خطأ طبي «عقاب الاماني» الفصل الثامن وخمسون 58 - بقلم نورمين

#خطأ_طبي «عقاب الاماني»

بقلــم : نورمين 🖤🦋

...

ريان

اخيرًا صار شي حلو بهالفترة السودة.

شمس قبلت واجت لجامعتي ضيفة اليوم، مجنت ادري بيها حتجي.

فاجئتني من وصلت، بحيث ظليت مبتسم والتعبير خانني.

ريان: اشرقت وانورت الجامعة بجيتج

شمس: شكرا شكرا..
ردت بمرح.

ريان: شعجب الله هداچ علينه واجيتي؟

شمس: ها يعني تريدني اروح؟

افترت دتروح ممثلة الزعل، اردفت.

ريان: لا يمعوده ما صدكت اجيتي وين تريدين تروحين!!

هزت راسها مبتسمة
شمس: بيني وبينك اجت فكرة ازورك اليوم هيج بلحظة، وكلت ليش ما اسويها صدك، وسويتها!!!

ريان: عفيييية عليج!

شمس: وهسة اني جوعانة، من فراشي لهنا كبل علمودك كوة رتبت نفسي

صفنت مبتسم بكلمة "علمودك"..

ريان: علمودي؟!

شمس: اي لعد شعندي هنا مثلا، جاية عليك غير؟!

ريان: اي اي، تعالي اخذج للنادي نتريك سوا لان اني ممتريك

شمس: بس هسة ساعة 9!

ريان: اي واذا؟

شمس: معندك محاضرة؟!

ريان: لل9 ونص وهم يجوز ما احضرها

شمس: ياا ليش متحضر!!

ريان: علمودج

ارتبكت شوية، وكالت.

شمس: ميخالف افوت وياك عادي

ريان: دسكتي هو اني ما صدكت تجين حتى افرج بالجامعة ونتونس، تريدينا نحضر محاضرات!! دمشي امشي

شمس: بس دراستك اهم!!

ريان: مو اهم منج

شمس: ومنو يحدد؟

ريان: اني طبعًا ويلا امشي

لاحظت توترها، قبل جنت اضم مشاعري هسة كمت اتعمد اذب حجي وابسمرلها.

اكيد هي فاهمتني، توترها يأكد هالشي!

بالنادي، طلبت الريوك وكعدنا بطاولة بعيدة عن الهوسة، بالطرف صايرة.

شمس: ليش كعدتنا هنا

ريان: هدوء احسن

شمس: هسة ليشوفنا يكول شو شعدهم

ريان: ويكول؟

رفعت حاجبها ونظرتلي بتعجب.

ريان: شعلينا شيكولون خ يكولون، اهم شي احنه نعرف نفسنا

شمس: حتلو، نظرات الطلاب تزعجني

ريان: هو انتِ بس هاليوم هنا!!! خلينا هيج

شمس: تمام لتضوج

تنهدت، هسة هاي شتكللها وتقتنع.

ريان: مضايج بس اريدج انتِ متضوجين، يعني بربج اول مرة تجين لجامعتنا اريد نسولف نطك صور ناخذ راحتنا خو ما اكعد بنص الهوسة، ولله شنو خاف كم طالب يفهمنا غلط؟

شمس: اسفة كتلك هذا هو

ريان: بدون اسفة ولج شنو هالرسميات

شمس: مثل متريد ولك هههه

ضحكت ع ضحكتها، اجة الطلب وبدينا نتريك.

سولفت ع جامعتها وحفلة تخرجهم القادمة.

شوية جبناها عالدراسة والدرجات والوسط.

وهي تسولف جنت منصت بدقة، حتى كوة ارمش كدامها.

هيج لهاي الدرجة ساحرتني، اخاف ارمش وتفوتني حركة من حركاتها العفوية.

للظهر، جنة كاعدين بحديقة الجامعة دا اخذلها صور.

وهي متوترة بحيث الصور مدتطلع حلوة.

