رواية قلوب على جرف الهاوية الفصل الأول 1 - بقلم الكاتبة نهى

قلوب على جرف الهاوية

للكاتبة Nuha-d-h
-
استاذ علي ممكن لحظة من وقتك
علي وهو يترك القلم من ايدة ويرفع راسة
علي-نعم تفضل احمد اسمعك
احمد-سيدي قبل يوم وصلني خبر من صديقنا نورس الي موجود بالناصرية كان مستلم قضية اغتصاب فتاة عمرها ٢٠سنة
واثناء التحقيقات في المحضر استغرب ناصر باسم الضحية
كانت تملك نفس اسم الجد والعائلة ولقب عشيرتك
انت
بس حبيت انطيك خبر خاف اكو اشكال اوتشابه بالاسماء او خاف الموضوع يمت الكم بصلة

علي وهو متفاجيء من كلام احمد
علي -اذا تگدر تخلي نورس يحولي ملف القضية اريد اتطلع عليه هيج من باب الفضول ولو اني متاكد احنا ماعندنا قرايب بالناصرية لكن اكون مشكور لك
احمد-تمام سيدي انت تأمر

في الناصرية
سماح
گومن بنات يالله بسرعة ما راح تلحگون على المدرسة گومن يالله
فرح -يالله ترة انة صبيت الريوك وهدرت الجاي على الصوبة راح ابدل ملابسي
سماح -گومي سرورلا اجي ابدي الماي على راسج گومي علة
سلوى - هاي القوانة اليومية الماتخلص

فرح عمري ١٧سنة
اني الاخت الثالثة عندي اثنين خوات اكبر مني
سماح الكبيرة وعمرهة ٢٠سنة
وسلوى الاصغر منه وعمرهة ١٨سنة
واختي الصغيرة بزر الگعدة اسمهة سرور
وعمرهة ١٢سنة
صارت بعد معاناة امي بالحمل رادت تسوي ولد لكن الله ما كتب
احنا اربع خوات
عايشين بمشتمل بسيط ملك
و ماما وبابا صارلهم سنة من توفو بحادث سيارة
كانو مسافرين حسب ما بابا گال
ان هو يريد يروح حتى يستسمح من ابوه ويطيح عليه بلكي الله ويقبل اعتذاره ويبطل صد ويحن گلبه عليه
اني وخواتي ابد ما شايفين بيت جدي ولانعرف اي شخص منهم لكن ابوي الله يرحمة كان بين فترة وفترة يگعد يسولف النا عن حياتهم ووضعهم ومرات يحجي مواقف مضحكة من كان شاب وامي هم كانت تسولف النا عن بيت جدي وعن عمامي
امي اصلها فلسطينية وكانت ساكنة وية امه عند بيت جدي كان عندهم بيت خاص للفلاح وهمة هناك سكنو
وكانت تسولف عن عماتي وعمامي واولادهم وبناتهم
الي اعرفة ان احنا عندنا ثلاث عمام وبابا الرابع وهوالصغير
عمي الكبير توفيق والثاني وجواد. ونبيل وبابا اسمة منذر

بس امي كانت تكره نبيل حيل يعني من تجيب طاريه
ينگلب وجهة وابوي ينقهر
هو الوحيد الي ما يجيبون سيرتة عرفت عمامي البقية كانو يحبون اخوهم الصغير الي هو ابوي لكن
الضروف الغامضة الي ابوي وامي ماحجولنا عنها
كان ضرف جدا قوي لدرجة يخلي جدي يطرد ابوي
من بيتة
بس كنت مرة اتذكر واني صغيرة من اخذنا بابا
كان عمري ٧سنوات اخذنا انة واخواتي لبغداد بالعيد
لبيت جدو اتذكر سافرنا وصلنا لمكان كلش حلو ووكفنا مقابيل بوابة جبيرة طلعنا رجال جبير لابس دشداشة وجفية لافه على راسة
ابوسماح-شلونك عمي صاحب شخبارك
صاحب-هلة هلة بوية منذر شخبارك
ابو سماح
يريد يكمل كلامة لكن قاطعة صوت من الخلف كان لاخوه نبيل
نبيل بخبث وهو يعرج -هَـا ولك عار شعندك لفيت النا ا
ترة ابوي ما يريد يشوف جهرتك ومحرم عليك عتبة البيت
وانطى قرار محد يلفيك ويستقبلك بالعشيرة كلهة
فاحسن الك لاترجع بعد هنا مرة ثانية

