خطأ طبي «عقاب الاماني» الفصل السابع وخمسون 57 - بقلم نورمين

#خطأ_طبي «عقاب الاماني»

بقلــم : نورمين 🖤🦋

...

مشيت خطوتين ورجعت، شفته راح للمطبخ واني صعدت لغرفة الدكتورة.

ماعرف ليش هيج داسوي، بس رجلية وحدها مشت مو بسيطرتي، اريد اشوفها ميت عليها!!

شفت ريما هستوها دتطلع من الغرفة، انصدمت من شافتني وسألت.

ريما: عقاب!! هاي شدتسوي هنا؟؟

عقاب: الدكتورة موجودة؟؟

ريما: عفوًا؟ شتسوي بيها ممكن اعرف؟

ع صوتها طلعت اماني، وهي اللخ هم انصدمت بشوفتي!

اماني: شدتسوي هنا انت؟

ظليت ساكت، هو اني نفسي ماعرف شدا اسوي هنا.

ريما: احجوا جوة رح ابقى هنا اراقبلكم الوضع

اماني: ميحتاج ماكو شي نحجي بي بعد، من فضلك روح

عقاب: لا ما اروح

اماني: ع راحتك، ابقى واكف هنا لعد

رادت تسد الباب لزمتها.

خزرتني وحجت بعصبية.

اماني: شترررريد مني بعد!!!!!

ريما: يمعودة صوتج ليجي احد، فوت انت اللاخ جوة رح تفضحونا

دفعت اختها طبت لجوة، ادور جرتني طبيت اني هم، وكفت يم الباب وحجت بتنبيه.

ريما: بدون صياح احجوا بهدوء وبس!! ولتطولون هم، اذا اجة احد اني اكلكم

ابتسمت للدكتورة بخفة وراحت.

اماني: ممكن اعرف شجاي تسوي ببيتي وبغرفتي؟

مكتفة ايديها وواكفة بزاوية بعيدة عني.

عقاب: ممكن اعرف شبيج هجومية؟

ردت ساخرة.

اماني: هه.. هجومية! شتريد اخذك بالاحضان مثلا؟

عقاب: وليش لا؟!

ردت بجدية.

اماني: تؤ غلطان، اماني ذيج تغيرت.. وگلبي الي حبك بجنون عقل ورجع لوعيه.

استصعبت كلامها، بس ميخالف مجروحة وحقها..

عقاب: لعد وگلبي شبي ما عقل بعده؟!

اماني: مشكلتك هاي مو مشكلتي

عقاب: اهااا؟

هزت راسها بثبات، راسمة ملامح جدية وحادة ولا چنهة ذيج العشكت ابتسامتها ولطافتها.

عقاب: انتِ متغيرة عن قبل حييل، معقولة هيج جروح الحب تغير الانسان؟

اماني: جروحك هاي مو جروح الحب

عقاب: ماكو فرق، لان بگلبج اني الحب

اماني: مو چنك واثق زيادة!

عقاب: متاكد هواي مو بس واثق

اماني: ارجع واكولك مرة ثانية، غ..ل..ط..ا..ن!!

عقاب: لتجذبين، عيونج فاضحتج!!

اماني: وهسة صايرلي تفتهم بلغة العيون!

عقاب: من زمان، مو من هسة

اماني: اختصر، شتريد مني وشعندك جااااي؟!

عقاب: رجليه جابني..

رديت بضعف، ماعرف شبيه..

هزت راسها بأسف وتقربت مني وهي تأشر ع گلبي.

اماني: هذا بطّل تسمعله، يضيعك بعدين، تذكر الي بيننا غلطة ولازم تتصحح.

غمضت عيوني مستذكر كلامي الكلته الها.. نفس هالجملة عينًا.

عقاب: بعدها بكلبج لسة؟

اماني: كل كلمة طلعت منك بعدها بكلبي، ومستحيل يجي يوم انساها!! مستحيل يجي يوم انسى بي شكد اذيتني ودفعتني ثمن حبي الك غالي!

