رواية خطأ طبي «عقاب الاماني» الفصل التاسع 9 - بقلم نورمـين

#خطأ_طبي «عقاب الاماني»

بقلــم : نورمين 🦋🖤

...

عقاب

دكتور توفيق طول يم الحجي، لوين يلا طلع، شافني ابتسم بغرور.

توفيق: انت عقاب ؟

بنبرة واثقة رديت.
عقاب: بشحمه ولحمه شخصيًا

هز راسه وضحك بسخرية، ضيقت نظراتي وواضح شكد مستصغره ولعبانة نفسي منه.

توفيق: سلملي ع اماني، وكوللها ابني امير يكول مشتاقين هوااااااي..

غضبت ملامحي ونظراتي وتقدمت بأتجاهه، اني ما اصيحلها بأسمها، هو منو لحتى يكول اسمها هيج لا ويحجي هيج حجي سخيف!
الحجي صار كبالي هزلي راسه بميخالف، تنهدت وحاولت اكتم غضبي، مسحت ع كتفه باطراف اصابعي وكتله بنبرة مستفزة.

عقاب: تشتاقله جهنم كول امين

رفع حاجبه بتعجب، رجعت كتله بتهديد واني اعدل قبوطه.
عقاب: اياك ثم اياك تفكر ولو مجرد تفكير بالدكتورة، ولتجيب اسمها ع لسانك مرة ثانية احسلك لان ساعتها حـيصير شي ميعجبك دكتورنا

باوع بنظرة معاجبه الكلام وراح، اني جنت اغلي من العصبية، منو هذا امير ادور؟ واضح كالها بطريقة مستفزة لحتى يعصبني! بس ليش وشنو غايته؟!!

الحجي: مو هيج الحجي يا بوية

عقاب: يابة مشفته شلون يحجي، خل يحمد ربه طلع يمشي ع رجليه، جنت ناوي اكسر رجليه هالكلب

الحجي: عقاب هذا جان حيصير عم اماني، حسب ما فهمت هو ورياض جانوا رح يتناسبون، ويزوجون امير واماني لبعض حتى تقوى العلاقة بين العائلتين

حسيت بشي حار صعد لمخي، الدكتورة جان عدها علاقة قبلي؟!! ليش ما كالتلي!!!

عقاب: وعلمود هالشي اجة؟

الحجي: لا بس الظاهر يعرف بقصتنا وية رياض وجاي يتوسط، تخيل عرض عليه فلوس حتى اتنازل عن وجود رياض بالحزب وهم حتى الدكتورة ترجع لبيتها

بأندفاع كلت.
عقاب: وفوكاها ما خليتني أدمي!!!

الحجي: مو كلشي ينحل بالضرب، انطيته الجواب ورفسته

عقاب: اي بس شنو هالجرأة هاي يابة!!

الحجي: عيش وشوف، هاي لا شيئ ترا، ومو ضروري تسوي عداوات ويه كلمن يغلط بحقك، اعرف شلون تفشله وتاخذ حقك بطريقة متخلي عليك لزمة، تدري هو جاي ومستقصد يستفزك حتى يرفع دعوة ضدك؟

عقاب: اللهم طولج يا روح.. يابة اني تدري بيه عصبي وما اكدر اتحكم بهالشي، من اعصب ماشوف كدامي بعد

الحجي: لا تشوف، والدليل بس شفتني هدأت

عقاب: اي مو انت معزتك تختلف فكلشي تريده انفذه حتلو جنت رح اموت

الحجي: اسم الله عليك بوية، اسمعني زين، العصبية ترا اول وتالي تضرك الك، مو زينه ع صحتك وهم توديك بتهلكة، وتخسرك هيبتك وصحبانك لان اليعصب يحجي اشكال وتالي من يهدئ يتندم، ماريدك توصل لهيج مرحلة، ولا عبالك سالفة شقاك البارحة ويه قسورة مشت عليه، مبين جنت معصب وممكن تريد تضربه، بس هو ما انطة بيك ودبر عذر حتى ليفشلك، يا حبيبي ترا مو كل الناس تقدر وتفهم طبعك مثلي ومثل قسورة، وهم اصلا ما مجبورين يتحملوك، خلي هالحجي ببالك، واذا صدك تعزني فلازم يحضرك بكل موقف يشبه موقف اليوم

