رواية خطأ طبي «عقاب الاماني» الفصل الثاني 2 - بقلم نورمـين

#خطأ_طبي «عقاب الاماني»

بقلــم : نورمين 🦋🖤

...

عِــقاب

كاعد ع اعصابي متاني تخلص العملية حتى اطمئن ع بيري، بعدني للان ممستوعب الصار.. شنو زائدة شنو عملية؟! هاي شوكت صار عدها هيج؟ وليش مكايلتلي من قبل!؟

بس مصبر نفسي انو شغلتها سهلة، ورغم هذا بيني وبين نفسي ادعي الله يحميها ويعديها ع خير، كلبي مو حمل ألم خسارة شخص بعد ..

ورة وقت طويل، طلعت الدكتورة البلغتني بالعملية ووجهها ميتفسر، اصلا اني مشبه عليها بس مدا اتذكر وين! بس مو هذا المهم هسة.

سئلتها كبل.
عقاب: ها دكتورة بشري شلونها اختي!؟

سكتت وعيونها حمر، شبيها هاي دخيلك ربي!
وخرت كمامتها وكالت بصوت مهزوز.

اماني: البقاء بحياتك

صمت رهيب خيم ع الجو، لدرجة كمت اسمع صدى دكات كلبي الهايجة، رمشت بعدم تصديق وملامحي بهتت.. لا مستحيل هالشي يصير، مستحيل!

عقاب: ش..شنو شنو؟ شقصدج دكتورة شنو هالحجي اختي ويييييين!!!!!
اخر شي كمت اعيط بصوت عالي واحس نار حركت بلعومي، خاصة ملامحها تبين انو هاي هي الحقيقة!

عقاب: شسويتي بيها احجيييي؟ انتِ مو كلتي عمليتها بسيطة شنو ماتت!!
فركت وجهي ورجعت لورا، ضحكت ورجعتلها: دتشاقين مو؟ احجي ليييييش ساكتةةةةة!!

تخبلت وهاي متحجي، بس عيونها حمر وحاصرتها البجية، طلعن الممرضات سألتهن مرة لخ وكلي أمل يطلع ماكو شي!

عقاب: ها وينها اختي؟ شلون صارت؟  شوكت تخرجوها؟

نزلن راسهن ومحجن شي، وحدة منهن حجت بأسف: الله يصبرك ويرحمها ..

هنا بس استوعبت حجم مصيبتي...
بيري هم راحت! صفيت وحدي بهالدنيا!! ليش يربي مو كتلك احميها مالي غيرها؟

غمضت عيوني بألم ووكعت ع ركبي بالكاع، ودموعي كامت تجري بدون سيطرة مني.. ديرن صوتها ببالي وهي تضحك وتسولف.. وهي تركص ومكيفة خلصت سادس وحتدخل جامعة!
سوده عليه ما لحكتي تفرحين..

حطيت ايدية ع وجهي وبجيت بصوت عالي، حيلي كله انهد وكل ذكريات السيئة المرت عليه رجعت مرت ببالي مرة لخ وخلتني افقد تحكمي بنفسي..

وين رحتي انتِ هم ولج بيري؟ مو جنة متفقين نكمل حياتنا سوة ونصير عائلة لبعض، وين رحتي ويتمتيـني؟!

اني هسة من صدك صفيت وحدي بالدنيا.. ما الي احد بعد، تذكرت ابويه بيوم وفاته.. وشلون وصاني عليها و ع امي عبالك كلبه حاسه حيموت ويخلينة وحدنه بهالدنيا.. بوكتها جنت 17 سنة وبيري جانت اول ابتدائي.