عقاب: يعني مـ راح تنسيني؟

اماني: انت هذا الي هامك؟

عقاب: اي.

اماني: شكد اناني لعد!

عقاب: بيج اني اكبر اناني!!

ردت بحدة..

اماني: شنو هالتناقض انت شترررريد عجزت افهمك شنو هاي لعبة جديدة؟؟!!!!!! احبج واناني بيج بس ابتعد عنج واطلكج؟؟!!! ماريدج بس اجي لبيتج واطب لغرفتج بدون وجه حق!!! لك انت شنو بس فهمنييي شنووو!!!!! ما عندك كلب متحس؟؟!!! اذا انت تحبني مثلما تكول ليش هيج تكسرني ليش دتجرحنييي؟؟ لو يعجبك تشوفني اتعذب؟؟ شتريد شترييييييييد بس فهمني تعبت اني تعببببت!!!!!

كلامها المعاتب اختلط بصوتها العالي الي ديطلع متحشرج بسبب موجة البكاء الي دتقاومها..

اماني: حبيتك بكل حواسي وانت متعرف تحب او تحترم هالحب حتى، واني ما مستعدة اتحمل نوبات تناقضك اللامنتهية..

تقربت منها وكُلي تأثر بالكالته..

دفعتني ونترت بيه بتحذير..

اماني: دير بالك تمد ايدك عليه! عقاااب دير بااااالك!!!!!

عقاب: تمام هاي وخرت بس اهدي .. اهدي...

اماني: شنو اهدي شنو اهدديييي؟؟ انت دتموتني ببرودك وعدم اهتمامك اطلع منا لو سمحت..

عقاب: بس اني ...

للحظة ردت احجيلها سبب تركي الها، بس قاطعتني وردت بأصرار.

اماني: بدون بس كتلك اطلع!!! لتخليني اصيح الحرس، خليني محترمة ذكرياتنا وعشرتنا ماريد اسوي تصرف مو حلو، تفضل برا..

مدت ايدها باتجاه الباب بمعنى اطلع، تنهدت دافع الثقل الي استوطن كلبي..

ابتسمت بحسرة ودنكت راسي، ايدي تلعب بلحيتي بعشوائية..

هي هاي تاليها؟؟

بس ولله حقها، غير اني مصختها ..

اختفت ابتسامتي وطلعت من يمها واكو على ظهري جبال من الانكسار والاحباط..

لاكتني ريما، رادت تحجي بس من شافت وضعي سكتت وراحت لاختها.

نزلت بهدوء وطلعت للحديقة واني افكر بكلامها..

......

اماني

وية ما طلع، كعدت بالكاع وكمت ابجي بدون صوت..

كمت استحي من نفسي ابجي بصوت عالي.

واكثر شعور موجع بالدنيا هو الكتمان، البجي بلا صوت..

عبارة عن عذاب بطيئ غير معلوم النهاية..

اجتي ريـما خايفة..

ريما: ها مون شصار..

باوعتلها ودموعي نزلت ..

اماني: شيريد يصير اكثر من الصار ..!

اجتي حضنتني وكامت تمسد ع راسي بحنان..

لوين يلا هدأت وردتلي نفسي.

ريما: لتشوفي بعد اذا كل مرة هيج تظلين وراه

اماني: علساس بيدي، متشوفين شون هو يجي مثل القدر ما منه مهرب

ريما: لعد قوي گلبج، لتخلي يحس شكد متعذبة بدونه، كرامتج وينها مون؟!

اماني: لج هو بقالي كرامة بقالي شي لنفسي؟ حتى كمت اتعارك وية روحي وكلبي شلون رايداته رغم كلشي سواه!

ريما: اففف هسة انتفلج شعراته ذني واجره من اذاناته الجنهن عراوي طاوة بس لتضوجين

اماني: ليش تحجين عليه؟

ريما: اهووو شوف وين چلبت!!

