رواية خيِّال ومُهرة الفصل الحادي والأربعون 41 - بقلم amna

بسم الله الرحمن الرحيم»
«خـيَّـال و مُـهـره»
«آمـنـه عـادل»
========
«لا تنسون التصويت آغاتاتي»

«اللهم صلِّ على محمد وآلِ محمد»

ــــــــــــــــــــــ

هلا يا بَعد الروح، شلونكم شخباركم؟
مشتاقتلكم ومشتاقه للكتابه🙂..
صار فتره اريد اكتب البارت الأضافي
بس بديت بيها من جديد عدلت بيها هواي أخطاء..
يلا كافي سوالف خلي نبدي بالبارت...

ــــــــــــــــــــــــــــــــــــ

«سجى»

انا دائماً  استثني الأحن..
من بين متصنعين الود..
من يعطيني من وقته لكي يكون قريب مني..
من يكون صادق في التعبير معي..
من يحبك في جميع عيوبك..
هذا ما نسميه الشريك المناسب..

چان رضا الشريك المناسب بمعنى الكلمة حبي اله
يفوق كل حب حبيته بحياتي احتواني بكل حب
خلاني اكتفي من كل شعور نقص چان بداخلي..

مرت فتره على خطبتنه كل يوم نلتقي بالدوام
رضا مسويلنه جدول نسويه كل يوم مثل المكالمه
والمراسله و اوقات الصلاة وكل يوم نسمع محاضره
و دائماً يگلي هاي الجمله التخليني اسوي اليگلياه بسرعه..

ــ لا تخلين اليوم يفوتچ بدون ما تسمعين معلومات
بحيث كانت دينيه او علم،  لان راح يفوت يوم من أيامچ
وانتِ ما مستغلته بالعلم..

وحتى دائماً يرسلي مقاطع عن الحجاب اني اعرف يريدني البس بس هو ابد ما حاچي وياي بالموضوع بس يرسلي محاضرات واحاديث..

وهواي اثرت بيه تغيرت هواي حتى نظريتي عن
الحجاب تغيرت اكو شي بداخلي اقتنع بسبب
المحاضرات مو علموده حسيت طريقته غيرت
تفكيري كلش جابت نتيجه..

واليوم قررت من باچر اروح للدوام بحجاب بس اني
حتى ما عندي..

گمت من سريري چان بعد ساعه الصلاة المغرب
رحت الـ ديار چانت گاعده يم بنتها تلعب بيها وأسد گاعد يباوع بالتلفزيون اول ما شافني گال..

ــ هلا عمه..

ــ يروح العمه..

گعدت يمه بوسته وحچيت ويه ديار..

ــ اگلچ ديار..

ــ ها حبي..

ــ اريد البس حجاب..

ــ يممه فدوه.. صدگ؟

ــ اي والله..

ــ حياتي مدري شگلچ بس صدگ فرحت..

ــ اني همين فرحانه..
بس خلي نروح اني وياج اشتريلي ملابس مال حجاب
وشكم حجابلان ماعندي..

ــ تدللين بس خلي اطي خبر المالك ونروح..

ــ اوك...

عفتها ورحت اطيت خبر الـ ماما وهي ما اعترضت
رحت الغرفتي اتصلت على رضا اريد اگله راح نروح
للسوگ..

ــ الوو.. حبيبتي شلونچ؟
ــ الحمدلله.. انتَ شلونك؟
ــ بخير..  شعجب خابرتي هسه؟
ــ أريد اروح للسوگ..

ــ انتِ ويامن؟
ــ اني وديار ياخذنه مالك..
ــ تمام براحتچ..

ــ رضا..
ــ بَعد گلبه...
ــ اني احبك..
ــ اني هم احبچ روحي تردلي من تگولين احبك..
كل ما تشوفيني گليلي ياها..

ــ هههههههه.. ان شاءلله..

سولفنه شويه وسديت الخط من صارت الصلاه
كملت صلاتي وبدلت ملابسي واخذت من ديار
ربطه ولبستها طلع شكلي كلش حلو بيها ابتسمت
واني اباوع النفسي بالمرايه صورت نفسي..

