خذ بيدي ولا تسألني الفصل الثامن والعشرون 28 - بقلم نهى

خُذ بيدي ولا تسألني
بقلم الكاتبة nuha-d-h

((

رضوان دخلت لبيتي وتفاجئت بوجود ابوي وخواني
رضا وفاضل وضياء منتظريني ببيتي
ورنق جاي تضيفهم باوعت لرونق بتسائل
هي رفعت جتفها بعدم المعرفة بسبب جيتهم النا

طبعا انتقلت اني ورنق ببيتنا الجديد قريب على بيت اهلي
اني من يوم الي طلعت بي من بيت اهلي بعد مدخلتلة
لا اني ولا رونق
لان الي صار بينا من ورة امي مو شوية وصارلي عبرة من يومها والكل. عاذرني على قساوتي
سمعت بامي ووكعت متخربطة ورة ما طلعت منهم وصارت بيها جلطة ادت الي شلل بايديها وحلگها
ما انكر انمرد گلبي عليها بوقتها اجيت انسى نفسي واروحلها لكن رجعت ذكرت روحي بالي صار

عمري مراح انسى الي صار بية وبرونق
............................
بيومها رحت واتوجهت على عائلتي
طلعت من بيت اهلي واني ميت قهر من امي على سوايتها وياي وشلون خربت حياتي وحياة رونق
اتذكر شلون كان شكلها من طلعت سمعت صوتها تصيح وراي يمة رضوان لاتعوفني
بس اني هالمرة دست على گلبي وطلعت من حياتهم
سمعت ابوي وضياء ركضو على امي الظاهر امي اتخربطت
ما انكر گلبي خمطني عليها لكن لا مستحيل هالمرة مراح اخلي گلبي يحن
وصلت لبيت ام مروة ونزلت من السيارة وتوجهت لباب اليبت ودكيتة وطلعلي مروان وسئلتة عن رونق
وگلي امة ورونق اخذو كرار للمستوصف لان مريض وهسة على جية
رضوان -ليش من سألتك باول يوم من تجيتكم لهنا اسأل عن رونق كلت مجتي لهنا
مروان -والله ياخوي اني عبداً مأمور بأن ما اجيب طاري رونق لأي واحد خصوصاً الك لان كانت
خايفة منك على الي صار لان اهلك مبلغين
رونق اذا انت تشوفها تذبحها
قاطعنا صوت كرار والتفتت عليه
رفعت نظري وشفت
رونق شلون شايلتة ولابسة عباية وهي حامل متت قهر على حالها شلون تعبانة ومهمومة
اتمنيت اركضلهم واخذهم باحظاني
ماحسيت من رجلية خذتني لعندهم
ورحت اتقدمت عليهم بخطوات شفتها شلون رفعت راسها
وجمدت بمكانها وبانت على وجها معالم الخوف
وسمعت صوت كرار من شافني صاح بابا ...بابا
ظل يدفع بأمة يريد ينزل من ايدها ونزلتة وهي عيونها بعيوني
واجة كروري يمشي على كيف الي بخطوتة البطيئة
وهو يضحك ووصل لعندي ورفع ايديه بفرحة
ااااخ ياابة من شفت عيونة شلون صارت بيهن لمعة فرحة ولد صغير بشوفة ابوه كانت بيهم اللهفة
شلتة ورفعتة وحضنتة وشميت رگبته افييششش هسة ارتاح گلبي
احس بروحي جنت مضيع شي ثمين وعثرت عليه
انتبهت على رونق ظلت جامدة بمكانها رحت اتقدمت لعندها وبدون مقدمات وبدون ما انطق اي كلمة
گمت سحبتها من ايدها وحضنتها حيل بصدري وما اهتميت
لمكان تواجدنا بنص الشارع
سمعت شهكت رونق و كأنها
كانت مخزونة ومحبوسة بصدرها
لزمتني حيل من قميصي وصارت تبجي مثل الطفلة

