#خطأ_طبي «عقاب الاماني»
بقلــم : نورمين 🦋🖤
...
عقاب: لو مكملتها وحاضنة الحجي فد مرة مو احسن؟
اماني: ش..شنو؟!
ماعرفت شحجي لان مفهمت قصده، بعدين شبي هذا ضايج؟
عقاب: حلو الثكل، اثكلي شوية ليشوفج يكول سنين مشايفتهم مو اقل الشهر
بحدة جاوبته: وانت ليش ضايج؟
ضيق عيونه وخزرني بنظرة اني اعلمج، باوعتله بعدم اهتمام، حلوة هاي فوكما يحجي عليه هو ابو الراهي.
ماما سألتني بلهفة : شلونج حبيبتي شخبارج؟
تصنعت الابتسامة ورديت.
اماني: الحمدلله كلشي تمام
مديت ايدي لزمت ايد عقاب وابتسمتلها واني احجي بسعادة حتى لتحس عليه.
اماني: وعقاب كلش حباب ويايه وممخليني احتاج شي
ابتسم نص ابتسامة وهز راسه، وخر ايده عن ايدي واعتدل بكعدته، ضجت منه، يعني يكولي مثلي زين ومن امثل هو يبوز وجهه!
شفت نظرات عدم التصديق والخوف عليه بعيون كل شخص بعائلتي بس تجاهلتها لان ميفيدني هالشي، اني يوم قررت اتزوجه تخطيت كلشي ودست ع نفسي علمودهم، وحظل هيج مكملة لحد اخر يوم بحياتي.
الحجي: شوف شلون حلوين سوة، ادور لابسين نفس اللبس، متفقين لو شنو هههه؟
الحجي يسوي نفسه ظريف، انتبهت صدك لبسي اني وعقاب نفس الشي كله اسود، عبالك منسقين سوا بس هي مجرد صدفة.
عقاب: صدفة يابه
الحجي: شلون صدفة حلوة لعد
عقاب يحجي من ورة خشمه، كلش قهرني من كال صدفة، يعني هو حتى بالجذب والتمثيل ميطيقني!
الحجي: اي دكتورنا شلونك، شلونها الامور، ان شاء الله مرتاح بحزبنا؟
وجه كلامه لبابا الي مبين ميطيقه و كاعد ع اعصابه وياه.
رياض: ماشي الحال، احاول اتعود
الحجي: اي مو مشكلة يرادلك وقت وتتعود علينا
رياض: نشوف ..
كالها بنفاذ صبر والحجي ابتسمله باستفزاز، ظلوا يحجون بامور السياسة وعقاب يشارك بالكلام بحجايتين ويسكت، لاحظت عليه انو هو مو شخص يحجي هواي، كلامه قليل وع كد الحاجة، جدي وميحب الهوسة واللغوة الي بلا نفع.
الكعدة كلها جانت عبارة عن حرب اعصاب باردة، واحد يمثل عالثاني السعادة والتفاهم واحنه جذب كلشي ماكو من هالحجي، اني وعقاب فاصلين كلمن بعالم، اهلي ونظراتهم المشككة الي، ابوية والحجي الي مادري شنو فلمهم، تعبت اعصابي من الجو، بس رغم ذلك جنت فرحانة انو شفتهم لاهلي واطمنت عليهم بعد وقت طويل.
كعدنا عالسفرة نتعشة وامي واختي بدن يجيبن الاكل للمائدة، ردت اكوم وياهن بس عقاب حط ايده ع رجلي وخزرني بمعنى كعدي، تنهدت وظليت بمكاني، تعبت منه يالله شيخلص هالليلة عاد.
بلشنا ناكل والصمت مخيم عالاجواء، ريما وماما اكلوني بنظراتهم، واني مغلسة ومسوية نفسي ممنتبهة، عقاب كاعد بثقة ويا جبل ميهزك ريح، لا تاثر لا ارتبك ولا كأنو اكو شي، اكل وكمل وكعد ع صفحة.
كمت اغسل، لحكتني ريما وشبكتني بقوة.
ريما: اخييييرا لكفتج لوحدج، شلونج احجيلي بالي يمج ولله
اماني: ما بيه ريري، اني زينه هياتني كبالج
ريما: لتجذبين ترا كاشفتج، اختي واعرفج احجي شديسويلج هالحقير؟
اماني: لتغلطين عليه
ريما: شوف هاي يربي، وج بابا ليش تزوجتي وعفتينا؟هددج بينا مو؟!! احجي اماني احجيي!
