رواية خطأ طبي «عقاب الاماني» الفصل السادس والعشرون 26 - بقلم نورمـين

#خطأ_طبي «عقاب الاماني»

بقلــم : نورمين 🦋🖤

...

اماني: ليش هيج تحجي.. شكو الله يخليك فهمني!!

عقاب: عرفت الهجموا بالسلاح ع بيتنا ورايح احاسبهم بطريقتي، ارتاحيتي؟!!

اماني: لااا انت اكيد تخبلت.. عقاب شتسوي رايحلهممم بكل هالعتاد!!!

عقاب: نلعب غميضان سوة

لحكته وكمشت ايده، باوعلي متعجب.

اماني: لخاطري لتشمر روحك بالخطر من وراهم، مو قدمت بلاغ؟ هذا هو القانون يحاسبهم

عقاب: لا يحاسبهم ولا شي لان الدعوة حتتسجل ضد مجهول

اماني: ليش والتسجيلات؟ ما وصلوا للدراجة واصحابها؟

عقاب: مبيوكة من ابو معارض ولكوها مشمورة

سكتت متفاجئة ..
بعدين رجع تبادر لذهني سؤال!

اماني: لعد شلون عرفتهم انت؟

عقاب: طُرق خاصة

كالها ودفعني ع كيف لجوة البيت ورجع وصاني.

عقاب: بالج ع نفسج، ما اوصيج بعد

هزيت راسي بحزن، ما يتعاند وكلمته وحدة!

اماني: وانت هم فدوة..

سوة حركة بوجهه بمعنى اي، راح وسديت الباب.

مشيت للصالة ببطء، خايفة عليه خاف يسووله شي ..

اصلا منو ذوله، شنو مشكلتهم وياه وليش مستهدفي؟!

يرب تلطف بي ..

...

عقاب

مريت ع ليث، اخذته ورحنه لنقطة لقاءنا المتفقين عليها اني والبقية.

ليث: الظاهر اليوم الدبل صاعد، ما ظل حيوان منهم ما اجة

عقاب: هو الزين، حتى نكبسهم كلهم سوة

ليث: وللهي يا صديقي اني ممتعشي لسة، لازم تسمحلي اخذ حصة الاسد اليوم

ابتسمت.
عقاب: هاي بقت يمك، لان هم هواي يكفونة وزايد فــ انت وشطارتك

ليث: صايرين 

شوية واجو قسورة وشاهين وضرغام.

ضرغام: يا هلا بالشباب

ليث: بالمهلي حبيب

شاهين: دومكم غالبينة، عقاب انت اظنك توصل قبلنا يلا تخابر

عقاب: لا وياكم اصلا، بس سايقكم مو شي يجوز..

باوعت لقسورة بخبث.

قسورة: نجبوا يلا مالي خلككم ترا

شاهين: لازم ريري مقحطة عليك

قسورة: شاهين ولله اجيبك ببوكس افلش سنونك لا تجيب طاريها بسوالفنا

خزرتهم بـ سكتوا، لان الظاهر قسورة واصلة وياه لحدها. شاهين جر بوش وكال.

شاهين: هاهيه اسف لتضوج

عافنه وتقدم للبداية وهو يجر القسام مال سلاحه.

اشرتلهم يظلون بمكانهم ورحت وراه.

حطيت ايدي ع جتفه، اندارلي شافني ورث جكارة ورجع يباوع لكدام.

عقاب: شبيك غادي نار؟

قسورة: مالي خلك احجي عقاب

عقاب: ع راحتك بس كلي شلونها معنوياتك لليوم؟ هههه ترا اليوم تفليش والحجي اطانة الاوكي

حاولت الطف الجو عليه بس هو هو.

قسورة: اي زين، عالاقل اطلع حرگة كلبي بواحد يستاهل

عقاب: اسم الله ع كلبك حبيب

قسورة: تعبتني حيل عقاب..

حجة بحسرة، شكد شايفه يحجي عنها ومتوجع لان متحس بي ولا تدري بحبه الها، بس اليوم اول مرة اشوفه هيج حزين..

عقاب: شسوت؟

قسورة: بعدين احجيلك ..

عقاب: تمام بس قوي روحك، ما تعودت اشوفك هيج مهزوز

قسورة: هه.. صدكني هذا الدتشوفه كله لا شيئ مقارنة بالي بداخلي!

عقاب: لهالدرجة تحبها؟

قسورة: واكثر مما تتصور.. احبها لحد ما واصله احد ..

