رواية خيِّال ومُهرة الفصل الثاني 2 - بقلم amna

«بسم الله الرحمن الرحيم»
«خـيَّـال و مُـهـره»
«آمـنـه عـادل»
========
«لا تنسون التصويت آغاتاتي»

«اللهم صلِّ على محمد وآلِ محمد»

ـــــــــــــــــــــ

في ليلة بارده
لا اريد شيء يغطيني..
اردت من البرد ان يصل لعظامي..
اردته ان يصل الى قلبي...
ليطفئ تلك النار التي تلهب داخلي....

.......

كعدت من نومي قبل ما تطلع الشمس
رحت بهدوء للكنتور طلعتلي ثوب وحجاب
لبست الثوب وحطيت الشال على كتفي
بسرعه وطلعت بلا ما احد يحس بيه.

فتحت الباب بهدوء حتى محد يگعد
ركضت للمكان الاحبه اركض وابتسامتي
ما راحت من وچهي وصلت النخلتي
وصديقتي التسمع سوالفي الحلوه والبايخه
كعدت جواها واني اكللها بهدوء....

-ما تأخرت  عليج موو؟

تچيت ظهري على جذعها واني اسحب النفس بالگوه
بدت الشمس تشرق بألوانها الدافيه وعيني راحت  للشط البده ضوه الشمس يعكس عليه...

احب تفاصيل حياتي مايمر يوم اذا ما اروح للنخلة
واگعد اباوع الشروق الشمس...

رجعت للبيت لگيت امي وابوي يتريگون اول ما شافني
ابوي گال..

ــ خايبه انتِ مخبله يوميا رايحه للنخله وترگضين
من الصبح شماالچ؟

-بويه شنيه خليني براحتي.

-ومدري شني تعاي اكليلچ لكمه خلي نروح نشتغل.

اكلت على السريع ورحت اشتغل ويه ابوي شيگلي
اسوي كلشي لان احس اني مسؤوله على مزرعتنه وياه..

خلصنه شغل رجعنه للبيت ولگيت امي تسوي غدا ومخبوصه

-ها يمه شبيج ترگضين هيچ وهيچ؟؟

-راح يجون بيت ابو علي صديق ابوج هو ومرته وبته.

-صدك؟؟؟

ضليت اگمز من الفرحه مادري بروحي

-خايب ومرض شبيج انصرعتي،  روحي نظفي الديوانية

-خوش رايحه

رحت نظفتها نوب دخلت سبحت وبدلت وظفرت شعري..

ابو علي صديق بابا عنده بنيه و2 ولد ما يجون وياه الولد قليل بس كل ما يجينه يجيب وياه بنته صديقتي  يمكن صار 6 سنوات كلش احبها وهي همين..

كل ما تجي تجيبلي وياها كتب بالبسكوت من
اهلي علمود ما يدرون اقراه نوب ارجعه الها..

دگت الباب خلت افكاري تتشتت كمت بسرعه فتحت الباب سلمت على عمو وراه دخلت زوجته سلمت عليها ودخلت ديار بسرعه رحت ضميتها.

-اشتاقيتلچ كومه

-اني ميته على شوفتج ياابعد گلبي  وروحي.

دخلتهم ورحت اصب ويه امي الغدا تغدينه واخذت ديار ورحت للمكان الاكعد بيه كل مره تجي نروح نكعد هناك.

كعدنه سوه نسولف على الروايات وعلى المدرسه هي صف خامس اعدادي وكلش شاطره..

_مُهرة شنو حلمج؟

_حلمي تصير عندي مكتبة واحط بيها كل كتب العالم...

_ههههه حلمج بسيط وحلوو.

_يمكن بسيط بس حلمي المفضل، عندي احلام ثانية بس هذا اهم واحد.. وانتِ شنو حلمج؟؟

_حلمي ادخل جامعة طب اسنان واحب واحد هناك.

_حلمچ يختلف عني

_اكولچ مُهرة ذاك مو بابا؟

التفتت اباوع على المكان الأشرت عليه وگتلها...