رونق

وانتبهت على رضوان اتقدم بتجاهي وفتحلي ذراعه
اني بوقتها متحملت شمرت نفسي مثل الطفلة من تححضن ابوها
اي رضوان ابوية واخوية وكلشي بدنيتي
حضنتة وصرت اشهگ وابجي وكأنما اشتكيلة
على الظلم الي اتعرضتلة من بعد غيابه
شنو صار بية
رونق وبصوت باكي
-ليش رضوان اتأخرت علية والله كنت بعز الحاجة الك
كنت لوحدي خايفة
من سافرت صارت المصايب تركع فوگ راسي
من كل صوب
رفع صبعة وحطة على شفتي
-اشششش هسة مو وكت العتاب خليني اشبع من حضنج وبعدين نكعد نتعاب عتاب الاحباب
همست بصوت يرجف
رفعت راسي وباوعت بعيونة شفت الابتسامة والدمعة تلمع بعيونة وابتسم لي
-صار مراح اعتب
اهم شي انت رجعت النا ومراح تتركنا بعد
دنگ راسة بتجاهي باسني من راسي
حتى يطمني
وهمس بأذني
-لج رونق الله يلعن ابليسج صرنا فرجة للناس بنص الشارع
ضحكت واني ابجي وسحبت نفس عميق وطلعت حصرة من داخل صدري
ام مروة -تعالو خالة تفضلو جوة
خطية كانت هي الثانية تبجي
لان تعرف بحالي شكد اتعذبت بحياتي
دخلنا
انتبهت لمروة شلون تباوع علية
ورفعت حاجبها بتسائل
بمعنى شنو
من شافت ابتسامتي هي ضحكت واطمنت
ان رضوان جاي علية يرجعني
كان رضوان لازمني من ايدي وشايل كرار بيأيدة اللاخ
ورحنا كعدنا بالاستقبال سوية
وكانت ام مروة ومروة موجودات لكن مروان كان خارج البيت
وصار رضوان يحجي لرونق على كل الي صار من بعد ما تركت البيت
رونق
كنت بين المصدومة والمتفاجئة من الي سمعتة
من رضوان يعني معقولة
اكو هيج ناس ناقصة ذمة وضمير
يعني لو بعد مليون سنة مراح اصدك ان عمتي وسهير ولؤي يتفقون على تشويه سمعتي امام رضوان
والله كرهت الدنيا من سمعت بسواية بنت عمي وياي
الله لايرضى عليهم
يعني حتى گطعو سبيل المعروف
التفت علية رضوان
-رونق يالله جيبي غراضج وجنطتج
وتعاي وياي
مراح اطلع من البيت اذا مو رجلي على رجلج
ضيعت من عمري بمافيه الكفاية واني اركض وراج
والله تعبني حبج
احس بروحي داخل بحرب ولازم انتصرلان كلها صارت ضدي
وما اريد اخوض الحرب لوحدي اريد عائلتي وياي
لان انتو سبب قوتي وبيكم ومن اجلكم اني راح احارب الكل
رونق وبفرحة كان كلام رضوان الي مثل البلسم على گلبي
بوقتها اخذني رحنا. اني وكرار وية رضوان لبيت اخوه
رضا
-رضا انطيني مفاتيح بيتي
-شنو راح تنتقل لبيتك
-اي بس قبل لا انتقل بي اريد رونق تشوفة حتى نأثثة
سوية
رونق
كانت اسعد لحضات بحياتي من شوفني رضوان البيت كان كلش حلو بناء حديث بنفس منطقة اهلة
ومرت الايام
وانتقلنا بالبيت طبعا رضوان طلب من خواته وضياء ان
ينقلون الغرفة وغراضها للبيت الجديد
لان مقبل لاهو ولا اني ندخل لبيت اهلة
طبعاً كان رضوان كلش قاسي بتعاملة وية امة وابوه
واباوع على عمو شلون مقهور من نقلو غرفتنا لان احنا بيتنا قريب على بيت عيالي
حسيت بالذنب بتجاه عيالي يمكن لو مامتزوجني رضوان جان مصارت هاي المشاكل كلها