عقاب: وتظل هيج تحبها من طرف واحد وتتألم وهي متدري بيك وين الله حاطك اصلا؟!!

قسورة: اي

عقاب: مو صاحي انت..

قسورة: اعتيادي، لعد منو يحب ويورط روحه بهيج ورطة وهو صاحي؟!!

عقاب: لتظلمها فد مرة عاد، تكدر تتخطاها وتحب وحدة تحبك وتحس بيك، ترا الخلقها خلق غيرها

قسورة: لو هي لو ع گلبي السلام..

عقاب: عجيب!!!

قسورة: زين تصدك اذا اكلك حتى الجرح منها يحلالي!؟

عقاب: مادري شكلك.. الله يجبر بخاطرك صاحبي

قسورة: لا مو هيج، كول الله يجبر خاطرك بيها

ضيقت عيوني بنظرة عدم تصديق، ابتسم بتعب ودار وجهه.

لميت الولد، كلمن سلاحه ومخازنه وياه.

اليوم اني جاي ع قحطان الكلب، لصالة القمار مالته والا اخلي يعرف ويامن ديلعب!

هو الي دز جماعة ترمي ع بيتي ودزلي رسالة قريب الظهر، كاتب بيها :

" خو ما خافت مدامتك الحلوة ؟ خطية لو بمكانك اصير حباب و ما اخليها بهيج وضع"

رديت عليه: منو انت يا حيوان!!؟

رد: "تاج الراس قحطان "

ما رديت عليه، انطيت خبر للحجي وهو انطاني صلاحية باتخاذ القرار المناسب.

سولفت للولد واتفقنا، ليث كال يعرف واحد يشتغل وية قحطان يكدر يكللنا وين يلتقي اليوم.

وفعلا ورا ساعة اجانة الخبر، رح يتواجد بصالة القمار مالته لان جاييه ضيوف من غير محافظة ورح يفرغلهم الصالة.

ولله اجت فيت، هدوء وناس قليلين حتى استفرد بي لهالكلب.

صالته صايرة بمكان معزول ماكو يمها هواي محلات او عالم، حاط حرس داير مدايرها.

وزعت الاسلحة للشباب وشدينا الهن كاتم ، وتقسمنا كل واحد لزم جهة، بس اني وقسورة اخذنة المقدمة.

الي اجة بوجهنا اكل المقسوم، سواء ضرب او رصاص وهيج لحد ما تلاكينة كلنا جوة.

طبيت للصالة الداخلية والكالك قحطان ووياه 4 زلم اعرفهم بالاسم، همين شخصيات سياسية.

بس شافوني طاب ورافع سلاحي انخرعوا وعافوا اللعب.

والي جنت مخططله اجة فيت مية بالمية وزايد همين!!

لان الجماعة هنا حاطين مخدرات، يتعاطون ويلعبون.

ابتسمت وانداريت ع قسورة الي هم بادلني الابتسامة.

اجو بقية الولد، وكلمن حط سلاحه باتجاه واحد.

قحطان: عقاب ديربالك تتهور ترا تعرف شكدر اسوي اني!!

دفرته وكع بالكاع، ضربته طلقة برجله صرخ.

فوك ما روحي طالعة منه يجي يهددني!

قحطان: اااااااخخخخ لك اني الللللللكككك

كعدت عالكرسي وضحكت.

عقاب: ليش منو كلك حيكون عندك فرصة تردلياها؟

ليث: هههه خلي يحلم

ضرغام: اي شبيك ترا حلوة الثقة بالنفس 

عقاب: مو يمي هالسوالف.. متمشي..

قسورة راح داس ع جرح رجله وكله.

قسورة: اي شلونك شخبارك مشتاقين صار هواي مدازلي چلابك

قحطان: انت هم جايك السرة اصبرلي

كالها بوعيد، قسورة ضحك ضحكة طويلة ورجع دنك يمه.

قسورة: سلمـلي يابه ..

باوعله قحطان بغيض، البقية ظلوا يتوسلون حتى نعوفهم.

-ترا احنه مالنا علاقة بقحطان، خلينا نروح

-اي واذا تريد انت والحجي هم نتحالف وياكم

-الله يخليكم لتفضحونا، وشتريدون احنه حاضرين

ضحكنا، الروح شكد عزيزة بحيث الواحد يذل نفسه!

قسورة: ولكم الحياة ما تستاهل تتوسلون علمودها! عشتوا عمركم كله لا كرامة ولا الكم قيمة، عالاقل موتوا بشرف!