_اي هو..

_شعجب اجه يمنه

_مادري. تقرب يمنه وگال

_هااا بنات  شتسوون هنا كاعدات

ديار: نسولف والجو يجنن...

ابو علي: اي والله صح يخبل عاشت ايدكم هنا
تگعدون تسولفون هم هدوء وهم  حتى محد يسمعكم..

مُهرة: اهم شي محد يسمع..

بقينه نسولف الحد ما صار المغرب من جاي نكوم
نرجع كال ابو علي.

_اكلج مُهرة عمو متجين ويانه اليوم وباجر نرجع

ديار: اي عليچ الله تعالي

مُهرة: والله مادري،  بس يمكن بابا مايقبل..

ابو علي: معليچ ابوچ يمي اني اقنعه

ديار:  والله ما اكدر اصدك راح تجين ويانه!

مُهرة: واني همين مامصدگه وآخيراً راح اطلع من المزرعه

رحنه للبيت اني رتبت البيت وچان اكو اماعين وصخه غسلتهن واجتي ديار تركض

ـ ولج مُهرة قبل ابوج ترحين..

ـ صدك عود قبل؟؟

- اي والله ولج ما مصدگه راح تباتين يمي اليوم

- امشي بلا خلي اشوفهم علمود اصدك

ـ يا طايحة الحظ  شنو اچذب عليچ؟ واني اسحبها من ايدها

ـ لا والله مو تچذبين بس خلي اشوف الوجوه مگلوبه لو لا.

ـ هسه انتِ شعليج مگلوبه لا امشي ويانه ونچبي..
ـ هم صدك..

رحت للغرفة احتاريت شلبس واني ماعدي غير كم ثوب دخلت امي وهي ضايجه شويه..

- ها يمه شو چنچ ضايجه ماترديني اروح

ـ لا روحي تونسي

ـ چا شبيج ضايجه

ـ مادري شبيه قلبي مقبوض

ـ اسم الله يمه لا تحجين هيچ بس تگولين هاي
الكلمه احس راح يجي الشر لومدري شني.

ـ لا يمه اسم الله  عوفي هاي السالفه وكليلي شتلبسين خو ما ترحين البغداد بـ ثوب؟

-هو اني شعندي غيرهن؟

ــ تعاي اني اطيچ...

راحت للكنتور طلعت منه ملابس واجتي يمي..

ـ هاج لبسي ذني..

فتحتهن قميص ابيض وتنوره طويه سوده ضحكت وكلت

ـ منيلج ذني

ـ مالاتي قديمات..

ـ يااا...  عود صدگ

ـ اي والله

ـ ههههههه.. خوش راح البسهن واجي

بدلت وخليت كحل عرب من مالت امي وعدلت حجابي ورحت الديار واگفه بالباب منتظرتني

-يمه شنو هالجمال عيني

ـ اكلچ وين ابوي؟؟

ـ بالباب  هو وبابا

ـ ها خوش خلي ابوس امي واجيج..

ـ بس استعجلي فدووه..

ـ اي خوش... 

رحت أركض ضميتها بستها وطلعنه واني صفنت على الجامه اباوع ولا درت وچهي على طول الطريق اباوع
وما مصدگه اني طالعه من بيتنه..

ـــــــــــــــــــ

«روسلينا»

قررت اعوف كلشي وراي وما ارجع افكر بالعشته قبل
وشنو المريت بيه محيته من عقلي..

سافرت دوله اجنبيه وقررت ابني حياتي من جديد  هناك..

بابا ساعدني وگف وياي وكال شتقررين اني وياج حچيتله على الأريد اسويه قبل وگال

ـ اكو صديق عندي هناك عنده ماركه عالميه مال ملابس راح اتوصل وياه علمود ايوضفج عنده.

مر اسبوع واجه بابا كالي

ـــ الرجال عنده أسئله الج يريد يحجي وياج..
حجيت وياه سئلني هوواي عن عمري عن دراستي عن هوايتي..