جولت نظري بكل اركان المكتب من الفشلة، كلام الحجي رب الصح بس ياخي هذا طبعي، شلون اغيره مادري!

عقاب: صار يابة وهاي لخاطرك بس

الحجي: فدوة لراسك يابة بس لتكول لخاطري، الك وعلمودك هالحجي شحاط بجيبي اني قابل

باوعتله ومحتار شحجي، لساني ينبلع بهيج لحظات واظل اتصفن!

رجعت للبيت، الدكتورة ماكو دورتها بكل مكان ملكيتها، كلت بسلا شردت!
بقة عندي اخر احتمال هو غرفة بيري، فتحت الباب ولكيتها هناك صدك!
من شفتها شلون كاعدة ع فراش بيري وكامشة كتابها، حسيت نار وحركتني حرك.. رئسن صرخت بيها.

عقاب: منو سمحلج تفوتين هناااااا وتمدين ايدج ع اغراض اختي !!!!!!؟؟

فزت من شافتني وخافت.

اماني: م... مححـ..د

تقدمت عليها، لزمت ايدها بقوة وهسهست بحدة.
عقاب: دام محد سمحلج، شلون تتجرأين تطبين لهنا؟ انتِ ليا مرحلة من الحقارة تريدين توصلين بس فهميني!! اشنقج واخلص لو شلون بيج؟!!!

حاولت تجر ايدها مني بس مكدرت، جعدت ملامحها بألم وحجت.
اماني: ايدي عقاب دتأذيني...

عقاب: يا اذية هاي، ولج اني دا اموت، اموت! تعرفين شنو يعني اموت؟!! من اشوفج واكفة ع طولج احترك بناري، وهسة تخبلت من شفتج تفتشين بغراض بيري! ما عندج ذرة احساس، انتِ شنو من بشر!!!؟

نفضت ايدها مني وحجت بصوت عالي وهي تبجي وواضح عليها القهر.

اماني: انت شدتحجي هاااااا شدتحجييييي!!! لتحجي بهالاسلوب وانت متعرف اني شنو دا اعيش!!! كل يوم الصبح اكعد واني اتمنى يكون هذا اخر صبح يطلع عليه واموت واخلص من العذاب هذا بس ماكو... لك الانسان يموت مرة وحدة بحياته واني يومية اموت مية الف مرة!! وجع الضمير رح يكتلني من كد ما يأنبني، ولله ثم ولله ما مرت لحظة الا وبيري ببالي، وكل ليلة ما تغمضلي عين الا وزارتني كوابيس تخوف بسبب هالموضوع، مردت هيج يصير ولله، جان خطأ طبي خارج عن ارادتي! اسفة ومتندمة وعسى الله ياخذني وارتاح، بس كافي تعذبني كااافي!!!!! انت ع شنو دتعاقبني مدا افتهم!! و اني اصلا دا اتعاقب باسوء طريقة، البيه كافيني ولله ما ناقصتك.. ارحمني عاد...!

جانت تحجي ودموعها عشرة عشرة ع خدودها، كلبي رجف من كلامها ووضعها هذا، ماعرف شصار بيه!

ع اخر كلمة كالتها داخت ورادت توكع، كمشتها وشلتها حطيتها ع فراش بيري.

صرخت بوجع اريد كلبي يرتاح، احسه دينزف دم من كد الوجع..!
لوين تاليتي بهالمشاعر، لا اني لسمـا ولا اني لكـاع، وهالضياع والتناقض رح يكتلني.

