رواية خطأ طبي «عقاب الاماني» الفصل التاسع والعشرون 29 - بقلم نورمـين

#خطأ_طبي «عقاب الاماني»

بقلــم : نورمين 🖤🦋

...

اماني: عيد شكلت مسمعتك

عقاب: دا اكلج الجرح مو جبير، هيج بس شخطة

اماني: لا مو هاي القبلها

عقاب: ياهية؟

اماني: مال ميخالف عمري

عقاب: شنوو؟!!

اماني: شنو شنو، انت كتلي عمري!

عقاب: خ اضمد اصبعج، مو وكت خبالاتج

اماني: ولله انت كلتتتت!!!

عقاب: لا مكلت اذانج بيها خلل

اماني: الخلل بيك، لتفرها عليه

غلس وراح يجيبلي معقم ولاصق جروح..

ضجت من نكر بس بعدين تذكرت انو هو هذا طبعه وخشمه اليابس حيظل هيج!

ضحكت وغمضت عيوني متخيلته يكول الكلمة مرة ثانية، كلش حلوووةةةة منه!!

شيصير لو يزلك ويكلي احبج هم هيج بعفوية!!؟

بس لا لحظتها حيخرب عليه الفرحة وهم ينكر، اففففف.

رجع، عقم اصبعي ولف عليه لاصق.

والوجع مثل الوخز، خبلته كل حركة واجر ايدي واصيح اخ اخ اخ.

بس هو متفهم وما ضاج، بالعكس جان يكولي خلصنا وهانت ..

استلم ويكلي شحبيتي مني!!

عقاب: وهسة امشي كعدي بالصالة ع ما اخلص اصيحلج

اماني: لا نكمل سوا

عقاب: جنج رايدة تبتـرين اصابعج كلهن اليوم؟

اماني: لاا بس ع كيفي اشتغل

عقاب: ماكو، امشي برا يلا

اماني: بس خليني اساعدك! شنو واذا تعورت كلها يصيرلها هيج!

كومني واخذني للصالة واني مستمرة احجي، وهو ولا يمه.

اماني: عقاب مو وياك ليش لابسني!

عقاب: كبري عقلج يا عيني وانتظريني، اصلا خلصنا مظل شي!

اماني: اي مدام هيج خ ...

سكتت لما خزرني، تأفأفت بضجر.

اماني: افففففف منك

عقاب: ميخالف

عافني وراح، ليش يعاملني مثل الطفلة، واذا تعورت شنو يعني؟

اول لو اخر وحدة تتعور بالسجينة!

ليش مكبرها مدا افتهم؟؟!

كمل وتعشينا، اكلت هواي لان معدتي حرفيا فارغة.

شال المواعين وخلاه بالغسالة، ادور وكف يسوي كهوة.

اباوعله وهو يتحرك بسرعة شلون نادر وخفيف.

جاب الكهوة واجة.

اباوعله ومبتسمة هيج لا اراديا وما حاسة ع نفسي، رفع حاجبه بتعجب وكال.

عقاب: اكو شي يضحك؟ ضحكيني وياج

اماني: ماكو

رديت مبتسمة بشكل اكبر، ضيق عيونه واشرلي بحواجبه شكو.

اماني: ماكو وداعتك بس هيج جايتني الضحكة

عقاب: هاا ضحكة خير ان شاء الله

اماني: شكرا، ممكن اطلب منك طلب؟

عقاب: تفضلي

اماني: عاجبني اشوف فلم كوميدي

شرب من كهوته ورد.

عقاب: متشوفين منو لازمج؟

اماني: اريد اروح للسينما

عقاب: والتلفزيون والقنوات بشنو مقصرة وياج؟

اماني: يمعود هو التلفزيون شبي ملل وماكو افلام حلوة، تاخذني لو اخابر ريان يجي عليه وياخذني؟

خزرني، رجعت وسعت عيوني باندفاع.

اماني: لا تخزرني شكلت قابل ترا اخويه مو صديقي!