تعمدت ما افتح موضوع الحجاب ويه رضا
لان اريد باچر افاجأه من يشوفني بالدوام..

نزلت الديار لگيتها امبدله ومالك گاعد من شافني گبل
گام وضمني وهو يگلي..

ــ اروح فدوه لهل وجه طالعه عبالك اميره..

ــ والله حتى اني احس طالعه كلش حلوه..

ــ هههههههه..  ماكو احلى من الحجاب..

رحنه للسوگ اشتريت فساتين اطوال وبشتات
لان اني لبست حجاب خو ما نص ونص البس
حجاب و ملابسي ضيقه وتفاصيل جسمي كلها
مبينه  ..

اشتريت جواريب و ربطات ورجعنه للبيت شوفتهن
الـ ماما وصعدت رتبتهن بالكنتور وتعشينه ونمت..

ثاني يوم گعدت متحمسه بدلت لبست فستان طويل
و الربطه ما حطيت مكياج ابد طلعت للدوام من وصلت
حسيت توترت ما اعرف ليش..

اخذت جنطتي ودخلت للدائره والانظار كلها صارت
عليه وكلهم مصدومين بس اني ما چنت اباوع على
ايّ واحد لان كلهم ميهموني بگد ما رضا يهمني..

چان صافن عليه ومبستم وگفت يم مكتبه  ..

ــ شلونك عيويني...
ــ الحمدلله.. شنو هذا الجمال يابه؟
ما چنت ادري من تلبسين حجاب تطلعين هيچ حلوه..
ــ صدك حلو عليه؟
ــ يجنن، يمووت، يخبل...
ــ ههههههه..

ــ من يخلص الدوام نطلع راح اتصل بمالك اطيه خبر..
ــ تمام عيوني..

رحت المكتبي وبديت اشتغل وكل ما اباوع عليه الگاه
يباوعلي ومبتسم..

خلص الدوام وطلعنه من الدائره..

رضا:  لا تجين للدوام بالسياره انا اجي اخذج..
ــ ليش؟
ــ كل ما نريد نطلع نحتار بسيارتچ وكل واحد يروح بسياره.
ــ عادي..
ــ لا مو عادي اني اريدچ تصعدين وياي..

ــ اوك بعد ما اجي بيها اذا انتَ تجيني يوميا..
ــ عفيه بنيتي التسمع الكلام..

باوعتله صفح وهو ضحك وگال..
ــ تدرين احس فرحتي اليوم تختلف..
ــ حتى اني فرحانه و احس اول مره ارضه عن نفسي..
ــ اني چنت اريدچ تلبسين حجاب بس ما ردت
افرضه عليچ لان يمكن ما راح تحبينه..
ــ  اي اعرف..

وصلنا للمطعم تغدينه وهو طول الوقت يوصف بجمال
الحجاب عليه من خلصنه غدا گال..

ــ نروح انشوف غرفه؟
ــ هسه؟
ــ اي،  لان العرس بعد اسبوعين ما بقى شي..
ــ تمام براحتك..

ــ انتِ كملتي غراضچ؟
ــ لا بعد كم شغله مابقى شي..
ــ اي حتى تبدون تجهيزات العرس..
ــ ان شاءلله..

رحنه المحلات هواي يلا اختارينه غرفه من طلعنه
عبالي راح نرجع للگراج اخذ سيارتي بس شفت الطريق
مو نفسه..

ــ وين رايحين؟
ــ البيتنه اريد امي تشوفچ بالحجاب..
ــ لا رضا، استحي والله..
ــ هي غير تطير من الفرحه اذا تشوفچ بهذا الجمال..

وگف السياره بالباب مالت بيتهم واني ارتبكت كلش..
دخلنه للبيت بيتهم يلمع من كد النظافه وريتحه تخبل
وصوت القران عالي..

دخلت للصاله چانت گاعده ويمها مُهره وياسر..