ريان: ليش هيج متوترة، ضحكي سويلج حركة عدلة ترا الصور مدا تطلع حلوة!!

شمس: عوفهن لعد خيولن

ريان: لا عيني ماكو، يلا ريلاكس وانطلقي مبتسمة براحة

شمس: ماكدر اتشنج

ريان: قابل شكو، يلا واحد اثنين تلاثة چيررررررز!

ضحكت اخذتلها الصورة، باوعتلها مبتسم وسويت بأيدي علامة اوكي.

وشوية شوية كمت اسولف وياها وهي ترد واختفى ارتباكها، اخذتلها صور تجنن.

فمن كملنا، جانت واكفة بصفي ومدنكة راسها تباوع ع الصور الي بالتلفون.

ريان: شفتي شلون من ابتسمتي وشلتي التوتر صارت الصور احلى!

شمس: اصلا بكل حالاتي حلوة اني

ضحكت..

ريان: كلش صح

شمس: شو بلا هاي

كامت تكلب بالفون وهو بأيدي، شلت راسي عن الفون وخليت نظراتي مرتكزة عليها وسرحت بتفاصيلها وجمالها عن قُرب..

شمس: ياهية احلى برأيك هاي يم المصطبة لو ذيج يم الشجرة؟

لا رد، رايح بغير دنيا.

شمس: ها ريان شكلت هس......

شالت راسها شافتني، جمدت بملامحها وابتعدت خطوتين لورا ومن خبصتها وكعت.

شمس: اخخخخ
ريان: الله الله شجاج!
....

عقاب

وفجأة، نزلوا زلم مسلحين كومة من السيارات

يطلع بيهم 15 واحد، حاصرونا من كل الاتجاهات!!

اماني خايفة وتتلفت بيناتهم بصدمة متدري شكو ولا شديصير.

اتصلت ع اخر رقم مخابره بسرعة، جان ضرغام.

عقاب: بمنطقة .... تعرضت لهجوم مسلح بيهم 15 واحد

ضرغام: عقاب ديربالك ع نفسك، جاييك احنه

صوت اطلاق الرصاص علّى بالجو، صاحت اماني بخوف، سديت التلفون.

شسوي اذا انزل معناها اسلمهم ارواحنا ع طبق من ذهب!

ماكو غير استخدم السيارة!

رجعوا رموا وواحد منهم تقدم وكال.

-مشكلتنا مو وياك، سلم الدكتورة وتوكل بحال سبيلك

استنفرت انفاسي وعقلي طار، ذولة السفلة يريدوها بسبب فساد ابوها!!!

اماني: شيريدون مني ذولة؟ ليش يريدوني بس اني!!!

عقاب: اششش هدأي معليج

اماني: شلون معليه ما سمعتهم شديحجون!!

عقاب: اسلم روحي وما اسلمج الهم، بس اهدأي خ افكر.

باوعت اكو مسافة قليلة اكدر امر من عدها بس ممكن تنشخط سيارتي.

يلا مو مشكلة، بس خلي نطلع من هالورطة.

عقاب: عندج ثقة بية؟

ردت بضعف..

اماني: اي اثق بيك..

ابتسمت ورديت..
عقاب: وان شاء الله اكون كدها، حزام الامان لابسته؟

اماني: اي

عقاب: جيد، نزلي راسج لجوة ولترفعي ابد لحد ما اكلج، يلا بسرعة

سحبت نفس، رجعت الگير ودست بانزين .

مشت السيارة بسرعة وكاموا يضربون رصاص عليها.

ظليت ساعة اشيل راسي ساعة انزله اباوع، همزين سيارتي من نوع مصفحة ميأثر بيها الرصاص.

الهدف من سرعتي حتى ميضربون التايرات ويفشوهن، لان هذا العيب الوحيد الي ممكن يخلينا بحال خطرة!

كلت اهم شي اعبرهم واوصل لمكان ميكونون مكتظين بي

حتى اكدر اشرد اكتل كم واحد، بس اذا هم هيج وبهالعدد وفوكاها مسلحين مستحيل اكدرلهم!!

