خذ بيدي ولا تسألني الفصل السابع والعشرون 27 - بقلم نهى

خُذ بيدي ولا تسألني
بقلم الكاتبة nuha-d-h

رضوان اجيت اطلع وسمعت صرخة هاجر
الي كانت مليانة قهر وهي تبجي

هاجر --لااااا رضوان انتظر اخذني وياك لتروح بعد ما اكدر اسكت اكثر من هيج اذا بعد بقيت ضامة الي بگلبي يمكن اموت
ام رضوان كامت على حيلها
-اكول هاجر انطمي وسدي حلكج لاوالله ترة اعرف شلون اسكتج
هاجر وبصياح مثل الي طفح بيها الكيل من ظلم امها
-لا ما اسكت بعد متخوفيني
شنو تردين تسوين سوي
براحتج تردين تخربين خطوبتي من نشوان بكيفج
مراح اكدر ابني سعادتي على حساب سعادة غيري
وزواج ما اريد اتزوج
بس راح احجي لرضوان عن كلشي سمعتة

هي كملت كلامها منا واجاهة راشدي على خدها من امها لطمتها على حلگها
انتبهت على هاجر شلون رفعت ايدها لخدها
-هذا الي الله قدرج عليه
- اشششش انجبي ولا كلمة والله اذبحج
كنت اباوع لهاجر شلون دموعها ظلت تنزل
وفجاءة سمعت صوت ضياء
-لا يمة اذا كدرتي على هاجروسكتيها براشدي وبتهديد فما راح تكدرين تسكتيني دخيل ربج انتي شنو من ام

ابو رضوان -احترم نفسك وانتبه لروحك ولتنسى نفسك ترة انت دتحجي وية امك
ضياء - والله يابة عاذرك بس بعد الي راح احجي الكم
ما راح اتوقع يبقى احترام التفت على امة ومع احترامي
للوالدة المصونة
ام رضوان ووجها صار الوان من الخوف
-يمة ضياء ليش تنطي بية
ولزمت گلبها
-لالا لتزمين گلبج هالمرة محد راح ينقذج لاگلبج ولازخوفهم عليج
مراح تگدرين تردعيني وتسكتيني
اليوم راح احجي كلشي لرضوان

شوف خوية رضوان مرتك طاهرة وشريفة ومظلومة
وهسة راح احجيلك عن كلشي
وكعد ضياء يحجي كل كلمة سمعها من امة ولؤي