اماني: لا لا لا
عطت بيها بنفاذ صبر، دخلت ماما فحجيت واني اباوعلهن ثنينهن.
اماني: افهموا اني بارادتي تزوجته محد جبرني محححححد!!!! كافي تسألون!
ماما سئلتني مرة لخ: وج ليش تشلعين كلبي يا امي، ليش هيج سويتي بروحج و بينا!
اماني: ماما الله يخليج كافي، بزعتوني ولله
ريما: يوم ولله هاي جذابة لتصدكيها
الام: علساس ماعرف بنتي اني وتكليلي، داشوف العذاب بعيونها بس تكابر متراوينياه، وج ماما احنه اهلج وياج دوم
اختنكت حسيت النفس ماكدر اخذه، اني معايزة وجع كلب وامي داست عالمكان الي ديوجعني، والي هو اهلي.. بس لو تدري الي دا اسويه بنفسي علمودهم!
اماني: اذا تظلون هيج بعد ما اجي ترا
الام: لا حبيبتي لا بنيتي، غير من خوفنا عليج
ريما: عوفيها يمه هاي شخطت مثل رجلها الشفية
نترت بيها.
اماني: احترمي من تحجين عنه!
باستهزاء ردت.
ريما: هاج باعي متقبل عليه ادور
الام: كافي ريري!!
ريما: هو اني شحجيت وكبيتن؟!
اماني: ماما اني رايحه اكعد يم عقاب
الام: بس كوليلي قبل لتروحين وطمني كلبي، مرتاحة؟
سؤالها خلاني احتار بالرد، راحة؟ صار شكد ما حاسة بهالاحساس..!
هزيت راسي وكلتلها حتى اطمنها.
اماني: لتقلقين مرتاحة ماماتي، عقاب حباب وياي ترا مو مثلما عبالكم
ريما: ع شوية تسوي حب حياتج، لج بابا اصحي اصحي! عليمن دتمثلين كاشفينج ولله
هزيت راسي بعدم رضى ودرت وجهي وعفت امي تحجي عليها، ريما الوحيدة فاهمتني وحاسة بيه حتلو محجيت او جنت ما ابين هالشي، مادري افرح مادري اضوج، المهم عديها ع خير يا رب.. هالليلة استهلكت طاقتي ومشاعري ع كد ما كبتت بنفسي..
رجعت كعدت يم عقاب، لاحظ عليه مو طبيعية، باوعلي بنظرة شكو، هزيت راسي بماكو شي، بس هو ظل يباوعلي بشك، تقرب يمي وحجة بهمس.
عقاب: شصارلج شنو هالحالة هاي؟!
اماني: بعدين نحجي
رفع حاجبه بتعجب ودار وجهه، ادور جابت ريما الجايات وقدمتلهم، اني ما اخذت لان ماشتهي احط شي بحلكي.
عقاب حط استكانه عالطاولة، لان دك تلفونه وطلع يجاوبه، ريما كعدت كبالي وهي تباوعلي بنظرات عجزت افهمها، وتأشر ع الحجي وتغمز بحركة شماتة.
شفتها تباوع للحجي شوكت يشرب، هنا ربطت هاي شدتسوي!!
كمت ع حيلي وصحت.
اماني: لااااا لا تشرررررررب!!!!
عقاب يباوعلي باستغراب والحجي كامش الاستكان وعينه عليه، هم ما فهمان شديصير،ريما خزرتني بس مدرت بال وبابا وماما نفس التعجب بوجوههم.
الحجي: شكو بنيتي؟
توترت ورحت يمه، اخذت الاستكان منه واخذت مال عقاب، باوعتلهم وكلت بتوتر.
اماني: ماكو عمو بس عقاب كلي انتو تحبون الكهوة، فراح اسويلكم هسة واجي، ريما متعرف
عقاب ضيق نظراته بشك، بلعت ريكي حتى اقوي نفسي، احس كل هالاحداث هواي عليه!
الحجي: عادي حبيبتي هم نشرب الجاي ترا مو الا كهوة
اماني: لا ابد اليوم الا تضوك كهوتي لتفشلني فدوة
ابتسم وكال.