بالأخير كال تعرفين للكاميره

ـ اني كولش احب التصوير والكاميرات والتصميم وهاي السوالف..

ـ هاهيه لعد من باجر اريدج هنا..

مرت ايام يلا سافرنه بين ما خلصت الأقامه دخلت دورة تعليم اللغة الانگليزية والحمدلله كلشي چان سهل..

سافرنه اني وابوي واجرنه شقه اعيش بيها
قريبه على الشركه حتى تسهل عليه الروحه والرجعه..

داومت بـ الشركه وبديت اصور الهم العارضين
للملابس وكلهم متعجبين بشغلي واحترافيتي..

كعدت الصبح غيرت ملابسي لبست جاكيت كابوي
وبنطرون اسود وهاينك اسود وفوگهم كوت وشال...

رحت للشركة واخذ وياي قهوة يوميا واخذ لبنيه
صديقتي اسمها جولييت كولش حبابة ولطيفه..

دخلت للصاله مال التصوير شفت جولييت رحتلها انطيتها القهوة وهي تحجي وياي«بالنگليزي»

ـ البارحه فاتتچ سالفه تخبل

ـ شنو هي؟

ـ العارض تعارك ويه المدير وصارت عركه شكبرها اخير شي العارض انطرد..

ـ يعني اليوم ماكو تصوير  الحمدلله

ـ اگللها عركه تكول مانصور

ـ اي شبيج يعني اليوم ماعدنه شي..

ـ عبالج استاذ احمد يعوفنه نرتاح اتصل بالعارضات وراح نسوي جلسه للبنات

ـ يلا عادي ما كو اشكال نصور ونتونس

صورت خلصت شغل الساعه ب5 العصر رحت للمطعم تغديت ورحت للبيت..

بقينه على هذا الوضع اسبوع الحد ما لگو عارض جديد
رحت الغرفة التصوير وحضرنه كلشي يخص الجلسة ومنتظرين حضرت العارض يجي..
«بالنگليزي»

ـ اگلج شنو هذا وين راح

جولييت: انتِ تعرفين يا عارض

ـ واذا عارض مهم شنو يعني يبقينه ننتظره هلگد

ـ اي هما هيچ المشهورين..

دخل وهو رافع راسه لابس زي العمل جان هذا اخير اصدار للماركه وهو يكول

ـ اسف... اسف  على الانتظار بس واجهت مشكلة بالطريق اعتذر...

كلها ردت عليه اني سويت نفسي ما اسمع رحت للكاميرا وهو بدا يسوي الحركات ابد ما شلع گلبي حركته سريعه..

راح يغير البس واني نظفت العدسه من جديد رجع لابس همين زي العمل بس بغير الوان  ..

كملنه الجلسة بنص ساعه من گد ما سريع وعنده ثقة بنفسه حتى ما طلب يشوف الصور اكو بيهم اصورهم صوره الا يشفونها يلا...

بالاخير من خلصنه الجلسة لبس ملابسه واجه يريد  يشوف الصور واني جنت واكفه وياهم اباوع بشاشة الحاسبه وكلنه مندمجين ونسولف..

كالت تولين«بالنگليزي»

ـ عاشت ايدچ روسلينا يجنن التصوير

ـ حبيبتي شكراً

حچه بصوت اقرب بالهمس وبالعراقي

ـ ترى اني المحلي التصوير

باوعت عليه وابتسمت وهو باوع عليه وانصدم عباله اني ما اعرف عربي...

ـــــــــــــــــــــــ
«آسيا»

أكثر انسانه عايشه حياتها بروتين اني ..

كل شي بحياتي عباره عن ملل وروتين اني..
من المدرسه للبيت..
من البيت للمدرسه..
ماكو اي تغيير..

بس عندي اهم شي مدرستي وصديقاتي
كلش متعلقه بيهن وحتى دائماً يجن اليه
للبيت..

رجعت من المدرسه لگيت البيت كالعاده يلمع
لمع من النظافة وريحة الأكل توصل النهاية الشارع..

