رواية قلب الصخر الفصل السادس 6 - بقلم الكاتبة ديانا

البارت السادس
قلب الصخر

صخر ...
طلعها ابن خالها من الحمام و حط الخاولي عليها بس هي متحشمة ما خالعه .... و دخلها للغرفة و هي تبچي ...
ورة دقايق طلع و اجة يحاچيني و الخوف بعينه ...جان يكلي ... هسة شلون ...؟ كتله والله يا ابن عمي كتلك الوضع و الي رح يجي ترة موش زين ... خلي ببالك ... اتصل بوالدك و احجيله كلشي و انطي الحل .... الي انه اتبرعت بي ( كلت خلي اخوفه ..) ترة لو غيري ما يسويها .... بس انه غيرتي ما قبلت تتهاون و انتو ضيوفي و محسوبين علي ...

وافق يتصل بأبوه و فعلاً الي اتوقعته صار ... ابوه تخبل متحمل كله هسة جاي انطيني العنوان ... طبعاً انه عفتهم بالبيت و ركبت سيارتي و رحت لابو راضي ... نزلت من سيارتي و طبيت لمحله و بكل قطرة غضب عندي كتله تحضر ... باجر مجلس فصل تلم بي عشيرتك و هلك و انه رح اجيب عشاير العمارة كلها يشهدون على خيسة ابنك ....
جان يكوم يوكف و يكلي بسسسسك يا ابن جبار احجي عدل ولا تهرم ... شنو الموضوع ..؟ كتله اسأل ابنك العار ... و جان ارفع اصبعي بوجهه اهدده و حسيت النار تطلع من مناخيري و انفاسي تلسع كتله ابنك  اتعدى على  عرضي.... و انه صخر... و الذل و الاهانه موش طبعي و لا ثوبي .........
انهد حيله و كعد ع الكرسي و عينه حومرت هو يعرفني انه ما اتهمت ابنه بالباطل لان ابنه واحد سافل وتطلع منه هالسوالف الخايسة ... لذلك سكت و ماحجة شي ...
و انه طلعت ع السريع اخذت اكل و رحت لريم و ابن  خالها لان اكيد احتاجوا اكل و انه ما ضيفتهم لسا ....و وراها كلت ارجع للعرس حتى اكول لعمام ابوي يحضرون فصل باجر و الحمدلله نص  لباجر  ..موجودين ....
و كلت الباقي اخلي حسين يتصل عليهم. .....
رجعت لبيتي و لگيت ابن خالها رايح جاي بالهول ... كتله ها يمعدل شون اختك ... باوعلي و جان يتلعثم بالحجي و كلي اريد افهم منك شغلة ...  ليش دتساعدنه ....