الحجي: هاهيه مثل متريدين يابه
تنهدت براحة ورحت اركض للمطبخ، كلبي يريد يطلع من مكانه وكوة اجر نفس، ممصدكة ريما وصلت بيها تسمم بشر! يعني لو مهما يكن ماكو انسان يستاهل انو يموت!
اجت ورايه تبهذلني.
ريما: ولله اكبر غبية ع وجه الكون هي انتِ، مو ردت اخلصج منهم ليش هيج سويتييييي؟!!!
تخبلت من كلامها، فوك تصرفها الغبي هيج تحجي!!
اماني: مع الاسف ولله، هيج روحتي تربية وتعب بابا علينا بتصرفاتج الغبية، يعني عبالج بابا ميكدر يكتلهم لو يدز ناس تخلصنا منهم؟ لو اني ماكدر اسممهم وارتاح؟ لو عبالج بس انتِ تفتهمين وحليتيها علساس؟ اني للان مصدومة مدا اصدك .. ابد ما تخيلت بيوم تفكرين بهالطريقة وتصيرين مجرمة! شنو فرقج عنهم هسة بلا من سممتيهم؟!
ريما: اكو فرق وهواي هم، ع الاقل اني داسوي هيج حتى احرر اختي من ظلمهم!
صحت بيها بأندفاع.
اماني: منو الكلج اني مظلومة؟ هاااا منووووووووووو؟؟؟؟!!! لج لو يصلبني عقاب هو والحجي هسة هم مالكم حق تحجون، اني كتلت اخته تعرفين شنو يعني كتلتهاا؟!
ريما بجت وحجت بحزن
ريما: بس انتِ ما جنتِ متقصدة تكتليها، هذا قدرها شتسوين يعني، اصلا يكفي الدمار العشتيه من بعد موتها
اماني: مو انتِ لتقررين اذا يكفي او لا، وهاي اخر مرة احجي واحذرج، ريما اياج وبالج تتقربين لشي او شخص يخصني، هالمرة سكتت بس مرة اللخ، ما اكول اختي ولله احطج كدامهم واخليهم هم يتصرفون وياج فتأدبي وكبري عقلج
ريما: بس مون اني ردت اساعدج...
حسيت الدنيا افترت بيه، كعدت ع كرسي وضميت وجهي بأيديه، ريما انخبصت وظلت تسأل شبيج وكلشوية تعتذر وتكول اسفة، فز گلبي من سمعت صوت عقاب.
عقاب: ممكن تعوفينا وحدنا شوية
كالها لريما، باوعتلي هزيت راسي فعافتنا وطلعت، مشالت راسها وباوعتله، اعرف اختي تسوي السالفة ومتحسب حساب لشي، بعدين يلا تحس ع نفسها، اما عقاب فجان يباوعلها بنظرة مشمئزة، معقولة حس اكو شي؟!
تقدم باتجاهي، وكف كبالي وسألني بصوته الحاد.
عقاب: شديصير وياج انتِ؟ شنو هذا الاستعراض السويتي من شوية؟
اماني: ماكو شي بس ردت اسويلكم كهوة ادري بيكم تحبوها
رفع حاجبه وحجة باستهزاء.
عقاب: متاكدة هيج بس؟
اماني: اي لعد شكو يعني
قرفص كدامي، صار بمستواية فـنظراته التقت بنظراتي، كلبي دك سريع من حركته هاي، حط ايده ع راسي، ربت ع شعري بهدوء وكال بثناء وهو مبتسم.
عقاب: عاش الزلمة الربـاچ
وكفت الدنيا يمي لثواني، رمشت كم مرة بعدم تصديق وفرقت شفايفي اريد احجي بس ماعرف شحجي اصلا!
معقولة هذا عقاب؟ لا مستحيل هو اكيد بدلتوه!
اماني: شكرًا
كوة طلعت مني الكلمة، واصلا مادري اذا هي الجواب المناسب او لا، نظراته جانت تتفحص وجهي وتعابيري المرتبكة وهالشي زيد توتري.
عقاب: لترمشين هيج
بفهاوة رديت: هاا؟
عقاب: ولهدا لهالحلك الفاهي
كالها وكام وكف عدل، ظليت مصدومة من تحوله الغريب، هالرجال شنو وضعه ساعة لطيف ساعة حاد!
