خطأ طبي «عقاب الاماني» الفصل الستون 60 - بقلم نورمين

#خطأ_طبي «عقاب الاماني»

بقلــم : نورمين 🖤🦋

...

شاهين

اخذت ضرغام وطلعنا بالحديقة هم حتى ناكل ونشتم هوا وهم حتى نتصل ع نسواننا.

ميقات لزكت الا تريد مكالمة فيديو، وتالي سويناها.

جانت هي واختها كاعدات وحاطات الفون كدامهن، واني وضرغام مثبتين الفون ع الكاع بطابوكة وناكل ونسولف وياهن.

ميقات: وهسة شلونه؟

شاهين: زين حبيبتي بس بعده بالعناية، من يصحى يخرجوه لغرفة ونكدر نشوفه

ضرغام: ايي غير يصحى عاد صارله شكد!

جنات: يصحى ليظل بالك، العملية السواها مو هيّنة ترا هذي اعصاب مو لعب

ميقات: اي ولله، تخيلوا لو جايته بالعصب؟ ينشل بساعتها بس غير الله لطف بي

وسعنا عيوننا بتفاجؤ ممزوج بالخوف من كلامها..

شاهين & ضرغام: اسم الله!!

جنات: تفف من حلكج شدتحجين هاي فوك ما تدعين للولد تفاولين عليه!!

ميقات: وشبيكم كبيتوا، كلت تخيلوا خو ما صارت صدك!

جنات: يمعوده اسم الله عليه بعده شاب بيش طالبته!!

ميقات: اهوو جيب ليفهمها عاد

ضرغام: خ نغير الموضوع بسچن عرك

ميقات: متشوفها نابصتلي عالحجاية

جنات: لا حبيبي هي تستاهل واصلا انت سمعتها شحجت مو؟!

اخذتلي عضة من لفتي وكلت..

شاهين :صدك لو كال ليث ماكو شي احلى من الاكل بالحياة

جنت اكل ومندمج باللفة واسولف، وفجأة سيطر الهدوء عالاجواء.

باوعت بغرابة داير مدايري، ضرغام يباوعلي بصدمة وذني بالتلفون مخنزرات.

شاهين: شبيكم؟ ليش هيج سكتتوا؟!

ميقات: شنو احلى شي بالحياة بلا؟!

كالت وهي مضيقة عيونها بترقب وملامحها متبشر بخير، ضرغام يباوعلي بأسى وهنا اني طخت براسي شبيهاا !!

تحمحمت وحاولت اداري مصيبتي.

شاهين: شي لو شخص حبيبتي؟ حددي حتى اعرف اجاوبج ع هالاساس

جرت بوش وباوعت لاختها، ادور كالت.

ميقات: وشنو الفرق عود؟

شاهين: شلون شنو الفرق، يعني برأيج هاي اللفة الي بأيدي هي احسن منج لو انتِ احسن منها؟

ميقات: هاا؟؟

لصتها يربي، شلون الزكها!!!

شاهين: طبعًا انتِ احسن منها، لان الملكات متتساوى بالجواري

ميقات: وشنو الربط اصلا بين كلامك وتبريرك هذا!!!؟؟؟

شاهين: شلون شنو الربط، قصدي انتِ ملكتي واميرتي الحلوة، ميصير تضوجين لان كلت الاكل احلى شي بالحياة، لان هو يبقى شي صغير مقارنة بيج وبمكانتج بكلبي.. وصلت؟!

ساحت من الخجل، تنفست براحة، همزين تلزكت كلت هاهيه شيخلصني من لسانها بعد.

جنات: ضرغام احنه لازم ننسحب يمكن مو؟

ضرغام: لا حبيبتي عليمن، لعنده شي هو ينسحب احنه كاعدين بأدبنا ليش نعوفلهم الساحة؟!

يحجون بخبث ويقصدونا، ضحكت واخدتلي لفة ثانية.

شاهين: ولله اني عن نفسي اني وحبيبتي كلشي ما عدنه، ابيض من البياض نفسه مو بلا ميمي؟!

ميقات: اي حبيبي

جنات: اييييع ميمييي؟؟!!! بربكم دلع هو هذا

ميقات: لعد وجوجو؟؟ هم حاسبته دلع؟؟؟!!!! ايييييع

جنات: منو كلج ضرغام يصيحلي جوجو؟؟ حبيبي كوللها شتصيحلي

حجت اخر جملة بغرور، ضرغام ضحك وكال ..

ضرغام: جـنتي.. جنـاتي ونعيـمي الدنيوي ..

ميقات خلست من جمال الكلام بينما اني كورت حلكي بتعجب، فعلا حلو اللقب!!