كعدت بصفها وهي مغمى عليها، دنكت راسي وحاوطته بأيديه وظليت اعصر براسي بحيرة، شسوي شسوي رح اتخبل..!

عقاب: يااا الله!!!
حجيت بصوت مليان قهر وذبيت حسرة بألم، مخنوك لحد احس كل الهوا الي بالدنيا ما يكفي يترس ريتي..

انداريت عالدكتورة، شفت دموع تنزل من عيونها، رغم هي فاقدة الوعي!! جعدت ملامحي بقهر وعيوني حُمر دم.

عقاب: شنو سـرچ انتِ! شدتسوين بيـه ووين حـتوديني؟!

همست بحزن مخلوط بالأسف، شنو السر الموجود بيها، و الي يخليني بعز عصبيتي وخبالي اضعف تجاهها، برغم كل الوعود الي قطعتها لنفسي بأنو ما اتهاون وياها!

مديت ايدي مسحت دموعها برقة والألم كلما جاله يشتد بگلبي..!

...

اماني

كعدت دايخة وعيوني احسها تطلع نار، كمشت راسي المصدع وبلشت اتذكر شصار اخر شي..

حطيت ايدي ع رگبتي وكمت افرك بصدري، الوجع نايم ع كلبي وخانك صدري، لدرجة حتى التنفس استصعبه!

من شفت نفسي بغرفة بيري، دمعت عيوني مادري ليش..
عافني انام بغرفتها رغم كلشي .. شكد متناقض وصعب تحزرين تصرفاته هالـعقاب!

طلعت شفته كاعد بالصالة، مكتف ايديه ومغمض عيونه.

مشيت ع اطراف اصابعي حتى ما اطلع صوت واكعده، رحت غسلت وانداريت شفته واكف بنص المطبخ ويباوعلي بنظراته الي من يوم شفته وشافني هن بنفس الحدة.

عقاب: الموقف الصار قبل شوية ماريده ينعاد، مفهوم؟

هزيت راسي واجول بنظراتي داير مداير الغراض.
اماني: تمام ما اطب لهناك بعد

عقاب: ياريت.

دار وجهه واخذ جاكيته وطلع،  شربت مي وكعدت اخذ نفس شو الهوا جنه ماكو ..!

...

عقاب

رحت لقسورة للبيت، فتح الباب انصدم من شافني وملامحي متتفسر.

قسورة: ها يمعود خيرك؟

باوعتله بنظرة تعكس كل الحزن والالم الي بداخلي، طبينا لجوة.

قسورة: وكعت كلبي شكو ولك

عقاب: ااااخخخخ قسورة

قسورة: شكو خبلتني!

عقاب: تعبااان.. لدرجة كل عظمة بجسمي  تكول للثانية لا تنتچين عليه..

قسورة: هاي شكو ليش هيج!!؟

عقاب: اربعين بيري عكب باجر ..

قسورة: الله يرحمها ويصبرك

عقاب: ما ظل صبر ولا ظل عقاب ولا ظلت دنيا ..!

قسورة: كول يا الله، الله موجود والدنيا متوكف بموت احد، اي نتاذى وننكسر بس هي هاي حال الدنيا، خو ما نموت وراهم..

عقاب: بس اني متت!

قسورة: اسم الله عليك، عقاب افتهم حزنك وحالتك ولله ويمكن اني اكثر بشر فاهمك، بس ميصير هيج صدكني، يعني هسة انت عبالك بيري مكيفة وفرحانة من انت هيج تحجي وتتصرف؟ ترا الألم والبجي يخلي الميت يتعذب بكبره، انت ليش دتعذبها خطيه؟!

عقاب: مو بيدي قسور... الوجع اكبر مني ومن حد استطاعتي.