وبمرور الايام كملنا تأثيث البيت واستقرينا
وقرر رضوان ان ينقل دوامه قريب علينا
وفعلاً تم النقل
واني صرت ام البيت احس بروحي ملكة
واني ممصدگة نفسي
ان هذا بيتي ووطني ومحد راح يهدد اماني اني وعائلتي الصغيرة
...............................
بعد مرور فترة
صار عدنا ولد ورضوان گال نسميه قصي
وفعلا صار عندنا قصي وكرار احلى اطفال
وكلما اشوف رضوان كاعد يمهم احس بسعادة
وادعي ربي كل يوم ان يحفظهم الي ويديم هاي النعمة علية
بس اليوم اتفاجئت بجية ابو رضوان واخوانه على بيتنا
طبعاً رضوان تقريبا راح يصير له سنة مشايف اهلة وبالذات امة
كنت اسمع من هاجر وفاتن ان امهم انشلت واتغيرت كلش هواي
وانصدمت صدمة حياتي من سمعت بعمو ابو رضوان اتزوج مدرسة عمرها بالاربعين على ام رضوان
والله بوقتها متت قهر عليها
كانت هاجر من تتصل علية دائما تحجيلي عن امها لان
نشوان يوديها لبيت اهلها لحتى تساعد امها وكانت تحجيلي معاناة ام رضوان وية ضرتها
ودائما يكولن امي تبجي وتريد تشوف ابن رضوان
بس من اجي اطلب من رضوان اودي قصي حتى تشوفة عمتي ميقبل
كلتلة مو اني الي اوديه هاجر هي الي تجي تاخذة خطية بس تشوفة
رضوان بوقتها جاوبني بعصبية
-رونق مستحيل واياني وياج اسمع بيج مودية قصي لاهلي فكرج ترة
كانت دائما محاولاتي تخيب بالفشل
واتوقع اليوم حموييني جايين علمود سالفة امهم
قدمتلهم العصاير ورحت گعدت بصف رضوان
وبدة فاضل يحجي
-شوف رضوان اليوم احنا جايين علمود نصالحك وية امي
ترة الوالدة خطية حالتها كلش تقهر لاتسر صديق ولا عدو وهسة وگعت وتخربطت مرة ثانية وكل ساعة تصيح اريد اشوف رضوان ابني
وجيبولي ابن رضوان
-اسف خوية جيتكم الى عيني وراسي بس الموضوع لهنا وينتهي اني مراح اكدر اسامح امي على الي سوتة
بية
كانت قساوتها بتجاهي وبتجاه عائلتي لاتغتفر
هي اختارت بتصرفها هذا ان ابتعد عن حياتها ومسوت حساب بيوم الي راح اعرف بي هي ورة كل هالمصايب الي وكعت على راسي اني ورونق
ابو رضوان
-زين واذا گتلك لخاطري روح شوف امك
رضوان -يابة خاطرك على عيني وراسي بس اعتذر
بعدة جرحي ماطاب
وكعدو اخوان رضوان يحجون ويحاولون يقنعونة لكن ماكو فايدة
دخيل الله اشكد راسة يابس
لكن من ايسو الولد ورادو يطلعون من بيتنا
اني فاجئتهم من صحت لعمي وللولد

رونق
-انتضرعمو اخذوني وياكم اني
مالي گعدة بهل البيت
مدام رضوان ميقبل ان يتراضة وية امه
اني مراح اكعدلة بالبيت لحظة وحدة
رضوان بغضب
-لج رونق كعدي وسكتي انتي لتتدخلين
وشنو يعني تهددني بيج وتلزميني من ايدي التوجعني

رونق بتحدي
-شتريد تفتهمه افتهمها
اني رايحة وية عمو
رضوان وبغضب وعيونة تجدح نار
-لج رونق اذا عتبتي باب بيتي مالج رجعة