ميقات: مو حلو، كال جنات كال اصلا امي رادت تسميها جهنم بس كالت عيب شيكولون علينا

جنات: مضغوطة اتفهمججج يا ميمييييييي

ميقات: انجبي بلا

جنات: ليش ليش مو دا ادلعج

ميقات: لتدلعيني شنو هالميانة اوي

عافتها وكامت، ظلت جنات تضحك وتكللها..

جنات: تعاي يمعوده وين رايحه؟؟ سكتت ولله

ميقات: اريد اجيبلي شي اكله، جوعوني ذوله

جنات: جيبيلي وياج حبابه شو اني هم جعت

ميقات: تمام

راحت ورجعت جنات خلت الفون عليها وحجت بهمس حتى لتسمعها.

جنات: كل عقلها ضاجت هاي!!

ضرغام: لا مو كلتلج جاعت

جنات: اختي واعرفها، هاي حجة لتصدكها مبينة غارت مدري ضاجت

شاهين: عوفوها بحالها بلا

جنات: واحنه شسوينا؟!

شاهين: لا وفوكاها تسوين روحج متدرين؟!

جنات: يااا ضرغام تسمعه شيحجي!

حط ايده ع جتفي ورد بهدوء.

ضرغام: هذا هم يغار معليج بي

خزرته بغيض، هي ضحكت..

سمعنا صوت سجاد يصيحلنا، التفتنا شفناه حلكه مشكوك من الفرح ..

سجاد: عقاب كعد ولكككككممممم

كمزنا بتلقائية من جمال الخبر ..

ضرغام: بيباي عود بعدين نتحاجة

جنات: تمام وطمني لتنسى

ضرغام: ان شاء الله

عفت تلفوني بيد ضرغام وركضت لجوة.

......

قسورة

الحجي بالغرفة متمدد وليث وسجاد يفترون يا رايحين يا رادين.

عقاب بعده ما كعد، ضجت كلت معندي غير ريما.

ابتعدت عنهم واتصلت عليها.

قسورة: الو

ريما: هلاو حبيبي شلونك

قسورة: الحمدلله، شو مشفتج؟

ريما: اذا هو بباب المستشفى وبابا واماني تعاركوا، يكلها رجعي للبيت وهي متقبل، تالي اخذني اني وماما ورجع وريان ظل يمكم علمودها

قسورة: اهاا.. هيج الحجي

ريما: يي واصلا تدري ردت ابقى وية ريان وبابا جان بي مجال يقبل بس ريان رفض!! كله من وراه ابو راس المصفح

قسورة: زين سوة شعندج باقية هنا والوضع متوتر؟

ريما: ردت اشوفك غير!

قسورة: ميخالف، ع غير مرة عود

ريما: شو ادك ع اماني مترد عليه وينها؟؟

قسورة: غراضها بقن بسيارة عقاب، والسيارة بالكراج بالمكتب

ريما: اهاا، زين عقاب شلون صار؟

قسورة: الحمدلله زين، الاطباء منتظرينه يكعد ونفتهم اكثر حالته

ريما: ما عنده غير العافية

قسورة: تسلميـن يحلوة

ريما: تدلل يحـلو

قلدت نبرة صوتي وكلامي، فضحكت وكلتلها..

قسورة: صوتچ وضحكتچ من ضمن المهدئات بالنسبة الي ..

ريما: دير بالك لعد كثرة المهدئات تسبب الادمان

قسورة: ليش منو كلج اني مو مدمن؟!

ضحكت واردفت بمرح..

ريما: خطية لعد انت تحتاج علاج بمصح

قسورة: واذا اكلج اني المدمن الما يريد يتعالج؟!

ريما: امممم شكد خطية انت..

لمحت الدكتورة من بعيد جاية.

قسورة: شوية واخابرج ريري

ريما: تمام ع راحتك.

كمت وكفت، اجتي كلتلي وعيونها تلمع بسعادة واضحة.

اماني: عقاب كعد!!

بهتت بصدمة، بس بنفس الوقت الابتسامة انرسمت على وجهي بفرحة..

قسورة: وييينه اريد اشووفه!!!

اماني: هسة اخذك اله، بس اني وعدت الحجي اول ميكعد عقاب هو يشوفه فأجيت اخذه

قسورة: اي ميخالف.

رحنه لغرفته، جان على وشك ينام.

بشرناه، وهو بساع كام من فراشه ووية ما وكف لزمته دوخة، سندته عليه يلا كدر يمشي عدل.

طلعنا رايحين لعقاب، صادفنا ليث وسجاد.

