رواية خذ بيدي الفصل الخامس عشر 15 - بقلم زهراء العراقيه

من كتابات زهراء العراقية
تراتيل حواء
- ليش عفتنا ..... ليش ....
رد واعيونه كانت غارگة بلمعتها
- حمدلله على سلامتچ ...
- سلامتي اي سلامة هاي انه اشوف الموت بعيوني ....
- ليش يبعد الروح
- وتسأل ليش .... بعدك أذاني ...
انهاريت بحظنه
- على عيني . بس والله القصف فوگ روسنا وما اگدر ارجع انحصرت اهناك ...هسة وبالگوة وصلت سالم
لزمته من قميصه بأثنين أدية
- لا تعوفني ....حسن ابو گرون رجعلي .. بعدك ارجع تخبل
داواني بأبتسامته الي دوم أطمني وگال
- ياحيف يرجع والسيد اهنا
رجعت ضميت راسي بصدره العريض
- ما اشتاقيت الي ...
- اشتاقيت الكم اشتاقيت لبناتي العشرة !!!
رديت  عليه مستنكرة
- شنو حسبتني وياهن
رفع وجهي من حنكي وباوع بعيوني 
- انت بتي اني ربيتچ على ايدي
بدلال وعتاب
- جبت وحدي........ انت مو يمي حسن .... ما شفت بنتك ما نيمتها بحظنك 
- غصبا عني والله 
هدى
- هاااا
- انتي وسط الگلب والله .. 
حاوطته بأدية من تحت اديه  وباوعت لعيونه الي الشوق ضاهر منهن انه لا اعرف بالحب ولا اعرف اسولف عنه لكن بين اديه ولا ودي انزل عيني عنه احسهن يفهمني وافهمهن
- خفت لا الامريكان يقصفونا واني ما شايف ثمرتنا ... التفت للسرير مالتي ... ما شافها .. راح للكاروك خشب متين .. تهاني طلعت اشترته الي هو والجهاز لكن بعد ما ولدت ،،،هي الا ولدت الا رجعت لبيتها ولحياة بناتها  ...
ما شاف بته بالكاروك
- هدى وين بتنا ؟؟؟؟؟؟
- ها ا ا يم يم
عقد حاجبه.
- يم ام شروق هسة اجيبها
.عصب حيل
- اشلون اتخليها يمها
- كل يوم هي تعاوني بيها لأن ماتنام بالليل ابد ..
- روحي جيبيها
ركضت ..شفت تهاني نايمه ومحاوطه بتني بالمخدات لا توگع .. سميت وشلتها ...ورحت لغرفتي لگيت حسن مطروح ...گام النا اتلگانا
سمة واخذها مني كانت مطلعه ايدها من القماط  وحاطتها بحلگها تمص بفطرية بيها . هي متفحه . ارضعها طبيعي ... ابعد اشوية الگاورية عن وجها ..وباسها .   وشمها من نحرها صدگ ريحتها  ولا تنمل .  ولا يگلك بعده اربعينها   ما طالع ... اذن يم اذنها !!!
سالني
- شنو سميتيها
- ام محمد گالت سموها رقية حتى انت تفرح .
كانه ما عجبة الي گلته ..!!
- لا ....ما اريد رقية
- بعد طلع بيانها
- يتغير ...ما اريد ... رقية محد ياخذ اسمها .....كل ما اصيحون الها تجي هي بالي ....
باوع لبتي وباسها
- حرامات هاي الحلوة من اشوفها احزن ... هاي بدر منور ....ما شاء الله طالعة عليج ..
- هههه رحم الله والديك ..
- شمس ..  اسمها شمس على هذا النور الطالع ..العلوية شمس
گام حطها بكاروكها ورجع الي
- ام شمس ..
- ها
- تعاي غيري الي ملابسي
رمشت بعيوني
- شنووو!!!!!!
وگف وصرت خلفة ...
-باوع للمراية وگال
- هاي شنو لحيتي ..
- لعد توك شفتها
-هو اهناك اكو مراية لو اكو بال صافي
- ههههه بس حيل لايگة الك حباب لا ازينها
- لا ما احبها
- لا حباب خليها طالع رجال
خزرني ....وانه ضليت اوت وت !
- ا ما ما اقصد انت   .... اقصد انه
قاطعني بنهر
-شنو هي الرجولة باللحية .....تعاي لعد اشوفچ
الرجولة على اصولها !!!!
هو يهددني مايدري انه ميته من لهفتي علية
،
الصبح محد يدري بحسن جاي ...سمعت صوت الباب انفتح گعدت ...وچان اشوف تهاني  انصدمت جايه كالعاده اشوف شمس لا گاعده ...
شافتني بحظن حسن محتظني بأثنين اديه وحده جوة راسي والثانية فوك متني وانه منطيته ضهري ... عدلت ثوبي الحليبي
وهي استحت طلعت ...مدري استحت مدري اختنكدگت بعبرتها ... اجتني ريحة البورگ المقلي عرفت تهاني دا اسوي لحسن .. گمت انه رضعت شمس وعفته نايم ...
..
البنات فرحن برجوع ابوهن الي ما طايق يگعد يم تهاني بنفس المكان  وطلب مني اسوي اله ريوگ ثاني ماقبل ياكل من اكلها ..!