الاب: بعد شمحتاجه حبيبتي حتى اجيب فد مرة قبلما اروح

بيـري: بابا اهم شي جبس لعيونك، مو تنسى ابو الطماطة اريد

الاب: صار وانت عقاب؟

عقاب: ماريد شي، بس ارجع من وكت فدوة بابا عندي اجتماع اولياء امور بالمدرسة اليوم

الاب: ان شاء الله بس دير بالك ع البيت بغيابي ولتفتح الباب لاحد اذا اندكت

الام: يلا يا عيني هم يلا تلحك تروح وترجع، لتخاف احنه بخير

الاب: مادري شو كلبي ممرتاح

الام: لا يبعد عيني ارتاح وخلي رجليك بمي بارد، الله موجود والكاتبه يصير

الاب: والنعم بالله، يلا اروح اني، بابا عقاب تعال سد الباب ورايه

عقاب: اجيت
مشيت وياه ومن وصلنا لباب البيت، حط ايده ع جتفي وكال كلام وهو ديوصيني بنبرة جدية، عمري كله ما انساه ولا يغيب عن بالي لحظة وحدة..

الاب: انت صرت رجال حبيبي، دير بالك ع نفسك وع امك واختك ترا هالدنيا مالها امان، كون الهم سند واحميهم من هالوكت الاغبر، اني كلبي راضي عنك ومطمن اذا رحت، لان ادري بيك كد المسؤولية

بوكتها جانت 2006.. والطائفية بأوج مرحلتها، الناس تتكتل وتنشمر ومحد يحاسبها، والشيعي يصيح السني مو زين ويريد يكتله، والسني يصيح الشيعي مو زين وهم يريد يكتله، الموت بالجملة والعالم كلمن يصيح يا روحي، ومتكدر تأمن بجار ولا بصاحب والوضع بالضيم.

من حجة هيج ظليت صافن بي وحاصرتني الخنكة، يعني ابويه حاس حيموت مع ذلك رح يطلع.. علمودنا!

عقاب: اسم الله عليك بابا ليش تفاول ع روحك، ترا احنه منكدر بلياك ولله، بعدين اني منتظرك تجي تسال عليه بالمدرسة اليوم ..!
حجيت اخر كلمة وشبكته قوي، دموعي متحجرة بعيني متقبل تنزل ماعرف ليش..

الاب: لا باباتي شو باوعلي ..

وخرني عن حضنه وكال: الموت حق علينا، اذا مو هسة فـباجر، واني الي فترة حاس گلبي مقبوض وما مأمن ع روحي.. واذا ع المدرسة فاني ادري بيك شاطر وكدها

عقاب: بس بابا شلو..

قاطعني: ماكو شلون، قوي كلبك امك واختك بأمانتك، لتخيب ظني بيك وليدي، اريد انام بكبري مرتاح

هنا بس، دمعتي نزلت بقهر: بابا لتروح حباب، سد الباب وتعال نطب جوة منريد اكل ولا نريد اي شي، وجودك انت كافي علينا، فدوة يلا

احجي ولازم ايده اجره للبيت، ملامحه حزينة بس ديحاول يقوي نفسه كبالي.

الاب: ميصير باباتي لشوكت نظل هيج خاتلين بلا اكل، حتى الطحين رح يخلص شناكل بعد؟

عقاب: بس بابا ..

قاطعني: يلا يحبيبي لتتعبني

نزلت راسي، مسحت دمعتي واخذت نفس وقويت نفسي، اذا ابويه هيج قوي ويحبنا عيب عليه اظل اتبجبج واتعبه

عقاب: مودع بالله باباتي، امي وبيري بعيني اخليهم لتخاف بس دير بالك ع نفسك

طبطب ع جتفي وكال بفخر ممزوج بالحزن: هذا وليدي الربيته

عقاب: انت الغالي

الاب: ما ندمان يوم سميتك عقاب، متاكد حتكون صلب وقوي ومترضى بالظلم.. مثله بالضبط

دنكت راسي بحزن ورجعت رفعته اباوعله بتمعن، اريد احفظ وجهه زين، يمكن بعد ما اشوفه..

مجرد التفكير بهالشي ديخلي كلبي يوجعني والغصة خانكتني، ابويه عامود بيتنا، ومن مات بيومها انهدم البيت ع روسنا كلنا.. فراك الاب شي مو سهل نهائيًا خاصة اذا جان هيج حنين ويداري جهاله، بوكتها ما كدرت اطلع كل حزني لان ما ردت امي واختي يشوفوني ضعيف، جنت كل يوم بالليل ابجي وحدي بفراشي بسكوت، حتى النفس جنت اخنكه حتى ليطلع ويفضحني..