كتله..:  وسفة ... عليك يا ابن عمي ترة الكدامك ابن عشاير ... و ما نخاني واحد و ما فزعتله .. و انه ترباة شيوخ و العوجة ما تعجبني ...
و اختك تعرضت للاعتداء و هي حرمة و ضيفتي ببيتي ... و انه بمركزي و بمقامي ...شتريد مني ... اتركها ..؟ اتفرج ... و اصفن عليها .. كمت اصرخ... لو اصفك لراضي على السواه وانه الدرد كاتلني ....؟ ثمّن حجيك يالمعدل ....
هو خنس و لا نطق بحرف ...  وراها كلي بابا جاي بالطريق هسة...
كل ما يكلي (بابا) اريد انطيه عجل يصحي على زمانه هالفكاكة ... بابا للزعاطيط يا الزلمة --كلت بكلبي --
هناك و جان يدك علي حسين كلي جا الزلمة ابو ضيف بغداد ... لان انه دزيته يتلگاه ...  صار ليل ... خالها جان ابغداد و جاي ع السريع مفزوووع  شوي وصلوا للبيت و صرفت حسين و دخل خال ريم مفزوع و يصرخ وييين بنتي ...وين ريييم رفل ... كتله هلة يا عمي تعال اكعد و استراح حمدلله ع سلامتك ..
گعد خالها و كلتله ... شوف عمي ... .....( وحجيتله القصة بما انزلت ) كلتله و هسة انه موجود عدكم و رح اكون انه سچينة الخاصرة لراضي و بلا مقابل ... ابوها كال كلشي ما اريد رح اخذ بنتي و ارجع بيها لبغداد و بعد ما نجي لهما ابد ... غلطة و متنعاد ... و اصلاً رح ادزها لاخوها لالمانيا ... حتى من العراق رح اطلعها وجان يوكف و كال اني اتشكرك و هذا فضل ما انسى الك وين ريم ...رفل بابا روح جيب اختك..... كتله بصراخ نسيت نفسي .... ووووووووين ..؟ جان يباوعلي و صفن كلي اني مشبه عليك .... انت من يا عمام ...
انه هنا كلت لازم اكشفله نفسي ...و اكله انا بالضبط منو ...
كتله استريح وانه افهمك من يا عمام ... كعد وابنه بصفه ... كتله يا عمي الحجي الي رح احجي ما اريده يطلع من بينه احنه الثلاثة ... انه و انت و ابنك ... هو جمد و حتى رمشه ما تحرك ... انه حسمت امري لان نيته خوفتني يريد يسفرها للخارج يعني ريم بهذيج الحالة ما رح تعرف منو هي لحد ما تموت ....كلنه رح نشيل خطيتها... لان كلنه جنه ساكتين على اعمال  امي ويه فطيم ام ريم ... فأنه لازم اقدم شي لهالمظلومة بنت المظلومة ...
كتله عمي انه اسمي صخر جبار ابن سلمان غانم ... كلي و بصراخ ووكف راساً ... سلمان غانـــــــم..؟ كتله اي انه ابن عم ريم ... وانه احق واحد يفزعلهة ... و ما راح اسكت ع الصارلهة و اقسمت الا اكلب العمارة على راضي و هله ....
كلي اني لازم اخذ بنتي و ارجع ... جان يتجه لباب الغرفة و عينه حومرت ... كتله ابددددد انت موووش والدها ... والدها عايش و موجود والنفس بي .. وانت حارمها من عنده شوف اكلك يا عمي ... انه لا تشوفني زغير عمر ... بس الحياة علمتني دروس و عقلي اكبر من عمري و الي سويتوا غلط حرمتوا عمي جاسم من ظناه و فطيم ما تدري بحالها ... جان يقاطعني و بعصبية ... كال احنه لو جدك سلمان الي حرم بتنه من الحياة الطبيعية ... و طعنها بشرفها ... و كل هذا احنه ما حجينه ... كتله حقك علي انه جنت زغير و مو واعي و جدي غلط و متأكد و هسة انه اريد اصلح الغلط ... گلي و تصلح الغلط بغلط افدح ... تريد تزوج ريم بحجة تعاقب الجاني حتى تتفرغلهة امك و انت تكملون الانتقام من فطيم ببنتها ... لا لا يا حفيد سلمان ماكو هيج حجي ... متنول الي تريده بنتي عزيزة و ما اسمح تذلها انت وامك ...
كتله ما عاش الي يذل بنت عمي جاسم ... لا تنسى يا عمي ترة ريم موش بنتك مو من صلبك ... هي الهة ابو ... و ابوها موجود و لو درى انت ضامها كل هالسنين ما رح ييسكت و هذا حقه ... جان يكلي و شنو يثبت حجيك ... كتله عمي لا تشوفني لابس دشداشة و عايش بقرية ترة انه دارس و خريج هم ... و اعرف اكو شي اسمه تحليل DNA لاثبات النسب ... و نكدر بكل سهولة من خلاله نحدد ريم الك لو النه ... انه هاي موش مشكلتي ... الي اعتدى على ريم عشيرته تحب الطلايب و تشتريها باغلى الاثمان ... و انه اصلاً عشيرتي و عشيرتهم على خلاف و قديم هذا الخلاف ... بنت عمي هسة بخطر و ما مفروض اعوفنها ... انه للغريب اطيح جبال اذا ضاع حقه ... هنوب بنت عمي و من دمي ...
جان يكلي اي اني رح اسوي جوازها و اطلعها لاخوها ... كتله و اني اعصاب يا اخوو ... ابنك موش اخو ريم ... ريم بنت جاسم ... و لهنا بعد ماكو حجي ...
جان يكلي زين حلك شنو ... كتله اعلن اني خاطب ريم و اعقد عليها حتى اكدر احجي بأسمها .. و انه رح افصله بنفسي  عار الزلم .. والا اخلي عبره ... و اوعدك بعد ما اامن وضع ريم اطلكها و تصير حرة بس بشرط لازم تعرف اهلهة منو بس مو هسة  ...
صفن بحجي و كعد على صفحة يفكر ... كلي زين ... انطيني مهلة افكر و اشور اخوها ... هنا فقدت بعد ما كدرت... و باعصاب كتله هم كلي اخوها ... يا اخ كافي اوهام ... انت محاسب امام الله على هذي التصرفات لان البنية تحل على ولدك و انه الن عمها و ما ارضى ...
گلي و بصراخ ..هذولة اخوتها و من زمان همه تربوا وياها انت منو تجي تحجي هالحجي ...
ابنخالها هذا الحجي كله مصدوم وفاتح حلكه الفكاكة لو فاتت ذبانه لحلكه ميحس .... همه هذوله الاخوة الي يحجي بيهم ... نيالي اي والله ... اذا هديت ريم و خليتها صدك تروح ويه خالها .. راضي يكتلها يعني يكتلها ...
كتله ... عمي ما عدنه وقت ....
انه رحت لابو الي اعتدى على ريم و نذرته بفصل رح انصبه باجر و الم عشاير العمارة و كتله البنية عرضي ... وبهالحالة لازم اعلن انها خطيبتي واعقد عليها الليلة .... لان ما اريد اعلن هي بنت عمي هسة .... لعدة اسباب اولها صحة ريم النفسية ... لان هي كلش تعبانة مو مال اجي اكلهاعندج اب و ام غير الي تربيتي على ايدهم ....
خالها ساكت و صفن بوجهي ... انهد حياه و كعد ع الكرويته .... كلي ضاعت مني البنت .... راحت ريم .... هيج بشربة مي ..؟ كتله لا ابد ... هي تبقة بتكم بس الاولى انها ترجع لابوها و تعرف منو امها الحقيقية ...
دمعت عينه و كام يبچي ... انه اختنكت و روحي انعصرت مجنت متخيل صعوبة الموقف .... كتله عمي انه ما اريد اصغط عليك اكثر و لضيق الوقت رح اروح اجيب شيخ و اجي .................