وفعلًا، هذا الصار.

عبرتهم بس ما كدرت ابتعد عنهم لمسافة طويلة، يا دوب افتريت من غير فرع وعبرت مسافة 30 متر.
لان ضربوا التايرات الورا فششوهن.

عقاب: انزلي بساع!!

نزلنا، كمشت ايدها وركضنا نختل بين البيوت.

الي اغلبها مهجورة او خرابة، طبينا بواحد ختلنا ورة ميز جبير حديد مشمور بعشوائية بوسط هوسة.

همستلها.

عقاب: لتطلعين صوت

تمتمت بخوف ودموعها متجمعة بعيونها..

اماني: خايفة كلش عقاب

عقاب: مو علساس من تكونين وياي تحسين بالامان؟

سكتت، ابتسمتلها حتى تطمئن.

اماني: واذا أذوك؟

عقاب: عادي

اماني: لازم تسلمني الهم وتروح لعد!!

عقاب: ع جثتي يوصلولج.

اماني: بس هذا اسمه انتحار!!

عقاب: ابقى وياج للموت أمنيتي..

وسعت عيوني مأشرلها بالسكوت بعدما سمعنا اصواتهم تقترب.

-توزعوا ودوروا عليهم بكل مكان، ما ابتعدوا لسة!

ابتسمت، هذا المطلوب!!

شوية وبلشت افرزن اصوات خطوات يمنا، يعني طبوا لهنا.

اشرت لاماني بعيوني اطمأني، اومئت براسها بالايجاب.

ووية ما وكف واحد كبالنا رفعت ايده لفوك جريت المسدس شمرته بالكاع، وفريت ركبته مات ووكع.

اخذت سلاحه، كومت اماني.

عقاب: ظلي ورايه ولو مهما صار لتتحركين او تروحين لاي مكان، تذكري امانچ وياي، تمام؟

هزت راسها وكالت..

اماني: تمام بس انتبه فدوة

عقاب: مو تدللين

طلعنا نمشي مناك بحذر، اني لكدام رافع سلاحين بأيدية اثنينهم وهي خاتلة ورة ظهري متحامية بيه.

الي اشوفه اضربه طلقة بمكان يخلي يسلم روحه للرب بلحظتها.

واماني وراية خبصتني كلشوية تكلي ديربالك ذاك واحد، ليطلع منا واحد، انتبه وراك كدامك مدري شنو.

طبعا الجماعة محضرين امورهم.

شدوا كواتم صوت لاسلحتهم.

وأي واحد اكتله اخذ سلاحه احتياط.

اماني: عقاب بالك خاف يطلع واحد منا

عقاب: ليش متاخذيلج مسدس لعد وتصوبيهم انتِ؟! حتى نتعاون

اماني: درووح اخاف اني

عقاب: لعد سكتي وخليها يمي

اماني: مو صوچك، صوچ لتنبهك وخايفة عليك

انداريتلها براسي شوية، وكلت بخبث.

عقاب: شلون شلون؟ خايفة عليه؟

اماني: لا مو ..

عقاب: مو شنو؟

اماني: مو انت دتحميني وواكف كدامي مثل الدرع، شي طبيعي اخاف يصيرلك شي لان اذا راح الدرع اصير بالوجه، اي طلقة تجي بيه كبل

عقاب: يعني مصلحچية؟

اماني: اي هيج شي

عقاب: خوش لعد

كتلتهم كلهم ومشطت المنطقة اكثر من مرة.

وكفنا واخذت نفس عميق براحة.

اماني: خلصنا منهم مو؟
حجت وهي تتلفت داير مدايرها بخوف.

عقاب: اي كلهم شلع

اماني: ماعرف شلون اشكرك، عقاب اني ...

خزرتها وحجيت مقاطع كلامها.

عقاب: هووب هووب!! شو جديدة هاي مال اشكرك؟!

