رواية خطأ طبي «عقاب الاماني» الفصل الخامس والعشرون 25 - بقلم نورمـين

#خطأ_طبي «عقاب الاماني»

بقلــم : نورمين 🦋🖤

...

حط راسه يم ركبتي وهمس

عقاب: طبعي واضح ولله بس انتِ معقدته ..

اماني: لأن دا اشوف بيك تناقض بين كلامك وتصرفاتك!

عقاب: لا ابدًا، بس تدرين المشكلة وين؟

ابتسمت بسخرية ورديت.
اماني: وين؟

عقاب: بهذا ..
نقر ع گلبي ، ظليت اباوع بنظرات متأثرة..

عقاب: هذا رح يضيعج، لان اقل تصرف مني بدافع انساني هو يفسره الج حب وديعيشج بأوهام مالها اساس من الصحة.. فيـا بنت الناس كافي تنجرفين وراه ترا محد يخسر غيرج وهالحجي دا اكوله الج من دافع حرص لا اكثر، والا اني بشنو استفاد؟!

دمعتي نزلت من القهر، نبرة صوته وكلماته جانت كلش قاسية عليه ..

يمكن اني صدك جنت غبية وفسرت تصرفاته المشفقة عليه على انو هي حُب..

يمكن اني صدك مجان لازم انجرف ورا مشاعري ..!

بلعت ريكي وعضيت شفتي السفلية بقوة احاول اتدارك نفسي..

اماني: شكرًا ع حرصك عليه، وهذا هو اعتبر كلشي مسمعت مني ولا جنك تدري بشي .. واني هم حـ اتصرف ع هالاساس.

عقاب: اكون ممنون ولله ..

اماني: تمام ..

وية ما درت وجهي عنه دموعي رجعت تنزل، شبيدي عليك يگلبي ..

ادري غير كافي تحس ع روحك!!

بشر ميريدك وديكلك بكل الطرق اني ماحبك غير تكرهه وتأيس عاد!!

نمت بليلتها والغصة شاعلة بلعومي، وكلما تنزل دموعي امسحها بقوة..

حتى صوت تنفسي حاولت اكتمه، ماريده يشوفني ضعيفة، ماريده يستخطيني..!

ثاني يوم تريكنا ووصلني للدوام.

عقاب: دير بالج ع نفسج ولتطلعين لحد ما اخابرج، خلي التلفون يمج وتأكدي منه ممطفي، صار واضح؟

هزيت راسي ببرود، حرك السيارة وراح.

طبيت للمستشفى وبلشت شغلي، التهيت بالمرضى والعمليات بس عقلي ما نسى سالفته ولا موقف عقاب وكلامه البارحة..

كل البنات حسوا عليه مو تمام، خاصة شهد بس محبيت احجي هواي كتلهم تعبانة وسديت السالفة.

للظهر، اجاني عقاب وطلعنا للبيت ..

بس تفاجئت من وكف كدام صايغ ذهب!

نزل وكلي.
عقاب: يلا دكتورة

اماني: شكو؟ شتسوي يم الصايغ؟

عقاب: نزلي وتعرفين

نزلت بدون نقاش، دكتاتور وتعلمت لطبعه بعد.

كال للصايغ يريد حلقات زواج، انصدمت وباوعتله بعدم تصديق!

لوين يريد يوصل? وليش ديشتري حلقات زواج واحنه ع اعتاب الانفصال!!

- هذني كدامك موديلات واكو بعد افخم اذا تحب

عقاب: خلي المدام تختار

اندار عليه وكال.

عقاب: تعاي اختاري ليعجبج

ادنيت يمه وكلت بسخرية ممزوجة بعدم الفهم.

اماني: تناقضاتك هاي رح تضيعك حضرة الدكتاتور!

دار وجهه وضحك ضحكة بينت اسنانه، لان اقتبست من كلامه من كلي كلبج رح يضيعج..

عقاب: شوكت تبطلين تقلدين كلامي؟

اماني: من تلتزم بي ومتناقض نفسك بنفسك

عقاب: اختاري وفضيني يـ غضب الله..

اماني: تدلل يـ نقمة الله..

ابتسم بتزييف واني هم بادلته، اخذت اي شي طلع بوجهي الي واله وطلعنا.

