رواية خطأ طبي «عقاب الاماني» الفصل السادس وثلاثون 36 - بقلم نورمـين

#خطأ_طبي «عقاب الاماني»

بقلــم : نورمين 🖤🦋

...

عفتهم وركضت ورا عقاب ..

امشي واتلفت بالممرات، وين راح هذا بكل هالسرعة!!!

طلعت للحديقة لكيته كاعد هناك.

كعدت يمه ومحجيت شي، جانت انفاسه عالية تدل ع ضيقه ..

كمشت ايده وشديت عليها، باوعلي بنظرة حزينة ودار وجهه..

اماني: ليث معصب لتاخذ كلامه جد، ميقصد وانت تعرفه

عقاب: اي.. بس كلامه صحيح، اني السبب!!

اماني: لا طبعا شعليك انت!! قابل انت كلتلهم يسوون هيج شمدريك؟؟!!!

عقاب: شلون شعليه؟ اني الي جان عليه اتكفل بمراقبة حازم بس فشلت!! ونتيجة الفشل دتشوفيها بعينج، لا الحجي ولا قسورة!! رغم مشكلته وياي اني راح الحيوان أذاهم وضربني بيهم!!!!

جان يحجي بصوت عالي وعيونه على وشك تدمع ..

اماني: بس انت ما متعمد يصير كل هالشي، مالك ذنب كافي تلوم نفسك وفكر بطريقة تكدر توصل بيها لقسورة!

عقاب: راسي رح ينفجر .. دورت ببيته ومكتبه ومكان شغله وماكو.. و مادري شسوي بعد، محتاررر وين ادور والمن الجأ لحتى يساعدني؟!!!

اماني: الا ما تلكة طريقة بس اهدئ وفكر زين، الله رح يدليك للطريق الصحيح متاكدة ..

عقاب: والنعم بالله..

حطيت ايدي ع وجهه درته عليه، باوعتله بنظرات حزينة وكلت..

اماني: وجهك الاحبه هواي متضرر.. كسر بأيدهم ان شاء الله!

عقاب: هه مو بس ايدهم، كلهم تكسروا

اماني: شسويتلهم؟

عقاب: دزيتهم لمكان حلو ..

رمشت بصدمة، ديحشش الاخ!!

اماني: اريد اضمد جروحك هاي، رايحة اجيب علبة الاسعافات واجي

عقاب: ميحتاج كعدي

كمت وكتله..
اماني: محد سئلك، دا اكلك رح اجيبهن انتظرني وانت ساكت ..

محجة شي، ابتسمتله ورحت ..

....

عقاب

من راحت الدكتورة، صفنت وية روحي وفكرت بكلامها زين..

صدك لازم اترك لوم نفسي ع جهة..

وافكر شلون اوصل لقسورة!

دك تلفوني رقم غريب، رديت بسرعة.

عقاب: الو

حازم: عاش من سمع هالصوت ..

عقاب: قسورة وينه يا حيوااااان!!!

حازم: له له له، ما يصير تغلط عالاكبر منك وليدي

كمت وكفت وحجيت بعصبية..

عقاب: قسووورة وييييييينننن كتلللككككك؟؟؟!!!

حازم: بضيافتي لتخاف عليه، الشباب ادوا الواجب وزايد..

عقاب: مشكلتك وياي اني، ليش دخلتهم بيننا؟؟؟ لو ما بيك خير تجيني فـ تروح ع الناس الاحبهم؟؟؟

حازم: لا يا ذكي، اني اذا كتلتك الك واخذت حسابي منك مراح تتعذب، بس من اعذب الناس الي انت تحبهم؟ هنا اكون ضربت ضربتي ودفنتك بالحياة!

عقاب: سافللللل ولله الا ادفعك الثمن غاالي ولله!!!

حازم: هههههههه الوكت فاااات فااات حيييل وصار وكت انت تدفع الثمن غاالي!!

اخذت نفس ومسحت ع راسي بمحاولة لتهدئة نفسي..

عقاب: ميخالف، بس كلي قسورة وين؟ شسويتوله؟

حازم: تعال وشوف بعينك شسوينه برفيق دربك وصاحبك الانتيم..

جان يحجي بسخرية، بس اني ما صدكت كلي تعال كبل جاوبته.