اماني: شبيك؟
عقاب: سمعت كلامج وية اختج كله
انتفضت وركضت وكفت كدامه وكلت واني ادافع عن اختي بخوف.
اماني: بس اسمعني، هاي غبيه وطايشة ومتعرف تتصرف، واصلا مصار شي ..
قاطعني وكال.
عقاب: اعرف وداكلج سمعت كلشي
اماني: مراح تأذيها مو؟
حجيتها بضعف
باوعلي بتعاطف بعدين رجعت الجدية سيطرت ع ملامحه.
عقاب: هالمرة لا، بس يا ويلها اذا انعادت
اماني: متنعاد ولله وداعة بابا
عقاب: زين بس للمعلومة، احنه مو مجرمين ومنكتل احد، واذا صار وكتلنا فيكون يستاهل، لا عبالج عدنه سلطة وحزب معناتها احنه ناس ايديها ملطخة بالدم
دنكت راسي بخجل، هذا يقصد من كلت لريما شنو فرقج عنهم هم صرتي مجرمة!
اماني: تمام
رديت بنبرة ثابتة.
عقاب: دكتورة سؤال
بلعت ريكي بتوتر من كال هيج، خير يا ساتر شكو ادور، خاصة هو ميسأل الا اذا اكو شي مهم!
اماني: جواب
عقاب: ليش ما خليتي اختج تنفذ الي سوته؟
اماني: اعتقد انت كلت سمعت كلامنا مو؟ فالمفروض تعرف الجواب
عقاب: صحيح بس عاجبني اسمعه مرة لخ
تنهدت ورديت واني مدنكة راسي، لان نظراته تربكني.
اماني: بابا وماما من جنة صغار علمونا انو الروح غالية، وانو ما نقابل الاساءة باساءة، اذا المقابل جان سيئ وياي، مو ضروري اعامله بنفس طريقته، من الحلو ان اعامله بتربيتي واصلي، وهيج رح اخجله واحسسه بغلطه اكثر مما لو قابلته بنفس اسلوبه السيئ
باوعتله شفت بعيونه نظرة حزينة ع نادمة ماعرف شون اوصفها، بس الاعرفه انو حركت شي بداخلي، طولت بنظراتي اله وهو نفس الشي، بهالثواني شفت عقاب ثاني .. ابد ميشبه عقاب القاسي والصلف الاعرفه!
عقاب: وحتظلين هيج، حتلو جان هالشخص رح يسوي شي يحرك كلبج؟
عرفت انو هو يقصد نفسه، ابتسمت بحزن وهزيتله راسي.
اماني: حتلو جان رح يكتلني، اني حـ اظل مثلما اني.
ملامحه تغيرت وعيونه تغيرت نظرتهم الحادة، وبين عليه التأثر، فرق شفايفه وراد يحجي شي بس تراجع، ودار وجهه وطلع بلا كلام، وخلاني وحدي اصارع تناقضاتي وافكاري الي دتاخذ من طاقتي..!
....
عقاب
طول الوقت جنت كاعد ع اعصابي، كل الي داشوفهم احس الهم ايد بموت اختي، امها وابوها الي شجعوها تدخل طب هم السبب!
ابوها الي طمطم السالفة حتى لتتأذى هم حقدت عليه، اختها الي عبالي بريئة طلعت حاطة سم بالجاي الي وللحجي!
سمعتها تحجي هي واماني بالمطبخ، بعدما كلتلهم انو حشوف اماني، حرفيًا حسيت برعشة مشت بجسمي من سمعت شلون ترزل اختها علمودنا اني والحجي!
تذكرت الي سويتلهم زينات بكد شعر راسي قبل، وشلون جازوني بالغدر ونكروا تعبي وياهم، وهاي الي ما عاملتها بطريقة زينة شلون جازتني..!
حسيت بتأنيب الضمير وبالندم تجاه كل كلمة وتصرف جارح طلع مني واذيتها بي، هسة بس يلا تأكدت انو الخطأ الي صار وراحت ضحيته اختي جان ممقصود..!
بس هالشي ميمنع انو صار وخسرني اختي، وانو الدكتورة مذنبة، طلعت من يمها واني محمل غضب بشكل فظيع.
