رواية خطأ طبي «عقاب الاماني» الفصل الاول 1 - بقلم نورمـين

#خطأ_طبي «عقاب الاماني»

بقلــم : نورمين 🦋🖤

...

انا القسوة بعد الجحود..

والرماد المتناثر بعد حريقٍ مهول..

انا العاصفة التي تعقب الهدوء المريب..

والظلام الدامس في اقاصي الليل..

انا عِـــقاب.

كاعد بمكتبي ومصعد اكمام قميصي للنص، وايدي تتخلخل شعري بعشوائية واني اكمل شغلي والملفات مسطرة.

دك تلفوني جاوبت.

عقاب: وين صرتوا قسورة؟

قسورة: جايين بس صارت مشكلة بالطريق هي أخرتنا

بقلق سألت: خير شصاير؟

قسورة: تعرض موكبنا لهجوم مسلح من ملثمين بس كدرنا نصدهم

كمت عن الكرسي وحجيت بخوف: والحجي؟!

قسورة: بخير بخير لتخاف محد يكدر يتعرضله بوردة بوجودي

تنهدت براحة ورديت: شحدك اصلا

قسورة: هههه انعم الله، يلا دقايق واحنه يمك

عقاب: ماشي

سديته منه فركت وجهي بايديه واخذت نفس عميق، سديت الملفات وعدلت رداناتي ولبست جاكيتي وكمت، تفقدت المبنى والموظفين ووكفت بالاستعلامات انتظر وصولهم بقلق، اريد اتاكد بعيوني انو الحجي بخير، مستحيل تمر هالشغلة بسلام واني الهم هالانذال الي تجرأوا وتعرضوله..

شوية ووصل، تلكيتهم ومشيت وياه، دخلت لغرفته حتى اطمئن عليه.

الحجي حمزه: شلونك.. اخيتك شلونها

عقاب: بألف خير، انت شلونك يابة معرفت منو سبب الهجوم؟

الحجي حمزه: ماكو غير قحطان السافل وجماعته

عقاب: اني اله هالنذل لازم انطي درس مينساه حتى ليرجع يتطاول ع اسياده بعد

الحجي حمزه: عوفك منه هسة هذا فارغ، عود بعدين نشتغله، ركز ع الشغلة الكلفتك بيها، اريد اي دليل ملموس او قضية ضد دكتور رياض الرحمن بأسرع وقت ممكن عقاب!

هزيت راسي وكلت: تأمرني يابة

الحجي حمزه: اخذ راحتك لعد ومنتظر منك خبر يفرحني

عقاب: بأذن الله، من رخصتك يابة

عفته وطلعت، لكيت قسورة بالباب.

عقاب: كمشتوا واحد من الي نفذوا الهجوم؟

قسورة: لا كلها شردت والي صوبناهم ودعوا بمكانهم

عقاب بوعيد: سهلة ..

قسورة: ترا ميراد ندور ونبحث، ماكو غير قحطان الكلب ورا هالسالفه

عقاب: اعرف بس ردت ادزله هدية بيد واحد من زلمه

قسورة: شنو ببالك ولك؟

عقاب: بعدين تعرف

قسورة: رجلي ع رجلك، شتريد تسوي كول ترا مثلك اني و الحجي بحسبة ابوي واعز

ابتسمت وحطيت ايدي ع جتفه، باوعت يمنه يسرة ماكو احد،  اتقربت يمه وشاورته بخطتي، ابتعدت وهو مبتسم.

قسورة: لك عاش عقلك

ابتسمت بجانبية وكتله: راجع لشغلي، لتخلي احد ينتبه لشي خليها بيننا، نحلها بس اني وياك احسن

قسورة: لتوصي حريص

مشيت لمكتبي وكمت اسوي اتصالاتي وزرعت جواسيس بكل مكان، الكالك مكسورة دكتور رياض يعني الكة!
نائب ودكتور من سنين ممعقولة ما الكالك غلطة منا منا!