اماني: لعد شلون، انت ساعدتني وما خليتهم يخطفوني، اقل شي اسويه اشكرك ع معروفك هذا

عقاب: لا الواضح الصدمة والخوفة لسة معلكة يمج

ضحكت وكالت.

اماني: لا صدمة ولا غيرها، اني من كل گلبي اشكرك

عقاب: كم مرة كايلچ انتِ تدللين

سكتت مرتبكة من كلامي ونظراتي، ادور رجعت سألت.

اماني: زين ذولة منو وليش رادوني الي؟

عقاب: متعرفين يعني؟

اماني: شعرف؟ احجي عقاب

عقاب: لتكولين اسمي

اماني: تمام، ممكن تحجي حضرة الدكتاتور؟

عقاب: هيج حلو

حجيت مبتسم هي هم هزت راسها وضحكت بتعجب..

عقاب: برأيج ليش مشددين الحرس ببيتكم وريان مخلاج تطلعين الا وية حرس؟

اماني: اي مو هو كلي الوضع خطر

عقاب: دخيلك ربي، يعني تدرين وفوك هذا تعاندين وتتسألين؟

اماني: شدري شبيك، غير علمود الانتخابات؟!!

عقاب: يا انتخابات، الظاهر كلشي متدرين

اماني: خليني ادري لعد، سولف شكو؟

عقاب: خلي السيد الوالد يشرحلج، اني ما اكدر احجي

اماني: شنو متكدر لعد المن حجيت من الاول وخليت السالفة ببالي؟!!!

عقاب: عبالي تدرين، شمدريني

اماني: هسة تحجي !

عقاب: دمشي باباتي، ارجعج للبيت وعود اهلج يحجولج

اماني: وانت شبيك ومتحجي؟

عقاب: باختصار، مالي حق افك حلكي واني مالي دخل بعائلتكم

احجي وأأشر بالمسدس بأنفعال.

اماني: دوخره من وجهي شنو تخوفني بي

عقاب: ديلا بلا
هزيت راسي وكلبت عيوني بعدم تصديق..

اماني: دقيقة دقيقة.. يعني انت بهاي الحالة تعترف انو مالك دخل، بس بغير شي عادي الك دخل، وتطب وتطلع لبيتنا وتوصلني هاا؟!

عقاب: ذني وحد

اماني: مو هي بكيفك ووحد؟!!

عقاب: اي....

سكتت لما لمحت شخص وراها ديريد يضربها طلقة.

رفعت المسدس وبحركة اخذت اقل من ثانيتين، صوبته ووكع بالكاع.

ظلت واكفة وفاتحة حلكها من هول الموقف.

اماني: ه..هاي.. شـ.. شصار؟!!

عقاب: ما صار، امشينا يلا

سندتها عليه وكمشتها من كتفها حاضنها الي لان كامت تتراجف.

مشينا، وورة شوية رفعت راسها عليه وكلتلي.

اماني: كمت اخاف من الامان اذا مجان وياك عقاب.

فز گلبي ع حجيها.. وكفت وأردفت مجاوبها.

عقاب: بكل مكان وزمان، رح ابقى امانچ والدرع الي يحميچ من كلشي، يكفي تصيحين بأسمي و اني رح اكون موجود فورًا

اماني: واذا ما لحكت عليه؟

عقاب: اسابق الزمن والحكج

اماني: مو منطقي الي دتكوله

عقاب: لعد وين المنطق بألي دتكوليه انتِ؟

اماني: شنو؟ الظاهر انت ما فهمتني

عقاب: بالعكس كلش فاهمج، بس انتِ كل عقلج واحد يدنالج واني عايش؟!! اصلًـا قبل لتصيحين اسمي حتلكيني واكف كبالج وفاتح صدري للنار

اماني: اذا انت هيج تحبني، ليش عفتني؟ ليش فرقتنا ليش هيج سويت بحبنا؟

عقاب: مو وكته هالحجي

اماني: شوكتتت يجي وكتته لعددد؟؟؟؟

عقاب: لتصيحين

اماني: لعد جاوبني وريّـح گلبي

تنهدت بضياع، احجي هسة؟؟!