اماني: ماريد اروح للبيت

عقاب: وين تريدين لعد؟

اماني: مطعم وياريت يكون جبير ومفتوح مختنكة

عقاب: صار

اماني: وكون مو خبصة، راسي دايخ

عقاب: ميخالف، عدج شي بعد؟

اماني: وسوق ع كيفك، معدتي كامت تكلب من ورا الطسات

باوعلي وهو مبتسم معاجبه ..

عقاب: اوامر ثانية؟

اماني: ليعاشر الدكتاتور شيصير؟

عقاب: انتِ

خزرته ودرت وجهي، عود دمه خفيف الافندي.

نزلنا يم مطعم وصدك هادئ مو هوسة، وصينا ع اكل وكعدنا ننتظر.

اماني: شنو مناسبة المحابس هسة؟ حلمان بيهن من تالي لو شنو؟

عقاب: تؤ..

اماني: الظاهر ساري صحاك ع زمانك
كلتها وضحكت..

عقاب: لتجيبين طاري هالكلب ع لسانج!

اماني: ليش شبي؟ مو زين خلاك تفطن انو ماكو بيدي حلقة تدل ع كوني متزوجة؟! اصلا بالعكس اني اشوف ان لازم تشكره

عقاب: دكتورة نصيحة اليوم لتسوين سوالفج ذني، ترا روحي بخشمي

اماني: وشنو الجديد؟ من عرفتك ولسة كضيتها كلها روحك بخشمك وتنافخ

عقاب: دكتورة!!!
نتر بيه بحدة ومبين صدك اعصاب، سكتت مؤقتًا.

ع الاقل من نرجع للبيت استلمه مو هنا فشلة منا العالم.

اكلنا ورجعنا للبيت، هو بجهة واني بجهة كلبي خلصان واحس مالي خلك اتعارك بعد خاصة ان النتيجة وحدة.

لليل، كاعدة اباوع فلم رومنسي وحاطة طاسة الجبس بحضني واكل.

كعد بصفي، مد ايده اخذ من جبسي وباوع للتلفزيون، ضيقت عيوني بانزعاج.

يعني شلون ما اخلص منه اني، كل شوية طافرلي واني من اجي يمه يعيط بيه!

حطيت الطاسة ع الجانب الثاني بحيث ميلوحها وادنيت عنه.

من انتبهلي، كال بنفاذ صبر.

عقاب: شوكت تبطلين سوالف الجهال هاي؟

اماني: الجبس جبسي وما احب اشارك احد بي

عقاب: هو انتِ هذا لفهمتي؟

اماني: لعد شتريدني افتهم بلا؟

عقاب: انسي ..

تنهد وكام لبس وطلع، صافنة افكر بي ..

دماغي عجز يحزر شيريد هالرجال!

هسة هو مو ميريدني؟
ليش من ابتعد عنه يتقربلي، ومن اقتربله يبتعد؟!

عبالك واحد عنده انفصام بالشخصية، كلشوية تسيطر عليه وحدة..

مر اسبوع واحنه ع هذا الحال، يروح يمنى اجي يسرى، يدنالي اشرد منه، يسولف وياي اغلس واعوفه وحده ..

مو قصة حبي اله نقص، بس كلبي انچوى منه ..

مدا اكدر اتصرف وياه بشكل طبيعي ولا كأن صار شي!

كلامه بذيج الليلة مو بس حطم احلامي، لا كسر كلبي وكسرني الي هم..

اماني تغيرت بذيج الليلة والسبب هو!

هو ما عرف يحتوي حبي، ولا عرف يبعدني عنه بحيث ما احبه..

حنون ورجولي وياي، غير عن اللحظات العاطفية الي يفتعلها وياي ويخلي كلبي يهيج..

هسة اني بالدوام، دا اسوي عملية مستعجلة لبنية جسمها محترك بالكامل ..

كلشي بجسمها تعبان وكلبها ضعيف ميتحمل كمية الالم..

طبيت للعملية واني حاطة ببالي نسبة 90% تموت ..

بس جان عندي امل تنجح العملية، خاصة انو نسبة نجاحها 10%

توكلت ع الله وطلبت منه يعينني اساعدها لان بعدها صغيرة!

عمرها 16 سنة، متزوجة والعرفته من امها الي اسعفتها ان زوجها الحقير هو الي حاركها!

اشتغل والعرك يصب مني، ودموعي اختلطت وياه..

دخيلك يا الهي ولله بعدها صغيرة، فدواتك ساعدني انقذها!