عقاب: تمام دزلي العنوان

حازم: بس لازم تستعجل! وتجي وحدك مو تتذاكى عليه ترا بس احس بيك جايب احد وياك، يصير غير حجي وصاحبك يروح بالبـيباي

عقاب: افتهمنااا!!

سده ودزلي رسالة بيها العنوان..

المكان تابع لمنطقة صناعية بيها معامل ممكتمل بنائها لسة وبعيدة عن المدن السكنية.

سديت تلفوني ومشيت للسيارة بسرعة..

صادفني ليث..

محجيت شي، مجرد باوعتله بنظرات حاسة بالذنب ..

ليث: اسف.. ما جان قصدي اذب الصوج بيك بس الخوف والموقف عمى ع عيوني..

دنك راسه بأسف، خليت ايدي ع جتفه رفع راسه..

ابتسمتله..

عقاب: ماكو رسميات بين الاخوة، وانت مغلطت اصلا حتى تعتذر.

ليث: لا بالعكس، غلطت واكبر غلط هم، انت ما الك علاقة بالي ديصير، حازم الكلب هو الي خطط لكلشي!

عقاب: هذا عوفه عليه، لان هالمرة صدك تجاوز حده وجنى ع عمره!!

ليث: ليش انت عرفت عنه شي؟

سألني بشك.. ضيعت السالفة وكلت.

عقاب: حاليا لا، بس لشوكت يكدر يختل، الگفه الگفه!

ليث: اهاا..

جنه ممقتنع، بس اني مستعجل ..

عقاب: اي يلا من رخصتك

ليث: وين؟

عقاب: اشوف الولد الي دزيتهم يراقبون حازم خاف لكو شي.

ليث: تمام ولتنسى تكللنا اذا عرفت شي جديد

عقاب: اكيد

فتحت السيارة وسقتها بكل سرعتي..

بس اريد اوصل والمنطقة بعيدة!!

....

اماني

رجعت للحديقة وبيدي جنطة الاسعافات بس عقاب ماكو!

ذبيتها عالمصطبة ورحت افتريت داير مداير الحديقة..

ماله اثر، وين راح؟؟!

كلت خاف رجع جوة يم الولد.

رحتلهم وهم ماكو!

اماني: مشفتوا عقاب؟

ضرغام: مو جنتِ وياه؟

اماني: اي بس رحت اجيبله ضماد رجعت ملكيته!

شاهين: ما اجة لهنا دكتورة

اماني: يا الله صبرررني عليه!!! شلون بي خاف يأذوه وهو رايح وحده يفتر؟

ضرغام: ما اتوقع، الا في حال يستدرجوه عن طريق قسورة!

اماني: شنو معناته هالحجي؟

تنهد ورد..

ضرغام: يهددوه بحياة قسورة فيضطر يروحلهم برجليه

شاهين هز راسه بهدوء واني اباوعلهم وصافنة ممصدكة كمية البساطة والبرود الي عندهم ...

اماني: الله شكد حلو..

ضحكت باستهزاء، ادور تغيرت ملامحي للجدية وكلت..

اماني: بس شاطرين تذبون الصوج بعقاب، وهسة بكل برود جايين تكلولي يروحلهم برجليه عبالك رايحين يلعبون مو يكتلوه!!!

شاهين: شوكت ذبينا الصوج بعقاب؟ بعدين منو كال برود؟ دكتورة احنه دنحجيلج المنطق بشغلنا، مثلما حجيتيلنا المنطق بشغلج وكلتي حضروا نفسكم للجاي لان وضع الحجي مختلف، هم اجيت وتعاركت وياج وكتلج شنو هالبرود؟

اماني: بس اني سويت شغلي والاكدرله كله والباقي يم الله..

شاهين: احنه هم!! واذا عقاب راد يروحلهم وميكللنا شنكدر نسويله يعني بس فهميني؟؟؟ انتِ اكثر وحدة صرتي تعرفين طبعه وشلون اذا حط شي براسه ميغيره الا ينفذه!

اماني: بس هذا مو عذر شاهين!

شاهين: اكيد بس دا احجي فرضًا!

سكتت واخذت نفس، يا رب لا تخلي الكاله شاهين يتحقق!!

شوية ورجع ضرغام من الحمامات وسأل.

ضرغام: ليث وين راح شو ماكو؟

شاهين: مادري مو كال رايح للحمامات

ضرغام: اني جنت هناك هسة ومشفته

شاهين: هاي الحجي قبل نص ساعة تقريبًا، يجوز بالحديقة او يجوز طلع يشتم هوى لان خطية كلش تعصب..