درت وجهي للجانب متجنب نظراتها الي دتصوب كلبي بسهام ألم مميت..

وشفت نفس هذا الصوبته قبل شوية واكف ومصوب سلاحه علينا، احتدت نظراتي بفزع.

سلاحي جنت ضامه بخصري، فرئسن جريت الدكتورة حضنتها مبعدها عنه فـأجت طلقته بظهري..

تصلب جسمي من قوة الرصاصة..
اماني شهكت بصدمة وتعابير وجهها تحجي مدى خوفها..

اماني: عقاااب لاااا!!!!!!!

-اجاچ السرة دكتورة

جان يحجي بتشفي وهو كامش جتفه المتصوب.

بحركة سريعة ضربته طلقة اجت بگلبه، انحنى ع ركبه ادور وكع بالكاع.

ذبيت مسدسي وقوتي خارت..
وسط اصوات الدكتورة وانهيارها وبكاءها ع حالتي.

........

قسورة

بالمكتب، جنت يم الحجي.

الحجي: شعجب لعد ما داهمتوه لصلاح لسة؟

قسورة: عقاب دز جماعة جسوله النبض وكلوله ع غير وكت لان هسة مو مناسب

الحجي: مو مناسب شنو ادور؟

قسورة: ولله مادري، اسأل عقاب هو يجاوبك لان مكال بس هيج

الحجي: هو عقاب وينه شو ماكو؟!!

قسورة: طلع قبل شوية

الحجي: وين راح؟

قسورة: مادري بس كال خلصنا شغل المن ظال

الحجي: ابد ما عاجبني وضعه هالفترة، طلاكه من الدكتورة هواي محزنه ومغيره.

قسورة: اي يابة متأذي حيل وهو كلش يحبها ومتعذب لان تركها مجبور من ورا هذا الكلب الي ميتسمى امير

الحجي: وهذا الساقط لسة ما لكيتوا اثر اله؟!!!

قسورة: لا يابة، مشطنا كل المحافظات الجنوبية وبغداد ماكو ماله اثر!!

الحجي: هذا الا شارد للاقليم

قسورة: عقاب هم كال هيج

اجة ضرغام فتح الباب مال المكتب وطب وجهه ميتفسر.

ضرغام: يابة عقاب مداهمي ع طريق ..... خابرني

رديت بصدمة.
قسورة: شنووو!!!!!

الحجي: مداهمة ايييش!!!!

ضرغام: ماعرف مكال شي محاصرينه جانوا

الحجي: امشوووا بساع شمتانين لعععععدددد؟؟!!!!

طلعنا نتراكض و توزعنا ع سيارتين.

اني والحجي وضرغام سوا

وليث وسجاد وشاهين بسيارة ورانا.

جنت دايس سرعة و اتسابق بين السيارات.

دك تلفوني، انطيته لضرغام الكاعد وراية.

قسورة: ضرغام انت شوفه اني ملتهي

ضرغام: ماشي

همس بخفوت..

ضرغام: هاي ريما

خرب ابد مو وكتها.

قسورة: ارفضها خياي

ضرغام: تمام

رفضه ورجعلياه.

هم ردت دكت.

سديته من الصفحة، والحجي كال.

الحجي: دجاوبها

سويت روحي اثول.

قسورة: ياهيه هاي

الحجي: حبيبة الگلب

قسورة: هاا منية هاي حبيبتك يابة؟

الحجي: دنجب سرسري، انطينياها شو

اخذ التلفون مني ورد عليها.

الحجي: الو ها باباتي ريري شلونج، اي ديسوق وملتهي، لا شغل عدنه، ميخالف..

قسورة: يابة بس كوللها لتطلع وحدها خ تنتظر اخوها او الحرس يجون عليها

الحجي: سمعتي لو اعيد؟ اي لتطلعين وحدج ترا الوضع مو امان، اي عفيه يلا الله وياج.

