خذ بيدي ولا تسألني الفصل الرابع 4 - بقلم نهى

خُذ بيدي ولاتسألني
لاكاتبة nuha-d-h

مرت الايام
لكن انتقام سهير مازال مستمر خصوصاً من اجت ام مثنى زوج سهير لعمتي وطلبت ايدي وعمتي اتعاركت وية مثنى رجل سهير وطردتة من البيت
ولكم الله اكبر حتى مدارت سنة قصي الله ياخذهم هذولي شنو من بشر
وعمتي يوم عن يوم حالتها من سيء الى اسوء والله خايفة اذا صار على عمتي شي والله اموت منو الي بعدها بهلدنيا
جنت نايمة عند عمتي بالليل لان تخربطت وجانت موزينة
والله وكعدت يوم ثاني شفت صحتها بدت شوية تتحسن
رحت عالمطبخ اسويلها ريوك خلصت الريوك وحطيت الصينية كدامها ورحت دخلت عغرفتي
واشوفلك الكناتير كلها مفتحة والملابس مالتي ماكو والله اني بوكتها اتخبلت
لان عرفت سهير ماخذة ملابسي الله لا يرضى عليها من ورة هاي السواية شگد قهرتني
بس بوقتها من القهرة بحيث گبل حصرني الطلوك و عمتي اتصلت على صديق قصي لان هي اتعودت عليه كلما تريد شي تتطلبة من عندة وهذا رجل سهير عمتي اتعاركت وياه لان اجو طلبو ايدي للزواج
ورجل رشا مسافر للخارج قجق وكال ارتب اموري هناك واسويلكم دعوة تجون وراي
وخطية الولد صديق قصي ابتلى بينا واخذني للمستشفى اني وعمتي بس بوكتها كلشي مفتهمت جنت كلش متأذية وولدت كروري فديتة ابو عيون يشبة ابوه ماخذ مني بس لون بشرتي ابيض
وبعد ما ولدت وارتاحيت شوية ورضعت كرار
بعدين يالله قبلو يكتبون ورقة خروجي من المستشفى
واخذنا. رضوان للبيت بعد ما نزلنا للبيت اشو هذا رجع ورة ربع ساعة محمل بانواع العلاليك والغراض وجايب وياه مشويات سفري وعمتي ظلت تحجي عليه
والله ومرت الايام
وسافرت رشا ورة زوجها
وبدة كرار يكبر وصار هو كل دنيتي وعالمي والنفس الي اتنفسه بس كون الله يقدرني ان اخلي اسعد طفل
وصار كل فترة من بعد مولدت يجوني خطابة
واني جنت ارفض وكانت عمتي كلما تجي مرة تخطبني
عمتي تتمرض اكثر وتگعد تون والله تكسر الخاطر عبالها اني اتزوج واخذ ابني واتركها

ودارت سنوية قصي
وسوينا ثواب وكعدنا نوزع وبعدين كعدنا نقراله
قران وهديناه للحبيب
وبيومها اني وكعت بالفراش مريضة من البجي اتذكر اخذتني رشا بوكتها للمستوصف القريبة علينا
ويوم ثاني سافرنا للنجف حتى نزور واني شفت قبر قصي واني اتخبلت وقربت كرار وگعدت احجي وية قصي عبالك كاعد گبالي صرت مثل المخبلة احجي وية نفسي
(( يمكن تگولون علية مخبلة بس اتمنيت ان ينفتح الگبر وياخذني وياه اني وابنة
عذروني والله مو بيدي هذا رجلي وابو بيتي ورفعت راسي وسندي وكلشي بحياتي اني مشفت شي من الدنيا من وعيت عليها واني كلة وية قصي و اتزوجنا وكان هو اغلى امنية بحياتي وهو كل عالمي ماعندي غيره الله يرحمك
ياحبيبي مودع بالله ))

