغام لان محد غيرهم برا.
كمت فتحتها، طلعن كبالي بنات اثنين حلوات بشكل يخطف العقل.
ميقات: هلاو
اماني: هلاا عمري، تفضلي
ميقات: امي سوت دولمة ودزت لعقاب
شنو هاي، منو امها وشنو علاقتها بعقاب؟!! حجيت بأنزعاج
اماني: عفوًا بس منو انتوا بلا صغرًا بيكم؟
جنات: اني جنات وهاي اختي ميقات، جيرانكم وهذا بيتنا بصفكم
اماني: اهااا، اهلا وسهلا تفضلوا
اخذت الماعون منها وطببتها هي واختها جوة، لان باوعت لضرغام وهو هزلي راسه بمعنى امان.
كعدن بالصالة، حطيت الماعون عالطباخ وجبت عصاير قدمتلهن وكعدت.
ماعرف شحجي ولا شسوي، كلت خ اعرفهن عن نفسي لان هن كالن اسمائهن واني مكلت.
اماني: طبعا نسيت اكولكم، اني اسمي اماني، اعذروني بس مجنت اعرفكم
جنات: لا حبيبتي عادي، تشرفنا بيج
ميقات: اصلا حتى احنه منعرفج، عبالنا عقاب ساكن وحده
اختها خزرتها، هنا اني ظليت مستغربة، يعني هو مكايل لاحد اني وياه متزوجين لو شنو؟
جنات: العفو بس ميقات لسانها فالت
اماني: لا عادي، اشربوا عصيركم
ابتسمت بتزييف، بدن يحجن عن نفسهن ويحششن، ارتاحيتلهن و حبيتهن، حسيتهن لطيفات وكلش ذكرني بـريما، نفس عمرهن وحتى نفس طبعهن.
شوية وطب عقاب عيونه بكصته، خزرني خلاني مادري شسوي ولا شيريد مني اصلا.
سلم ع البنات وهن هم سلمن وسألهن ع جامعاتهن، وهن يحجن وياه عادي، كلش ضجت شنو هاي ليش ميحاجبني مثلهن وليش يبتسملهن واني مخلصها وياي كالب وجهه؟!!
جنات: ليش مكلتلنا اختك هيج حلوة!
بلعت ريكي بصدمة، هذني عبالهن اخته خربحظي، ادور هو وجهه احتقن.
عقاب: اماني مرتي
جنات: صدك!!
ميقات: هاي شوكت ومنين شو مادري!!
حجتها بصدمة ممزوجة بالحزن، بحيث لفتت النظر الها، هاي شبيها بسلا حاطة عينها عليه!
عقاب: ما اعتقد حياتي الخاصة تهم احد
جنات: لا مو هيج قصدها هي.
جنات دا تبرر وذيج قاطعتها.
ميقات: بس اني تهمني عقاب!
عقاب: بس اني ميهمني انو هالشي يهمج
حجاها بحدة ونظراته ممهتمة، برد گلبي بهالرد.
ميقات: بس عقاب انت ...
قاطعها: شتريدين انتِ وليش هيج مهتمة بموضوع مرتي ممكن اعرف؟
نفخت روحي من كال مرتي، هاي شبيه اني كل عقلي! مفروض وحدة غيري تكيف حتى تخلص من عقاب، وترجع لحياتها بس مدري ليش ديصيرلي العكس!
ميقات: لااا، بس.. بس.. انصدمت مادري بيك متزوج وانت هم ما حجيتلنا فتفاجئت
عقاب: يلا هسة عرفتي
هزت راسها واختها جنات تخزر بيها، دنكت راسها ضايجة، طول الوقت جانت تحجي بحركة كلب، عبالك مواعدها بشي وخلف بوعده الها، شكد اجة ببالي اخنكها، ايع شون شخصية زفت، انغشيت بيها وبلسانها المعسول.
استأذنن وكامن، كمت وراهن سديت الباب وجنات همستلي.
