رواية خذ بيدي الفصل الرابع عشر 14 - بقلم زهراء العراقيه

اربع مرات رحت غسلت ايدي ورجعت .... افرك بيها ...........لا بعدها مو نظيفة ...ردت اطلع للمرة الخامسة

حسن
- هدى وين تعاي
چان مسطح على السرير
-كافي يمعوده شنو وين رايحه
- اريد اغسل
- مو توج غسلتي ؟؟؟
- لا ما غسلت عدل
رحت ورجعت ...لگيته نايم ... نمت ابصفه واني انتظر باجر يجي حتى اجيب الادوية وارجع طبيعية مليت ......

لاحظني حسن كلساع اطلع بيومها نفسيتي كلش متأثرة ضحكة شماتة تهاني ادگ بأذني ...
لو حسن الي مثل  علية رسم  الابتسامه .. چان يصيحني ام علاوي ... رحت للمطبخ افرغ دموعي .. ما اگدر بعد اتحمل ....اكثر
ردت اطلع واخترعت حيل من شفت گدامي واگف يباوع الي بعطف
رحت من گدامه شارده للغرفة وهو خلفي  انطرحت وغطيت راسي
شال عني الغطى
وصاح
- اشبيج ...ليش هيج تتصرفين عود
واذا طلعت ابنية كلها نعمه من الله ..
باوعت اله بحزن
-چنت اتريد علاوي ..
- الله ارادة اقوى بعد هاي هي نتبطر على نعمته گولي الحمدلله وكافي بچي مو زين عليها ..
- حسن انه  تعبت ما اريدها بعد .
نهرني لا اعيد كلامي مرة ثانية ..
الصبح هو راح للشغل وانه بس بغرفتي ابچي  ..انطويت  على نفسي ... ضليت ايام على هاي الحالة  ... الدوة جبته بس خايفه اخذه .... كنت اتمنى اشوف بنتي ....شو داخلي خايف عليها اهواي ....گلت استحمل هاي الوساوس ولا اذيها ....
طلعت اساعد بالشغل ... لكن تهاني ما قبلت رجعت مثل قبل ماتقبل احد يلمس شي ببيتها
كأن مو من حقي اني هم .. حتى حسن احسها اتسوي المستحيل حتى يتأخر من ليلتي
.ومرة سمعتها اتگول اله حرامات ازوجت علية حسن وهم راح تسطر الك بنات  احنه عايزين جهال صدگ ضجت  ....

صارت حالتي الى الأسوأ  لاحظتني تهاني ...
اوف بس تظغط عليه ابطل وسوسة وما اغسل كلساع
انوب اني عايشه بخوف من جبت الحبوب اخاف الولد مفتن الها  ردت اذبهم بس بطلت
چنت واگفه يم الغسالة انتظرها تكمل لازمه بنطي

تهاني اجتني
- بس لا عدتي الغسل يمعوده ...شنو هالوسواس ..اوف لو عندچ ادوية چان خففت عنچ
- بس مو زين
-يمعوده دخت منچ ولو حبايه وحده باليوم ما اعتقد راح تأذي
تأثرت بكلماتها هي ماتگول شي غلط وتعرف احسن مني .... ضليت افكر بيها ..... الى ان دنت نفسي وردت بس ارتاح ...اخذت وحده بأحد الصبحيات ..