ضحكت بعز وجعي، مدري اني تخبلت..

ريما: اي دضحكيييي يروحلج فدوة عقاب وكل عشيرررررته ابوس ضحكتج يمةةة صدقة صدققققة

باستني وشبكتني حيييل، تنهدت بـراحة بس طاريه بعده ببالي..

.....

عقاب

ظليت صافن بعالمي الخاص وكلامها ميروح من بالي.

فاصل عنهم شديحجون وحتى اذا ديتآمرون ع موتي هم ما اهتم.

ندسني قسورة.

قسورة: شبيك وين صافن؟

عقاب: ماكو، شوكت نطلع عاد؟

قسورة: اصبر مظل شي

الحجي: ها عقاب شتكول؟

تحمحمت ورديت..

عقاب: بخصوص شنو يابة؟

الحجي: موضوع رياض

عقاب: برأيي يحلها من يدفعلهم الفلوس ليريدوها، لان متسوة ينفضح وتتسكط سمعته والانتخابات اسبوع اللاخ

رياض: ما عندي فلس احمر انطي!

ريان: بابا ترا كلامه صحيح!!!

عقاب: عوفه ع راحته، براحتك دكتور لعندي كلته واتوقع انت تعرف هاي الناس شنو طينتهم بحكم شغلك المتواصل وياهم من سنين

رياض: ما انسجن لتخاف، اعرف شلون اطلع نفسي من هالورطة!

عقاب: ياريت لو تجي سجن وبس، يكتلوك وتروح بخبر كان، ترا هم مو اغبياء يسجنوك ويدرون بيك تكدر تبرئ نفسك وتطلع، شغل عقلك شوية وتصرف بواقعية

رياض: اعرف شلون تحجي وياي

عقاب: اعرف ميحتاج

الحجي: لا تبدون، يلا كومونا وانت دكتور مثل مكالك عقاب، ادفعلهم الفلوس وريح راسك

رياض: الله كريم اشوف شسوي

كمنه لسياراتنا.

قسورة والحجي بسيارة واني بسيارتي.

طلعت اماني فتحت البصمة مال سيارتها وواكفة تحجي وية ريان، الواضح مو راضي تطلع.

ولان اعرف بسالفة التهديد، نزلت رحتلهم.

ريان: اني اوصلج

اماني: ميحتاج اروح وحدي

ريان: لعد خلي واحد من الحرس وياج للاحتياط

اماني: ليش هو شكوو؟؟!!

ريان: مون بلا عنادج، الوضع جدي كلش ترا واني من غير شي متاخر ع جامعتي!!

اماني: متروح منو مأخرك!

ادخلت وحجيت ..

عقاب: كلام ريان صحيح، لتطلعين وحدج هالفترة

اماني: عفوًا؟ وانت شعليك حتى تدخل؟

رفعت حاجبي واردفت بحدة.

عقاب: لسانج لزمي

اماني: وانت منو حتى تحجي وياااي؟؟!!

ريان: اماني كافي!

اماني: شنو كافي اني شسويت!!!

ريان: كتلج طلعة وحدج ماكو، لو اني اخذج لو تاخذين وياج حرس

اماني: اي واكعدهم بغرفة الدكتورات ينتظروني وانطيهم جكليتة حتى يكعدون عقال ع ما ارجع مو؟؟

ريان: اماني!!!!

عقاب: اني اوصلها، روح انت

اماني: ومنو كلك اني اصعد وياك؟ وفر ع نفسك هالحركات

عقاب: ريان روح، خليها عليه

ريان: بس عقاب ..

قاطعته ورديت بأصرار.

عقاب: بدون بس، لتخاف عليها مدامها وياي روح لحك كليتك

ريان: تمام شكرا

باوعلها وكال.

ريان: لعد بالرجعة انتظريني اني اجيج

عقاب: نشوف شلون عود، يلا توكل

ظلت مستغربة شلون ريان عافها يمي وراح.