ومثلما كنت متوقعة، ما اتحملت لان كمية الضرر بجسمها كبيرة..

ماتت..

طلعت من غرفة العمليات، شمرت الكمامة والجفوف، وكفت اغسل وعيوني حمر ..

دموعي اختلطت بالمي وكمت ابجي ع حالتها هالمسكينة..

لوين يوصل بينا الاجرام بعد!

اكو بشر يحرك بشر بكل برود هيج!

لا وطفلة صغيرة!!

المن الوم..؟!

الاهل الي استثگلوا لكمة بنتهم وزوجوها لهيج واحد حيوان بهيج عمر صغير؟!

لو للحيوان الي نفسه القذرة خلته يرتكب هيج جريمة!!؟

كلبي يوجعني عليها..

طلعت للممر شفت امها تدك وتلطم وكلبت الردهة كلاب بالبواجي والصياح..

ما انقهرت عليها..
ولا حتى تأثرت بحالتها التعبانة، بالعكس كرهتها وحقدت عليها!

ليش هي شجانت متخيلة من زوجت طفلتها بهيج عمر؟!!

رحت يمها وكلت بنبرة مقهورة.

اماني: ان شاء الله هيج تكونين سترتيها ومنعتيها تنحرف؟!

بجت وكالت.
- ردت ائمن عليها ولله ما عبالي هيج تروح... ولج يمه كعديلي زهرةةة..

ابتسمت بسخرية.

اماني: ابشرج أمنتي عليها، بس يم رب العالمين ..

بجت بقهر، قرفصت وصرت كدامها وكملت..

اماني: عليمن هالبواجي ع الاقل زهرة هسة ترتاح منكم ومن تفكيركم المريض!

سكتت شوية ورجعت كملت بغضب..

اماني:  ليش هيج دمرتوها؟  شنو ذنب هالبنات الي بعمر الورود تروح ضحية جهلكم؟ كم زهرة راحت مننا وكم زهرة حتروح بعد يلا تتعظون وتعرفون ان البنية مو عورة حتى تستروها بزواج، وان البنية مو ضعيفة حتى تأمنوها عد ذكر حقير؟!! وان البنية اقوى واترف مخلوق الله سواه! وهم انخلقت حتى تعيش وتحقق احلامها حالها حال جنس ادم؟ الله ينتقم منج ومنهم ومن كل واحد يفكر مثلكم وعسى ناركم تاكل حطبكم يا حثالات المجتمع!!!

كمت اصيح واحجي بكلب محروك، والمرة تزيد بالبجي واللطم، تجمعوا الناس والدكاترة كوة جروني عنها.

دكتورة زينب والممرضة شهد ظلوا يمي يهدأون بيه بس اني ماشوف بعد من القهر، انعمى كلبي من الالم عليها..

كلما اتخيلها شلون صايرة عبارة عن كتلة من الدم وجلدها فحم احس روحي توصل لخشمي واختنك!

مدا استوعب هالناس شلون تفكر وليش هيج بناتهم رخاص عدهم!!

من تموت يلا تصير عزيزة!

من ياخذها التراب يلا يحسون بغلطهم!

بعديش؟؟؟؟؟؟؟؟؟؟

جنة كاعدات بالحديقة وكدامنا الاستعلامات..

لمحت امها لزهرة دتحجي وية ثنين زلم واحد شايب والثاني بنهاية العشرينات تقريبًا، مسحت دموعي وكمت طلقة وزينب وشهد وراي يصيحن اوكفي وين رايحه.

وصلت يمهم واسمع الشاب يكلها اذا اشتكيتي اخليج تعظين اصابعج ندم

وكفت كدامه بحيث صرت بينه وبين المرة وكلت بغل وعيوني تلسع شرار مو نظرات عادية!

اماني: ولله لاخليك انت تعظ اصابعك ندم واراويك هالرجوليات عليمن تسويها يا حيوان!!

-وانتِ شعليج ***** !!!

اماني: هي هاي المراجل، فشار وضرب؟ تفففف عليك و ع شرفك اذا عندك شرف يا ناقص يا عديم الغيرة!!

تفلت عليه، مد ايده جر شعري دفرته بمنطقته وكع بالكاع يغلط ويتكفر ويتوعد بيه.