حسيت براحه بال وهدوء رجعت لنفسي الي فقدتها ....
كنت اظمه جوة ملابسي ...
وكل يوم حبة وحده ....
حسن بهاي الفترة دومه مشغول ..يروح محافظات ويرجع ما فارغ ... ودوم ناس يمه من موجود بالبيت ...يرجع بالليل يلف راسه وينام حتى ما يميز وين ينام .. مرات بالهول يحظن رقيه وينام ومرات يمي ومرات يم تهاني .ما يحسب ليلات مثلنا وين ماتاخذه رجلة ينام ويطلع من الصبح ... 
بيوم چنت اغسل بالحديقة و رقية تلعب يمي .. نزلت للترابية تلعب يم الدجاجات وانه ما انتبهت الها ... چنت بشهر الثامن ثگيلة بحركتي ..
-روقة انه داخله لجوة تعاي لا تلعبين يم التراب
عفتها ودخلت ...
سمعت صوتها صاحت وخنست ركضت انه صيحتها مو مال وگعه بسيطه انهلعت من شفتها واگعه بدمها الساني انعگد وجمدت اريد اتحرك ما اگدر بعد
اجت زهراء شافتها صاحت وركضت لامها وانه بمكاني واگفة .....
اجت امها شالتها ..   يمه بنيتي شوگعچ يمممه ردي عليه ...شالتها وطلعت للشارع اصيح التموا الجيران اخذوها للمستشفى بس مع الاسف وصلت لهناك جثه هامده .. هذا كله وابوها ما يدري جان بكربلاء ...البنية بالمستشفى ..واحنه مفجوعين كلنا انه بس ابچي والطم وامها تخربطت اهناك بالمستشفى نايمه  ..
دزوا خبر لشروق ولجماعة بغداد ..كلها صار عدها علم ...بس مايگدرون يدفنوها منتظرين ابوها الي ماعدنا وسيلة اتصال اصلا مانعرف يافندق گاعد .. چان رايح زيارة ...
رجع بعد وفاة رقية بيوم العصر ...
شاف البيت مخبوص ونسوان داخله وطالعه ...اول ما سأل على تهاني گلبه وگع خطية ....لكن من اجاه خبر رقية حبيبة گلبة واگعه عليها طابوكه الحبل من فوق الستارة وميته .... انهلع الرجال راح لهناك ما مصدگ ....
اختصر الحزن الي صار لأن اكيد بكل بيت عراقي عنده الي يكفيه ويوفيه  ..  عشنا ايام امر من المر ... تهاني كلساع تصحى اصيح اتريد بتها ... وتبچي ...  ام محمد ضلت يمها واختها الي عايشه بغداد خلص العزة راحت واخذت شروق وياها ...
اما حسن .... دومه طالع وغرفه تهاني والبنات مايگدر يدخلها لأن بته دوم بيهن چانت ..
بصورة عامه البيت كله ما يجيه غير من يريد ينام وغابت ضحكته من غابت رقية عن اعيونه ..
افترت الادوار و هو الي صار دومه صافن مايدري ارضه وين
وانه الي احاول  اطلعه من حالته بس ما اعرف ..
حتى اكلة صار قليل ... بدة يضعف ... يذب همه كله بالشغل مايسولف وانه حايسه بالبيت والخطار الي يجي ... گمت انسى اخذ علاج انشغلت حيل بالبنات ..... وعذراء دوم تجي يمي تحجي وياي ...  واتكول البيت لا يطاق امي حالته  يرثى لها ... وتشكي الي افتقادها لأختها 
بعد اربعين رقية انه دخلت بشهري التاسع ..
چنت ضعيفة بس بطن عندي اخذت سونار ثاني وهم طلع ابنية ..گمت احبها قبل لا تجي .. ذبيت العلاج واتخلصت منه ..
ام محمد  البارحه جانت يمنا  وشافت حالة حسن وانه هم شكيت الها فگالت اتلگيه بالكلمه الطيبة و فركي رجليه وعادي اتقربي منه وبوسيه تره واذا حزين مو يتحرم عليچ  الرجال مهدود حيله بموت بته  صح لكن يبقى مثل الطفل يخف حزنه وينساه بالمداره 
انه الاسود چان يشع عليه شع  .. تعدلت بس مشطت شعري ذيل حصان وهو ثخين و بيه رده قويه صار جنه شعر مريام فارس بس ع خشن
حطيت بس كحله ...  سمعت صوته ركضت اله
- هلا ابو علي الله يساعدك
اخذت منه المسواك ورحت للمطبخ عزلته
شفته طلع من الحمام انطرح على السرير
اجيته  وگعدت يم رجليه وبديت افرك بيهن
-شسوين
بتردد
-افرك رجليك مبين تعبان ...
سكت
وانه بديت افرك واحسه ترخى وارتاح حيل

