رواية خطأ طبي «عقاب الاماني» الفصل الثامن 8 - بقلم نورمـين

#خطأ_طبي «عقاب الاماني»

بقلــم : نورمين 🦋🖤

...

اجة الحجي ع صوتي، من شافنا هيج عاط بينا بعدم رضى.
الحجي: هاي شدسوون ولكممم!!!

هديت قسورة وتنهدت، الف لعنة عالشيطان اني شداسوي بصديق عمري!؟

قسورة باوعلي ورجع باوع للحجي وكال.
قسورة: ماكو شي يابه دنشاقة

باوعلنا الحجي بشك وتقدم يمنه.
الحجي: حتى بالشقة، لتتعلمون واحد يمد ايده ع اللاخ، لان الشقة يمحي الاحترام، و مرات يكلب جد وهنا حتصير مشاكل بينكم الها اول مالها اخر

عقاب: صحيح كلامك يابه وان شاء الله ما تتكرر

قسورة: متنعاد يابه، نعتذر

هز راسه وعافنا وراح لمكتبه، ادري بي ممصدك بسالفة الشقة بس عبرها بمزاجه حتى ليفشلنا.

كعدت بمكاني وباوعت لقسورة بندم.
عقاب: لتاخذ بخاطرك مني، مدري شجاني

قسورة: نجب لك مو بيننا هالرسميات

ابتسمت ورديت عليه بسخرية.
عقاب: ها مو اكوله للحجي دتشاقيني وتغلط عليه؟

رد عليه بنفس الاسلوب.
قسورة: حتى اكوله تمد ايدك عليه وتعذبني يا قاسي يا عديم الضمير، شنو ولد العالم لعبة بايدك؟!!

ابتسمت بشرود، اجتي ببالي الدكتورة من تكول اني مو لعبة بأيدك، رفعت راسي شفت قسورة ملامحه جدية.

اشرتله بعيوني بشكو، ابتسم بتزييف بعدين ذب حسرة وكال.
قسورة: لا هيج بس تذكرت محد يطلع وراي حتلو ذبحتني لان اصلا معندي احد

حجايته أذتني، اني مثله هسة معندي احد فأعرف بشنو ديحس.
عقاب: لعد اني وين رحت ابن الكلب؟ لو الحجي مال اخوية وعضيدي طلع بس صبغ

قسورة: اكلك ترا انت ولله مطي، يعني تذبحني وترد تفزعلي، ترا ماكو ربط

عقاب: ايا سرسري..
ضحكنا، بس كل واحد همه واضح بعيونه، وبضحكته المزيفة.

.....

اماني

صار الصبح واني منمت نومة عدلة، بس اتكلب وكل شوية افز، ممرتاحة وبالي وگلبي مشغولات بالتفكير بعقاب.. شلونه هسة يا ترى؟!
معقولة يكون مر بتجربة المصح النفسي لذلك يتخبل بس اذكرها؟
زين اني من شوكت اهتم لشخص اني موجودة بأخر قائمة اهتماماته.. هاي اذا جنت موجودة بهالقائمة اساسًا..!

عالريوك، البنات وامهن جانن حاطات كاهي وعسل واجبان، المنظر والريحة تشهي بس نفسي مسدودة.

جنات:ليش متاكلين مون؟

عذراء: اي حبيبتي شنو بسلا متحبين الجبن؟ اسويلج بيض؟

اماني: لا خالة شكرًا بس اني ما اشتهي من الصباحيات

عذراء: براحتج بس انتِ دكتورة وتعرفين الريوك اهم وجبة باليوم، لازم ما تهمليها

اماني: صحيح بس شسوي، متعودة هيج

شربت چاي بس، هن كامن يبدلن وحـيروحن للدوام، كلت خ ارجع للبيت بعد كافي.

شكرتهم وودعتهم ورجعت للبيت، وصلت يم الباب تذكرت ما عندي مفتاح، والمفتاح الاحتياط قسورة البارحة قفل البيت بي واخذه، غميت روحي ع هالنسـيان، ادور لا بيه ارجع لبيت ام جنات ولا بيه انتظر هنا لان موت برد!

