رواية خطأ طبي «عقاب الاماني» الفصل الثامن والعشرون 28 - بقلم نورمـين

#خطأ_طبي «عقاب الاماني»

بقلــم : نورمين 🖤🦋

...

اماني: لتروح .. نام بصفي.. رجاءًا عقاب؟

بين شعور الصدمة من كلامها، والتوتر من الموقف ورجفة گلبي عليها، لكيت نفسي متمدد بصفها.

حضنتني ونامت، بادلتها واني صافن عليها والافكار تتصارع براسي ..

كلام قسورة صحيح، لازم ما اخلي الظروف عائق بيني وبين الدكتورة! 

بس ماعرف ليش، شعور الخوف عليها ورغبتي بحمايتها عندي هن رقم واحد!

لزمت خصل شعرها وشميتهن ..

رجعت مررت اصابعي ع خدها وكصتها المجروحات ..

كسر بأيدها للضربتها، هو هالجمال شلون الواحد ينطي گلبه يشوهه!

ولو، جمالها زاد بيهن ما نقص..

ظليت هيج كاعد وأتأمل ملامحها والتفكير شاغل بالي..

وكالعادة، موصلت لحل وبعدني اتخبط!

دكات كلبي صارت مجنونة وهي بكل هالقرب مني..

بس بنفس الوكت، كلش بعيدة عني وصعب اوصللها!

شكد صعب هالاحساس، رغم ان هي بين أيدية وبحضني، بس كلش بعيدة عبالك فرق مجـرات بيناتنا؟!

...

قسورة

بالايام الراحت، علاقتي بريما كلش تطورت ..

كمت ادزلها فديوهات حب واغاني لكاظم الساهر وترد وتنطيني رأيها بكل احترام.

صح هالنقطة معاجبتني لان هي اسلوبها هيج فري وية الكل وتسولف وترد عادي.

مو بس وياي يعني، الا ان هي فارضة احترامها.

رديت ع ستوري مالتها ..

-ممرضتي ما قررت اليوم تجي لو لا؟

شوية وردت..

-شدا تحجي بعدين اني مو ممرضة!

ابتسمت.. يلا اني اذكرج بطريقتي

-اي انتِ ممرضتي الي وبس

-انتقي الفاظك رجاءًا

-انتقيتها.. ايدي متطيب اذا انتِ مموجودة، وهسة كليلي تجين اليوم لو لا؟

ردت بساع.
-الغثيييييث!!!!! هذا انت!!

ضحكت.

-بشحمه ولحمه يالفاهية

-شسوي بحسابي؟

-اتصفح

-وليش مكتلي هذا انت من البداية؟

- ما سئلتيني حتى اكلج

-لعد خ انطيك بلوك

-حتى اجي اهجم بيت رياض ع راسج

-سبع!

-وما انكدر هم

-فارغ

-كافي صمي حلكج، تجين لو لا؟

-لا

-تجين

-مو بكيفك

-تجين يعني تجين

-بأحلامك

-لو تجين من وحدج لو اجي اني اخذج وانتِ اختاري ليعجبج

-مخبل انت شنو هي كوة!

-اي كوة وهم اكو شي مهم اريدج تعرفي

-والي هو؟

-هناك تعرفيه مو هنا

-ليش عود؟

-حتى اشوف ردة فعلج، هنا اظل اتخيل؟ ما ترهم

-تمام رح اجي بس خلي ببالك، مو خوفًا منك بس هيج اريد اشوف اختي

-اي ميخالف، ب5 موعدنا اشوفك هناك يحلو

ما ردت ..

هههه اكدر اتخيل ردة فعلها، خجلها ونظراتها المصدومة.

ذبيت التلفون وغمضت عيوني واني مبتسم..

قررت اليوم اعترفلها وشيصير خلي يصير!

اليوم اطلق العنان لمشاعري واحرر حبي الها ونشوف اذا هي تستقبله أو لا؟!

كعدت ع حيلي، دكيت ع عقاب، يدك ميشيله.

قسورة: وين مولي هذا!!

رجعت دكيت هم ماكو ..

دزيتله رسالة:

"شدتسوي انت والدكتورة بحيث مفارغ ترد ع تلفونك؟؟!"

ذبيته ورجعت تمددت، ضحكت واني اتخيل منظر عقاب من يقرة الرسالة.