سده وكال.

الحجي: انت مرتبك وهي لا، ولله وكت

قسورة: مو وكته هالحجي يابة، ضرغام دك ع عقاب شوفه شصار وياه

ضرغام: دا ادك ميرد عليه

الحجي: سوق واسكت لتظل ملتهي تسولف

قسورة: صار يابه

.....

اماني

الطريقة الي حماني بيها عقاب من الطلقة وشلون وكع بين ايدية..

كبرته بعيني اضعاف قبل.
وقتلت كل ذرة شك جانت بگلبي تجاه صدق حبه الي.

ظلت دموعي تجري وكلبي ينبض بتعب..

حاضنته لصدري وهو ينزف، بين الواعي وبين الفاقد من الالم..

اماني: انت ليش هيج سويييتتت؟؟؟

رد بصعوبة..
عقاب: مـ .. مش..ـشهد حلو مو؟

اماني: اششش اسكت لتحجي .. لتتعب نفسك

عقاب: م..مو كتلج.. للموت اظل وياج؟!

اماني: اششش... اسم الله..

مسدت ع راسه ولعبت بشعراته بلطف واني احجي ودموعي تنزل بدون سيطرة مني.

اماني: لا تحجي هيج، بعد عندي هواي حجي وياك، عقاب ممنوع تموت، ممنووووووووع ماكو مووت، ماكووو!!!!

عقاب: ظلـ .. ـي بـ ... ـخير..ر ..

لزمت ايده وكلت.

اماني: اذا تظل وياي اظل بخير..

جعد ملامحه بوجع وعيونه حمرة ..

اماني: لتغمض عيونك حبيبي افتحهم

عقاب: مـو بيـ .. ـدي..

اماني: لخاطري حاول ها؟

اومئ بملامحه بالايجاب ..

مررت ايدي ع خدوده ببطء وكتله.

اماني: عقابي القوي اتماسك لخاطري.. هسة اني كايمة اجيب جنطتي واخابر ع الاسعاف، بس انتظرني ولتغمض عيونك ابد ابد.. متفقين؟؟!!

عقاب: لااا لااا، ابقي هناا..

اماني: بس ميصير تظل تنزف هيج!

عقاب: ا..اريد يكون وجهج اخر شي اشوفه قبلـ .. ـما ا..ممـ.. مو.. وت

خليت ايدي ع حلكه ودموعي نزلت بـوفرة تزامنًا وية عنف دكات كلبي الخايفة عليه.

اماني: ازعل وياك ولله بس تكول اموت بعد، موت ماكو سامعني؟؟!

رمش بعيونه بضعف وبلع ريكه ديحجي..

اماني: اششش لا تتعب نفسك ولا تحجي شي..

سمعت صوت خطوات تقترب من عدنا واصوات زلم يسولفون.

كلبي انخمش وباوعت لعقاب بصدمة، تنفس بقووة وكال.

عقاب: س.. ساعدينـ .. ـي اكوم

اماني: وين تكدر تكوم انت!!

عقاب: ا.. اكوم وحـ ... ـدي احسلي

كمشت ايده سندته عليه وكام وهو يتأوه بألم.

عقاب: صـ .. ـيري ور.. اي

اماني: عقاب فدوة اكعد، لازم ما تتحرك مو زين على جرحك

غلس ومشى كوة يجر بخطواته جر.

مصوب مسدسه للامام ومستعد يضرب بأي لحظة.

واني واكفة وراه ولازمة جتفه وبكلبي ادعي الله يعديها ع خير..

سمعنا صوت ليث يكول..

ليث: يابة وين رااااح لك ضرغااااااااااااام

ضرغام: دشوفه هناك وين راح يعني وذولة كلهم مكتلين.

تنهدت براحة، عقاب من سمع صوتهم أمن.

انحنى عليه ووكع، كمشته وكلت بقلق.

اماني: عقااب حبيبي افتح عيونك، عقاب تسمعنيي؟؟ يا ربييييي

كعدت بالكاع وخليته بحضني، دموعي ما نشفت ابد..