شسوي شسوي، معندي تليفون ومحافظة رقم عقاب اصلا!! شهالوضع المأساوي الي اني بي يربي..!!!؟

رجعت لبيت ام جنات، تفاجئوا من شافوني، ابتسمت بتزييف احاول اضيع فشلتي بردة فعلهم.

عذراء: ها دكتورة محتاجة شي؟

اماني: خالة ممكن تلفونج شوية، نسيت اجيب مفتاح البيت ويايه والتلفون جوة

ميقات: شلون نسيتي ولج

حكيت مؤخرة راسي بتوتر.
اماني: صارت بعد لان جنت مستعجلة

عذراء: اي عادي تصير تصير، هاج هذا حبيبتي

ابتسمت بأمتنان.
اماني: شكرا هواي

عذراء: ع شنو، يلا يلا اتصلي

هزيت راسي واخذت التلفون وطلعت بالحديقة، بيمن اتصل يا ترى؟!!
دورت بتلفونها رقم عقاب ماكو، ملكيت احد اخابره غير ريما.

كتبت رقمها ودكيت عليها.
اماني: الوو ريري؟

ريما: مون هاي انتِ؟

اماني: ليش منو يصيحلج ريري غيري؟
ضحكت وحجيتها.

ريما: ههه بس انتِ، شلونج شعجب اتصلتي؟

اماني: تكدرين تجيني؟

ريما: وين؟

انطيتها العنوان، حجت بفرحة ممزوجة بالصدمة.

ريما: وباتمان مالتج يقبل؟

اماني: مادري بس تعاي والله كريم

ريما: مسافة الطريق واني يمج

اماني: تمام انتظرج

سديته ورجعته للمرة وشكرتها، كعدت بحديقة البيت، موت برد والقهر ياكلني، عود هي هم حالة هاي؟ لا تلفون لا مفتاح بيت لا فلوس، بلا صار شي مستعجل شلون بيه؟ اظل انتظر حضرة جنابه شوكت يرجع؟!

شوية ووصلت ريما، اجتي ركض حضنتني.
ريما: مشتاااااقتلججججج

دفعتها وحجيت بسخرية.
اماني: علساس صار سنة ممتشاوفين، اول بارحه التقينا ترا

ريما: ها هيج صارت؟ لعد شكو خابرتيني وكلتيلي تعالي؟!!!

اماني: مادري شلون ابديها وياج

ريما بعدم فهم.
ريما: هي شنو؟!!

اماني: البيت مقفول ومعندي مفتاحه

ريما: تحجين صدك انتِ؟

اماني: كعدتي بهالبرد شتوضحلج؟

ريما: زين خابري خ يجيبلج المفتاح

اماني: معندي تلفون

صفنت بوجهي، متعجبة ع برودي بالرد ومن الموضوع كله اساسًا!

ريما: لعد بيمن خابرتيني؟

اماني: بتلفون مرة جيراني

ريما: زين ليش مخابرتي منها؟

اماني: محافظة رقمه

بهتت بوجهي واني منطية تعابير باردة، تعبت امثل لعبت نفسي.

ريما: تحجين جد لو شنو ترا مدا استوعب، شلون تكولين ذاك اليوم علاقتج بعقاب زينه وانتِ العكس مثلما دا اشوف!

اماني: هاي الحقيقة اختي العزيزة، هاي حياتي ويا عقاب، لا تلفون لا طلعة لا نقاش لا دوام لا كلام، كلشي عنده ممنوع

ريما: دافنج بالحياة هذا!! اماني ليش محجيتي هالحجي من سألناج اني وامي لعد؟

اماني: واخلي امي بالها عليه؟ تؤ تؤ

ريما: لعد زينة حالتج هاي؟ مون ليش متقبلين نساعدج احنه مو اهلج؟!!!