رفعت راسي وشفت واحد واكف من بعيد لابس دشداشة
سودة وملثم نفسة لكن طاحت عيوني بعيونة وشفت عيونة حمر دم معرفتة منو وشفت ثنين واكفين بصفة واحد لازم جتفة والثاني رافع ايديه ويقرة الفاتحة
سمعت سهير سألت رجلها
-اكلك مثنى هذا منو الرجال الملثم
-هذا رضوان صديق قصي وهذولي الي وياه جماعة قصي. جانو جايين قبلنا هنا بس من شافوكم انعزلو على صفحة حتى تاخذون راحتكم

مرحبة اني رضوان عمري٣٥سنة اني ضابط وبرتبة عقيد بعد ما اترفعت ذيج السنة بعد نجاح المهمة والتي خسرتني صديق عمري قصي

كنت عايش حياتي كلها عند بيت جدي اهل امي لان جدي يموت علية وكان لواء ركن متقاعد وكان هو القدوة مالتي من اني وصغير جنت اتمنى اصير مثل جدي
وترعرعت ببيت جدي وكملت دراستي هناك ودخلت كلية عسكرية

لكن بعدها رحت استقريت عند عند اهلي
لان جدي توفة الله يرحمة ومحد بقى ببتهم بس خالي ومرتة وجهالة
احنا اربع اخوان وخوات اثتين فاضل ورضا واني وضياء والبنات هاجر وفاتن
اني ترتيبي بين اخوتي الثالث
اخوتي الكبار متزوجين وطالعين كلمن ببيت لكن بنفس المنطقة وخواتي وحدة متزوجة والثانية على شاية عمرها ١٨
اما اخوي الاصغر مني طالب يدرس قانون
ااخواني يشتغلون وية ابوي تجار وعندهم علاوي وخير من الله اني الوحيد شذيت عن القاعدة لكن على كولت ابوي انت الوحيد طلعت عن شوري لكن فلحت وصار براسك خير وصارتلك مركز وسمعة والكل تحلف براسك
من يوم استشهاد اخوي وصديقي قصي واني اخذت على عاتقي ان اتكفل بأهله والله هم خطية اهلهة كلش فقرة حال ومال ابوه اتوفى مصارلة هواي وامة مرية تعبانة وانا اعرف حياتهم واعرف ان زوجتة تصير بنت عمة ويتيمة ووحيدة اهلها وخواتة متزوجات اثنينهم وخطية ابنة كرار اتذكر اول ما انولد وشلتة بين ادية
وكبرت بأذنة وسميتة كرار مثل ما.كان يريد
واسأل الله يمكني ان اكون كفو لحمل هاي الامانة

رضوان-الو هَـا تمارة الله كريم هو اني راجع بالطريق ليظل بالج

رونق
من رجعنا من النجف
عمتي تخربطت وضعيتها كلش وصرنا كل يوم ناخذها دكتور وصار المصرف ثكيل على البيت
كان رضوان كل يوم يجيب حليب وحفاظات ومسواك ويحط مصرف بيد عمتي
و عمتي كانت تقبل تاخذهم وتظل تتدعيلة بس الى متى يظل الولد يصرف علينا مايصير هيج
جانت صديقتي بنية وياي بالمنطقة جانت خوش بنية حبابة اسمة مروة جانت بين فترة وفترة تسأل علية وتتطمن علية