جنات: لتضوجين من ميقات فدوة هاي خبلة
هزيتلها راسي وكلتلها.
اماني: لا عادي حبيبتي سوء فهم وانحل
جنات: فدوة لوجهج
كرصت خدي وراحت، ابتسمت ع تصرفها، حبيتها حسيتها حبوبة اكثر من اختها ذيج.
سديت الباب، التفتت والكة عقاب ورايه، شهكت بفزع وصحت.
اماني: يمةةةةةةة خرعتني
عكد حواجبه واحتدت نظراته، عرفته عصب.
عقاب: منو سمحلج تستقبلين ناس ببيتي وتكعدين وياهم؟! بسلا حاسبة نفسج مرتي ومصدكة روحج؟
استجمعت قوتي ورديت عليه بنبرة مستفزة.
اماني: وشدعوة عليك هيج مصدك روحك فد شي بحيث عبالك ميتة ع انو اكول للناس اني مرتك؟
ابتسم نص ابتسامة وكال.
عقاب: طالعلج لسان وصايرة تحجين
اماني: ليعاشرك شيصير؟
تقرب عليه اكثر حصرني عالباب ونظراته الحادة مصوبة ع عيوني، قربه يوترني وحرارة انفاسه الي تلفح وجهي زادت الوضع سوء بالنسبة الي.
عقاب: صيري حبابه
كالها بهمس ووخر.
اخذت نفس اخيرًا، حسيت الهوا ضاع مني، شرب مي ورجع صاحلي.
عقاب: تعالي دكتورة
كعدت كباله بلا ما اكول شي.
عقاب: ليش فتحتيلهن الباب؟ منو سمحلج؟
جان ديحجي بهدوء مو عصبية مثل قبل شوية فجاوبته.
اماني: محد سمحلي بس اني عبالي الشباب احتاجوا شي، من فتحت الباب شفتهن بوجهي
عقاب: زين، لهنا متدرين، وراها ما عرفتي تصرفيهن؟
اماني: عيني هن جايات حتى يشوفنك، اني لا اعرفهن ولا شايفتهن بس ضرغام اشرلي ادخلهن فنفذت، عبالي عادي تقبل.
عقاب: فتحي اذانج وعقلج واسمعي شراح اكول كلش زين لان ما اعيده بعد
هزيت راسي بضجر، هم رجع لاسلوبه الحاد افف!
عقاب: مرة ثانية لو الباب تتكسر متفتحيها، لتكولين مادري وما متقصدة، هاي من هسة حذرتج، اني اذا موجود افتحها واتصرف غيرها لا
اماني: تمام
عقاب: شغلة ثانية، ممنوع منعًا باتًا تحجين حجاية وحدة عن علاقتنا او زواجنا لكائن من يكون، ولا تكولين لاحد انتِ مرتي او تتفاخرين بهالشي
اماني: عفوًا..! اتفاخر؟ ليش انت شنو حتى اتفاخر بيك؟!
عقاب: انجبي واحجي عدل
اماني: انت الي مدتحجي عدل!! ترا انت الي كلتلهن اني مرتك، هن عبالهن اختك بس انت فضحت نفسك بنفسك كدامهن فالحجي هذا كوله لنفسك مو الي
عقاب: دكتورة صمي حلكج خ الغي
اماني: انت ليش هيج تحجي ويايييي؟!! شو وياهن تحجي عدل وتتمضحك ويمي بس تصيح
خزرني وحجة بعصبية.
عقاب: اياج وبالج تطولين لسانج مرة ثانية، اكصه ولله واخليج تتندمين، ثانية وبعد انتِ منو لحتى تقارنين نفسج وياهن؟ نسيتي روحج لو شنو؟ خاف صدكتي دور الزوجة وعشتي اللحظة، ارجعي لوعيج احسن ترا الواقع يختلف ومحاجة احجي بعد
انقهرت كلش، حسيت كلامه سجاجين وانغرزت بگلبي، بس هم صح اني وين وهن وين، قاتلة ع بنات جيرانه شجاب لجاب، عيوني صارن حمر كوة لزمت روحي حتى ما ابجي.