رفع حاجبه ورد باستهزاء.

عقاب: عوزج ولله تطلعين وية صديقج!

اتنرفزت من نبرته، فرديت بعناد.

اماني: ليش شكو بيها واذا طلعت وية صديق؟

عقاب: لا ابد كلشي ما بيها، بس ساعتها تلكين روحج انتِ وياه بوادي السلام وشابعين مي ورد.

اول شي كال بسخرية، ادور كمل بحدة.

اماني: لا بلا وشدعوة عليك كل هذا؟

عقاب: مرتي، شتريدين اسوي مثلا؟ اصفكلج لو شنو؟

اماني: فعلًـا دكتاتور!

عقاب: شتسميها سميها، مو كرن كدامج تفترين وية زلم واسكتلج

اماني: اهووو هسة ليسمعك مو يصدك ولا يكلك دا اشاقة!!

عقاب: حتى متعيديها بعد حتى بالشقة

اماني: نننننن
قلدت عليه ودرت وجهي بضوجة.

باوعلي متفاجئ من تصرفي، باوعتله بشكو وكمت نمت عالجرباية.

لحكني، تأكد مني عالجرباية نايمة ورجع يريد يطلع.

وكفته لما كلت.

اماني: شدعوة هيج مهتم وين انام؟

اندارلي وكال.

عقاب: ما مهتم، اجيت ابدل عبالي بعدج تريدين تروحين للسينما بس الظاهر بطلتي، يلا بعد احسن نامي نامي

هو كال هيج واني طفرت، خربحظي نسيت شجنت اريد منه.

اماني: لا لا كايمة بس ردت استراح شوية

ضحك وهز راسه.

عقاب: ديلا لعد لتتاخرين

اماني: اي هسةةة طلقةة

اخذ ملابس سود، جنت اباوعله شياخذ حتى البس مثله لان اليوم عاجبني انسق وياه.

رحت طلعت بلوز اسود وبنطرون اسود جينز.

نزع البدي مالته طلعن عضلات بطنه السداسية.

باوعتلهن بذهول!

تمتمت ..

اماني: عود ذني حقيقيات؟

ضحك وكال.

عقاب: اكيد

اماني: بس شلون وانت متروح لقاعة؟!! جسمك عبالك مال واحد رياضي وعضلاتك مرتبة جنها بقلاوة!

عقاب: بقلاوة؟!

هزيت راسي وهو رجع راسة لورا ضحك ضحكة جبيرة حسيتها طالعة من گلبه..

شكد حلوة ضحكته، ظليت اباوعله ومبتسمة ع ابتسامته..

عقاب: منين تجيبين هالسوالف انتِ؟

اماني: هن وحدهن يجن

ضحك ولبس بلوزه وكلي بخبث.

عقاب: بس تطورات، لا خجل لا شي.. حلو حلو

هو حجة هيج واني طبيت بهدومي من الفشلة.

صدك شو اني هالمرة بايعة المستحة واسولف وياه وع جسمه عينك عينك!

اخذت ملابسي وفلتت، اسمعه يضحك.

اماني: تبقين ثولة اماني!

رجعت ضحكت وهمست..

اماني: هو ميخالف لو كلمن ينثول يشوف هيج شوفة هههه

استغفر الله حيصير بيه انفصام من وراه.

ساعة اضحك ساعة اضوج، رح يعديني من فيوزاته الضاربة!

شلت شعري كباية وخليت كذلتي عالجوانب.

عقاب: مو كايلج شعرج لتربطيه هيج؟

اماني: ترا لابسة بلوز ابو الرگبة كلشي ميبين!

ضيق نظراته جنه ديتفحص البلوز ..

عقاب: افتري بلا

اماني: ليش؟

عقاب: افتري ومعليج

افتريت ..

عقاب: مدام هيج تمام لعد

حجيت بضجر ..

اماني: همزين رضيت حضرة الشيخ

عقاب: لعد شلون..