ومن هذاك الوقت، اخذت عهد ع نفسي انو اخلي ابويه يفتخر بيه، لان ادري هو ديباوعلنا من فوك ..
وصرت اخذ من اسمي صفاته بالمضبوط، لحد ما صرت الانسان الي اني عليه اليوم، ولو بوفاة والدتي قبل كم سنة هم ضعفت، بس ما انكسرت، امي من راحت هدت حيلي كله هد، وخلتني حاير بزماني وية اختي ..

بس الله موجود وهو الوحيد الي ما تخلى عني، بوقت كل الدنيا والكرايب دارت وجهها.

واليوم اني انتهيت، اخر ذرة تحمل فقدتها، بيري مو بس اختي هاي بنتي الي ربيتها وكبرتها ع ايدي بتعب وسهر ومجهود.. هيج تروح مني! وسفةة..

كل شِدة مريت بيها كسرت بيه شي، واليوم اني مبقة مني شي صاحي، كلبي خلص ومشاعري ماتت، عائلتي كلها اندفنت جوة التراب.

ما اتصور اكو شي يستاهل الواحد يعيش علموده بعد، لذلك اني صفيت بس جسد، روحي ومشاعري كلها ماتت اليوم ودفنتها وية بيري.

كاعد يم كبر بيري الي صاير بصف كبر امي وابويه، عيوني حمر بس دموع ما بيها.. من كثر ما متألم وروحي متوجعة احس حتى الدمعة تخاف توكع مني.

قسورة: يلا يا عيني امشينا، كافي تعذب نفسك

عقاب: روح اني باقي هنا

قسورة: عقاب فدوة لتسوي هيج ترا اختك تتأذى من تشوفك هشكل

عقاب: وشبيه اني؟ كلشي ما بيه روح ومعليك

قسورة: بس ..

قاطعته بصوت مكسور: عوفني وحدي اريد اخذ راحتي ويه اهلي

قسورة: صار بس دير بالك ع نفسك، اني رايح

هزيت راسي بلا ما اباوعله، رحت كعدت يم كبر ابوية.

عقاب: ان شاء الله تكون راضي عني يابة، اني صنت الامانة وداعتك بس هالدنيا مدري شبيها ويانه.. جنكم ثكيلين عليها ومتريدكم.. انتظروني هاا.. مظل شي واجي يمكم، كلش اشتاقيتلكم ولله.

نزلت راسي وذبيت حسرة حركت بلعومي ورجعت اباوع ع كبورهم بالسرة واحجي بحركة كلب.

عقاب: الوجع الي بكلبي مينحمل، ماعرف شسويله ويخف.. مخنوك عبالك دا اتنفس من زرف ابرة..

ظليت اسولف وياهم واحجي الي ضامه بكلبي، اليوم اول ليلة تبات بيها بيري بالكبر، سوده عليه هي متحب الظلمة، تستاحش منها وتخاف هواي.

رجعت للفاتحة ثاني يوم، لان جنت بايت بالنجف يم بيري، ما ردت اعوفها وحدها هناك وهي اول ليلة الها.

جانوا عمامي الي بغير محافظة جايين، هه لو ما الفواتح ما نتلاكه اني وياهم.

من بعد تعب الفاتحة والي استمر يومين، طبيت للبيت اول مرة لان مجنت انام اصلا، مو بس لان عيني متاخذ نوم، هم لان ماريد ادخل للبيت..

البيت وحشة بشكل .. كلشي بي ميت وكل زاوية تذكرني بـبيري، هنا جانت تركص وهنا تغني، هناك تدرس وهناك تطبخ وهناك تلعب هي وصديقاتها، غمضت عيوني بتعب وتخطيت كلشي وكعدت ع القنفة وصافن، اريد افتهم شصار بيوم العملية وليش؟
من حزني مكدرت اركز ساعتها بس هسة بدت التساؤلات تضرب مخي. بيري طبت تسوي عملية زائدة، ليش ماتت؟
وليش الدكتورة جانت تحجي وترجف من طلعت من العملية؟

كلبي لعب من هسالفة خاصة انو بشهادة وفاة بيري كاتبين سبب الموت سكتة قلبية!
زين شنو الربط بين كل هالامور؟

خابرت قسورة الي عافني قبل شوية وحجيتله.