ــ السلام عليكم..
ــ وعليكم السلام..

بقو يباوعولي مبتسمين اجتي مُهره بوستني
رحت الخاله بستها وهي تگول..

ــ ما شاءلله يمه عين الحاره باره فدووه لله
طالعه تخبلين يا بَعد حيلي..

ابتسمت وياها وكعدت يمها بعد ما سلمت على ياسر..

مُهره:  شنو شوكت تتزوجون نريدچ تجين هنا يمنه..
رضا:  ان شاءلله قريب
مُهره: شگد شهر يعني؟
رضا:  لا وين،  بويا اني زلمه يريد مرته بعد ما اتحمل..

حسيت وجهي بوخ من الخجل..
بقينه كاعدين نسولف بعدين مُهره سوتلنه عشا تعشينه
ومُهره وياسر راحو البيتهم و احنه گعدنه شويه وگتله..

ــ رضا شوكت اروح للبيت؟
ام رضا:  بعد وكت يمه شعندچ..
ــ والله خاله تعبانه من الصبح الهسه طالعه..
رضا:  يلا گومي نروح.. 

سلمت على خالتي ورحت للمطبخ اريد اطلع بره
وما حسيت الا سحبني من ايدي وضمني..

ــ رضا شبيك سحلتني سحل؟
ــ مشتاقلچ..
بادلته الحضن وگتله..
ــ غير من الصبح الهسه وياك يا عيني..

باوع عليه وگال..

ــ احبچ من تگولين عيني وعيوني..
ــ اني هم احبك عيوني..

اول ما خلصت الكلمه تقرب عليه والتهم شفايفي
وبقيت متصنمه بمكاني نفس كل مره يبوسني بيها
ابقى ما احرك وهو يجيبني منا ويحطني منا وما احجي
كلمه..

ــ شمالچ؟
ــ شنو؟
ــ كل ما ابوسچ تتجمدين مدري شني...
ــ اي...
ــ شنو اي؟
ــ يعني استحي..

ــ تستحين مني؟
بقيت ساكته وهو رجع ضمني وگال..
ــ شو اني ما استحي منچ..

سحبني من ايدي وطلعنه وصلني للگراج ورجعت للبيت
وهو يمشي وراي من وصلت راح..

مر ابأسبوع بالدوام و من ارجع نروح للسوگ الى ان
خلصت غراض جهازي كلهن والأسبوع الوراه اخذنه
اجازه اني وياه وبديت ادور بدلات وصالون وهاي السوالف..

الى ان اجه يوم العرس ومهما اريد اوصف الخبصه بذاك اليوم ما تنوصف خبصة اليوم شگد مهم بصفحه و خبصة عقلي بصفحه..

احس القلق والتوتر مسيطر عليه واني گاعده بالصالون
اجت وياي أفنان لان هيَ الوحيده الما عندها اطفال من
البنات كملت المكياج كلش بسيط وسويت التسريحه
من خلصنه اجه ياسر ورضا ورجعونه للبيت..

الطريق كله يسولفون ويضحكون واني كلمه ما حچيت
منزله البرگع على وجهي ومدنگه حتى ميبين مني شي
الى ان وصلنه للبيت نزلني من السياره رافعه فستاني
حتى ما اوگع دخلت للبيت وانصدمت مليان بنات اقاربنه
اول ما دخلت اجتني زينب ضمتني بوستها ودخلت گعدت
هلكانه من التعب وبعدنه كلشي ما مسوين..

اجتني ديار و روسلينا لازمه ايد بنتها ريانه..

ديار:  ولچ شطالعه شنو هالجمال؟
روسلينا:  حياتي الف مبروك ما شاءلله طالعه تخبلين..
سجى:  بنات اني راح اموت من الخوف مدري شبيه..

مُهره:  يمعوده شكو ليش خايفه لا تنسين هذا يوم مميز
بحياتچ لازم تعيشينه بكل تفاصيله حتى تسولفينه الأطفالچ
بالمستقبل..