....................................
ام رضوان -شوف خالة لؤي اسمع الي راح اطلبة منك
ما اريد احد يدري بي كائن من كان
هذا الشي بس بيني وبينك
لؤي -گولي خالة اني من ايدج هاي لايدج هاي
-شوف اريدك تبعد رونق عن طريق رضوان
بأي طريقة المهم ما اريدها تبقى على ذمتة
شلون اني ما ادري بس المهم كون تدبرلي
سالفة اريد رضوان ميباوع بوجها كون دبرلي ورطة تخليه بسرعة يطلكها
-ليش خالة شعجب تردين تبعديها عن رضوان اشو اشوفهم متناسبين والبنية خوش بنية ورضوان مبين عليه يحبها المن بعد تردين تبعديها
-اسكت ولك خالة راح اموووت من القهر هاي
المعيدية المتخلفة تاخذ ابني العقيد رضوان الي كلها تحلف براسة
والنسوان كلها تتمناه ان يصير من قسمة بناتهم
تالي متالي يصفالها لهاي البيئة
اععووووع لو شايفها شلون جنها مشايفة على كلشي تتعجب والله حتى استحي اطلع بيها بالاعراس والماسبات اخاف تفشلني كدام النسوان
ولا الي يكتلك مخلفة وجايبة وتبيع ثگل براس رضوان
وشالعة گلبة متريدة يتقرب عليها
ولا اتبلت على ابني ضياء وخلتة يهج من البيت
-اي خالة بس هذا مو سبب يخليج تبعدين البنية عن رجلها
هو القاضي راضي انتي بعد شكو من يمج
-لالا عفية شنو القاضي راضي لا حبوبي
هاي انفرضت عليه فرض
والله لوما زوجة صديقة المتوفي فلا يتزوجها
-بس خالة خلي ببالج ترة انتي تريدين تهجمين بيت ابنج مو هينة ترة صعبة
-شنو لؤي انت وياية لو علية
- لا وياج بس السالفة مو سهلة
-لتخاف اعرف بيها السالفة مو سهلة لذالك اني راح انطيك حلاوة تفيدك
-هذا هو مدام السالفة بيها فلوس اني خادم صغير
بس انتي هم اريدج تساعديني
-لتخاف دبرتلك
بنت عمها هاي اجتي بالصدفة النة
وجسيت مايها وشفتها تبيع امها وابوها علمود الفلوس
الله وكيلك
بس انطيتها خمس ورقات كامت ترجف
-هذا هو تٌـٌـمـــام انتظروني اني اتصل عليكم واكلكم شتسوون
-اي عفية لؤي بس خلصني منها بسرعة لان احس برضوان صار كلش متعلق بيها هي وابنها
والله اموووت من القهر اذا اخذتة وبعدتة
-اي يابة ادري بيج
هذا رضوان مو اي واحد من يوم يومج هو المفضل
على اولادج كلهم
.................
ضياء وهو يحجي وية رضوان
تعرف من سمعت كلامهم قررت افاتحها
واحجي وياهة ان تتوقف عن تنفيذ خطتها وهددتها ان احجيلكم الي سمعتة
لكن هي بوكتها اترجتني وحلفت ووعدتني ان راح تكنسل كلشي وتبعتد عن حياتكم
وحتى بوقتها اتخربطت واخذتوها للمستشفى

لكن شاءت الاقدار ان تتصل علية هاجر
لان تعرف بية اني الوحيد اعرف بسالفة امي ولؤي
وحجتلي امي شنو سوت برونق

ان تخلي بنت عمها توديها لبيت الدعارة على كم مرة بحجة تخيط حتى توديها لوحدها هناك
ومناك لؤي ينطي امر يسوون كبسة على البيت
البي رونق
لكن مع الاسف اجاني اتصال هاجر كلش متأخر وان امي منفذة كلشي.

لكن هاجر
كالت
ان امي حجت وية لؤي بالنقال
تكلة خلصني منها وياريت تتخلص من الي ببطنها يكون احسن وهسة رونق راح تلم هدومها وتتطلع من البيت

لك رضوان اجيت اتخبل من عرفت امي اشكد ما عندها خوف الله وشلون ترتكب على هاي المسكينة
بلحظتها ركضت شغلت سيارتي
وكعدت اتصل عليك لكن مع الاسف الظاهر الوالدة سبقتني واتصلت عليك لان كان مشغول
واني مبقى عندي وقت يعني لو تطلع رونق بباب البيت تخطي خطوة راح تتأذى
وصرت بين خيارين اما ان
اتصرف لوحدي من يمي
او منا على ما اكعد اشرحلك واحجيلك
تكون رونق راحت بالرجلين
فمن شفت رونق طالعة من بيت اهلي بالباب گبل اخذتها وركبتها بالسيارة
ووديتها لبيت صديقتها ام مروة امنتها عندهم
ورحت على سهير بنت عمها وهددتها بيك وكلتلها رضوان راح يجي يهد البيت على راسج
وهي من خوفها حجتلي شلون كان اتفاقها
وية امي ولؤي هي كانت بحاجة الفلس
واستغلت طيبة رونق وعطفها عليها وقشمرتها

