خذ بيدي ولا تسألني الفصل الخامس 5 - بقلم نهى

خُذ بيدي ولاتسألني
للكاتبة nuha-d-h

رضوان
بعد ما سمعت كلام زوجة صديقي قصي كان فعلاً صحيح وهي الاصول تبقى اصول وميصير انة كل يوم
راز نفسي عند بابهم وهي مرية وحيدة وتجيب الها السمعة
وانة بوقتها اتخذت قرار ولازم انفذه
رضوان وهو نازل من الواجب لاهلة علمود يحجي وياهم
دخل عليهم
-السلام عليكم
الكل-وعليكم السلام
راح باس راس امة وابوه وكان اخوه ضياء كاعد
ضياء-هلة برضاوي اشو منشوفك
ولاتكول شغل لان انت صارلك سنة من نقلت دوامك هنا

ام رضوان-اي يمة كلة خاف احجي انة ويكول حاطتني ببالهة لايقبل يتزوج مثل الخلگ والعالم ولايقبل يگعد ويستقر يمي
رضوان ببتسامة هاي القوانة اليومية حفظها
-هو انة اليوم جيتكم بخصوص هذا الموضوع. اريدكم تخطبولي
ام رضوان-يايمة ساعت المباركة انتة بس اشر واحنة نروح نخطبها الك
رضوان-يمة انة اريد اخطب زوجة صديقي المرحوم قصي
ام رضوان وهي تلطم على صدرها
تعرف صديقة قصي وتعرف ان هو عاف ارملة وطفل
-يايمة عزة العزاج ياسعدية على هذا الخبر
ليش يمة رضوان يعني تصوم تصوم وتفطر على زورية
يعني انة من تالي عمري وصبري وياك ازوجك لوحدة ارملة وعندها طفل
رضوان-يمة انة مجاي اخذ رايكم انة هيج والا هيج اتزوجها اتزوجها لان اهل قصي امانة برگبتي والاوضاع تطلب مني ان اتزوج حرمتة واربي ابنة لان همة بعازتي هسة ومحد الهم
ام رضوان -اي يمة اجريلها راتب ولاتخليها تعتاز بس مو تتزوجها يا يمة واكفة السالفة شتكول عليك الناس دارت عقلك الارملة
رضوان-يمة صدك تحجين لو تجذبين والله ابد ما مقبول منج ترة عيب هذا الحجي يطلع منج
واذا ارملة وشنو قابل يعني بايگة سايكة هم حالها حال النسوان ليش تخلين بكلشي إنة
وترة اني والله الشاهد لانفسي بيها ولاشي كل ماهنالك بالموضوع ان اريد استر عليها واجيبها عندي وحتى اخذ بالي من ابن المرحوم واطمن عليهم

ام رضوان وبدت بدور الدراما وكامت تبجي
-يايمة رضوان انت مسوالك سحر ماتقبل غلط
والا انت عجزت وياك عرب وعجم حتى تقبل تتزوج وما اتزوجت
تجي هسة من تريد تتزوج تاخذ هاي يايمة ونوب جرفتها فگر متشوف طيرتة للزلمة ومات
رضوان وبغضب
-شحجي وياج بعد اگلج ارملة تگللي جرفتها فگر
هي هاي الي الله قدرج عليه
شوفي يمة ترحون وياي حتى اخطبها لو اروح لوحدي واخذ خوالي مناك واتقدملهة
ام رضوان صفنت تعرف بابنها راسة يابس وحجايتة ما يثنيها وجاوبت بدهاء
-هَـا اة خوش اروح وياك امري لله بعد ابن بطني واعرفك كلش زين ماترتاح الا تسوي البراسك

