رواية خيِّال ومُهرة الفصل الحادي عشر 11 - بقلم amna

«بسم الله الرحمن الرحيم»

«خـيَّـال و مُـهـره»

«آمـنـه عـادل»

========

«لا تنسون التصويت آغاتاتي»

«اللهم صلِّ على محمد وآلِ محمد»

♡ـــــــــــــــــــــــ ♡

تدري وهمه ما يدرون
تدري بـ كل قهر بيه
شكثر ومنين والمن وشوكت وشلون
تدري وهمه ما يدرون
احبك يَـ الشفتني ابجي بدون عيون .

«روسلينا»

ما حسيت الا انفتح الباب ودخل علي تجمدت
بمكاني حتى ما غطيت نفسي من الصدمه..

دخل ما رفع راسه سد الباب ورفع راسه
وشافني وبقى متجمد..

هذا كله بـ ثواني..

دار وجها وطلع بسرعه واني لبست ملابسي و ردت اطلع..

بقيت واكفه بالباب شلون اطلع..
والله فشله اديه گامن يرجفن واحس
بنفسي تخربطت احوالي وما جاي اسيطر
على رجفتي ابد..

طلعت لگيته واگف بالباب..

ــ اعتذر بس انطوني هذا الكارت ومكتوب هذا الرقم
ودخلت مادري صاير اشتباه ومطينه نفس الكارت...

ولا رفعت راسي..

ــ تمام.. هسه ننزل اخذ غير كارت؟

ـ لا ابقي بهاي الغرفه اني راح اروح الغيرها..

دخلت بسرعه وسديت الباب وبقيت بالحجاب..

كل شويه يرجع ينعاد الموقف ابالي واغم گصتي على المواقف المريت بيها ويه علي ولا واحد بيه خير والله عيب...

اندگ الباب رحت فتحته لگيت علي..

ــ جنطتي جايبهيا هنا..

ــ اي...

فتحت الباب وهو دخل اخذها وطلع..

ثاني يوم من الفشله ولا باوعت عليه صورنه وحتى ما حچيت شي وياه..

رحنه كل الموجودين المطعم و هم يسولفون وياكلوون ويشربون قدملي استاذ هاري گلاص بيه مشروب..

ــ لا... شكراً..

ــ لازم انتِ تشربين... لان هاي الگعده كلها على نجاح تصويرچ..

ابتسمت وهو يجي منا ويروح منا سكران

ــ لا اني ما اشرب انتو استمتعو بوقتكم..

قرب الگلاص الحلگي يريد يشربني وهو ميت ضحك استغربت من جرئته..

ودفعت ايده بقوه و وگع الگلاص وانكسر وصار هدوء والكل گام يباوع علينه..

ــ شلون تتجرئين؟؟

وهجم عليه يريد يضربني و ما حسيت الا علي لزمه من ياخته وشمره بالگاع وراد يروح يضربه..

لزمت سترته من الردان مالته وگتله واني مختنگه..

ــ علي عوفه خلي  نطلع منا حباب...

هز راسه واخذ جنطتي وسحبني من ايدي والكل مصدوم من الصار اول ما طلعنه من المطعم نزلت دموعي..

مشينه شويه ودار عليه علي..

ــ لا تبچين.. خيولي هذا القندره اذا ما اطيح حضه واخلي بالسجن...

گعدت على الرصيف..

ــ ياربِ... ليش كلشي صعب مر عليه بكوم و اني حياتي هنا بكووم... شگد ما چنت فرحانه احس هسه جاي تخنگني..

ــ لا تحچين هيچ، هذا الحيوان راح يدخل للسجن واخليهم يسحلونه سحل...

ــ وانته؟؟

ــ اني؟؟ گعد بصفي وگال

اني شمسويلچ روسلينا؟؟

ــ كل المواقف التفشل صارت وياي انته چنت يمي گمت حتى استحي اباوع عليك من گد الفشله..

ــ شبيچ ياابه تحچين صدگ؟؟

ــ اي والله.. احس بنفسي ماعندي احد هنا و ما چنت افكر بهاي السوالف قبل لا اجي چنت متأكده كلشي اكدر اسويه الوحدي..

بس طلعت غلطانه ..

ــ اني وياچ بكل شي... لا تخافين من شي...