- الا اخلي ****** بسيطةةة يا حيوانة اني الججج **** لج تعرفين اني منو وشكدر اسوييي!!!

اماني: حقير وذرة خير ما بيك دام كدرتك ع مرة!! وشتريد تسوي سويييي!!!!! متخوفني ولا تهز شعرة مني خليها ببالك، والا اسحلك بالمحاكم واراويك منو اليعظ اصابعه ندم يا عديم الرجولة يا عار الزلمممم!!

جروه الامن شمروه برا، وام زهرة تبجي وتكلي لتسوين شي ترا يأذيني الي اني واخوتها.

باوعتلها بعدم تصديق، واحس كرهي الها زاد!

تسكت عن حق بنتها بس في سبيل راحتها هي واخوتها السفلة!!

هم وينهم اصلا؟ شو مشفت احد منهم!

ولو، بيا عين يجون؟ ومنو يكول هم مهتمين بأختهم!

اماني: لتخليني اتجاوز عليج، سكتي عني لا انتِ هم ارفع دعوى ضدج واخليج متعرفين راسج من رجليج!!

-لا الله يخليج دكتورة ولله ما عندي بس الله وانتِ، استري عليه و ع بنيتي فدوة لعينج

اماني: لتكولين استريييييي!!!!!!! بنتج ما بيها شي غلط ينستررر، عقولكم هاي الي لازم تنستر من كد غبائها وجهلها!!! لج انتِ ام انتِ ؟؟؟؟؟؟؟؟ انتِ ام وتنحسبين عالامهات؟؟؟؟ معقولة اكو جوة رجليج جنة؟؟؟ مدا اصدكككك!!

عقلي وكف ماعرف شكمت اخربط وياها، عفتها تتوسل ورحت لغرفة الدكتورات بدلت ودا اطلع صار كبالي عقاب.

جنت تعبانه لدرجة حتى عيني ما رفعتها عليه، باوعتله ببرود ومشيت كدامه.

عقاب: وينج صار ساعة اتصل متردين؟؟؟ الووو دكتورة سامعتني؟؟ شبيج شصاير وياج ليش هيج حالتج؟؟؟؟

ما رديت، طلعنا برا للكراج، ماكو عالم هوايه هنا لان بس سيارات توكف..

ردت اصعد كمش ايدي وكال بنبرة قلقة.

عقاب: وكعتي كلبي، شبيج ولج شصاير؟

باوعتله بحزن مكتوم.. ضميت وجهي بايدية..

مكدرت الزم دموعي، بنص هوسة العالم بچيت..

عقاب: ها ها ها هايشنو الدموع يمعودة احجيلي!

وخر ايدية عن وجهي وكال، باوعت بعيونه شوية حسيت نفسي محتاجة احضنه..!

رفعت رجليه لحتى اوصل لطوله، لفيت ايدية داير مداير ركبته وحضنته قوي وكمت ابجي بحركة ومن كل كلبي..

انخبص بيه، ميعرف شيسوي واني مستمرة ابجي وحاضنته.

عقاب: هدت حيلي دموعج .. ياهوة ليستاهل قطرات دموعج الزمردية الثمينة هاي بس كليلي؟!

حطيت ايدي ع حلكي، بمحاولة يائسة لكتم موجة انهياري بس لا حياة لمن تنادي..!

ضمني لكلبه ومسد ع راسي بهدوء وحنية وهو يهمس..

عقاب: اششش.. كافي دموع كافي بجي..  مردتي كلبي ولج بس كليلي شمزعلج؟

اماني: احضني عقاب فدوة..

نفذ واني غصت بحضنه، ظلينا هيج لفترة..

اني نسيت زعلي وهو نسى يسألني شنو سبب زعلي..

سكتت ورة شوية، وخرني عنه كمش ايدي بقوة وكال.

عقاب: اصعدي خلي نروح بعدين نحجي

فتحلي باب السيارة، صعدت وسدها واجة ركب بصفي وساق وهو عيونه عليه وكلها اهتمام وقلق.

وكف يم حديقة.

عقاب: نزلي

نزلت وياه، كعدنه ع مصطبة بمكان هادئ بعيد عن هوسة الناس.

ظلينا ساكتين نباوع عالمنظر شكد حلو، الخضار والورود واكو فراشات تفتر بيناتهن والوانهن حلوة..

كام وكف .. مشى كم خطوة ورجعلي، وكف كدامي وسأل بهدوء.

