رواية خيِّال ومُهرة الفصل السادس عشر 16 - بقلم amna

«بسم الله الرحمن الرحيم»

«خـيَّـال و مُـهـره»
«آمـنـه عـادل»

========

«لا تنسون التصويت آغاتاتي»

«اللهم صلِّ على محمد وآلِ محمد»

ــــــــــــــــــــــ
في المطر نلتقي في موعدٍ مُبلل
القليل من الاغاني ، شارع طويل ، مَطر
و يديك الدافئة والكثير الكثير من الحُب
ثم نمشي بكل الشوارع بدون تخطيط ولا فكرة
فكرتنا الوحيدة هي الحُب غير المشروط .

                  

«روسلينا ــ 2014»

نسيت اني منو
فقدت كلشي املكه..
روحي..
ضحكتي...
سوالفي..
اهلي...
حياتي..

كلشي صار بلا لون وبلا طعم الشي الوحيد الأريده بس حبايه وهاهيه گمت ما افكر شنو الصح والغلط..

صار 7 اشهر اني گاعده بهاي الغرفه لا اطلع
ولا اعرف شنو جاي يصير ولا اريد اعرف..

مهند اهم شي عندي بالحياة مو علموده لان
ينطيني سم اشربه واخلص روحي من الواقع..

بيوم گعدت  ما اعرف اذا چان صبح او ليل على صوت صراااخ مالي البيت كله..

فتحت الباب ونزلت اباوع نسوان گاعدات ويه ام مهند  يبچن ويصرخن گعدت على بايات الدرج اباوع عليهن.

لمحت آسيا دخلت شايله طفله بيدها حطتها بالگاع و صعدت اليه تركض من شافت شكلي بقت ادگ على وجها...

ــ ولچ روسلينا شبيچ؟؟ 
احچي منو مسوي بيچ هيچ؟؟
روسلينا....

گومتني صعدتني للغرفه وهي تسئل واني كلمه
ما احچي وياها، وگفتني گبال المراياه و تحچي وياي.

ــ باعي النفسچ..... احچي شنو چانو يسوون بيچ؟

باوعت النفسي وچهي اصفر وباهت وشفايفي لونهن ابيض وعيوني حمر و من گد ما ضعفانه وجهي صاير طويل و شعري بيه فراغات من گد ما املخ بيه من احتاج حبايه.

لزمتني آسيا من اكتافي وهزتني بقوه..

ــ انتِ غبيه؟  احچي.... 

دفعتها بكل قوتي واني احجي وياها..

ــ روحي اطلعي بره هسه تذكرتيني هسسسسه؟
اني لو ميته محد يدري منكم..
انتم هم تعتبرون اهل؟
الله لا ينطيكم دمرتوني الله يدمركم..

ــ ولچ اجي هنا اني وامي نريد نشوفچ يگولون
مسافره لو طالعه  اخابر عليچ مغلق اخابر على
مهند يگول هي بالحمام لو اني طالع وهي بالبيت
اجي هنا اتعارك وياهم كلهم علمود بس اشوفچ..

ــ وين مهند؟؟ روحي صيحيله اني ما اريد اشوف
اي واحد بيكم اريد بس مهند...

ــ شنو متدرين؟

ــ شنووو؟؟  شدري شصاير؟

ــ  لگوه مهند  ميت..

حسيت بعد ما اصيطر على نفسي گعدت بالگاع واني مصدومه و الصوت الجوه مالت الصريخ والبچي ما وگف دقيقه...

ــ شلون متدرين محد گلچ؟

سكتت واني بعدني مصدومه وگلبي يوجعني..
رجعت گالت..

ــ گومي بدلي وتعالي ننزل جوه كلها تسئل عليچ..

ــ شلون مات؟

ــ لگوه بـ باب البيت مكتول..

بقيت صافنه عليها..

ــ الب.... البارحه چان هنا.... شوكت مات؟؟

ــ وره ساعه من ما طالع ججايبينه ميت
روسلينا شبيچ ترجفين؟؟ 
انتِ مريضه لو شنو وضعج ابد مو طبيعي..

بدلتلي وغسلت وجهي ونزلتني جوه لگيت امي گاعده وتبچي و من شافتني ضلت اتدگ على رجليها وتبچي
بصوت عالي..

ــ يممه.. شصاير بيها بنيتي.... يممه..

واني اجتني النوبه مالت الحبايه حسيت بعد ما اسيطر على نفسي جسمي كله يرجف...

حتى النفس بالگوه اسحبه اريد اتقرب على امي و احط راسي على صدرها واصرخ وابچي واشم ريحتها المشتاقتلها..