ذيچ الايام مرت صعبة على العراقيین اجمع ... حتى اثرت على شغل حسن .. هو يتاجر بالمواد الغذائية چان ... هسة انفتح الحصار واختلف الوضع ... اما علاقته بيه صارت علاقة احتياج من الطرفين  ۔احسه يحب احتياجي لوجودة الدائم واني ماعندي غيره ...حتى ضعفي احسه يحبه !!!! ...صار ياخذني بيدة لشيخ مبروك ...نگعد يمة يقرالي ... و البس حروزة ..
وكل خميس ياخذني يزورني لمرقد معين  ..ما خليت ضريح ماتوسلت بيه ياخذ بايدي رب العالمين ..وما يرجع الي السوء ...

ومرت ثلاث سنوات .....

2006

كانت تروح شمس لخواتها تخبث وترجع الي تتمضحك ... هي مربربه وكصايبها رفاع  همزين شعرها سرح على ابوها  بس اشقر علية واعيونها زرگ بلون السما..ولابسه دلاعي مخطط بنفسجي وابيض ..
انه چنت حاطه الموبايل واحاول اتعلم للعبة جديدة ...
و تهاني تطبخ  الغدة .
شروق  اخذها ابن خالتها الي ببغداد ازوجها .. و الباقي بعدهن يدرسن . عذراء دخلت جامعة  .. 
تهاني بعدها الكل بالكل بالبيت هي دايرته حتى انه دايرتني واتگلي شنو اسوي ... بس شي واحد ماتگدر تتقرب اله ...وهو رجلها !... حتى كلام عادي ما بينهم  ..چنت احس حسن قاسي ...واخاف حيل من زعله لأنه مر ...  مرة ردت ادخل من كيفي واصلح بينهم ...
چان يشرب چاي بالهول ويباوع اخبار ..
- ابو شروق ...اريدك بموضوع
-امري ام شمس
- اگول انت مو اتگول المسامح كريم
- ههههه قابل  هي مقولتي ...شرايده هداوي
- ما اسامح تهاني والله خطية شايلتنا........
سكتني بنظرته
حط الچاي
- لا اكملين وروحي من گبالي
- بس انه
- اش روووحي
- اشبيك حسن غير نحچي
صاح
-  هدى
گمت من يمه وزعلت بيومها ...
على العشة وجهي ثگيل وياه ..وما دار الي بال
بغرفتنا  انه عرفته راح عادي عنده زعلي وما يراضيني وانه اريد انام بحظنه متعوده .. اوف حاط شمس ويلاعبها ....
صحت بشمس
- روحي لعذراء تنيمچ يلااا
خافت شموسة وراحت انه معودته اتنام يمهم ...هو انطاني ضهره ....رحت بلعت الحبوب  مال النفسي ومال منع الحمل هم
لان حملي صعب انه عايشه على المهدئات
.. اتحلفت بيه فوگ ما يصيح عليه يعوفني ..اه من قساوة زعلك ..... طلعت من كنتوري ثوب ازرگ ... ولبسته كان مدلع ...ولطخت نفسي   
وگعدت على كرسي التسريحه البس بالبتوت واطلع  بيهن صوت حتى اجذب نظرة ...
شفته اصلا ما يباوع ....اوف بس هم بسيطه رحت من گباله ..سويت نفسي اريد احط محبسي على الميز و وگعته طبعا متعمده ...  ودنگت منطيته   ضهري   ...ورحت لفت للجهتي انام بس على كيف .. ..
انطرحت وانطيته  ضهري ....مستغلة نقطة ضعفة ....واحسة التفت علية ...جرني اله ...
-روح زعلانه ۔۔۔۔۔۔۔۔مااا هي گوة !!
- ليش لابسة لعد دتعاي انتي مستحية
باسني وضحك عليه حتى ما راضني