اماني: متكدرون تسوون شي، لذلك تشوفيني ساكتة ومتقبلة الوضع كما هو

ريما: الى متى!! لشوكت تظلين هيج كاتمة بگلبج؟ واصلا ع شنو باقية وشنو نهايتج انتِ وياه!!!

ابتسمت بحسرة.
اماني: من اعرف عود اكولج

سكتت وملامحها تحجي كمية خوفها عليه، مادري اذا صح السويته من حجيتلها او لا، بس الاعرفه انو اني محتاجة احد يسمعني واني احجيله، احس كلبي رح ينفجر ع كد ما كاتمة بي.

تنهدت بتعب وكالت بجدية.
ريما: امشي وياي

بتعجب سئلت.
اماني: وين؟

ريما: لتخافين، نكعد بمطعم صخام ع ما يجيج الافندي.

انسب حل خو ما اظل هنا بالبرد، هزيت راسي ورحت وياها، كلبي ديدك سريع لان عقاب منعني من الطلعة، شيسوي اذا عرف؟!
اوي واني شكو دايرتله بال، شيسوي خ يسوي، بعدين الصوج منه واني بهالحالة مجبورة، ماله حق يحجي حتى!

دفعت افكاري وقلقي عليه بعيد عن زاوية تفكيري حاليًا، وسؤال ريما يدك ببالي، شنو نهايتي اني وعقاب؟!
ابد مسائلته هالسؤال، ولا خاطر ببالي اصلا، بس هسة دياخذ حيز جبير من عقلي، بحيث دا انسج ببالي افكار وسيناريوهات محتملة للموضوع!

...

عقاب

كملت دوام من وكت، طلعنا اني وقسورة للكهوة، نزلنا نراكيل وكعدنا ندخن.

قسورة: يعني هذا قرارك الاخير؟

اخذت نفس عميق من النركيلة، ورديت بعدما طلعت الدخان كله من صدري بكثافة.
عقاب: اكيد وما بي رجعة بعد

قسورة: فكرت زين؟

انداريت عليه، رفعت حاجبي وكلت بشك.
عقاب: ليش كل هالاسئلة، اكو شي؟

قسورة: لا بس ماعرف.. احسك تسرعت

عقاب: هو هذا الي لازم يصير

قسورة: الي تشوفه ..

عيوني لمعت بألم، صعب من تحجي شي وتمثل شي، والي بداخلك شي ثاني مختلف.
اصعب شي بالدنيا هو التناقض.. من تريد تبتعد بس بنفس الوقت عاجبك تقترب، من عقلك يكولك لا بس گلبك يكلك اي، وما بين المشيتين تضيع ومتعرف انت شتريد بالحقيقة!

نفخت الدخان بتعب، وعيوني تباوعله بتمعن، ياريت لو اكدر امسح كلشي بداخلي واطيره بالهوا مثل هالدخان وارتاح، ياريت!

..

اماني

ما قبلت اروح لمكان بعيد عن البيت، كعدنه بمطعم قريب عالبيت اكلنا، وريما ما سكتت، سولفتلها كلشي صار بيني وبين عقاب ما عدا من هددني بيهم.

ريما: شنو لمخليج تبقين وياه؟ احجيلي!

اماني: الخطأ الطبي

ريما: بابا يكدر يحله الج قانونيًا ومتتحاسبين

اماني: ماريد، اريد اخذ عقابي عالخطأ هذا

ريما: انتِ صاحية؟ عقلج وين راح اماني شبيج اصحي؟!!

اماني: ريما بس تعيدين حجي بهالموضوع اعوفج وارجع، كافي!

ريما: ونبي مو صاحية، تخبلتي انتِ

اماني: اي ولله تخبلت، عوفيني بحالي عاد

درت وجهي عنها وشربت عصيري، دك تلفونها ردت.

ريما: ها بابا.. وية اماني اني شوية واجي ما اتأخر.. اي زينه ليظل بالك.. تمام يوصل باباتي، الله وياك

سدته وباوعتلي بتأنيب.
ريما: بسببج كمت اجذب ع بابا

اماني: وين الجذب اني صدك زينه

ريما: الحجي ضايع وياج اسكت احسن

اماني: اي ولله ياريت

درت وجهي عنها، اني بيا حال وهاي وين تحجي..!