بس حاوطني الظلام وبعد ما حسيت على نفسي...

ـــــــــــــــــــــــ

«روسلينا  ــ الحاضر»

واني گاعده گدام علي والخنگه البيه متنوصف واحس الكلمات بالگوه تطلع مني بس احاول اسيطر على نفسي واحچي بثقه و اخفي رجفتي...

ما قبلت ام مهند ياخذوني للمستشفى امي بقت تلطم وتصيح عليها..

ــ شسويتو بـ بنتي الله لا ينطيكم..

صاحت گدام الناس كلها

ــ بتچ مدمنة مخدرات تردين يسجنوننها اخذيها للمستشفى... ما يهمني شتردين تسوين سوي...

امي وآسيا فقدن آسيا حتى دفعت ام مهند وهي تصيح وتغلط علها صاحت الـ بابا واجه اخذني البيتنه..

من گعدت لگيت نفسي نايمه بغرفتي بيت اهلي گمت نزلت جوه لگيت امي وبابا وآسيا گاعدين بالصاله ومحتارين شيسوون... حچيت واني انزل

ــ رجعوني يم مهند خلي يطيني حبايه يلااااااا
رجعوني بسرعه ما أريدكم ولا أريد ابقى هنا..

نزلت يمهم گعدت بالگاع واضرب على وجهي و املخ بشعري اجو يلزموني يردوون يوگفوني محد يگدرلي احس اريد اسوي شي الجسمي حتى يهدء ما كو اي شي..

وره شويه شفت ولد غريب اجه لزمني من ايدي حيل وضربني ابره حسيت كلشي استقر بيه وغمضت اعيوني وحسيت انرفعت من الگاع وحطوني على السرير وغطوني.. 

نمت ساعات طويله و من گعدت حسيت بـ أيد على راسي عرفتها امي من صوت بچيها وايدها الدافيه..

فتحت عيني وهي گالت..

ــ ها يمه، شلونج؟

طاحت ادموعي واني اگللها

ــ ليش عفتوني...
عفتوني وحدي..
يوميا يضربني ويشربني حبوب الحد ما خلاني
ما أكدر بعد اعوفهن..
يمممه... احس بروحي مخبله صرت...
والله تخبلت..

ــ اسم الله عليچ... امداني يمه... امداني..

دخل بابا و وياه نفس الولد الـ ضربني ابره
اخذ امي وطلع وبقى هذا الولد..

ــ تتذكريني روسلينا؟

ــ انت الضربتني ابره..

ــ ههههههه... اي بس اني منتظر ابن عمتچ...
راح اعالجچ من أثر المخدرات.

ــ اممم..

ــ بس اريدچ تساعديني حتى تطيبين بـ أسرع وقت..

ــ ما أكدر ..
ما اگدر اعيش بدونهن..

ــ والله تطيبين وتصير سوالف...

بقيت على هذا الحال يوميا اتخبل اكسر واصيح و املخ بنفسي ويجي منتظر ينطيني علاج انام واگعد ارجع من جديد..

تعبت كلش وبعدني حتى ما مستوعبه مهند ميت اگللهم رجعوني المهند ما اريدكم ويگعدون يهدئون بيه ويشرحولي..

مرت شهرين وحسيت نفسي شويه احسن و منتظر باقي يمنه ينام بالستقبال ويهتم بيه بالعلاج..

بس اني حالتي النفسيه كلش تعبانه
راح اثر المخدرات من جسمي
بس بقت روحي متعلعله بذيچ الأيام والعذاب
المحد مر بيه و محد حس بيه...

گمت ما احچي و لا اريد اشوف واحد اگعد بغرفتي من الصبح لليل بهاي الغرفه اسمع اغاني وابچي و اباوع تلفزيون..

وبيوم بابا گلي بدلي نطلع رفضت بس بابا ما قبل رحت بدلت وصعدت بسيارة بابا واخذني الطبيب نفسي استمريت اروحله 3 اشهر وصرت احسن رجعت امتحنت خارجي و دخلت دورة تعليم اللغة الانگليزيه..

وأهم من هذا كله فترة علاجي قربتني من رب العالمين
هواي اصلي بوقتها واصلي صلاة الليل واگعد على السجاده
ساعات طويله..

چانت سجادتي ملاذي الوحيد من كل التعب..

سافرت وبديت اشتغل والتقيت بيك هناك..
وهاي حياتي و الماضي مالتي..

علي:  ششتوقعين يعني مثلاً اعوفچ لان عشتي
حيات ما تردينها؟

ــ انت فكر و سوي التريده علي...

ــ روسلينا اني احبچ ما اعوفچ على شي صار
وياچ بالماضي..