ابتسمت بحزن وگتله..

ــ حتى انته تمل... لازم ارجع للعراق بعد ما اگدر...

ــ روسلينا اكو واحد يمل من شخص ينتظره يحچي وياه...

لا تگليلي ارجع للعراق اني ما اگدر بدونچ.. لا تعوفيني..

استغربت من الحچاه وبنفس الوقت گلبي تخربطت احواله وبقيت صافنه عليه وهو عيونه تتنقل بوچهي وحتى ما رمش..

ــ شنو جاي تحچي؟؟

ــ اني وگع گلبي بيچ...

اني احبج..

ما بينتله شگد هاي الكلمه خلت جسمي كله يرجف وما مستوعبه شلون هيچ صار بيه...

ــ شوكت حبيتني؟؟ صار 5 اشهر من عرفتني وحبيتني؟؟

ــ تدرين الصدگ
حتى اني مادري بروحي شوكت تعلقت بيچ وحبيتچ..

اول يوم شفتچ عجبتيني بس گلت ما معقوله توصل الحبچ..

واريدچ بكل تفاصيل حياتي وياي...

ــ لا علي... لا اني ما اگدر..

گعد گدامي وگال

ــ ما اريد تحبيني هسه بس اريدچ تنطيني فرصه..
اني بحياتي ما ضعفت..

اول مره احس بهذا الضعف يمچ...

ــ اني ما اگدر...

گام بسرعه مسح وجها وحچه بصوت اعلى..

ــ شنو المتگدريله روسلينا شنووووه؟؟

ــ انته كلشي متعرف عني..

ــ انتِ گليلي علمود اعرف... رجع هدء وگعد يمي..

گعدي فكري لا تنطيني جواب هسه برئيچ الحياة لزم تنطينه فرصه..

وانتِ فرصتي بهاي الحياة...

گعدت ساكته بس كلش تأثرت بحچيه وتمنيت اني المريت بيه قبل كله ما موجود..

واحبه صدگ ويحبني واعيش شعور الحب العمري ما حاسه بيه...

بقيت ساكته مرت نص ساعه واحنه گاعدين على الرصيف..

ــ يلا تعالي نرجع..

ــ وحدنه؟؟ منرجع وياهم..

ــ انعل.... لا تخليني اغلط عليهم... نروح وحدنه

أجر تكسي و رجعنه للبيت من وگفنه باب العماره گالي قبل لا انزل..

ــ لا تنسين تفكرين بالموضوع...

هزيت راسي بـ أي ونزلت..

احلى شعور حسيت بيه خلاني اطير من الفرحه..

وبنفس الوقت اكو شي بداخلي يخاف من الحب ومن الزواج..

وبالأخص من الرجال كلهم...

دخلت للشقه شغلت اغنيه و گمت اطفر على السرير واني الضحكه ماليه قلبي..

ـــــــــــــــــــــــ

«آسيا»

كل الم بالدنيا ما يعادل الم قلبي...

اتصل عليه..

ــ الو.. هلا مهدي

ــ هلا بيچ..

احنه الچنه نحچي بحرارة الحب
صارت سوالفنه فاهيه وما بيها لون..

ــ ما اگدر اجي..

ــ ليش؟؟

ــ ابوي ماقبل رادني اروح البيبي واني يمها هسه..

ــ هاا.. ردت اشوفك.... لاخر مره.

ــ ها هيچ... يعني هاهيه..

ــ اي..

ــ تخليتي عني؟؟

ــ انت همين تخليت عني... تگدر تجي تخطبني ومتخلي واحد ثاني ياخذني ويدمر كلشي..

ــ ها نوب صرت اني..

ــ ليش تريد بس تذبها براسي، ترى اني نظلمت اكثر منك..

ــ يلا آسيا روحي ما منه فايده هذا الحچي...

ــ هاي اخير مره نحچي..
باچر الخطبه..

بقه ساكت شويه واني دموعي تنزل بلا صوت...

ــ تمام... تتهنين..

سد الخط واني متت من البچي الحد ما نمت..

گعدت على صوت امي تصيح گمت رحنه للصالون ولبست فستان بسيط لونه بيجي..

باوعت النفسي بالمرايه طالعه كلش حلووه
تمنيت هذا كله اله ملابسي مكياجي فرحة اهلي..

