خذ بيدي ولا تسألني الفصل السابع 7 - بقلم نهى

خُذ بيدي ولا تسألني
للكاتبة nuha-d-h

رضوان
ظليت اباوع علنقال شلون سدتة بوجهي وحتى منتطني مجال اكمل واني عيوني صارت جمر من الغضب والله
الله حابهة هاي المرية مو. يمي جان صدك ملصت رگبته
شلون تتجرء تنهي المكالمة وانة بعدني ممخلص كلامي
بس بسيطة
وهي مبين من كلامهة ان امي الله اليعلم شنو مسمعتها
وخالتهة متخبلة مني لان غير وحدة مثل حالتها لا حول ولا قوة وتجيها هيج قسمة لازم تركص الها بجفية
وتلزمها بيدهة وسنونها
بس والله مراح اسكت لو سمعت امي الهة ظلع بالسالفة والله اگلب الدنيا على راسهم

رونق
جنت كاعدة بالبيت ارضع بكرار وسمعت صوت الباب
غطيت صدري وشلت كرار وياي ولبست شالي وطلعت للباب
رونق من ورة الباب -منو
-اني مروة فتحي الباب
-هلة بمراوي خية شلونج شخبارج تعاي تفضلي دخلي
دخلت مروة وجانت وياهة امها
-هلة خالة حبيبتي شخبارج
طبعا اني اموت على هاي المرية احس بيها انسانة راقية
مدرسة تدرس باعدادية البنات وكل فترة خطية تجي وية مروة تسأل عني

ام مروة-هلة بيج خالة رونق شخبارج اجيت اشوفج واسأل عنج
رونق-حبيبتي خالة اشكرج تعاي تفضلي
-يزيد فضلج
مروة مدت ايديهة حتى تاخذ منها كروري
وشمة رگبتة
-افيش شلون ريحة حلوة فديتة شوفي من هسة اگلج هذا خطيبي
-ههههه وين يلكة احسن واحلى منج بس عودك اخذي من هسة هو وحفاظاتة حتى من يكبر ياخذج
ام مروة - حبيتي رونة انتي مو ذاك اليوم وصيتي اشوفلج شغلة او وضيفة مناسبة
رونق-اي والله خالة ياريت
-شوفي حبيتي اكو. روضة اهلية مال صديقتي
حجيتلها عنج وكالت خل تجي واشوف شغلها همة كل الي يحتاجونة من ان تديرين بالج على الاطفال يعني مو معلمة لا دورج تشتغلين بالحضانة يعني تعتنين بنظافة الاطفال وبأكلهم الي يجيونة الاهالي وياهم من يجيبوهم للحضانة وتغيرين حفاظات وتسوين مميات وغيرها من الاشياء المعروفة والفئة العمرية من سنة الى ٣ انتي مسؤلة عنهم ووياج هم موظفة لاخ هم عليها شغل مثل شغلج وهي هم راح تعلمج
رونق-رحمة الله والديج خالة والله يستر عليج مثل ما سترتي علية بهاي الشغلة والله خالة ضاگت بية الواسعة
وگعدت رونق تسولف لمروة وامها شنو سوت بيها سهير
وسولفتلهم عن رضوان واهله مروة وامها يعرفن رضوان
ام مروة- شوفي خالة ترة مبيهة شي المرة تعيل روحها وتوگف على رجلها وتربي ابناءها وهاي اني گدامج
اتوفى ابو مروة واني بعدني شابة وعندي مروة وميار ومروان والحمد لله شوفت عينج ربيتهم وكافحت من اجلهم وصبرت على كل مصاعب الحياة
بس اذا كان هذا رضوان نيتة صافية شكو بيها اذا قبلتي بي وترة امة متدوم وانتي مراح تتزوجين امة راح تتزوجين رضوان يعني خالة هو او غيره انتي اول وتالي تتزوجين لان بعدج صغيرة والحياة گدامج وتكدرين تفتحين صفحة جديدة من حياتج
اعرف راح تكولين المرحوم وگلبج مدا ينطيج تاخذين غيره لكن ماما هاي سنة الحياة
يعني گولتج اذا المرحوم كان عايش وانتي الي متوفية تتصورين راح يظل ميتزوج وحدة ثانية لحد الان لا حبيبتي غلطانة
لان مهما كان هم تكون الة اعذاره واحتياجاته
وانتي حجيتيها بنفسج كلتي ان هو گال ما اريد منج شي حتى حقوقي مراح اطالبج بيها
بعد شتردين ووافقي يوم لان هاي فرصة على الاقل اني من عافني الرحوم عندي بيت وعندي وظيفة وكدرت انهض بهاي العائلة
لكن انتي كلها ضدج
اول شي انتي كلش فقيرة وعلى نياتج ومبين عليج ما
عندج اي تجارب بالحياة ومتعرفين شلون تتعاملين وية المجتمع والناس خارج بيتكم بيهم الزين الي يخاف الله وبيهم الشين الي ما بگلبة رحمة الي مثل سهير حماتج واضرب منها
وثاني شي عندج حماتج تريد تبيع البيت وين تنطين وجهج من تبيع وهل ياترى حصة زوجج المرحوم تجيب قيمة بيت وان كانت تجيب هل ياترى انتي هيج سباعية
راح تدبريها وتگعدين تدورين على بيت وتكملين احتياجاتة والبيت تكوينة مو سهل ترة زلم مشوربة ينكسر ظهرهم يالله يكدرون يحصلون بيت ويكملون احتياجاته
رونق
وتحس بروحها غرگت
-خالة اني كلشي سهل عندي بس كون الله يهديلي هاي سهير والبيت يظل اكدر ارتب اموري
ام مروة-ترة خل اكلج هاي حماتج عگربة من جوة الجوة وهذا التشوفينة كلة ارحم من الداخل ترة الداخل كلة سم يقتل وسالفة التقديم على راتب الارامل والتقاعد مال زوجج هذا كلة جاي تستلمة هي وتاخذة الهة مو عبالج بعدة لحد الان ماكو
رونق وهي تلطم على صدرها
-خالة شلون عرفتي
-عرفت من الفراشة الي بالمدرسة ام سامر
تكول مشتركة برقمين بالسلفة
فهيج سألتها بالصدفة منين عندها فلوس حتى تشترك
بأسمين
كالت تكول استلم فلوس تقاعد اخوي
يعني تخيلي وين وصلت بيها المواصيل تاكل اموال ايتام
عادي عندها ليش اكلج خالة احسن لج قبلي بهذا رضوان على الاقل هذا اسمة سند والله مو بس اسمة سند حتى مركزة يخولج ان تعيشين بسلام ومحد يندگ بيج
رونق
وكلام ام مروة الي فر راسي وخلاني اضرب اخماس باسداس هاي وين جانتلي
رونق -هسة الله كريم هسة هو بعد ما اتوقع يرجع يتقدملي من بعد ما رفضتة شي اكيد كرامتة متسمحلة يرجع مرة ثانية علية
ام مروة -الله كريم البي خير يقدمة رب العالمين
رونق-خالة الروضة وين تصير مكانها
ام مروة-حبيبتي الباجر اني اجي عليج اخذج واعرفج على صديقتي والحلو بالموضوع
ان تگدرين تاخذين ابنج وياج على شغلج بس كون تحاولين متلتهين بي يعني تكدرين تنظمين بين كروري وبين الاطفال
رونق بامل -ان شاءالله