سلمت على امي

ـ بدلي وتعاي نصب غدا اني وياج..

ـ اخواني اجو؟

ـ اي اجو بغرفتهم يبدلون

ـ خوش هسه اجي. .

رحت بدلت وصبينا غدا وتغدينه واجتني صديقتي لينا بالاسبوع تجيني مرتين نقره سوه انگليزي هي كلش حبابه
وامها مدرسه بمدرستنه..

رحت وصيت اختي الصغيره تروح تجيبلنه
حلويات من المحل اليمنه ورجعت يم لينا..

ـ آسيا ليش متجربين تحچين وياه؟

ـ ما ادري لينا

ـ شبيج جربي اذا ما عجبچ الغي كولشي..

ـ اخاف واستحي

ـ ترى مابيها شي جربي اسبوع وراها اذا ما ارتاحيتي الغي كلشي...

ــ الله كريم  هسه خلي نقره كافي.

بقينا لليل نقره قبل لا تطلع گلتلي اطيني موبايلچ اسجل الرقم اطيتها الموبايل

ـ واخيراً..

ـ شنو؟؟

ـ قبلتي

ـ ترى ابطل..

ـ لا بعد ما احجي

ضحكنه كتبت الرقم وراحت دخلت للبيت واني احجي ويه روحي السويته صح لو غلط گالتلي امي..

ـ اسيا فرشي لخوانج اني راح انام تعبت كلش

ـ اي خوش يمه..

فرشت ورحت الغرفتي كعدت على سريري
ولزمت الموبايل وكتبت بالرساله

(السلام عليكم
اني اسيا
لينا اليوم انطتني الرقم..)

  وره 5 دقايق اتصل احس قلبي كام يوجعني وصارت بيه رجفه بكل جسمي اريد افتح الخط ما اگدر انسد ورجع من جديد اتصل فتحت خط وحطيت الموبايل على آذاني

ـ الووو.. 

ـ الو

ـ السلام عليكم شلونج آسيا

ـ وعليكم السلام الحمدلله زينه وانت

ـ الحمدلله.. 

سكتنه شويه وگال

ـ خلي نصير اصدقاء

- ان شاءالله..

  يحجي مرتاح و بثقه عكسي ميته خوف وارجف حتى صوتي يرجف

سكتنه شويه وگال

ـ  نسولف ليش هلگد مرتبكه

ـ اول مره بحياتي احچي ويه ولد..

ـ اي يابه حقچ والله ما الومج..

بقينه يمكن ساعه كامله هو يسئل واني اجاوب وشويه شويه سحب الخوف والتوتر الجنت عايشته وصرنه اصدقاء صدگ.

نگعد ساعات نسولف هو مهتم بكل التفاصيل ويحب يسمعني شكد ما حجيت...

اول مره اشوفه بيها طلعت من المدرسه و لگيته واكف بالباب حتى ما عرفته بالبدايه بعدين لينا گالتلي  ..

لابس قميص رصاصي وبنطرون  وشعره اسود وشويه طويل حتى ما ركزت بالملامح لان چنت حيل مستحيه..

لا رحت يمه ولا حچيت وياه بس حسيت بيه يمشي وراي..
اول مادخلت للبيت رحت للموبايل  لگيته يدگ نفس ما توقعت جاوبته...

ــ الوو... شلونچ؟

ـ الحمدلله...  شعجب اجيت للمدرسه؟

ـ ماعندي دوام بالجامعه  وردت اشوفچ..

ـ لو گايلي

ـ حتى اني ما ادري راح اجي..
بس فضولي اشوف شكلچ خلاني اجي ما اعرف شلون اوصفلچ بس اني ما متقرب الشخص ولا مفكر اتقرب مثل ما حسيت ارتاحيت الچ وصرتي قريبه مني...

مادري شنو حسيت بشعور غريب حاوطني
والأبتسامه شگت حلكي..