طلعنا، جنة حرفيًا عبالك سيت واحد، وعقاب ما انتبه طبعا!

بالطريق، دكت عليه امي.

اماني: الوو شلونج ماما

سما: بالي يمج اذا انتِ زينه اني زينه

اماني: عمري ماماتي اني كلش زينه ولله ليظل بالج عليه

سما: زين تعالي مري عليه، لهدرجة مشغولة؟

اماني: ولله ماما المستشفى تعب، ارجع يا دوب انام الكة الليل صاير

سما: اي ميخالف تعالي تعشي او سهري يمنا، تدرين احنه ل12 كاعدين

اماني: ان شاء الله لعد اهم شي لتزعل دكتورتنا الحلوة

سما: ههه ماماتي يلا انتبهي ع نفسج

اماني: انتِ هم، بيباي

سديته، وباوعت لعقاب وكلت.

اماني: ماما تكلي ليش متجين تشوفيني

عقاب: اي حقها، روحيلها عود

اماني: وانت؟

عقاب: اني شعليه

اماني: غير تجي وياي؟

عقاب: مو الا، بس اذا رهمت اجي ليش لا

اماني: انت اكثر دكتاتور فري شفته بحياتي

ضحك مستغرب

عقاب: شلون رهمتيها هاي؟

اماني: ترهم ترهم، شلون اطباعك المتناقضة راهمة عليك

عقاب: جنچ قسورة، كلما حجة حجاية سوالي تاك

اماني: هههه حبيت مال تاك

عقاب:  هي هم تحبج

اماني: هاا؟

عقاب: وجعاا

اماني: عيد شكلت

عقاب: وجعااا

اماني: لا مو هاي القبلها، ولتكلي اذانج بيها الخلل هالمرة!

عقاب: لعد شوفيلج دكتور، اذنج وضعها ميبشر بخير اتلاحكيها

شهكت بخوف

اماني: اسم الله بيش طالبني!

ضحك وكمل سياقة.

فتحت الجامة وكذلتي كامت تطير بالهوا انثبرت ثبيرة وحسيت روحي كفشت.

سديتها خرب لو ادري هيج اتبهذل ما افتحها.

لاحظت نظرات عقاب يلمعن، مو نظراته العادية.

اماني: ها؟

بنبرة هادئة كلي.

عقاب: يا امي بطلي تكولين ها

اماني: اكلك ترا خبلتني، ساعة امي ساعة باباتي، حدد موقفك رحمة لدينك، وادور سالفة الها المدري شعندك وياها، انت شيوجعك بالضبط فهمني؟

عقاب: رشاش مو لسان دخيلك ربي

اماني: مو انت تطلع الواحد عن طوره!

عقاب: ديلا علساس انتِ شلونج

اماني: شقصدك عود؟

عقاب: يابة تخليني اسوق بهدوء اليوم لو شلووون!!

حجة بنفاذ صبر، عفصت وجهي وتمتمت بخفوت.

اماني: اوي عيني وشكلنالك

شو هذا التفتلي وحجة بعصبية

عقاب: اوي بعينج لتعيديها لا ادور لسانج اكصه!!!

رديت بعدم تصديق..

اماني: اصير خرسة احسن مو شتكول؟

عقاب: ياريت، تسوين فضل ولله

اماني: هه!

خزرته بانزعاج ودرت وجهي عنه، عشتو شهالبشر الي كلشي ميعجبه والوكت كله يقلد ويتأمر!

لا واني الثولة رحت حبيته..اخخ!

....

قسورة

بعد هاليوم الحافل، رجعت للبيت تعبان بس بنفس الوقت فرحان ..

يا رب تكمل هالفرحة وتوافق ريما عاد.

تمددت وتذكرت احداث اليوم ..

لكيت نفسي مبتسم لا اراديًا، لمجرد مرور طاريها ع بالي.

طبعا كلشي احبه بيها بكون، وعصبيتها بكون ثاني!