عقاب: شلون صرتي هسة؟

هزيت راسي وكلت.
اماني: احسن

عقاب: زين..

باوعتله بنظرة امتنان..

عطفه وحنيته عليه وكت ما اكون ضعيفة وحزينة هو اكثر شي احتاجه!

ابتسملي..

ادور قرفص كدامي وحط ايده ع رجليه، توسعت نظراتي بصدمة وكلبي دك سريع..

اماني: كوم ليش هيج كاعد

ابتسم ورد بلهجة عفوية.

عقاب: مرتاح هيج معليج مني وسولفيلي شنو المزعل دكتورتـي؟

عيوني نست  شلون ترمش، وحسيت ع كلبي نبض نبضة سعادة!

ضاف ياء التملك، يعني اني ملكـه...!

عقاب: ها وين صرتي؟

تنهدت بمجرد مرور طاري الموضوع ورجع كلبي يوجعني عالبنية..

سولفتله الصار وبجيت، يمكن ليشوف الموضوع ميتأثر مثلما اني متأثرة ويستغرب..

بس اني العشت الموقف بكل تفاصيله المؤلمة، وكلبي رهيف بهيج امور وخاصة اذا الموضوع بي ظلم للبنات..

توقعت عقاب يتعاطف وياي، بس ما توقعت ياخذ صفي ويوافقني الراي!!

لا ويعصب همين ع الحقير زوجها!

عقاب: بسيطة، شلون شكله هالحقير؟

اماني: عقاب لا فدوة خليني احاسبه بطريقتي، صدكني بالقانون نكدر نجيبه من ياخته سحل وهو الممنون

عقاب: ميخالف وياج اني، بس كليلي هسة شلون جهرته خلي اشوف يجوز اعرفه

اماني: طويل وملامحه شرانية، لحيته طويلة جنه واحد ارهابي وهيج من تشوفه تكش روحك

عقاب: باختصار زايعته الكاع

اماني: بالضبط

عقاب: اسمه؟ التقرير مال البنية وين؟

اماني: اسمه يوسف صاحب والتقرير هذا جبته وياي، خفت يصير شي ويتلفون التقرير او يبدلوه

عقاب: عاشت ايدج، هسة الاريده منج تقوين نفسج ومتبجين بعد

اماني: بس عقاب انت مشفتها شلون مفحمة.. ولله كلبي يوجعني كلما اتذكر وروحي تطلع، يعني ليش هيج بس اريد افتهم ليشش!!

رجعت ابجي، كمش ايدي، وبايده اللخ مسح دموعي.

يا ربي ع لمساته شتسوي بيه..

جنها دوا لجروحي.. ومرهم لحروق كلبي..

عقاب: شكتلج اني شبساع بجيتي!

اماني: مو بيدي ولله ..

عقاب: ميخالف حاولي!

اماني: ان شاء الله

كام، وبايده الكامشة ايدي جرني كومني وياه.

باس راسي وكال بثناء.

عقاب: رحت فدوة لأم گلب رهيف..

لحظتها ارتعدت خلايا جسمي وما عرفت شسوي او شكول .. هذا ديتغزل بيييييه!!

يعني قبل شوية يكلي دكتورتي وهسة رحت فدوة، وفوك هذا كله يكمش ايدي ويبوس راسي!!

يا يابه شصار بكلبي وبـحالي..

اماني: كافي استحي ترا

عقاب: ههههه هاي منو ليحجي؟

اماني: اني

عقاب: مو هو هذا لمعجبني!

اماني: بدينة!!

عقاب: لا بس ردت اغيرلج جو والحمدلله بعده هرمون النكد والمشاكل عالي عندج ما تأثر

اماني: ها؟؟؟

عقاب: اوف منك يلساني

اماني: كولها ليش سكتت

عقاب: مو وكتها، كومي نروح للمركز

اماني: هسة؟

عقاب: لعد باجر؟ كومي خ نلحك ع صاحبي العقيد

اماني: يلا

رحت وراه، وصلنا للمركز.

ردت انزل، لزمني وكال.

عقاب: جيبي التقرير اني اسلمه اله واحجيله الصار

اماني: لا طبعا! اني اريد انطيهيا وهم يجوز احجيله تفاصيل نسيت احجيها الك

عقاب: عود اخابرج مناك وسولفيله

اماني: مستحيل عقاب مستحيييل، اني شاهدة ووجودي ضروري دتفتهمني؟

عقاب: وج بابا شسوين نازلة وطابة للمركز بنص الزلم؟!!!!

