رواية قلبي بينادي باسمك الفصل السابع 7 - بقلم sasso

فجر يوم السبت صحت سوار عشان تصلي و هي رايحه تتوضى سمعت صوت سالي بتتكلم و صوتها واضح

سالي: انت كمان وحشتني نفسي أشوفك و الله
عمر: وانا كمان يا قلبي
سالي: طمني حوشت قد أيه
عمر: حوشت مبلغ كويس باقى بس ٦ الاف اكمل تمن الشبكه الي عجبتك
سالي: ٦ الاف بحالهم هنتصرف فيهم ازاي دول
عمر: شوفي حاجه من حاجات سوار المبلغ الي جبتيه من بيع الخاتم كان كبير شكل دهبها غالي
سالي: ايوا دا دهب سعودي ابوها الي كان جايبه ليها طبيعي يجيب فلوس كتير
عمر: طب ما تروحي تشوفى حاجه تانيه
سالي: لا سوار عينها عليا الفتره دي غير اني بوظت الدنيا امبارح اصلا باقي لها تكه و تموتني هشوف حاجه من عند ماما مش هتاخد بالها

سمعت سوار كلام سالي وهي مصدومه مش قادره تصدق ان كل الي حوليها كدابين و بيتآمرو عليها ، دخلت اتوضت و صلت قعدت على السرير تفكر ازاي هتتعامل مع سالي و اسرارها .
_________________________________

في نفس الوقت كان تركي بيصلي الفجر و فتح الموبيل لقى رساله من عبد الله بتقول انه هيوصل المطار على ١٢ الضهر ، حاول ينام مقدرش فقرر يفضل صاحي لحد معاد اول عمليه عنده الساعه ٨

الممرضه: د.تركى الاشعه
تركي: حياكِ الله اتركيه على المكتب

كان ماسك اشعات رضوى و بيبص فيها عشان يعرف يختار الدكاتره المساعدين العمليه مش سهله هو حاول يطمن سوار ، أول مره يشوف الورم دا ورم ضخم على طول سلسله ضهرها و بيكبر كل شويه ولازم يتشال لإما هيأثر على الحركه ، مسك تيليفون المستشفى و كلم د.وليد يشوفله احسن دكاتره عنده يساعدوه في العمليه ، مهما كان هي أم اخته و اكرامها من اكرام اخته و هيبذل كل جهده يطلعها سليمه.
__________________________________

فتحي: سوار هتوديكي المستشفى امتى
رضوى: بكرا العصر
فتحي: صممي اني لازم اكون معاكي
رضوى: ماشي
فتحي: سيبي الباقى عليا و اوعي حنان الام ياخدك تاني و تدلدلى لسانك و تتكلمي
رضوى: هتعمل أيه
فتحي: ملكيش فيه هتصرف انا
___________________________________

الساعه ١١ الظهر كانت سوار صاحيه بتجهز الي هيتاخد معاها المستشفى من لبس و ادويه و دماغها في الي سمعته من سالي الصبح بتلف لقت سالي في وشها

سالي: بصي انا عارفه اني عكيت الدنيا و خليت منظرنا زفت سامحيني
سوار: منظرنا .. سالي انت مستوعبه انت عملتي أيه
سالي: اصل الموضوع كان مريب بردو يجيلك البيت و فجأه تتقابلو برا اي حد هيفكر كدا
سوار: أي حد مش انت يا سالي ، سالي انا اختك سترك و غطاكي وانت سترى و غطايا حتى لو كنت بعمل حاجه غلط تفضحيني بدل ما تسترى عليا !! انت ليه مصممه تطلعيني وحشه ومقصره انا عملتلك أيه غير اني راعيتك
سالي: انت بجد مش عارفه انت عملتيلي أيه
سوار: انا عاوزه اعرف انا عملت فيكي أيه لدا كله
سالي: ماما بتحبك اكتر مني مدياكي كل الصلاحيات وانا لا .. متحكمه تحكم كامل في كل حاجه حتى حياتي اتحكمتي فيها اكل أيه و اشرب أيه اصرف أيه و ليه و امتى انا مش صغيره .. دا انا اخترت أبعَد كليه عشان أبعِد عنك وعن تحكماتك الفلوس الي بتديهاني دي مش فلوسك دي فلوس بابا انت لا بتمنى عليا ولا ليكي عندي حاجه اصلا