سجى:  ان شاءلله..
روسلينا:  يلا ابتسمي ولا تنسين هذا احلى يوم الي نجمعتي بيه ويه شخص تحبينه..

زينب:  اي عفيه احچن وياها..
عود اني اختها لازم انصحها بس اعذرني
اعرف كلشي اسويه بالحياة الا النصيحه..

ديار:  ههههه حتى اني..

بقينه شويه گاعدين وسمعتهم گالو اجت السيارات
حتى نروح للقاعه اجتي زينب لبستني البرگع وطلعتني
حسيت بـ مالك من اجه لزم ايدي واخذني للسياره واني كلشي ما اشوف..

صعدت بـ السياره وصعد هو يسوق اول ما صعد گال..

ــ جبت سيارة علي لان مظلله رفعي هذا من راسچ..

رفعته باوعت عليه هو يباوع عليه مبتسم لابس ستره
سوده وقميص ابيض ورافع شعره بترتيب..

ــ شهل جمال يابه؟
مد ايده لزم ايدي وسحبها باسها وگال..

ــ اوعدچ بشي مستحيل يتغير يوم..
هو راح احبچ طول حياتي وما راح اقصر بشي وياج..

ــ واني اوعدك تبقى الحبيب الأول والأخير بحياتي
وراح اسوي المستحيل حتى نبقى سوه وما راح افرط بيك..

باس خدي ومشت السياره وهو يسولف وياي ومن صدگ
نسيت كل التوتر الچان بيه الى ان وصانه للقاعه..

سوينه الدخوليه والتصوير و وصلني للكوشه وگعد شويه
وطلع يم الرجال بالقاعه الثانيه..

اول ما طلع رضا دخلت اشتغل الديجي وزينب وديار تگابلن ورگصن رگص لا صاير ولا داير واني اباوع عليهن وميته ضحك..

افنان اجتي يمي تضحك بوستني وكعدت يمي..

افنان:  اعذريني ما أگدر ارگص لان حامل والطفل نازل
چان هسه واگفه بالنص واهز..

ــ حياتي معذوره..

ــ والا اني من صغري احضر العرس رضا جبت عمري كله استحي ارگص بالعراس ضميتها العرس رضا..

ــ ههههههههه.. اني ما اعرف أصلاً...

اجتي مُهره يمنه وبقينه نسولف واخذنه صور..

الى ان خلصت الحفله وطلعنه من القاعه رحنه للفندق
يمكن اختاره اكثر يوم تعبت بيه بحياتي..

دخلت للغرفه مالت الفندق وحسيت بعد ما اتحمل البدله
من گد ما ثگيله كلش چبيره هلكتني..

رضا: شلونج حبيبتي؟

تقرب عليه باسني براسي كتله..
ــ اول مره احس بشعور الـ هلكانه من التعب..

ــ بيه ولا بيچ..
ــ اسم الله عليك..
ــ هسه تسبحين ونصلي ويروح التعب..

ــ تمام...

نزعت الطرحه وبديت اوخر الماشات وهو نزع
الساعه والمحابس واجه ساعدني ويسولف وياي
الى ان خلصت گمت اريد انزع البدله وهو فتحلي
السحابه ودخل للحمام واني نزعتها ولبست البرنص
ومسحت وجهي من المكياج وطلع هو من الحمام
دخلت اني سبحت ولبست ثوب النوم ونشفت شعري
توضيت وحطيت مكياج خفيف وطلعت..

لكيته فارش سجادات الصلاه اني جايبتهن وياي طلبتهن
من النت مكتوبه عليهن اسمائنه..

رحت لبست چادر الصلاة  و صلينه سوه المغرب والعشاء..
مدلي ايده..

ــ تقبل الله حبيبتي..
ــ الله يتقبل اعمالك..
ــ نصلي ركعتين للامام المهدي «عجل  الله فرجه»..

ــ اي..

گمنه صليناها سوه، اندگ الباب وراح فتحه ورجع شايل
الاكل..