عقاب: لا تنتظر شي من شخص فاقده .. طول عمرهم عديمين شرف وغيرة وحيظلون هيج

ليث: اكلكم اني جعت، خ نخلص عليهم ونروح نتعشى

عقاب: مو تدلل حبيب

كمت وكفت وسحبت قسام، رفعت سلاحي ودورته بينهم واني مبتسم باستفزاز.

عقاب: بيمن ابدي يا ترا ....

شاهين: الكبير اولًا صاحبي

عقاب: صححح!!! اني كلشي ولا الاصوليات، ما اتعداها ابد

قسورة: هسة قحطان اكل حصته مبدأيًا، يلا منو يريد وراه خل يرفع ايده!

ضحكت ورفعت السلاح، صوبته باتجاه قحطان وكلت.

عقاب: كلبي ما يطيني اعوفه يباوعلهم ويضوج، شتكولون ابلش بي؟

ضرغام: بلش لعد كلشي ولا كلبك

شاهين: اتفق

ليث: يلا قحطان تشاهد ع روحك

كمش رجلي باس حذائي وكال بأذلال.

قحطان: لا تكتلني الله يخليك عقاب ولله اسوي كلشي تريده وبعد مالي علاقة بيك ولا اجي يمك، وحتى اعوف السياسة كلها وابطل بس عوفني الله يخليك

ظليت اباوع مستنكر وبنفس الوقت مصدوم، شلون تغير من مغرور لواحد مهان مذلول ..!

ضرغام: كالها قسورة، لا تتوسل علمود الحياة ترا كلش ما تسوة

ابتسمت بتشفي، حطيت سلاحي بكصته وهو يتراجف من الخوف ومستمر يتوسل..

وبلحظة، طلعت الرصاصة من السلاح واستقرت بـ ...

...

اماني

كلبي يفور من الخوف ع عقاب، ماعرف شسوي واوصله.

اخابر عليه و على قسورة ميجاوبون.

عقلي وكف وكمت امشي بالبيت بعصبية اروح وارجع مثل المخبلة.

يا ربي دخيلك كون وياهم واحميهم ..

دك تلفوني ركضتله بلهفة عبالي عقاب.

طلعت ريما تتصل، تنهدت ورديت بنبرة صوت اصطنعت بيها انو الوضع تمام.

اماني: الوو

ريما: هلاو مون شلونج

اماني: الحمدلله وانتِ

ريما: الحمدلله، اكلج

اماني: كولي

ريما: اني قريبة ع بيتج، مشتاقتلج وهم ما سولفنا زين ذاك اليوم، باتمان هنا ؟ حتى اذا موجود ما اجي

اماني: ماهوة

ريما: يلا لعد فتحي الباب جايتج

سديته وكعدت، فركت وجهي بأيدية بمحاولة لتهدأة نفسي، رجعت خابرت عليهم هم ماكو ميردون، رح اتخبل ولله!

ورة كم دقيقة، اجت ريما واول ما شافتني حست بيه مو طبيعية.

ريما: شبي وجهج اصفر؟

اماني: دطبي هسة

طبت وسديت الباب وراها.

كعدنا بالصالة ورجعت سألت بقلق.

ريما: خو ما تعرضولج بعد، ترا خوفتيني احجي!!

اماني: دطيني مجال خ احجي اول!

ريما: سولفي فضيني

اماني: عقاب عرفهم للي رموا وراح حتى يحاسبهم

ريما: وانتِ ع هاي ضايجة؟ هاي بدال متفرحين وتكيفين لزمهم وحياخذ حيفه منهم!!

حجت ببرود، نترت بيها بحدة.

اماني: ولج شلون افرح وهو عبالك راح لحرب، ترسله جنطة اسلحة وراح!!

ريما: جنطة؟

هزيت راسي وكلت باندفاع.

اماني: اي واكيد ما راح يسكتوله واحتمال يتصوب!!

ريما: اكيد لعد بس هو سبع ويرمي

اماني: ريري!!!!

ريما: شحجيت اني هسة!

حجيت بعصبية.

اماني: ريما لو تسكتين لو تراويني عرض جتافج، كلبي خلصان ومالي خلك روحي

ردت عليه بهدوء وهي تباوعلي.

ريما: كلبج خلصان من الخوف عليه؟

تنهدت بعمق وهزيت راسي بالموافقة.

رمشت كم مرة وباوعتلي بتأثر، درت وجهي عنها لان حسيت دمعتي رح تنزل هلكد ما كلبي طاك عليه.