من شفته غفى بطلت وغطيته ...فتح اعيونه بثقل ومد ايده ... اجيت انه يمه بس ما نمت عليها
- انت تعبان حسن  ...
نمت ابصفه ومديت انه ايدي  .. نام عليه .. وانه ضليت افلي شعر راسه .... 
صاحتلي فاطمه اتريد اسبحها
ردت احط راسة واگوم چان غافي
ما خلاني ضل لازم بيدي  .
...........
كنت احاول  اقلد شغل تهاني حتى يحسون بتغيير ..  بس الخبز متعب حسن يشتريه ..
بيوم راد يروح يزور گلت اله اخذنا وياك والله نفسنا انغمتت من گعده البيت .. تهاني ما راحت . بس البنات طارن اطيور وشاف هو بنفسه من طلعن كأنهن كان مسجونات  بالحزن الي جوة  ..وحس هو بحزنه راح يأذي بقية بناته ...
رجع يحاول يكون وياهن . وصار يقلل عمله حتى يتواجد وما يضيع يوم ما يشبع منهن
اما اني رجع يوم يمي ويوم يم تهاني ..الي بدت ترجع طبيعية اشوية . صح حزينه بس رجعت تشتغل واذب حملها بالشغل ....

اما اني بديت احس بأوجاع مال شهري ...
تتعارك تهاني ويه ذبان وجهة حتى حسن ما خلصان منها بس يبات يمي على الريوگ الا تغثى ورجعت بينهم المشاحنات ومرات حسن يغلس  ...
گان هو بالبيت من دگو عليه ناس من بغداد .. 
گالوا اله بتك صار بيها حادث انه الي سمعت الخبر ما تحملته  مو انوب تهاني .   الي ظلت تلطم ...راحوا لهناك ....الحمدلله بس كسر بضلعها .  جابها ابوها يمنا ....بهاي الفترة ما اعرف شنو صار الشهر صارت بيه  من مصايب ..عرك ومشاحنات بينهم و البنات بس يتعرضن لكوارث الله يحرسهن منها حسن انظربت ايده  ونشگت، غراض البيت تعطل .ضلينا بس نتعثر بقيت بس انه وبتي ما لاحنه من النحس ...  
تمرضت تهاني حيل دوم تختنگ وماتعرف اشبيها ... واحتار حسن بيها ياخذها للدكاترة يگولون كلشي مابيها حالة نفسية 
هي نفسها مستغربة من الي يصير وياها بس تتوجع وتختنگ ماتگدر اتگوم انه اخدم بيها واخدم ببتها شروق وانه على وشك ولاده ... كنت ناوية اكمل ختمه القرأن خلال شهري التاسع ... گاعده بغرفتي اقرة واسمع اصياح تهاني الي ...
تون واتگول خل حسن يجي هسة
گلتلها طلع ماهو
گالت الله يخليچ خل يجي .. راح اموت
ما گدرت احصله  الها وخفت حيل عليها ...

اجه حسن من وحده اول ما دخل بناته گالن اله .

طلعن البنات بس هو ظل وهي گالت خل اظل هدى
- حسن راح اموت
باس ايدها بحب  وگال
- عمرچ طويل ام شروق
- لا اني اريد اموت واخلص
- والله مابيج شي هاي نفسيتج بس تعبانه .. من باجر اخذچ وانروح للشمال
- حسن اني مغموته نفسي ...ما اگدر اعيش ....الله عاقبني يا ابو البنات الله  طلعها بيه
چانت تحچي وتبچي
- ما اشوف الكوارث وحده ورة وحده خسرت وحده والباقيات جاي يتعرضن لكوارث .. 
الله كون يطلع الحوبه  بيه مو بيهن
حسن بحنية
- شنو تحچين تهاني .هذا قدر انتي ما االچ علاقة
- اااه حسن الله يخليك سامحني
كان يسكت بيها ويحظنها واني ما اعرف ليش اصرت اظل كنت افضل اطلع ....
من ادموعها
- اني حسيت نفسي فارغه مو مرة من شالوا رحمي وطلعت بنت والله  چنت متخبلة .. ما جان قصدي والله. والشمات عموا على عيوني وگلبي
گامت تبچي بحرگه وادگ على گلبها وحسن صافن عليها ما مستوعب عن شنو تحچي