والله واجتني خالة ام مروة واخذتني اني وكرار ابني للروضة هي روضة وهي حضانة
والله وعرفتني على صديقتها وهم كانت امراءة وقورة ومديرة الروضة ورحبت بية وصاحت للمعاونة حتى تاخذني وتفهمني شنور المطلوب وتشوفني الروضة والغرف مالت الاطفال المهم جانت كلش حلوة وبيها العاب وصفوف و حياطين ملونة وعليها رسومات يعني فعلاً عالم كامل للطفولة مثل حياة الاطفال كلها ملونة يارب ارزقني وقوني حتى اخلي حياة ابني كرار كلها الوان
رجعت لام مروة والمديرة بعد ما فرتني المعاونة الروضة كلها
ام مروة-حبيبتي من باجر تعاي داومي من الساعة ٨انتي كون موجودة ويجي عليج سايق الروضة حتى تاخذين بالج على الاطفال الي تفترون عليهم لبيوتهم
وهسة هو السايق راح ياخذنا
والله رحنا اني وام مروة وشفنا كيا وبيها رجال جبير اسمة ابو تحسين ركبنا وياه علمود ندليه مكان البيت حتى الباجر الصبح يمر علية وابدي دوامي
وصلنا للبيت واتشكرت من المرة العظيمة الي سندتني
وكانت دائما تشجعني
يمكن تشوف نفسها بية من صارت ارملة وهي شابة فحبت تساعدني حتى اكدر اوگف على حيلي
رجعت كلش جوعانة گليت بيضة وعندي گرصة خبز وسويت جاي والله گعدت سگت عليهم ورحت حللت كروري من الملابس وهو ابن الاوادم گعد يتمغط
وفتح ايديه اثنينهم عبالك واحد اطلقو سراحه يمة فديت الايدين الصغيرة يمة فديت اللحمة الترفة اباوع عليه شلون يلم حلگه ويباوعلي بعيونة مخنزر عاگد حواجبة
عبالك يكلي العفو منو حضرتج
بعدين ابتسم ابتسامة تجنن
عبالك يگول هااااا عرفتج انتي امي
هههههه ابن الاوادم
اوف هسة الي يشوفني احجي وية كروري هسة عباله مخبلة
رحت غسلتلة وبدلت ملابسة وخليت باودر بيبي
وانطيتة رضعتة وحسيت بروحي نعست فا اخذت كرار
ورحت انام
نمت تقريباً ساعة وسمعت صوت الباب
رحت كمت على حيلي
رونق-منو
-اني سهير فتحي الباب
فتحت الباب
سهير-فوتي سوي مجال الرجال يريد يدخل يشوف البيت ويقيم سعره
رونق-زين سهير واني مفكرتي بية وين اروح وانطي وجهي
سهير - هسة خل يطلع الرجال وبعدين احجي وياج
طلع الرحال وبعدها التفتت لي سهير
-بالله شو تعاي سويلي استكان جاي خلي راسي ينعدل
رونق -ماعدنا جاي ولا مسواك وفلوس ماكو
سهير اريد راتب التقاعد مالت قصي
سهير التفتت علية مصدومة
رونق-شوفي حبابة عرفت بيج جاي تاخذين راتب قصي
لج انتي متخافين الله تاخذين فلوس ايتام بحاجة الفلس
سهير -اهوووو شوفي ولج انتي بدوني تاكلج الجلاب مو انعم الله علية لحد هسة متحملتج
وعلى كلن ترة راتب التقاعد كل ثلاث اشهر. ينطون مرة مو عبالج كل شهر
رونق-لا كل شهر ينطون مو عبالج ما افتهم
سهير -بكيفج براحتج الباجر روحي لوحدج هاي اذا تعرفين منين ترحين والمن ترحين ومنين تستلمين. مو عبالج سهلة
بختصار سهير حاولت ان تسودها بوجهي كلش
سهير -شوفي حبابة واذا كان عليج انتي وابن اخوي فاليوم الفراشة ام سامر رادتج لابنها
رونق -لا اني ما اتزوج
سهير-لعد حبوبة وين تردين تگعدين لايكن عندي واني عندي رجال وعيال وين احطج
رونق بعناد -انتي انطيني حصتي واني ادبر حالي ومو عبالج ظلمتي السالفة علية مالت التقاعد اني اعرف شلون راح اوصل للراتب والي اكلتي ببطنج ما مبرية الذمة عليه وهذا كلة مال حرام