رضوان وهو يرجف من القهر ومصدوم صدمة عمرة
بأمة -ليش ما اجيت بوكتها حجيت لي عن الي سمعتة
التفت ضياء على امة
- ها. يمة اگول لرضوان ليش محجت
لو اسكت
رجع التفت لاخوه
تعرف امك شسوت من درت اني عرفت بخطتها هي ولؤي
راحت دزت لؤي هددني ان اسافر لو يشوف شغلة وياي
لك خوية امك وصلت بيها المواصيل
ان مستعدة حتى تخلي لؤي يدز علية كم واحد
من الشلة التعبانة الي يعرفهم
حتى يتعرضولي
وبوقتها اتصلت عليك انت مجاوبت
وگدرت اشرد منهم لبيت صديقي
اتصلت عليك حتى تجيني وافهمك السالفة كلها لان لؤي خلة مراقبين يتأكدون ان اني ما اوصل للبيت

ام رضوان -جذاب وداعتك يمة رضوان اخوك يجذب عليك لتصدگة
هاجر -لا ماما ضياء ميجذب
التفتت على اخوها وابوها
رضوان امي مو بس هددت ضياء حتى هددتني الية
ان اذا احجي تفسخ خطوبتي من نشوان ما انكر اني غلطانة لان خفت خاف تخرب خطوبتي من نشوان
وقبلت اسكت بس صدكني حيل متندمة بگد شعر
راسي والله حتى اتمرضت من تأنيب الضمير خصوصاً من اشوف رونق شلون تداري بامي وتنصحني ان ادير بالي على امي وما ازعجها لان مريضة
واموت قهر من اشوف معاملة امي وياهة
احس بروحي صدك نذلة وحقيرة
لان مواقف رونق الطيبة وياي هواي واني خنت عشرتي وياهة وجازيتها بسكوتي وبقيت اشوفها شلون
خايفة وتتلوة من القلق والحيرة من ورة تهديد لؤي الها

ام رضوان -لالا لا مستحيل كلكم جذابين
رضوان يمة لتصدكهم انت تعقلها ام تسوي بابنها هيج شي
ابو رضوان
-اشششش ولا كلمة ما اريد اسمع حرف منج انتي بالذات ولج الله اكبر على راسج شنو من مرة
وانة اگول هاي الايام اشو كثرت جيات لؤي لبيتنا شنو هالحب الي نزل عليه فد نوب
رضوان وبكل قهر وغل الدنيا
-ليش يمة عفو عليج شلون انطاج گلبج تشوفيني اتگلب اتگلب من القهر گدام عينج
واگلج يمة هاي مريتي واحبها ورحي من الدنيا
شلون هنت عليج ماگلتي هذا المگموع خطية
يعني انتي هسة تردين تقنعيني
ان انتي سويتي كل هذا علمود تحبيني
لا مستحيل ما اصدك لان الي سويتي بية وبرونق
ميتسمى حب هذا
يسمونة مرض
يمة انتي مريضة انانية
كون كلشي التردينة لازم يتنفذ
بس مع الاسف بهاي سوايتج
خسرتيني وبعد انسي عندج ولد اسمة رضوان

ام رضوان رحت وكفت لعند رضوان ولزمتة من زنده
-لالا يمة عفية رضوان والله اموت اذا تطلع من البيت
-لا يوم هذا كان زمان من كنت اسويلج الف حساب قبل لا اخطي اي خطوة واخاف على مشاعرج
لكن هسة مع الاسف مستحيل بعد اسويلج حساب
على الي سويتي بية
واذا صار عليج شي وتمرضتي فهذا مو علمود حبج لرضوان لا بالعكس هذا مرضج من ورة تأنيب ظميرج لان بافعالج خسرتي احترام اقرب الناس الج
طلع رضوان
من البيت وهو مقرر ان بعد ميرجع لبيت اهلة لو
مهما صار
وراح اتجه لعائلتة الي وهبهم الله الة
رونق وكرار
اخ يا رونق والله الج غصة بگلبي
ميت قهر شلون مگدرت اصونج واحافظ عليج شكلي فشلت بهاي المهمة
وحقها متنطيني ثقتها اذا كان كلشي ضدها
اااااااخ يبنت گلبي
ركب سيارتة وشغلها وراح
ينفذ الي كان ناوي عليه

يتبع