مادري شنو هالطبع الغريب البيه، بس احب اعصبها واستفزها كلش!

فتحت تلفوني دزيتلها ..

- وصلتي بعدج؟

ردت بسرعة.

-معليك

ابتسمت، دا اتخيل شكلها الضايج ..

-تكدرين تحجين اذا اتصل؟

-ماريد احجي وياك

-بس اني اريد

-شي يخصك شسويلك

-رح اتصل وحتجاوبين والا تعرفين شسوي

-شتسوي سوي، اتصال ما اتصل وهسة انطيك بلوك

-سويها وشوفي

-هه خفت

-خوش

سديته وكمت، اراويها شلون تقلد وتعاند ام راس يابس.

اخذتلي تكسي ورحت لبيتهم.

طفرت ع حديقتهم، اكو شبابيك للغرف عالحديقة بس ما ادري ياهوة منهم الها.

شلت حصواية شمرتها عالشباك شو ماكو احد..

معقولة نومهم ثكيل لو هم مغلسين!

ما عندي رقم هالغبية، واستحي اطلبه من الدكتورة ..

كلت ما عندي حل غير اتصل عالنت.

فعلت نت عالشريحة، واتصلت عليها فصلته.

رجعت دكيت هم نفس الشي، يعني كاعدة.

دزيتلها رسالة.

-تعالي للحديقة مال بيتكم لا اجي اني اصعدلج

اتصلت بنفس اللحظة، فتحت خط واني مبتسم بنصر.

ريما: مخبللل انتتت!!! روح قبل ليشوفكك احد!!

قسورة: ما اتحرك منا قبلما اشوفج

ريما: قسورة لا تتخبل مو عيب عليك شتسوي جاي لبيتنا بهيج ساعة!

قسورة: العيب بالجيب، تجين لو اني اجيج؟

ريما: افففففف منك جاية

قسورة: عفية سباعية

سديته، اجيبج للدرب يعني اجيبج ريما!

اجتي تمشي وتتتلفت..

ضحكت وكلت.
قسورة: ركبتج حـتطك ع كيفج ماكو احد

ريما: هههه شكد كوميدي!

قسورة: ورومنسي هم اكو بس غير انتِ متنطيني فرصة اطلعلج كل مواهبي

ريما: شعندك اجيت؟

قسورة: علمودج

ريما: بس اني ما كتلك تعال!

قسورة: بس انتِ رفضتي نتخابر وهاي نتيجة رفضج

ريما: هاي مكالمة هيج، لعد لو رفضتك الك شتسوي؟

حجتها باستهزاء..

بس الحجاية دكت بكلبي، سكتت وملامحي كلها تغيرت..

قسورة: يلا رجعي طبي باردة، مع السلامة

حجت مستغربة التحول الصارلي.

ريما: بس هيج؟ علمود هاي اجيت!

اصطنعت الضحكة وكلت.

قسورة: اي مو شفتج؟ هذا هو هيج يكفيني

برطمت بعدم اقتناع، رحت وعفتها بحالة تعجب  ..

شكد احبها..

بس بنفس الوقت شكد توجعني الحجايات لتطلع منها بلا قصد!

ظلت تسعر بگلبي الحجاية، وحتى النوم جافاني ليلتها..

...

اماني

باوعنا فلم لأحمد حلمي.

جان كوميدي خربت ضحك عليه وعقاب ولا ضحك ولا انطة رد فعل، اقصى شي جان يبتسم ابتسامة عريضة بهدوء.

يا اخي شكد احب رزانته، باللبس بالتصرفات بالشخصية.

لو ما الاتفاق جان كلت هنيالج اماني ع هيج زوج بس ..!

طلعنا من القاعة، ذبيت علبة الشامية الي قضيت عليها تماما.

عقاب: هيج تمام؟

اماني: اريد بعد شغلة وحدة منك بس

عقاب: كولي

اماني: اريد بقلاوة

ضحك هو، الظاهر تذكر جفصتي.