انقهرت من قساوتة حتى وياي
حجيت وخاطري مكسور
-اشكرك رضوان
براحتك هذا بيتك وانت حر بي اني ما اجبرك
بس مراح ابقالك هنا
شفتة صار اعصاب بالزايد
-وخلي ببالج اطفالي متاخذيهم لا كرار ولا قصي فاهمة
ابتسمت بداخلي لان اعرف هسة كبرياء رضوان الي ديحجي وياي وهسة هو ميكدر يكلي لتروحين لان كرامتة متسمحلة فصار يضغط علية بالاولاد
-عادي براحتك اولادك خليهم عندك واني رايحة
التفتت على الولد وعمو
بس انتظروني اجيب جنطتي واجي وياكم
رضوان -لا يابة روح هاي مخبلة ماعيلك بيها
-لا عمو اني احجي صدك ما تخبلت بالعكس اني
بكامل عقلي ما اريد ابقى ببيت واحد قاسي وماعندة رحمة بگلبة ما انكر امة اذتة بافعالها
لكن هو الله الي يرحم ويغفر
اني اخاف من قساوة رضوان تنگلب عليه
يوم من الايام وهذا الشي ما اريد اطفالي يكبرون ويشوفون ابوهم قاسي على امة
-يابة روحو واني اجيبها وراكم
-لا ميحتاج هياتني خلصت ماعندي شي اصلاً بهذا البيت
مثل ماكلت هذا بيتك ومالي دخلة بي اذا طلعت منة
لبست عباتي وطلعت وعفت كرار وقصي عند رضوان
الي ظل يدردم
مرات احس برضوان مثل الطفل العنيد الي ميقبل الاعتراف ويتنازل
يعتبرة انهزام لان هو كلشي بحياتة يقيسة بمقياس الحرب
سمعت عمي ابو رضوان
-عمو رونق الله يرضى على البطن الشالتج
ورحمة على والديج على هالتربية
بس لاتهجمين بيتج ابني واعرفة راسة يابس لاتخربين بيتج علمود تصالحيهم
-لا عمو اني مو بس اريدهم يتصالحون واريد اولادي يتربون بحضن جدتهم
رحت وياهم لبيت عيالي
وحسيت رضوان ظل واكف بالباب واحس ظهري اتزرفً بنظراتة بس ظل متمسك بكبريائه
دخلت لبيت عيالي
وشفت عمتي وفاتن وهاجر ومرية غريبة يمهم
اول ما شافتني عمتي ام رضوان ظلت تبجي ورحت
وسلمت عليها وهي حضنتني وكعدت تشم بية
خطية كسرت خاطري حسيت بيها تدور بية ريحة ابنها
وظلت تباوع وراي تنتظر شوفة ابنها لكن مع الاسف ما اجة رضوان حسيت بيها خاب املها
ودنگت وظلت تبجي ودخل عمي والولد وراي وحجو لعمتي وللبنات عن الي صار واني شنو سويت
ام رضوان وهي گوة تحجي
-ليش يمة عفتي بيتج علمودي
والله اني ما استاهل الي سويتيه علمودي
والله وجهي اسود ومستحية منج
وانتي ثبتي طيب اصلج واني الي كسرت ابني وطعنتة
والله ما اريد شي غير بس يفرحني بشوفتة هو واولاده
خلصت لحظات العتاب والاعتذار بيني وبين عمتي
وبعدين كعدت اسولف الهة عن رضوان والاولاد
وخطية هي مرات تضحك ومرات تجر حسرة عليهم
والتهيت وية البنات وعرفتني هاجر على مرت ابوها
خوش بنية وحبابة وكامت بينا بالصلوات
ما انكر ما يخلو الجو من بعض الشحنات بين عمتي وضرتها لكن لاتخلو الحياة من بعض المناوشات
وكانت عيني كل ساعة تصد عالباب
انتظر دخلت رضوان على بيت عيالي
لكن مع الاسف خلص اليوم ورضوان ما اجة لبيت اهلة
وحسيت بنفسي ماعندي قيمة بگلب رضوان
بليلتها
باتت هاجر عند بيت اهلها بعد ما اتصلت على نشوان حتى يقبل تبات
بوقتها ابد ما اخذت عيني النوم
لان ممتعودة انام اذا مو بحضن رضوان
صرت اتگلب
دخلت علية هاجر
اكلج هاج لزمي هذا زوجج حرگ النقال علية
كل ساعة يتصل
رونق -ما اريد احجي وياه هو متصل عليج اني شكو انتي جاوبي
ردت هاجر وفتحت حاكية
-الو هلو رضوان شعجب متصل بهيج وقت صاير شي
-لا مصاير شي بس سمعت بيج بايتة ببيت اهلي
فگلت اتصل اسلم عليج بس
-اهاااا
-ووجعاا كليلي. رونق يمج
-اي هيج گول من الاول انت متصل علمود رونق بعد صارلك ساعة تمد وتجر بالكلام على شنو.
-اكول سكتي بلا لغوة انطيني اريد احجي وياهة
التفتت علية وانطتني النقال
اني اشرتلها ان تگلة نايمة
رفعت حاجب
-حبيبي رضوان رونق نايمة
سمعتة شلون ظل يصيح ويغلط ههههه وسمعت يمة شي انكسر يالله اشكد عنودي وعصبي
بس خلي احسن يستاهل
-ااااااخ الله