للظهر خلص دوامي وطلعت وية الحجي، حتى نلتقي بمجموعة من حلفائه، ما راد ياخذني بس اني اصريت لان اخاف يتعرضوله مرة لخ.

وصلنة لبيت واحد من اعضاء الحزب، والي متفقين يجتمعون بي، قسورة هو السائق، اخذ السيارة يصفها بمكان قريب بعدما نزلنا ويرجعلنا، مشيت ويه الحجي ردت افوت وياه للبيت بس الحرس مخلوني.

خزرتهم والحجي التفت عليهم وكال بعصبية.
الحجي: شيل ايدك انت وياه!

نفذوا وابتعدوا بتوتر، مشيت وية الحجي مبتسم.

عقاب: يوم عن يوم يزيد مقامك عندي

الحجي: وليدي انت

عقاب: معدل يابة ..

ابتسم وفات للصالة واني بقيت واكف بالممر يم بقية المساعدين.

...

أماني

طلعت من صالة العملية بضجر، نزعت الكمامة وشمرت الجفوف بالزبالة ورحت غسلت ايديه وعقمتهن وطلعت.

فتحت شعري الي جنت شايلته ذيل حصان وتوجهت لغرفة الدكتورات، اول مطبيت شمرت نفسي ع واحد من الكراسي واخذت نفس بتعب، هلكت من كمية العمليات الي سويتها اليوم، عدنه نقص بالكادر الطبي وهالشي يجبرنا نسوي العملية حتى لو ما كانت ضمن نطاق تخصصنا، ولو تصيب لو تخيب والي يدفع الثمن هو المريض.

دكتورة تيا جانت كاعدة بمكتبها وتوقع ع عمليات وتقرة ملفات المرضى، من فتت سألتني بمرح.

د.تيا: ها دكتورة بشري حمامة غراب؟

بدون ما التفتلها رديت: حمامة بس شنو، انشلع باب كلبي ولله

د.تيا: ديلاا ميخالف اهم شي خلصت

حجتها بطريقة ضوجتني، مدري اني متنرفزة اصلا، لان خلوني اسوي عملية مو بنطاق تخصصي فـ نترت بيها.

اماني: اي و شهامج انتِ؟! سمعيني زين دكتورة، هاي اخر مرة اسوي عملية خارج تخصصي واجازف بروح انسان بريئ، وصلي الكلام للمدير خلي يتحرك ويلزم اطبائه عاد، مو وضعية هاي ناس يطيح حظها وناس متجي ومخلصتها عطل

د.تيا: ع كيفج عيني شجاج انهديتي، فوك ما نثق بيج ونسلمج هيج مسؤولية

اماني: لتثقون بيه يا اخي! خلي كلمن يوكف ع راس عمله وفضت راحت! ارواح الناس الفقرة مو لعبة بيدكم

د. تيا: الظاهر اعصابج مشدودة، خ اعوفج واطلع احسن

زفرت بضيق وهي طلعت، يعني شنو تاليتها هالشغلة التعبانة! لشوكت اظل اقدم شكاوي ومحد يسمع صوتي!؟
مدير المستشفى اكبر فاسد وعنده جهات تدعمه وتطلعه من اي قضية مثل الشعرة من العجين، واطبائه رب الاهمال والواكع بيها المواطن الفقير، لان مستشفى حكومي فكل اهتمام بي ماكو وحياة الناس يا مرخصها .. شيصير بينا بعد بهالبلد مادري.

الوضع الصحي والبنى التحتية كلها متدمرة وكل اهتمام بيها ماكو، عندك فلوس تكدر تروح لمستشفى اهلي و ع حسابك يعاملوك كأنك ملك، ماعندك فلوس فتجي لمستشفى حكومي، يطلعون بيك مرض غير الي انت جاي علموده، هاي اذا كدرت تطلع مناك سليم، الفساد ينخر بجسد المنظومة الصحية من كل مكان ومنعرف شلون نوكف هالآفة عند حدها.

...