عقاب: بالبيت مو هنا

هذا وين شمر باله!

اماني: مو الي ببالك، بقلاوة اكل اكل!

عقاب: لعد اني شكلت؟ نشتريها ونروح للبيت

فشلت من روحي..

اماني: ها اي اي ..

عقاب: تعاي شنو اجة ببالج انتِ؟

اماني: ولا شي

عقاب: مبين..

جنة نمشي ونحجي، وكفت وكلت بنفاذ صبر..

اماني: كافي عاد يبتلي الواحد يحجيله حجاية كدامك!

عقاب: دتنفسي وهاج شربي مي ليطكلج عرج

كالها بسخرية ومدلي بطل المي الي بأيده.

كلبت عيوني بضوجة ومشيت، لحكني وظلينا عالصامت لحد ما وصلنا لابو حلويات.

نزلنا من السيارة.

عقاب: حطلي كيلو بقلاوة

-تدلل

اباوع عالحلويات وعيوني تلمع..

ادنة يمي عقاب وكال بهمس.

عقاب: شجاج جنج مشايفة؟

اماني: عقاب احبهن

عقاب: ياهنة ولج!!

اماني: الحلويات شبيك!

عقاب: اهاا زين ..

اماني: اريد كنافة وزنود الست همين

عقاب: ميخالف بس مو زين هيج ترا

اماني: دجيب ومعليك، اعرف شلون اوازن

عقاب: تمام اذا هيج

حاجة الرجال ..

عقاب: عيني وبدربك شكلي من كلشي عندك فد كيلو

باوعتله بسعادة هو ابتسملي ..

خاف جنت احبه قبل، هسة كمت اموت عليه.

كلشي ولا الحلويات، اضعف كدامهن!

طلعنا مناك والعلاكة مال المشكل بايدي والثانية عد عقاب.

صعدنا بالسيارة، حطيت العلاكة بحضني وكمت اكل.

عقاب: كافي مو زين هيج دكتورة!

اماني: شماكلة هسة اني متكلي!

عقاب: تعاي اكليني بعد فد مرة!!!

شمرت العلاكة لورا وكلت بضوجة.

اماني: ها اها عفتهن الك ارتاح ابو نفس

عقاب: هههه هاي كل عقلج تحجين؟

اماني: لا نصه

باوع لكدام وكال وهو ديسوق..

عقاب: ربييييي.. بس العقل كلشي ماريد منك بعد ..

باوعتله صفح.

اماني: اي ولله ربي بس العقل للبالي ..

عقاب: وللبالي هم..

وصلنا للبيت، عفته وطبيت وهو اجة وراي خلا العلاليك مال الحلويات عالطاولة.

فرش اسنانه وراح بدل.

خليته يروح وكمت اخذت علبة البقلاوة.

هسة اني شبيه انفتكت عالحلا فجأة، مادري شجاني كلش مشتهيتها.

واحس طاقتي مصفرة، واني بهيج حالات اذب روحي عالحلا.

اكلتلي قطعتين عالسريع ورجعت لمكاني.

بس شنو، ما استطعمت بيهن، مدري لان بلعتهن بلع قبل ليجي ويشوفني..

كمت اخذتلي وحدة بعد ورجعت ..

خرب ولله طيبة.

بالربع ساعة وعقاب ماكو لا حس و لا نفس.

كلت هذا نام، جبت العلبة واجيت.

تربعت بالكاع وخليتها بحضني وكمت اكل واسوي امممم هلكد ما طيبة.

اماني: لذذذذذيذذذذة

غصيت باللكمة من سمعت صوته.

عقاب: الف عافية

وكفتلي اللكمة وكمت اكحكح، شون فشلة يا ربي!

عود زعلت وهسة لكفني متربعة واكل.

شلون مواقف بايخة انحط بيها وياه!!!

جابلي مي، دك ع ظهري بلطف.

عقاب: شربي

اخذته منه وشربته ع كيف..
حسيت اللكمة تمزلكت.