خبرتهم الدكتورة واني كملت مسيرتي بالمشي وية الحجي لحدما وصلته ليـم عقاب وهديته لما كعد عالكرسي.

اماني: رح اخليكم وحدكم وياه، بس مو تتعبوه هواي، خمس دقايق كافي؟

قسورة: هايشنو دكتورة خمس دقايق وين اصرفهن اريد اشبع منه!!

حجيت متذمر، عقاب ابتسم والدكتورة ردت بمرح..

اماني: تلحك تشبع منه، بس خلي يصير زين عالاخير وظل وياه شكد متكدر محد يكلك لا

الحجي: هايهيه بنيتي، روحي انتِ ولتشيلين هم.

اماني: تمام لعد، اترخص اني

الحجي: ع راحتج باباتي.

عافتنا وراحت..

التفتت ع عقاب وكلت بعتاب بصوت عالي.

قسورة: انت ليش متبطل تهبطني؟ كم مرة كايلك تدير بالك ع نفسك!!!!!؟؟؟

عقاب: صـ .. صارت بعد، قابل بكـ .. يفي هي؟!

قسورة: حجي يفيدك، لو ميت منو يفيدني؟؟ حجاياتك ذني مثلا؟؟!!

الحجي: اكعد عنه مو وكتك ولك، مدتشوفه كوة يحجي

قسورة: يابة دخلي يولي عرج ميطكه

دفعته وكعدت بصفه عالسرير، تأوه بألم ورد بعصبية..

عقاب: اخخخخ لككك!!! وخر وين كعدت؟!!!

قسورة: يمك غير، ماعوفك وحدك منا وهيج

عقاب: دوخر عني هسة خنكتني!!

قسورة: ما بيك شي، هياتك تتنفس طبيعي وتصيح بعلو حسك كلشي ما بيك ها اهااا

عقاب: يابة احجيلك كلمة وياه ميصير هيج ترا

الحجي: عوفك منه خبل، انت شلونك شدتحس؟

عقاب: ولله اني جنت كلش زين، بس من شفت قسورة تخربطت احوالي طلعوه منا

شبكته وخليت راسي ع جتفه السليم وكلت ..

قسورة: لو تنط، انام يمك اليوم حبيب

جر ايده مني ماكو مدا اتأثر وبعدني ع نفس اللزكة.

عقاب: يمعود وخر مو ريما انييي!!!!

شلت راسي خززته ورديت..

قسورة: نجب لككك!!!

عقاب: لك بعينك سرسري كوم وخرر!!!

وخرت عنه ضاحك ووكفت يم الحجي..

قسورة: وخرنا عيني سندس خاف ازعجناج

عقاب: قسورة ليش تخليني ابلش بيييك!!!

قسورة: اذا بيك حظ كوم

كلتها بتحدي، شو هذا صدك كام بس شنو معصب اذا يلزمني يفترسني.

الحجي كمشه وما قبل يخلي يتحرك.

الحجي: اكعد باباتي كل عقلك انت!!

عقاب: يابة متشوفه شلون يجفص!!!

الحجي: متعرفه انت من يوم يومه هيج، بعدين هو ديشاقيك ليش ضجت

عقاب: دطلعه برا لا انيم الكانونة بكصته.

الحجي: اطلع برا قسورة

حجيت معترض.
قسورة: اطلع برا شنو، ما اطلع!!

ادور عيوني دمعت وملامحي تغيرت لأخرى جادة يغشوها الحزن..

قسورة: لك روحي راحت واني انتظر خبر يفرحني عنك!! بهاي ايدية كمشتك وكتلك خيااي لتعوفنــي.. وانت جنت غركان بدمك والنفس كوة تاخذه.. متت واني اسوق وحاير اوصلك للمستشفى لو اشبع شوف منك لان جنت واصل للنهاية.. كلبي صار نار يلا اجت الدكتورة وطفت ناره بخبر انقاذك!! وهسة مستكثر عليه اشاقيك؟!!

الحجي يسمعني بسكوت، وعقاب ملامحه ذبلت بتأثر.

قسورة: لك عقققاااب لو اذبحك هسة هم متحجي ولا تفك حلكك!!

فتح ايده الي، اجيت حضنته وهو صاح اخخخ متوجعة..

وخرت عنه وكلت بقلق.

قسورة: ها اذيتك؟

ابتسم ورد..

عقاب: لا يابة انت تمـون .

رجعت حضنته بقوة اكبر، وطبطبت ع ظهره بحماس شو هذا صرخ بصوت عالي جفلني..

الحجي: ع كيفك قسور مو هيج!!

قسورة: هو كلي تمون.