كعدت الصبح يوم ثاني بدلت وبدلت لكروري وكلفتة من البرد واخاف عليه يتمرض وحضرت غراضة والجنطة
واجة علية السايق
وگعدنا نفتر على بيوت الاطفال وهمة شون حلوين الي يجي يصعد للكية ويودع اهلة والي گوة يطلعونة اهلة بالجلاليق والي نص ونص المهم نوصل ورة هاي الهوسة كلها ورة نص ساعة للروضة وكعدت البنية الي وياي بالحاضنة تعلمني شسوي وشلون اهتم بيهم وحتى اكو بعض الموظفات يجيبون اطفالهم همة وعلاجهم ولازم تكعدين تحفظين شوكت موعد الدوة حتى تنطينة للطفل وغيره وغيرها من الالتزامات بس يوم عن يوم بديت اتعلم واتعودت
واصلا احس صرت انطلب بالاسم لان الاطفال الي تحت ايدي كانو كلش نظاف ومرتبين بحيث يجيبوهم اهلهم ويرجون ياخذونهم نظف
وليش ما مرة من المرات اكو رجال عمرة بالاربعين ومبين عليه الله رازقة مرة جاب بنتة علروضة بسيارتة وجنت صادف جاية داخلة للروضة انتبهت عليه نزل من السيارة
ودخل الطفلة ويانة للروضة ودخل داخل للادارة بس حسيت عليه عينة ابد مطاحت مني وصارت هاي الحالة تكرر اكثر من مرة وليش ما مرة من المرات دزت علية المديرة للادارة ورحت دخلت عليها
شفت الرجال گاعد عندها وصارت عيوني بعيونة
وكعد يسألني كم سؤال امام المديرة
-العفو سمعت بيج ارملة وممتزوجة وراقبتج هاي الايام
وعجبتني اخلاقج واني المديرة تعرفني شنو واني حالياً اريد اتزوج صحيح اني متزوج وعندي عائلة لكن زوجتي مريضة فاريدج زوجة على سنة الله ورسولة
بس اريد بالسر حتى ما اجرح مشاعرها لان هي مريضة وخاف تظل بخاطرها
رونق
ظليت صافنة بوجهة شحجي وياه بس التفتت للمديرة وحسيت عليها ممرتاحة بس فضلت اسكت وانتظر يطلع واسألهة
رونق-اخوية والله ممفكرة بالزواج
-ما اريدج هسة تردين الجواب الج مهلة منا لاسبوع فكري ورديلي خبر

يتبع