خذ بيدي ولا تسألني الفصل الثاني والعشرون 22 - بقلم نهى

خُذ بيدي ولاتسألني
بقلم الكاتبة Nuha-d-h

التحق رضوان صارلة يومين
جنت اكوي بملابس رضوان واجتني هاجر انطتني نقالها
- هَـاج اخذي هذا رضوان يريد يحجي وياج
-الو هلو رضوان شلونك اي صحيح مغلق لان
وكع بالماي جنت عايفتة على ميز الطعام رحت اكمل شغلي بالبيت اجيت لكيتة طايح بدولكة الماي سألت منو الي شمر عمتي كالت هذا كرار شمرة شفت شلون صاير وكح
-لا تخاف مسويتلة شي هو اني اكدر امد ايدي عليه من وراك مطلع عينة
-لا ممحتاجين شي بس سلامتك الله وياك مع السلامة
نهيت الاتصال
صرت اشتاقلة واشتاق لحضنة

خطية ضياء حماي كلي اني اشتريلج نقال لتضوجين
بس عمتي ظلت تحجي عليه كالت على يا اساس تشتريلها شنو نوب تگعد تصرف فلوسك عالغربة
ما اعرف ليش كلامها كلة سم
المهم نسيت سالفة النقال
وكملت ترتيب البيت لان بعد كم يوم يجون يخطبون هاجر
فالتهيت بالتحضيرات خطية هاجر حيل اتعلقت بية صارت متختار شي الا تجي تاخذ رأيي بي
واني داشوف موديلات الفساتين الي دتراوينياه هاجر سمعت عمتي صاحتني نزلت حتى اشوفها شتريد بس اتفاجئت بسهير جاية لبيت عيالي ولا كاعدة وية عمتي
سهير كامت سلمت علية ورديت عليها السلام
بس مستغربة من جيتها
- خية اتصلت عليج وجهازج مغلق وظل بالي عليج وعلى ابن اخوي واجيت اريديح تجين وياي لدكتورتي لان ما اكدر اروح لوحدي مثل متشوفين حالي كلش تعبانة ومريضة واني هسة كلش محتاجتج وياي
من شفت حال سهير انكسر خاطري عليها احس اشوف بيها قصي وعمي الله يرحمهم
التفتت على عمتي
عفية عمة اتصلي على رضوان اريد انطي خبر حتى اطلع خاف ميقبل
ام رضوان
-لايمة شدعوة تگاطعت الوادم لاحبوبة روحي وية بنت عمج خطية مدتشوفيها مريضة وتكسر الخاطر
-ميخالف هم للتأكيد اتصلي عليه حتى انطي خبر
-روحي انتي وياهة واني راح اتصل عليه واكلة طلعت وية بنت عمها للدكتور
شفتها لزمت نقالها وتصلت على رضوان وحجت وياه
وهو وافق اروح وية سهير
رحت بدلت وبقيت كرار عند هاجر ورحنا اني وسهير للدكتورة ودخلت لوحدها وسوت تحاليل وانتظرنا سرانا
ودخلت لوحدها مرة لخ وبعدين رجعنا كانت الدكتورة قريبة عالسوك هم اخذتني بالسوك وبعدين اخذتني لبيت كالت هذا بيت الخياطة صديقتها
دخلنا للبيت وكعدتنا المرية بالهول الحولي بس استغربت
عندها سبع بنات بس استغفر الله شكولهن مو راحة
ولو هي الام بكبرها شكلها مو راحة
وبعدين شفت سهير طلعت قطعة قماش وكعدت تحجي وياهة على التفصال
واني اباوع على بناتها وصوت الضحك مالتهن عالي واصل للشارع عبالك استغفر الله.
بعدما اتفقت سهير وية المرية على الخياط
سهير-شوفي حبوبة خاف اني ما اكدر اجي ادزلج هاي
بنت عمي رونق
واشرت علية
المرية-ماشاء الله هاي بنت عمج اشو متشبهج
هاي حلوة مكسرة عليج
-اي حلوة على امها الله يرحمها
كمنا وطلعنا وية طلعتنا
دخلو اربع رياجيل اشكالهم مبين عليهم الخير استغربت سألت سهير
-اگول سهير هذولي منو الي دخلو لبيت الخياطة
- هَـا هذولي اولادها غير
- ممبين عليهم اولادها اشو مبين عليهم الخير شعجب امهم خياطة
- هاا لا هي تحب تخيط حتى تطلع مصرفها متحب
واحد يصرف عليها متحب تظل بمنة احد
وصلتني لبيت عيالي
وراحت على بيتها
ومرت الايام منتظرين رضوان ينزل مجاز. حتى يسوون خطوبة هاجر