قسورة: مفهمت شتقصد ترا

عقاب: بيري يمكن ما ماتت بسكتة قلبية هيج من وحدها

قسورة: لعد؟ وضح عقاب ترا مدا اربط وياك

عقاب: المستشفى حكومي والكل يدري وضعه بالويل، بيري راحت لان متألمة وطلع عدها زائدة، ليش ماتت برايك؟

قسورة: قصدك الدكتور السوة العملية مالتها هو سبب موتها؟

عقاب: الدكتورة

قسورة: ابحث واردلك خبر، انت ارتاح واذا طلع صدك الحجي هيج فأني الها

عقاب: محد يحاسبها غيري قسورة، فتهمت لو لا؟ اختي الراحت ترا

قسورة:  ماشي

سديته منه متنهد، يا ويلج مني دكتورة اذا لبالي صح!
الا اندمج ع الساعة لدخلتي بيها كلية طب.

...

اماني

كاعدة بغرفة الدكتورات وصافنة، فكرة تجيبني وفكرة توديني.. اني قتلت روح!  شنو فرقي عن المجرمين؟ هاي بدال ما اكون سبب برجوعهم للحياة، ادزهم للموت بأيدي!

الايام الراحت وضعي بالويل، متحطمة للاخير واهلي يهدون بيه وخاصة بابا، هواي خاف عليه وحجة وي مدير المستشفى حتى يطلعوني من الصورة.
اني مجنت راضية بس هم جنت خايفة!

تيا: وين صافنة امونة؟

فزيت ع صوتها، باوعتلها بلا اهتمام ورديت.

اماني: هيج ماكو شي

تيا: استاذ حازم يريدج بغرفته

حجيت بعصبية: شيريد مني بعد!

تيا: روحي وافتهمي منه شمدريني اني

اماني: اللهم طولج يا روح.. ابتليت اني دخلت طب خو ما ابتليت..

تيا: اهووو هاي انتِ لسة تفكرين بهسالفة؟!

اماني: شنو من كلب عندج انت بس فهميني!

تيا: نفس العندج بس اني اشغل عقلي، بعدين احنه وظيفتنه تتطلب منه نكون هيج، مية مرة كلنالج البنية بكل الاحوال جانت حتموت، لان مرارتها منفجرة وملوثة داخل جسمها ومسببتلها تسمم بالدم، انتِ من كطعتي شريان بالغلط، ما سويتي شي غير انو عجلتي بموتها كم دقيقة وبس!

اسمع وساكتة وعاكدة حواجبي بقهر، كلامها صحيح بس اني مدا اكدر استوعب انو بسببي ماتت، يعني لو ميتة بالتسمم جان كلت ميخالف شي ما اكدر اتحكم بي، بس من كصيت شريانها وخليتها تنزف هنا اني موتتها!

اماني: لو جان دكتور احمد ملتزم بدوامه وموجود ساعتها، مجان صار كل الصار، وحتى جان من الممكن نتلاحك البنية وتعيش!!

تيا: هالحجي هذا كله ميفيد هسه، الصار صار وخلص تقبلي الموضوع

اماني: مستحيل انتوا بشر! مدا اتخيل كمية الحقارة الي عندكم!!! اني مستحيل ابقى هنا لحظة بعد، اني صوجي ظليت امشي ورا عاطفتي وسكتتلكم، لك الله ينتقم منكم كلكم انتو السبب!!

تيا: ديلا ولي عاد، الله ومحمد وعلي وياج 

هزيتلها راسي بوعيد وعيوني محتدة بغضب، اي رايحه بس مو قبلما افضحكم واحد واحد بس اصبرولي، وصلت حدها وياكم.

رحت لغرفة المدير حازم، دكيتها صاح تفضلي ودخلت كعدت.