عقاب: مثل الشاطرة تروحين تصعدين حتى اوصلج

اماني: لو تموووت!!!

عقاب: نجرب؟

اماني: اضربك ولله!!

عقاب: ضربة ايش ضربتج

اماني: بالكعب هذا ولله ادفرك واعورك

رفعت رجلها اشرت ع حذائها الكعب وحجت بعصبية.

لزمتني ضحكة هاي شدتسوي بروحها، حتى بعصبيتها تنكرط.

عقاب: كل قوتج هاي؟ بعدين هذا شلون تمشين بي متوكعين؟

اماني: معليك ووخر عني مالك علاقة بيه انت

عقاب: انطيت كلمة لاخوج اني اوصلج، تحركي يلا

اماني: ما اصعد وياك!!!!!!!

عقاب: اذا ملاحظة مدا اطلب منج، دا أأمرج!

اماني: مو جديدة عليك حضرة الدكتاتور

عقاب: زين بعده ببالج الدكتاتور

اماني: هو ينسي؟

عقاب: ما اتوقع..

اماني: بس خلي ببالك، ذاك الوكت راح وتغير واحنه ولد اليوم، قبل جنت زوجتك فـ اخضعلك، هسة بشنو تكدر تجبرني اخضعلك؟!

عقاب: اساليب هواي اكو، لتديرين بال

اماني: انت اكثر انسان اكرهه بحياتي!

عقاب: يزيدني شرف هالشي، يلا استعجلي ..

اشرتلها بيدي ع السيارة، خزرتني وراحت صعدت من لاچارة.

لحكتها، طول الطريق التوتر جان حاضر كعنصر رئيسي بيننا.

رغم ان هذا الشي الاريده، بس ابتعادها عني حتى بالنظرات يأذيني..

لذلك دا افكر بجدية ان احجيلها السبب الحقيقي الي دفعني اطلكها.

اماني: نزلني هنا

عقاب: بعدنا ما وصلنا، شتسوين هنا؟

اماني: وانت شعليك حلوة هاي

عقاب: عليه ونص

اماني: وكف السيارة!

غلست، ردت حجت بصوت عالي.

اماني: كتلك وكفهاااا شبيك متسمع!!!!

ما انطيتها اي رد فعل، تخبلت بالزايد وفتحت باب السيارة.

صحت بيها بخوف ممزوج بالصدمة، ما توقعتها خبلة لهالدرجة!!

عقاب: شدسوووووين!!!!! سدي الباب

اماني: اذا متنزلني انزل وحدي

عقاب: تتأذين يثولة!!

صاحت بغضب.

اماني: انت شعللللللييييييك عسى ما امووت شعلييييك!!!

اردفت بصوت اعلى وبأنفعال..

عقاب: اموووووت وراج غيرر المن ظال بعددددد!!!

رمشت بصدمة وملامحها صارت اهدئ من قبل.

بلعت ريكي، شون زلكت اني، ولو مو جديدة عليها هيج طلعات دوم تخليني ازلك بالحجي.

حجيت بهدوء.

عقاب: سديها دكتورة

مدري شهمست لنفسها ما فهمت..

عقاب: كلتي شي؟

اماني: اي، كلت الله ياخذني واخلص عاد

عقاب: اسم الله !

اماني: هه، يلا نزلني مو عبالك نسيتني

عقاب: صاحية انتِ شبيج! كتلج ما انزلج الا بباب المستشفى

اماني: واني كتلك مو بكيفك هي ما اشتغل جوة ايدك اني وبكيفك اتصرف، وكف السيااااااااارة عقاااب!!!!

دست بريك بصورة مفاجئة، شهكت وارتد جسمها للامام بحركة تلقائية.

اماني: هاي لييش هيج سويت!

عقاب: مو تريدين اوكفها، هياتني وكفتها

اماني: مريض!!!

عقاب: ديربالج تعيديهااا !!!!!!