قسورة: هههههه عاد تخيلوا يطلع صدك وية الدكتورة!! ملعوون يسويها وهو النهار كله يبجي بوجهي.. ادور هالكبت هذا لعنده تاليته ينفجر بالمسكينة وفنه لينقذها منه!

...

عقاب

ما ادري شلون نمت، حسيت ساعة 4

بعدنه مثلما احنه، باوعتلها مطولًا كأن اريد احفظ ملامحها بمخيلتي ..

كمت سبحت وطلعت، اخذت التلفون لكيت قسورة داك عليه

دكيت عليه، رد بسرعة.

قسورة: صح النوم

عقاب: شمدريك جنت نايم؟

قسورة: ادري وبس

عقاب: وشتريد هسة؟

قسورة: ب5 اني يمكم حتى الدكتورة تضمدلي ايدي

عقاب: اهااا تمام

قسورة: اي وشوف خ اكلك شي

عقاب: كول

قسورة: اليوم رح اصارح ريما بمشاعري

ضحكت وكلت بأعجاب

عقاب: صلف!!

قسورة: اي ولا اظل مثلك اباوع واتحسر من بعيد

عقاب: ليش ما تنجب انت؟ اني شعليه بكل عزة حاطني لاطم؟

قسورة: من حبك لاشاك حبيب

عقاب: دولي

قسورة: موووواح

سديته مبتسم، شكد سرسري هالولد.

رحت للدكتورة كعدتها، فتحت عيونها ورمشت بلطف ..

بلعت ريكي بتوتر، كلمن يكعد من النوم هيج حلو لو بس هي؟

بس عقاب اصحى..

درت وجهي وعلكت الشسوار.

عقاب: حيجي قسورة تبدليله الضماد مال ايده

هزت راسها وكامت، رفعت شعرها بقراصة لفوك وخلت كذلتها نازلة من الجوانب..

اخذت ملابس حتى تبدل برا، واني عيوني عليها..

شدعوة هلكد حلوة اليوم؟

لو المرض لايكلها وهي حليانة لو عيوني بيهن شي!

كملت، اخذت تلفوني وكعدت بالصالة.

عالك التلفزيون عالاخبار.

شفت خبر الاعتداء الي صار لاماني منطينه بالنشرة همين وديحجون ع تفاقم موضوع العنف ضد الكوادر الطبية.

عقاب: هو لو قانونكم بي خير يتجرأون يسوون هيج؟

اجتي الدكتورة.

اماني: ويامن دتحجي؟

التفتتلها وكلت.

عقاب: خبر الاعتداء عليج اليوم منطيه بالاخبار

بهتت بنظراتها ودارت وجهها عالتلفزيون..

اماني: عززا!

عكدت حواجبي بتساؤل.

عقاب: شبيج؟

اماني: هسة تصير سالفتي ع كل لسان افففف

باوعتلها بعدم تصديق وابتسمت، هاي هي الضحية وهيج تفكر!

شحال لو هي الفاعلة؟ ولله يا الله ..

عفية بلد، كلشي بي يمشي بالعكس!

عقاب: شو تعاي كعدي كبالي

كعدت، باوعتلها وكلت بجدية.

عقاب: شنو هذا الحجي الكلتي؟ شنو سالفتج تصير ع كل لسان؟

ردت بتوتر وهي تلعب بأصابعها..

اماني: مو .. مو هاي مو خوش سمعة عليه

عقاب: يابة انت صاحية لروحج شدتحجين؟

اماني: انت متعرف هالامور شلون تأثر ع سمعتنا كـدكاترة، العالم شمدريهم اني مسويت شي وهو مات من وحده؟! محد يصدكني وكلها تمشي ورا حجي اهل الضحية وتعرف انت شعبنا شلون، يصدك كل الناس الا اهل الاختصاص والفاهمين

عقاب: طز بيهم، وطز باليفتهم قبل الميفتهم، يابة انتِ بهذا مكانج وبهاي شهادتج، شلون تنطين اهمية لهيج عقول متحجرة؟

اماني: هذا مجتمعنا ترا عقاب، متكدر تغض بصر و تتصرف كأن مصار شي

عقاب: هو شنو المجتمع؟ اني وانتِ وهم وذولة وذولاك، اكو الزين واكو المو زين، متكدرين ترضين الكل لان الناس هاي مترضى ابد! اذا ظليتي تفكرين بهيج طريقة فأنتِ وحدج حـ تخسرين!