هاجر تحرك بحواجبها بشيطنة
-شنو شبيك رضوان يوجعك شي
-لا سلامتج ميوجعني شي بس اتمنى اجي لهَـا ي التنبل الي نايمة يمج واكسر راسها اليابس
اخ الله لو الزمها والله بالحزام وين اليوجعها
-يمة ليش هذا الاجرام كلة مگرودة يرونق متزوجة
واحد مجرم
سمعت صوتة ينافخ
-هسة شلون اريد انام بالله ماتگعديها
-شنو الظاهر الاولاد ما يخلوك تنام
-لا والله الاولاد نامو بس ابو الاولاد ماجاي يگدر ينام
اني اسمع بصوتة شلون يحجي واني گلبي يدك الف بالدقيقة
-الله يساعدك حبيبي والله الحب متعب الله يساعدك
زين انت ليش خليتها تطلع من بيتك
-عمي دتطيري انتي الثانية هم راح تصيرين براسي ناصحة
-اكول ابو الشباب ترة انت المتصل مو اني
-بالله شو گعديها گليلها قصي مفرفح من البجي خل تجي تاخذة دوخني
-والله انت مو صاحي
سوت روحها تكعد بية وجاوبتها بصوت ناعس وسمعتة
واني مطلعة الساني وهاجر تضحك على منظري
-هَـا هجورة
-كعدي هذا رضوان يكول ابنج قصاوي بس يبجي
-لا لا ما اروح خلي هو يبتلي بيهم هو مو گلي بعد متعتبين بيتي خلي بيتة الة واني الي الله
يالله وخري مني اريد انام
سمعت صوتة
-بسيطة يا رونق بسيطة
وسد النقال
بس بعدها ضلت هاجر بس تصنف على رضوان
ولج والله هذا اخوي فلم
وبعدها گوة يالله كدرت انام
يوم ثاني گعدت من الصبح لان اصلاً مكدرت انام
وسويتلهم ريوك
وشفت عمتي ام رضوان دخلت وتباوع علية
ام رضوان -اااااه والله اشتاقيت لايامكم انتي ورضوان
اتذكر شلون كنتي تگعدين من الصبح واسوين ريوك واشوفكم شلون تسولفون مثل البلابل
والله متندمة على كل لحظة فرطت بيها
والله يخالة جنتي مدللتني بترتيبج الي وللبيت
بس ما حسيت بالنعمة الا من فقدتها
امانة يرونق تبرني الذمة على كل شي سويتة بيج
-مبرية الذمة خالة انتي ووالديج
الدنيا متسوى حتى نخلصها بالزعل
-ياريت ابن بطني يحن علي مثل ما انتي حنيتي علية
-خالة لتضوجين رضوان گلبة ابيض وطيب وصديگيني راح يجي اليوم الي يرجع بي لحضنج
ورة ربع ساعة كعدت هاجر وعمو وزوجتة الثانية وضياء وكعدنا نتريگ
لكن فجاءة سمعت صوت واحد يحم حم يم باب المطبخ التفتت بشهگة ممصدكة الي داسمعة
شفت رضوان عيونة حمر وشعرة مهوس
وشكلة مبهذل بس زايدة جاذبية
وكان شايل قصي
ولازم بيدة اللاخ كرار واثنينهم مبهذلين
كان شكلهم ثلاثتهم مضحك
انتبهت لصوت انين
وراي وشفت خطية ام رضوان شلون عيونها تصب دموع عشرة عشرة على ابنها حقها الابن عزيز
انتبهت على رضوان راح لامة اتقدم عليها واخذها لحضنة وهي ظلت بس تشم بصدره وتبجي
ام رضوان-يمة رضوان سامحني اني غلطت بحقك وبحق مريتك
رضوان بصوت خشن
-مسامحج يمة مسامحج
وباسها من راسها ورجع لمها لصدره
واني اباوع عليهم وابجي ربي لايحرك گلب كل ام على ابنهة
خلصت لحظات العتاب بين الام وابنها
واخذت من ايدة قصي واخذتة لحضنها وكعدت تبوس بي
-يمة فدوة لله يشبه ابوه مخنزر
ابو رضوان -يالله بوية بوجهك تعال اتريك
والله ام كرار مسوية مخلمة تجنن لتفوتك
رفعت عيوني وباوعت عليه شلون يخزرني
وبدة ياكلني بنظراتة
واني سويت نفسي زعلانة لان بعدني منسيت سالفة
البارحة
صبيتلهم ريوك وتركتهم وخليت قصي بحضن عمتي خطية ممصدگة بشوفتة خليها تشبع بي
وكرار يم ضياء ياكل ويدردم ماعرف شنو يسولفون
بس شكل الاخ متونس
رحت على غرفة هاجر وكعدت احضر بجنطتني
محسيت على الباب من انسد وراي التفتت
شفتة رضوان
اقترب مني
-هز ولج شلون انطاج گلبج تعوفيني وترحين لبيت اهلي اشو جنج ناسية عندج رجال يحطلج حد ويكسر راسج
باوعتلة
-اي هذا هو بعد بيتك مراح ادخل بي خلي الك انت مو كلت ما اعتب بيتك اذا طلعت منة
رضوان وعيونة تلمع لج من احتركت عشيرتي
وكص الساني اذا بعد نطقت هاي الكلمة
والله لو ما انتي لازمتني من ايدي التوجعني وخليتيني اعلن انهزامي واجيت برجلي وطحت على امي
كلة من وراج يا ام راس اليابس