انمد راس علينا انه ناسيه اقفل الباب
- شفتكم ....
العينتين شمس مادته وتتمضحك  ...
ابسرعه اتغطيت واجتي يم ابوها ..شالها وراح ...
رجعلي بعد ما وداها  ...
شافني لابسة ثوب بيتي وونايمة مخبثة
-هاي شنووو
ضل يدردم وگال بسيطه اني الج .....
- راح اطلع هسة ازوج زواج متعه ....وارجع
سد الباب وطلع

انه وراه رحت ... .وصل لباب الهول
- تعااااال حسن ....جذب عمي تعااال 
كان لابس دشداشة
- رايح اني زعلان  ....ازوج وحده ما تتزعل ..
ضجت - تعال ما زعلانه
شفته يريد يطلع صدك
طبگت عندي شلت ثوبي
- والله راح انزع اهنا ...
رفعته وطلعت الازرگ ...
وهو اجاني مسرع .. دخلني وقفل الباب وهاي دوم هيچ يضحك عليه ...اصلا چان يريد يدخل طيور الحب مال عذراء برة القفص وبالليل يدخله من خرب عقلي الي ابسرعه يصدگ .....
بعدها خبرني ليش كلش قافل على تهاني ...
تهاني ... كانت حب عمره    ازوجها وما رهمت مع امه طلعها ببيت وحدها بأجار واحتار بينها وبين امه وخواته ...لكن ما گعدها يمهم حتى ترتاح  ..  وشنو اتريد هو ينفذ  حتى صارت اشوف نفسها عليه هءا الكلام ما گالة بطريقة مباشرة لكن انه فهمتة ...
گال متأسف
-  من شكيت بيها بالبداية كنت اشوف الندم بعيونها ودليلي يگول الها ايد بس من شفت نفسي اخسرها بمجرد شك .... رجعت واتعذرت منها وهي قبلت اعتذاري بعين گوية ..... ما حست بذنب واني اتوسل الله يسامحني إذا اذيتها . تالي العقاب صار النا اثنينا ...لاني مغفل ....ما اگدر اباوع بوجهه بعد يا هدى عوفيها للزمن اهم شي بناتها مايعرف .....
؛
بأحد الصبحيات ... حسيت بدوخه فضيعة ... رحت لعرفتي اسطحت اجتني رغبة بالنوم كبيرة رغم اني ما صارلي ساعتين من گعدت !
- اوف انوب حسن راح يجيب عمتي اتريد تجينا .انه ربع ساعه من ياخذني الها ما اتحمل اگعد مو انوب اظل كم يوم  .  تهاني راحت لهلة اوف هنيالها عدها اهل من اضوج اتروح الهم . الا اني .  ماعندي لا اب ولا ام ولا اخ اروحلة ...... انه اذا زعلت وين اروح ؟
همستها بصوت مسموع ... وانه مطية ضهري للباب
باسني احد على خدي  وگال
- لگلبي ... اشحده حسن يزعلچ
ضحكت گرگشني بأنفاسه
التفتت عليه
- اجيتوا
- اي اجينا . روحي سلمي على الحجية
- صار ..
گمت بالگوة عن فراشي ولا ودي اگوم ..
شفتها گاعده بالهول اتبوس بحفيداتها
- السلام عليكم
- ااح وعليكم السلام .. بوستها ..
وگعدت
- زهوري گومي جيبي لبيبي ماي
عمتي
- عوفيها يمي ما اتگومين انتي ولو ذيچ العوبة عايفة بناتها وانتي مشتغلة عليهن بدور مرت الأب
مارديت عليها ... رحت جبت الها الماي .... ورجعت ...