عقاب: لكككككك اخخخخخخ!!!! هو هيييج

قسورة: اسف تحمست

.....

اماني

من طلعت من يم عقاب ظليت ادور ع ريان ماهوه.

افتريت المستشفى كلها ماكو اله اثر.

اخذت تلفون من وحدة من الممرضات دكيت عليه مغلق، رجعت دكيت ع ريما مرتين يلا ردت كلت بلكي يمهم بالبيت.

اماني: الوو

اجاني صوتها مطبك من النوم.

ريما: ها مون شبيج

اماني: اكلج ريري ريان بالبيت؟!

ريما: لا ما اجة، مو علساس يظل وياج؟!

اماني: اي بس ماهوه مدري وين راح، دورت عليه كل المستشفى ماكو ملكيته

ريما: زين ما حاولتي تخابري يجوز راح يجيب اكل شو شنو؟

اماني: بلي اتصلت من وحدة من الممرضات بس خطه مغلق، وظل بالي عليه كلش

ريما: ليش يظل بالج عادي يجوز انطفة جهازه ليش مكبرتها؟!

اماني: الموضوع مو بهالسهولة ريري، السالفة اكبر من هيج بهواي

ردت بعدم فهم ..

ريما: شنو قصدج بأكبر؟ صاير شي ماعرفه اني؟؟

اماني: رح اسده وانتِ اتصلي، خطية رصيد البنية يروح وشغلتنا مطولة

ريما: تمام

سدته وردت اتصلت فورًا.

ريما: احجي شكو ترا بديت اخاف!!

تنهدت بحيرة، ماعرف اذا الي دا اسويه صح بس هي لازم تعرف.

اماني: رح احجيلج، بس وعديني تظلين هادئة ومتسوين مشكلة بهالليل!!

ريما: مون تحجين عاد لو لا ترا بزعتيني!!

اماني: تمام بس ظلي هادئة!

ردت بنبرة عالية مستنكرة.
ريما: ششايفتني يعنييي دا اصيييح؟!

نترت بيها..
اماني: ريما!!!

ريما: سكتت، احجي فضيني

حجيتلها الصار وياي وكلام ريان هم، الحادث وكلشي كلشي بالتفصيل..

بالمقابل جانت تسمعلي وهادئة عكس ما توقعت!!

توقعتها تكلب الدنيا تصيح تحجي عليه بس لا!!

ريما: يعني تأكدتي هذا هو بابا مو مثلما نعرفه؟!

بنبرة مليانة أسف، اردفت بالأيجاب..

اماني: اي ريري.. بابا طلع لابس قناع النزاهو وخدعنا كل هالسنين

ريما: بس اني جنت حاسة مون!

عكدت حواجبي باستغراب وكلت.

اماني: شلون يعني حاسة؟ سامعة شي شايفة شي احجيلي؟!

ريما: باعي هو بصراحة اني من فترة من ردت اشتغل بالمجمع الطبي مالته هو رفض، رغم جان دائما يكلي كملي دراسة حتى اعينچ بي بس من صارت صدك كام يطلع حجج وسوالف مو مقنعة!! حتى بس اتركه وانسى الفكرة

اماني: اي وبعدين؟

ريما: ومرة من المرات، زرته هناك جنت متوجعة وبطني تأذيني من البرد، كلت اخذلي شريط مال مغص من الصيدلية واطلع بوجهي، شو من كتله للولد انطاني الدوة و كلي انتِ بت الدكتور مو؟ كتله اي، كام جر الدوة من ايدي وكلي غير تحجين لعد! و لتشترين منا ما ابيعلج اني، يمعود ليش هيج عدل بدل ماكو، ظلت ببالي السالفة فـ كلت لريان كلي لا يجوز ما حب ينطيج شي ويدخل بسالفة وية بابا خاف ميفيدج، ما اقتنعت بس هم جنت مو كلش مهتمة اعرف، تدرين جنت بادية اشتغل وهم ما خطرت ببالي تكون السالفة هيج ابدا!!!

اماني: شحجي عليك يا بابا هسة، بس كولي شحجي!!!

ريما: عوفج منه ريان ليش ماهوة؟ عود خطفوه مثلما رادو يخطفوج؟!

اماني: مادري ريري مادري راسي رح ينفجر!! مدا استوعب شس بعد، معقولة هذا ابونا ولله مدا اتقبل الفكرة!

ريما: اني هم، لسة مصدومة واكول بلكت يطلع سوء فهم!! مون بابا بالنسبة الي بطلي الخارق وقدوتي، والي بسببه معاييري كلها مرتفعة بالزلم، تالي يطلع هو هيج؟!! يا فشلـة الفشلة..