رحت يم قسورة لان بعد ما اكدر اتنفس براحتي هنا، احس الهوا بهذا البيت يخنكني، طلعت جكايري وبلشت ادخن بشراهة.
قسورة: شجاك يمعود هو هيج؟
عقاب: نااااار تسعر بگلبي ولك، اريد تنطفي موتتنيييي!!!
قسورة: شصار جوة؟ احد ضوجك؟ كلي حتى اطب انتحر بي!
عقاب: الدكتورة ..
قسورة: يا طلابة الدكتورة لما تفض، شسوت هالمرة؟
سولفتله كلشي، واني ما بطلت تدخين، ايدية قالب ثلج من البرد بس كلبي نار، واحس اكو شي ثكيل نايم ع صدري وخانكني، وهاي حالتي من يوم ماتت بيري لليوم، دموعي متطلع مدري شبيها، وهالكبت رح يدمرني!
قسورة: وانت خابص روحك وهالنكد كله ع هالسالفة؟ بدال ما تكيف طلعت الدكتورة خوش بنية
عقاب: ولك ولله لو غالطة وسابة عشيرتي كلها ولا كايلتلي حظل مثلما اني .. حسستني شكد اني واحد نذل!
قسورة: لتزودها، هي حجت هيج لان تعرف بيك محروك كلبك ع اختك ومعناها هي عاذرتك لو شما سويت
عقاب: لعد اني شنو لمخبلني قسورة!!! ليش عاذرتني ليييش؟!!!! اريدها تحجي تصرخ تغلط تأنبني!
قسورة: متسوي هشكل، لان هي من النوع المسؤول، مدام غلطت وتعرف نفسها غلطانة، دتدفع ثمن هالغلط وهي الممنونة، فـقابلة بالواقع
عقاب: بعمري مشفت هيج.. يعني شكد جنت مستحقرها بس هسة دا اشفق عليها، دتلاحظ ليا مرحلة اني وصلت؟!
قسورة: ملاحظ وهذا الشي ديخوفني، عقاب دير بالك تخلي مشاعرك تتحكم بيك، ترا بعدين تتندم
عقاب: اي مو عايز اني...
قسورة: انتبه لعد
هزيت راسي واني ادخن وانفخ بقوة، اريد النار الي بصدري تطلع وية الهوا مال الجكارة، بلكي يخف وجعي شوية.
عقاب: تدري هسة يلا عرفت ليش اصر الحجي منجيب باقي الشباب ويانه كحماية؟
قسورة: شلون؟
عقاب: لان يعرف كلش زين انو الدكتور متطلع منه طلعات صفح، فما اخذ احتياطات، واكبر دليل كلام الدكتورة وية اختها وموقف الدكتور الهادئ اليوم
قسورة: صدك شلون جان وضعه؟
عقاب: هادئ رغم مبين عليه شكد حاقد علينا، اخخ تصدك احترمته ع هالعقلية والتربية الحلوة الي مربيها لأولاده
قسورة: يستاهل ولله
شوية وطلع الحجي ووياه الدكتورة وبقية اهلها، رحت وكفت يم الحجي، ودعناهم واخذت الدكتورة لسيارتي، صعدنا والهدوء جان سيد الاجواء، الجو بارد والهوا يكص كص، ورغم هالشي احس بروحي محتر، الدكتورة واضح بردت، جانت ملابسة شي ثخين حتى جاكيتها خفيف ميدفي، من طلعنا جان الجو زين، ردت انطيها جاكيتي بس ترددت.. وبعدين شلت الفكرة من راسي تمامًا.
وصلنا للبيت، بدلت ملابسي وتمددت ع جربايتي، الدكتورة اخذت ملابسها بدلت بالحمام ورجعت.
نامت بمكانها عالكاع ونطتني ظهرها، ظليت اباوعلها وافكر بكلشي صار، شنو الصح؟ واني شدايصير وياي؟ دا احس نفسي ضعت!
...
اماني
من رجعت للصالة وجبت الكهوة، جان عقاب ما موجود، قدمت الكهوة للحجي وكعدت وعيوني تدور عليه، ماهوه مدري وين راح، وضعه معاجبني وظل بالي يمه.