- تفلت عليها گدامك وگلتلك اكتلها ....وما قبلت ارضعها
وهم اخذت ادگ على صدرها
- اااخ يا حسن من جبرتني ارضعها بالليل چنت بس ابچي ما اريدها حطيت المخده على وجهه.
حسن وگف - كااافي
اعيونه صارن حمر وجسمه كله يرعش ..

-  عفتها ورحت نمت هي ونايمه ماتت ! .. بس والله گعدت الصبح اللطم عليها  والله احبها واريدها ... والله مو قصدي ....
فتح الباب وطلع حسن .... انه ردت اطلع  خلفه لزمت ايدي
- دربالچ عليهم ....هدى
وچانت  تبچي وتترجى فلتت ايدها ورحت وراه ما لحگت عليه طالع ..  رجعت الها
ردت الومها ليش گالت اله لگيتها مختنگه بنفسها

ضليت اهفي الها وفتحت المنافذ اتحسنت ...
- اثاري الله ضامه الي  شما طال الزمن تطلع بعدين مايروح شي عند الله
گالتها واندارت وتبچي عفتها وطلعت  ...

ماگدرت اتحمل .. 
حسن ثلاث ايام غايب عن البيت وازداد قلقي عليه  ....
انه نفسيتي هم تعبت يعني خلال شهرين شهرين بس هيچ انگلبت حياتنا ....اشوكت ارتاح اني الرجال  هج ما نعرف اله مكان ....و حمل البيت عليه .... مرة مريضه ... عليه خدمتها هي وبتها لا وبعد بس بچي تأثرت نفسيتي ...وانه ماكله من العاشر ما عندي طلوگ قوي بس تشاليع ....
نومت البنات ورحت تعبانه .من السهر ما اگدر انام ...بس افكر بحسن وين راح وماجاي استوعب  ذني بس شهرين هيچ شون بحالنا دمرنا دمار وخاصه حسن كل يوم كارثه تطلع اله شصير يعني  مو جبل هو  ....

مر اسبوع وحسن ماله خبر ....بس يجون الي يشتغلون  عنده ...يجيبون النا مسواگ . ومن اسأل محد ينطي جواب شافي ...يلا المهم هو بخير  .... دا اكتر بالمسواگ وحسيت بوجع يكتل ... اريد اتحرك ما اگدر متت  موووت نفس وجعي من وسام رفس بطني و موت طفلي .. ضليت ابچي بالمطبخ على صوت بواچيي اجني البنات كتلهن راح اموت  امهن خاويه بغرفته راحن صاحن الها ...لبست عبايته وطلعت ...انه گلت هاي هي راح اموووت
دخلت ام شروق وجايبه وياها جدة ...
دخلني لغرفتي و ولدت ...ابنية خشنه ....
حمرة بيضه حطوها بحظني وانه اشتم بيها ... ما مصدگه هاي من عندي
بس اشلون ارتاح انه ...صار السقوط وصارت الهوسة بالعراق وسمعنا صدام شرد وبغداد سقطت ودخلنا انذار متت من رعبي من عرفت حسن ببغداد ....گلت راح الرجال .... ماتهنيت ببنتي يمكن لعنة قتل طفلة تهاني لحگتني الي !! ولحگت العراق كله  ادمر
ضلينا بنار .....من هدت الاوضاع  گالوا لا هو بخير جماعه من صحبانه مبشرين زوج اخته ...