اماني: فهمت
عقاب: زين، ميقات وجنات معندهن اختلاط ببقية الجيران لا هن ولا امهن، فـ محد حيعرف انتِ زوجتي غيرهن، صار واضح لو لا؟
هزيت راسي ونظراتي محتدة عليه، ساعة اكرهه واتمنى اكوم اخنكه وساعة استلطفه، اففف شنو هاي التناقضات يربي.
اماني: تحبها؟
مادري شون طلع مني السؤال بس جان يدك ببالي
عقاب: مفهمت
اماني: ميقات واضح تحبك، انت هم تحبها؟
ابتسم وبسخرية كال.
عقاب: من اكلج مصدكة روحج مرتي متصدكين
اماني: سؤالي مجرد فضول مو اكثر
عقاب: ولو ميخصج بس خ ارضي فضولج مثل متكولين، اني مستحيل احب احد لان ماكو گلب ميت يدك، لا بالحب ولا غيرها
احتاريت برده وظليت اباوع بعيونه، شنو هالنظرات وليش هيج طبعه، حتى كلامه يلچم الكلب!
...
عقاب
مرت الأيام بروتين ممل، من الشغل للبيت، لو اطلع وية قسورة لو اظل وية ضرغام وشاهين، علاقتي بالدكتورة شبه معدومة، اشوفها اتجاهلها تحجي اعوفها واروح، رجعت لروتيني القديم.
الشغل هالفترة كلش مكثف ومنكدر نحك روسنا من كثره، اغلب الاحيان كمت اشتغل بالبيت حتى الحك.
وبيوم بالمكتب، كاعد اني وقسورة نشرب كهوة، صاحلي الحجي.
عقاب: تفضل يابة
الحجي: هلاا بالغالي تعال اكعد خ نسولف
ابتسمت وطبيت كعدت يمه.
الحجي: شلونك شلون الامور؟
عقاب: كلشي عال العال يابة لتشيل هم
الحجي: كلش زين، خ اطبلك بالنظيف لعد
عقاب: اي ولله يكون احسن
الحجي: رياض عازمنا ببيته اليوم
عقاب: رياض رياض؟
الحجي: اي بوية دكتور رياض ماكو غيره
عقاب: شنو المناسبة.. ما افتهمت شعنده؟
الحجي: صار من يوم اخذت بنته لليوم هو يتوسل ويرجع ع صفحة حتى نرجعها اله، هسة أيس وتقبل الواقع، فـأول البارحة عزمني نتعشا ببيتهم اني وانت والدكتورة وكتله افكر واشوف
عقاب: ما مرتاحله يابة، انت شتكول؟
الحجي: لا من هالناحية لتخاف، لانه فارغ ميسوي شي واكبر دليل تهديداته الي بيك ما نفذها ولا تقربلك
عقاب: يعني تكول نروح؟
الحجي: اي، بالاخير احنه عدنه صفقة ولازم نحاول نمشي الامور مثل منريدها منا لمن نوصل للنريده
عقاب: التشوفه اني موافق عليه يابة
الحجي: خوش لعد تحضر وانطي خبر للدكتورة، ولتنسى تذكرها شيصير اذا لعبت بذيلها منا منا
عقاب: يمي لتشيل هم
الحجي: عاشت ايدك
عقاب: يلا اترخص لعد
الحجي: مرخوص بوية
طلعت منه افكر، ماعرف ليش ممرتاح، حجيت لقسورة.