سمعت سوار كلام سالي في هدوء وهي مش عارفه تفتح قلبها تجاوبها على كل اتهاماتها و تخلي شكل مامتها وحش ولا تسكت و تبلع

سوار: حرصى عليكي كان حب يا سالي و عمرى ما هلاقي حاجه تضرك و أوافق عليها
سالي: بطلى كلام الأفلام دا يا سوار انت بتستمتعي لما تشوفيني مدايقه

حاولت سوار تمسك اعصابها و لكن سالي عندها قدرة رهيبه في شعلعه الجو

سوار: انت مفكره اني مش عارفه الفلوس الي بتطلبيها كل يوم التاني بتوديها فين
سالي: شوف انا بقول أيه و انت بتقولى أيه
سوار: عمر الي انت مفكره انه بيحبك و بيحوش لشبكتك دا بيستغلك مش هيتجوزك
سالي: وانت بقيتي خبيره في العلاقات بقا صح
سوار: سالي الي بيحب حد بيطلبه في الحلال و بيتعب في القرش مش بيستنى لحد ما يجيله لحد عنده على الجاهز
سالي: كالعادة طلعت منها انا الي غلطانه و انت مفيكيش غلطه
سوار: لا يا سالي محدش مفيهوش غلطه ولكن في بيعترف و بيصلح و في بيكابر و الي بيكابر بيقع على جدور رقبته

وقفت سالي مربعه ايديها و على وشها ملامح الغضب

سوار: عموما يا سالي ليكي كامل الحريه في حياتك وانا مسامحه في الخاتم الي بعتيه و اديتيه لعمر ولكن اعملى حسابك ليكي معاشك من باباكي و جزء من معايا كل شهر مفيش مليم هيطلع تاني غير دول مصاريف ليكي .. عاوزه تمشي مع عمر و تشوفي حقيقته امشي عاوزه تقفلي بابه اقفلي و افتكرى دايما انك مهما عملتي انت اختى و هفضل جنبك بس لازم تتعودي تشيلي مسؤوليه قراراتك و على موضوع تركي هعمل نفسي انه محصلش ومش هحاسبك عليها

قربت منها و مسكت خدودها بين ايديها

سوار: وغلاوتك يا سالي مش هتدخل في أي حاجه ليكي تاني إلا بأمرك

مشت سوار من المكان وهي مقرره انها مش هتتكلم مع سالي في اي حاجه تخصها تاني و انها هتحميها من بعيد و هتجاهد نفسها تبطل تجرى وراها ، يمكن غلطت انها حبتها زياده عن اللزوم فخنقتها من غير قصد .
___________________________________

الساعه ١٢ الضهر كان تركي في المطار بيستقبل عبد الله اخده وقعد معاه في كافيه قريب من المستشفى بعد ما حط شنطته في اوضه تركي في الفندق

عبد الله: ما نمت من امبارح تركي ايش في .. ايش الموضوع الي ما يتأجل ولا نكون مع بعض
تركي: يبا انت تعرف اني ما اسوى شي من ورا ظهرك
عبد الله: أيه الله يرضى عنك
تركي: الي بحكيه الحين كله صدفه و والله ما دبرت لأي شي
عبد الله: ايش فيك تركي اتكلم
تركي: بتتذكر الغرفه الي دايم كنت تنظفها و ما تسمح لضيف يدخلها
عبد الله: أيه ايش فيها
تركى: الله دبر الكون و قابلت صاحبه الغرفه

سكت عبد الله مش فاهم و باين عليه التوهان

تركي: يبا اختى سوار قابلتها
عبد الله: ايش
تركي: الله قدر اسافر مصر عشان اسوى عمليه امها و اكتشف انها اختى

وقف عبد الله و رفع ايده السما ودمع

عبد الله: الحمد لله الحمد لله فرجتها يا رب لقيتها يا رب

ونزل سجد سجده شكر وسط الكافيه و الناس كلها تبتص باستغراب ، ابتسم تركي و مسك كتف عبد الله

تركي: ابشر يبا
عبد الله: وينها بشوفها
.
.
.