اماني: افففف خلي اكوم اشوف الولد بلكي واحد منهم شافه او يعرف وين راح

ريما: تمام واني نازلة لبابا

اماني: شسوين يمه!!

ريما: اذا انتِ تسكتيله، اني ما اسكت يلا باي

سدته بدون متنطيني فرصة احجي، واصلا هو مو صوجها صوجي اني الغبية الحجيتلها!!!

كمت افتريت المستشفى مرة ثانية، صادفني قسورة الي كال بتعجب من شاف ضياعي..

قسورة: دكتورة خير بيج شي؟ ليش هيج حالتج؟!

اماني: قسور عفية ما شفت ريان؟

قسورة: لا بس اخير شي جان يم ليث اتوقع، هسة اسألجياه

اماني: اي ولله ياريت

قسورة: خير خو ماكو شي؟!

اماني: ماكو بس احتاجيته بشغلة وما لكيته

قسورة: زين اتصلي عليه هاج هذا تلفوني

توترت.. شكله هسةة!

اماني: ل..لا ماكو داعي لان تلفونه مطفي شحن اصلا

قسورة: اها، لعد اشوفلج ليث وارجع

اماني: اي انتظرك

راح بس جنه ممقتنع، ديلا ولا يقتنع شسويله اهم شي الكة اخوية!

راح ورجع هو وليث وسجاد.

قسورة: هاي الدكتورة، احجيلها شكتلي

سجاد: يعني هو ريان جان كاعد يمنا اني وليث بس فجأة دك تلفونه، انكلب وجهه وراح بعيد جاوب

ليث: اي وجان منفعل، ادور اجة ترخص منا كال شوية واجي كناله براحتك ولسة مشفناه

اماني: هالحجي قبل شكد يعني؟؟

ليث: قبل ليكعد عقاب بنص ساعة تقريبًا

سجاد: اي تقريبًا .. ليش صاير شي؟

اماني: لا شكرا تعبتكم

ليث: لا ولو مسوينا شي .

اماني: منو اكو يم عقاب بعد؟!

قسورة: شاهين وضرغام

اماني: لعد الحجي وين؟

قسورة: وديته لغرفته يرتاح

اماني: اها تمام

اجتي الممرضة الي اخذت تلفونها..

-دكتورة هاي وحدة تكول اختج تريدج بشي ضروري

بلعت ريكي بخوف، بسلا صاير شي!!!

حاولت ما اتأثر كبالهم، رغم ان نظرات قسورة الي دتكلي كاشفج ضوجتني بس ما اهتميت.

اخذت التلفون منها ورحت بعيد ارد.

اماني: ها ريما شكو؟!

اجاني صوتها يرجف..
ريما: مون لا ماما ولا بابا موجودين!!!! محد ماكو ومادري وين راحوا ولا شوكت طلعوا!!!

وسعت عيوني بتفاجؤ والقلق زار خلاياي بتسارع..

اماني: يعني انتِ بالبيت وحدج؟!!!

ريما: اي اي وحدي وكمت اخاف بصراحة، امشي واتخيل واحد وراي اباوع ماكو احد كمت امشي واحجي وية روحي مثل المخبلة

اماني: باعي هسة انتِ قوي نفسج وسدي بيبان البيت عليج ولتطلعين لاي مكان، واني هسة جايتچ

ريما: تمام بس عليج الله استعجلي دا اموت خووف ولل....

انقطع كلامها لما صرخت بفزع، ظليت اصيح..

اماني: ريمااااااا ريماااا ريييييرييييييييي، ريرييي حبيبتي وينجج!!!!

بعدها اختفى صوت صرخاتها وانسد الخط، ظليت اطكطك من الرجفة والخوف ...

شسوي اني هسة واهلي وينهم شديصير يا ربي؟!!!

رجع دك التلفون، رقم ريما!

فتحت خط وكلبي يرجف من الخوف..

كزبر جلدي من سمعت نبرة صوت المتصل، الي جانت كلها وحشية مثل حال كلماته ..

-لو تلحكين ع اختج الحلوة لو متلحكين!! ترا الشباب جوعانين وهاي خوش فريسة

نترت بي بغضب...

اماني: حقييييييير اندمك بس تمد ايدك عليهااا!!!!! ديربالك تدنالهاااااا سامعننننيييييي؟!!!!!

-هالشي يعتمد ع تعاونج ويانه، تصيرين حبابه؟ ميصيرلها شي، تلعبين بذيلج منا مناك؟ تصير فريستنا وللصبح وبكيفج بعد

صرخت بألم لمجرد لفظه للكلمة..