-ما عطشانة
-!!!!!!!

- نايمه للضهاري ما تگولين عندي بيت . الله يرحم ايام الحيل  من چنت بگدچ .. اتعارك وي الشغل عرك .. عندي حسن بس يبچي اشيله بيد وتك ايد اشتغل واخته محاسن توها توها تمشي حركه واعيالي عشيره كلهم اخدمهم انه
اگعد من الخمسة لليل انه اشتغل ..
ابتسمت ما گلت شي ...
گمت اريد اسوي غده .. 
عفت شمس يمهم اتخاف من بيبتها لان ماعدها اسنون ! واصلا هي ابد ما تقرب شمس الها وحتى البنات من امهن موجوده ولا اتقربهن الها بس هسه شفتها تبوس بيهن من امهن ماهية  ...
نسيت الگلاص اهناك خل اروح اجيبه خاف شمس تبدي الماي وشيخلصني من بيبيتها    اوف حسن جابها وراح للشغل ...
من دخلت شفتها حاطه شمس واشمشم بيها
- يابرصة باوعي الي
شمس مغطيه وجها ما تحبها
من شافتني عمتي نزلت شمس عن حجرها
- بتج فاهية مثلچ
ما حچيت شي غريب امر هاي المرة اشگد عكرة هسة اكو احد يعتب عليها اذا حبت بنات ابنها ليش گدامنا تگلب عليهن ما اعرف ....
- تعاي شموسة وياي
اخذتها ورحت للمطبخ ...
اجتني فاطمه
- خالة خلي شمس تروح وياي لبيت صديقتي
- ليش .!؟؟
-ههههههه گلتلها عدنا اخت شگرة ما صدگت اريد اتباها بيه
صدگ لا گالوا الگرعه تتباها بشعر اختها
اجيت ارفض لأن ابوها ما يقبل ابد تطلع شمس ويه بناته بالفرع  يگول مميزة والمميز معرض للحسد ..
بس توسلات شمس وهي اجر بذيال ثوبي وماده عنگها الي حتى اوافق كسرت خاطري حيل ...ذكرتني بروحي من اتوسل بأمي اطلع ويه ابوي .  وهي تدفعني اذا جريت اذيالها وماتقبل اتگوله تنحسد
-خاله وين صفنتي حبابه شوفيها هي اتريد اتروح
- يلا اخذيها بس لا تتأخرن خوش
-اي
ركضن لبرة
فاطمة صار عمرها تسع سنوات محجبة من غير عبايه وناعمه  سمرة على امها بس احليوة
رقية چانت تشبه ابوها الله يرحمها .. وشروق ماخذه من الاثنين وعذراء نسخه من خالتها ام محمد لهذا هي قريبه  عليه حيل ......
طلعن وانه نسيتهن التهيت بالطبخ تشريب دجاج وتمن وعليه شعرية .  ورحت طلعت العجين . اشنگ حتى اخبز ...
البنات عدهن دراسه وامهن ما تقبل يشتغلن ابد بس ملابسهن وغرفتهن ينضفنها وشايلات خواتهن الصغار من سبح وتنظيف وانه هم مريحاتني .  بأمور شمس هم ينظفنها و يمشطن الها ... چانن يموتن عليها وهي مدللة وطالعه عينها اشوية انوب ابوها منطيها مجال 
اقل كلمه اتروح اتوصلها اله ..اصلا مكان اكو اسرار بالبيت بسببها شگول واحد منا اتروح اتوصلها ...
چنت بالحديقة اخبز وعمتي حاطه كرسي وگاعده الي
-اشماله خبزط بيه حواف
صفنت عليها
لحد الان اكلت گرصتين وتعيب اووف یاربي
رجعت اخبز
- حاطه مخده وما مدبرتها انه چنت گبل بأيده ارع الشنگه بالتنور
هي تحچي وانه بالي مو يمها اصلا ...مغلسه .. بنتي اتأخرت حيل .. اوف منچ فطومه عود كلتلچ لا تتأخرين .. ....
خلصت خبز ورحت اركب التمن ... صاحتلي عمتي
-تعاي جيبي الكرسي ورايه
.....