صفنت وتذكرت ان عقاب صارله نفس هالوقت من اختفى..

فحجيت باندفاع..

اماني: معقولة يكون راح وية عقاب؟؟!!!

باوعولي بصدمة ..

معقولة؟!

.....

عقاب

بنص الطريق، رد خابرني.

حازم: وين وصلت يا سبع؟

عقاب: مبقالي هواي، عشر دقايق واني يمكم

حازم: اي خطية صاحبك دينتظرك ع احر من الجمر ..

ضيقت نظراتي وحجيت بحدة..

عقاب: تدري اذا مسويله شي شسوي بيك؟

حازم: انت مو بوضع يسمحلك تهدد

عقاب: اني كتلك لعندي وبكيفك بعد!

حازم: نشوف عود، خو ما جبت واحد منا مناك؟

عقاب: جايك وحدي

حازم: اي عفيه ترا بس اشم ريحة لعب منا لو منا ميصير شي يسرك، طلقة براس صاحبك وادزه يم ربه واني حذرتك حتى لتكول ما كتلي..

تنهدت ورديت بلهجة ثابتة..

عقاب: تمام تمام الله ياخذك!!

سده ورجعت اسوق واني اسابق الزمن..

كلشي الا قسورة ينضر، وخاصة ماله ذنب!

وصلت لهناك بعد ربع ساعة تقريبا..

نزلت من السيارة، خليت سلاحي بخصري ومشيت باتجاه المعمل ..

جان اكو زلم اثنين واكفين بالباب..

فتشوني واخذوا السلاح مني..

مو اني الاتعامل بهالطريقة بس ما اكدر اسوي شي خوفًا ع قسورة!

طبيت لجوة وصار كبالي مكان جبير مفتوح وكله غراض قديمة مشمرة بعدم اهتمام..

لنهاية الممر، جان قسورة كاعد ع كرسي ولافين ايديه ورجليه، وهو مدنك راسه بتعب وواضح من هيئته انو مبللي ..

وسعت عيوني وركضتله، صار كدامي حازم و زلم اثنين ع جوانبه اسلحتهم متجهة عليه..

رجعت خطوتين لورا، الي فتشوني هم اجوا وصوبوا اسلحتهم ضدي!

انحصرت بينهم وما متأكد اساسًا اذا هالحقير يوفي بوعده ويخلي قسورة يروح!

قسورة: لك عقاااب شدتسوووي انتت!!!!

عقاب: شلونك يابة؟

قسورة: شنو شلونك صاحي انت شعندك اجيت!

عقاب: اشششش اسكت الظاهر انت بخير فلا تحجي.

حازم: اسمحولي اقاطع هاللوحة الاخوية الحلوة شوية بلا..

عقاب: اني وفيت بكلمتي واجيتك وحدي، عوف قسورة يلا..

قسورة: هي بكيفككك!!! ما اطلع منا وانت يا غبي شجااابك ليش مظليت وية الحجي؟؟

قاطعنا صوت هازم وهو يقهقه بسخرية..

حازم: احم احم ..

باوعلي وكال..

حازم: تأخرت 5 دقايق و 54 ثانية بالتمام..

عقاب: الطريق بعيد والدنيا ليل شمنتظر اجيك طيران مثلا؟

حازم: هذا مو اسلوب واحد جاي يريد ينقذ صاحبه!

عقاب: اختصر هالمهزلة عاد وخلي يروح

حازم: مو انت لتقرر، اني!

عكدت حواجبي وحجيت ..

عقاب: شنو معناته هالحجي؟

حازم: معناته يا حبيبي انت وصاحبك حتكونون بضيافتنا، كلت خاف يمل وحده فجبتك وياه ونس

كمشته من ياخته وهسهست بغل..

عقاب: صوجي وثقت بيك ونسيت ذيل الچلب عمره ما ينعدل!!

قهقه ونزل ايدية عنه، نفض هدومه وكال بجدية..

حازم: رح نبدي نلعب بشروطي والخسران نعاقبه!!

راح لقسورة وكله ..

حازم: هم كول عليه مو زين، هياته صاحبك جبته يمك وحتموتون سوة وين اكو احلى من هيج بعد؟

قسورة من غير شي محتقن، كام تفل عليه ..