اماني: اني وياك بكلشي كلته، بس هالنماذج موجودة ودتأثر حتى عالناس الزينة، يعني شتسوالي اذا باجر عكبة واحد سأل ع اسمي وكلولهم ديروبالكم منها ترا مو خوش دكتورة وهواي راحولها وماتوا؟؟

عقاب: هالحجي صح؟

سكتت مفاهمة..

عقاب: اقصد هذا الكلام الكلتيه هسة هو صدك صار؟

اماني: من عدا اختك، لا مصار ابد

عقاب: عوفي اختي ع صفحة، وضعها يختلف

اماني: تمام

عقاب: انتِ مكتلتي احد، وكلمن لحد يومه وسلم امانته لالله وودع، اني وانتِ نعرف هالشي والاهم ان الله هم يعرف، اما اذا كلتي المجتمع و الناس، فذوله حتى على الرسول طلعوا اشاعات وكذبوه وحاربوه، تريديهم يرضون عنج؟ انتِ ليش شايلة هم الهم لهالدرجة؟

سكتت شوية وهي تباوعلي، ظليت منتظر رد فعلها او كلامها ..

ضحكت، عكدت حواجبي بعدم فهم.

اماني: انت شنو من سحر عندك؟

عقاب: سحر ايش؟

اماني: سحر بالكلام بحيث تخلي الواحد رئسن يغير وجهه نظره ويقتنع برأيك

ابتسمت.

عقاب: مقبولية من الله، بعدين انتِ صدك صفنتيني! دكتورة شكدج شكبرج مهتمة لرأي كم همجي؟

اماني: بعد كلامك الكلته، مراح اهتم لرأيهم

عقاب: مو بس رأي الهمج، حتى رأي الفاهمين، لتهتمين لرأي اي احد بيج كائنًا من كان، مدام انتِ مغلطانة ودتسوين الصح هذا هو

هزت راسها مبتسمة..

..

اماني

ما دققت كلش عالطلب السخيف لطلبته من عقاب، احسه عادي بس اني معظمته ..

واذا حضنني ونمت وياه؟ عادي مو احنه زوجين.

وهسة، اجتي ريري وقسورة لسة ماكو.

بالمطبخ دا اجيبلها عصير وكيك، اجاني عقاب.

عقاب: قسورة اليوم يحاجي اختج بحبه

شهكت بصدمة

اماني: شننووو!!!

خزرني والتفتنا ع ريما الي دتباوعلنا بتعجب..

عقاب: صوتج نصيه شكد مفضوحة!! هو كايلج يحبها مو؟

بلعت ريكي وكتله ..

اماني: اي بس ليش هلكد مستعجل؟

عقاب: كليله اله، اني شكو المهم انطيتج خبر

اماني: ليش كتلي عود؟

عقاب: الموضوع يخص اختج غير؟

اماني: اي اعرف بس اكول ليش..

عقاب: حسيت لازم اكلج وبس

اماني: هااا

عقاب: كارثة ولله

حجة بانزعاج ودار وجهه وراح..

شبي انعفص فجأة شسويت قابل!

كعدنة وورة شوية اجة قسورة، ومن اول ما طب عيونه شاخصة ع ريما.

نزع جاكيته وفتح قميصه، طلع ايده وبلشت اشتغل.

عقمتها ولفيتها بشاش وريما وياي بكل خطوة.

تعرف شنو دا اسوي، فقبل ما اكللها اريد فلان شغلة الكاها محضرتها الي.

كملت وانسحبت، لان طول هالفترة الاستاذ اكل اختي بعيونه ولا كال فشلة اختها كاعدة هههه.

عقاب شال علبة الاسعافات واني كمت وراه، غسلت وهو كال بصوت عالي، حتى يسمع ريما.

عقاب: دكتورة بس شوية محتاجج بشغلة

رديت بنفس طريقته.

اماني: اي جااية جاااية

رحت وراه، شفت قسورة يغمزله ضحكت.

طبينا للغرفة نضحك.

اماني: اكلك خو ما صديقك ياخذه الواهس؟

عقاب: شقصدج؟

اماني: اااا يعني

رفع حاجبه ورد

عقاب: حسب ..

اماني: يعني شنو؟

عقاب: يجوز اي ياخذه الواهس ويسوي شغلات ثانية غير الاعتراف ويجوز لا..