حطيته بالمطبخ وهم فوگ راسي تعقب على الشغل
تمنچ ماصخ ..
- عود احطه ملح من ابزله
چان بعده يفور بالجدر وادري بيه بعد يتملح اكثر لان بعده ممستوي ...
خلصت ورحت لغرفتي .  اكترها دعيت الله لا تجي ورايه ...
وجان تدخل . خرب حظي .
- يااااا جايفة انتي طلعتي
گالتها بفهاوة
- ليش هيچ
صفنت انه
اشو بس الشرشف مخربط واشويه تراب ع ميز التلفزيون ...! ودا اعزلها يعني شي طبيعي هيچ
عدلتها وهي ادردم وتحچي بطولاتها وانه مغلسه ...
رجعت شمس تبچي
- ما علية ما عليه
وتصرخ بعلو صوتها
فاطمه
- والله ما سويت الها شي
فضحتني يم ابو حازم اتريد تاخذ ست مصاصات واني ماعندي 
- مااااااا اريد
دخل ابوها ..وكان محمل بالمسواگ اقصد مواد غذائية هو يجيبها او يدزها بأيد احد...المخضر تهاني تسوگ مال ثلاث ايام وانحطه بالمجمده والثلاجه ....
روحي ياشمس وابچي يم ابوچ تبغج يگلك كاتليها
حط الغراض بالحديقه حتى مادخلهن وشالها يمسح بدموعها
انوب هي لازمه المصاص الي بربعها مشتريته وجبس  ربع فاطمه وما قابله !
دخل للهول وسألني
- اشبيها شمس
هو يعرفها تبالغ لهذا حتى يراضيها يخشن صوته ويسأل عن السبب ويراضيها كل مرة هيج يسوي

عمتي
- غير مرتك هاي الفاهية مسيبه البنيه ببيت الجوارين . مدري كاتليها  مدري جوعانه من الصبح لهسة
صحيح هنه تأخرن ساعتين ببيت صديقتة فطوم بس انه اعرفهم ماعدهم اطفال بتهم بگد فطومه وناس طيبين
اعيونه صارت بگصته هو محرص عليه لا اطلعها
ضليت ابلع بريگي انوب جاي تعبان وطالعه روحه
بلهجة محذره
- كم مرة محذرچ لا اطلعيها يم الجيران
ضليت اوت وت
- والله و الله بس لبيت ام مهرة ما تأخ.....
سكتني
- اني محذرچ لو لا ؟.....  حدها للمحل يشترون الها وترجع ...  مدري توگع مدري تنجرح بشي موصيچ اضل بين اعيونج لو لا