..

عقاب

رجعت للبيت ووياي قسورة الي شمر سيارته بالغسل، من فتت عالشارع الي ورا بيتنا شفت الدكتورة ووياها ولد واكفين يم باب مطعم ويحجون وهي تتمضحك وياه.

عقل ما ظل براسي من شفتها!
هاي شجابها لهنا؟ ومنو هذا لوياها؟! اني مو منعتها تطلع!!!

وكفت السيارة ونزلت فاير وقسورة ورايه يصيح.
قسورة: يمعووووود عقاااب اوكف!!!

بس اني ماشوف ولا اسمع بعد، رحت عليها جريتها وصحت بصوت عالي.
عقاب: شدسوين هناااا؟ ومنو هذاااا؟!!

جانت مرتعبة.
اماني: بس اسمعني، اجيت اني وريما..

قاطعتها: واذا انتِ وتبنننننننن؟!!!!!!! منو سمحلج تطلعين، اني شكايل؟ مو كايلج ماكو طلعة!!!!

قسورة: عقاب مو هيج، ع كيفك

حجة الوياها.
-وانت منو واجيت نافخ روحك علينا؟!!

خاف اني اريد اعوفه، هسة هو خلاني اطلع خبالي بي!
جريته وذبيته بالكاع، ضربته بوكسات خليت خشمه يطك دم ووجهه يورم، واني احجي بغضب واضرب بكل قوتي، وين ما تجي ايدي هذا هو.

عقاب: ولك اني منو!!! انت الي منووووو يا كلب يا ساقططططط!!!

ما خلاني قسورة افوخ كلبي منه، وخره واماني طول الوقت تصيح وتكولي لا عوفه.

جريتها للسيارة والشرار يتطاير من عيوني، شفت اختها طلعت من المطعم وانصدمت، عفت قسورة وياها ورحت.

الطريق كله تبجي والخوف واضح عليها، بس اني عيوني انعمت من العصبية، بس اريد اوصل للبيت واعلمها شلون تخالف اوامري!!

وصدك وصلنا، نزلت وهي هم نزلت تتراجف، فتحت البيت طبت كدامي، سديت الباب ورحتلها، وكل غضب الكون متجمع بيه بهاللحظة.

عقاب: شسوين طاااالعة؟؟!!!!!! اني شكلت ولججججج شحجييييييت؟؟

اماني بخوف : م..مجان عندي مفتاح البيت

عقاب: مو عافج قسورة ببيت المعلمة، شسوين طالعة منااااك؟ جان ظليتي هناك لحد ما اجي وافتح الصخام وكعدي

اماني: طلعن عدهن دوام خو ما ابقه وحدي ببيت العالم!

سكتت وفركت وجهي بعصبية، وظليت اروح وارجع بالصالة.

عقاب: تبقين هنااااا كاعدة ومتتحركين لراس الشارع ويا ويلج اذا انعاد هالموقف!! بعدين تعالي منو هالكلب الجان يمججج؟!!!

اماني: وانت شبيك مهتم منو ميكون يكون، مالك علاقة بيه، تفتهم شدا احجي لو لااااا، مالك علاقة بيه انتتت!!!!!!
جانت تصرخ وتبجي، كلامها زيد غضبي اضعاف، كمشت حنجها بقوة وعصرت وجهها بين ايديه

عقاب: انتِ مرتيييي!!!! وغصبن عليج تحترمين هالشي وتصونين نفسج وسمعتج لانج مرة متزوجة هسة!

اماني: زواج ايش هذا!!! مجرد توقيع عالورق عبالك اتفاقية، متكدر تكول عنه زواج حتى
جانت تحجي بحرگة گلب واني ابتسمت بخبث.

عقاب: يعني تريدين يصير الزواج حقيقي مو!! تعاي نسوي حقيقي ولا يهمج

هزت راسها بلا وبجت اكثر، وتصيح بعوفني ولا حباب وتتوسل، طببتها للغرفة شمرتها عالجرباية وصرت فوكاها، لزمت ايديها بقوة ثبتتها وهي جواية تبجي وترجف من الخوف.