تدمر كلشي بنيته
كلشي حلمت بيه
ماچنت انام ليلي اذا ما اسمع صوته.
وافكر بيه..

ما چنت انام اذا ما افكر بعرسنا
وشلون نلزم ايدين بعض ونمشي واني بالابيض..

كله راح بكلمه وحده...

رجعنه للبيت متروس ناس حتى اهله جايين..

گعدت على الكرسي وبنات اجو سلمو عليه واني حتى ابتسامه ما اگدر ابتسم..

الحد ما غطوني واجه الشيخ و هو وياه والرجفه
الصارت بيه ودموعي التنزل سئلني الشيخ ٤ مر. ات
واحس صوتي ميطلع مني.

ــ نعم...

وهنا انتهت قصة حب..
وبدأت اخرى...

ـــــــــــــــــــــــ

«ديار»

گاعده بالصاله وامي و بابا وراشد يمي نسولف
ونباوع على التلفزيون..

امي: اكلك عيني ابوعلي اتصلت عليه اختك نور گالت تعالونه هسه البنات متجمعات كلهم تعالو تعشو يمنه..

بابا: غير باچر الخطبه وترحين..

ــ اي بس گالتلي تعال نرتب كم شغله..

ــ براحتچ خلي راشد يوديچ..

ــ ديار ترحين؟؟

ــ لا ماما، ما اروح..

ــ يلا براحتچ باچر نروح سوه..

ــ حتى باچر ما اروح..

ــ ليش عيب شنو مترحين غير خطبة ابن عمتچ..

ــ انتم ترحون كلكم منو راح يتذكرني..

ــ لعد تعالي هسه اذا باچر مترحين..

بابا: اي روحي هسه وباركيلهم احسن..

ماحچيت شي ورحت بدلت ونزلت..

طلعنه واحنه بالطريق گتلهم..

ــ مو تطولون اكثر شي ساعه..

وصلنه للبيت وفتحو الباب ودخلت ماما و راشد و وراهم اني شفت مالك..

ــ هلو خويه شلونك

چان منزل راسه من گلت خويه رفع عينه باوع عليه..
اني تعمدت اگله خويه اريد صدگ يصير مثل اخوي وما افكر بيه غير شي..

ــ هلا ديار...

دخلنه و گعدت يم البنات وكل واحد يسولف شكل
ناس تگول البنيه تخبل ويباعن بصورها
وناس تگول تعرف عليها بالجامعه..
وناس تگول صارله سنتين يحبها وراح يتزوجها..

كلش اختنگت عفتهم وطلعت بره بالحديقه اكو طبله وكراسي گعدت على الكرسي ودموعي تجري لشوكت اني ابقه افكر بيه...

انصدمت من گعد بصفي بسرعه مسحت دموعي..

ــ شلونج ديار ؟؟

ــ الحمدلله..

باوعت عليه لگيته مخلي الجگاره بحلگه ويشغل بالجداحه من اشتغلت قربها على الجكاره..

بقيت گاعده 5 دقايق و طلع راشد صاح عليه نروح..

واني گمت وگتله..

ــ الف مبروك مالك.. ان شاء الله التوفيق..

ــ الله يبارك بيج.. شنو باچر متجين؟

ــ لا ما اگدر اجي اجيت اليوم حتى اباركلك..

ــ شكراً عيوني...

طلعنه رحت للسياره و هو واكف يسولف ويه راشد ملامحه ما چنه فرحان بس يمكن اني اطلع حجج النفسي..

بقيت اباوع عليه الحد ما صعد راشد و مشت السياره ردت اشبع منه لان اخير مره راح اباوع عليه وهو ممتزوج انتهى كولشي وهو بعده ما بادي

وصلنه للبيت واني مختنگه ما ردت اگعد الوحدي..

وديت على حلويات اخذتهن و رحت المُهره..
دگيت الباب فتحه ياسر..

ــ هلا بالروح والريه..

وفتح اديه تقربت عليه وهو ضمني الصدره..

ــ انتَ حبيب روحي..

اكثر شي محتاجته واحد يضمني بحنان مثل ياسر..

ــ وين مُهره؟

ــ بغرفة الرياضه..

رحت لگيته لابسه ملابس الرياضه ورافعه شعرها طالعه تجنن..

