خذ بيدي ولا تسألني الفصل الثامن 8 - بقلم نهى

خُذ بيدي ولاتسألني
للكاتبة nuha-d-h

رضوان
من يوم الي اتصلت على زوجة قصي تقريبا صارلي اسبوع محاجي وياهة وطلعت من اهلي زعلان واتعاركت وية امي بعد ما عرفت هي شمسوية وياهة وعمي حقها من انهت المكالمة بدون ما اسمحلها
وماانطتني مجال حتى اكمل اثاري الوالدة لاعبة طوبة وهسة اني جاي احط النقط على الحروف
اتخبلت من سمعت من جماعة وياهم بالمنطقة ان اخت المروحوم ناوية تبيع البيت وتترك هاي الكرودة لحالها تدبر امورها والله لو اعرف اتزوجها غصب عنها اسويها
هاي كرامتها راح تعم عليها اتصل عليها متجاوب
وارسل رسايل ومترد عليهن بس عودك شنو اني اشوط للزرگة اتمنى بس الزمها بيدي والله وين اليوجعها بالحزام شنو هاي من راس يابس يعني جاي تصعب علية الامور وابد ما قدمت اي تنازل

رونق
بالروضة مر على موضوع الرجال ثلاث ايام
بوكتها من طلع سألت المديرة عنة
المديرة-والله يا ماما ما اعرف شنو اكلج بس لتوافقين لان اني سامعة عن مرتة الله ميجرعها على كد ما الرجال مرتب ومعدل على گد ما مرتة مصيبة يعني السان عبالك السان دلالة ومتنجرع ومن تشوفيها طالعة وياه عبالك امة مو مرتة وهو يستحي يگول مبيها شي
فمتأكدة دبر هذا العذر مال مريضة حتى يضمن ان انتي تتعاطفين وياه وتقبلين تتزوجينة بالسر بس ما انصحج تتورطين وية هيج عائلة
اليوم
اول مدخلت على غرفة الاستراحة وحطيت جنطتي واخذت كروري ورحت بي للحضانة ورة شوية رحت لغرفة الاستراحة علمود اصيح تبارك حتى تجي على اطفالها ليش هيج عايفتهم لوحدهم دخلت على الاستراحة وشفت تبارك مدري شتدور بجنطتي
-تبارك شعندج بجنطتي
كمزت من مكانها من فاجئتها لا والله ما ادري بيها هاي جنطتج عبالي جنطت ست علا لان دزتني حتى اجيب نقالهة
-اهاا يالله على العموم اطفالج لوحدهم وديبجون ميصير هيج اهمال
رجعت على اطفالي وكعدت كالعادة روتيني اليوم واريكهم واغسللهم وغيرها من الواجبات
بس ورة فترة دخلت علية المعاونة
-رونق المديرة تريدج
رحت للادارة وشفت المديرة اشرت على الدوة الگبالها
كالت هذا العلاج جابو اهل الطفل .........

وفجاءة تدخل علينا وحدة كلش ضخمة وصوتها صوت زلمة من گد ما خشن لابسة عباية راس جنها عتريس وجان الشرر يطلع من عيونها