اماني: لا بلا؟!!

عقاب: اي ولله، تعرفين الي يحب ميقاوم هيج فرص!

هذا شديخربط!

اماني: مثلك يعني؟

احتدت ملامحه

عقاب: بس اني ما احب

اماني: اي صحيح، انت تعشق ما تحب

وسع عيونه بنظرة ساخرة وكال

عقاب: ومنو هاي الاعشقها ان شاء الله بسلا انتِ؟!

تقدمت عليه، رفعت رجليه وكلت بثقة.

اماني: اي نعم اني

هز راسه مبتسم ..

عقاب:  بس لو اعرف هالثقة العندج منين تجيبيها؟

اماني: مو من شي محدد، بعدين اني كاشفتك

عقاب: صدك ولله ؟

اماني: استهزء ميخالف، هاي الطريقة الوحيدة البقتلك حتى تسكتني بس خلي اكولك شي، انت مفضوح .. !

مكال شي، نظراته شاخصة باتجاهي، منتبه عليه شكول وشنو اسوي حركة..

رفعت رجليه حتى اوصله، حاوطت رگبته بأيدية.

انصدم ونظراته بلشت تضيع اكثر بسبب قربنا من بعض.

باوعت بعيونه واني مبتسمة وكملت بنفس الثقة.

اماني: تصرفاتك نظراتك كلامك وخوفك عليه وحنيتك بوقت الحاجة، امور فاضحة حبك الي بس المخليك للان تنكر، هو عقلك وكم فكرة مغلوطة براسك وبس، لان كلبك خلاص اعلن استسلامه بحبي

رد بالنفي يحاول يستجمع ذاته بعد الكلام القوي الي سمعه مني..

عقاب: تؤ..

اماني: اثبتلك؟

ضيق نظراته بترقب، ابتسمت.

وبسته، ماعرف شلون اجتني الجرأة وسويت هيج بس صارت!

بالبداية جان مندهش، بعدين هو اخذ السيطرة مني!

ابتعدت ..

باوعتله ملامحه ارتخت وبعيونه نشوة الحُب!!

خليت ايدي ع كلبه، يدك سريع عبالك جان بماراثون ركض!

اماني: مدام هذا هيج ينبضلي، شتريد تكول كول.. كاشفتك!

عقاب: هه ترا مو خشبة كدامج، رجال و اكيد اتأثر مو شرط يكون اكو شي من الي ببالج!

اماني: صحيح كلامك بس خلي انبهك ع شغلة، الرجولة تتأثر لحظة الاثارة الجسدية بس الگلب؟ ميتأثر وينبض بهالطريقة الا من شخص يحبه يقتربله

باوعلي بنظرة .. محتارة ضايعة حزينة ماعرف شلون افسرها بالضبط وابتعد كعد عالجرباية!

ليش هيج يسوي بنفسه وبيييه؟؟؟!

...

قسورة

من راح عقاب والدكتورة، لبست قميصي وريما ساعدتني لان صعب البسه وايدي متأذية.

كعدت كدامي وكالت.

ريما: شنو الشغلة لتريد تكولها؟

اعتدلت بكعدتي ..

قسورة: ع هاي جاية؟

ريما: صراحة غير؟ اي لان اني فضولية واريد اعرف، من كتلي ولسة افكر افكر افكر افكر

تنهدت..

قسورة: واني؟

ريما: انت شنو؟

قسورة: هم صدك..

دنكت راسي وزفرت ..

اهدئ قسورة لتنزعج، خليك مثلما انت مخطط!

ريما: شبيك؟ ايدك دتوجعك اصيحلك اماني؟

شلت راسي، ع وجهي ملامح تعبانة ومشتاقة وتواقة للحُب!

هزيت راسي بلا وكلت.

قسورة: هذا يوجعني

اشرت ع كلبي..

بهتت ملامحها، اعرفها ملاحظة حبي بس مغلسة!

قسورة: شنو الحل اله برأيج؟

ريما: تعالجه ويشوفه طبيب غير؟

هزيت راسي بلا ..

ريما: لعد؟

قسورة: علاجه عد وحدة تدري بي متأذي ويريدها بس هي مغلسة ومسوية الوضع عادي، تعرفيها؟

وجهها احتقن.

ريما: تذكرت امي وصتني اكول لمون ع شغلة ونسيت، خ اكللها

كامت، لحكتها بساع كمشت ايدها ..