حازم: والدج السيد رياض بلغني انو انتِ حابة تنقلين دوامج لغير مستشفى، وطلب مني بشكل شخصي امشيلج الشغلة

هزيت راسي واني ملامحي مغندبة، روحي تلعب منه هالكلب، لو لازم دكاترته جان متأذى احد.

حازم: بس اريد منج توقعين ع تعهد صغير

اماني: عفوا؟

مد اوراق كدامي وهو مبتسم، اخذتهن وشفت المكتوب وسعت عيوني بصدمة وكلت بعدم تصديق.

اماني: اكيد انت تخبلت، شنو هاي؟!!!

حازم: كم توقيع صغير منج يضمن رضا كل الاطراف، مثل متريدين تشردين بعملتج وتأمنين ع روحج، اني اريد ائمن ع نفسي وع المستشفى

حجيت بنفي: تحلم اسويلك هالشي تحللللللللم تسمعني لو لا؟ واذا عالنقل انقل وما احتاج مساعدة منك يا سيد يا محترم!

حازم بتحدي: نشوف يا بنت النائب النزيه والشريف رياض الرحمن والي معنده اي نقطة سودة بدفتر حياته

ضيقت عيوني: شنو قصدك؟

رجع جسمه لورا وانتجة ع كرسيه براحه.

حازم: يا ترى لو تسرب خبر للاعلام، بأنو بنت الدكتور رياض قتلت مريضتها بغرفة العمليات وابوها توسطلها يم مدير المستشفى حتى تتسجل حادثة الوفاة نتيجة سكتة قلبية، وبعدين حاول ينقل بنته لغير مستشفى حتى يبعدها عن الصار، برأيج شنو ممكن يصير؟ وشنو نظرة الناس لابوج بعد؟

ظليت اتصفن وممصدكة، اني شسويت بروحي وبأهلي؟ شهالمصيبة يربي دخيلك..

اماني: ابوية ماله علاقة بالصار!!! انتو اصلا بجميع الاحوال جنتو حتسجلون الحالة سكتة قلبية حتى لتنفتح عليكم بيبان ثانية مثل وين الدكتور الاختصاص؟

حازم: حجي يفيدج هذا، محد يصدكج والدلائل كلها ضدج

ضميت وجهي بايديه بنفاذ صبر، امتحانك صعب الهي..من جهة ابوية يموت اذا مس سمعته شي!  لان كلش تعب بحياته حتى يوصل للي هو عليه بلا ما احد يمن عليه.
ومن جهة ثانية اني ماكدر اوقع ع هالاوراق والي تديني بشكل تام وتحملني المسؤولية الكاملة بموت البنية!
شسوي يربي ...!

زفرت بحيرة، ابوية ماله علاقة يتأذى بسببي، وهو سوة ليكدرله حتى يحميني، وهسة صار دوري احمي، اي خلي اوقع احسن لان هي اول وتالي غلطتي.

وخرت ايدية وجريت الاوراق وقعت عليهن بدون ما اباوع بوجهه، كملت كمت اريد اطلع بسرعه بس هو كال.

حازم: اكعدي بالبيت بعد لتجين لحد ما اتصل عليج وابلغج.

باوعت عليه بعدم اهتمام، كمل درت وجهي وطلعت، بس وخرت من يمه تبدلت ملامح وجهي، اني شدا اسوي بروحي وليش وصلت لهنا؟ معقولة نيتي الطيبة وحبي لمهنتي هم سبب مصيبتي هاي؟! ما اعرف بس الك بيها حكمة ربي..

نزلت اتمشى بالحديقة وصافنة بأفكاري، منظر اخوها مدا يروح من بالي .. الله يساعده اكيد كلش متاذي عالصارلها..

كعدت ع وحدة من المصطبات وظليت اباوع للسما، واهسي بالطب راح، حتى ثقتي بنفسي انعدمت، شلون حـ سوي عملية بعد وشلون رح اتحمل عبئ المرضى ومسؤولية حياتهم؟ احس كلش غلطت بأختيار هالقسم ..