ــ على كيفچ ويانه عيني منتحمل هيچ جمال..

ضحكت واجتي يمي باستني..

ــ شوكت اجيتي؟

ــ هسه دخلت..

ــ ها، راح اسبح واجي..

ــ تمام راح اگعد يم ياسر وجبت وياي حلويات
حتى نباوع فلم..

ــ عاشت ايدچ يالحب

رحت گعدت يم ياسر..

ــ وين چنتي.؟

ــ رحت ويه ماما البيت عمه ام مالك..

ــ ليش؟؟

ــ بابا گالي روحي وياهم لان عيب باچر ما اروح وياهم للخطبه..

هز راسه ولزم موبايله واني طلعت فلم واجتي مُهره لابسه بجامه وتيشيرت وشعرها مبلل ومفتوح طالعه تجنن شويه سمنانه ..

ــ شني عمي صايره تخبلينن شيوكلچ اخوي...

ياسر چان يباوع بالموبايل رفع عينه باوع عليها
ابتسم و رجع باوع للموبايل..

اجتي گعدت يمي وشاورتني..

ــ موكلني خ**..

اني متت من الضحك..

ياسر: ترى سمعتچ...
هي حتى بيضه متعرف تسوي كله اني اطبخ..

مُهره وجها صار احمر واستحت كلشي ما حچت بعد..

بقينه گاعدين اني و مُهره وياسر راح نام..
صار الوقت كلش متأخر يلا نزلت..

ـــــــــــــــــــــــ
«مُهره»

گعدت ثاني يوم متأخره لان سهرت ويه ديار اول ما طلعت للصاله لگيت ياسر گاعد ومخلي على رجليه لابتوب..

ــ طلعت نتائجكم...

ــ صدگ.. مشيت بسرعه گعدت بصفه

ــ طلعت نتائج ديار؟

ــ اي.. معدلها 90

ــ يممه... الحمدلله...

ــ هذا اسمچ تقربت باوعت مكتوب المعدل 93..

گمت وگفت على حيلي واني اطفر و فرحتي ما واسعتني اندگ الباب عرفتها ديار رحت بسرعه فتحت الباب و بسرعه ضمتني وثنينه بچينه من الفرحه..

ابتعدت وراحت الياسر همين هو گام وضمها الصدره..

ــ تستاهل دياري... والله اني چنت متأكد منچ حترفعين راسي...

ــ شكراً حبيب عيوني..

صار شگد ما فرحانه ولا حاسه بهذا الشعور..
حسيت رب العالمين عوضني عن الفات كوله بهاي الفرحه..

مر يومين گعدت قبل الشروق رحت للسطح گعدت اباوع للشمس شلون تنور الارض بعد الظلام الچان بيها..

اريد تشرق الشمس بحياتي الظلمه مثل ما تشرق للأرض..

رحت لعبت رياضه ساعه و رحت سبحت و لبست ثوب جوه الركبه ومخصر على جسمي وبيه چاكات اول مره البسه مشطت شعري وعفته مفتوح ولبست روب لان ضيق الثوب كلش..

وطلعت لگيت ياسر نايم وتذكرت من گال الـ ديار اني حتى بيضه ما اعرف اسوي..

رحت للمطبخ اني صدك ما اعرف اسوي بيضه لان ما احب اطبخ بس من حچه عليه گلت بعد اريد اتعلم اطبخ...

نزعت الروب لان شويه ردانه عريض يضوج وخليت القوري على النار هم زين اعرف اسوي چاي..

اخذت بيضتين من الثلاجه وطلعت الطاوه وطگيت البيضه واني فرحانه بنفسي عبالك مسويه دجاجه مو بيضه..

حطيت الطاوه على ميز الطعام وجبت گلاص واني احچي بگلبي كون يگعد ياسر ويشوفني متريگه وافشله..

واني امشي عثرت و وگع مني الگلاص وانكسر ودست على كزازه..

رفعت رجلي من الگاع وباوعت ياسر اجه يمي حط اديه على خصري ورفعني گعدني على الكاونتر واني مصدومه من السواه

رفع رجلي و سحب الگزازه وحط كلينس حلى رجلي.. واني اباوع عليه وحتى ما حسيت بالگزازه من طلعها چان شعره مخربط ولابس فانيه داخليه وبجامه..