ورة فترة مرت
بينت معالم بنتي كانت حمرة بيضه واعيونها زرگ راسه اول ماطلعت من بطني كله شعر اشگر .... ولادتي خلت تهاني اتگوم من وحدتها ...وتطلع من الي هي بيه خاصه ماعدنا رجال رجالنا  شارد منا  . ومن همنا  ..  بس اكو شي خوفني ما اگدر اصرح عنه فوگ ما المرة اساعدني وهو تگعد الي بنص الليل تاخذ الطفلة بحظنها واتگول الي نامي انتي نفسة ...
انه گلبي يلعب بس .. شسوي انطيها الها وما نام اگعد اراقبها .... شفتها اكثر من مرة من تگعد بنتي تبچي تنطيها صدرها !!!!!
لو تگعد تبجي واتلولي بصوتها الباكي لبنتي ...

فطرت گلبي حالتها بس شسوي . مرات غلطات مو بوعينه ادمرنا ...خاصه اني ابسرعه عذرتها ترة الشيطان شاطر ويعرف يجي للبني ادم ... والضعيف بينا من يسلم نفسه
بتي صار عمرها عشرين يوم ابوها ما شايفها هي خشنه ... تهاني ماتقبل اطلعها للنسوان خاف تنحسدت اتگول هاي اتبين بت الشهرين ..وحلوة خاف تنظر ....
وانه اسمع كلامها من غير معارضة ....
يدز النا مصرف حسن لكن هو اشوكت ناوي يجي النا ...!!! يعني معقولة اول بت الي منه تأذن براسها تهاني مو هو !!!!!
انه شنو ذنبي كرهني ويه البيت .. بناته شنو ذنبهن !!!!
شو نفاسي طول كل ما اسبح بعدني ما انظف ..
دخلت للحمام ويه ما دخلت انطفت الكهرباء  بالليل ... هذا الحچي ردت انام طاهرة بحكم الاستحاضة علمتني عليها تهاني وهي اغسل من الدم واصلي بعد عشرة ايام الولاده .. بس انه ما استنظفت نفسي توني قررت اصلي  ..
حسيت ببروده بوجهي  .....ونفس ذيچ اللمسات الساني انشل ماگدرت اگول  شي ....بس
گلبي چان يردد تسبيحات  ...اشويه ورجع كلشي طبيعي  قريت ايات وانه ميته خوف لبست ملابس وشردت من الحمام !!!
ورجعت معاناتي بس انه دوم اذكر عبارة حسن الطاهر  ماتگدر تتقرب منه الشياطين .. دوم طاهرة وبس احس بشي غريب اضل اقرة ايات ..
گعدت الساعه ب 11 باليل دورت على بتي ماكو
. چان بس ضوة النوم مفتوح وگفت يم الباب اريد افتح الضوة واطلع اشوف رقاوي بنتي يم خالتها ...وچان اشوف من فتحه جوة الباب رجلين صخلة وذيل يهتز ....!!!!!!!
علگت الضوة ...كلشي ماكو...چنت ارجف وگمت اقرة ايات رجعت فتحته ...رجعت الرجلين
اكو شي بداخلي يگلي ارجعي طفيه وشوفي شصير .. صدگ طفيته  ... وضليت اقرة الايات بصوت عالي كأنه اتحداه انه عرفت هذا ابو گرون من رجليه رجع يحوم عليه لان نفس رجليه ..  ضليت اردد شكو ايه حافظتها .وقريت اية الكرسي اهنا انفتحت الباب .... مالتي جمدت ....من شفته گدامي .. فتح هو الضوة .. وانه اباوع بوجهه ما مصدكه هو گدامي اجاني بالوقت المناسب
كان يباوعلي بعيون مشتاقة  ...
همست
- حسن !!!!!!!!!!!
ابسرعه سحبني وبقوة حظني ....ويقبل بيه من خدي ...
مكنت مستوعبه رجوعه الي
دفعته حيل  وصحت وين چنت
طلعت حرگه خوفي من ابو ك
گرون بيه
ادفع واعاتب .. 

يتبع
۔۔۔۔۔
عذرا على التأخير  وقتي لا يسمح لي التنزيل هنا
وفي الكروب نزلت الهم جزئين البارحه كنوع من الهدية لأني طلبت منهم طلب مقابل بارت اضافي اما هنا لا كل يوم جزء بعد التدقيق الاملائي ينزل