رواية قلب الصخر الفصل الرابع عشر 14 - بقلم الكاتبة ديانا

البارت الرابع عشر
قلب الصخر

ريم ...
اني خطيت خطوة كلش جبيرة بحياتي ... و ما حسبت حساب احد ... بس حسبت حساب گلبي الي هوى شخص بفترة زمنية قليلة و اصعبها بحياتي ...
بس شكد ردت اقنع نفسي هذا مو حب ... هذا اعجاب لشهامته و مواقفه و رجولته ... لكن ما فاد ... گلبي جان اله رد ثاني ... روحي الي هي اسيرته ..الها رد ثاني .. عيوني الي تترجم لغة عيونه جان الها رد ثاني ... ثارت عليه حواسي و دواخلي لما حاولت انفي هذا الاحساس واكول مو حب ... الجموني و خلوني اعترف وبصوت عالي اني اريده ...
حتى ابوية الي رباني و تعب عليه مختاريته ... كفة صخر و نبضي اله هي الي دكت بميزان اختياري ... و ابوية نسيت زيناته بلحظة عشگ ... يجوز اني غلطانه... لا بل اكيد ... لكن اكو شي يشدني بصخر .. عيونه ... لا ... گلبه ... لا بعدني متكشفت على مشاعره ... حنيته ... يمكن ... اي يجوز حنيته الي خلتني ذايبة بين ايده و ناسية كل خلق الله حتى ابوية ... و اخوتي و امي 😢
كمت من مكاني الوب و بية غصة طويلة و خانكتني العبرة ... صورة ابوية وهو يودعني مدتروح بالي ...
جتني رباب و شايلة كيس چبير و علاليك وياه و ضحكتها شكبرها ... انسانه وديعة و بسيطة كل همهة تخدم ابن اختها الشيخ و رضاه عندها بالدنية كلها ....
كلتلي ياله عروستنه اشو انت ممتحمسة ... تعاي اراويج شجبت وياي ...
صخر بنفسه اختارلج هالفستان اني وحسين رحنا و جبت ثلاث و من بينهم اختار هذا ... فتحته و اني انصدمت ع الجمال الي حمله ... الصدر و الردان شفاف و منثور عليه كرستال ناعم و التنورة الجوة منفوشة و طبقات من التول هواااية وهم منثور كرستال ... صراحة هذا نفنوف الاحلام ... بس ما ادري ليش مفرحانة گلبي عاصرني ... ابتسمت غصباً عني افرح هالمسكينه الي واكفة تنتظر اشارة مني او اي مشاعر ... بعدين طلعت تكرمون الحذاء ... جميييل بمعنى الكلمة ابيض و نزاكة مابي اي اكسسوار لكن حلو ... و بقية العلاليك ملابس و عطورات و مكياجات مهتميت الها ... و بعدين طلعتلي علبة قطيفة چبيرة  حمرا و فتحتها جان بي 😱😱😱 گلادة قاردول لف و بتوت سته و محابس ٢ و تراچي .. كالت الشيخ صديقه صايغ و هذا نيشانج ... كتلها هذا هواية ... كالت اكيد انتو مسويتوا عرس ببغداد.. من تزوجتوا العام .. افرحوا هنا و بلمتنه و فرحتنه بيكم يصير عرس احلى الاعراس لاحلى عروسين ... و جان تبوسني ... گلتلي اني فرحانه لصخر .. يستاهل كل خير ... عوضي تعبه و نسي مسؤوليات السنين ... انه ما احب اتدخل بس ترة صخر مو بالهين محافظ ع لقب الشيخ .. صخر كل دقيقة من حياته هي مو اله ... هي منذورة للحواليه و لهله و لافراد عشيرته ... تعبان يريد يخلي الكل مرتاح و على حساب راحته ...
هي تحجي واني اسرحت بيوم الي ساعدني و جان الي منقذ و لوما هو جان اني انتحرت بعد الي جان راضي  ناوي يسوي ...
كتلها اي بس امه ما فرحانة اله و هذا رح يتعبه بالزايد ...