مرت الايام
وليش ما يوم من الايام كعدت من الصبح كالعادة و
سويت ريوك لعمتي وشفت ضوة الغرفة مسدود
كلت خطية خليها تنام رحت على كروري وسبحتة وبدلتله وگعدت ارضعة وبعدين كمت على شغلي بس عجيبة عمتي اليوم متأخرة بالنوم خل اروح اكعدها والله
رحت واني بيدي الملابس الناشفة اقتربت منها
رونق-عمة گعدي اشو اليوم متأخرة عمة اليوم فاتتج سبحت كروري
هذا الحجي احجي وية عمتي واسفط بالملابس بكنتورها لان كنت منزلتهم من حبل الغسيل
لكن سكتت اشو عمتي ما حجت التفتت عليها واقتربت منها. شفت عمتي شكلها مو طبيعي
وبلحظتها عرفت عمتي فارقت الحياة وتركتني
رونق-لااااااا عمة عفو عليج عمة وين رحتي لاااااااا
منو الي غيركم اشو كلكم تبريتو مني ومحد حسب حسابي
وبوكتها التمت المنطقة على صياحي وشفت سهير شلون اجتي هي ونسوان المنطقة للبيت وكعدن يملخن نفسهن وكطعن روحهن من البجي
رونق
اني بهاي الفترة اتقوقعت على روحي من الالم الفراق
مشكلة الالام المشاعر لاتترك اثر على البدن لكن اثارها تكون في القلوب ومن هذه الالام الم الفراق هذا الاحساس اقسى انواع المشاعر ان تشوف روحك تصعد للسما وتنزل من القهر وانت مبيدك شي حتى ترجع الراح لاتنفع الدموع ولا اللطم ولا اي شي يكدر يجبر خاطر الانسان الفاقد عزيز
فقط الله هو الوحيد القادر على منحه الصبر والسلوان والالهاء الذي يشغل الانسان وينسيه الحزن
وبعد وفاة عمتي هذا الولد صديق رضوان ابد متركني اني وكرار ليش ما مرة من المرات طلع حجي علية بالمنطقة ان انا اجيب ولد عالبيت وهذا الولد مكابلني وكاعد يعني باختصار مستگعدني مخليني الة عشيقة يصرف علية
هذا الكلام وصلني من مروة صديقتي
بس والله بوكتها فرفحت من البجي والقهر يعني الناس ابد متخاف الله يعني شنو نسو اني بنت منطقتهم وربيت بنصهم ويعرفوني من واني صغيرة ويعرفون اخلاقي. وبنت منو اني. هذولي شنو من ملة الله لايرضى على كل واحد طعن بشرفي واني اعرف منو ورة هذا ماكو غير مثني رجل سهير هو مطلع الاشاعة
لان هو كتل نفسة علية واني بس اصدة وسهير بطلت تجي تبات هي وجهالها جانت خايفة مني خاف احرگ گلبها برجلها واخذة منها هسة عاد هو شلون رجال شفية والله اشو هي وياه كلش متوالمين
جدر تيه غطاه ولگاه

ليش ما مرة من المرات
اجة رضوان كالعادة جايب مسواك كومة ومصرف
اني كبل حجيت وياه بصوت ناصي من ورة الباب
-خوية بلا زحمة عليك اخذ غراضك وفلوسك والله وياك
ممحتاجة بعد واحد يعيلني
رضوان وهو متفاجيء
-ليش ام كرار تحجين هيج شنو بدر مني تقصير حتى يخليج هيج تحجين
-لا والله خوية مقصرت والنعم منك بس خوية بعد لتجي
لان هاي جيتك طلعت علية حجي بالمنطقة وانت تعرف السان الناس ميرحم واني حرمة لوحدي بالبيت واشوفها صعبة ورحمة والديك ومشكور خوية على كلشي سويتة
النا اني وكرار وخالتي
رضوان -اكص السانة الي يجيب سيرتج بالشينة
انتي بس گولي منو الحجة والله يوم ثاني مااخلي يصبح ببيتة الا احرك بيوتهم فوك راسهم

-لا خوية ميحتاج الاصول تبقى اصول
وانت ابن اصول وتعرف ان كلامهم صحيح فاشكر معروفك ويانة
بس لهنا وكافي
صار لازم اني اعتمد على نفسي واوگف على رجلي ميصير اعتمد على الناس تعطف علية وعلى ابني وابقى طول عمري مادة الايد للناس ومحتاجة المساعدة حتى اني ماقبلهة

رضوان ويحس بگلبه صار نار
-رحمة الله والديج خوية يعني انة هاي وگفتي تعتبريه
اجداوة لو عطف اذا انتي تعتبريها هيج فاني اعتبرها بيت اخوي ولازم اوكف وياكم
هسة على كلٍ. ما اريد وكفتي بالباب تطول
لان على گولتج السان الناس مايرحم واني راح احط حد لهاي الالسنة

يتبع