يلم بالگزاز وگال

ــ غير تنتبهين؟؟

ــ عثرت..

ــ يلا تعالي ناكل.. شعجب مسويه ريوگ؟

ــ جعت..

هز راسه واني نزلت حافيه ونسيت الثوب الضيگ والچاكات..

گعدت على الكرسي وهو جاب كوبين و القوري حطهم على الميز حطيت شكر وحسيت بيه لزم شعري يجمعه چان على كتافي..

ــ ليش تعوفين شعرچ مفتوح..

رجف جسمي كله من سحب الخصلات اليم وجهي وتلمس بشرتي.. حچيت بصوت بالگوه طلع..

ــ عوفه... اني المه.

ــ يوميا تعوفينه منگع ومفتوح ويبلل ملابسچ..

ظفره وحط الظفيره على كتفي.

ــ اي هسه ارتاحيت..

باوعت عليه مستغربه هذا شبيه ليش هيج يسوي واني شبيه تخربطت احوالي..

خلصت ريوگ و هو طلع واني نظفت البيت و رحت للغرفه رتبتها و لگيت قميصه حاطه على الكرسي استغربت من تزوجنه الهسه ما شايفته شامر ملابسه حتى احسه هو ارتب مني...

قربته عليه وشميته عطره يجنن..

بسرعه شمرته بالگاع اني شجاي اسوي مادري بروحي..

شلت القميص علگته ورحت للصاله اريد التهي
بـ أي شي حتى ما اتذكره..

كل شويه اتلمس الظفيره وابتسم وارجع اغلط على نفسي و الومها، بس اني اول مره اشعر بهيچ شعور...

وره صلاة المغرب اجتني اندگ الباب ؤحت فتحته

ديار: بابا يريدچ..

ــ ليش؟؟

ــ والله مادري بس گالي صيحي مُهره..

ــ بس ياسر ميقبل انزل..

ــ اتصلي عليه.

ــ ماعندي رقمه.

ــ ياا، ولج لا تحچين يم واحد ماعدچ رقمه غير تفضحينه..

ــ هو هسه يمن حاچيه متگليلي..

ــ يلا جيبي موبايلچ انطيچ رقمه..

جبت موبايلي ردتلي الرقم سجلته واتصلت عليه..

ــ الوو..

ــ هلا مُهره.. اول ما حچيت عرفني

ــ عمو ابو علي صاحلي انزل؟

ــ جاي... وسد الخط

ــ شگال؟

ــ گال جاي.

ــ يعني ننزل لو لا؟

ــ مادري..

ــ تعاي خلي ننزل.. رحت بدلت و نزلت بگيت عمو گاعد بالصاله رحت تقربت وگلبي ناغزني حسيت اكو شي و گلبي ميخيبني..

ــ السلام عليكم..

ــ وعليكم السلام هلا عمو تعاي هنا گعدي..

رحت گعدت يمه على القنفه..
سئل عني وباركلي على معدلي بعدين گال..

ــ عمو انتِ تدرين بشغلي واستثماراتي..

ــ اي عمو اعرف..

ــ اني اريدچ تبيعيلي الگاع مال ابوچ.. اريد ابنيها تصير عمارات واني اوعدچ ابقيلچ حصه كل شهر حتى لو بعتيلياها...

گمت بانتفاضه..

ــ عمو شجاي تحچي؟؟

ــ اي عمو بيها ارباح الچ كومه..

ــ لا..... ما اريد ربح ولا اريد اي شي...

ــ هذا السويته كله الچ.. ما اجه بعينج؟

ــ اجه بعيني اني ما ناكره... بس الشي الوحيد البقه من امي وابوي هي المزرعه وبيتنه..

ــ انتِ صلفه كلها گلتلي لا تجيبها البيتك بس اني گتلهم لا... هي مثل بنتي..

ــ مثل بنتك لو علمود ابيعلك الگاع؟؟

ما حسيت الا رگعني كف على وجهي وطحت بالگاع من گد ما قوي تجمعت الدموع بعيوي و اني مدنگه وشفت رجلين قريبه يمي رفعت راسي شفته ياسر عيونه حمر ويباوع عليه...

يتبع🦋

~~~~~~~~~~

لا تنسون التصويت والتعليق بين الفقرات واشتركو بقناة التلي