ــ يلا تعاي ناكل اني ميت من الجوع..
ــ اني ما جوعانه..
ــ هو بكيفچ؟
ــ هههه… لعد بكيف منو؟
ــ تعاي اكلي حبيبتي مو زين عليچ..
ــ تمام..

نزعت الچادر ورحت يمه گعدنه نتعشى اكلت كلش قليل وگمت فرشت اسناني ورجعت للغرفه والتوتر كل ما يزيد الوقت كل ما يزيد بداخلي..

كعدت على طرف السرير لازمه اصابعي بقوه وما منتبها النفسي طلع من الحمام باوع عليه مستغرب..

ــ شبيچ؟
ــ ما بيه شي..
ــ عوفي اصابعچ بويا..

عفت ايدي وگمت يم ميز التواليت احط عطر
وحسيت بأيده تحاوط خصري وهو واكف وراي..

ــ ليش خايفه حبيبتي؟
ــ ما خايفه.. بس متوتره شويه..
ــ شويه لو هواي؟
ــ ههههههه.. هواي..
ــ ترى هاي السوالف مال صغار وانتِ چبيرا المفروض
تعرفين هذا الشي طبيعي..

ــ رضا ترى هو شي اول مره اعيشه اكيد اتوتر..
ــ اي اعرف.. بس انتِ احس بيچ تختلفين عن الكل
واعيه كلش..

ــ الوعي مو كلشي..

ــ ههههههه  هم صحيح..
اكو افكار البقيه يزرعونها بينه مثل اول ليله من العرس
راح تكون صعبه كلش و اخاف وهاي السوالف رغم ما هو
الموضوع جداً بسيط..

حسيت راح اموت من الخجل اريده بس يسكت ويعوف هذا الموضوع گمت اهز براسي و اوفقه الرأي حتى ينتهي الحديث..

بس چان اسلوبه الهادئ يخلي المقابل يهدئ تلقائياً..
وانقضت اول ليلى النه وچان مكتوبلي انُ اصير اله..
واغرگ بحبه الما بشبه حب هذا الوقت احبه بحيث ما
اگدر افارگه  ابد...

حتى مرات اهلي يتصلون عليه يگلولي تعاي نشوفچ
اطلع حجج علمود ابقى يمه وما افاركه واذا اروح هو وياي..

ــــــــــــــــــــــــــــــــ
«مُهره»

من يگولون الناس تلگه شخص يغنيك عن الكل
ما چنت اعرف معنى هذا الكلام الى ان عرفت ياسر
صار هو امي و ابوي وصديقي واخوي وحبيبي
عوضني عن غياب اهلي واحتواني بحنيته..

اني عكس البنات بحملن ابد ما تعبت بالنساوه مالتي
ولا تلعب نفسي ابد بس اشتهي هواي اكلات واذا ما
اكلهن احس بروحي اصير مو طبيعيه تبقى روحي تلوب..

گعدت من النوم ياسر بالدوام والبيت فارغ كلش اكره الوقت
الأبقى بيه وحدي انظف البيت واسوي غدا واگعدت انتظره يرجع..

بدلت ملابسي شعري مفتوح وحطيت حمره وحضرت الزلاطه ودخل ياسر رحتله ضميته نفس يوميا..

ــ شلونچ يروحي؟
ــ مشتاقتلك..
ــ تشتاقلچ العافيه..
ــ ياسر لا تكلي تشتاقلچ العافيه اكرها..

ــ خوش،  شمسويه غدى فاطس من الجوع..
ــ باميه و تمن وزلاطه..
ــ راح اغسل واجي..

طبع بوسه على خدي وراح يغسل واني صبيت وگعدنه
ناكل..

ــ نروح للدگتورة العصر..
ــ اي..
ــ دخلت بشهر السابع وبعدنه ما نعرف ولد لو بنيه..
ــ كلشي من الله راضين بيه..
ــ طبعاً..