زلمه راحوا ضربوا قسورة وهو مسح وجهه..

ضحكت عليه وحجيت..

عقاب: ماسك مفيد للبشرة، ليش مسحته بساع؟

اجة واحد من ورا ضربني ع ظهري وكعت بالكاع..

عقاب: مو غدر ياااا كلاااب!! بالوجه تعالوا مثل الزلم!!!!

قسورة صرخ: عقااااب باللللك!!!!!!

باوعت باتجاهه وادور باوعت عالجهة الي يحذرني منها قسورة..

ما لحكت استوعب شكو واجتني ضربة خلتني افقد الوعي!!

...

رفرفت بجفوني على نحو بطيئ..
صداع فظيع مسيطر ع خلايا مخي..

فتحت عيوني وتوضحت كدامي الصورة..

حازم وزلمه، وبصفي قسورة..

ايدية مربوطة ورجلية هم ..

عقاب: هي هاي المراجل يا رجال؟

حازم: لتحجي بالمراجل وانت الكتلت واحد نايم!

عقاب: هه خاف نطيته منوم

صاح بغضب..

حازم: لك حيووووان وهو نايم كتلتهههههه وجاي تحجي بالمراجل بكل صلافةةة!!!!!

رديت علي بنفس نبرة صوته..

عقاب: ليش تكفرني كتلك ما كتلته ما كتلتهههه!!!!

حازم: وامير يجذب لعد؟ لك شافك بعيوننننه!!!

ضيقت عيوني بصدمة وسئلت بتعجب..

عقاب: امير؟

سكت جنه جفص وهستوه حس ع نفسه!

باوعت لقسورة الي همسلي..

قسورة: خاف ابن دكتور توفيق؟

هنا صدمتي صارت الضعف!
واني شلون نسيت هالكلب هذاا!!!!

عقاب: امير ابن دكتور توفيق مو؟

محجة شي، راح ورجع يمشي بصمت..

صحت بي..

عقاب: كتلك عن يا تببببن تقصد احجي؟!!!

ضربني واحد من زلمه، ارتديت عليه بقوة وعيوني بكصتي..

عقاب: اذا انت زلمة فكننننني!!!

حازم: انجب عاد دوختنا، جيبوا اللعبة يلا ..

قسورة صاح بعلو: لاااااااااا ياااا حيوووووان!!!

باوعتله بتفاجئ، شبي هذا وعن يا لعبة يقصد حازم؟

حازم: شجاك خلي نتونس

باوعلي قسورة بعدما فقد الامل من ذولاك وكال..

قسورة: جهاز صعقات كهربائية عقاب!!

غمضت عيوني ورجعت فتحتهن..

منجرمن مبلل وعلى وجهه وجسمه اثار دم، اثاري جانوا يكهربوه السفلة!!!

شكلوا الجهاز وذبوا مي علينا اثنينا..

اجة حازم وحط الكرسي بالمقلوب وكعد كدامي..

حازم: ليش كتلته سولفلي..

نترت بي..

عقاب: مطي ما تفتهم انت؟ كتلك ما كتلته!!!!!

ضربني زلمته بوكس اندار وجهي للجهة الثانية وطك حلكي دم..

قسورة يتصارع ويه الكرسي ويصيح عليهم..

ضحكت وكلت مستهزء..

عقاب: كل قوتك هاي؟!

رفع ايده ديضربني مرة لخ، صاح بي حازم.

حازم: اوكف!

باوعله ورجع لمكانه..

كام حازم مشى داير مدايري اني وقسورة وهو يحجي..

حازم: انسان مثل عقاب، شايف كلشي وعايش كلشي يعني باختصار بايع ومخلص، فـ انت من تريد تضربه لازم تعرف ان الضربة التضربه بي ما توجعه، بكد ما توجعه الضربة الي تجي للاشخاص ليحبهم..

رجع كعد بمكانه واني خازره بنظرات شرارية..

حازم: فـ يا حبيبي انت شتسوي بهالحالة؟ تريد عقاب يتأذى ويتوجع؟ اضرب قسورة!

ضربوا قسورة واني اصيح وارافس بالكرسي وماكو..

عقاب: لكككك ****** ككككلللب حيييوااانننننن ******** احسلك تكتلني ولله لو عفتني الا اندمك ع كل هذا وازوعك دم ولللللهههههه، لك عوففففهههههه!!!!!!!!