انتبهت على هاجر صارلها فترة صار
ووجها اصفر ما اعرف شنو مخربط حياتها بس الجائز اكو شي يخص نشوان بس اذا متريد تحجيلي براحتها مراح اضغط عليها هي من تشوف نفسها مستعدة تجيني وتحجيلي
بس اشو هاي صارت يوم عن يوم متقترب مني وتتهرب ما اعرف شبيها بس خل افرغ واشوفها شبيها

دخلت هاجر علية بالغرفة وكنت انوم بكرار
هاجر -رونق رضوان اتصل عليج يريد يحجي وياج
هاج لزمي النقال خل اروح واعوفكم تحجون براحتكم بس مو تطولون
اريد نقالي ترة
اخذتة منها واحس بگلبي طار من اللهفة
-الو رضوان
-لا الجني
- ههههه شلونك
-دوم الضحكة يارب لج مشتاقلج بگد رحمة الله بعد ما اكدر على البعد كرهت حتى الدوام من وراج
كمت احسب يوم يوم حتى انزل مجاز اتعودت كل يوم انومج على ايدي
ابتسمت
-حتى اني مشتاقتلك
-شلون شلون عيدي شكلتي الو الو
-هاا اني وياك اسمعك
-هَـا عبالي انگطع الخط اشو سكتي عيدي شنو گلتي
-مكلت شي كلت مشتاقتلك كومة ومشتاقة لحضنك
وشكلي نساوتي صارت على ريحة حضنك
-لا لا انتي اليوم ناوية علية ولج اني هنا كاعد مصموط ابو ابوي وانتي كاعدة تنغوصين وتحرگين بدمي بهذا صوتج
ااااخ ياصوتج اشكد جنت اتمنى اسمعج تهمسين بهذا صوتج وانتي بين ايدية
-رضوان استحي عيب صير عاقل
-ولج لتحجين هيج ياعاقل هي ظل بيها عاقل والله مظل براسي عقل من وراج والله دوختيني سبع دوخات خليتيني كاعد بالمكتب وافكر بيج حتى بدوامي اظل اتذكرج انتي وكرار
-والله حتى اني هم افكر بيك .....

طبعاً انتبهت على شغلة جديدة وهي ان اني اكون اخذ راحتي واصير اكثر جرءة بالتعبير عن مشاعري لرضوان من احجي وياه بالنقال اكثر من يكون گدامي
يمكن هذا الشي راجع لان هو ميكدر يشوفني فاعبر عن مشاعري الة بدون حواجز
-ااااخ يابة تدرين شتمنى
-اي
-اتمنى كون اني طير واجي لعندج وانام بحضنج
لج اااااخ هاي شفايفج هسة كون كدامي يمكن ما ارحم بيهم الا اطلع القضى والمضى بيهن
-اااه خرب
- هاا شنو اجيج الظاهر كلامي اثر بيج
- ههه يمعود شنو مصدكت ترة هذا ابنك كعد يرفس ببطني
-انتظريني اني اجي واعلمة الج شلون يصير عاقل
-اي جان علمت كرار اذا انت هيج ناصح
- ذكريني اشتريلج نقال من ارجع
-يالله اني راح اطلع ديري بالج على نفسج وعلى كرار
-ان شاء الله وانت هم دير بالك على حالك

رحت اودي النقال لهاجر شفتها دتحجي وية امها وتبجي
-يمة والله حرام عليج الي دتسوي ما اكدر اسكت بعد
-اكلج تاكلين تبن وتسكتين ماكو والله اخرب سالفة خطوبتج من نشوان وشوفي وكولي گالت امي والله اسود عيشتج
دخلت عليهم ونطيت النقال لهاجر
وشفتها بسرعة مسحت دموعها واخذت النقال مني وطلعت
شديصير بهذا البيت
التفتت علية عمتي ام رضوان حضري الاستقبال اليوم عزمت لؤي يجي على الغدة
يمة هذا شيسوي يجي للبيت يمة معقولة عمتي هي
المتفقة وياه حتى يبعدوني عن طريق رضوان لا ممعقولة
ما اتصور لان هي هاي الايام تاركتني بحالي ومالها شغل بية وحتى لو حاولت تفكر ان ابتعد عن طريق رضوان شي اكيد راح تتراجع من محاولتها لان اني شايلة حفيدها بس على الاكيد من طرف تمارة اي لان اسمعها كل يوم تتصل وتحجي وية عمتي