قسورة: ماكو هيج حجي، الله ما خلاك بهيج موقف الا وهو يعرف انت قوي و كده ورح تتخطاه

عقاب: ولشوكت عود؟

قسورة: ظلت يمك بعد، شهر، عشر شهور، سنة، سنتين تلاثة عشر سنين المهم تتخطاها

عقاب: اجي وياك، لنفرض صار مثلما كلت، انت كل عقلك من اتخطاها رح ارجع طبيعي ولا كأنو صار شي؟!

قسورة: اكيد لا، كل معركة نخوضها بهاي الحياة نطلع منها خسرانين شي، بس مو هذا المهم، المهم انو نطلع منها منتصرين

عقاب: بودي اصدك بحجيك هذا، بس اني طاب حرب ادري بروحي خسران كلشي بيها واولها روحي!

قسورة: كافي تفكر بسوداوية، عقاب شوية اتفائل وخلي عندك امل بباجر احلى!

عقاب:  اني الغرگان ببحـر اليأس، والمحترگ بنار الفراك، عن يا امل وتفاؤل تحجي، انت ولله بطران!

دخنتلي جكارة وقسورة يباوعلي وساكت، شيريد يحجي اكثر من الحجي الكاله، بس هاي اني وهاي قناعتي متتغير.

رجعت للبيت بالليل، كمت اكره اطب للبيت ع كد ما اتنكد واعيش لحظات اضطر بيها اعيش صراع وية نفسي.

جانت الدكتورة بالصالة، تجاهلتها وبوجهي للغرفة، اخذت منشفة وطبيت اسبح.

وكفت جوة المي البارد، الدنيا شتا والبرد يكرص بس ما همني، اريد النار الشابة بيه تطفة وبلكي هالمي المثلج يطفيها!

كملت، لفيت الخاولي ع خصري وطلعت، رحت للمطبخ احضرلي كوب كهوة، جانت الدكتورة دتسوي عشا.

اماني: دا اسوي اكل، عوف الكهوة

بدون ما اباوعلها رديت.
عقاب: شكرًا ماريد شي

اماني: مو زين عليك تظل هيج بلا اكل، ومخلصها بس جكاير وكهوة

التفتت عليها، ابتسمت بخبث.
عقاب: وانتِ شعليج؟

اماني: ش..شنو شعليج فوك ما مهتمة بصحتك؟

عقاب: محد طلب منج تهتمين

اماني: هو هم صوجي ..
همست لنفسها بضوجة، رحت عليها وهي استحت.

عقاب: عيدي شكلتي؟

اماني: البس ملابسك شنو انت متستحي تطلع كدامي هيج

حصرتها عالكاونتر واباوعلها وحاصرتني ضحكة ع ملامحها، صارت حمرة من المستحة.

عقاب: ليش استحي انتِ مرتي، وعادي اطلع بالخاولي او بدونه حتى

فكت عيونها بصدمة، كوة لزمت ضحكتي وظليت متمسك بقناعي الثابت.

اماني: لا مو عادي، هم فد مرة شفتني افتر كدامك بالخاولي بحجة رجلي؟

عقاب: لا بس عاجبني اشوفج، ليش متسويها؟

خزرتني وضربتني ع صدري.
اماني: فاسد

ضحكت ع حجايتها وهي استغلت الفرصة وشردت، لزمت ايدها وكلتلها بخبث.

عقاب: حسبي منا ل3

باستغراب ردت.
اماني: مفهمت، ليش احسب؟

عقاب: حسبي ومعليج

اماني: واحد ..
حطيت ايدي عالخاولي

اماني: ثنين..
هديت ايدها، فتحت الخاولي عن خصري بس ظليت لازمه بأيدية، هي من شافت هيج تبسمرت بمكانها من الصدمة والخجل.

عقاب: اذا انتِ بت ابوج كولي تلاثة
ابتسمت وكلتها.

شافتني هيج وهاي خلت وشردت، ضحكت من كل كلبي ع ردة فعلها اللطيفة..!
ماعرف ليش هيج سويت، او شنو هالتحول الغريب بمزاجي من شفتها!

