خذ بيدي ولا تسألني الفصل التاسع 9 - بقلم نهى

خُذ بيدي ولاتسألني
للكاتبة nuha-d-h

رونق وصلنا رضوان اني وخالة ام مروة ومروة للبيت ونزلنا كلنا عالبيت وراح منطق اي كلمة غير بالاخير من نزلنا كلنا
وجان داير وجها للامام وگال
-ام كرار راح اتصل عليج بعد ساعتين عندي موضوع جدا ضروري احجي وياج فجاوبي عالاتصال
وحرك سيارتة وراح منتظر مني اگلة اي او لا
يعني حتى مطلب مني طلب لا احس بي يأمرني هذا شنو والله شايف نفسة

دخلت للبيت
مروة التفتت علية
-ولج انتي اكبر عوبة شفتها بحياتي يعني اكو واحد يرفس هيج نعمة والله علمود شنو امة مقبلت خايبة دطيري انتي وامة والله لو العشيرة كلها توگف ضدي اخذة
رونق-اي حقج تگولين هيج لان انتي گلبج فارغ مبي احد مو مثل حلاتي ارملة وبعدة قصي بروحي عايش ويمشي بدمي
مروة -يا اختي افتهمج بس انتي لازم تشغلين عقلج ترة اغلب الزواجات هاي الايام متنبني على الحب تنبني على الاحترام المتبادل واغلبهم تتم الزواجات عن طريق الامهات والاهل والولد والبنية اخر من يعلم بعدين عودك يجي الولد ويشوفها وتصير القسمة
رونق -انتي مدتفتهمين شنو قصدي هذا الشعور الي بگلبي محد تحس بي بس الي فاقدة زوجها وابو بيتها سألي امج وهي تجاوبج
ام مروة-والله عاذرتج خالة بس تردين الصدك خالة انتي اول وتالي تتزوجين ميصير تبقين لوحدج بهاي الدنيا

ورة مطلعو ام مروة ومروة لبيتهم ظليت لوحدي وكعدت ابدل لكرار ملابسة واغسلة ورضعتة حٍٍِْــًبٌٍـيبي كعد يناغي وسولف وية روحة
رحت عالمطبخ وگليت طماطة وسويت جاي وشفت باقية بس گرصة خبز يالله خل ادبر اموري بيها والله كريم لازم اطلع اتسوك خلي انطي خبر لام مروة من تريد تطلع للسوك اروح وياهة اتسوك
شوية وسمعت نقالي دك رحت شفت هذا رضوان
جاوبتة بصوت ناصي مستحية من الموقف الصار
-الو
رضوان وهو يباوع للنقال حتى يتأكد ان هو ديتصل علىً ام كرار لو متوهم بس استغفر الله الصوت صدك عورة هذا الصوت يسطر
-الو شلونج ام كرار
-الحمدلله ترة اني اعتذر عن الازعاج الي سببتة الك اليوم تعبتك وياي
-لا عادي تعبج راحة ام كرار على العموم انحلت السالفة والباجر تداومين حتى يعتذرون منج المرية وزوجها على الموقف السوتة وراح تعتذر منج امام الكل
-اشكرك اخوية والله ما اعرف شلون اردلك الجميل

-ام كرار انة اتصلت عليج هسة حتى احط النقط على الحروف ترة اليوم خلصت شغلتج بصفتي خطيبج وهسة الكل الي بالروضة صار يعرف ان انتي مرتبطة وعلى وشك زواج بالعقيد رضوان واني معروف وشي اكيد الكل راح يعرف بخبر خطوبتنا
رونق-منو سمحلك تقرر عني هيج شي يخصني
رضوان اخ يابة هاي البنية فايتهة دك
-انة سمحت لروحي ان اتخذ عنج هيج قرار لان حضرتج اتصلتي علية وطلبتي مني ان اساعدج واخلصج من هاي الورطة يعني انتي مسألتي نفسج بصفتي شنو اروح واطالب بحقج
ترة اني لا عمج ولاخالج ولا اعودلج
يعني انتي مفكرتي بكلام الناس عنج لو بس المهم انتي وراسج اليابس كون التردي حضرتج يصير وما تهتمين لاحد غيرج انتي اكبر انانية شفتها بحياتي
لان تفكرين بس بنفسج ومفكرتي بابنج شلون اتبهذل وياج بالمركز يعني مع احترامي الج من شفتج اتوقعتج امرية جبيرة ورزنة وعندج عقل وتعرفين توزنين الامور بعقلج بس طلعتي بس الغلاف يدل على الوقار لكن المضمون بعدج زعطوطة وعلى العموم هذا مو موضوعنا اني اتصلت عليج راح ادزلج اهلي حتى تتفقون وهالمرة انتي معليج بكلام الوالدة وترة عرفت شنو سبب رفضج ذيج المرة وافتهمت ان الوالدة هي السبب
رونق-رضوان انت اشو مدتطلب مني وتاخذ رائيي انت داتأمرنيواني لازم انفذ وهذا الشي ميصير