كالت ام صخر صح صعبة بس ترة تهاب صخر كولش و تحسبله حساب ثكيل .... ويجي اليوم الي تقتنع و ترضى .. انت لا تشيلين هم ..
كتلها الله يحنن گلبها عليه .. كالت امين ... كومي ياله شوفي نواقصج جان تغمزلي .. كتلها اي نواقص قصدج كل هذا الي دازه الي صخر و بعد اكو نواقص ..؟
جان تضحك .. كالت انه صح موش متزوجة بس ترة يمكن افهم اكثر منج ... صفنت عليها كتلها يعني شنو ... كالت الي بالي بالج ... كتلها والله ما افتهمت ... جان تاشرلي على حضني .. باوعت على حضني وجان اشهك 😱😱😱كتلها شنوووووو ....؟
كالت ياله انه رح اعوفنج تخلصين كل اموراتج وهم غمزت و اروح ارجع للبيت يحتاجوني ... علمود ورة متكملين اخذج للصالون نروح نزينج ... كتلها لا حبيبتي ميحتاج اني اسوي هالشغلات ... كالت تعرفييين😳كتلها اي اعرف شوية اسوي شعري و احط مكياج خفيف ... شكرا الج حبيبتي تعبتج ... باستني و هم وصتني على صخر و طلعت ...
اني ظليت كاعدة مكابلة الغراض و صافنه ... معقولة رح اصير عروس والبس هالفستان ... بس استاهل اكون عروس،؟ و يفرح بيه زوجي .. واني اتعرضت لمحاولة تدنيس برائتي و انوثتي .. على ايد نجسة ... و جماله العريس هو نفسه الي شهد لهالكابوس و يعرفه كامل .. رح يعجبه يباوعلي لو هم رح يشمئز مني مثل ما اني مشمئزة و قرفانه من روحي .. واني و دا افكر و بدت تنزل دموعي دك موبايلي برقم ... شلته و مصحت الو بس اسمع ... تمنيت لو المتصل امي .. اشكيلها .. اصارحها .. تمسح على چتفي بحنيتها .. تصبرني ... ترفع من معنوياتي ... تنفض ذرات الخوف الي سيطرت عليه ... لكن خاب مناي و الصوت رجولي ... هذا صخر ...

صخر ...
انه هملت المي و الجرح الي بچتفي ينزف بس قليل ... و مدرت بال اله ... التهيت بامور الزفة و عندي كم شغلة بالبيت سويتها ... جتي رباب و كلتلي شيخ ريم انطيتها الغراض كلهن مثل ما ردت .. كتلها و شلونها جانت .. كالت والله معجبتني  لونها مخطوف وقهرتني مالها احد وبهاليوم تحتاج البنت ام لو اخت يمها ... كتله رباب اريدنج ما تعوفيها و ظلي يمها عوفي البيت بي ناس هواي غيرج يكملون شغلج وانت ابقي يمها ... للعصر حتى ادز حسين وياج و جيبوها لهنا لان ما انزف ببيتي الا هنا ..
كالت اي ان شاءالله ..
طلعت التليفون و دكيت رقمها الي جبته من مرت اخوي .. شالته و ما حجت بس انفاسها اسمعها و جانت انفاس بچي .. كتلها ريم تسمعيني .. كامت تبجي اكثر ..
كتلها .. انه مو اتفقت وياج دموعج غالية علية بغلاة عمري .. ليش تأذيني ... انه ادري انت تحولت حياتج بيوم و ليلة ... بس انت بايد صخر بايد الي يبيع عمره و يحميج .. مسحي دموعج ... و لا تخليني اجي هسة و انه امسحهن .. احجي ولو  چلمة ... صوتج الدافي وينه ...
غزالتي ... ترة صخر موش سهلة عليه يظل يتوسل .. وهذه احد عجائب الدنيا..ياله طمنيني بحچاية حتى اروح اكمل شغلي و فد ساعتين و ادزلج حسين و رباب يجيبوج...
