رواية قلبي بينادي باسمك الفصل الثامن 8 - بقلم sasso

عبد الله: وينها بشوفها
تركى: حاضر يبا بكلمها

اتصل تركى على سوار ولكن مردتش قعد تركى يكلم عبد الله عن ازاي عرف سوار وكان كل تفكير عبد الله ازاي رضوى قدرت تخفى سوار العشرين سنه دول كلهم
___________________________________

فتحى: بقولك أيه يا باشا انا عاوزك تفضيلي المصنع دا كله كدا عشان عاوزه كام يوم
العامل: حاضر يا باشا عاوزه كله فاضي
فتحى: لا كفايه ٣٠ متر كدا عرض و طول و جهزلى كام كرسي على مرتبه و حبال و متنساش تخلي كلاب المصنع جعانه
العامل: حاضر يا فتحى بيه عاوز المصنع امتى
فتحي: بكرا العصر يكون جاهز مش عاوز حد يعرف حاجه هبعتلك رجاله بكرا الصبح لا تكلم غيرهم ولا تدخل غيرهم و اسمى ميجيش على لسانك فاهم
العامل: أوامرك يا فتحى بيه بس المصنع كدا حاله هيقف كام يوم ودا جاي بخساره

بص فتحى للعامل و خرج باكو من جيبه ، العامل لما شافه عنيه زغللت و خطف الفلوس و حطها في جيبه و بدأ يقول أشعار في فتحى
__________________________________

سالي بعد ما شدت مع سوار دخلت اوضتها و فتحت شات عمر و بدأت تفر فيه مش عارفه ليه الشك دخل قلبها .. عمر بقاله فتره مش بيكلمها غير لما يطلب فلوس بحجه انه بيحوش ولكن لما بتواجهه بيقدر يثبت لها انه فعلا بيحوش ومش بيصرف الفلوس ، أخدت نفس و قررت تقطع الشك باليقين و كلمت عمر

عمر: ايوا يا وش السعد
سالي: ازيك يا عمر
عمر: عمر!! كدا حبيبي زعلان مالك
سالي: اتخانقت مع سوار خناقه كبيره
عمر: ليه كدا يا بيبي مش قلنا نهدى التون شويه
سالي: سوار لقت اخوها السعودي و اكيد هتلاقى ابوها وانا فكرت انها مصاحبه وقفت في الشارع و قلت كلام مينفعش يتقال
عمر: ليه كدا يا سالي
سالي: كنت مبقوقه منها ومصدقت تعمل غلطه
عمر: طب أيه موضوع اخوها السعودي دا
سالي: طلع اخوها الدكتور الي هيعمل لماما العمليه دكتور كبير و ابن راجل تقيل هناك تقريبا
عمر: يابختها هتتنغنغ بالريال
سالي: هو انت كل تفكيرك في الفلوس كدا
عمر: مهو لو مفكرتش في الفلوس مش هنتجوز يا سالي
سالي: انت فعلا بتحوش يا عمر ولا بتصرف الفلوس
عمر: يوه تاني الاسطوانه بتاعه كل مكالمه انت مش هترتاحي غير لما اصورلك الفلوس

سكت شويه و رجع كمل

عمر: ادي صوره الفلوس الي مجمعها ارتحتي كدا اذا هنبدأ حياتنا بالشك يا سالي ملهاش لازمه نكمل سلام

قفل المكالمه في وش سالي وهي على قد ما هي مبسوطه انه طلع فعلا بيحوش على قد ما هي زعلانه انها وصلتله احساس الشك وخافت ليسيبها
__________________________________

سوار: ايوا يا مستر انا عارفه ان الترقيه محتاجه شغل كتير و لكن انا والدتي هتتحجز من اول بكرا محدش يعد معاها غيري
عادل: يا مس سوار انا عارف ان الموضوع مش بسيط الله يشفيها و لكن صعب
سوار: طيب ممكن تديني اجازه من غير مرتب
عادل: و شغلك مس سوار مين يشيله
سوار: هكلم مستر ابراهيم يشوف حد
عادل: ماشي يا مس سوار

قفلت سوار مع عادل موظف شؤون العاملين و رجعت اتصلت بمديرها ابراهيم تحاول تقنعه يتصرف في اي حاجه عشان تعرف تعد مع مامتها وقت العمليه ، بعد فتره مش قليله قدرت توكل شغلها لحد تاني و أخدت الاجازه .