منذر -انة اريد اشوف ابوي لاتخليني اتعداك وادخل
نبيل -ترة الوالد بالمستشفى وحالتة مو زينة فلا تخلي تتأزم حالتة من وراك مو زين على گلبه
ودخل نبيل وتركنا احنا وبابا منتظرين بالباب
بس كان صوت الرجل الكبير صاحب يردد-حسبي الله ونعم الوكيل
فرح وهي تأشر على صاحب -بابا هذا منو الحجي هو هذا جدو ؟
منذر-حبيبتي لا هذا مو جدو هذا البواب
يالله بابا امشونا
لن انسى نظرات ابي عندما ترك بيت اهله ومشى لكن في نهاية الطريق التفت ونظر الى بيتهم ونزلت دموعه الطيبة
اخذ الحسرة بحزن
منذر-والله مشتاق لك يا يابة مشتاق لحضن امي
وريحة اهلنا
فرح بقهر تعود الى الوقت الحالي
اذا اكو شي بحياتي اكره فهو جدي وجدتي وعمامي
لان سمعوا بابوي اتوفى هو وامي ولا واحد بيهم كلف نفسة يجي يطيب خاطرنا
عساهم لا اجو ولا نشوف رگعة وجهم همة هذولي هم اهل محسوبين علينا اوف
فرح تكمل طريقها وتحط جنطتهة على كتفها وتطلع للمدرسة مع سرور
وهنة يمشن في طريق المدرسة صحيح الطريق
طويل بس اتعودنا
احنا من بعد وفاة بابا
عشنا على راتب التقاعد واختي سماح كانت ثاني مرحلة كلية تربية لكن من وفاة بابا بطلت وگعدت بالبيت تدارينا
ولحكتهة سلوى بطلت
سلوى -ما ادبرهة هاي السنة سادس ووفاة امي وابوية ما خلاني اركز فخلي هاي السنة اتوقف وارجع السنة الجاية اذا راد الله وعيشنا

وانتبهت على سلوى ذبت روحهة على الخياطة لان هي تفنن بالخياط مو بس دشاديش لا حتى عندها امكانية ان تخيط فساتين حفلات اذا واحد وفرلها الغراض والقماش الغالي

صرنا بس اني وسرور الصغيرة بالمدرسة
شخصية سلوى طيبة بس شخصيته ضعيفة يعني بسرعة تستسلم وترفع الراية البيضة
عكسي اني
شخصيتي غير تختلف عنها عنيدة وراسي يابس وحقي ابد ما يضيع اتذكر ماما من تكول انتي بالغلط صرتي بنية المفرض انتي ولد
اما اختي الحبيبة سماح حنونة وطيبة وبخوفها عيلنا وحرصها احس بيها مثل امنا
وسرور حبيتي بعدها صغيرة ونحاول احنا الثلاثة ان مانحسسها باليتم خطية بعدها ماشبعت من حنان امي وابوي