اماني: ضرغاااااااام احنه هناااااا الحككككككولناااااا

مادري منين اجتني الطاقة حتى اصيح بهالصوت العالي..

يمكن خوفي ع حبيبي خلق بداخلي قوة مادري عنها.

وصدك اجوا، وية مشافوني ركضوا علينا.

ضرغام: شبي عقاب شصايير؟؟

ليث: لك هاي شكووو!!!!

اماني: صوبوه وهو ديحميني.. ضرغام خابر الاسعاف فدوة عقاب دينزف هواي

ليث: يا اسعاف يمعودين يموت وهي بعدما مواصلة

اماني: لعد شلون تعوفه يموت هنااااا؟؟!!!!

رد مستنكر والتمست بصوته عصبية..

ليث: انتِ مو دكتورة؟!!!! شوفي شغلج ليش هيج عايفته!

ضرغام: ليث بهدوء مو هيج تحاجيها

ليث: لك متشوفه غارك بدمه وهي مكابلته وواكفة كلشي متسوي!!!!!

ضرغام: مصدومة ميخالف ع كيفك وياها، دكتورة احنه ويانه علبة اسعافات، سويله اسعافات ع ما نشيله نوصله للمستشفى

هزيت راسي بطواعية، هستوها طخت براسي حجاية ليث..

صدك اني ليش ما سويتله اسعافات ليش ظليت ابجي وعفته يروح من ايدي؟!!!!

اماني: اريد قطعة قماش

ضرغام: بسيطة

نزع بلوزه، غضيت بصر وغيرت اتجاه نظراتي عنه..

شگه وانطانياه.

ضرغام: هاج دكتورة

اخذته لفيته ع مكان الاصابة، ببداية ظهره قريب ع جهة كتفه الايسر.

ليث ظل ينافخ بعصبية وواضح عليه شكد خايف ع عقاب.

ما حطيت عيني بعينه ابد..

ضرغام كام يخابر لقسورة.

ضرغام: قسورة جيب السيارة وتعال لهنا، اي اي وية متعبر الفروع الاثنين اكو دربونة فوت بيها، ع ايدك اليسرة، استعجل اخيك عقاب دينزف، اي يمعود متصاوب فظها..

كمشت ايد عقاب حسيت نبضه ضعيف، يعني اوكسجينه قليل..

اخذت نفس عميق، راح اسويله تنفس اصطناعي.

سديت خشمه ونفخت بحلكه اكثر من مرة وضغطت ع صدره برفق، استعدلت نبضاته.

ضرغام وليث جانوا واكفين ع صفحة ودايرين وجههم .

اجة قسورة بالسيارة، نزل من عندها وركضلنا خايف.

قسورة: منو صوبه؟؟؟ ووييييننن؟؟ عقااب تسمعنييي خيااي افتح عيوونك ..

بجيت من منظره وهو كامش عقاب ويحجي وعيونه تدمع بخوف.

ليث: قسورة كافي وخر، خلي ناخذه للمستشفى التأخير مو بصالحه

وخر واجوا ليث وضرغام شالوه من حضني حطوه بالسيارة واني امشي وياهم ولازمة ايده بقوة.

ضرغام: دكتورة كعدي لورا حتى تخلين راسه بحضنج وتچيكين وضعه

اماني: اي اي ..

ركضت صعدت، خلوا راسه بحضني.

قسورة: اني راح اسوق

ليث: لا اني اسوق!

قسورة: كتلك انيييي!!!!!

ضرغام: مو وكت عرككم ****** سفلةةةة!!!!! اخونا حيموت وانتوا تتعاركوووووون؟؟؟؟؟؟؟؟؟!!!!!!!!!!

قسورة: ضرغام اني اسوق اسرع منه!

ضرغام: ديلا ولي اصعععدد!!!!!

صعد قسورة وبصفه ضرغام.

الطريق كله قسورة يسوق ويفشر ويغلط.