اماني: وشتسوي اذا عدتها؟ مريض مريض مرييييييض!!!!

خنزرت عليها وصكيت اسناني بحزم، كلشي ولا هاي الكلمة توكف عقلي!

عقاب: اذا عبالج بهاي التصرفات اطفريني، فانتِ غلطانة ما اتركج الا بباب المهجوم مالتج

اماني: منو كلك اني منتظرتك تطفر؟ رح اطفر بنفسي

اخذت جنطتها وفتحت الباب، لزمت ايدها قوي.

عقاب: حركة وحدة بس تدفعين الثمن

اماني: هد ايييييديييي!!!

جانت تحاول تجر بيها واني كامشها بقوة.

عقاب: شكد كتلج خلي اوصلج، اكعدي بأدبچ ماكو هاي النتيجة تحملي.

ظلت تجر بايدها، اخير شي بجت وهي دتكول..

اماني: ايدي دتوجعني حباب عوفني..

نبرة صوتها صحتني ع نفسي، هديت ايدها جانت حمرة واثار ايدي مطبوعة ع جلدها الرقيق..

عقاب: اا.. اسف ما عبالي هيج، بس ردت ..

قاطعتني لما حجت ..

اماني: ممستغربة منك اساسًا، ليش انت ممسويها قبل مثلا؟!

عقاب: بس ذيج المرات جان الوضع مختلف وانتِ تعرفين هالشي كلش زين!

اماني: مو مهم

عقاب: لا شلون مو مهم، هسة عوفج منه شو ايدج خ اشوفها

ردت اشوف ايدها جرتها للجهة البعيدة عني.

اماني: حضرتك دكتور واني مادري!!

عقاب: ردت اطمن بس!

باوعتلي وكالت بحدة، بينما دموعها الي تلالي بعيونها منطيتها فد منظر كسر كلبي اضعاف كسرات قبل..

اماني: تطمن؟ هههه لتضحكني بربك، تتطمن ع منو؟ عليه؟ وعلى شنو؟ ايديي؟ ليش وكلبي ما يهمك تتطمن عليه تشوف شحاله بعدما فطرته نصين، لو هذا مو مهم لان مينشاف؟! خلي ببالك اني مو بحاجتك بعد ولا بحاجة اهتمامك المزيف، وكافي تتقرب مني بكل فرصة لان هالشي دينزلك من عيني اكثر واكثر!!!

وهنا بس، صمت فظيع دب بعقلي وبكلبي..

درت وجهي متدارك نفسي المتألمة.
وسقت لحدما وصلتها للمستشفى.

نزلت بهدوء وراحت، باوعت لخطواتها ثكيلة كوة تجر بروحها..

عقاب: سودة عليـه يـضوة روحي..

.......

ضرغام

وصلت للمكتب اني وشاهين، لكينا ليث وسجاد.

تسالمنا وكعدنا.

شاهين: متحمس اليوم لكتلة صلاح الكلب، ونااااسة صار كومة ممدشن قدراتي

سجاد: دكعد راحة فان ديزل

شاهين: زليزل منو؟

سجاد: هههههههههههههه زليزل شسوويت باسمه خربحظك

شاهين: هو منو اصلا؟

سجاد: هيج انسى

ليث: عوفكم من زلزال هسة، شعجب ما طيحنا حظ صلاح من البارحة لعد؟

ضرغام: عقاب دز واحد شافله الوضع كله مو مناسب، يفترض اليوم نباشر

ليث: اهاا زين زين

دك تلفوني جنات، ابتعدت شوية ورديت.