ــــــــــــــــــــــ

«مُهرة»

وصلنا البيت ديار البيت كلش چبير  الاثاث يجنن
فتحلنه الباب ولد شكله يخبل صاحتله امه اسمه
راشد صعدتني ديار فوگ وتأشر..

ـ هاي غرفتي وذيج غرفت راشد
وياسر الطابق الثالث كوله اله..

ـ هاااا

ـ وجعاااا تعاي طبي..

  دخلت للغرفة تجننن ركن كامل من الغرفة مكتبه بيضه ومتروسه كتب وسرير ابيض وكنتور ابيض وميز عليه
عطور ومكياج بس شنو الترتيب والنظافه والغراض
انبهرت بجمالها..

ـ الله.....  غرفتج تخببل..

ـ تدرين دائماً اتخيلچ وياي بالغرفة وصارت صدك وانتِ يمي هسه رحت شبگتها وابوس بيها

ـ تدرين بيه شگد احبچ...

ـ وانتِ تدرين شگد احبچ....

كمنا نطفر ونلعب ونگمز وميتين ضحك

ديار:  أگلچ خلي اطيج ملابس بدلي..

ــ خوش..

طلعت من الكنتور واطتنياهن..

ـ بدلي اني حروح للحمام  واجي..

لبست بجامه  تخبل حرير و وياها قميصها نفس الون والنقشه، فتحت الظفيره مالتي دخلت ديار

ـ ولج شنو هالجمال..

تقربت يمي اخذت حمره من على الميز وتقربت خلت الشفتي وهي همين حطت النفسهاا وجابت موبايلها..

ـ تعاي ناخذ صور سوه..

صورنه كم صوره و رحنه للحمام گالت ادخلي
من تخلصين تعاي للغرفه..

ـ شبيچ انتظريني

ـ لا والله ميته تعب

ـ يلا روحي امداچ

ـ ههههههه...

سديت الباب غسلت وكملت طلعت اباوع على البيت شلون نظيف ومرتب والاثاث يجنن  واحجي بگلبي شيصير لو ابووي يبيع المزرعه ونجي نعيش بيت مثل هذا..

بس وين اكو مثل مزرعتنا الترد الروح..

امشي اباوع للغراض واسولف بداخلي الى ان حسيت جسمي نركع بفد شي فتحت عيوني اباوع والگاه ولد طويل ولابس قميص اسود وبنطرون ودگم قميصة مفتوح نصهن اباوع النفسي اني بنص صدره وهو ايده على ظهري يمممممممه قلللبي وگف بسرعه وخرت وطبيت للغرفة وسديت الباب واحس الدنيا تفتر بيه وگلبي راح يطلع من مكانه..

ـ شبيج مُهرة؟؟؟

ـ ولج ديااااار..

لزمت ايدها واني اتنفس بسرعه..

ـ هاااا شبيج؟؟؟ 

ـ واحد من الولد واني امشي نرگعت بيه وحضنته
وشافني بدووون حجاب..

ـ خايبه كبر عبالي واحد مات..

ــ كبر الگبرچ ياااا خبيثه گتلچ تعاي وياي..

ـ مُهرة تعالي اكعدي واخذي نفس اهدي..

ـ والله راح امووت من القهر والفشله  .. 
بجيت واني احچي

ـ ياااا مُهرة شبيج تحچين صدگ

ـ اكللها شبكتة وحط ايده هنا أخذت ايدها حطيتها على خصري والثاني على ظهري هيج لزمني واني مثل الثوله حاطه راسي على صدره

ـ بلا عوفيني خلي اروح استفسر من الولد واجي..

ـ لا لا ولج عيب..

ـ شنو العيب؟؟

عافتني وطلعت واني كمت اجي منا ومنا وأكل
بأظافري وره شويه دخلت رحتلها على السريع

ـ ها منو طلع؟؟؟؟

ـ ياسر..

ـ الله ياخذني.

ـ ولچ ديلا هسه شنيه موتي روحچ

ـ سئلتيه

ـ لا حتى ما رحتله  بس شفت راشد ابغرفته گلت اكيد ياسر من رجع لان چان طالع،  يلا تعاي نطلع فلم وديت راشد يجيب حلويات...