قسورة: ولله اني هم ممرتاح بس لازم ننفذ اوامر الحجي
عقاب: اكيد بس لازم ناخذ احتياطاتنا، ما اثق برياض خاصة بحالته هاي يسوي كلشي حتى يرجع بنته
قسورة: اي ولله، هسة لو بمطعم جان صارت آمنة اكثر بس ببيته، مدري كلبي لعب من هالسالفة
عقاب: اي بس هو عود يريد يوكع الزعل وكذا فعزمنا ببيته عود اهل صرنا
قسورة: صح
عقاب: راجع للبيت اني، محتاج شي؟
قسورة: لا حبيب بس تأنق زين اليوم تشوف عمك دام ظله
عقاب: صم حلكك
ضحك واني عفته وطلعت، سالفة رياض ما مرتاحلها كلبي، هستوه تذكر بنته وتقبل الواقع؟ حيصير شهر وهو لا حس ولا نفس بس يلا يهدد، طك فش صار يعزمنا ببيته!
رجعت للبيت، سلمت ع شاهين وضرغام وطبيت.
لكيت الدكتورة بالمطبخ تسوي غدة، باخر ايام صارت هي تحضر الغدة النا اني والولد.
اماني: الله يساعدك
تجاهلتها كالعادة ورحت غسلت وسبحت وطبيت ابدل بالغرفة، اخذتلي تراك لبست البجامة ودا اريد البس البلوز دكت الباب وطبت
شافتني هيج، دارت وجهها وكالت.
اماني: اسفة ردت اصيحلك تاكل
مشيت كبالها واني البس بالبلوز، بدون ما ازيد حجاية ع الي كالته.
صحت الولد وكعدنه نتغدة بهدوء، جان الاكل ناقصه ملح، فظليت احط لحد ما شفته صار زين.
اماني: بس مو زين هيج، الملح الزايد يسويلك ضغط
عقاب: متعود
شاهين: يبوو هي بس هاي العايزها عقاب حتى تكمل وياه
ضرغام:اكل واسكت كافي تجفص
شاهين: شكلنة قابل
..
اماني
ضرغام خزره وعقاب محجة شي بعد، شاهين سكت بس ظلت جملته تدك ببالي، ليش شبي عقاب وهيج كال؟وليش ضرغام سكته؟ شصاير وياه؟! اففف شوكت احصل اجابة ع اسئلتي هايه!
للعصر كاعدة اباوع تلفزيون، اجة عقاب تحمحم حتى يلفت انتباهي، باوعتله.
عقاب: كومي جهزي نفسج حتى نطلع
اماني: وين؟
عقاب: ابوج عازمنا عالعشا ببيتكم
كمت ع حيلي وحجيت بعدم تصديق.
اماني: صدك ولله؟!!
عقاب: مشاقي وياج قبل؟
اماني: لا بس.. شلون وشوكت ليش مكتلي من قبل؟!
جنت احجي بحماس وهو ابرد منه ماكو.
عقاب: يعجبني، خلصتي اسئلة لو بعد؟
اماني: لا هاهيه لتعصب
عقاب: ما معصب، كعدي احجي وياج
كعدت وهو كبالي، ملامحه كالعادة جدية، حواجبه معكودة ونظراته حادة.
عقاب: ع شنو متفقين احنه؟
اماني: ما اجيب سيرة التهديد واتصرف طبيعي
عقاب: وبعد
اماني: ما الفت نظر واظل وياك وأأيدك بكلشي تكوله
عقاب: وبعد
اماني: ما اكول لاحد اني مرتك
عقاب: مو هاي ولج
اماني: لعد شنو
عقاب: بعد اكو شغلة مهمة، ممعقولة نسيتيها؟
اماني: شنو هي؟
عقاب: تذكري زين
اماني: مدا اتذكر ولله
عقاب: ممنوع تحجين لاحد عن علاقتنا وتفاصيل حياتنا
اماني: ليش احنه اكو بيننا علاقة؟
عقاب: كدامهم يفترض اي، بيني وبينج بالحقيقة كلشي ماكو
اماني: تمام
عقاب: يلا كومي، هم يالا تخلصين ورايه اشوف الحجي ويجوز اروحله للبيت
اماني: تمام كايمة، ما اطول
كلتها بحماس ورحت ابدل، لبست بنطرون وبلوز وحطيت جاكيت جلد فوكاهن، شعري عفته مفتوح ومكياج اصلا معندي بس حُمرة، حطيت منها شوية لشفايفي وشوية لخدودي، لان وجهي تعبان ومصفر.