ماعرف اذا جان السبب اهلي او اني.. بس اني وعيت ع بابا دكتور وماما صيدلانية وحبيت هالمهنة من صغري واطبعت بأطباعهم.
صح هم جانوا دائما يكلولي نريدج دكتورة بس ما اظن هم السبب الوحيد لاختياري هالقسم.. اني ردته وردت اصير مثل بابا، تجاوزت كل مخاوفي وصفاتي العاطفية الي متفيد بهالمهنة يمكن!

....

عقاب

اليوم يصير 4 ايام بلا وجود بيري، ماعرف شلون اوصف شعوري بس كلشي صار باهت وفقد لونه، حياتي وضحكتي وكلشي كلشي.

الشي الوحيد الي متمسك بي كأداة اتخلص بيها من غضبي عالصار، انو تكون الدكتورة فعلا غلطانة!

كاعد بمكتب الحجي لان اليوم داومت، ما تحملت ابقى اكثر بالبيت.

الحجي: هي هاي سنة الحياة وليدي، كلنا ع هالطريق لا تضوج روحك ترا اخيتك هم ما ترضى هشكل، بعدين هي هسة يم رب العالمين الي هو احسن مني ومنك

عقاب: ونعم بالله حجي بس اني القاهرني غير شي

الحجي: شنو؟

عقاب: ما متاكد بس يمكن الدكتورة السوتلها العملية جانت سبب وفاتها، منتظر خبر من قسورة حتى اتصرف وياها

الحجي: وليش هيج تفكر؟

حجيتله وجهة نظري بالصار وشرحتله نقاط التعجب الي ببالي.

الحجي: ما دام مستشفى .... فاحتمال جبير كلامك صحيح

عقاب: غير اذا طلع صدك، اشرب من دمها!

الحجي: كول يا الله، ترا تكدر تقاضيها وتطيح حظ حظها وهيج حتأذيها اكثر

عقاب: بحثت ولكيت بالقانون هواي ثغرات تنطيها حماية بهيج حالات، اخلص شغلي بأيدي احسن

الحجي: ع شنو ناوي؟

عقاب: كل شر يابة.. كل شر وداعتك والا اخليها تندم ع الساعة لصارت بيها دكتورة

الحجي: الله كريم، اهدئ احتمال ميطلع الي ببالك صح

عقاب: ياريت، لان حتى اني ما اتمناها تعيش الي دا اخطط اله

ورا يومين بالليل،  كاعد اشرب ببيتي وعالك موسيقى، التجأت للشرب لان احس حينقذني شوية من التفكير المستمر، بس ما اشرب هواي حتى ابقى بوعيي.

ابويه.. امي.. اختي.. واحد ورة اللاخ ودعوا حياتي، وكل واحد منهم جان وجع فراكه بكلبي ما ينحمل!

دك تليفوني، قسورة المتصل، رديت.

عقاب: الو

قسورة: هلا حبيبي، جبتلك خبر بس ما ادري اذا تفرح او تحزن علموده

عقاب: عرفت شي عن الدكتورة؟

قسورة: الي ببالك صحيح خويي، تخشخش صاحبنا وعرف انو الدكتورة السوت العملية لاختك مو اختصاص، وهي مسببة نزيف لبيري ومكدرت تسيطر عليه فماتت

كلبي وجعني واني اسمع، اختي هم ماتت ضحية!
يعني ابوية ضحية الطائفية، امي ضحية حادث سير مجهول واختي بحادث طبي! مو هوايه هيج يربي؟!!

عقاب: عاشت ايدك سبعي

قسورة: تدلل ولو

عقاب: دزلي عنوانها وهالتفاصيل

قسورة: بس اني لسة موصلت للخبر الثاني

عقاب: الي هو؟

قسورة: الدكتورة اسمها اماني رياض

عقاب: ويعني؟

قسورة: اماني رياض الرحمن

وسعت عيوني بصدمة، هسة تذكرت وين شايفها! ببيت رياض يوم الرحت ويه الحجي.

عقاب: انت متاكد؟

قسورة: اكيد ولهالسبب تأخرت اصلا يلا رديتلك خبر

عقاب: استغفرك الهي..
فركت وجهي بحيرة

قسورة: ع شنو ناوي؟

عقاب: قبل لا اعرف بيها بت رياض جنت مخطط انحرها وافوخ كلبي، بس هسة مادري شسوي..