حسيت ع ايديها حطت ع اكتافي، حضنتني وكالت.

ريما: يرجع بخير طمني كلبج و لتخافين

اماني: ريري اموت اذا صارله شي ولله اممووت!! ما اتحملل..

حجيت بعيون دامعة واني اباوعلها.

ريما: ليش تفاولين عليه، عمرج سمعتي باتمان انهزم؟

باوعتلها بترقب..

ريما: اكيد لا!! لان هذا باتمان الذي لا يقهر!

ابتسمت بتعب..

اماني: شكد سخيفة، حتى بهيج مواقف متبطلين سوالفج.

ريما: اي شسوي لعد اذا اختي الحبابه كالبتها مناحة علية، غير شوية اضحكها واعدللها مزاجها !

حضنتها بقوة واخذت نفس طويل ..

يا رب يكون فعلا بخير ويرجعلي سالم ..

...

عقاب

بالسيارة راجعين، قسورة تصاوب بايده.

والولد رجعوا بسيارته واني جبته وياي حتى الدكتورة تداوي.

فجان يحجيلي شنو لمضوجه اليوم وكالب كيانه.

عقاب: اي؟

قسورة: شنو اي، دا اكلك يومية اموت الف موتة واني اشوفها تصور وية هذا صديقها وتنشر وياه!! لا واليكتل قبل شوية ناشر صورة الها هي وياه وكاتب سطر غزل، وهي الفطيرة مشاركته وكلش عادي الوضع عدها

عقاب: يجوز تحبه شمدريك؟

قسورة: انت وياي لو وياه؟

عقاب: وياك بس دا احجيلك احتمال وارد!

قسورة: يا تحجي شي بي خير يا تسكت، البيه مكفيني

عقاب: يطبك مرض

قسورة: اشكرك

عقاب: تدلل تعال باجر هيج وكت هم تلكانة مفتحين

كلتها بسخرية، ضحك ودار وجهه اتعورت ايده المصابة صاح اخخخخ.

عقاب: ها ها يمعود ع كيفك

قسورة: بالريش بالريش

باوعتله بشك ورجعت باوعت للطريق، ادري بي توجع بس يكابر.

قسورة: فكس لهالعيون شبيك تباوع هيج؟

عقاب: ليش تكابر وانت متأذي؟

قسورة: هذا سؤال ينسأل الك مو الي، اني شخص واضح والي بكلبي ع لساني

عقاب: جذاب

قسورة: لا وداعتك، بس صدك كل انواع الوجع قليلة يم وجع كلبي وناره..

باوعتله بفراغ.. حجايته قوية جيل!

صفنت وافكاري تداخلت براسي، ما حسيت الا صوت هورن قوي كدامي!

قسورة: هووب يمعود انتبه وينه بالك!!!!

دست بريك ووكفت السيارة.

قسورة: ها حبيب شجاك انثولت؟

عقاب: دخت

قسورة: ديلا مظل شي ونوصل، انتبه جان سويتنا ثريد بهالليل

هزيت راسي، اخذت نفس انعشت رئتي ورجعت شغلت السيارة وسقت..

...

اماني

ريما ما قبلت تعوفني وحدي، لان فعليًا انهاريت وية كل دقيقة تمر وهو ماكو منه خبر ولا حس ..

لوين يلا اجة!!

انفتحت الباب وطب هو وقسورة المتصوب.

اول مشفتهم شهكت بصدمة وريما كذلك انصدمت.

اماني: شصار! شبي قسورة!!؟

عقاب: ما بي شي بس عقميله جرحه خ يروح لبيته

اماني: شلون انجرح! عقاب شصار احجي!!!

حجة بنفاذ صبر

عقاب: يابة ولعباس احجيلج بس شوفي الولد خلص دمه من كد النزيف !

اماني: اي هسة هسة

ريما جانت واكفة ع صفحة وتباوع لقسورة، الي صافن عليها.

راح عقاب يجيبلي العلبة مال الاسعافات الاولية ويجي.

قسورة: هاي شبيها اختج صافنة؟

باوعتلها ورجعت باوعتله وكلت بصوت ناصي.

اماني: مصدومة يجوز

قسورة: ما اتوقع..

باوعتله بعدم فهم، دار وجهه وصاح عليها بمرح

قسورة: شبيج مخروعة بسلا خايفة من الدم؟

اجت يمه كعدت.