جان تنطق و اخيراً كالت وهي تبچي .. صخر اني خايفة ...غمضت عيني حيييل و روحي شاغت من حجايتها .. كتلها (بس مغصوب مو من كل گلبي) هسة اخرب كلشي و ارجعج لهلج لو موش رايدة نكمل ..
سكتت و انه انتظر جوابها على نار .. جنت خايف تهون .. و حنت لاهلهة و تريد ترجع .. طولت الثواني و ماردت جواب ... وانه مثل الطفل اتلهفت لجوابها ... كالت لا ...
انه اتنهدت براحة كتلها لعد من شنو خايفة ...
كالت ... اني خايفة من فكرة اكون عروسة ...
انه صدك ضحكت ... هذه طفلة ..؟ معقولة تصارحني الي بهالفكرة .. ؟ كالت اشو تضحك ...؟ كتلها اولاً انه ما راح اكلج ... يجوز اشمنج و اغفيج بين ضلوعي و .... سكتت حتى اتلاعب باعصابها ...جان دكول بصوت ناصي و خايفة  ... اي وبعد ...؟ هم ضحكت كتلها تريدين تعرفين بعد ... انتظري فد ساعتين و انت حتعرفين شرح اسوي بعد ... جان يجيني صوت ...طوووووووط
طبكت التليفون غزالتي ... خايفة بعد روحي و ما عدها احد تشكيله انه كل ناسها .. تبسمت و حطيت چفي على صدري اهدي گلبي الي جان ينبض بجنون ...

بعد الزفة الكبيرة و الحدث الي جان شاغل القرية كلها و حضور الاعداد الكبيرة من سكانها و تعبيرهم بالافراح و المسرات لشيخ الشباب شيخهم المقدام صخر ...
صار وقت انتهاء الحفل و توديعهم اياه متمنين له زيجة العمر ومنه المال و من عروسه العيال....
دخل العروسان لغرفتهم ....
ريم ..
طببتني خالته رباب للغرفة و وياها بنات ام محسن يهلهلون و يكولون عبارات مال عرس واني ارجف هو جان برة كتلها رباب رح تعوفيني ؟؟؟ كالت چا شلون ابقى؟؟؟  ... وكاموا يضحكون ... و كلتلي لا تخافين ترة انتو متزوجين قبل لا تعيشين اللقطة ... و خلتهم يضحكون و طلعوا ...
ظليت كاعدة افرك بيدي و اتمنى ميجي .. الغرفة جانت تخبل بكل تفاصيلها اثاثها و ستائرها الوانها بالوان الزولية و الحيطان مصبوغة كريمي ... وحاطين بالكاع دوشك ... ابو نفر .. مهتميت عفته و صينية عشه مشاوي و كاسة طرشي و تمن وعليه شعرية و فوكاه لحم ... و زلاطة و لبن و خبز .. ويمه علبة حلويات و ماعون كرزات و عصاير .. اني اباوع ع الصينية و نفسي لعبانه ... صخر ما رح يعدي اليوم چنه على خير .. اشو سواها صدك ...
هذا و محضر كلشي ... و جان تنفتح الباب ... و يدخل هو ... اني عصرت ايدي و غمضت حيييل ... سد الباب و ظل واكف ... جنت منتظرة يهجم عليه ... هيج خليت ببالي ... لان عليش الدور كولش بدلة و مزايق و ناس ركصت علما كالت بس و هلاهل و فرشة و عشا شبقة ....؟
فتحت عيني و انتبهت من ورة البرقع بعدة واكف و يباوعلي ... لابس دشداشة بيضا و غترة بيضة و عگال و عباية على جتفه و ساعة ذهبية بايده اليسرة و محبس باصبعه الزغير .... كل تفاصيله شفتها و حفظتها و بالاخص عطره الي ملأ الغرفه و صار بدل  اوكسجيني ...
حفظته بين ضلوعي ...
اجة تقدم ببطيء و كل ميخطو خطوة گلبي يخفق اكثر و روحي تشتاگ اكثر ... خايفة و مو خايفة .... خايفة و هذا شعور الخوف الي ينتاب اي بنية بليلة مثل هذه ... و مو خايفة ... لاني وجدت الامان بشخصه و چفه ....