قسورة: انت تعرف الحجي يحتاجها مو؟

عقاب: اكيد اعرف بس قسورة كلبي غادي نار! شلون شسوي والمن اختار بس فهمني؟

قسورة: ولله حقك وصراحة موقفك هذا ابد متنحسد عليه

عقاب:  الحجي يدري؟

قسورة: لا، حبيت اكلك بالاول حتى انت تتصرف

عقاب: تمام عاشت ايدك

قسورة: مسويت شي، تريد اجيك؟

عقاب: لا اريد ابقة وحدي

قسورة: تمام دير بالك ع نفسك وفكر زين

عقاب: صار يابة

قسورة: مع السلامة

عقاب: الله وياك

سديته وظليت واكف محتار بزماني، ليش دا احس الدنيا كلها متفقة تأذيني؟ ليش؟ اني شسويت؟!
تمتحني بأعز شخص بقالي هسة.. بالحجي؟!

ركعت الكلاص بالحايط تطشر والكزاز ترس المكان، واني اباوع عليه بفراغ، كلبي هسة مثل هالكزازات صاير، مكسر تكسر وكل قطعة بي تجرح، يا ويل ليتقربلها!

صفنت، اذا كتلتها رح افوخ كلبي، بس رح اكون خيبت ظن الحجي بيه!
زين اذا كتلتها قابل كلبي التكسر يرجع يلتم؟ لو بيري ترجعلي؟ لو ألمي حـ يخف؟!  لا والف لا.
اجلت التفكير هسة، بالاول خ اشوف الحجي شيكول، واذا نكدر نستفاد من هالسالفة وبعدين اقرر شسوي بخصوصها.

دزيت رسالة لقسورة حتى يدزلي معلوماتها.. ثواني واجتني المعلومات كلها، كعدت اقرة، عمرها 29 يعني مو مبتدئة ومتعرف حتى تغلط!
اختصاصها قلبية، يعني لا يم الباطني ولا بصفه!! زين اذا هي مو اختصاص شكو سوت العملية! منو الصخم وجهه ودز عليها؟! 

ظليت الليل كله اتمحرك والافكار نخرت مخي نخر، ما صدكت اجة الصبح، بوجهي رحت للمكتب.

كعدت بمكتبي ع اعصابي، منتظر الحجي شوكت يوصل.

ورة نص ساعة اجوا سلمت عليهم والحجي فات لمكتبه، اما قسورة اجة يمي يهدي بيه وهم حتى يفتهم شقررت.

قسورة: رسيت ع بـر؟

عقاب: اي تقريبا

قسورة: شنو؟

عقاب: اشاور الحجي وافهمك شيصير

قسورة: زين تسوي، تدري للحظة عبالي حتكتلها ومتكول للحجي

عقاب: واذا سويت هيج، الي حق لو لا؟

قسورة: الك اكيد وما الومك، بس الحجي فضايله مغركتنا عقاب

عقاب: اعرف ولذلك تنازلت عن قتلها

قسورة: الله يحيي اصلك صاحبي

ابتسمت بخفة: تسلم تسلم

ورة شوية، فتت للحجي .

عقاب: فارغ يابة نسولف؟

الحجي: افرغلك وليدي تعال

سديت الباب وطبيت يمه كعدت.

عقاب: لكيت دليل ع الشغلة لردتها

تبسم وكال بثناء: سبببع !!

ابتسمت بتزييف ورجعت كملت.

عقاب: بنته دكتورة اماني، تداوم بمستشفى... هي نفسها الي سوت عملية بيري، وهم هي سبب موتها، وحاليا القضية طمطموها بيناتهم بس عندي تقرير الطب العدلي الاصلي، لان زوروه وطلعوا سبب الوفاة سكتة قلبية!

الحجي:  يعني طلعت صدك هي الكتلت اختك!