وسألت المديرة بدون سلام علية والمديرة اشرت علية
انتبهت على المديرة وجها گام ينطي الوان
المديرة-اتفضلي كعدي استريحي ام علاوي
-لاحبوبة اني مجاية حتى استريح مو انتي حضرتج گالبة الروضة بيت دعارة
انتبهت على واحد ضخم دخل وراهة
المديرة گامت من مكانها
المديرة-ام علي اكدر اعرف على شنو هذا الحجي المالة لزوم
ام علي - جاية اخذ بنتي من روضتكم وانقلها
حضرتج معينة بنات مو راحة مجايات على حب الله لا جايات حتى يلعبن على الزلم
رونق التفتت على المديرة باستفسار هاي منو
المديرة تهمس بصوت ناصي غير مسموع
-هاي المريضة الي حجة عنها الشفية وكال اريد اتزوج عليها بالسر مراعاتاً لمشاعرها هسة صدكتي كلامي
الله يعلم شنو جايبتلج من مصيبة
المديرة -رونق عفية روحي جيبي الطالبة ريتاج تصير بالصف التمهيدي صف الياسمين.
رونق -حاضر ست
رونق داطلع من الادارة وسمعت المرية تكللها هي هاي رونق اليحجون بيها
عفتهم ورحت احس گلبي گام يرجف والله مابية حيل مشاكل وهي جاي وجايبة وياهة جلب بوليسي حماية على اساس هي محتاجة واحد يحميها هو انتي لوحدج تخوفين عشيرة
رحت نزلت الطالبة من صفها وصلتها للادارة
راحت على امها
ام علي وهي تلطم على صدرها
-يمة وين كلادتج وتراجيج اشو ماكو ملابستهم وين اختفن احجي گولي منو اخذهم من عندج