ما اكدر اتحمل وجود لؤي بالبيت هنا وجودة يرعبني
اني لازم من يجي رضوان احجي له عن تهديد لؤي الي
دخل ضياء وهو شايل بيدة دراجة هوائية صغيرة
ضياء-وين كروري صيحي بسرعة
اجت هاجر وهي شايلة كرار
هاجر -عااااا دراجة كروري يبوي بعد شيفكنا هو من غير كلشي كاضيها علينا صياح ونوب اشترولة دراجة هاي هي بعد ميتحاجة

دخل عمو ابو رضوان من باب المطبخ وخلفه دخل لؤي
اوووف ياربي شكد كريه
سلم عالكل واجة لعندي وسلم علية وكصني من فوك ليجوة بنظراتة المقززة
لؤي -شلونج ام كرار
رونق كوة اطلع الحجاية مني مالي نفس اباوع لخلقتة
-زينة نحمده ونشكر الله على كل حال
التفت على ضياء
-هاي شنو الدراجة انت لو ابوه مشتريها
ضياء -اني اشتريتها والله لو يسمع بية رضوان مشتري دراجة لكرار يلعب بية طوبة لان بعدة صغير عالدراجة
بس مو بيدي شفتها بالسوك وضعفت كدامها
لؤي وهو يباوع على رونق
-اي حقك تضعف گدامها هو منو الميضعف كدام هيج شي يموووت
ضياء - العفو شنو كلت مسمعتك
-كلت يالله انت همة مثل ابوه ماكو فرق بينكم
يحجي وعيونة على رونق

عزة العزاك يالسافل هذا صدك محد يوگفة عند حدة الا رضوان بس مع الاسف هو يجي لهنا بس من يكون رضوان ملتحق
رحت اكمل الغدة وية هاجر
ام رضوان-رونق تركي الي بيدج وروحي اخذي دولكة ماي لعمج ولؤي بالاستقبال
يعني ماكو غيري الا اني اروح
بس شحجي امري لله رحت اخذت اكلاص ماي ودولكة ورحت للاستقبال دكيت الباب ماكو محد طلع
عودك اني كلت ادك الباب ويطلع عمو ابو رضوان وانطي الماي بس اشو ماكو صوت بعد احسن خل ادخل احطهم على الميز واطلع الجائز راحو يغسلون اديهم قبل الغدى
دخلت وفعلاً ملگيت احد بالاستقبال حطيت اكلاص الماي والدولكة عالميز والتفتت ووكان انصدم بلؤي ساد باب الاستقبال ومنتجي عليه
- لؤي ليش سديت الباب
رحت اتقدمت
بالله شو ابتعد منا اريد اطلع ترة مو عبالك اخاف والله صوت واحد مني الم البيت عليك كلة
-الله وهو المطلوب يالله صرخي شتنتظرين
رونق
بدة الخوف يستوطن باطراف جسمي
-اني اليوم جاي مخصوص علمودج
-علمودي شكو
-اتوقع انطيتج فرصة حتى تفكرين بالكلتة الج وهسة اريد اعرف جوابج
-لك انت بكل عقلك تحجي تريدني اروح لرضوان واكلة طلگني احنا وين عايشين وحتى لو اني مراح ابتعد عن رضوان حتى لو على كص رگبتي لان رضوان مو بس زوجي وابو ابني لا رضوان حٍٍِْــًبٌٍـــِٓېٍٓ ومستحيل اتنازل عنه ومراح اسكتلك لا انت ولا للي دزك علية
- يعني هذا جواب نهائي
-اي ومراح تكدر تغيرة لو على جثتي مستحيل اخليكم تفرقون بيني وبين رضوان
-خلاص هذا هو لعد استلمي الي راح يجيج

يتبع