ضرغام: صباح الخير حبيبتي شلونج اليوم

جنات: صباح النور اني زينه بس مشتاقتلك صار شكد مشايفتك

ضرغام: اليوم اذا فرغت امر بيج ونطلع، تمام هيج؟

جنات: هسة انت دفرغ وبعدين نفكر بالطلعة

ضرغام: شو جنج مواثقة؟

جنات: لا بس انت اخر فترة هواي تشتغل يا دوب نتحاجة، مو ادور نلتقي ونطلع

ضرغام: يا عمري مو انتِ تعرفين وضعي وشلون علينا ضغط، بس هالكم اسبوع بينما تخلص الانتخابات وبعدها بالنا يصفى واتفرغلج

جنات: ادور تطلعلكم سالفة تشكيل الحكومة، وهم تنشغل

تنهدت..

ضرغام: الله كريم هسة منو يكول نفوز، يجوز ع حظج نخسر وكلشي منحصل بالحكومة الجاية لا مقاعد ولا اصوات

جنات: هو يصير اكول امين لو ينهجم بيتك؟

ضرغام: هههه ينهجم ولج

جنات: لعد مو امين

ضرغام: اي هيج زين

جنات: ضرغام.

ضرغام: عيونه كولي شرايده

جنات: البارحة شصار عدكم بالشغل؟

ضرغام: شنو مناسبة هالسؤال انتِ متدققين بشغلي بالعادة!

جنات: لا مو.. مو

ضرغام: شنو احجي؟

جنات: البارحة رجعت تالي وكت ويا دوب كتلي تصبحين على خير ونمت وصوتك جان كلش تعبان، وهاي فـ صار عندي فضول اعرف شبيك شمشتغل هيج ع غير العادة ..

ما مشت عليه..

ضرغام: اي بس هيج؟

جنات: اممم لا اكو بعد

ضرغام: اي كملي لعد ليش سكتتي

جنات: سمعت من ميقات تكول مخزن الاسلحة مالتكم مدري شنو، بايكينه ناس وانتو مستنفرين

ضرغام: وميقات شمدريها؟

جنات: غير شاهين مسولفلها منين تدري يعني

ضرغام: دباعي هسة اني مشغول، اكمل ونرجع نسولف

جنات: تمام حبيبي

ضرغام: ما عندج دوام اليوم؟

جنات: عندي بس كنسلته لان مالي خلك

ضرغام: لا بلا شنو هي بكيفج، اني شكايلج؟!!

جنات: ما عدنه شي مهم ولله

ضرغام: بعدين نتحاسب باي

جنات: باي حاسبتي

ضرغام: ولجج!!

جنات: احبك سيادة المحاسب باااااي

ضحكت وسدته، اول شي ظليت مصدوم بصلافتها بعدين ابتسمت.

ضرغام: ربي ورطتني بوحدة خبلة، وشلون اني ما احب الخبال!!

.....

قسورة

ورة فترة من وصولي اني والحجي، يلا اجة عقاب.

وجان ضايج ووجهه ميتفسر، ولان الولد كلهم كاعدين ما ردت اسئله كدامهم، كلت اخليها لمن نظل وحدنا.

حتى ياخذ راحته ويسولف خاف ميريد يبين شي كدامهم.

قريب الظهر، جان كاعد برا هو وسجاد وليث.

رحت يمهم اتمختر بغرور، لمحتهم من بعيد ملامحهم جدية.

ظل بالي هاي شديسولفون وهيج بعيدين علينا.

شو من وصلتلهم سكتوا، وظلوا واحد يباوع بوجه اللاخ.

حجيت بتعجب..

قسورة: ليش سكتتوا؟ كملوا شجنتوا تحجون!!

ليث: ماكو شي هيج حجي عادي

سجاد: اي اي ماكو شي

عقاب ساكت ويدخن بلامبالاة.

رفعت حاجبي بعدم تصديق، ممقتنع بهذا الحجي اني.

احساسي يكول اكو شي ثاني!

عقاب: اني رايح

ليث& سجاد: الله وياك

عقاب: ع اتفاقنا مو تنسون

سجاد: لا اطمئن

ليث: ان شاء الله

راح، اخذتلي نظرة عليهم مضيق عيوني بشك.

عفتهم وركضت ورا عقاب.