اماني: لااا لا لاا!!!! الله يخليك لا لتسويلها شي، كولي شنو المطلوب مني رح انفذ

-اولا، اذا حسيت مجرد احساس، ها سامعتني احساس بس!! ان انتِ انطيتي خبر لجماعتج او للشرطة ساعتها اقري ع روحها الفاتحة، مو بس هي اخوج امج ابوج، كلهم بأيدي، ومصيرهم يعتمد عليج انتِ!

نار الكيد والحقد شعلت بصدري، كتمتها بكد ما اكدر وحاولت ما انهار حتى محد يحس عليه واورط اهلي.

اماني: تمام

-ثانيًا والاهم، بس تطلعين من المستشفى حيكون اكو سيارة تكسي واكفة عالشارع منتظرتج، سايقها رجال جبير بالعمر صعدي وياه هو يجيبج لموقع لقاءنا

اماني: بس انت منو؟! ليش هيج دتسوي بأهلي شنو مصلحتك ويانه!!!!

-هذي الاسئلة كلها احتفظي بيها للوقت المناسب، واخذي اجاباتها من السيد الوالد، هاي اذا ظل عايش طبعًا

اماني: واحنه شنو ذنبنه بمشاكلك انت وابوية؟!! ليش دتعاقبنا ع شي مالنا ايد بي!!!!

-ذنبچ انتِ واهلج ان انتوا عائلة انسان ساقط، وبس!

اماني: حرام عليك الي دتسوي، انت ما عندك اهل متخاف الله؟؟!!!!!

-اوووه اكلج ترا دوختيني، وهاي الاسطوانة سامعها هواي من قبل ومتمض بيه، فظيها وكولي تجين هسة لو اخلص عليهم واحد واحد؟!

اماني: جاية الله ياخذك.. جاية..

-شاطرة

سديته ودموعي بدت تنزل بقهر، يا ربي يعني الى متى يستمر هالعذاب؟ شوكت ارتاح؟!

مسحت دموعي وقويت نفسي، اذا ما اروح اهلي يموتون.

البجي ميفيدني هسة، حاولت ابين طبيعية ورحت رجعت التلفون للبنية.

وبوجهي طلعت بدون ما اودع عقاب او انطي خبر لواحد منهم.

لان ذولة يكشفوني من نظرة ما اكدر امثل عليهم انو اني بخير وماكو شي..

وخاف اذا عرفوا ذاك ينفذ تهديده ويقتل عائلتي.

وخاف هم يرجع عقاب او واحد من الولد يتأذى بسببي وبسبب اعمال بابا الفاسدة واللاقانونية.

فأختصرت الموضوع وطلعت، شفت سيارة واكفتلي والسايق موجود بنفس المواصفات الي كلي عليها.

امشي وكلبي يدك مثل الدمام من الخوف والفزع..
ايد ورة وايد كدام، ماعرف لوين دا اروح ولا شنو ممكن يصير وياي اذا صعدت وياهم..

كل الاعرفه اني رايحة اسوي شي حتى انقذ اهلي!

طول الطريق والهدوء المرعب دياكل بروحي من شدة الجزع والترقب ..

افكاري المتشابكة توديني وتجيبني والقلق نهش لحم مخي بـ جسارة..

وبداخل عقلي.. اكو الف دعاء دا يلهج بي بالي ولساني على حد سواء، والي مضمونه يكونون اهلي بخير!

بعد طريق طويل استغرق ساعات..
نزلني يم بيت بأطراف بغداد، المنطقة شبه مهجورة ولو اكو بيوت بس كلها بعيدة عن بعضها، كلمن مشمور بصفحة..

داير مداير البيت زلم كومة مسلحين، طلعلي واحد وجهه جنه وحش.. مشخط وتك عين ومنظره مرعب بشكل!!

يعني خاف اني عايزة خوف، اجة هذا حتى يكملها عليه.

كلي بصوته الأجش..

-السيـد بأنتظارج دكتورة ..

بلعت ريكي بثقل.. حافظت على ثبات ملامحي ورديت عليه بحدة.

اماني: ما اريد اشوف احد، اهلي وينهم؟!!

-مو انتِ لازم تشوفيه حتى تعرفين اهلج وين

عكدت حواجبي بتفكير، صوته يشبه صوت هذا الي خابرني قبل شوية..

اماني: انتَ نفسك الي حجيت وياي بالتلفون مو؟!

-قوة ملاحظتچ قوية!

اردفت بصوت عالي ..
اماني: يعني جنت انت؟!!!!!

ضحك ورد ..

-اخويه التوأم مو اني.

اردفت بتقزز..

اماني: ماكو فرق نفس الطينة انت وياه!!!