  سكت شويه وگال...

ــ ‏عندما نَتقابل تَختلط الفصُول
ليُصبحَ الصيفُ قارسٌ والشتاءَ مزهرٌ..

هيچ حسيت وياچ شعور عمري ما حسيت بيه..

ــ اني همين  اول مره اعيش هذا الشعور...

مد ايده لزم ايدي..

ــ وعد انسيچ كلشي مريتي بيه..
هسه يلا گومي نرجع ابوچ اتصل عليه..

رجعني للبيت رحت بدلت و اجت آسيا و سوينه
دولمه للغده ونسولف ونضحك..

اجه بابا للمطبخ..

ــ اتصل عليه علي يحدد موعد العقد الخميس...

ـــــــــــــــــــــــ

«ديار»

اليوم اول يوم نداوم بالجامعه الحماس والخوف بنفس الوقت احساس غريب كلش..

بدلت و حطيت مكياج خفيف وصعدت المُهره...

ــ خلصتي؟ 

ــ اي خلصت يلا امشي ننزل ياسر منتظرنه جوه بالسياره...

طلعنه الياسر وهو يسولف ويانه اني گاعده يمه ومُهره وره حسيت كل شويه يباوع عليها بالمرايه اني اباوع عليهم ومبتسمه مبينين و احد يحب الثاني وثنينهم ميحچون.. نظراتهم مو نفس قبل..

نزلنا واحنه مثل الأطرش بالزفه كلشي مانندل خابرت على زينب هي ويانه نفس الجامعه بس غير قسم شويه واجتنه..

زينب: يممممه هلا، هسه نورت الجامعه..

ــ هلو حبيبتي، تعالي انقذينه كلش مانندل..

مُهره: شلون ثنين..

ديار:  باب الشارع ما طالعاته وحدهن..

اخذتنه للقسم اول ما وصلنه للقاعه استلمونه محاضرات و كلش صعب كوله بالنگليزي واني ومُهره منحب النگليزي..

خلصنه الساعه بـ طلعنه بره ننتظر ياسر بالطريق جاينه..

ــ اگولچ شنو هاااي عيني صايره بيناتكم نظرات وكذا..

ــ منو؟؟  اني تحچين وياي؟ 

ــ لا تسوين روحچ متدرين..
اي انتِ اكو غيرچ..

ــ يا نظرات؟

ــ انتِ وياسر شفته شلون يباوع عليچ من المرايه مالت السياره ويتأمل عيونچ...

ــ يااا..  انتِ منين تجيبين هاي السوالف...  والله يا ديار..

ــ والله انتِ بدت مشاعرچ تتغير ويه ياسر
وياسر نفس الشي..

حسيت بيها شلون ارتبكت و تحاول تغير الموضوع الحد ما اجه ياسر اني هلكانه من التعب گبل رحت تغديت ونمت..

واستمرينه اسبوع بالدوام نروح ونرجع الحد ما صارت خطبة علي رحت اشتريت فستان اسود قصير و شسورت شعري وحطيت فول مكياج و رحت المُهره حطيتلها مكياج..

رسمت عيونها بالكحل صارت عيونها كلش كبار تخبل وحطيتلها لون حمره فاتح علمود تبرز عيونها اكثر ولبست فستان بيجي من فوگ تور من يم الصدر طويل وبيه فتحه هو كله مسدود بس الفتحه مبينه رجلها طلعت عبالك عارضة ازياء..

عفتها تكمل و نزلت اريد اروح اشوف فستاني الـ راشد رحت الغرفته دگيت الباب ودخلت.

ــ شنو رئيك اخووووي؟

افتريت وشمرت شعري وره  ورفعت راسي لگيت مالك وراشد واگفين وصافنين عليه....

يمممممه وگف گلبي من شفت مالك واگف دار وجها واجه راشد دفعني بره..

ــ الثوله انوب مو بس تراويني تسوي حركات الخايسه..

ــ شبيك راشد اني شمدريني..

ــ امشي روحي لا اكفخچ..

دخل وسد الباب

دمعت عيوني من گد الفشله گمت امشي واغم بگصتي..

ــ شگد ثوله
اكبر ثوله اني
يااااربي...

رحت لبست حجاب و بشت ولبست كمامه حتى ميبين المكياج وطلعنه البيت روسلينا...

ـــــــــــــــــــــــ

«مُهره»

هذا الاسبوع عباره عن دراسه ولطم اني وديار كلشي
منفتهم كلشي صعب عبالك الدكتور يحچي ويه روحه
ولا واحد بالقسم مفتهم...