رضوان
اول مرة تنطق اسمي بس اول مرة اعرف اسمي هيج لحنة حلو
استغفر الله اعوذ بالله من الشيطان الرجيم
يعني لو احط الصوت وية الشكل صدك صدمة
-سمعيني زين ام كرار انة مداخذ رايج اني قررت لان انتي الظاهر مداتفتهمين
المرحوم امنكم عندي انتي وكرار فمو انتي ولاعشرة منج يخليني اخلف بوعدي لصديقي فيابنت الناس لاتعبيني ولا اتعبج الباجر الاهل يجون وتتفقون وخلي ببالج ترة العقد باجر وحضري غراضج وغراض كرار اخذكم وياي لبيتنا وهذا هو انتهت
فلتخليني الجيء للضغط عليج بغير وسيلة وتعرفين كلش زين انتي مو بگدي
رونق-شنو انت گاعد دتهددني
رضوان وروحة طافرة منها -شتفهمينها
فهميها
الي اگولة يتنفذ لان الظاهر انتي ماعندج احد يحطلج حد فاهمة
حجاها بصوت عالي بحيث رونق كمزت من مكانهة
رونق بارتباك -اة اة بس هذا مو حل انت الظاهر كلشي عندك بالقوة تاخذة
رضوان ببتسامة-عليج نور وهسة انتي عرفتي اول خصلة عندي وهسة صيري حبابةوسمعي الكلام وجهزي نفسج على باجر
نجي عليج ناخذج
هَـا قبل لا انهي المكالمة
اتحملي السان امي شوية واي واحد يسمعج حجاية اني موجود تجين تحجيلي فاهمة واني اردة لعند حدة
يالله في امان الله
رونق
نهة الاتصال وكعدت اباوع على النقال
هذا شنو اشو حجة وقرر وجاوب روحة والباجر راح ينفذ بدون مياخذ رأي وعبالك اني زعطوطة وهو يقرر عني
ادري تريد تساعد اهل المرحوم بس موهيج گالوهة يعني
كل گواة عين يحجي شنو من ثقة عندة

رضوان -يمة اني بلغتج ولتخليني اتزوجها واطلع منكم من البيت وانتي بكيفج
ام رضوان. گاعدة متربعة وتضرب بديها على رجليها -يمة هاي العجيز مسويتلك سحر
هاجر- ماما خافي ربج هذا الجمال كلة وتصيحين عليها عجيز
ام رضوان وهي تشمر النعال على هاجر
-وغمامة التغمج وتغم امج وياج ولج الهبشة تگومين منا لا هسة ابتلي بيج
ضياء-دعوفيها يوم مالج دخل بيها مخبلة
هاجر -هسة شگلت علمود هدت علية لو هو امي ما گادرة الا على ابوي
ام رضوان -ولك يمة ضياء وخر اختك هاي من گدامي راح تموتني ناقصة عمر
ضياء-دكومي روحي منا مدتشوفيها شلون محروگ گلبها على اخوج ناوي يتزوج الارملة السوداء الحيزبون
هاجر -وهي تفر بيدها والله يالله احمدك واشكرك يا رب
وراحت وعافتهم
رضوان-يمة انتي تعرفيني كلش زين الي براسي اسوي لو على كص رگبتي فانتي مراح تكدرين علية سامعة
فالله يرضى عليج تعاي وياي وخليني اعقد عليها
ترة مو والله شلعتي گلبي لتخليني اتخذ قراري وانتي تعرفين من اكول كلمة بعد ما ارجع عنها
ترة اخذها واطلع بيها وبعد متشوفين رگعة وجهي
ام رضوان وهي تشهك -لايمة لا كلشي ولا انت ولا ونوب تريد تطلع بالمسعدة لبيت لوحدها خوش عيني كملت تستفرد بيك
-هذا هو الباجر ترحون انتي وابوي واني واخواني وخواتي وعمامي وياي اروح اخطبها واعقد عليها واجيبها وياي بنفس اليوم للبيت اني اتفقت وياها على كلشي
ام رضوان-يلوك ماخذ العشيرة كلها علمود الخاتونة
ايه لعد ليش ذاك اليوم كاعدة براسي تبيع ثكل وتكول اني كلشي ما اعرف عن رضوان ولاهو يعرفني
اشو هي تحجي شكل وانت تحجي شكل
طلعتو منفقين على سالفة الخطوبة ومقررين
رضوان-وتاليته وياج يمة يعني ماراح تفكين مني الا من اسوي مصيبة واطلعلج من البيت واعوفة الج
ام رضوان وهي تحط ايدها على حلكها
-يالله اهااا سكتنا بعد مراح احجي شي
بس لتعزل بيها ببيت