امي صاحتلي وظلت تحجي نفس الحجي، جاوبتها كالمعتاد وعفتها ورجعت، لكيت الحجي منتظرني حتى نروح، طلعت وياه شفت عقاب يم قسورة ويدخن والواضح عليه ابد مو تمام وضعه، معقولة اني كلت شي غلط ضوجه؟
الطريق كله ما حجة، واني اعيد بالموقف ببالي واتذكر الكلام الصار بيناتنا، مية مرة راجعته وماكو شي يضوج بي! لعد شبي هيج مفور؟
ادور فوك هالضيم، الدنيا موت برد واني ملابسة زين، متت من البرد، تجمدت على ما وصلنا للبيت.
نمت بالكاع واحس ضلوعي وحدة تطك باللخ من البرد، الكاع ثلج والفراشات هاي متفيد ابد، لفيت نفسي بالبطانية زين وغمضت عيوني، رئسن رحت بعالم النوم من كد الضغط العشته باخر كم ساعة.
....
قسورة
وصلت الحجي لبيته ورجعت لبيتي هلكان تعب، عمرتلي نركيلة وكعدت انركل واتذكر شصار وياي هناك ..
قبل ليجي عقاب يمي بشوية، جنت كاعد بسيارتي واكلب بالتلفون بملل، فجأة طلعت بنية للحديقة، كعدت تبجي والظاهر هاي اخت الدكتورة الي حجالي عنها عقاب، ظليت اباوعلها وتعمقت بنظراتي لدرجة ما حسيت ع نفسي حتى!
شعرها اسود ليل وعيونها المدمعة انطتها فد مظهر مميز، الاضاءة جانت خافتة بس هي جانت تضوي، حسيتها دخلت گلبي بلا استئذان!
فتحت باب السيارة وطلعت، اخذتلي نظرة عليها ورحت اتمشة بثبات لحد موصلت يمها.
خافت بالبداية ورجعت لورا.
قسورة: لتخافين ما اسويلج شي
مسحت عيونها بقوة وكالت بغضب.
ريما: شتريد انت الثاني؟!
باوعت منا ومنا، ابتسمت وكلتلها بمرح.
قسورة: الثاني؟ ليش منو الاول؟
ريما: وانت شعليك؟
قسورة: ليش دتبجين؟
ريما: ميخصك
قسورة: دهاج كلينس مسحي دموعج، ولتبجين ماكو شي يستاهل تصرفين خزان دموعج علموده
صفنت بوجهي وتباوع للكلينس، ادري بيها مصدومة مني وشلون تجرأت احجي وياها طبيعي.
قسورة: لتباوعين هيج نظيف الكلينس مماسح بي
حجيت بسخرية وابتسمتلها، بادلتني الابتسامة واخذتهن مسحت دموعها بيهن ع كيف.
للحظة تمنيت روحي كلينساية!
والامس خدوها الناعمة وعيونها الحلوة،طاحظك قسورة هي هاي تاليتك، زلمة شكدك شكبرك تريد تصير كلينس مسح، وسفةةةةة.
ريما: شكرًا
قسورة: ادللي ولو يابه
ابتسمت وراحت، رجعت يم السيارة اتمشى والابتسامة شاكة حلكي، ادور اجة عقاب سولفلي شمصخمة، كلش ضجت منها وتمنيت الكفها هسة، الا اخليها تبلع الكلينس بلع هالغبية، شلون تتجرء تسمم الحجي والعقاب!!؟ واني العبالي بريئة، طلعت اني البريئ يمها!
اخذت نفس ثاني ونفخته، سويت الغرفة عبارة عن مدينة من الضباب من كد الدخان النفخته، كلما اكول كافي قسورة ختولي، ترجع وتهجم ع افكاري وتنرسم صورتها ببالي من جديد، شلون طلابة هاي!!
....
اماني
كعدت الصبح، الغرفة دافية كمت ولكيت عقاب بعده نايم، استغربت شعجب مطالع للشغل اليوم.
كمت للمطبخ غسلت وشلت شعري ذيل حصان، واشتهيت طماطة وبيض فسويتها وهدرت جاي، كعد عقاب وانصدمت صدمة عمري من كال.
عقاب: صباح الخير
ظليت لا اخذ ولا انطي، هذا ديحجي وياي معقولة؟!
هو هم جنه حس عليه شنو دا افكر.