عكدت حواجبي وعيوني حمرة دم من الاعصاب، الخوف الي بوجهها ودموعها نقطة ضعفي ومادري شلون وشوكت صارن هيج!

هسهست من بين اسناني بغضب مكتوم.
عقاب: لتخافين اني مو حيوان، مستحيل اتقرب لوحدة متريدني، وخلي يكون ببالج هذا مجرد تحذير، مرة الخ اعرفي شلون تحجين، لان صدكيني لسانج هذا حيوديج بمصايب انتِ بـغنى عنها..!

بلعت ريكها بخوف،كمت عنها وهي عدلت روحها واخذت نفس، رجعت باوعتلها احتدت نظراتي وصكيت ع اسناني وكلت.

عقاب: منو هذا الجان وياج؟

اماني: زميل سابق

عقاب: وشجابه يمج؟

اماني: بالصدفة شافني، وجانت ريما بالحمام

عقاب: و ع شنو جنتِ شاكة حلكج بالضحك وياه؟

اماني: مو ع شي، مجرد تذكرنا ايام قبل وضحكنا

عقاب: اهااا، سمعيني زين، حتى نفس متاخذين بدون اذني، اذا تريدين تضحكين ويه احد اني لازم اسمحلج اول، عيونج تنعمي للشي الاكولج بي ممنوع تشوفيه، وطلعة لغير مكان ممنوع حتلو البيت يحترك، مفهوم؟!

باوعتلي بحقد وهزت راسها ودموعها متجمعة بعيونها.
طلعت من يمها ورحت للصالة، تمددت عالقنفة واخذت نفس اهدئ بروحي، ممصدك الحالة الي اني بيها بسبب ولد ضحكتله!

...

قسورة

طلعت ريما من المطعم ع اخر شي، وتفاجئت بعقاب معصب يجر اختها للسيارة وهي تبجي، وهذا واكع بالكاع مدمى، اما اني فعفت الدنيا كلها وركزت بجمالها وهي مصدومة وخايفة.. هو كلمن يخاف يصير هيج حلو؟!

ريما: شكو شصاير؟ يمه رحت للحمام دقيقتين ورجعت انكلبت الدنيا!

قسورة: ماكو بس الاخ حكه جلده وعقاب ما خلاها بنفسه

كمز يهدد.
-احترم نفسك لا ادميك!

ضحكت بصوت عالي وباوعتله باستهزاء.
قسورة: هاي منو ليحجي؟! روح بابا روح عقم جروحك وشوف خشمك خاف انكسر

-بسيطة اني الكم واحد واحد
كالها بوعيد وراح وهو يخزر بيه، صحت وراه.

قسورة: وين رايح يمعود، لتجيب امك عليه حباب

ضحكت، حطيت ايديه بجيوب بنطروني ورجعت اباوعلها شلون صافنة ممفتهمة شديصير.

ابتسمت وباوعتلها.
قسورة: تحتاجين وسيلة شرح؟ اني بالخدمة ترا

ريما: اختي وين شبي وياها باتمان؟

باستغراب كلت.
قسورة: باتمان منو؟

ريما: صديقك اليخوف

ضحكت بصوت عالي ورجعت راسي لورا، نعلعلا ابليسها ولله مو قليلة!

قسورة: تدرين اذا سمعج هيج تحجين عليه يعلكج بالسكف؟

ريما: اوووي خفت ترا

خزرتها لان حجت بصوت عالي.
قسورة: صوتج!

ريما: احجي شبيها اختي

قسورة: اختج جانت واكفة ويه هذا النوتيلا وتضحك، عقاب تخبل انطاه المقسوم واخذ اختج

ريما: بأي حق يسوي هيج؟ تصرفات صديقك ما مقبولة ابد!