قفلت المكالمه عشان تتفاجئ بمكالمه من تركى ابتسمت لما شافت مكالمته طول عمرها نفسها يكون ليها أخ يطمن عليها من لما عرف انها اخته كل يوم يطمن عليها و فضل وراها يتأسف لاحساسه انه كان السبب في موقف سالي .. اتصلت عليه و هي مبتسمه

تركي: هلا بالحلو
سوار: اهلا يا تركي ازيك
تركي: الحمد لله كيف صرتي الحين
سوار: الحمد لله احسن
تركي: ترا لا تنسي بكرا ٣ العصر
سوار: لا مش ناسيه دا انا حتى أخدت اجازه عشان افضل معاها
تركي: فيكي الخير .. ترا سوار فينا نتقابل ولا مشغوله

كان تركي فاتح اسبيكر الموبيل يخلي عبد الله يسمع صوت سوار وكل شويه عينيه تدمع و يمسك نفسه

سوار: طيب ممكن كمان ساعتين اغدى ماما
تركي: أيه اكيد وين تحبي نتقابل
سوار: في نفس المكان .. تركي انت اتغديت اجيبلك أكل معايا

ابتسم تركي و بص لباباه الي عيونه مدمعه

تركي: اكلت وجبه الفندق الحمد لله
سوار: وجبه فندق أيه انا عامله ملوخيه هتعجبك أوي أهو بالمره تدوق طبيخي
تركي: خلاص بستنى الملوخيه فيكي تكترى الكميه
سوار: عنيا

قفلت سوار الموبيل و هي مبسوطه دايما هي بتدي اول مره حد يديها عندها استعداد تهد الدنيا عشان تركي قامت تخلص الي وراها عشان تلحق معادها
___________________________________

عبد الله مسح دموعه و حضن تركي

عبد الله: كيف هي تركي
تركي: بتشبهك يبا
عبد الله: في الشكل؟
تركي: شوي في الشكل و وفي الخصال
عبد الله: الحمد لله
تركي: يبا ليش ما درينا على سوار
عبد الله: انا وام سوار كنا على خلاف و ما قدرت اربي سوار من صغرها خفت تدرون بشي ممكن ما يتحقق
تركي: ايش الخلاف
عبد الله: خلاف تدخلت المحاكم فيه
تركي: ايش سوت
عبد الله: ما في لزوم نتكلم عن الغايب خلاص بلاها

سكت تركي شويه

عبد الله: ام سوار بإيش مريضه
تركي: ورم خبيث على طول العمود الفقرى سريع الانتشار .. عمليه كتير خطيره بس بساوى كل جهدي فيها

سكت عبد الله لما سمع حالتها و بطل يفكر في اذاها المهم انه لقى بنته و هي كفايه الي ربنا عمله فيها الله اعلم هتعدى منها ولا لا
___________________________________

سوار و سالي و رضوى على الاكل الصمت سيد القعده لاحظت رضوى و سالي ابتسامه على وش سوار باين على حركات ايديها و جسمها انها سعيده

رضوى: شكلك مبسوطه النهارده
سوار: بتكلميني يا ماما
رضوى: انت الوحيده المبتسمه الي فينا
سوار: لا يا ماما عادي افتكرت حاجه بس

بصت رضوى بشك هي عارفه ان ورا الابتسامه دي مصايب هتحل عليها ولكن عندها أمل لآخر لحظه حاجه تتغير و ترجع سوار في ايديها مره تانيه

رضوى: وانت يا سالي ملكيش حس ليه
سالي: مفيش يا ماما عادي
رضوى: انتو اتخانقتو تاني
سوار: لا يا ماما
سالي: شكرا على الاكل يا سوار تسلم ايدك

ابتسمت سوار و بصت لها

سوار: بألف هنا .. في التلاجه فراوله بلبن عملتهالك انت و ماما يبقى اشربو منها
رضوى: وانت
سوار: انا عندي مشوار هخلصه و ارجع
رضوى: رايحه فين
سوار: مشوار يا ماما

قامت سوار من على الترابيزه تظبط الي وراها و حضرت أكل تركي دخلت عليها سالي

سالي: انت بتعملي الاكل دا لمين
سوار: لتركي
سالي: هتروحي تقابليه

سوار حست بتغيير سالي و ابتسمت

سوار: اه .. سالي انا بحبك

وقفت سالي مصدومه شويه مش من السهل ان سوار تطلع كلام زي دا

سالي: سوار انت كويسه
سوار: انا اسفه لو كنت ضيقت عليكي من كتر حبي ليكي انا قررت اتعامل بطريقه مختلفه
سالي: انت متأكده
سوار: اه متأكده
سالي: وانا كمان بحبك

حضنو بعض لاول مره من فتره .. سوار قدرت تقرب من سالي و تغير من طريقتها لما اكتشفت ان سالي فاهمه الوضع بالعكس .. لمست سوار شعر سالي بحنان و راحت اوضتها تجهز عشان تنزل
___________________________________