رونق
اتصلت على سهير وحجيتلها السالفة وهي فرحت بس مو حباً بية لا بس علمود تريد تبيع البيت
وتخلص مني
-بالمبارك لعد خوش خل اتصل على خالي حتى يجي يگعد وية الناس
سهير وهي تباوع لرونق
-عدلي روحج شوية جنج بومة
ماجنك راح تتزوجين اليوم
رونق وهي مقهورة من رضوان وسهير لان الجانبين يضغطون عليها
ونوب بعدها اتصلت على ام مروة ومروة صديقتي اموت عليها واحتاجهم بهيج يوم
واجو اهل رضوان العصر
وكانت الوجوه مگلبة وامة بس تخزر بية
ورة شوية خال سهير صاح لسهير حتى البس عباتي ويعقدولنا

ووعقدلي السيد من ورة الباب وخلصت الخطوبة واتفاجئت بالمقدم والمؤخر كان الرقم كلش جبير
والله خلصت وطلعو الناس ورضوان بقى هو واختة هاجر هي الوحيدة حسيت بيها متقبلتني الا ام رضوان اعوذ بالله كل ساعة تخزرني ما اعرف عبالك كاطعة ليلة عرسها

اليوم الصبح قبل العقد
حضرت غراضي وغراض كرار لان الله يحفظة استاذ رضوان منطاني مجال حتى ارتب اموري بالبيت
وسهير كالت اني اصفي البيت وابيع الغراض بس بوقتها غير متت قهر وبجيت بجي احس بروحي خويت واجتني خالة ام مروة الصبح واخذتني للروضة واعتذرولي ام علي وزوجها بعد ما سمعت ابوها واخوانها ضاربينها على سوايتها وياي لان الظاهر رضوان لاعب بيهم طوبة بحيث خلاهم مثل الكرتة تجي تعتذرلي هي وزوجها
رونق واحنا طالعين من الروضة
رونق-خالة البارحة حلمت حلم
ام مروة -گولي خالة ان شاء الله خير
رونق-خالة حلمت شفت قصي راكب بقطار
واني بالحلم جنك اتأخرت وفاتني القطار واخذت اركض ورة القطار واني ابجي اصيح على قصي واگلة
قصي شلون نسيتني بس قصي يباوع علية ومحجة شي بس مطلع راسة ويباوع علية شفتة نزع من ايدة سوار فضة وشمرة الي واني اخذت السوار ولبستة
وبعدها بجة كروري وكعدت من النوم
ام مروة -خالة اني سامعة عطية الميت خير وان شاء الله المقصود بهاي العطية زواجج من رضوان

رجعنا للبيت وحطيت صورة قصي بالجنطة مالتي وحطيت جميع الذكريات بالكارتونة الجبيرة بس كل قطعة احطة بالكارتون احس احط جزء من روحي مو هينة علية
ابدي حياة جديدة بغير مكان بعد ما عشت وترعرعت بهذا البيت لازم اتركهم واودع كل ذكرة الي بهذا البيت
يارب سهل امري

يتبع