-السيـد يكره الانتظار، وميحب الي يتأخر عليه، هاي اني حذرتج خاف تكولين ما كلي!!

ارتعدت ملامحي بخوف، وعبرته بخطوات متسارعة حتى افوت اقابل التبن هذا الي اسمه السيد!!

وية ما دخلت، انصدمت بالشخص الي شفته!!

فتحت حلكي بدهشة وعيوني شاخصة بنظراتها باتجاهه بعدم تصديق...

تمتمت ببطئ من هول الموقف..

اماني: عمو توفيييق!!!

كام من مكانه، واجة وكف كدامي وعلى وجهه ملامح الغرور والانتصار..

توفيق: عيون عمو، تفضلي كعدي

اشرلي ع كرسي الموجود بجانب مكتبه الي يتوسط القاعة الجبيرة هاي.

سرعان ما تغيرت ملامحي من المصدومة للمشمئزة المليئة بالحقد والضغينة.

اماني: انت اخر شخص توقعت منه يكون بهاي النذالةةة!!!!

رد بخبث رافع حاجبه بشك..

توفيق: زين يعني دكتور رياض قبلي لو بعدي؟

تغاضيت عن سؤاله وحجيت بثبات.

اماني: اهلي وييين؟؟ شسويتلهم وليش جبتهم لهناا شتريد مننا انت؟؟!!!!

توفيق: للامانة يا عمو، اني ما ردت الامور توصل لهنا بس ابوج اصّر وظل راكب راسه ومعاندني، لا وراد ينسحب ويترك شغلنا الي تعبنا عليه من سنيييين!! ولله شنو؟ يريد يتوب!

فتحت عيوني على وسعهن بصدمة، شيريد عقلي يستوعب حتى يستوعب!!

توفيق: بلا كليلي انتِ.. يصير تدخلين شراكة انتِ ودكتورة صديقتج بشغلة، وبعدين بنص الطريق تعوفيها وتديرين وجهج الها؟ لا وتروحين تشاركين شخص ثاني غيرها وبكل صلافة تريدين تنهين كل العقود والمستحقات الي بينكم! هيج بهالبساطةة!!؟؟؟

اماني: انت دتقصد عقود الفساد الصحي مو؟

هز راسه واردف بفخر..

توفيق: بالضبط!

اماني: طلعت حقير لابس عباية الاخلاق والنظامية!!!! شكد نزلت من عيني انت وبابا بعدما عرفت حقيقتكم!! انتوا عار!!!!!

هسهست بـغل، ضحك ادور ضرب يأيديه عالطاولة بقوة وأضاف كلامه التالي..

توفيق: اششششششش كافي لغوة ودراما، احنه ببلد الفساد والرشاوي، العراق هو صاحب لقب البلد الاكثر فسادًا بالعالم من بعد دول افريقيا المحتاجة طبعًا..

اماني: بس بلدنا ما محتاج!!! لك احنه اغنى شعب بالعالم بس انت وامثالك سبب كون بلدنا بالحضيييض!!!

توفيق: اني وامثالي مو اكثر من مجرد امتداد لفساد الاداريين الي سبقونا بالحكم.. وهنا الامتداد فريضة واجبة البقاء!

اماني: فرضيات فارغة وكلام تافه ماله اساس من الصحة!! انت اي ممكن تكون اجيت لكيت الوضع خربان بس وجودك بهالمركز هذا لحتى تصحح الخراب مو تزيّده!! الشعب حط ثقته بيك وبأمثالك على امل تكونون التغيير المنتظر!!

توفيق: ناتج معادلة التغيير للوضع السياسي المتهالك في العراق، قيمته غير مُعرفّة..!

اماني: اذا تغيرت الثوابت ومعاملات المتغير تتغير قيم الناتج!

توفيق: بس هالشي مو ممكن بقواعدنا، الثوابت ممكن تتغير بالرياضيات بس بقواعد لعبتنا الثوابت ثوابت دائمًا، اما معاملات المتغير تتبدل تبعًا لنوع الحاجة المستخدمة الها، وغالبا هالمعاملات تكون مجرد ادوات لعب، نتحكم بيها بمزاجنا حتى نغير مسار المعادلة لصالحنا.

اماني: بكلامك هذا اثبتتلي شكد انت انسان منحط!! الفساد فساد الروح قبل فساد الاموال والاعمال، وانت من داخلك فاسد ومتصيرلك چارة!