اندارت عليه وجرت ايدها مني ..

ريما: انت شبيك!!!

قسورة: بيه انتِ!

ريما: قسورة رجاءًا .. اني ماريد اجرحك بكلامي ياريت تفهمني

قسورة: اكو واحد ثاني؟

ريما: ليش هو منو الاول؟ لا اول ولا ثاني اني حرة نفسي

قسورة: وليش متنطيني فرصة؟ انتِ مو النهار كله تباوعين كاظم الساهر وتتغزلين بي بحسابج وتتمنين رجال يحبج مثله!!!

ريما: اي واذا شنو يعني؟

هديت ايدها، اخذت نفس وكلت بصوت هادئ..

قسورة: أحبينــي ..

رمشت بصدمة

قسورة: أحبيني بلا عقدِ.. وضيعي في خطوط يدي ..

ريما: بس..

ما سمحتلها تحجي، كملت..

قسورة: أحبيني لأسبوعٍ، لأيام، لساعاتٍ.. فـ لستُ انا الذي يهتم بالأبدِ ..!

ريما:  قـ..ـ قسورة انت شدتحجي!!

قسورة: اريدج تحبيني مثلما احبج

ريما: بس انت صدمتني!

قسورة: هي هيج لحظات لازم يصير بيها اكشن وصدمات، المهم ريحي گلبي وكليلي شنو جوابج؟

ريما: ما ادري ..

قسورة: دتعاي خلي نكعد ونتفاهم

هزت راسها ومشت وراي، كعدت اجيت كعدت بصفها.

باوعتلي بارتباك، اتفهم وضعها بس يا اخي كلبي طك ما اتحمل انتظر بعد!!

قسورة: هسة تكولين لنفسج هذا شديمسلت، شلون يحبني واحنه نهار كله نتناكر وما عدنا لقاء واحد بس مار بسلام

ضحكت وكملت ..

قسورة: صدكيني اني هم ما اعرف شلون وشوكت حبيتج، بس الاعرفه ان انتِ دخلتي گلبي من اول مرة شفتج بيها تبجين ببيتكم ويا سبحان الله، هم تناكرنا

ابتسمتلي وكالت

ريما: وانت بعدك تتذكر؟

قسورة: ولج شلون انسى؟؟!! هذاك اليوم محفور بعقلي وبكلبي وحافظ تفاصيله عالغيب

تباوعلي وساكتة ..

قسورة: احجي لا تسكتين اريد اعرف بشنو دتفكرين!

ريما: ليش حبيتني؟

قسورة: بغض النظر عن ان اني احب كلشي بيج بطريقة عجيبة، ما اعرف شلون بدة هالحب ولا شلون انخلق بكلبي.. هيج من الله!

ريما: ليش جنت متابع حسابي ومكايلي انت منو؟

قسورة: ببساطة حبيت اتعرف عليج وع تفاصيل حياتج لان اكو فد فضول بداخلي، بالاضافة للشوق يعني

ريما: ها؟

قسورة: يبعـد كل ناسي، 16 وجعا بحليك عقاب

ضحكت، ابتسمت ع ضحكتها

ريما: شعليه عقاب ادور!

قسورة: معليج بيناتنا

ريما: كمل ترا بعدني ما فهمت

قسورة: خلاصة الحجي، اشتاقلج واصبر روحي بصورج وسوالفج، اما ليش مكتلج هذا اني؟ مسئلتيني ولا صارت فد شغلة تستوجب اكلج ترا اني فلان

ريما: يعني مجان عندك مانع تكلي اصلا؟

قسورة: اي

ريما: اممممم تنطيني وقت افكر؟

ابتسمت براحة، ما دام ماكو رفض قاطع يعني بيها مجال!

قسورة: كل العمر كدامج بس ها؟ هالله هالله بالفقير

ابتسمتلي وكالت..

ريما: ان شاء الله

قسورة: وهسة كومي جيبيلي مي فحطتيني

ريما: متكوم انت شبيك مكسر؟

قسورة: ميخالف اريد اشوف طولج الحلو

ريما: خيولن ذني قديمات، ميعبرن عليه ترا

قسورة: هم صدك، نسيت اني ويامن داحجي، دكتوووورةةةةةةةةةةةة

صحت ع اختها، انخلست وكلتلي.

ريما: يااااا اشششش اششش ولك

اجت الدكتورة هي وعقاب ع صوتي.