عِقاب

كمل الحجي اجتماعه ورجعنا، وصلته للبيت ووصيت قسورة عليه ورجعت لبيتي.

نزلت من سيارتي واسمعلك صوت الاغاني الجاي من البيت شعلاته.
رحت امشي واني ابتسم، اكيد خبلتي رجعت لسوالفها. طبيت وجان اشوفها تكمز وتهز فرحانة، ضحكت وصرت كبالها، شافتني اجتي تركض شبكتني وكالت.

بيـري: شلونك حبيبي

عقاب: زين وانتِ ام عطوب

بيـري: مضغوط من شعري اتفهمك

ضحكت: شلون جان امتحانج ولج؟

بيـري: صخام كالعادة بس اهم شي خلصتتتت!

ضربتها ع كصتها بخفة وكلت:  لعد هالعرض الاستعراضي كله ع شنو اذا مصخمة؟

بيـري: اهووو اخويه حبيبي هذا كله لان خلصت من طياح حظ السادس اخييرًا!!

عقاب: هو ادبي، لو رايحة علمي شجان سويتي

بيـري: اكول شبيك جاي محمل عليه، شو معاجبك العجب؟

عقاب: اي لمي عطوبج وامشي سويلي اكل جوعان
مشيت لغرفتي واني احجي باستفزاز واضحك عليها

عقاب: ويا ويلج اذا لكيت عطوبج بالاكل مثل البارحه

بيـري: نننننن محد ابو عطوب غيرك شوف روحك جنك واحد منتول

عقاب: هاي يسموها سبايكي يا عديمة الذوق

بيـري: واني يسموها كيرلي يا عديم الذوق

ضحكت وركضت وراها وهي شردت.
عقاب: تعالي ولج واني الج، هاي ويامن هالحجي

بيـري: وياك وياك ويااااااك، شنو بس انت تحجي عليه ولله حلوة هاي
تحجي وتكمز وصايرة يم القنفة، حتى شون ما اجيها تكمز

عقاب: غير اخوج الجبير ولج

بيـري: اي واني اختك الصغيرونة الحلوة الكيكة

عقاب: اي وام كفشة اهم شي

وكفت عالقنفة و تخوصرت بغير رضى وكالت: هسة منو يعيل بمنو؟

ادري بيها تتخبل من واحد يحجي ع شعرها وتتيه راسها من رجليها، فبسرعة لزمتها خنكتها ع كيف واني اضحك عليها،  جنها عصفور بين ايديه.

عقاب: اعتذري بسرعة يلا

بيـري: اسفة بس هدني اختنكت خربيومك

عفتها وكفختها براسها: صيري حبابة ادور

بيـري: خوش انت هم صير حباب شكبرك تصير بعد ومتبطل سوالفك هاي

عقاب: دنجبي وامشي ميت جوع

راحت واني اضحك، احب اشاقيها واشوف عصبيتها، بيـري مو بس اختي، هي كل عائلتي الباقية واعز بشر ع كلبي.
شفتها لازمة بطنها ونلامحها متألمة، سألتها بقلق.

عقاب: شبيج ليش لازمة بطنج؟

بيري: وجعتني من كثر الهز يمكن

ضحكت ورحت لغرفتي سبحت وبدلت ملابسي، واكف اشسور شعري دكت الباب.

صحت: فوتي

بيـري: هذا اكلك اني حباوع مسلسلي بالغرفة، اذا ردتني دزلي واتساب مو تصيحلي مناك لهناك بلا فايدة سمعت؟

عقاب: تعاي اخذيلج راجدي بعد؟

بيـري: لا هاك بوسة بالهوا

دزتلي بوسة بالهوا وراحت، ضحكت وكعدت اكل، شوية ولكيت شعراية بالاكل، ضيقت عيوني باشمئزاز وصحت بصوت رج البيت: بيـريييييييييييي!!!!

...

لليل، رحنة اني وقسورة لملهى تابع لقحطان، وكفونا الحرس مالته مخلونا نفوت، شفت الكاميرات مال المراقبة، سويتلها حركة هلو واني مبتسم بثقة.

