رواية قلبي بينادي باسمك الفصل السادس عشر 16 - بقلم sasso

بدأ يجري بسرعه و صوت العساكر وراه و هو مش راضي يقف دخل شوارع صغيره و بدأ يجري بسرعه لحد ما استخبي جنب صندوق زباله و فضل قاعد لحد ما اتأكد ان الشرطه جريت في  مكان مختلف ، قام و راح عند اقرب حلاق كان شاب صغير  ، دخل اجبره يحلق له شعره زيرو و يشيل كل دقنه و شنبه ، طلب منه بنسه يحاول يفتح الكلابشات ، بدأ يحاول يفتحها لحد ما اتفتحت ، بدأ يحسس على جيوبه لحد ما لقى ١٠٠ جنيه اداها للراجل و مسك فكه جامد

فتحي: انت لا شفتني و لا تعرفني ، وهعرف اذا قلتلهم عليا ، و ال ١٠٠ جنيه دول حق الحلقه و البنسه ، مع انك متستاهلشهاش

زق فكه بايده ، و اخد الجاكت بتاعه و لبسه و غطى راسه بالزنط ، و بص للشاب بتهديد و صباعه بيشاور له بمعني افتكر كلامي ، خرج بسرعه و بدأ يمشي بعيد عن اي ظابط و يمشي وسط الزحمه لحد ما قدر يوصل بيته ، دخل بسرعه لم كل الفلوس الي كان ساحبها من فلوس عبد الله و حطهم في شنطه و نزل بسرعه ، وهو بيبعد عن البيت لقى الشرطه نازله عند بيته قرر يروح بيت رضوى لان الشرطه اكيد هتكون عند المستشفى ، وصل العماره لقى سالي طالعه البيت راح لها بسرعه و رسم على وشه ابتسامه

فتحي: سالي
سالي: خالو ، انت فين يا خالو ، دا وقت بردو تختفي فيه
فتحي: تعالي نطلع و هحكيلك كل حاجه

دخلو العماره و على وشه ابتسامه نصر و دخل الشقه معاها
___________________________________

دخل تركي على رضوى يطمن على العمليه و هي ساكته مش بترد

تركي: أستاذه رضوى ، في شي يوجعك؟
رضوى: هو انا حاسه بحاجه عشان اتوجع اصلا
تركي: هذا كان اقل ضرر بالعمليه ، كان ممكن تموتين
رضوى: كنت موتني اسهل ، بدل العيشه العذاب الي هعيشها دي

بص تركي للممرضه و شاور لها تدخلها الاشعه ، خرج من اوضتها ينفخ ، متابعتها حمل على قلبه ، دخل مكتبه و بدأ يرتبه و اكتشف ان دفتر شيكاته مش موجود ، فتح ادراجه كلها و فرغ شنطته مش لاقيه ، وقف يتأكد من جيوب لبسه مفيش حاجه وقف شويه يفتكر ، خرج نادى الممرضة

تركي: في شخص دخل مكتبي بالفتره هذى
الممرضة: لا يا دكتور ، محدش بيدخل مكتبك غير والدك و اخواتك البنات

وقف تركي شويه مش مستوعب الي بيحصل عدت سوار من جنبه

سوار: أيه يا تركي ، سرحان في أيه
تركي: لا ولا شي ، في شي مو موجود بمكتبي
سوار: طب دورت عليه كويس يمكن تحت حاجه او في فايل
تركي: لا ما في شي

وقف تركي يبص لسوار بشك ، و بعدين غمض عينيه و مسح على وشه و هو بيستغفر و بيحاول يطلع الافكار الي في دماغه

سوار: في ايه ، هي حاجه مهمه أوي كدا
تركي: أيه ، دفتر الشيكات
سوار: يا خبر ابيض ، انت متأكد انك مش ناسيه في الفندق
تركي: لا انا متأكد ، استعملته قريب

وقف سوار و قلبها وقع في رجليها عرفت الي فيها و كان لازم تتصرف ، حياتها الجديده مهدده بسبب سالي ، لازم تتصرف و تجيب الدفتر قبل ما تركي يعرف اي حاجه

تركي: في ايش تفكرين
سوار: لا ولا حاجه

بص لها تركي بشك و بدأت الافكار تزيد في دماغه ومش عارف يتصرف ازاي
___________________________________