خلصت اماعين الغدا وبدلت ورحنه للدگتوره
انتظرنه يوصل سرانه من صاحت اسمي دخلت
وحدي هو ما دخل وياي حچيت للدگتوره عن وضعي
وهي تسئل واجاوب..

تمددت والدگتوره حطت ماده على بطني وحركت الجهاز عليها بهدوء واني عيني بالشاشه واباوع للدگتورة اريدها
بس تحچي..

ــ ها دگتورة؟
ــ بيچ ولد ما شاءلله وضعه كلش زين..
ــ الحمدلله..
كتبتلي فيتامينات اخذت الورقه منها وطلعت بسرعه
اريد بس اشوف ياسر واگله..

چان واگفلي بـ باب العياده اول ما شفته ابتسمت..
ــ ولد..
ــ والله؟
ــ اي..
ابتسم ولزم ايدي وگال..

ــ الحمدلله احنه بنعمه..
ــ الحمدلله اكيد..
ــ خلي نروح الـ علي..
ــ يلا...

رحنه البيت علي وثنينه فرحتنه چبيره..
ف

تحلنه الباب علي سلمنه عليهم وگعدنه
وريانه بنت علي گعدت بحضن ياسر وتسولف
وياه و راحت للمطبخ رحت وراها..

روسلينا:  شلونه البيبي؟
ــ الحمدلله بخير،  چنت يم الدگتورة..
ــ ها شگلتلچ؟
ــ بيه ولد..
ــ اوي فدوه لله حبيبتي الف مبروك..
ــ الله يبارك بيچ..
ــ گلتو الـ علي؟
ــ لا اكيد ياسر هسه يگله..

اخذت الفواكه وروسلينا شايله العصير
اول ما دخلت للصاله  علي هلهل..

روسلينا: ههههههه،  تعرف تهلهل؟
علي:  كلشي اعرف حتى اذا تردين اهزلچ...
ياسر:  طاح حضك..
علي:  خلوني فرحان لگيت رجل البتي..

روسلينا: شني بس ابن ياسر يتزوج ابنيه اكبر منه بخمس سنوات؟

مُهره: عادي اهم شي الاخلاق...
علي: بعد بنتي وانتِ تخيلي اخلاقها..
ياسر:  چا شبيك انتَ؟
علي:  اخبل..

روسلينا:  يمكن اجيب ابنيه ثانيه واخذوها لابنكم..
علي:  شني ناويه تجيبيلي درزن بنات..
مُهره:  اكو احلى من البنات؟
ياسر:  لا والله اذا ولد واذا بنيه نعمه..

علي:  لا بالعكس اني ماعندي هاي السوالف.
بس اليضوج شنو انتَ تربي وتتعب وتكبر بتك
انوب تطيها الرجال ترى ما ترهم اني كلت ريانا
ما ازوجها..
ريانا:  بابا اني اريد اتذوج أسد..
علي:  اشتعل ابوچ..

ضحكنه كلنه على ريانا بقينه كاعدين نسولف
رجعنه للبيت الوقت متأخر اتصلت بـ خالتي
ام رضا وگتلها بيه ولد وكلش فرحت خطيه..

مرت الشهور الأخيره من حملي وچانت كلش صعبه
وحالتي النفسيه اسوء من الصحيه بديت احضر اغراض
الطفل وخالتي ام رضا وياي ساعدتني بهواي سوالف لان
اني مو كلش اعرف والغراض الأحتاجهن بالولاده بقيتهن
يمها لان اول ايام راح ابقى يمهم..

الى ان يوم اتصلت بيه افنان كالت راح اروح لاهلي
تعاي علمود نلتقي گلت الياسر وصلني وطلعو هو ورضا
ومالك جاب ديار وزينب بقينه بس احنه بالبيت..

سوينه عشا ثلاثتنه بالمطبخ والأطفال يم خالتي تركض
وراهم واحنه نسوي عشا حسيت وجع بـ بطني بس غلست
كلت يمكن تقلصات..