رونق وبدلع
-طبعاً يحقلي اصير هيج غير زوجة رضوان لازم يصير راسي يابس

اخذني لحضنة وباسني من راسي
-اشو دتعاي خل اشمج والله البارحة ليلي كلة مانمتة من وراج اجيت اطفر سياج بيت اهلي واجي عليج واخطفج من بيت اهلي
-لا والله خاف ماترضى تخطفني واني گاعدتلك
-اصلاً انتي ماتعولين اجي عليج لان سمعت بيج حتى انتي منايمة البارحة كلة
-منو كال
-هاجر
-ايا ملعونة اثاري جانت ناصبة علينا
..................................

رونق
- رضوان مو تنسى تجيب وياك حليب لقصي
-صار يابعد گلب رضوان اتذكري بعد شنو محتاجة
اذا ارجع للبيت ترة ما اطلع
مو تتذكرين كل ساعة شغلة
-لا حبيبي ممحتاجة شي بس تعال انت مو تتاخر
رضوان بخيبة امل
-اه يعني مناسية اليوم شي مهم
-لا ابد ما ناسية هَـا وجيب وياك مسواك للبيت
-ااخ لج والله لو يمي هسة جان لزمتج وبالحزام ووين اليوجع ابسطج بسط
-اوووي ليش حبيبي شكو شصاير سامع شي
رضوان بغيض
-لا هيج سلامتج روحي نامي
الله بلاني بوحدة مطفية بس احلى مطفية بالعالم
رونق بدلع
-اهوووو رضاوي لتحجي علية والله اني خطية تعبانة من اولادك والبيت ومشغولة موووت
-زين وابو الاولاد مالة حق ياخذ حصة من وقتج الثمين
وتتكرمين وتحنين عليه
-اهووو رضاوي شكد صاير تتمزعل مني
احس بيك تغار من اولادك
-تردين الصدك اي مرات اغار مهنم
هو اني مخدة جنت اغار منها اذا حضنتيها مو نوب اشوف اولادج على صدرج كل ساعة
خو هذا قصي موتني قهر ابن الاوادم احس بي متقصدني
كلما اريد استفرد بيج يشغل الصيتية مالتة
عبالك موقتها وياي
-اووي يالله حبيبي لاتزعل اني كلي الك
-لج من احتركت عشيرتج على هاي الاوي
انة الج بس خل اخلص مسواك البيت واني جايج اريد اطلع هذا الدلع كلة من عيونج
.............
اليوم محضرة مفاجئة لرضوان
لان اليوم يصادف عيد ميلاد زواجنا صحيح احنا اتزوجنا بضروف غير مناسبة
ما سمحت لرضوان ان يتهنى بيوم زواجه مثل باقي العرسان
فا اتفقت اني وهاجر ان تجي للبيت وتاخذني للصالون
وخطية اخت رضوان فاتن اخذت الاولاد مني گالت بقيهم عندي اليوم اريدج تونسين اخوية واتعوضينة ليلة عرسة
وفعلاً طلعنا اني وهاجر واشتريت فستان اوف وايت
يجنن كان شكلة ملكي موديل روماني
ورحت للصالون وقامت الحلاقة بالواجب من كص وشسوار وكان لون شعري لونة اسود طويل لان رضوان ميقبل اصبغة او اكصة يموت على لون شعري وطولة
كملت شعري وخلصت الميك اب لوجهي وخلت فوگ راسي تاج لروماني يصير مثل اوراق الشجر على جانبين الشعر لونة نحاسي
باوعت لنفسي بالمرايا حسيت
بشكلي صدك عروس
بعدها اتصلت هاجر على ضياء واجة علينا واخذنا. من الحلاقة
ضياء -والله اخر زمن ضياء يصير البنگالي مالتكم
ويوصلكم ترة مصارت هاي
تعال ضياء ودي وجيب وسوي ممية لكرار ولبس قصي حفاظة
والله احس بروحي صرت ست البيت.
من ورة رضوان ورونق
ادري اريد اعرف شبقيت لزوجتي وجهالي
هاجر-اي يا اخي اعتبرها دورة تقوية تتعلم بيها شلون تعتني بعائلتك
-ادري هسة غير اتزوج بالاول وبعدين لاحك على الكراب
رونق وهي تضحك على كلام ضياء
-يارب تخطب وتتزوج ونفرح بيك
-امين يارب الله يسمع منج
-ههههه شوف الولد شلون مستعجل على الزواج عبالك وحدة معنسة ههههه
وصلت للبيت وكان رضوان
بعدة ما واصل للبيت
وكعدنا اني وهاجر انزين الغرفة والصالة
وطبعا ضياء جاب النا ديجي صغير
وعلمني عليه
وهاجر اختارت بعض الاغاني الرومانسية
كنت مقررة اليوم اعيش رضوان احلى ليلة بحياتة
وشعلت الشموع وحطيت عطر وهاجر راحت لبيتهم
واتصلت على رضوان
وكال واصل قريب عالبيت
وطفيت الاضوية مالت البيت كلها وظل بس ضوة الشموع
وعطرت البيت كلة
سمعت صوت رضوان
دخل السيارة بالكراج وكعد ينزل الغراض من السيارة