عقاب: شكو شبيييك!!

قسورة: ما بيه حبيب، بس ردت مي وهاي الخبيثة تتعاجز تجيبلي

عقاب: طيح الله حظك اذا صدك

اماني: وكعت كلبي عبالي شو شصار بيكم، دكومي جيبيله مي يا ريري!

ريما: ناقصه ايد لو رجل؟ لسانه شطولة هو يجيب سم لروحه

قسورة: اووخ عنيفة

راحت الدكتورة وعقاب دك تلفونه راح يجاوب.

قسورة: لعد شبي حظي من اخابرك ما احصلك، دكتورة ديري بالج منه خاف يلعب بذيله

حجيتها بخبث، عقاب خزرني والدكتورة باوعتلي بصدمة.

ريما: انت شبيك شبيييك متكلي، متستحي شون هيج تسوي!!!

ابتسمت باستفزاز

قسورة: لو من الاول كايمة جان مصار الصار

ريما: بسيطة لعد الا ما اكوم وشتريد مني ما اسوي وهم ما افكر بكلامك وها اها بطلت

عكدت ايديها لصدرها وكالت بتحدي، ضحكت.

قسورة: يمة اروح فدوة لهالوجه المعصب..

ريما: هه ميفيدنك هالسوالف فلا تتعب نفسك، ترا اني مو من ذني المايعات والغبيات لتضحك عليهن بكلمتين

قسورة: ادري..

بارعتلي بغرور، كملت.

قسورة:  ينضحك عليج بكلمة وحدة شدعوة كلمتين

وسعت عيونها بصدمة والدكتورة اجت بيدها المي وكوة لازمة ضحكتها..

كامت ريما شمرتني بالكلاص مال المي بوجهي.

قسورة: الله انتعاش، بربج بعد واحد

ظلت لا تاخذ ولا تنطي مصدومة، هههه ولكم يا جماعة الخير هاي البنية غير تنكرط من تتعصب!

ريما: خبييييث

قسورة: حبيبتي ولله، شهادة اعتز بيها

غمزتلها، خزرتني واخذت جنطتها وكامت.

لحكتها الدكتورة والظاهر كبن عدها الفيوزات ورح تروح.

مدري اني دست زايد، افف شون مشكلة هاي بلا واني احب شكلها من اجفص ببطنها!

راحت رغم الدكتورة چلبت بيها.

عقاب: وراثة عدهن سالفة المي

سألته بعدم تصديق

قسورة: ماكلها يعني؟؟

هز راسه.

عقاب: شتكول انت؟

قسورة: ههههههههه ولله عمي هالخوات مو قليلات

كعدت الدكتورة.

اماني: انتوا تستاهلون

عقاب رفعلها حاجب معاجبة، غلست عنه.

قسورة: الظاهر مو بس اني و ريري دنلعب لعبة توم وجيري

عقاب: قسورة ولا حرف!

سويت حركة سحابة عود سديت حلكي بيها.

اماني: شصار وياك؟

قسورة: امممم ام امممم امممم

عقاب: احجي عدل

قسورة: امم اممم امممم

عود حلكي مسدود وما اكدر احجي، خزرني خزرة خلاني اتراجع عن حسي الفكاهي بثانيتين.

قسورة: ما صار، حتفكر وتردلي خبر

عقاب: بس؟

قسورة: خو ما تريد احجيلك بالتفاصيل؟

عقاب: اني الك بعدين

قسورة: اهووو دكتورة لزمي رجلج بالش بيه اكس مربع شنو هي وليّة!!

عقاب: انجب ساقط

اماني: زين انت شتكول، ردة فعلها مطمئنة؟

قسورة: ولله دكتورة اني متفائل، ما رفضتني وتقبلت الوضع عادي يعني اكو امل واذا اكو شي غيره، انتِ افهميلياه منها

اماني: تمام

قسورة: اترخص اني لعد، شكرًا ع كلشي

اماني: العفو مسويت شي

عقاب: الكف الضلع

اماني: شنو يعني؟

قسورة: معناها انكلع، حقج متعرفيها هاي الفاظ سوقية

عقاب: قسورة!

كالها بحـدة ديحذرني، لبست حذائي وطلعت.

خلي افلت بالعزيزة، الظاهر عقاب مورث واجة يطلع حركته بية!

..