قسورة: كوله للريس مالتك ليخاف، جايين نصعد الكيف وبس

عقاب: اي يابة جايين نتونس ترا شجاكم تتراجفون

فوتونا بعدما اجاهم واحد من جوة، شاورهم الظاهر وصل تصريح دخولنا من ريسهم المعفن.

فتنا والبنات والشباب اشكال الوان الركص والشرب، كعدنا اني وقسورة ع صفحة واخذنا عصير بارد، بعدنة نريد نبلل ريكنا يلا نبلش بخطتنا.

اجتي وحدة جلبت بيه وكامت تحضن وتتمايع، وخرت ايدها عني بقرف، اتخبل من هالنماذج احسها قذرة!

-شبي الحلو

عقاب: ميخصج

-ليش يعني

عقاب:يلا يـحبابه وخري منا احسلج

-ضايج مو، تعال اني اعدلك مزاجك

تحجي وتجر بالحجي، وحاطة ايدها ع رجليه، دفعتها وكلت بحدة: لتكمشيني وكتلج وخري شنو انتِ متفتهمين!!

خزرتني وراحت، ملاهي ما ادخل بس علمود شغلي افوتله مرات، اتقزز من بنات الملاهي وما استنظفهن ابد، رغم اكو بيهن حلوات بس ابد ما يثيرن رجولتي!

شوية وبلشت الاجواء تحلو ونص الموجودين شاربين ومنتهين عالاخير، غمزلي قسورة هزيتله راسي وكمت.

كسرنة الطاولات والشرب والكزاز ترس الكيعان، البنات ختلن وكامن يتصايحن والعالم تشارد.
نزلوا زلم قحطان اخذوا المقسوم، نهيناهم تنهي وكلبنا الملهى كلاب، ما اتحرك ريسهم الخنيث ولا راوانه وجهه، احنه مجنة نريد نأذي اصلا مجرد تهديد صغير هههه.

طلعنا وبالباب شفت نفس الكاميرا الشفتها من فتنا، رحت عليها ولحكني قسورة، سويتله حركة بيباي واني مبتسم بسخرية، اما قسورة فجان يسوي حركات فشار، ضربته ومشينا.
صعدنة بسيارتي وحركنا واحنه اهل الراهي، زلمه للافندي حتى هدة ما بيهم، كلها تختلت من صارت صدك، صدك استخطيته.

قسورة: لك ابوس عقلك ابو الافكار الجهنمية

باوعتله وابتسمت، ورجعت اسوق نزلته يم بيته ورحت لبيتي، ناري خمدت ومي بارد نزل ع كلبي بعدما اخذت حق الحجي منهم.

....

ورا كم يوم، جنت بالمكتب اخابر وضايج، لان مكدرت الكة اي دليل يدين دكتور رياض، او يثبت تورطه بقضية عليها شبهة، ممعقولة يكون اكو نائب نزيه لهدرجة، كلش مستغرب منه.

قسورة: شبيك محتقن؟

عقاب: لك مدا الكة اي شي ضد رياض خبلني!!

قسورة: هو هالانسان نزيه كلش، صعب تلكاله شي

عقاب: ماكو شي يصعب عليه، اذا ماكو شي ضده اشوف اولاده والا ما الكة الاريده

قسورة: غير لزكة ومغرور انت، اعترف بخسارتك لمرة وحدة بحياتك

عقاب: شتسميها سميها، اني ما احب الخسارة والفشل ابد، ويستحيل استسلم الهم، بقاموسي دائما اكو مجال للربح

قسورة: عشت صديقي ههههه
ابتسمتله وفتحت تلفوني اتصل ع واحد من زلمي، حتى يبلش يبحث بحياة اولاد رياض.

للظهر صاحلي الحجي رحتله للمكتب.