اجيت من ورا حاوطت جتفه بذراعي وحجيت بمرح.

قسورة: شو من وكت حبيب وين تريد تروح؟!

عقاب: شغل وماكو مخلصين، المن ظال

قسورة: هيج صاير

عقاب: قسورة مالي خلك رحمة لدينك وخر عني

قسورة: هديتك ها اها.

وكفت وجريته وكف.

قسورة: سولف شبيها ما بيها، ترا اني ما مرتاحلك و وضعك مدري شلونه معاجبني

عقاب: شسولف يمعود اني بيا حال

حجاها ومشى، رديت كمشته من كتفه.

قسورة: دتعال اوكف شبيك تشمر، شصايرلك احجي؟!

عقاب: قسورة اني خلص وصلت لطريق مسدود، عقلي وكلبي ما بيهن طاقة يتحملن حزن اكثر بعد

قسورة: اي وشراح تسوي؟

عقاب: اريد اصارح الدكتورة بحقيقة تركي الها

شهكت بفرح ممزوج بالتفاجؤ.

قسورة: اخيييييرا !!!!!!!! منك من الشيطان

عقاب: لتخليني اتراجع، انجب بلا

قسورة: لا يمعود شتتراجع، ها اها انجبيت

عقاب: عفيه، لعد اني اروح

قسورة: خربحظي ولك اوكففف شبيك طاير

مشى بساع، ركضت وراه لزمته.

عقاب: شتريد مني!!!

قسورة: وين رايح شنو ببالك؟

عقاب: خياي طاكك الثول؟ مو كتلك اريد اروح للدكتورة احجيلها كلشي

قسورة: ها هااا اي وعلي صح، اعذرني نسيت

عقاب: لا هايهيه، ديلا

اشرلي بأيده بعلامة مع السلامة، بادلته ورفعت ايدي ملوح اله بأبتسامة جبيرة.

قسورة: هذا احسن قرار اخذته بكل حياتك ولك عقااااب

ابتسم بخفة ودك ع صدره ببطء بمعنى شكرا.

ادور اخذ سيارته وراح، رجعت للثنائي المرح ليث وسجاد.

قسورة: يلا قرّوا واعترفوا بدون لف و ودوران يلا يحلوين

سجاد: هاي ويانه الحجي؟

جان يباوع لليث ويحجي باستغراب.

ليث: مدريني يخوي

قسورة: اكو احد غيركم هنا يعني؟ طبعا وياكم

ليث: بشنو نعترف ما فهمتك

قسورة: لتثولها حبيب، ميعبرن ترا

سجاد: لا عفيه خ يعبرن، شبيك بابا شرايد اعترفوا شنو

ليث: دقيقة سجاد.. قسورة جديات مدا افتهم شتريد وضّح

قسورة: اي اوضح ليش لا، شجنتوا تحجون انتو وعقاب وسكتتوا من اجيت؟!

ليث: ع سالفة صلاح

شو ليث حجة وسجاد خزره، وذاك جر بوش.

اردفت بتعجب..

قسورة: شبيك تأشرله شكو ليش متريده يحجي؟!

سجاد: لا متوهم شعندي قابل وماريده يحجي

ليث: مدريني، بعدين هالتحليل تسوي من تكونون متدرون بسالفة محامي قحطان، مو من كلكم تدرون بي؟!

قنعني.

قسورة: صح بس اني مدري شبيه كمت ادقق اخر فترة.

سجاد: عادي حبيب وانت هم حقك من كثر المصايب كمت تشوف كلشي وواه مؤامرة جبيرة

قسورة: اي ولك اخخ..

......

عقاب

رحت للمستشفى، انتظر اماني تطلع حتى احجيلها الصار بالتفصيل وبدون ما ابقى شايله بكلبي.

مو لسبب، غير لحتى تعرف ان اني ما تخليت عنها، انجبرت!!

خابرت لريان.