دموعه تتخالط وية حجيه اعصابه انهارت..

وكلشوية يلتفت يباوعله ويكلي شلونه لو يكله خياي اتحمل مظل شي وصلنا.

بالف يا علي وصلنا للمستشفى.
نفسها الي اشتغل بيها جانت اقرب شي النا.

نزلوه الولد حطوه عالسدية، ركضت وياهم.

طببناه للطوارئ، قسورة وكفلي وضرغام لزمه.

قسورة: دكتورة ديريالج تطلعين اذا ما يطلع عقاب عايش وياج!!!! تسمعينيييي؟!!

ضرغام: صوتك ولك، دكتورة روحي شوفي شغلج.

هزيت راسي ببكاء.

رحت بدلت ودخلناه للعملية.

جان وياي دكتور اسمه فاروق.

بلشنا بالعملية وكل لحظة تفوت القلق والخوف ينهش بروحي اكثر واكثر ..

حبيبي بين ايديه والحركة محسوبة عليه، جنة حاطينه ع وجهه ودكتور فاروق ديطلع الطلقة من جسمه.

فاروق: مكانه خطير، خاف اطلعها ويتضرر العصب مالته

اماني: دكتور فدوة ديربالك

فاروق: هو هذا زوجج مو؟

سكتت ما عندي اجابة..
رجعت غيرت الموضوع .

اماني: لعد شلون؟ شتسوي اذا متطلعها، خو ما تبقيها؟

فاروق: لا خلي احاول، جيبي المشرط شهد

انطتهيا ووكفت بصفي..

شهد: لا تخافين دكتور فاروق رح يسوي العليه وزيادة

اماني: ان شاء الله

طلعها للرصاصة وبدة ضغط دم عقاب ينزل ونزيفه زاد..

دكات كلبه انخفضت لحد ما اختفت وصفرت..

جبت جهاز الصدمات بساع، اجة دكتور فاروق دياخذه مني.

فاروق: انطينياه دكتورة

اماني: لا اني اسوي

فاروق: كلبج ميتحمل، خليني اني اسويلهيا

اماني: دكتور كتلك اني اسويله الصدمات!!!!

وخر ع صفحة، صحت ع شهد.

اماني: خليه ع ال200

شهد: صار

قويت كلبي ومنعت دموعي تنزل، مو وكت الضعف كافي عقاب بحاجة الي!!

حطلي فاروق المادة عالجهاز، فركتهن ببعض وسويت اول صدمة ارتد جسمه لفوك، وماكو نبض..

عدتها ونفس الشي، اجيت ابجي بس رسمت ملامح قوية وصحت بصوت عالي..

اماني: شهد خلي عال300

شهد: خليته دكتورة

اخذت نفس قوي، دمعت عيوني بوجع رغم القوة الي دا احاول اقنع نفسي بيها..

تمتمت بصوت ناصي.

اماني: ديربالك تعوف امنيتـك ..

سويتله الصدمات مرة ثانية..

اول مرة ما حصلت نتيجة، بعده مصفر.

عدتها مرة ثانية نفس الشي، نزلت دمعتي وخارت قواي المصطنعة..

فاروق: هاي اخر مرة دكتورة

اماني: رجعيها لل 300 شهد

شهد: هي 300 دكتورة

غمضت عيوني متنهدة، يربي كمت ما اربط.

حطلي الدكتور المادة، همست بيني وبين نفسي.

اماني: يااااا رب دخيلك احميلياه ..

سويتله الصدمة ومن اول مرة رجع نبضه.

تنهدت ورفعت راسي لفوك وحجيت بفرح ..

اماني: الف الحمدلله والشكر الك يا رب.. ما خيبتني..

تتقاطعُ طرقنـا دائمـًا وبشكل مُريب..
وكأن الحياة مُصـرّة على اننا قدر بعضنا البعض.
-بقلم : نورمين

.......

انتهى

لا تنسوا التصويت والتعليق 🖤🦋

#الكاتبة نورمين