رحت وراها للغرفة.

اماني: عقاب استحي عاد، عيب عليك هالتصرفات

عقاب: لا بلا؟

اماني: داحجي جديات ترا مدا اشاقة وياك

عقاب: ليش منو كلج دا اشاقة وياج اني؟

اماني: لعد شكو تلحكني وكلساع تريد تنزع كدامي

عقاب: عابت لهالحلك.. فوك ما كاعدة بغرفتي جاية تبيع اخلاقيات براسي

اماني: هاي غرفتي مثلما غرفتك

عقاب: اهاا، لعد ظلي معندي مانع اني

فتحت الكنتور، طلعتلي تراك ورحت عالجرباية حطيته، اريد اوخر الخاولي وهاي طفرت وسرعتها اسرع من السرعة نفسها، هزيت راسي مبتسم ع تصرفها..

بدلت ورحت شربت كهوتي وهي جانت تتعشى، رجعت وتمددت افكر بردة فعلها قبل شوية والابتسامة مرسومة ع وجهي بدون شعور مني، هزيت راسي نفضت الافكار منه وغمضت عيوني بمحاولة فاشلة للنوم.

شوية وطبت تمشي ع كيف حتى لتكعدني، حسيت عليها بس ما فتحت عيوني، وكعت مزهرية بالكاع شلت راسي باوعتلها، الاسف واضح بوجهها.

عقاب: وتالي وياج؟

اماني: ما انتبهت وكعت وحدها

عقاب: استغفر الله..
تنهدت ودرت وجهي عنها، اتخبل من تكلي ما انتبهت او ما اقصد!

..

اماني

هسة هي مزهرية قحط قابل، شبي يستغفر وينافخ !
رجعت جبت مكناسة حتى الم الكزاز، لميته وطلعت، ذبيته ورجعت للغرفة.

جان مسوي روحه نايم، وكفت كدامه.

اماني: عقاب

ماكو رد

اماني: ادري بيك ما نايم، اكعد
ماكو رد

اماني: عقاااب

فتح عيونه ويباوعلي بنفاذ صبر.
عقاب: شتريدين من صخام؟

اماني: حشاك

عقاب: اني قابل معليج، احجي

اماني: اريد ارجع للدوام فدوة

عقاب: بربج؟! روحي نامي بابا

اماني: لتكول بابا اني مو طفلة هاي اولًا، وثانيًا اريد ارجع لشغلي وانت ميحقلك تمنعني

باوعلي بتحدي، رفع حاجبه وكال.
عقاب: ميحقلي مو؟!

محجيت شي بس حسيت روحي جفصت، هذا لازم احسب حتى الـ 'في و من و على' من اسولف وياه.

عقاب: من تريدين شي اطلبي بأدب، الدكتور ما معلمج؟

بضجر كتله.
اماني: كافي تحطه بكل سالفة بيننا لخاطر الله

عقاب: روحي من وجهي

اماني: مو بكيفك!! اريد ارجع لدوامي افتهم! دا اضوج وحدي بين اربع حيطان طول اليوم

عقاب: حجاية وحدة وما اعيدها، روحي من وجهي كلت!

حجاها بنبرة تخوف ونظراته رعبتني، فلتت لمكاني بس ميتة قهر، ليش ميقبل ارجع لدوامي!!! ليش هيج قاسي واسلوبه ينرفز!!

حطيت راسي عالمخدة، ضلوعي توجعني من نومة الكاع ممتعودة عليها، وادور البرد فوكاها افففف.

بدون ما احس، طلعت مني الأفففففف بصوت عالي، فعقاب كال بنفاذ صبر.

عقاب: انخمد اليوم لو شلوننننن!!!!!!!!

حضنت المخدة لصدري وسكتت، انخمد عيني منو لازمك.

....