وبهاي الاثناء دخل ابو رضوان واخوه الجبير فاضل
وسلم عليهم وكعدو يتبادلون بينهم الاخبار
وكعدت ام رضوان توز ابوه حتى بلكي يردة عن هاي الخطبة
ام روضوان-سمعت حجي ابنك شيريد يسوي
ابو رضوان التفت على ابنة
رضوان اتغدة بامة قبل لتتعشا بي
-شوف بوية اجيتكم حتى ترحون وياي حتى اخطب ارملة قصي صاحبي
گلي شنو بيها اذا اريد اتزوج واستر على عائلة صاحبي الي عافهم امانة برگبتي
التفت على امة
- انتي تعرفين كلش زين قصي فدة روحة الي
وتلكة الطلقات بصدرة بدل مني والمفروض انة ساكن الگبور مو هو
يحجي والعبرة واگفة بالبلعوم من الغصة
ام رضوان -يايمة اسم الله على اسمك
ابو رضوان -زين تسوي وليدي والله يبارك بيك ومو شرط انت ترعى اهل صديقك علمود فداك هو حتى لو مامسوي هيج وياك اني اعرفككلش زين انت ما راح تتركهم بعازة

رضوان -والله اعرف بوية اني مسويت هيج علمود فداني لا والله بس ردت اجيب عائلة المرحوم گبال عيني واربي ابنة ومرتة وحيدة ومالها احد وهذا حق الخوة الي بيني وبين قصي بس احجي وية الحجية الي ما تريد تقتنع

فاضل وهو يحط ايدة على اجتاف رضوان
-هذا هو هوية علبركة وبيهة الخير
اي صدك گبل لا انسى لكيت بيت بمنطقتنا قريب علنا والله بناء جديد وستوة طالعين العمال منة بس صادف ابو البيت محتاج فلوس ويريد يبيعة
رضوان - عاشت ايدك هذا هو انت كمل كلشي واني انطيك الفلوس حتى نتكاتب على التحويل
فاضل-على بركة الله
ضياء-يابة الله يخليك خليني ابدل هاي السيارة والله تعبت
ابو رضوان-شوف هذا البطران الناس ما لاگية الخبزة حتى توكل جهالها وهذا الشفية كل يوم والثاني جايني يريد يبدل سيارة
ام رضوان-اي شدعوة عليك حجي ناشب وية الولد دعوفة
خلي يتونس بجاهكم
ضياء وهو يبوس راس امة
-اي يمة كليلهم عفية شادين وياي حصرة علية اسوي شي اذا ما كلها كبت بوجهي
رضوان وهو يخزر اخوه الصغير
-شوف ولك تعدل روحك وتنتبه لتصرفاتك لا اجيك واراويك الله حق ترة مو ابالك ما منتبه على تصرفاتك
ترة كلشي جاي تسوي يوصلني بس انة مغلس عنك
فدير بالك والله اذا احطك براسي تعرف شنو راح يصر تصرفي وياك والله اعلكك بالبنكة

رونق
وهي ترضع ابنها وتسولف وياه متعودة دائما هيج تسوي
حبيبي صاير يناغي ويضحكلي من يشوفني ادخل ويريدني اشيلة
احمد الله واشكرة بأن خليت كرار يعتمد براضاعتة على صدري حتى ما يكلفني فلوس الحليب
يابعد عمري قصي تعال شوف وليدك شلون صار يبتسم ويناغي اتمناك موجود وتشوفة
جرت الحسرة واخذتلهة صفنة تفكير
من بعد عمتي صرت دايخة شلون ادبر العيشة لان اني كلشي ما اعرف بهاي الدنيا ابد مايوم اعتمدت على نفسي بتدبير اموري
سودة علية قصي ماجان يخليني اطلع او ادوخ بهاي السوالف كلشي اريدة يجيبة لعندي واني اصلا من صرت لحد هذا يومي ابد مطالعة لوحدي او مستلمة قيادة حياتي بنفسي
فنسبة معلوماتي عن الحياة خارج البيت صفر اوتحت الصفر فلذلك اضطريت اعتمد على سهير حتى تروح تراجع
الدائرة حتى تسويلي المعاملة مال الارامل وبلكي ينطوني راتب قصي اكدر اصرف على نفسي وابني
وانطيت جميع المستمسكات لسهير
وشفت سهير والله فرحت بالسالفة وكلتلها
الج مني المقسوم اذا كملتي المعاملة واستلمت الراتب