دخل عبد الله المسجد و اتصل بفدوى بلغها ان سوار هترجع معاه عشان تجهز البيت و تبلغ باقي العيله و بدأ يحكيلها على الي حصل

فدوى: و كيفها الحين
عبد الله: ما اقدر اواسيها ، كل مره تدخل لامها تبكي و ما في شي جديد
فدوى: ما اصدق ، في ام بالدنيا ما تحب أولادها
عبد الله: انا ما كنت اصدق ، بس الحين صدقت ،
فدوى: و هذا اخوها المجرم ذا الشرطه درت وينه
عبد الله: لا ، كلنا بالمشفى ما نقدر نتحرك و الشرطه مأمنه كل مكان
فدوى: لا حول ولا قوه الا بالله ، ان شاء الله بتعدي على خير حبيبي
عبد الله: فدوى ما اوصيك ما ابيها تحس بأي نقص ، ابيها تعيش و تنبسط
فدوى: ان شاء الله ، و غلاوتك عندي ما اخليها تحتاج شي
___________________________________

سالي: ولما كلمتها وبدأت ازعق راحت هاجمتني ، هو مش من حقى يا خالو اني اعرف كل حاجه عن ماما و لا أيه
فتحي: طبعا يا حبيبتي ، هي لقت ابوها و اخوها و نسيت أصلها يا سالي
سالي: حتى لو انا مكنتش موجوده بس دا حقي
فتحي: انا هشدلك ودانها لما اقابلها
سالي: تعالي يا خالو دلوقتي نروح المستشفى ماما عاوزه تشوفك ، حتى تقول لها كلمتين يصبروها

فتحي بدأ يتجلج و يتحجج عشان ميروحش

فتحي: لا لا مش وقتها دلوقتي ، خليها بكرا عشان تكون ريحت حتى

سمعو باب الشقه بيتفتح شاور فتحي لسالي تشوف مين و هو استخبي في الاوضه الكبيره ، دخلت سوار الشقه و شافت سالي ، حضنتها

سالي: عاوزه أيه يا ست سوار ، جايه تقطميني هنا كمان ، و لا جايه تعلميني الادب
سوار: انا عاوزه اتكلم معاكي بهدوء لو سمحتى ممكن
سالي: ليه بقا ان شاء الله ، مش انا مش فرد من العيله و مليش مكان بينك و بين ماما
سوار: سالي ، ارجوكِ انا محتاجه حد يفهمني و يقدر الي كنت فيه ، و الله مش تقليل منك ولا لاني مش معتبراكي جزء من البيت ، ولكن انا كنت بشوف مامتك بتتألم ازاي ، دا غير كميه السم الي كان بيدخل جسمها و مكنتش بتقدر تتحرك ولا تفرد ضهرها ، كل الدكاتره اجمعو انها مش هتقوم من العمليه سليمه ، اقل الاحتمالات انها تتشل ، و انا مكنتش بقول خوفا عليكِ و على ماما ، و كان عندي استعداد اخدمها بعيوني
سالي: و انا المفروض اصدق كلامك بقا
سوار: ايوا يا سالي تصدقيه ، لاني عمرى ما حطيت نفسي أولويه عليكو ، و انتو هدفي الاول و الاخير يا سالي صدقيني ، و الله العظيم ما كان قصدي أقلل منك ، ولكن خوفا عليكي

دمعت عيون سالي و بصت لها

سوار: سالي انا نفسي ابدأ معاكي بدايه جديده ، نفسي تثقي فيا و تتأكدي اني و الله ما عايزه غير مصلحتك
سالي: انا خايفه منك يا سوار
سوار: ليه يا سالي
سالي: معرفش خايفه و خلاص
سوار: سالي ، اعرفي اني عمرى ما هفرط فيكِ و الله ما هسيبك ، ولو سافرت هاخدك مش هسيبك ولكن قبلها عاوزاكِ تخليني اثق فيكِ
سالي: ازاي يعني
سوار: هاتي دفتر شيكات تركي ، و انا اوعدك مش هقوله حاجه هتصرف انا

قطع كلامهم صوت حاجه وقعت في الاوضه

سوار: أيه الصوت دا
سالي: دا خالو قاعد جوا

بصت سوار لسالي بفزع و مسكت ايديها عشان يخرجو بس طلع فتحي مبتسم و بيسقف

فتحي: بنت اختي الكبيره بقا ليها حد تتسند عليه و تتكلم بقلب جامد
.
.
.
.