عقاب: ها يابه رايدني؟

الحجي: شصار ع شغلتنا

عقاب: ولله لسة دا ادور اني والولد

الحجي: لازم تلكة دليل عقاب، لازم دتفتهم شقصد؟

عقاب: ان شاء الله

الحجي: بلغ قسورة خ يحضر السيارة حتى نروح نسلم ع دكتور رياض شو شتاقيتله

ابتسمت وكتله: تأمر يابة

طلعت وبلغت قسورة، صعدنة السيارة اني وياه والحجي، وويانة اربع سيارات حماية، كمنا نتشدد ع الوضع الامني بسبب اخر هجوم.

وصلنا لبيته، بالاول منعونا الحرس نفوت، بس اصرينا ندخل فأجاهم الامر انو يخلونا ندخل بس بالوقت المناسب، لان خلكي ضاك واجيت افرشهم عالكاع ونعبر من فوكهم.

  طب الحجي واني وقسورة وياه، وباقي الشباب عفناهم بالباب، كعدنا بالصالة والي تصميمها فاخر لاخر درجة.

جان رياض مغتاض وواضح ميريد يشوفنا.

رياض: شنو سبب هالزيارة؟

الحجي: وعليكم السلام والرحمة، بخير انت شلونك؟

رياض: ما عندي وقت اتناقش ويه شخص مثلك، فضني شتريد احجي وتوكل

وسعت عيوني بغيض وتقدمت يمه خطوتين، تجاوز حده!

اندارلي الحجي واشرلي اعوفه، رجعت لمكاني واني ضايج، ابد ما اتحمل احد يقلل احترام الحجي.

الحجي: ياريت تحسن الفاظك وتحجي عدل

رياض: ما مجبور احسنها وياك انت بالذات

الحجي: عوفك من هالحجي، شكلت ع عرضي الاخير؟

رياض: جوابي واحد مستحيل يتغير، افهم عاد وبطل جياتك الغير مرغوبة بيها لبيتي لان دتزعجني!

كوة لزمت اعصابي وما خنكته، الحجي هم حسيته كوة لازم نفسه، ونبرة صوته الحادة من حجة التالي اكدتلي هالشي.

الحجي: الا اخليك تتندم ع هالحجي هذا كله، وساعتها نشوف شلون رح تتوسل الي، لحتى اعطف عليك واسمحلك تنضم للحزب مالتي

رياض: اعلى ما بخيلك اركبه

الحجي: سهلة، اني وياك والزمن طويل

عافه وكام، مشيت وياه وطلعنا واني مفول غضب من الصار.

بالطلعة لاكتنة بنية حلوة وصغيرة، لفتت نظري بقصة شعرها القصيرة ولبسها الانيق مقارنة بكونها غير محجبة، ملامحها توحي باستغرابها من عدنا، كلت اكيد هاي بنته، درت وجهي وكملت طريقي.

صعدنه السيارة، قسورة يتحكم بنفسه احسن مني، اني وبسبب كلشي مريت بي بحياتي تعلمت اثور واعصب واكسر واحرك الجو.

عقاب: يابه ليش سمحتله يحجي وياك بقلة ادب؟ ما خليتني اكسرله راسه لهالغبي

الحجي:  اكسرلي راسه بغير طريقة ونفذ الكتلك عليه

حسيته لطمني ع حلكي وديذكرني بفشلي! ضجت لان اني ولا مرة تاخرت بأي مهمة يكلفني بيها الحجي، فهالموقف حز بداخلي.

...

اماني

رجعت للبيت وشفت كومة سيارات بالبيت، استغربت بعدين كلت اكيد واحد من النواب جاي يقابل ابوية.

من دا اطب للبيت، لاكاني رجال جبير بالعمر ووياه شباب ثنين الظاهر مرافقيه بالاضافة للحرس الي واكفيله بالباب، بس تعجبت لان بابا مو بالعادة يجيب شغله للبيت، دائما يلتقي بيهم بمكتبه.