عقاب

صار يوم اربعين بيري وسيناريو الحزن والقهر انعاد عليه كله، ادمرت لمن اجة هاليوم، يعني هاهيه طلع اربعينج حبيبتي! رحتي مني وهذا صار واقع مو حلم!

عذريني حبيبتي ما اكدر ازورج بكبرج اليوم، لان اخذت عهد يمج ذاك اليوم انو ما ارجع الا واني ماخذ حقج ..

وزعت ثواب على روحها وجانوا وياية الولد جماعتي، كرايبي ما وصل احد منهم، والحمدلله.

شاهين: كملت توزيع ع كل الفرع

ضرغام: اني هم كملت

قسورة: بقن عندي بس ثنين سفريات مادري المن انطي بعد واخلص منهن، هاكم اكلوهن وخلصوني منهن

ليث: جيب جيب!!!

عقاب: اني هم مظل عندي شي، بس حصة ست عذراء

طفروا ضرغام وشاهين.
ضرغام: جيب اوديها

شاهين: ليش انت، خو اني اوديها

قسورة اشرلي بشكو، سويتله بحواجبي بمعنى بعدين.

عقاب: لا انت ولا هو، قسورة انت وديها

شاهين: لك لاا لصير حقير

عقاب: نجب ادبسز

ضرغام لحك قسورة بحجة يسولف ويا، صحته رجعلي.
عقاب: ضرغام تعال

اجة يمشي وعلى وجهه علامات الاحباط، وكف كدامي، حطيت ايدي ع جتفه وحجيت وياه.
عقاب: ذني السوالف خيولن، اكرصها واكعد

ضرغام: مو شتاقيتلها ..

عقاب: شحجينه احنه؟

شاهين اجة من ورايه.

شاهين: عقاب ترا مو عدل هذا خلي نشوفهن هسة انت شخسران

تنهدت ورديت.
عقاب: احجي عدل لك شتشوف شكلولك عليهن!!

ضرغام: مو هيج قصده، بس يعني صدك خلي اشوف حبيبتي شبيك قفلت

عقاب: حبتك حية ام راسين منين اجتك حبيبتك!

ضرغام: تجي تجي معليك

رفعت حاجبي بشك.
عقاب: مسوي شي مادري بي انت وهالمطي؟!
اشرت ع شاهين.

شاهين: لتخاف ممسوين شي، بس رايديهن بالحلال وجنة نريد نكلك حتى نفتح الموضوع وية الحجي ويخطبهن النه

رفعت حواجبي مستغرب.
عقاب: تحجون صدك؟

ضرغام: اي لعد شعبالك نبصبص ونلعب!

عقاب: عبالي هيج ولله، ما توقعتكم جديين لهدرجة

ليث: وكلها تزوجت.. ظليت بس انةةةةة .. وكلها تزوجت

ضحكت علي، كامش الماعون السفري مال الثواب ويهوس وحلكه متروس اكل، اجة قسورة بهالاثناء.

قسورة: منو الكلها تزوجت، هو بس عقاب افندي

ليث: غلطااان، ذولة الزوج هم حيركبون القطار

قسورة بصدمة: تتشاقة!! صدك ولله؟

باوعلي رفعت جتافاتي بحركة معناها مادري، باوع ع شاهين وضرغام الي مسوين تعابير غرور بوجههم.

قسورة: ومنو الي الله غاضب عليهن وحيورطهن بيكم؟

ليث: جيران عقاب، ذني التركمانيات الصاكات

شاهين & ضرغام: نجببببب لك

ليث: هاك شوف

ضحكنه اني وقسورة.

قسورة: واني اكووووووول كتلوا روحهم يريدون يودون الثواب هم لبيت المعلمة!!