عقاب: اي وياج دا احجي
ابتسمت وكتله بسعادة
صباح: صباح الخيرات عقاب
غسل ونشف وجهه، كعد ع الطاولة، حضرت الاستكانات وحطيت الاكل ومنتظرة الجاي يهدر واجيبه.
عقاب: فتحي شعرج يابه لتربطيه
التفتتله مستغربة، ليش هو شعليه بشعري؟!
اماني: مفهمت، ليش يعني؟
عقاب: مو ضروري تفهمين، نفذي وبس
كالها بحدة، اهوو عرفت هنا رجع عقاب الحقنة، وذاك جان واحد ثاني.
فتحته وحطيت ربطة الشعر بأيدي، جبت الجاي صبيتله وصبيت الي وكعدت.
اكلنا وكملنا، غسلت المواعين بايدي لان قليلات، رجعت للغرفة اخذتلي تراك ورحت للحمام، سبحت وحسيت جسمي انتعش.
طلعت واني ارجف من البرد، ولافة الخاولي على راسي، رحت للغرفة حتى اشسور شعري، لكيته بوجهي.
باوعلي شوية ودار وجهه، غلست ووخرت الخاولي عن شعري الي ينكط مي، سمعت صوته يستغفر، شجاه هن قطرات مي مراح يأثرن ع ترتيب غرفته!
سرعت من حركتي، ونشفت شعري زين بالشسوار وردت ارفعه، شفته يباوعلي بالمراية ورافع حاجبه، عرفت منتظرني اتذكر شنو كلي، تنهدت وعفته مثلما هو.
دا اريد اطلع، صاحلي.
عقاب: دكتورة تعاي شوية
رجعت يمه.
اماني: نعم؟
عقاب: نعم الله ضلوعج، كولي ها
اماني: اكلك انت شتريد بالضبط؟ اذا اكول ها تكول ولهدا، واذا اكول نعم تكول نعم الله ضلوعج، واذا اسكت تكولي من احاجيج جاوبي!!
عقاب: حيييل هذا كله ضامته بكلبج مني؟
اماني: ششايف لعد
رفع حاجبه بشك وكال .
عقاب: خير ان شاء الله، المهم بدلي بساع ولبسي زين ترا باردة كلش
برطمت شفايفي ورمشت بعدم فهم، عقاب كم شخصية عنده؟! وين حياخذني، لا و كلي لبسي زين يعني اكيد مهتم الي حتى لا ابرد!!! شكد رح انصدم بي بعد!
عقاب: الوووو سامعتني؟!
هزيت راسي بـأي.
اماني:سامعة سامعة
كلتها ورحت بدلت، لبست اثخن شي عندي، المشكلة ذني اثخن شي عندي بس ميدفن!
رفعت شعري ولبست كلاو ابيض حتى اضم اذاناتي، ردت جفوف بس ما عندي.
ادور صفنت، اني ما سئلته وين حنروح اصلا!
كملت ورحت للصالة، لكيته مبدل وكالعادة اسود ورصاصي وتدرجاتهن، احس شخصيته كلش تشبه اللون الرصاصي، بيها مجال تصير فاتحة حلوة، وبيها مجال ترجع غامقة حادة، وهو ما شاء الله عليه مطبق السالفة بحذافيرها.
اماني: وين رايحين عقاب؟
عقاب: لتكولين اسمي هيج
اماني: شلون يعني هيج؟
عقاب: بمياعة
رديت باعتراض.
اماني: بس اني مو مايعة!
عقاب: لا اني
رمشت بعيوني بغيض، تقرب عليه وكال بحدة.
عقاب: كتلج لترمشين هيج!
اماني: ما ارمش احسن مو بلا شتكول؟
عقاب: رديتي تمسلتين
اماني: اني الامسلت؟ تحجي صدك!!!!
عقاب: نصي صوتج، حس واحد ما اريد اسمع، مفهوم؟
اماني: شعندك بعد اوامر استاذ عقاب؟
حجيت باستهزاء، اخذله نظرة عليه، ادور جر الكلاو من راسي ودارني، بحيث ظهري صار مقابيل وجهه، فتح شعري وهمس يم اذني.
عقاب: للمرة الثالثة والاخيرة، ممنوع تربطين شعرج كدام احد، مفهوم؟
....
-انتهى!
-لتنسون التصويت حبيباتي 🖤
-الى اللقاء قريبًا..
#الكاتبة نورمين 🖤
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!