وخر ايده عن ظهري واخذ الكلاص خلاه عالطاولة.

اماني: شكرا

عقاب: ولو

سديت العلبة وكمت.

عقاب: كملي ليش عفتيها

اماني: لا هذا هو شبعت

عقاب: ليش هيج وجهج؟

هو اني صدك احس بوجهي ديطلع حرارة بس معبالي واضح حتى اله!

اماني: ش..شبي؟

عقاب: احمر صايرة طماطة!

اماني: هاا اي عادي واذا

هز راسه بعدم رضا وكال.

عقاب: بنيتي الحلا الزايدة مو زينة، عبالج اني من اكلج عوفيها كافي مهتم الها مثلا؟ اكيد لا ،الف عافية اكلي بس بأنصاف، لان اني يهمني صحتج!

هزيت راسي بتفهم واحس وجهي ديطلع نار بالزايد.

ادنى عليه وخلى ايده ع كصتي..

عقاب: مصخنة؟

اماني: لا ما بيه شي

انسحبت، غسلت وفرشت ورحت مددت بصفه.

جان منطيني ظهره، ظليت اباوعله وغفيت.

كعدت الصبح ع صوته فول نشاط.

عقاب: دكتورة كافي نوم اكعدي

تمغطت وكلت واني ارتب بشعري ورة اذني..

اماني: صباح الخير

ابتسم.

عقاب: صباح الخيرات

كمت فرحانة، اكو سر غريب خلاني نشيطة وسعيدة، معقولة الحلويات السبب؟

بدلت وسوينا الريوك اني وياه، تريكنا وطلعنا.

اماني: شصار عالقضية مال زهرة؟

عقاب: اكمل دوام وامر ع عقيد زيد افتهم منه، لان العرفته اكو جماعة جبيرة دتضغط عليه حتى يتركها

اماني: الله ياخذهم واحد واحد كلهم سفلة!

عقاب: شتترجين منهم لعد، كلهم نفس طينته واسوء.

اماني: الله يجازيهم..

عقاب: امين.

وصلني للمستشفى ومن نزلت وصاني.

عقاب: ديري بالج ع نفسج مو مثل البارحة، لصيرين فاهية!

هزيت راسي..
اماني: ان شاء الله، بيباي

ودعته وراح.

طبيت وتلكوني بالاسئلة عن حالي.

طمأنتهم ان ماكو شي واطشرنا كلمن لشغله.

جان يوم هادئ نوعًا ما، حتى وفيات ماكو فـ نفسيتي مرتاحة كلش.

للظهر، خابرني عقاب كال حـ يتأخر شوية لان بعده يم العقيد.

وصاني انتظره وما اروح، فمن كملت ظليت كاعدة بغرفة الدكتورات انتظر اتصال منه.

دكتورة زينب سألتني.
زينب: مجنت ادري بيج متزوجة، من شوكت انتِ متزوجة؟ 

اماني: كم شهر

زينب: هاا يعني بعدج عروس جديدة

ابتسمت وهزيت راسي بمجاملة.

زينب: الله يهنيج حبيبتي

اماني: شكرا دكتورة

بكلبي اكول يا عروس يا بطيخ، ولله لو يدرون بقصتي!

الحمدلله ع كل حال، المهم الظاهر وخلي المضموم مضموم بكلبي.

اتصل عقاب، رفضته وودعتهن، واخذت غراضي ونزلت.

جان طالع ومنتجي عالسيارة ويدخن..

ومنظره اليشع هيبة باللون الاسود خلا كلبي يدك سريع..

اماني: سلام شلونك

عقاب: هلا يابة هلا

صعدت وهو هم طفة جكارته واجة.

شغل السيارة والتفتلي.

عقاب: شلونه يومج خو ما صار شي؟

اماني: عادي مبي شي جان هادئ

عقاب: خير ان شاء الله

من نبرة صوته حسيت عنده شي، بس سكتت لحد منوصل اسئله.