رجعنه من الجامعه البيت هوسه بالخطار اني صعدت فوگ بسرعه..

ــ حبي راح ابدل واحط مكياج واجي احطلچ مكياج..

ــ تمام حب انتظرچ.. 

صعدت فوگ ميته من الجوع طلعت اكل من
الثلاجه حميته واكلت ونظفت البيت ورحت
اختاريت فستان لبسته واجت ديار حطتلي
مكياج  لان اني كلشي ما اعرف احط بس كحله وحمره... من خلصت..

ــ يلا باعي حلوو؟

كمت باوعت على المرايه وانصدمت بشكلي راسمه عيوني بكحل اسود طالعه عيوني كلش كبار والحمره لونها يخبل..

ــ عاشت ايدچ.. يخبل

ــ وايدج قلبي... اني راح انزل.

نزلت ديار واني شسورت شعري واسمع واصوات
الولد يبدلون بغرفتي القديمه صارت الـ علي ينام
بيها ونقل ملابسه بيها..

وياسر ماخذ ملابسه ورايح يمه لبست بشت وشال و كمامه نفس ما وصتني ديار ونزلت جوه..

صعدنه بسيارة راشد مطلع اغاني ومعليه كلش و يركص و من يصير ازدحام يطلع جسمه من الجامه ويهز اجتاف..

اباوع على ياسر ومالك و علي صاعدين سياره وحدهم يباوعون على راشد وميتين ضحك...

بس الطريق چانت الونسه كافيه ضحكنه ضحك
اني وزينب وديار وراشد...

من وصلنه نزلنا چان بيت روسلينا صدك يلمع من
گد النظافه والريحه تجنن دخلنه للصاله هي چانت
گاعده لابسه فستان اوف وايت وفاتحه شعرها طويل ولابسه تاج ناعم طالعه تجنن رحنه بوسناها اني والبنات وشغلو اغاني والبنات يركصون اني وديار وزينب  نزعنا الحجابات والبنات يركصن بس اني گاعده يم روسلينه
و زينب رگصت ركص نفس راشد متنه ضحك عليها وعلى كميت التشابه بيناتهم...

شويه  و گالو راح يدخل الشيخ اني رحت لبست الحجاب وبقيت من بعيد اباوع عليهم علي لابس قميص ابيض ومفتوحه كم دگمه و ستره سوده وهو اكتافه عريضه وطويل  ورافع شعره طالع كلش حلو وهيبه البنات اقابربهم صافنات عليه ويبسبسن...

عقدو وخلصو رفعو الغطه من روسلينا و علي بقه بس صافن عليها مبين شگد يحبها وفرحان بيها وهي خجلت من نظراته بقت مدنگه وهو ولا رفع عينه من عدها لبسها الحلقه والذهب...

شويه و طلعنه رجعنه للبيت و اني ميته تعب  رحت الغرفة ديار زينب يمها واختها سجى  گعدت على طرف السرير..

زينب:  بعدني ما شبعانه رگص

سجى:  اووي متعبين؟

زينب:  بلا عفيه سجى خليني براحتي اريد ارگص واهز بكيفي..

ديار:  ههههه راح اشغلچ اغاني ردح..

زينب:  اي عفيه... تعالي مُهره رگصي ويانه..

شغلت اغاني وبقن يرگصن واني همين رگصت وياهن  باوعت عليهن عايفات الرگص وصافنات عليه..

ــ شبيچن؟

زينب:  عمي على كيفچ طلعتينه كسر برگصچ هذا...

ديار:  ولچ شنو هذا رگصچ يخبل...

ضحكت..

ــ من زمان چنت احب ارگص بس صار هوووواي ما راكصه..

زينب:  ليش متركصين الـ ياسر ؟

ما حسيت الا هاي سجى گامت طلعت ورگعت الباب حيل..

زينب:  خاب ثول...

مدري شبيها هاي البنيه يمكن هاي ثاني مره اشوفها وهي حتى سلام ماكو...

بقيت شويه گاعده بعدين لبست شي يغطيني وصعدت فوگ فتحت الباب بـ المفتاح و دخلت نزعت حجابي والبشت شمرتهم على القنفه ونزعت الحذاء الكعب رجليه موتني من عنده...

رحت للغرفه اريد ابدل اول ما فتحت الباب لگيت ياسر واگف ينزع بالساعه وفاتح دگم قميصه.. 

التفت عليه وبقى يباوع عليه واني گلبي راح يطلع..

اتقرب عليه بخطوات ثابته وعيونه بعيوني..

كل ما يقترب تزيد دگات گلبي ورجفتي...

يتبع🦋....

ـــــــــــــــــــــــ