حازم: عوفوه يلا رح يبجي عقابنا ..

جانت انفاسي متسارعة وملامحي محتدة، صاير نار!!

عقاب: نصيحة مني الك، اكتلني واسلم ع روحك!

حازم: واذا ما نفذتها؟

عقاب: انت الخسران، حلفت ازوعك دم وادوس راسك بقندرتي وبكيفك بعد..

الحجي ما عجبه، كام واجة يمشي باتجاهي ..

ضحكت وكتله..

عقاب: سكتت بسلا ما صرفتلك سالفة القندرة يقندرة؟!

ابتسم بخفة وهو حاط عيونه بعيوني، ادور جر شعري بقوة وخلى راسي يرجع لورا ..

طلع سجينة جانت بجيبه وخلاها كبال عيوني ومشاها ع كل وجهي ..

حازم: منين تحب اشوهك بالاول؟ عيونك.. كصتك .. خشمك .. لو غير شي؟ بكيفك اختار بما ان هاي لحظاتك الاخيرة، حتى تعرف شلون اني گلبي طيب..

عقاب: مريض .. هه..

حجيت هيج وضحكت، ضحكة جبيرة من كل گلبي وماعرف شنو سببها.. مستهزء بي مدري قرفان الوضع لدرجة الضحك مادري..

عيونه صارت بكصته وقسورة شاركني الضحك والتقليد..

قسورة: الظاهر صدك السالفة ممصرفتله..

رجع حازم لورا .. أشر لزلمه اجو حطوا اسلاك الجهاز ع جسم قسورة ..

ضحكتي اختفت، ملامحي بهتت و وسعت عيوني بصدمة وصحت..

عقاب: لك لااا، حازم يا ******* كتلك وياي تحااااااااسب!!!!!!!!

هز راسه وضحك وهو يفر بسجينته..

حازم: جايك السرة لا تستعجل ع رزقك!

عقاب: ااااااااخخخخخخ لك ك******

علكوا الجهاز وقسورة كام يصيح بألم وجسمه يهتز بقوة والدم ترس جسمه ترس..

واني احس روحي راحت من المنظر، اصرخ اغلط افشر لا حياة لمن تنادي!!!

عقاب: كاااااافيييييييييي!!!!!!!!

اشر لزلمته سد الجهاز، باوعت لقسورة مدنك راسه و روحه خايرة ويـون بألم..

عقاب: شلونك صاحبي؟ هاا .. قسورة تسمعني؟!

قسورة: ا.. زيـ..ـن يابة ززز... زين

ضحكلي وكوة حجة، باوعتله بابتسامة مغلفة بالحزن..

عقاب: اتحمل ..

هزلي راسه بهدوء..

قاطعنا حازم ..

حازم: شيتحمل الله يخليك، مرة مرتين ترهم وياه، عشرة! الا ما يوكف گلبه ويموت بوحدة منهن!

زفرت انفاسي ونظراتي شاخصة عليه بحدة..

عقاب: اخر مرة دا اكلك اكتلني، حذرتك اني وبقت يمك بعد، ولله ثم ولله يا حازم اذا ما دفعتك الثمن غالي انت وامير مالتك ما اتسمى عقاب، اطلع ***** وناقص من الزلم اذا خليتك تشم الهوى!

حازم: احلم احلم ميخالف..

عقاب: بس اكو احلام تصير حقيقة!

حازم: مو بعالم حازم!

عقاب: هه ولله مصدك روحك انت!

حازم: وحد عنك؟ كاعد وتحجي وتتوعد بيه بحيل صدر وانت شعرايتين بينك وبين جهنم ..

ضحكت..

عقاب: اي ليش لا..

قدم كرسيه وكعد قريب عليه بحيث المسافة الفاصلة بيننا اقل من متر..

حازم: بيـا ايد كتلته؟

هزيت راسي بنفاذ صبر وحجيت واني مبتسم..

عقاب: يا لغة تفتهم انت، كلي حتى احجيلك بيها؟

حازم: هم صدك.. يجوز اني مدا اعرف اتواصل وياك باللغة المناسبة والي تفهمها!

ضيقت نظراتي عليه وهو يضحك، اشر للواكف بصفي ..

اجة نزعني حذائي.
ادور اجة واحد لاخ انطة چلابتين لحازم..