تحاوزوني وراحوا، رحت للصالة سلمت ع بابا حضنته وكلت.
اماني: سلام باباتي شلونك

رياض: هلا بنيتي، شو تأخرتي اليوم

تنهدت وشمرت صدريتي وجنطتي عالقنفة وكعدت.
اماني: شحجيلك بابا، وضع المستشفى ابد ميسر الخاطر

رياض: ليش ما اجوكم التفتيش؟ خابرتهم كالوا رحنه

اماني: اي اجوا واخذوا نظرة بس ما سوو شي، ومتاكدة مراح يسوون اصلا، وحتى اذا سوو اكيد يوكفوها جماعة حازم -مدير المستشفى- قبل لتوصل للجهات المختصة

رياض: ولله عجيب امره، يعني الانسان غير يتصرف بدافعه الانساني؟ وهو طبيب ويعرف ان الطب مهنة انسانية، شو هذا حتى الحيوانات ميسوون سوايته

اماني: تعبت بابا، يومية اتعارك واحجي وياهم وميفيد، يومية جاية كوم حالات تعبانة ومحد يديرلها بال لو نقص بالتجهيزات، والموت شي كلش عادي، ارواح العالم رخيصة عندهم، ولا كأنوا هاي الارواح الله رح يحاسبهم عليها!

رياض: مخافة الله انعدمت عد هالبشر فكلشي توقعي، والله ليستر منهم

اماني: بس بابا اني دا اضطر اسوي عمليات مو بمجال تخصصي وهالشي ديخليني خايفة طول الوقت، كل حركة اسويها ايدي ترجف واخاف لتطلع غلط ويروح بيها شخص بريئ

رياض: لتسويها لعد حبيبتي انتِ ما مضطرة تحطين نفسج بهيج موقف

اماني: ماكدر اشوف العالم تتأذة وابقى اتفرج.. يعني اليوم دخلت للطوارئ اشكال العالم ومحد بحالها، والي قهرني اكو طفل عمره 7 سنين متعور باصبعه بآلة حادة، وجاي واحد من الممرضين يريد يكصه!! تخبلت عقل ما ظل براسي، همزين لحكت عليه قبل ليسويها صدك وخيطته

رياض:  استغفر الله يا رب، ماعرف شحجي

صعدت لغرفتي ارتاح، ونسيت اسأل بابا منو ذولة العالم، هلكانة من التعب الجسدي والنفسي، اصوات المرضى واهاتهم المتوجعة ترن براسي، اني شجابني ع الطب وشلاع الكلب مادري.

.....

عقاب

بعد اخر موقف بيني وبين الحجي، صرت اشتغل اكثر واكثر وادور بحياة رياض واولاده وزوجته، وخليت بدل الاربعة الي يدورون عشرة.
وهم ما لكيت الي اريده، شنو هالعائلة المستقيمة هاي!!

واني دا اشتغل، دكت عليه اختي، رفضته اول مرة ورجعت اشتغل، بس دكت مرة لخ جاوبتها واجاني صوتها وهي دتبجي وتعبانه.

بيـري: عقاب الحكلي داموت بطني توجعني فدوة تعال بسرعة

عقاب: شككككو شبيجججج؟

بيري: ماعرف... بطني موتتني

عقاب: جايج بسرعة

سديته وركض نزلت وكلت لقسورة يحاجي الحجي علمودي، وطلعت للبيت ودايس سرعة، ما صدكت وصلت.

طبيت للبيت ومن الباب اسمع صوت بجيها، تخبلت من شفتها واكعة بالكاع ووجهها ازرك وكوة تجر نفس، شلتها بساع وركضت حطيتها بالسيارة، يا ربي دخيلك بيه ولا بيها، هاي الانسانة الوحيدة الي بقتلي بهالدنيا الظالمة..

طول الطريق ما رفعت ايدي عن الهورن، واتغالب ويه الوقت، اريد بس اوصل، وبيري بس تبجي وتشهك، خبلتني وعقل ما ظل براسي، احجي وياها اكولها حبيبتي ماكو شي هسة تصيرين زينة قوي نفسج بس ماكو متجاوبني وبس تبجي وتصرخ بألم.