ورزلني ذيچ الزراله المعدله اجت دمعتي تطلع وعمتي تتبسم فرحانه اااخ يا ويلي ..  فاطمه گامت تبچي .... لان هي السبب انه اخذتهن هي وشمس ورحت  لغرفتي  شيخلصها ويه عمتي ...
على الغده بس تعيب ...
-ماااالح حيل واني عندي ظغط
صفنت عليها هي شالت الملح وحطت للتمن اصرت اتكول ماسخ
حسن
- شدعوة هيچ اكلج ما موزون احط ميزان بعيني وما ازود
هم ترزلت من ورها حتى عاشت اديچ كل مرة يگولها ما گالها من عيبت .....
سويت چاي . هم عيبت گالت مجفت  ...
...
بعد العشة طلعت فواكه واكلت چانت نفسي دانية على التفاح اشم بيه ريحته طيبه هالمرة ؟ واكل بيه بتلذذ بالمطبخ  .... دخلت علي عمتي باوعت الي صفح وشربت ماي وراحت يم حسن چان مطروح بغرفتي تعبان .....
من خلصت گمت انه رحت للغرفة
اجاني صوتها
- علم مرتك عيب تاكل واضمضم شنو ما شايفه والله عيب من شافتني ضمت التفاحه
ردت ادخل حجرت رجليه انه يمتى ضميتها ؟!
-وتتختل بالمطابخ شنو ماكله من الخلفوها ..
حسن ساكت وهي تلح گاعده على طرف السرير واسمم بيه
- ما شايفه خير هاي ... تهاني اشگد حقيرة بس بت خير ...مو مثل هاي جوعية اشمشم بالتفاحه ....
حزت بنفسي وطلعت ما دخلت ..انحرجت من حسن هسة شيگول علية
الا شفتها طلعت الا رحت لغرفتي ...لگيت حسن نايم اضاهر غافي على جرايد امه .....
ردت اغفى حسيت اكو حركه ...
-اوف حسن تعبانه .. 
- تعاي اريحج
- لا روح حباب
اووووف
دفعته حيل استغرب مني
ورحت اتقيئ ما حامله ريحته ..  گعدت يم السطل ابچي ... بس لا حامل ..  حسن ما يقبل ما يريد طلع من ورايه انه انسى اخذ الحب واعراض الحمل كلها عندي ..... ما راح اگول اله احسن
مسحت دموعي وگمت لگيت حسن فاتح الضوة وينتظرني ....
- وين چنتي ؟؟؟؟
ساعه صارلچ ...
- ها . چنت ... بچيت
انه يمكن حامل .....
ضليت امسح بطرف ثوبي بدموعي
- والله هو وحده صار انه ما عليه
شفت ابتسامه مريحه بوجه طمنتني مراح يعصب عليه
- تعاي هداوي تعاي ...
گرصني من خدي
- ليش دوم تنسين تاخذين الحبوب 
اني غير خايف عليچ لا اضلين تتخربطين من غير علاج .
- اخر مرة
- هههههه ولچ شنو اخر مرة بعد صار ... باچر حللي شوفي
- خو ما اخذتي حب هسه
- لا
- تعاي لعد خل اسولف الچ سالفه
ضحكت
- ما اريد سوالفك حفظتها
جرني
- دتعاي 
دا نضحك انه جذب حيل مشتاقه اله بس ادلل وهم ريحته صايره ما اطيقها 
ندگت الباب وانگطع ضحكنا 

حسن
-شمس روحي يم خواتچ ابسرعه ...
- انه امك سيد
تنهد وضل يحك بلحيته كأن مزاجه تعكر انه هم على العناد شلت ثوبي عني وانطرحت عنادا بعمتي
من شافني هيج سويت توتر وگام
- بعدين بعدين يمه ..نامي نامي ...
وخلع ثوبه واجاني تارك امه إتگول
-اني اخاف انام وحدي تعال يمه يمي
- روحي يم البنات سولفي الهن سالفه  ..اني عندي مرة راسها يوجعها اريد ادهن اضهرها
ضحكني بصوت من حشش عليها
واخذتة بليلتها بأحظاني مو بالحيف ارجعه بعد لأمة  !!

يتبع

مسائكم قرنفل ....  اليوم راح ينتهي اشتراك الانترنيت
ما اعرف شنو قضية النت انشر وما يوصل الكم !
التقي بيكم من افعل مع احر التحيات ....