اشرت الطفلة على رونق
-ماما هاي الست اخذتهم مني
رونق بشهكة وحطت ايدهة على صدرها التفتت للمديرة
-لا والله جذابة ماكو هيج شي شعندي ماخذتهم لا عفية حبابة باوعي زين واتأكدي اني شوكت شفتج حتى اخذهم منج
الطفلة المحرضة والمدرسة من قبل الام
-اي انتي اخذتيهم مني وگلتي حتى ميضيعون راح اضمهم الج بجنطتي
رونق-لاعفية جذابة هاي
ام علي -احترمي نفسج منو الجذابة بنتي طفلة متعرف تجذب انتي الجذابة والحرامية
رونق التفتت للمديرة -عفية ست والله ماكو هيج حجي اذا متصدگوني فتشو غراضي وفتشوني
والله وصار مصايح وهذا الرجال الجايبتة وياها طلع اخوها وكامت المديرة هي والمعاونة وام الطالبة وخالها راحو لغرفة الاستراحة حتى يفتشون غراضي او مابدو بجنطة كرار خالة بيها شغلاتة وبعدين وبعدين فتشو جنطتي وهم ما لگو بيها شي احمد واشكرك يارب
المديرة التفتت على ام علي
-هسة شفتي بعينج گدامج ماكو شي بجنطتها
ام علي-لاعيني حبوبة هو الي يبوك ميضم البوكة بهيج اماكن سهلة طبعاً ينلزم لا دورها هي وابنها فتشوها گدامي حبيبتي اني متعبر علية هاي السوالف
المديرة-شوفي ام علي اذا مطلع الذهب عند الست رونق تعتذرين الها امام الكل
ام علي -اذا طلع الذهب عندها اني ابلغ الشرطة عليكم وما راح اسكت على وحدة حرامية
والله اجت علية المعاونة رادت تفتشني
رونق التفتت على المديرة
-ست بلا زحمة قبل لتفتشوني خلي الولد يطلع بلا زحمة
ما اكدر اتفتش گدامة والله صعبة علية
والله طلع الولد ياربي شنو هالذلة
سمعت ام علي تحجي بصوت ناصي
ايه طلعت تستحي ام الرياجيل
اجت المعاونة وفتشتني ونوب راحت على كروري سودة علية نايم وكعدت تفتش بملابسة والله متت قهر عليه حبيبي من هو صغير خضع للتفتيش
لكن هنااااااا وكانت الصدمة
شفت المعاونة ترفع بيدها التراجي والكلادة
اني لطمت على صدري من الهبطة
رونق-يمة دخليك يارب هاي شلون وصلن هذني هنا لعند كرار
ام علي -حلوة هاي شي اكيد انتي ضامتهم هنا حتى لا ماتخطر على بالنة انفتش ابنج بس الله فضحج
وهسة اني راح اتصل على الشرطة
التفتت المديرة على رونق
- رونق تفضلي وياي للادارة انتي وابنج
المديرة-ام علي مالهة داعي تتصلين على الشرطة ترة السالفة متستدعي تطلبين الشرطة اني راح اعاقبها واطردها من الروضة
ام علي -لاحبابة اريد اسويها عبرة لمن لايعتبر
حتى تـُـــوب
رونق همة يحجون واني گلبي گام يرجف
رونق-لاعفية ست والله العظيم هاي مو اني الي اخذتهم عفية لاتظلميني
انتبهت على اخو ام علي طلع نقالة وكعد بتصل
ومن خلال كلامه عرفت اتصل على مركز الشرطة
يمة عزة بعيني لاعفية ركضت على المديرة
-عفية ست لتخليهم يتصلون على مركز الشرطة هاي ليش هيج يسوون بية والله مو اني الي اخذتهم
المديرة-اعتذر رونق انتي جبتي السمعة لروضتي
وبعد مالج شغل عندي
اجيت اطلع من الروضة بلكت الله ميحسون علية
بس وين من ورة هاي العگربة شلون اكدر اشرد
والله ورة عشر داقايق اجت سيارة شرطة بيها اثنين ضباط
ونزلو راح عليهم الولد وحجة وياهم بي من خلال سلام واحد من الضباط على ام علي مبين يعرفها يمكن يعودلها
وسمعو كلام المديرة والمعاونة وام علي والطفلة والمصيبة الجبيرة هاي تبارك اجت وكالت اي اني شفتها بعيني تنزعها الذهب اني هنا متت بدمي وايست من رحمة الله
ربي دخليك ماعندي غيرك الجيء له واشكي ضعف حالي
الضابط -تفضلي اختي ويانة عالمركز
اني رجلية صارت خيوط ودموعي صبن عشرة عشرة من الخوف شحجي وشكول حتى الحجي ماينفع
هذا الحجي ابني كرار ظل يبجي وزاد البجي مالتي يريد الرضعة مالتة واني صعبة علية وظليت اهز بي واسكتة والله خطية غفة على جوعتك سودة علية
وصلنا للمركز
وكعدو يستجوبوني واخذو اقوال ام علي والمديرة
وراحو وبقيت بس اني والضابط الي يعرف ام علي والكاتب
دخل فجاءة ضابط ثاني بس حسيت عليه اكلني اكل بعيونة وسأل ضابط التحقيق اني شسوي هنا
وحجالة عني
سمعتة يكلة بربك هسة هذا الشكل مال وحدة حرامية
بشرفك بس باوع عدل لك هاي شنو وين رجلها وهيج مسيب هاي النعمة بالشوارع
رونق
والله العظيم شكد شايفة ذلة بوكتها مثل هاي الذلة ماكو وبقيت بس ابجي واشتكي بگلبي لله
وهذا كرار رجع يبجي
الضابط-اي مو عيب عليج تمدين ايدج وتوكلين ابنج حرام اي ليش مسويتي حساب لهلطفل جان كسر خاطرج
رونق-اخوية والله مظلومة
الضابط-كلها شهدت ضدج وعندهم الدليل وانتي شنو دليلج يثبتلي ان انتي ما مديتي ايدج وسرقتي
رونق-اني الله المحامي مالتي وهو الي يثبت دليلي
بس ما اكول بس حسبي الله ونعم الوكيل
الضابط -عندج احد تتصلين عليه حتى تنطيه خبر
رونق -اتصلت على ام مروة بلكي تلحك علية ما اكدر اتصل بسهير هاي شيطانة موبعيد تستغلها فرصة وتتركني هنا وتاخذ ابني مني عادي كلشي اتوقع منها