فتحي: متخافيش يا رضوى قلتلك انا هتصرف
رضوى: هتتصرف امتى بقولك البنت كل يوم تكلم اخوها ومش بعيد يكون عرف ابوه مكانها
فتحي: ولو عرفه المكان هنغيره سهله
رضوى: انت متأكد
فتحي: بقولك أيه انا بفكر في اكتر من حاجه خلاص انا ظبطت كل حاجه وبكرا هنفذ
رضوى: بس مش هتعمل حاجه في البت
فتحي: يوه بقالك عشرين سنه بتعامليها معامله الكلاب و جايه تخافي عليها دلوقتي .. افتكرى ان البنت دي مصدر للفلوس بس
__________________________________

كان تركي و عبد الله في الحديقه مستنين سوار اول ما تركي لمحها رفع ايده يشاور لها و راح يشيل عنها الشنطه

تركي: كل هاذا تشيله لحالك
سوار: المصريات ياما شالو يا تركي عيب عليك
تركي: ترا جيعان
سوار: هنعد بس و اغرفلك

مشيت سوار مع تركي لحد ما وصلو عند عبد الله و سوار بصت لتركي باستفهام

سوار: تركي انت معاك ضيوف !
تركي: مو بالظبط

سوار مالت بجسمها حاجه بسيطه بدل ما تسلم

سوار: ازيك يا عمو اخبار حضرتك أيه
تركي: ما تقولى عمو قولى بابا

وقف قلب سوار اكن اتكب عليها ميه ساقعه و بصت لتركي و رجعت بصت لعبد الله

عبد الله: هلا يالغاليه

وفتح دراعاته بمعني تعالي في حضني قربت سوار منه و حضنته و محستش بنفسها غير و هي بتعيط و عبد الله يطبط على ضهرها بحنان و تركي وقف مبتسم

سوار: انت بابا بجد
عبد الله: و غلاوتك انا
سوار: وحشتني يا بابا
عبد الله: وانا اشتقت لكلمه بابا منك
سوار: طيب يلا زمانك جعان خليك تاكل انا عامله ملوخيه
عبد الله: طبخك!
سوار: ايوا طبعا يا بابا عيب عليك دا انا شيف كبيره

ضحك عبد الله و تركي و قعدو و بدأت تغرف لكل واحد فيهم

تركي: والله بسمن بصير دُب
عبد الله: انت صرت دُب من أكل مصر و ما كملت اسبوعين
سوار: دُب أيه يا بابا ما تركي زي الفل أهو كل يا تركي كل كله بيروح في الجيم
عبد الله: و انا وين يروح
سوار: لا دا ميروحش يفضل كدا عشان تفتكر الاكل بتاعي يا بابا

بدأ تركي ياخد راحته اكتر مع وجود عبد الله و يكلم سوار بأريحيه اكتر لحد ما خلصو و راح تركي يجيب شاي ليهم بعد الاكل

عبد الله: سوار .. ما قلتيلي محتاجه شي الفلوس تكفيك

سوار اتلجلجت و بان عليها التوتر

سوار: اه يا بابا متقلقش
عبد الله: في شي تخبيه عني تحتاجي اكتر بعطيكِ
سوار: لا يا بابا الموضوع مش كدا
عبد الله: و ايش الموضوع

دخل تركي بس وقفه كلام سوار و محبش يحسسهم انه موجود عشان تتكلم براحتها

سوار: ماما كانت بتحوش الفلوس ومعرفش انك كنت بتبعت حاجه غير من اسبوع
عبد الله: ايش يعني كل السنين هذى و ما كنت تدرين شي
سوار: لا
عبد الله: وكيف كنتِ تعيشين
سوار: من مرتبي في الشغل مع شويه فلوس من الي كنت بتبعتها و تعين الباقى
عبد الله: تعرفين وين باقى الفلوس
سوار: لا
عبد الله: حتى البنت ما تركتيها الله ينتقم منك
سوار: لا يا بابا انا قلت لك الكلام دا من باب الامانه ، معايا حساب البنك الي بتبعت عليه اخدته من ماما خلاص سيبها كفايه الي هي فيه
عبد الله: بكرا بلغي التعاملات على هاذا الحساب و بفتح حساب جديد لك انت بس تتصرفين فيه .. وليش تشتغلين تتعبين حالك خلاص مو محتاج تشتغلين
سوار: بابا الحياه في مصر احلى وانت بتشتغل
عبد الله: انت ناويه تعيشي بمصر
سوار: مقدرش أسيب ماما بالذات في الظروف دي

عبد الله حسس على راسها و ابتسم

عبد الله: أصيله حبيبتي .. ان شاء الله بستنى للعمليه واطمن عليكي و برجع السعوديه و بعطيكِ جوال خاص فيكي فيه كل ارقام العيله ان شاء بتتعرفين عليهم قريب

دخل تركي و معاه الشاي و بدأ كل واحد فيهم يتكلم مع التاني و يعرفو بعض اكتر تركي وصل سوار البيت و كل واحد استعد لبكرا سوار ، تركي ، رضوى ، عبد الله ، سالي ، فتحي
.
.
.
.