رحت انتظرة بالصالة وسمعت صوتة اول ما دخل
على الصالة
خطية اتفاجيء
رضوان وبضحكة
-هاي شنو ههههه واني عبالي انتي ناسية ومغلسة
على مناسبة عيد زواجنا
اثاري طلعتي مو هينة
-اتقدمت من عندة وشغلت الاضوية وهو اتفاجيء

انتبهت عليه شلون شلون يباوع على البيت والنفاخ والزينة والشموع مستغرب
اتسعت عيونه بالمفاجئة من شاف شكلي

-ااااااخ يابة لج هاي شمسوية
طالعة كيكة
لج اليوم شيخلصج مني اليوم اكلج كلج
بس صدك الاولاد وين
-صرفتهم عند عمتهم الحبابة فاتن
ضحك
-لوهيج عمة لو ماكو
بالله شو تعاي خل اشبع شوف قبل لا افترسج

-لا لا ممنوع اللمس اوكف
رحت شغلت الديجي على اغنية
سمعني نبضك دفيني بنار حضنك
واقتربت منة ولزمت ايدة وسحبتة الي
وحضنتة وصرنا نتحرك سوية على انغام الاغنية
وهو مقصر الاستاذ استغل الوضع ساعة يحضن وساعة يبوس وساعة ينزل على رگبتي ياخذ المقسوم

-والله مفتهمت من الاغنية شي كلة من وراك
انت شكد مخرب اللحضات الرومناسية
-اي دتعاي انتي غير مسوية هذا كلة الي اذن اني شنو اريد انتي تگولين تم
-اي خذ بيدي ولاتسألني

وعشنا احلى ليلة

(( هذه كانت قصة حقيقية. لمشوار حياة لفتاة عانت في
حياتها كثير من الصعوبات لكن
والله عوضها بزوجها واولادها
والي حاب يعرف سهير شنو صار بيها
فاحب اگللكم ان هي من يوم الي طلعت بي وية رونق اكتشفت بالصدفة فعلاً بيها مرض خبيث بصدرها
ولؤي قدم على نقل بغير محافظة وانتقل
بعدما اخذ المقسوم من رضوان ))

فيا احبتي اتمنى لكم قراءة ممتعة مع ابطال روايتي
وانتظروني على
رواية القادمة باذن الله

يتبع