ريما: ابد متضحك

قسورة: ما كتلج ضحكي

ريما: لا عفية كلي

قسورة: ماكول لا تتوسلين

ريما: حتى وانت متصوب متبطل سوالفك السخيفة هاي!!

قسورة: يطلعن وحدهن من اشوفج صدكيني

ريما: شقققصدككك؟؟ اني سخيفةةة؟!!

قسورة: اني ما كلت هيج

ريما: بس هذا المقصود بحجيك

قسورة: لا مو هذا، انتِ فسرتي بطريقة غبية

ريما: لعد شنو التفسير الذكي يا عبقري زمانك انت؟

قسورة: انسي ..

ريما: ها شفت، كمت تسوي ذني الحركات لان معندك شي تكوله، يعني كلامي صحيح

قسورة: اذا هيج تكولين ميخالف

جابلي عقاب العلبة وكعد ع صفحة يباوعلنا.

ضحكت ع المناكر مالتهم لقسورة وريما، تذكرت اني وعقاب شلون نكضي وكتنا هيج..

صحيح نخلص وقتنا سوا مناكر او مشاكل، بس هاللحظات هاي احب شي ع كلبي..

اماني: ممكن كافي تتعاركون خلي اشوف شغلي!

قسورة: منو متعارك؟

باوع لريما بعدم فهم، انطته نفس ردة الفعل وكالت باستغراب.

ريما: شمدريني

هزيت راسي بعدم تصديق وضحكت ضحكوا وعقاب من بعيد مبتسم بخفة..

وكلبي من وحده كام يدكله دكات مجنونة..

جنت اعقم ايد قسورة والفها بالشاش وريما تساعدني.

قسورة صافن بريما الي جانت كلش متوترة واتوقع ملاحظة حبه، ع الاقل هسة!

كملت، رجعت الغراض للعلبة وسديتها.

اماني: عندك حظ اجتك بصف العصب ضبط!! وهمين طابة وطالعة فـ جانت سهلة بس دير بالك عليها وكل يوم تعال حتى اعقمها الك حتى ما تلتهب

قسورة: شكرًا دكتورة بس العرض هذا لممرضتج هم لو بس الي؟

ضحكت وباوعت لريما الموسعة عيونها بصدمة.

اماني: بكيفها اذا تريد تجي هلا بيها

عفتهم وكمت دا اريد اشيل العلبة، اجة عقاب من وراية اخذها وراح كدامي.

ابتسمت.. ميبطل هالعادة!

العلبة ثكيلة لان حديد وجبيرة كلش ومتروسة ادوات ومستلزمات طبية، عبالك محضرها لهيج حوادث.

رحت وراه، خلاها يم الخزانة مال الحمام.

اندار شافني كدامه، وكف وحط ايده بجيوبه وهو يباوعلي ضاحك.

اماني: شبيك تضحك وجهي بي شي؟

عقاب: شكد انتِ فضولية!

اماني: لا ابد، بس كول مهتمة بيك وخايفة عليك.. واذا هالشي تصنفه فضول فـ عادي يسعدني اكون فضولية بيك!

دنك يمي وهمس..

عقاب: بالحالتين الفضول الزايد مو زين دكتورة ..

زميت شفايفي بحزن، ليش ميفرح بحبي واهتمامي؟؟
وليش ميغير اسلوبه الجاف هذا؟؟!!

اماني: شوكت تحس بيه وتبطل تجرحني بكلامك الي مثل الثلج هذا؟!!

غمض عيونه واخذ نفس .. جنت اباوع لتغير ملامحه السريع بترقب شديد..

اماني: انت تخاف تحبني مو؟

عقاب: منين تجيبين هالخرط هذا ؟!

اماني: برودك هذا ناتج عن حروق تلسع بكلبك.. ابوك امك اختك .. الصار وياهم ساهم بشكل كبير بكونك الشخصية الي انت عليها اليوم!

عقاب: اي وبعدين

اماني: استهزاءك ونظراتك هاي اكبر دليل ع صدق كلامي!

تقدم باتجاهي لحد ما استقريت عالحايط، حط ايده عالحايط بصفي وكال بحدة.

عقاب: لتصدكين نفسج زايد، صدق ايش واني بنفسي حاجيلج هالموضوع؟ شنو الشي الجديد الاكتشفتي ومكيفة بي مدا افتهم ؟

خليت ايدي ع گلبه، شفته يدك بجنون ..

باوعتله عاكد حواجبه ويحاول يمثل اللامبالاة، بس عليمن!!
اني خلص كشفته وتوضحتلي الصورة!