والله ومرت الايام
رونق
-هَـا سهير شنو سويتي على المعاملة
سهير-شنو حبوبة عبالك بيوم وليلة تخلص. هاي ينرادلها وقت يالله تخلص والله حتى انحلبت من ورة الكراوي وانسطرت من ورة الفرة
هم ياريت تستاهلين بس يالله كلة علمود ابن اخوي
اكلج رونق اشو هذا رضوان صارلة فترة مجاب شي للبيت
رونق
يعني هاي صدك تحجي يعني بدل ماهي تجيب للبيت
مسواك وتشوفني شمحتاجة جايتني تريد رضوان يصرف عليها وعلى جهالها صدك ناس متستحي
رونق-لا حبي اني گلت للولد ليجي بعد ويجيب مسوك للباب لان الناس اكلت وجهي بالحجي على ابو ان رجال كل يوم يجي لعند بَـــابي ويحجي وياي
سهير-من عزة العزاج يمصخمة منو كلج تتصرفين من يمج بالله شو انطيني النقال خل اخابر عليه واني احجي وياه اكلة حيب المسواك والمصرف لعدنا واحنا نوصلة الكم
رونق -شوفي حبابة مو عبالج مثل قبل تجين وتجفصين بالمصارين واسكتلج لا والله وحق الحق مدي ايدج عالنقال وشوفي والله اكسرها الج
سهير -لعد يطبج مرض فوك مرض اني شحارگ گلبي عنج لا اكلتي ولا لبستي اني غير علمودج انتي وابن اخوي متضلون بعازة احد
رونق-لتخافين علينا احنة بس تخلص المعاملة راح نستلم الراتب وندبر امورنا
سهير-شوفي حبابة ترة
احتمال المعاملة تطول سنة سنتين ماعرف شوكت تخلص يعني شراح تسوين منا لحد متخلص شلون تدبرين نفسج
وترة اني اريد حصتي من البيت ورشا قبل لتسافر كالت اخذي حصتي فشلون راح تدبرين حالج لان ممعقولة اخليلج البيت الج لوحدج
تسرحين وتلعبين بكيفيج
رونق- هسة الي يسمعج من تگولين بيت راح يصدك هذا بيت
بوية گولي مشتمل
وثانيا ً ليش انتي مو گلتي اجي ابني بالقاط الثاني واكعد عندكم
سهير-لا حبوبة ميعجبني اگابلج واگعد
رونق تعرف كلش زين سهير ليش خايفة حتى لازوجها يقترب مني
والله اني مو حباً بيها اريدها تكعد بالقاط الثاني لا اني اريد اضمنها متبعيع البيت يعني هاي رعنة وتسويها وكلشي اتوقع منها بالله وين انطي وجهي

رونق
ورة يومين جنت اغسل بالهدوم وسمعت صوت الباب يندك وجان كرار نايم
واني جنت لابسة دشداشة سودة وشال اسود كان على كتفي
نزلت ردن الثوب ولبست الشال واني متوحهة للباب
رونق من ورة الباب
-منو
-اني رضوان شلونج ام كرار
رونق بتردد-هلة بيك خوية
رضوان - ام كرار اني جاي وجايب الاهل وياي ممكن تفتحين الباب حتى يفوتون يدخلون جوة

رونق وهي تفتح الباب
-فتحت الباب وصارت وراه وانتبهت على مرة جبيرة لابسة عباية وشيلة وياهة ثنين بنات لابسات ملابس كلش حلوات وعالموديل وحدة جبيرة اكبر مني ووحدة صغيرة اصغر مني شفتهن دخلن والحجية التفتت على ابنها
يمة رضوان انت روح هسة ومن نريد نطلع نتصل عليك
-صار يمة انتظر منكم اتصال

يتبع