مد ايده و گلي انطيني ايدج ... ترددت بالبداية لكن قربه الي خلاني امسح هالتردد من اركان روحي بكل رضا سلمته ايدي ... شلت راسي و باوعته و ع السريع دنكت ... جرني من ايدي و وكفت ... شال البرگع و ظل يباوعلي ... اني جنت حاطة مكياج خفيف و سرحت شعري و هديته ... فضلت ع الطبيعة اكون ...
گلي ... سبحان الرسمج لوحة ...انت اية وانه ارتلچ ... ماكو غيري اليعرف تفسيرچ ... انت نجمة وانه بس  الوحج .. وبس الي يسطع ضواج ...  انت نبض بگلبي سكن من سنين ... انت زهرة بضلوعي زرعتج ...
اني استحيت يا ربي شنو هالكلاااام ...
جان ينصي و يبوسني من راسي ... گلي من اليوم انت حرمة صخر .. صخر الي يفديج مو بس بالمال ... بروحه و براحته ... واذا شفت دمعة تدهدرت من هالعين .. انگلب ذيب و اكل البچاج ... ضحكت جان يكولي و بصوت حنين اعجبنج من اگلب النبض چلمات ... انه انشيء لغة واخليها بأسمچ ... كتله كافي خجلت ... جان يشيل البركع و رجعة عليه و علي وصرنا اثنيننا جواه و نصى  و باس عيني گلي اذوبن بخجل هالعيون ... ضحكت جان ينصي و باس شفتي 😱😱تفاجئت بس بوسة زغيرة گلي اطيرن و بلاية جنحان من تنرسم بسمة على هالشفايف ... نزلت راسي وجان يرفعه من حنجي و باس حنجي ونزل على ركبتي و شمها ... اني بعد ما كدرت وخرت ليغاد .. و هو راسا وكف و ابتعد .. شافني ارتبكت .. وكمت افرك بايدي ... هو صح نساني ... الي مريت بي بكلماته الحلوة .. بس ما اعرف شجاني و تذكرت هذاك اليوم ...

صخر ...
بعد ما مليتها حنان و حب نابع من اعتق نهر بگلبي الي جان مهجور و هي الحورية الوحيدة الي سكنته ...
شفتها ارتبكت و وخرت غاد ... انه راسةً تذكرت لازم اراعيها و امهدلها ... واذا شفتها ما تريد نهائي ما اقرب الها ... الى ان تنسى و تتحسن ...
مديت ايدي و بلطف على ايديناتها الي من الارتباك و الخوف صارت تفرك بيهن ... لزمتها و جانت باردة ... كعدت ع السرير و كعدتها بصفي ... صرت اسمع نبضها ... و نفسها المرتعب ... حطيت ايدها على صدري و كتلها موش وحدج احاسيسج ثايرة ... انه جواية زلازل و بركان ...
كتلها شوفي يالغزالة ... انه صح يهابني كل الناس و يرتعب مني الجبير قبل الزغير ... بس ترة انه وي هذا و اشرتلها على كلبها ... اصيرن خاتم اهنا وجان ااشر على اصبعها ... و انه عد وعدي ... اي حقوق زوجية منج ما رايدها الا برضاج ... و ما راح اتكلم بيها نهائي ... و محاللج و واهبج الى ان انت تبادرين ...
اطمأنت و رفعت راسها و انفاسها انتظمت .... كالت يعني انت ما راح .... وجان تسكت ... كتلها اي ما راح اتدنى الج الا برضاج ... موافقة ..؟
وهسة گومي جيبلي عشة لان جوعان ...
كامت وكفت و جان تنصي على راسي وباسته ... كالت الله يحفظك ... و يعافيك و جان تلزم صفحة چتفي المصاب وانعصرت كتلها لا لا تلزمي يأذيني ... وخرت العبا و جان تشوفه ينزف ... اندهشت وكالت صخر انت تنزف ..............