رفعت حاجبي وتقدمت عليها وكلت بسخرية.
قسورة: لا بلا؟وشنو المقبول لعد؟ بسلا عبالج مكرن وتريدي يشوف زوجته بهيج حالة ويسكت؟!

ريما: الله وهسة هو شالته الغيرة وسوا الي سواه!
ضحكت وحجت باستهزاء، ضيقت عيوني وحجيت بجدية.

قسورة: بالضبط

خزرتني بحقد وراحت، ظليت اباوعلها لحد ما اخدتلها تكسي وراحت، مدري شيصير بيه من اشوفها، كياني ينگلب!
معقولة تعجبني هيج وحدة وكحة وصلفة؟! يعني حتى الدكتورة قوية بس بأسلوب محترم، مو نفس صلافة اختها!!

...

عقاب

ثاني يوم كعدت متأخر شوية لان كوة نمت البارحة بالليل، الدكتورة مموجودة بالغرفة، عكدت حواجبي وخفت تكون شردت، طلعت للصالة لكيتها لافة نفسها ببطانية ولامة رجليها لصدرها ونايمة، نومتها مو مريحة ورح تكسر جسمها تكسير بس شسويلها.
اخذت نفس براحة ورحت للمطبخ، غسلت وسويتلي كهوة، شربتها وبدلت وطلعت للشغل.

هناك جان اشوف سيارات وزلم كدام المكتب، عبرتهم و سألت ضرغام وشاهين بعدما سلمت.

عقاب: شكو؟ منو جاي؟

ضرغام: دكتور توفيق ونسايبه

عقاب: شعنده هذا؟

شاهين: اتوقع يريد يحاجي الحجي حتى يقنعه يتخلى عن عضوية دكتور رياض بحزبنا

ضرغام: اني هم هيج اكول

عقاب: كل عقله هذا؟! هه

شاهين: للاسف اي

طبيت شفت ليث، سلمت عليه ورحت لمكتبي الي يصير يم مكتب الحجي، شفت قسورة هناك.

عقاب: سلاام

قسورة: يا هلاا بالحبيب شلونك اليوم

عقاب: بخير وانت؟

قسورة: الحمدلله

عقاب: ما فتهمت شعنده توفيق اليوم؟

قسورة: لا لسة، يطلع الحجي ونفهم منه

عقاب: زين

كعدت بمكتبي وهو يحوم فوك راسي، حسيت عنده حجي.

باوعتله وكتفت ايدية.
عقاب: غرد شعندك

تنهد وكعد.
قسورة: اخت الدكتورة شكبرها؟

نصدمت بسؤاله، شعليه وليش هيج مرتبك علمودها؟!

عقاب: 24 او 25 هيج شي، ليش؟

قسورة: صاحبي اني وكعت

عقاب: بشنو؟ شدتمسلت انت؟

قسورة: بالحُــب يمعود شبيك متستلم بساع

ضحكت بعدم تصديق.
عقاب: تشاقة؟

قسورة: وجهي مال واحد يشاقة برأيك؟

عقاب: لا، زين منو تعيسة الحظ هاي؟

قسورة: ريما اخت الدكتورة

بهتت بوجهه، بعدين كتله باستهزاء.
عقاب: يا حب يا بطيخ وانت وين شايفها حتى تحبها، شعرفت عنها؟!

قسورة: هو هذا لمسودنني، شايفها بس مرتين وكلشي ماعرف عنها بس تعال فهم هذا -اشر ع گلبه- الي يدك بخبال بس يشوفها، وهذا -اشر ع راسه- الي يكوم يعلك وميربط كدامها

عقاب: وانت تكوم وتكعد تحجي عليه وتوصيني ما احب واخذ حذر، تالي انت تحب! لا والمن؟ بت رياض! انت كل عقلك قسور!

قسورة: للأسف الشديد اي!

عقاب: بغض النظر عن كلشي، هي تحبك او حاس عدها شي تجاهك؟

نزل راسه وحجة بحزن.
قسورة: لا

عقاب: يعني مشاعرك من طرف واحد! هيج انت حتخسر صاحبي، دوس ع كلبك وتخطاها دام بعدك بأولها

قسورة: هذا الحجي بايكه مني

عقاب: دنجب، واصلا منو يكول احساسك هذا حُب؟ يجوز مجرد اعجاب!