اماني: لو شكد متحاول تمثل وتسوي نفسك لا ابالي، هذا ميجذب ابد! هذا يريدني مثلما اريده بس خايف!!

كال بسخرية، كأن دياخذني ع كد عقلي.

عقاب: من شنو بلا؟

اماني: السؤال الك المفروض، بس خلي اني اجاوب وانت كولي اذا صح او لا

هز راسه وهو ع نفس الحال، رطبت شفايفي بلساني بمحاولة لتهدئة نفسي، وهم حتى الكة صياغة زينة للكلام الي ببالي.

اماني:الي مريت بي وفقدانك لكل الاشخاص الي تحبهم بطريقة قاسية، خلاك شخص بارد تكره تتعلق بشخص خوفًا من تكرار الم الفراق، وهذا هو نفس السبب الي ديخليك تصدني رغم انت هم تحبني!! انو انت تخاف تحبني وتخسرني مثل الخسرتهم من قبل!!

ظل يباوعلي بنظرة شاردة.. اتاكدت انو اني صبت الوتر الحساس!

فرجعت كملت بلهجة ليـنة.

اماني: بس عقاب هذا مو حل، الحياة هذا حالها وكلنا مصيرنا الموت، وبهيج لازم نعيش حياتنا بأحسن صورة ونستغل كل لحظة بيها ونعيشها بسعادة وية الاشخاص الي نحبهم حتى بعدين ما نندم!

عقاب: خوش تسفطين حجي..

طلع من صفنته ورجع لبس قناع البرود وحجة بسخرية.

اماني: اشرد اشرد.. بس لوين حتظل تراوغ، صدكني حيجي اليوم الي تتعب بي وتتمنى حظن يلمك وكتف يسندك كلما تميل ..

تقرب عليه واختلطت انفاسنا، الثقة الي حجيت بيها استفزته.

عقاب: ارتاحي من هالناحية، ما دام الله موجود اني ما احتاج بشر

هزيت راسي مبتسمة ..
عافني وراح.

...

قسورة

راحوا عقاب والدكتورة وفرغتلي الساحة.

ريما كامت دتروح جريتها كعدت ع رجليه، خزرتني وحجت واني مبتسم.

ريما: شدتسويييي انتتتتتت!!!

كامت عني بغيض رجعت جريتها وقربتها الي اكثر بحيث حسيت نظرات عيونها اخترقتني..

قسورة: صوتج نصي..

جرت نفسها دتكوم وهي تحجي بعصبية.

ريما: خلي صورتك بعيني حلوة لتخربها بهالتصرفات!

ثبتتها اقوة واني كامش ايدها .. باوعتلها بهيام وكلت.

قسورة: خليها لعد ..

ريما: تعوفني لو اصرخ؟

اباوع لملامحها المعصبة الحلوة واني مبتسم ..

قسورة: ليش تصرخين قابل شسويتلج؟

ريما: لا ابد اصلا كلش عادي وضعنا هذا

حجت بسخرية ادور رجعت كالت بجدية

ريما: هدني عاد حيجون عقاب واختي لتحطني بموقف مو حلو كدامهم!

قسورة: لتخافين ميجون هسة

ريما: وشمدريك انت؟

قسورة: ادري بيهم وبس

ريما: حتلو، فـ لو سمحت خليني اكوم، وهاي اخر مرة اطلب بأدب ادور اسوي شغلات ما تسرك

قسورة: شتسوين يعني؟

ريما: تحب نجرب يعني؟ 

ابتسامتي اختفت.. ملامحي هبطت وكلت بنبرة مترجية.

قسورة: ممكن نظل هيج شوية بس.. وبهدوء رجاءًا ريما؟!

ريما: بس اختي وعقاب هسة...

قاطعتها وكلت واني مقرب راسي ع كتفها واشتم شعرها وريحتها التاخذ العقل..

قسورة: ميجون، ثقي بيه ..

سكتت واني ظليت ع هالحالة كم ثانية..

احس كلبي بوده يطلع من مكانه..
ويطفرلها هلكد ما عاجبته وروحه بيها..

ورة شوية، هديتها وهي كامت بساع عبالك ممصدكة شوكت تجي هاللحظة..

بس يلا اتفهمها، تخاف تنحط بموقف مو حلو كدام اختها.

كعدت ع القنفة الكبالي، مو مثل قبل شوية بصفي.

رفعت حاجبي وكلت بشك.