هنا طخت ببالي شراح يسوون، ماعرف ليش الابتسامة الساخرة ما فاركت وجهي ابد!!

عقاب: اساليبك قديمة ورخيصة!

حازم: هو المطلوب، بلكي تناسبك!

ضحكت..

عقاب: نقطة لصالحك!

حازم: نرجع لموضوعنا، ليش كتلت يوسف ويا ايد استخدمت؟

عقاب: الحجي وياك ضايع واني لعبت نفسي، شتريد تسوي سوي

اشر للوراية، فك ايدي اليسرة وربط اليمنة..

حازم: مو الا نظل ننتظرك، نبدي بيهن بالسرة !

اشر لزلمته كمش ايدي كسر اصابعي بقوة، عيوني جحظت من شدة الألم وأحمرت بس ما طلعت صوت ولا بجيت حتى، كتمت الالم بداخلي!

قسورة: لك ما كتلنا ابن اخوك، ما كتلنا وعقاب ما سواله شي انت ليش مترضى تفتتتهم؟؟

حازم: لك تحجون بحيل صدر ولا كأن اكو شخص شاف جريمتكم!!!

قسورة: غبي انت؟ شلون مصدك بي هيج عالعمياوي ودتسوي كل الي دتسوي بس لان هو كلك عقاب القاتل؟!!!

حازم: لانه صديق يوسف، شلون انت والاخ هنا اصدقاء، امير ويوسف اصدقاء، واصلا شنو مصلحة امير وياكم ويتهمكم؟!!

ضحك قسورة وكله ..

قسورة: ما اغبى من الغبي، الا اليمشي وراه فما عليك عتب لان انت واحد زمال!!!

هو كال هيج وكام ضربه، هاي اول مرة يضرب حازم، جان يأشر لزلمه وهم يسوون الي يريده!

اذن قسورة صاب الهدف الصحيح!

حازم: هذا مو مال احترام، شغغغغغل!!!

اخذت نفس واني اباوعله بترقب..

علك الجهاز ورجعوا كهربوا قسورة وهو يصرخ ..

عقاب: الله ياخذذذذك انت وامير، لك قسسسسووووررررةةة!!!!!!

گلبي تكطع وعيوني كامت تدمع..
صديق عمري بهالحالة واني عاجز اسوي شي او اوكفهم حتى!

طفاه ووكف يمي..

جر شعري وراسي لورا، ومشى سجينته ع رگبتي..

حازم: حركة وحدة بس ع هذا الشريان الحساس تخليك تفطس!

عقاب: متسويها لعد شمنتظر؟

حازم: اممم.. يلا نسويها شكو ورانا.

نزل بسجينته ع الجلد، حسيت ببرودة حافتها تخترق جلدي والدم بلش ينهمر بغزارة ..

شوية وشالها ..

هدني وراح كعد.

عقاب: بسلا كلبك مينطيك، شسالفتك شغلك كله عالنص؟

حازم: ع الهادي مو ع النص، شوية شوية ولسة السهرة بأولها، مو بلا قسورة؟

قسورة جان يرجف وديحاول  يتمالك نفسه ..

حازم: هسة صار وكت فقرة الچلابتين!!

كعد يم رجلية، نقر بالجلابتين عليهن بالسرة..

حازم: بيمن نبلش يا ترا؟!

باوعلي وسأل..

حازم: ها شتكول!!

عقاب: بـ*** امك!!

كور حلكه بحركة متعجبة وكال..

حازم: يلا اني رح اختار، مزاجك مو حلو للعب يمكن

كال هيج وبلش يدك ع اصابعي بالچلابتين ويكول..

حازم: آلا بالا برتقالا كلي عمي احسب من الواحد للعشرة، واحد.. اثنين.. تلاثة.. اربعة.. خمسة.. ستة.. سبعة .. ثمانية.. تسعة.. تسعة وربع.. تسعة ونص.. عشرة الا ربع.. ع..ع.. عـش..

ملحك يكول عشرة وباب المعمل انفتحت!!

ابتسمت وعيوني لمعت بفـرح لمن شفت الي اجة!

....

انتهى!!

قفلة تحرگ الدم مو 🌚😂

لا تنسون التصويت والتعليق، حتى اذا جان تفاعلكم حلو انزللكم باجر بارت 🙈

#الكاتبة نورمين 🖤🦋