شغلت التلفزيون وره شويه اندگ الباب راحت ديار وره شويه طبت بيدها علاليگ

بقينه نباووع على الفلم تأخر الوقت ونمنا..
گعدت الصبح اول مره اگعد والشمس طالعه باوعت الديار نايمه..

كمت للمكتبة أخذت كتاب لفت انتباهي لاسمه« ابابيل»   اخذته ورحت يم الشباك كعدت وبديت اقره سافرت الغير عالم  مادري بالوقت الحد ما خلصت الكتاب واني مبتسمه شگد حلووووو.. كعدت ديار

ـ صباح الخير يا حلوو

ــ صباح النور يابعد گلبي

ـ شتسوين؟؟

- قريت هذا الكتاب

ــ ابابيل...  شفتيه شلون حلوو

ـ يجنن

ـ بعد بيه جزء

ـ صدك

ـ اي والله

ـ عدچ اريد اقراهن

ـ اي طبعاً عندي غير هذا العشق.  بس گومي خلي نتريگ هسه

ـ يلا امشي اني جوعااااانه

ــ يلا امشي  سحبت ايدي

ـ خلي البس ملابسي أوگفي..

ـ هاچ لبسي هذني

ـ يلا جيبي

لبستهن بجامه عريض كلش وياها سويتر على گولتها همين عريض  ولبست شال ونزلنا …

گاعدين كلهم على ميز الطعام شفته حتى ياسر گاعد وياهم كلت بصوت ناصي واني منزله راسي..

ـ صباح الخير..

ردو كلهم صباح النور كعدنه اني وديار وحده
بصف الثانيه  اني مدنگه راسي ولا رفعته 

ابو علي: مُهرة عمو ليش متاكلين؟

ـ ها عمو اي راح اكل.

ـ اي بنيتي اكلي..

اكلت لگمتين يمكن وبعد ما اكدر أكل بعد

ياسر:  أنه بعد شويه اروح للبصره …

ابو علي:  الله وياك..

سكتو شويه بعدين گال...

ابو علي:  ياسر اخذ وياك مُهرة وصلها وياك..

ياسر:  ليش ما توصلها انته؟؟

اباوع عليهم ذولي شبيهم يحجون عبالك اني مو يمهم

ابو علي  : بطريقك..

ياسر: ربع ساعه واطلع..

كمت صعدت فوك واجت ديار وراي

ـ شنيه هسه احنه شفتهمنه اجيتي البارحه بليل ورجعتي من الصبح..

ـ يلا ان شاءالله غير مره.

ردت ابدل ما قبلت وذممتني الا اخذهن الملابس. 

نزلت سلمت وطلعت لگيت السياره بالباب فتحت الباب الخلفي وصعدت باوعت على المراية البلنص شفته لابس مناظر شمسيه سود..

مشت السياره فتحت الجامه وبقيت اباوع  والهوى يضرب بوجهي وااحب بروحي مثل العصفور البالقفص وحرروه المده قليله وراح يرجع..

صح اني كلش احب بيتنه والمكان الگاعدين بيه كله بس مرات اتمنا نطلع الغير مكان بس ابوي ابد ما يقبل..

بقيت افكر الحد ما وصلنا والمح بيتنا من بعيد كله  اسود اباوع للزرع كله محترك ياااربي شصاااير هذااا تعبنه اني وابوي تقربنا على البيت اكثر..

گتله بصوت عالي..

ـ اووووگف..
وووگف السياره.. 

وهو بسرعه وكفها واني فتحت الباب وركضت كل سرعتيي  واصيح

ـ باااااباااا
يمممممه...... ويننننننكم

الحد ما وصلت للباب واشوف بعيني ابوي وامي بس بتابوتين..

يتبع🦋....

ــــــــــــــــــــــــــــــــ

حبيباتي لا تنسون المتابعه والتصويت..

اشتركو بقناتي التلي♥🤍