قسورة: عادي ما آكلج ترا

ريما: اكدر اعرف شنو سبب هالتصرفات هاي؟

قسورة: اي تكدرين ليش لا..

ريما: اي؟

قسورة: بعد مو هسة

ريما: ش..شنو!!

قسورة: احلى شنو اسمعها بكل حياتي ..

ريما: مو صاحي انت! خاف مشتبهين والطلقة اجت براسك مو بيدك!!

قسورة: هو اني متصاوب براسي بس مو اليوم، من زمان

ريما: اي مو اكول ممعقولة انت واعي لروحك

قسورة: شكد فطيرة ..

همست لنفسي وضحكت، كل عقلها صدكت تصاوبت براسي طلقة!

متدري اني متصاوب بيها ..!

ريما: شكلت مسمعتك؟

قسورة: مو وياج الحجي

ريما: ها عبالي

قسورة: اي يابه

سكتت شوية، باوعت منا ومنا اختها لسة ماكو، ضحكت وكتلها.

قسورة: شكتلج اني؟

ريما: شكلت؟

قسورة: اختج وصاحبي بس يروحون لمكان يلزكون بالربع ساعة يلا يرجعون

ريما: ليش عود

قسورة: ماعرف بس اذا سئلتيني شيسوون؟؟ الله اعلم..

ضحكت بخبث، هي استلمت وشمرتني بالكوشة مال القنفة وكالت بغيض.

ريما: شكد متستحي!!

ضحكت ضحكة طويلة..

قسورة: خليت المستحة الج

ريما: كهكهكهكه

ابتسمت بخفة واني صافن ع تعابير وجهها المعصبة والمضحكة وهي تقلد عليه..

وشوية شوية ابتسامتي اختفت وظليت مركز بس عليها..

ريما: الوو وين رحت

فزيت من صفنتي بيها..

قسورة: وياج

ريما:  بيمن تصوبت؟

قسورة: بمسدس

رديت ببساطة شو هاي ردت تقلد.

ريما: لا عليك الله صدك واني عبالي وكعت من المرجوحة!

قسورة: شبيج بابا شبيج؟

ريما: مو دمك خفيف

قسورة: انتِ ثولة ترا، كلتي بيمن كتلج بالمسدس، لو كايلة شلون جان سولفتلج الحادث

ريما: هااا لعد نعتذر منك عيني و نعيد صياغة السؤال

رجعت جسمي لورا وكلت بغرور.

قسورة: مقبول اعتذارج لتظلين تتوسلين حبابه

ريما: اسمحلي اكلك انجب

قسورة: هسة هاي الجملة اصفن بيها ع اخلاقج لو ع طياح حظج؟

ريما: اسمحلي مرة ثانية اكلك انجب

قسورة: الله يطيح حظج

ريما: هسة تكلي شلون تصوبت لو لا؟

اجانة صوت عقاب الي سكتني قبل لا احجي.

عقاب: اني اكلج شلون

اجة كعد ووراه بشوية اجت الدكتورة ووجهها ميتفسر.

وبلش يحجيلهن من اول ما طلعنا لحد لحظة اطلاقه للنار ع قحطان.

بلحظتها عقاب ما صوب قحطان، ضرب الحايط الي بصفه بس هو وكع هلكد ما خاف عيني الرقيق هههههه.

وراها سمعنا صوت دوريات الشرطة، وطبعا احنه الي طلبناهم.

و ع رأسهم عقيد زيد الي اجة طكهم جتاف واخذهم واحد ورة اللاخ.

الحلو بالموضوع تهمة المخدرات لابستهم لبس هم يمهم يشمون وهم بتحليل دمهم حتطلع!

بس عقيد زيد من شاف قحطان متصوب برجله، ما اتعامل وياه بنفس القوة الي تعامل بيها وية البقية.

عافه ممدود بالكاع وكام يحجي وية عقاب.

زيد: هسة انت سويت زينية كملها للاخير، ليش صوبته!

عقاب: يابة خو ما تريد اطيكياه هيج بلا ما افوخ كلبي

ضحك العقيد ورد.

زيد: وهسة فاخ كلبك؟

هز راسه عقاب ورد.

عقاب: مو كلش بس اشوى من قبل

جنت اسمعلهم واضحك، درت وجهي فجاة وصار كدامي قحطان وهو لازم سلاحه ومصوبه باتجاه عقاب.

كمت صرت كدام عقاب وصحت.

قسورة: ديررررر باللللكككك!!!