بس بهالوقت ظليت اسأل نفسي اذا صاير شي بقضية زهرة وعقلي كام يضرب اخماس باسداس!

وصلنا للبيت، تغدينا وكملنا يلا حجة.

عقاب:اريد احجيلج عن الصار بخصوص دعوة البنية زهرة

اماني: اي؟

عقاب: عقيد زيد كال دتجي اوامر من فوك حتى نترك الدعوة وهو حاول هواي بس ماكو نتيجة لان مبلغين مدير المركز يتصرف وياه ويوقف الدعوة والا يحاسبوه اله

اماني: اوامر من فوك؟

عقاب: جهات قوية متنفذة بالدولة

اماني: ليش هذاك الحقير منين مدعوم؟!

عقاب: مراح تصدكين اذا كتلج

اماني: ليش عود؟ اصدك اصدك لتخاف

عقاب: حازم يصير عمه

بعدم فهم كلت.

اماني: يا حازم؟

تنهد ورد.

عقاب: مدير المستشفى الجنتِ تداومين بيها

هنا وسعت عيوني بصدمة وملامحي بهتت..

لهنا لاحكني حازم!! شوكت اخلص منه ومن شره!

اماني: شوون عرفت؟!

عقاب: ليث بحث بالموضوع وكلي

غمضت عيوني وتنفست بعمق ..

مدام الشغلة تمس حازم فكلش صعبة!

اماني: زين وهسة شنو؟ شنو الحل؟

عقاب:  الحل يمي

اماني: شراح تسوي؟

عقاب: يجيج الصافي

اماني: عقاب لا تتهور فدوة ترا حازم مو شوية وايده واصلة!

عقاب: ع نفسه، ترا اني لسة مناسي سالفة تهاونه بحياة الناس ومن ضمنهم اختي ومنتظره عقاب عسير كلش بس خلي افرغله

اماني: شتكدر تسوي اذا هو نفوذه واصلة بكل البلد!

عقاب: دكتورة كتلج خليها يمي لتدوخين نفسج

اماني: شتسوي سوي بس دير بالك ع نفسك، ترا من تتأذى انت اموت اني

عقاب: اسم الله عليج يابه شهالحجي

اماني: احبك واموت اذا صارلك شي، ما اتحمل ولله!

حجيت بقهر، كمش ايدي وكال.

عقاب: اششش لا تجيبين طاري الموت، كلشي ماكو ان شاء الله

اماني: ان شاء الله

لليل، جان يمنه قسورة بدلتله ضماد ايده وظل ويانه عالعشا.

قسورة: ما حاجتج ريما؟

اماني: خابرتني العصر سولفنه شوية وراحت بسرعة، الظاهر متريد نحجي بالموضوع

عقاب: اقترح تخلوها ع راحتها هي اول وتالي تفكر وترجع خبر

قسورة: اتمنى الله يطيني نص برودك يا اخي

اماني: تدري اني اشك عنده ثلاجة جوة مو گلب

قسورة: اذا انتِ تشكين، اني متاكد

عقاب: دكافي عاد

قسورة: ضاج الاخ، يلا سكتنا

ظل يمنا شوية وراح، كلبت بتلفوني شوية وتمددت، شو ماكو نوم.

جان عقاب طالع يخابر بالحديقة، حسيته تأخر كمت وراه.

اخذتلي جاكيت وطلعت وكفت بالباب، مشافني جان منطيني ظهره.

سمعته يكول.

عقاب: ولله العلي العظيم بس تدنالها اطشر راسك واخليك تتندم عالساعة الصرت بيها!!

عكدت حواجبي ومشيت ليمه.

عقاب: كلللللب!!!

الظاهر سده بوجهه.

اماني: شكو عقاب؟

اندار عليه وبهت بوجهي متفاجئ ..

اماني: شبيك معصب و ويامن جنت تحجي؟

...

انتهى!

لا تنسوا التصويت 🖤🦋

#الكاتبة نورمين