عقاب: لعد شعبالك كاتلهم الثواب مثلا

قسورة: ايا سرسرية بس هاي من شوكت شنو منو ياهوة احجولي بالتفصيل، بعدين انت عقاب شلون متكلي؟

عقاب: شحجيلك وهم جانوا مثل البريعصية يفترون ورا البنات من جانوا يحرسون بيتي

ضحك شاهين وكال.
شاهين: ضرغام تتذكر من دكينة الباب عليهم بحجة نريد جاي وعقاب ميفتحلنا باب بيته

ضرغام: ههههههههههاي ليش هو هالموقف ينسي، كفيلكم الله خلصنه القوري كلساع داكين باب بيتهم بحجة نريد بعد

شاهين: ههههههه واخير شي امهن اطتنا القوري كله حتى تخلص

قسورة: حجي بيناتنا غير، اختياركم فد شي واني عبالي ذوقكم سزز

عقاب: لا يا ادبسزززية!
منين الزمهم بعد فلتوا وواحدهم لسانه شطولة!!

ليث: ولله حلو الحُب، شوكت الله يچبحني بحبيبة حلوة تحبني واحبها

قسورة:  من تعوف الاكل وتشوف دربك زين

ليث: ضحكت عليكم كلكم، اصلا اني مرتبط وعندي حبيبة من زمان كلش

رفعت حواجبي بتعجب، شو كلها صارت عاشقة وعدها حبيبة ع غفل!

شاهين: منية ومن شوكت ولك!

ليث: عشق منذ الطفولة اني والدولمة

قسورة شمره بالجفجير الي جنه نصب بي وكال بأنزعاج.
قسورة: ساقط واني عشت اللحظة عبالي صدك

ليث من بعيد يضحك علينا ويحجي.
ليث: ههههههه ولكم كل عقلكم انطي مشاعر الحُب مالتي لبشر؟!!! ليش والاكل وين راح؟!

غسلنا الكدور وخليناهن ع صفحة ينشف ميهن، الولد راحوا بقة بس قسورة يمي، الدكتورة جانت بالبيت ما سمحتلها تطلع، هه واصلا بيا عين تطلع!

وكفت اصلي، وهديت ركعتين لروح بيري، كملت وطبيت لغرفتها شفت غراضها وصورها معلكات، دمعة نزلت ع خدي من كثر الحزن الي تجمع بصدري بهاللحظة..

هسة يلا صدكت اني وياج متجمعنـا بعد هالدنيا ..!

طلعت مناك بعد فترة، جان قسورة ديحجي وية الدكتورة عن اختها.

قسورة: ها يعني هي متخرجة؟

اماني: اي خريجة قسم اشعة وسونار بس لسة ما تعينت

قسورة:  شعجب ليش ما يشغلها الوالد ع عرفه؟

اماني: بابا عرض عليها تشتغل وياه بالمجمع مالته بس هي متريد، تكول لاحكة اشتغل خلي اتونس فترة وعود بعدين الله كريم

قسورة ابتسم وهمس: وربي تفتهم

اماني: ها؟

عقاب: ووجعا

بهتت بوجهي، ادور دارت وجهها وراحت للغرفة.

كعدت عالقنفة ورجعت راسي لورا، اخذت شهيق وطلعت زفير، حسيت ع قسورة كعد كبالي.

قسورة: شبيك وياها؟

عقاب: مالك علاقة

قسورة: تمام، انت شبيك؟

عقاب: هم مالك علاقة

قسورة: الله يرحمها حبيب، هونها تهون!

عقاب: ما اهونها ولا اريد تهون

قسورة: انت شتريد بالضبط فهمني؟ ترا تاهت عليه

صفنت بوجهه، شنو اريد اني؟

عقاب: حق اختي

قسورة: رح تاخذه لتخاف مظل شي، راح الهواي وبقة القليل

عقاب: ان شاء الله ..

مو هذا الجواب الي جنت اريد اكوله.. مو هذا!!

....

-انتهى!

-لا تنسوا التصويت 🖤

-الى اللقاء قريبًا..

#الكاتبة نورمين