ما صدكت وصلت لمستشفى قريبة، نزلت شلتها وركضت بيها للسدية الي جابولياها الحرس، اخذوها للطوارئ واني احس گلبي يريد يطلع من مكانه من الخوف والقلق، بداخلي ادعي ربي ينجيها ويحميها الي، هي بس هالاخت الظلت.. دخيلك الهي تحميها الي.

شوية وطلعت ممرضة كلتلي حندخلها عمليات وراحت تجهز الغرفة، وظلن الدكتورات والممرضات طابات طالعات مادري ع اختي او ع غير مرضى، روحي راحت وظليت الوب اريد افتهم شبيها اختي عمليات شنو!!! الصبح جانت مثل الوردة وكلشي مبيها، شصار فجأة!!

..

اماني

اليوم الطوارئ مكلوبة كلاب والمستشفى تصيح الغوث، ومنا البارحة جنت لازمة خفر فكمت اشوق المريض اثنين، كلش دايخة ومسطورة ومع ذلك ما عفت شغلي، دكتور احمد مموجود كالعادة وطاحت الردهة كلها براسي.

اجتي حالة بنية صغيرة تبجي وتعيط، خبصتنا خبص وبعد الفحص تبين بأنو يحتاجلها عملية للزائدة الدودية.
بلغت الممرضة تحضر غرفة العمليات وترجع تحاجي دكتورة تيا تسويها، لان الجراحة الباطنية مو اختصاصي.

رجعتلي الممرضة كالت : دكتورة تيا عندها عملية ثانية وتتاخر

اماني: ليش مرحتي لاستاذ حازم وبلغتي يتصل ع دكتور احمد محتاجي ضروري!!

-رحتله وكال خلي هي تسويها مو سوت عملية زائدة ذاك الاسبوع

اماني: دخيلك يا ربي وذاك الكلب احمد شنو شغله لعد!!!
عطت بعصبية، من صدك وصلت حدها وياي كلش

-ماعرف بس خطية شوفيها شون تكسر الكلب
تحجي وتباوع للبنية الي دتبجي، ذبيت حسرة وكلتلها.

اماني: اني حسويلها العملية اخذيها، الغرفة جاهزة؟

-اي جاهزة

اماني: استعجلي لعد

طلعت ابدل والممرضات اخذنها لغرفة العمليات، وكفني ولد الظاهر جاي وياها.

عقاب: دكتورة شبيها اختي؟ يا عملية هاي شكو!!

اماني: زائدة دودية لتخاف مو شي خطير

عقاب: تمام مشكورة

رحت واني اتسائل وين شايفته؟ شكله مو غريب عليه، نفضت افكاري..ديلاا هسه خلي اركز بشغلي، اكيد واحد من المرضى او المرافقين الجانوا عدنه.

طبيت للعمليات بعدما تجهزت، واني ادعي ربي يقويني ويعديها ع خير مثل كل مرة.

بلشت اشتغل والعرك يصب مني من كثر التركيز، ايدي ترجف خاصة بعدما شفت انو مرارتها مفجورة وملطخة الداخل كله، واني منا تعبانة ومسطورة، كصيت شريان بالغلط وجان تنزف والدم غرك بطنها، متت بدمي ودموعي تجمعت بعيني، لا يا ربي دخيلك لا، كلشي ولا تموت، بعدها صغيرة!

اضطريت اسويلها عملية ثانية، احاول اوكف النزيف بس ماكو،  دخلت بغيبوبة، ادور كلبها وكف وماتت..!

بظرف دقايق انتهت البنية وسلمت روحها للخالق.. وكله بسببي.. بسبب خطأ طبي ممقصود!

....

-انتهى!

-شلون لكيتوا البارت الاول؟ شنو رأيكم بالفكرة والشخصيات؟

-شاركوا القصة بكل مكان ومنشنوا صديقاتكم يقرون وياكم 🖤

-الى اللقاء قريبًا..

#الكاتبة نورمين 🖤🖤