ام مروة -يايمة رونق ماصدكت بيوم حجتلي صديقتي السالفة لان اعرفج حبابة ما تطلع منج هيج السوالف. لكن من حجت صاحبتي عن سالفة الرجال الي متقدملج وكالت هاي مرتة عرفت منو ورة هالسالفة كلها
شلون بالله هسة
اي صدك اتذكرت ليش متتصلين على هذا الي اسمة رضوان مو تگولين هو ضابط
رونق -اي والله صدك راح من بالي بس والله مستحية منة واني اخر مرة كتلة روح ممحتاجتك
رونق اتصلت على رضوان واني گلبي يدگ حيل هسة شيكول علية حرامية بس المشكلة اني امام خيارين
اما اطيح من عين رضوان او ابقى هنا من ايد لايد وينمسح بية الكاع واني صاحبة طفل
لكن اختاريت اتصل على رضوان وامري لله
والله اتصلت بعدها ما صايرة الرنة الثانية هو رد جاوبني
رضوان-الو هلة ام كرار شلونج
رونق وهي صوتها يرجف وبي البجية
-اخوية ممكن تساعدني اني واگعة بشدة ونخيتك تلحگني لان ماعندي غيرك يحلها
-گولي ام كرار شكو شصاير
-اني بمركز الشرطة القو القبض علية بتهمة سرقة ذهب
-لتكملين گليلي وين المركز واني جايج
رونق التفتت للضابط باستفسار عن مكان المركز
-شوفي ام كرار انطي النقال للضابط واني احجي وياه
والله ورة مخلص الضابط كلامة وية رضوان خلص الاتصال بعد ما وصفلة المكان
انتبهت عليه اتغيرت نظرتة الي وصار وجهة اصفر ما اعرف ليش
الضابط-تحتاجين اجيبلج شي تشربينة جاي ماي
عصير اي شي
بجى كرار الي كان بيد مروة تسكت بي
رونق بتردد-اذا متصير زحمة اريد مكان ارضع بي ابني
الضابط -سهلة اختي اني طالع من المكتب وانتي اخذي راحتج ترة اعتذر عن قسوة معاملتي وياج لان مجنت اعرف انتي من اهل العقيد رضوان وشي اكيد انتي متسوين هيج شي
وطلع وتركني اني ام مروة ومروة وحدة ظلت تباوع عالثانية هاي شديصير بالدنيا اشو هذا اتغيرت تصرفاتك لوفة بالتسعين
گعدت ارضع كروري حبيبي خطية يحتاج تبديل ملابس
اباوع على الساعة صارت بال٣الظهر ولازم اني راجعة من الساعة١٢
وهاي سهير حتى مكلفت نفسها تشوف وين صفة بية الدهر
اذا الدنيا علمتي على شي فهو عدم اللامبالات يعني بعد ما كنت انقهر على كل صغيرة وجبيرة ببداية وفاة قصي صرت اعبر هواي مواقف يعني مو كلشي گام يهضمني ولاكلشي يخليني ابجي واتحسر احس مشاعري صارت اصلب جنت بالبداية على كلشي استهضم وابجي واروح لصورة قصي واشتكيلة لكن هسة لا اتعودت
خلصت رضعة كرار وسترت نفسي وعدلت شالي
واجة الضابط
-اختي تكدرين تتفضلين ترحين على بيتج ونعتذر على الي صار كان سوء تفاهم كدرنا نحلة مع صاحبة الذهب وخطيبج العقيد رضوان
انتي لو من الاول حاجية وكايلة انتي خطيبة العقيد والله جان مخليتج تتبهذلين هاي البهذلة
واتفضلو اخذو راحتكم هو هسة العقيد رضوان منتظركم بباب المركز بسيارتة ياريت تستعجلون لان عندي شغل كومة متراكم
واشكر تعاونكم وياي
رونق هو يحجي واحنا فاتحات حلگنا
عليه هاي شنو وشوكت وليش وليمتة هذا كلة صار
ام مروة وهي تكوم يالله ماما گومي
مروة وهي تشيل جنطة غراض كرار
-والله طلع هذا رضوان مو هين بعشر دقايق حلها للسالفة كلها واني من خوفي وصلتج لحبل المشنقة من الخوف
طلعنا وشفت سيارة رضوان من هاي السيارات العالية الحديثة وكان لابس مناظر شمسية ونزل بس ماشاء الله شلون هيبة ووقار على وجهة
حسيت بمروة بزتني بعكسها
-ولج لاتكولين هذا الصاك هو رضوان والله هسة اشمر روحي جوة السيارة اذا گلتي هو هذا
رونق -والله غير الصدك ابد مامنتبهة عليه بس اتوقع هو