توفيق: مثل مكتلج احنه ببلد الفساد، حتى نكدر نتعايش بسلام لازم نطخ راس لراية الفساد ونعلن ولائنا التام الها.. بكل مفاصل البلد منتشر الفساد والمزايدات اللاقانونية، بكل محفل وطني اكو محسوبيات، وبالمقابل القطاع الصحي لازم يكون اله نظير ينافس سياسات بقية القطاعات المهملة والفاسدة.. بعدين احنه عليمن نبيع مثاليات دكتورة غير انتِ دافنة نص المرضى اليجوج من ورة اخطائج الطبية لو تحبين اذكرج؟!!!

اماني: اياك وبالك تشبهني بيك!! مهما يكن الي يخطأ خطأ ما متعمد يبقى احسن بهواي من القتلة امثالك!! ومستحيل يتساوى بـألي يبيع اخلاقه واهلها وشعبه علمود الفلوس بدون ميهتم لحياتهم!!!

توفيق: التبرير قوي لكن النتيجة وحدة.. وهي الموت!

حجيت بنفاذ صبر، لان اعصابي تلفت من كلامه وجبروته الي ماعرف وين جان عني وممنتبهتله!

اماني: اهلي وين اختصر!!

توفيق: حلو، اني هم اريد اختصر بس انتِ الله يسامحج تقمصتي دور الوطنية المضحية ودخلتينا بمواضيع فرعية، وخليتينا ننشغل عن موضوعنا الرئيسي.

اماني: الي هو؟ احجي!

توفيق: رح احجي بس اول شي، خليني اراويج فلم صغيروني ممكن يعجبج

احتلتني الغرابة، خاصة ان هو كلامه كله الغاز و اهلي بأيده!

توفيق: معييين تعال!!

نادى على واحد من زلمه، اجة وطلع هو نفسه الي شفته اول ما اجيت..

بأيده ايباد انطاه لتوفيق.

توفيق: الفلم موجود؟

-كامل مكمل سيـد

توفيق: عشت، تكدر تروح

طخ راسه باحترام وراح، متت خوف واني انقل نظراتي بينهم وادور على اجابة شافية تريّح كلبي.

اماني: شنوو هذا لشنو دتخطط!!!

توفيق: لا تستعجلين، هسة تعرفين

مدلي الايباد، ظليت اباوع بقلق وجامدة بمكاني..

توفيق: اخذي شوفي متاكد يهمج

خوّفني كلامه، تشجعت واخذت الايباد منه.

توفيق: شغلي الفيديو ..

عضيت ع شفايفي بقوة كمحاولة يائسة لتمالك نفسي والسيطرة على زمام تصرفاتها..

ضغطت ع الشاشة مشغلة الفيديو..

سرعان ما تبدلت ملامحي للصدمة الممزوجة بالهلع المميت.

دموعي انسدلت بوفرة من عيوني وكلبي امسى ينبض بضعف من كد بشاعة الي شفته..

ريان معلكيه ع طاولة قمار من ايديه، ويچوون بجلده بالجمر وهو يصيح ويستريح من الوجع..

وجهه صعب تتعرف عليه من كد الضرب والاورام الي محتلته..

اكتافه خايرة وكأن ايديه مفترة او مكسورة..

يتنفس ببطئ او يا دوب يكدر ياخذ نفس حتى!

أسوّدت الدنيا بعيني، وكعت بالكاع على ركبي وحالتي كلما جالها تزداد سوء!

وسط نوبة البكاء الي سيطرت عليه، اجة يمي توفيق قدملي كلينس ومي.

رفعت راسي مباوعتله بأحتقار..

شمرت الكلاص بالكاع اطشر وهو كام من يمي راسم ملامح حزينة مزيفة ..

توفيق: اذا نقلل ادب يختلف الحجي ترا، خليچ محترمة حتى اعاملج على هالاساس!!

اماني: كول لزلمك يعوفون ريان فورررًا!!!!

توفيق: سهلة، بس احتاج احجي وياج واخذ موافقتج بموضوع ثاني مهم

اماني: يا موضوع بعد توفييييق!!!!!! اخويه ديموتتتت خليهم يسعفوه يسووله شي!!

توفيق: بدال هالحجي جان كتلج شنو الموضوع وتلاحكناه!

اماني: الله ياخذك... الله ياخذكككككككككك يااااااا كللللللبببببببببب

بالبداية تمتمت بخفوت، بعدين الصرخة طلعت من اعماق روحـي المتألمة..

توفيق: هسة احجي لو لا؟

اماني: احجي!

توفيق: ........

من فرط الوجع، شعرتُ بأن روحي تتمزق الى اشلاءٍ متناهية في الصغر..
بقلم: نورمين

....

انتهى ..

لا تنسوا التصويت والتعليق 🦋🖤

#الكاتبة نورمين