عقاب: اي يابة هي
حجيتها بأنكسار ودرت وجهي ع صفحة

الحجي وهو مبتسم: تدري شكد فخور بيك؟

عقاب: ادري بس شنو المناسبة؟

الحجي: علمودي خربت خططك، واني ادري شكد انت متحامل عليها عالسوته بأختك وتتمنى تعذبها، بس بموقفك اليوم كبرت بعيني، واثبتتلي انو تعبي وياك ما ضاع، وملحتي غزرت بيك.

عقاب: صدك جذب يابة غير انت الي خليتني اعيش بنعمـة ولميتني من الشارع

الحجي: لأنك خوش ولد وتستاهل الخير، الف الحمدلله من لكيتك، عقاب انت بمعزة ابني مو مجرد تشتغل عندي

عقاب: الله يشهد انت بمقام المرحوم واعز

للعصر، رحنه لبيت رياض بس هالمرة كلنا ثقة بالرد الي حـ يجي.
كلبي مقبوض ويدك بوجع، اليفصلني عن الدكتورة بس كم غرفة!
كعد الحجي وكالعادة دكتور رياض معاجبه.

الحجي: مشتاقلك يمعود لتحجي لتسأل شجاك

رياض: اني كم مرة كتلك لتجي لبيتي؟ انت ليش متفتهم بالحجي!!

الحجي: هاااا
سوة حركة بوجهه عود ضايج ورجع حجة بنبرة حزن مصطنعة : كولي اماني انقلت من المستشفى لو بعدها؟

انتفض ذاك ورد: شعليك ببنتي انت وتسأل؟

الحجي: عقاب الملف حبيبي
نطيتهيا ورجعت وكفت ورا، شمر الملف ع رياض الي احتدت نظراته بغضب من تصرف الحجي، والي سرعان ما تبدلت لملامح مصدومة بعد الكلام التالي.

الحجي: بنتك الدكتورة نهت حياة بنية بسبب غبائها وغلطها!! وبكل عين صلفة متوسط علمودها ومزورلها تقرير الطب العدلي وناقلها لغير مستشفى، عبالك هاهيه خلصت وانسدت السالفة؟ لا عيني غلطااان هاي صارت بايدي! لان البنية هاي تخصني دكتور!!

ضحك باستهزاء ع رد فعل رياض المصدوم وكال: هه.. هذا وانت خابصنه بنزاهتك، وتبيع مثاليات براسنه وهذا فاسد وذاك مرتشي، وانت طلعت اكبر مزبلة فساد!

رياض لم الاوراق الي وكعن عليه وقراهن وهو متوتر، ضحكت بتشفي.. لسة هاي البداية دكتورنا العزيز، اما الحجي فـ برد كلبي بحجيه.

الحجي: ها تأكدت بعينك؟

هز راسه بارتباك وملامحه فاضحته.

رياض: موافق انضم للحزب وياك بس بشرط لتفضح بنتي

ضحك الحجي ضحكة جبيرة مستهزءة، خلت رياض يتعجب ويغلي من الغضب والتوتر.

الحجي: توسل اول، بلكي افكر اشفق عليك

رياض: الله يخليك لتدخلها بمشاكلنا، مالها ذنب

نتر بي الحجي بعصبية واشر علية: لك قتلت اخت هالولد وشردت بلا متاخذ عقابها وبكل وقاحة تكولي مالها ذنببببب!!!!! شلون يصير الذنب بعد فهمني هاااااا؟!!!!

رياض: شتريدني اسوي اني حاضر، بس لخاطر الله لتأذوها

الحجي: انجب واسمعني زين

هز راسه بطواعية وفجر الحجي قمبلته الي صدمت الكل بما فيهم اني!

الحجي: تنضم لحزبي وبنتك تتزوج عقاب

رياض: ش..شنو؟!!! عقاب منو زواج شنو شدتحجي حجي حمزه!!!

الحجي اشرلي، بلعت صدمتي واجيت يمه كعدت وكال لرياض: سلم ع نسيبك الجديد اغاتي

....

-انتهى!

-لتنسون التصويت والتعليق حبيباتي 🖤🖤

-الى اللقاء قريبًا...

#الكاتبة نورمين 🖤