اماني

لليل، جعت دا اكوم اسوي عشا، كام وياي عقاب.

اماني: شبيك لحكتني؟

عقاب: اريد اسوي عشا، عندج مانع؟

اماني: لا بس اني رح اسوي!

عقاب: كبة لو طماطة وبيض؟ بربج معدتي عفنت منهن ومن اكل المطاعم

بهتت بوجهه بفشلة..

عقاب: شو دوخري

دفعني ع صفحة، وراح للثلاجة طلع بتيتة.

اماني: شنو حتسوي؟

عقاب: مخلمة بتيتة ولحم مثروم، تريدين؟ حتى احسب حسابج وياي..

هزيت راسي، طلع بعد وكعد يكشر ويثرم بسرعة.

عقاب: طلعي اللحم من الثلاجة وخلي بمي وحطي عالنار خلي يفك

اماني: تمام

سويت مثلما كلي، ورجعت كعدت اباوعله.

شلون يثرم بسرعة عبالك شيف محترف ..

انتبهلي اباوعله، اخذله كم نظرة عليه ورجع.

اماني: منو معلمك هيج تثرم؟

عقاب: امي، جنت اساعدها دوم بالثرم لان احبه

اماني: بس متخاف تعور نفسك من هالسرعة لتثرم بيها؟

عقاب: هو انتِ بس شيلي عينج، ميصير شي ان شاء الله

اماني: هه قابل انت شمسوي وخابصني هو كله بتيتات وثرمتهن، شنو قابل صنعت صاروخ!

باوعلي بتك عين وضحك..

عقاب: واضح

اماني: اصلا منو ميعرف يثرم!! ولله يا الله عباله بس هو يعرف

عقاب: تعالي ثرمي بدالي لعد

اماني: اجي شنو يعني، شو وخر

كام، كعدت بمكانه وكمت اثرم بسرعة اقلده.

اماني: شوف اللحم ليحترك

كلتها من ورا خشمي، كال بخفوت بس سمعته.

عقاب: لا هاي هي

اماني: كلت شي؟

عقاب: استمري مو وياج

شديتلها بالثرم وهو يباوعلي، كلت خ اراويه الثرم ع اصوله، شنو قابل بس هو يعرف!

عقاب: ع كيفج لتتعورين

اماني: شيل عينك وميصير شي ان شاء الله

استخدمت نفس جملته، باوعلي بنفاذ صبر وكال بجدية.

عقاب: دكتورة دا احجي جد عوفي الضحك لتتعورين مو لعبة هي والسجينة حادة كلش!

اماني: اي تمام

رديت بلامبالاة، هو هم من شافني هيج دار وجهه وحمس بصل وية اللحم، صارت الريحة دمااار.

واني دا اثرم، ما حسيت الا الدم ترس المكان واصبعي ينزف، شهكت بألم ممزوج بالفزع من منظر الدم!

عقاب ركضلي، شاف ايدي عكد حواجبه وحطلي كلينس ع اصبعي وراح يجيب علبة الاسعافات.

عقاب: عصري عالجرح

راح ورجع، وخرت الكلينس خلالي ديتول.

شاغت روحي من الالم والحرگة ودمعتي نزلت..

عقاب: مو كتلج ع كيفج!! بس انتِ ما تتعاندين شسوييي لراسج اليابس هذذااا!!!

اماني: عقاب مو وكته حجيك هذا

عقاب: شو خلي اشوف الجرح جبير لو لا

اماني: لاا حباب يوجعنييي

عقاب: ميخالف يــعمري شو بلا بس شوية

وكفت الصورة يمي..

السمعته صحيح مو؟
كلي عمري!!!!!!!!!

الكلمة طلعت منه بتلقائية بحيث حتى هو ما حس ع نفسه شكال!

عقاب: زين مو كلش جبير، مجرد خدش بس يحتاج اضمده

يحجي واني صافنة علي بغباء..

فرقع باصابعه كدامي

عقاب: الو دكتورة مو وياج؟؟

فزيت من صفنتي، باوعتله وضحكت

اماني: عيد شكلت مسمعتك

عقاب: دا اكلج الجرح مو جبير، هيج بس شخطة

اماني: لا مو هاي القبلها

عقاب: ياهية؟

اماني: مال ميخالف عمري

عقاب: شنوو؟!!

...

انتهى

لا تنسوا التصويت 🖤🦋

#الكاتبة نورمين