رضوان من وصلت عالمركز وسمعت الكلام

بوقتها كلش انقهرت من اتذكرت صوتها شلون يرجف من البجي والله لوقصي موجود ما اتوقع يصير هيج بحالها وتتبهذل وتدخل مراكز الشرطة من تالي وكت والله اسف يخوي جني معرفت اصون الامانة

التفتت على الضابط طلبت منة ان يرسل على اصحاب الدعوة والي انسرق منهم الذهب واول كلمة حجيتها الهم
ام علي-ليش رجعتو دزيتو علينا
الضابط-استجد شي بالقضية ولازم تعرفينا
رضوان-اني العقيد رضوان اكدر اعرف ليش متهمين خطيبتي بهيج تهمة وهي ممحتاجة تمد ايدها على ذهبكم لان الكل يعرف كلش زين اني منو وعائلتنا شنو
ام علي ظلت تبلعم
-ليش هاي شوكت انخطبت
رضوان-هاي عندها اسم واعتقد من ورة(( هاي ))
الظاهر عندج وياها مشكلة وية خطيبتي
هنا اخو المرية نطق ابو الهول
-شوف خوية اجيبلك اياهة من الاخير خطيبتك قبل ثلاث ايام اتقدملها رجل اختي يرد يتزوجها بالسر واحنا عبالنا هي فارة عقله
رضوان -احترم نفسك واحجي بادب من تحجي بحرمة بيتي سامع اختار الفاظك عدل قبل لتحجي لا ادور حلكك واعلمك الحجي
رضوان
هو هذا مبين من شكلة فطير ويجفص بالحجي والاثول فضح اختة المطي
المهم خصم الكلام ان كانت السالفة سالفة حقد لان راح تاخذ رجلها منها بس اولي الله شسويت بيهم غيرصخمت وجهم هي واخوها وبهذلت احوالها ودزيت على رجلها وابوها وعلگت بينهم بالنعل
روضوان-حلو مشاكلكم بينكم انة هسة اطالب ان الباجر
تحضر ام علي وابو علي للروضة يعتذرون لرونق خطيبتي امام الكل
والله
وطلعت بالسيارة وطلبت من الضابط ان يرسل الاهل
وراي انتضرهم برة بالسيارة
لكن شفت ثلاث نسوان المرة الجبيرة شايلة الطفل وهذا شي اكيد كرار واثنين بنات معرفت منو بيهم من هذولي الثلاثة مرت قصي
اني اعرف بيها جبيرة شي اكيد بعمر الثلاثين بس هاي الشايلة الطفل مبينة اكبر من عمرها بالله وحدة صغير لابسة ملون وكشخة شطبتها من القائمة لكن الشايلة كرار والثانية هذني لابسات سود وضاعت علية السالفة بس على الاكيد هي الشايلة كرار لان امي كالت عجوز وشحالها وين لگيتها الظاهر هي هاي بس خطية الحزن لاعب بيها طوبة وشكلها ابد ميشبه صوتها بالنقال
صوتها كلش ناعم وانثوي
اهوووو هاي شبيك رضوان شجاك على هذا الكلام
لا بس هيج اخذني الفضول اشوف منو بيهم
بس الله يستر على هاي البنية الثانية الصغيرة غير شايلة حسن وبرائة بوجهة استغفر حتى الاسود حرام تلبسة لان صاير عليها فتنة وهي ابد مرفعت عيونها
وماكدرت انطق غير السلام وياهم وكلمت طريقي استحيت احجي وية مرت قصي كدام البنات بالموضوع گلت اتصل عليها واتفاهم وياهة

يتبع