اماني: مو زلمتي وياي؟ عليمن اهتم بعد؟!

جان يحجي باعصاب، بس من كتله هيج سكت و ارتخى..

هو اني كلتها باندفاع، بس فعلا جنت اعنيها!

منو ليكدر يدنالي او يباوعلي بنظرة مو زينة وهو وياي؟!

عقاب: دنزلي يلا ام لسان..

ابتسمت لان كالها بضوجة، ادري بي ما مقتنع بس معنده حل ثاني، نزلت وراه.

عقاب: لسانج هذا مال محامية مو دكتورة

ابتسمت وكتله.

اماني: شتكول اقدم وادرس قانون؟

عقاب: حتى اموتج غير!

اماني: اوي وشبيك ضجت، احنه حننفصل شعليك بيه بعد

دار وجهه وتنهد، حسيت روحي جفصت رغم جنت اشاقيه.

اماني: ضجت مني؟

رجع باوعلي، كمش ايدي ومشى وجرني وياه.

عقاب: عليمن هو هذا الواقع

عين ع ايده وعين ع ملامحه الباردة من حجة، شبساع تحول وراح عقاب الحنون!

طبينا للمركز، الزلم اشكال الوان والضباط والمجرمين، بس الظاهر يعرفون عقاب لان وين ميفوت يسلم ويردون عليه بالاسم.

رحنه لعقيد زيد واحد يصير صديق عقاب، حجيتله التفاصيل وانطيته التقرير.

الرجال هم كلش عصب من عرف بالموضوع، وكلي رح اخذ حق البنية مربع من عينه.

طلعت من يمه بالي مرتاح لان عرفت مراح يسكت عن حق زهرة.

صعدنا بالسيارة واني مبتسمة، باوعلي عقاب وكال.

عقاب: ارتاحيتي؟

اماني: تقريبًا

عقاب: يلا ان شاء الله ينحبس وياخذ جزاءه، وهاي التقريبا تصير تمامًا

ابتسمت بتعب..

اماني: ان شاء الله..

وصلنا للبيت، طبيت بوجهي للغرفة وعقاب ورايه جان يخابر قسورة.

ذبيت روحي بمكاني عالكاع اريد انام.

عقاب: كومي نامي عالجرباية

اماني: ماريد

عقاب: باباتي الكاع توجع نومتها، كومي هنا

اماني: حتلو، ماريد انام يمك

عقاب: منو كال رح انام يمج؟

اماني: ليش وين تريد تروح؟

عقاب: شغل

اماني: شغل ايش وانت هستوك اجيت!

عقاب: شغل شغل باباتي، شعليج شغل ايش!

اماني: شلون شعليه!

غلس وراح طلع جنطة حط بيها اسلحة ومخازن، واني احجي واركض وراه منا ومنا.

اماني: المن هالاسلحة شتريد تسوي!!!

عقاب: اسطو ع بنك

اماني: ظريف!

عقاب: فوك متتصورين

دك تلفونه، طلعه من جيبه ورد.

عقاب: جايك حبيب.. كملتو؟ .. خوش خوش مسافة الطريق

سده وطلع، لحكته وكفت كدام الباب ما اخلي يفتحها.

عقاب: بنفخة تطيرين ترا

اماني: رايح ليوسف مو؟

عقاب: يا تبن؟؟!! لا بابا

اماني: لعد وين رايح بكل هالعتاد؟

عقاب: ش .. غ .. ل

حجة بتقطع وبنبرة ملل.

اماني: شغلك بالسلاح؟

عقاب: لا بالخرخاشات

اماني: عقااااب!!

تنهد واجة جرني من ايدي وخرني عن الباب.

عقاب: ديري بالج ع نفسج بينما ارجع، واذا اندكت الباب معليج بيها عسى ما تنكسر ابد لتطلعين، سامعتني؟

خوفني بتوصياته..

اماني: ليش هيج تحجي.. شكو الله يخليك فهمني!!

عقاب: عرفت الهجموا بالسلاح ع بيتنا ورايح احاسبهم بطريقتي، ارتاحيتي؟!!

...

انتهى!

لا تنسوا التصويت 🦋🖤

#الكاتبة نورمين