كلها انتبهت، والولد شاهين وليث وضرغام جانوا برة فـ هم اجو ع صوتي.

من شافها كلها كامشة اسلحتها، جر بوش بس ما استسلم.

عقيد زيد كله بتحذير.

زيد: اي حركة تسويها محسوبة عليك فـ انتبه وذب السلاح من ايدك احسلك

قحطان: ما يهمنيييي!

زيد: لتخلي سجلك الاجرامي يزيد، نزل السلاح كتلك!!

قحطان: كتلك ما يهمني، عقاب لازم يتحاسب ع كلشي سواه وياي

عقاب: لعد هستوك تذكرت يبعد روحي؟ وين جنت من قبل!

عقيد زيد اشر لعقاب يسكت، ورجع كال.

زيد: هاي اخر مرة اكلك نزل سلاحك، انطي امر اخلي هاي الجنود كلها تفرغ مسدساتها بيك، فـ تعاون وياي لمصلحتك!

نزل سلاحه وهو مدنك راسه، عبالنا استسلم.

بس الحقير ضرب طلقة وغدرنا.

واني لان جنت حاس بي حيسوي هيج، جنت محضر روحي كبل اوكف كدام عقاب.

وفعلا صار هيج بس اجت الطلقة بايدي لان ما لحك يصوب زين هيج عمياني ضرب.

رئسن صوبه العقيد بجتفه وكع المسدس من ايده.

عقاب كمشني وكال بقلق والولد داير مدايري.

عقاب: قسورة انت مطي لو مطي!!!!

ابتسمت.

قسورة: هاي بدال شكرا، بس يلا ميخالف ادري بيك عندك مشكلة وية هالكلمة فعاذرك

عقاب: الله يطيح حظك ع هالسواية، ليش شمرت نفسك كدامي!!

قسورة: جنت اجرب مهاراتي بالقفز، بربكم شلونها مو شكاكية؟

ضحكوا .

ضرغام: لو هاي الصحبة لو متنراد

قسورة: شوية بعد رح استحي، دكافي هي طلقة واجت بايدي.

راحو الجنود شالو قحطان وهو يتصايح بالم، بس من وصل يمنا، باوعلنا بغل وكال.

قحطان: اني وياكم والزمن طويل!!!!

عقاب ابتسم ابتسامته المستفزة الشهيرة واني رديت.

قسورة: اعلى ما بخيلك اركبه يا تاج الراس

اخر كلمة كلتها باستهزاء و ضحكنا.

عقاب: هاي اذا لحك يطلع اصلا ويركب الخيل!

خزرنه والجنود جروه اخذوه، تسالمنا وية العقيد وطلعنا.

لفيت جرحي بقطعة قماش من ضرغام ورجعت وية عقاب والباقي صرتوا تعرفوه!

...

اماني

عقاب: اي وهي هاي السالفة وما بيها، ارتاحيتن انتِ واختج؟

كال موجه الكلام الي، ظليت ساكتة متعجبة عليه.

شكد يحجي ببساطة عبالك لاعبين بمسدسات مي مو رصاص واليتصاوب يروح بخبر كان!

اماني: الحمدلله عدت ع خير وخلصنا منه

عقاب: اي ولى

ريما تسمع ومتحجي، ادري بيها مصدومة خطية متعرف بمغامرات هالشباب شلون اسطورية.

شوية وكامت دك تلفونها.

رجعت كالت ريان اجة بالباب وحياخذها، ودعتها وسلمت ع اخويه ورجعت طبيت.

سويت كهوة ونطيتهم، قسورة كملها وكام.

قسورة: ها خير وين تريد

عقاب: خ اوصلك

قسورة: دكعد واسكت الله يخليك اني اروح وحدي

عقاب: وايدك شلون!

قسورة: اخذ تكسي، بعدين عادي ايدي متصوبة مو رجلي اكدر امشي براحتي

عقاب: ع راحتك

  سد الباب وراه، ورجع كعد.

عفته كاعد ورحت انام، اجة ورايه بنفس الثانية.

عقاب: لتنامين عالكاع بعد وهذا الفراش جيبي خ اطلعه منا

اماني: ليش يمة شكو؟

عقاب: هذا الموجود

اماني: عقاب دتشوف الي دا اشوفه بيك لو لا؟

باوعلي بملل ورجع حجة بحدة.

عقاب: ....

...

انتهى

لا تنسوا التصويت 🖤

#الكاتبة نورمين 🦋🖤