عقاب: هلا ريان اكلك حبيب لتجي اليوم عالدكتورة اني ارجعها بطريقي

ريان: مية هلا، ايي الف رحمة ع جدك، متدري شكد خدمتني بهاي الفقرة

عقاب: لا تدلل

سديته مستغرب، شو العينتين عادي عنده الموضوع!

لا وادور مبين مكيف من صوته.

شوية وطلعت، صدريتها الطبية بأيد والجنطة والفون بأيد.

خصلات شعرها تتطاير وية الهوا، تجي ع وجهها تزعجها فترجعها لورا اذنها..

ابتسمت، يعني بعدها تسوي مثلما كلتلها ومتربط شعرها.

ورغم ان اني الصبح وصلتها بس مجنت منتبه الها هلكد حليانة..

شافتني من بعيد واكف كدام السيارة، دارت وجهها وراحت من غير طريق.

عقاب: تعالي ما اكلج

غلست، وكفت سيارة تكسي رادت تصعد منعتها وكمشت الباب مخليتها تفتحها.

دنكت كتله للولد.

عقاب: توكل حبيبي

اماني: شعلييييك انت!!!!!!

عقاب: امشي كدامي، عندي وياج حجي مهم

اماني: ماريد اسمع شي منك وما عندي اي حجي وياك!!! روح منا ماريد اشوفكككك!!!

عقاب: صوتج احنه بشارع!

اماني: لتخلي صوتي يطلع لعد، وروح

عقاب: دمشي امشي الله يخليج

اماني: شيل ايدك عني!

عقاب: هو اني يمته حاطها؟!!!

توترت وكالت بأختصار.

اماني: عقاب كلمة وحدة متصير اثنين، وخر عن طريقي فدوة، البيه مكفيني لتزيدها عليه

عقاب: هو بس هالموضوع هذا اكولج بي وبعدها شتسوين اني وياج ومراح اطلع بوجهج بعد، وهذا وعد مني الج.. ها شكلتي؟

باوعتلي واومئت بالخضوع.

اشرتلها ع سيارتي، راحتلها واني فتحتلها الباب، صعدت وسديتها ورديت كعدت بالصدر.

سقت لمكان هادئ، ماريد مطعم هوسة بهيج توقيت.
اريدلي منتزه حديقة شو شنو بحيث ناخذ راحتنا بالحجي.

اماني: شنو هالموضوع المهم هذا؟

عقاب: نوصل وتعرفين

اماني: لوين؟

عقاب: مدريني، اشوفلي مكان هادئ وننزل

اماني: تمام

ابتسمتلها بخفة دارت وجهها بلا متنطي رد فعل.

لميت ملامحي ورجعت تعابيري الجادة لوجهي.

شوية ووصلنا لطريق ترابي، والمنطقة شبه فارغة.

وجان تكسر علينا سيارتين مصفحات، دخيل الله بسلا الي ببالي صح!!

رجعت لورا وتعابيرها انكمشت بخوف..

اماني: عقاب شديصيير؟؟!

عقاب: ماكو شي لتخافين

فريت السيارة اريد ارجع وجان تطبك عليه سيارة ثانية سدت الطريق عليه.

وبهيج صرت محصور لا من كدام اكدر اعبر ولا من ورة ارجع.

عقاب: خرررب هالحظظظظ!!!!!!

اماني: منو ذولة عقاب فدوة اني خايفةة

عقاب: لتخافين حبيبتي اني وياج

اماني: شديصير ليش هيج كسروا علينا منو ذولة الزلم؟؟!!!

وفجأة، نزلوا زلم مسلحين كومة من السيارات

يطلع بيهم 15 واحد، حاصرونا من كل الاتجاهات!!

-مهمـا حاولتُ الابتعاد عنكِ، أجد نفسي في نهاية المطاف مهزومًا، مُكبلًـا امام حضرة عشقكِ..
بقلمي: نورمين

....

انتهى

لا تنسوا التصويت والتعليق 🖤🦋

#الكاتبة نورمين