دك الباب عقاب وطب، باوعلي ودار وجهه، ابتسم نص ابتسامة واخذ عطره حط منه وادور لبس جاكيته.
اماني: اكو شي يضحك بيه؟
عقاب: لا يابة ليش؟
اماني: لعد ليش ضحكت اول ما شفتني؟
عقاب: يعجبني، عندج اعتراض؟
اماني: لئيم
عقاب: انجبي وامشي يلا
رحت امشي كدامه قبل ليعصب ويكعدني بالبيت، ممصدكة حشوف اهلي بعد كل هالوقت، اخخخ شكد مشتاقتلهم.
الطريق كله خلصناه هدوء، ردت اشغل اغنية بس ما قبل الافندي، رجعت صفنت بالطريق.
شوية ودك تلفونه، جاوبه والظاهر كلوله طلعنا لان سمعته يكولهم جاي وراكم.
التفتت عليه وسألته.
اماني: اريد تلفون، بيا عصر احنه؟
عقاب: هذا الموجود
اماني: اريد ارجع لدوامي، مليت بالبيت
عقاب: بعدين نقرر
اماني: استغفر الله يا رب
وكف السيارة واندار عليه وكال بحدة.
عقاب: هاي اخر مرة احذرج، من تحجين وياية اعرفي شتكولين
اماني: الاستغفار ممنوع يمك؟
عقاب: اذا بنفس هالاسلوب اي وحرام هم، مفهوم؟
هزيت راسي ودرت وجهي، ما حسيت الا جر ايدي التفتت عليه يغلي من الاعصاب.
عقاب: من احاجيج تجاوبيني، ووجهج متديرينه عني، سامعة؟
اماني: تمام
كلتها بضعف، شكد كرهت نفسي وحياتي وشلون انتهى بيه الحال راضخة لعقاب واوامره ..
وصلنا لبيت اهلي.
نزلت وهو وياي، مشيت بس هو صاحلي، رجعتله لزم ايدي وهمس بأذني.
عقاب: لتنسين، مثلي زين
هزيت راسي ومشينا سوة، شفنه صديقه قسورة واكف يم سيارة، الظاهر هاي للحجي وهو واصل قبلنا.
سلم عليه وطبينا للبيت، اول ما فتت دموعي تجمعت بعيوني، مشتاقة لحياتي الحلوة الي جانت هنا، مشتاقة انام واكعد تحت هالسكف، مشتاقة لكل حياتي السابقة ومشتاقة لاهلي واحد واحد.
فتنا للصالة وشفت امي واكفة منتظرتني، ركضت حضنتها ودموعي نزلت من الفرحة، باستني وشبكتني جنها ممصدكة مثلي، بعدين شبكت بابا وبسته وريما اجتني من المطبخ تركض حضنتني قوي بحيث كطعت نفسي.
ريان اخذني بحضنه وطبطب ع جتفي وهمسلي بمشتاقيلج ومكانج خالي، احس كلبي رفرف بهالحجي، رديت عليه بـ اني هم والفرحة ما سايعتني.
كملت وصلت للحجي، ابتسمتله كمجاملة.
الحجي: شلونج بنيتي
اماني: الحمدلله
وكفت يم عقاب الي خلصها يخزر بيه ويرجع ع صفحة، ادري حتى السلام ع اهلي ممنوع عنده!!
كعدنه وعقاب همسلي بنبرة ضايجة.
عقاب: لو مكملتها وحاضنة الحجي فد مرة مو احسن؟
....
-انتهى!
للمعلومة التنزيل بين يوم ويوم، واي استثناء يصير انزل بالانستا، فجماعة الانستا يعرفون اول باول.
حسابي بالانستا: noormin13
-لا تنسون التصويت 🖤
-الى اللقاء قريبًا..
#الكاتبة نورمين 🖤
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!