قسورة: ما اتوقع

عقاب: توقع توقع، وعوف هالسالفة فدوة لعينك

قسورة: الحجي سهل

عقاب: والفعل صعب اعرف بس لازم تحاول، كافي ضحية وحدة بهالعائلة مو؟
كلتها بحزن وهو رفع راسه باوعلي بنفس نظراتي الحزينة، هز راسه وكام.

رجعت راسي عالكرسي، اخذت نفس وغمضت عيوني بتعب ممزوج بالقهر..

...

اماني

كعدت الصبح البيت فارغ، عقاب ماكو اكيد بالشغل، كمت سبحت وكعدت اتريك، ورجعت بذاكرتي للبارحة.

من جنت واكفة انتظر ريما بباب المطعم تطلع من الحمام حتى نرجع، وشلون فات ايمن بالصدفة، ما ردت اسلم بس هو عرفني واجة وكف يمي وسألني عن حالي.

ايمن: مشتاااقين شلونج

ابتسمتله مجاملة.
اماني: الحمدلله وانت

ايمن: الحمدلله، شلونها حياة الطب؟

من كال هيج انعصر كلبي!
اماني: ماشية ..

ايمن: ايييي كبرنا وصرنا دكاترة.. تتذكرين من جنة اذكى طلاب الدفعة والاساتذة كلهم يمدحون بينا

ابتسمت ع الذكريات الي رجعت مرت ببالي مثل الشريط.

اماني: هي هالايام هم تنسي؟

ابتسم ورد.
ايمن: لا طبعًا، لو حُبي الجبير الج ينسي؟

باوعتله بنظرة معاجبني الحجي.
اماني: وشجاب هالموضوع ع بالك هسة؟

ايمن: ليش هو يمته راح من بالي؟

اماني: مرت سنين عالسالفة، يفضل تنساه

ايمن: ان شاء الله، بس بربج متضحكين كلما تتذكرين شلون اعترفتلج؟

ضحكت لان هو هم ضحك، وتذكرت الموقف.

اماني: اكيد، اكو واحد صاحي يصارح بنية بحبه مثلك؟

ايمن: اي لعد شكو بيها، اصلا طريقة مميزة، حطيتلج المحبس بأصبع ايد الهيكل العظمي وقدمته الج بالمحاضرة، وبي ورقة مكتوب عليها 'احبج'

ضحكت اكثر من تذكرت ردة فعلي المصدومة، لان جنت معتبرته صديق بس.
اماني: بوقتها ظليت اتلفت يمين ويسار

ايمن: اي ممصدكة مني الاعتراف..

هزيتله راسي مبتسمة، بعدين اجة عقاب وصار الصار، كلش خفت منه وهو معصب، بس هم جزعت منه!
ظليت الليل كله كاعدة بالصالة بالبرد وارجف، ماريد اشوف وجهه ولا اشم عطره القوي الي تارس الغرفة، كرهته كره العمى، شلون حـ تخلص وياه حياتي مادري..

نفضت افكاري وكمت لغرفة اخته، طبيت ورجف گلبي لمجرد انو طبيت غرفتها وهي ميتة، لكيت عندها مكتبة صغيرونة بيها روايات وكتب تنمية وكتب اقتباسات.

سحبتلي رواية لأدهم الشرقاوي اسمها نبض وكعدت اقرة بيها، اندمجت بيها كلش من جمال الكلام والاحداث، وما حسيت الا واني مخلصة جزء جبير منها.

فززني صوت عقاب وهو يصرخ بيه بغضب وعيونه تطلع نار.

عقاب: منو سمحلج تفوتين هناااااا وتمدين ايدج ع اغراض اختي !!!!!!؟؟

.....

-انتهى!

-لا تنسوا التصويت 🖤.

-الى اللقاء قريبًا..

#الكاتبة نورمين 🖤