ضبينه العشا وگعدنه ناكل وگام الوجع يجي اقوه ويروح
ما حچيت لاحد لان ما اريد اقلقهم بس اني ميته من الخوف
گمت اتمشى واحس ما اتحمل الوجع اكثر رحت يم خالتي
ودموعي تنزل..

ــ خاله يمكن راح اجيب..

چانت مجرد كلمات خليتهم ينخبصون خبص ديار راحت تخابر الولد و زينب راحت تجيب الجنطه وخالتي اخذت
القران وگعدت تقره سورة مريم وهي لازمه بطني بحنيه..

عشر دقايق مرت واني احس روحي تريد تطلع من الوجع
دخل ياسر وجها اصفر ومخبوص طلعني بالسياره ورحنه
للمستشفى ما طولت ساعه و ولدت مُحمد باوعت عليه
وهما يلبسونه شعره اسود وطويل وصوت البچي مالته
عالي  احتاريت احتار بوجعي لو بـ بچيته..

حطولي مغذي ونمت ما حسيت بشي من كعدت لگيتهم
كلهم يمي وياسر جايبلي باقة ورد اجه باس راسي..

ــ الحمدلله على السلامة ام مُحمد..
ــ الله يسلمك ابو مُحمد..
علي:  الحمدلله على السلامة خويه ان شاءلله يكون
ولد صالح..
ــ الله يسلمك خويه.. 

طلعنه من المستشفى وخالتي شايلته اني عيني
عليه و خايفه احس ما اريد يبتعد عني ابد..

عجيب هالشعور  شعور الأم يختلف عن كل شي بالدنيا
حب، خوف، حنيه، كلها تنجمع على شخص واحد احسه قطعه مني....

مرت عشر أيام اني يم بيت رضا وچانت فرحتنه تختلف
حسيت اكبر فرحه بحياتي حتى سهري وتعبي انساه من
اضمه واشم ريحته..

رجعنه البيتنه وانمله وقت الفراغ  الچنت احس بيه
صار ما عندي وقت اگعد بيه الوحدي حتى..
بس حتى خبصتي بـ مُحمد حابتها..

وياسر نفس الشي اول ما يدخل من الدوام يروح
يشمه ويبوس بيه..

ــ شو صاير تبوس محمد قبلي؟
ــ لا شوكت بس اليوم..
ــ لا يوميا بس منتبه..

تقرب عليه يضحك باس خدي..
ــ انتِ حبيبت گلبي..
ــ اليوم عمتي ام مالك عازمة رضا و زوجته
وعزمتنه احنه و بيت علي وافنان وزوجها..
ــ ها ان شاءلله خير

خلصنت غدا وتنظيف وبديت اجهز بنفسي للعزيمه
وبدلت لـ محمد ورحنه سوه البيت عمت ياسر
وچان الكل متجمع لگيت افنان وروسلينا جايات
قبلي سلمت عليهم وگعدت وياهم شويه ورحت
للمطبخ يم ديار وسجى..

سجى من البدايه هيَ انسانه كلش مثقه و واعيه
ومن لبست حجاب صارت احلى واثگل كن قبل من
صدگ شخصيتها تجنن وطريقة كلامها عن رضا كلش
متعلقه بيه  محد چان متوقع..

أما افنان نفس جمالها وروحها الجميله اللطيفه
التخلي الشخص يحبها غصباً عليه..

ديار مختاره بأطفالها وبعدها تحب الدلال
من مالك يريد يطلع اطفاله لو يشتريلهم
يبدي بيها واذا ما سوالها نفسهم تزعل..

روسلينا وعلي اكثر شخصين راهمين البعض
علاقتهم تجنن صارلهم سنين متزوجين ولا
يوم صارت بينهم مشكله لان روسلينا تعرف
تتصرف..

كل وحده بينه عايشه حياتها وتحب حياتها ومقتنعه
هذا الشي اليخلي الانسان سعيد..

ماكو شخص كامل
ولا اكو حياة بدون مشاكل..

ـــــــــــــــــــــــــ

شرايكم بالبارت؟

لا تنسون التصويت واشتركو بقناة التلي