في بداية وفاة بابا
كانت الحياة بعد فراقهم كلش صعبة علينا نعيش سويا لوحدنا وكان الخوف ماخذ منا مأخذ لكن الله يرضى عليه ابو نوال جارنا تصير عندة دكان مطلعة من البيت مقابيل بيتنا
وهو مرتة كبار بالعمر واولادهم الثلاثة مهاجرين وبنتهم متزوجة بغير محافظة
فهو عينة عيلنا واحنا عينا عليهم يعني كل يوم وحدة تروح تساعد خالة ام نوال
اني اكثر وحدة اروح الهم اموت على كلامهم وقصصهم جنت ما امل من كعدتهم ابقى هناك ادرس وانطرهة خاف تحتاج شي والله مرات احس حالهم اسوء من حالنا
اذا كنا احنا مستصعبين حالنا بنات لوحدنا لعد همة خطية كبار بالسن لوحدهم شيكولون على حالهم
على الاقل احنا نكدر نخدم نفسنا ونعيش بس رب العباد ما يترك عباده سخرهم النا وسخرنا الهم لان احنا محتاجين بعض

سماح اختي حصلت شغلة عن طريق صديقته كان ابوها عند معمل خياطة يشغل بي الارامل والمطلقات والبنات
والله بدت صارلها ثلاث اشهر فرحانة بالشغل
ابو نوال -تعاي فرح بوية اخذي هاي الروبة للبنات هاي خالتج مسويتة كالت اخذ وياك للبنات نص حتى يتغدون بيه
فرح -اشكرك عمو رحمة الله والديك
هكذا كانت حياتنا مع العم ابو نوال والخالة ام نوال
مثل الاهل

كنت ارى سماح تجلس هي وسلوى واشوفه لازمات ورقة ويسجلن فيها المصاريف المنزلية مسويات قائمة
سماح -لازم نقلل المصرف شوية
بنات شنو رايكم نلغي الامبيرية السحب الشهرية لان شوفت عينكم تقاعد بابا صار كل شهرين نستلم
سلوى -اي والله همة العايشين ما جاي يستلمون رواتبهم مو النوب الموتة
فرح -هسة احنا شصارفين قابل
هسة بقت على الامبيرية عمي خل نلغيها وعودك من اريد ادرس لو اشوف المسلسل التركي مالتي اروح عند بيت عمو ابو نوال
فرح اتعلمت ان ما اضغط على خواتي بالمصرف الا للشي الضروري لكن المشكلة احنا بنات يعني كلش كلش ما نصرف بس الضروريات من مملابس داخلية على كل وحدة قطعة بينا هم راح يصير ذاك المبلغ الي يهد الحيل
بس رغم هذا حالنا احسن من هواي ناس
احمد الله واشكرة على النعمة الفضيلة
مرت الايام وسودة علية اختي سماح اتعودت ترجع مشي لان المشغل مايبعد عن بيتنا مسافة هواي
لكن كانت تروح للمشغل مع ام مثنى جارتنا بمنطقتنا
كانت امراة ارملة زوجه شهيد وعندها ثلاث اولاد درة مالت الله اكبر واحد بيهم بصف السادس علمي
لكن ذاك اليوم غابت ام مثنى عن العمل مما اضطرت سماح ان تروح للمشغل لوحدها
اختي سماح كانت جميلة وريانة وكانت العين عليه
بس هي جدا محتشمة ورزنة ابد ما يوم شفته تتمضحك بالشارع او تتكلم بمياعة ابد هو احنا كلنا على گولت بابا انتو زلم خشنة ما ينخاف عليكم
لكن اختي سماح بهذا اليوم الي راحت بي لوحدها
ماكو ما رجعت اتأخرتعلينا

وظل بالنا عندها شلون ربي صار الوقت مغرب واختنا ماكو مانعرف منو نسأل عليها
اني رحتت لبست عباتي واخذت وياي خالة ام نوال حتى اشوف ليش اتأخرت ورحنا على مكان العمل بالمشغل وسألنا البواب
گال بوية بتكم سماح اليوم ما اجت للشغل
فرح وهي تلطم صدرهة عزة بعيني
يمة ليش ماداومت اختي طلعت من الصبح
ورححت گبل على بيت ام مثنى
ام مثني-خالة اليوم ما داومت ومن اجت علية اختج شافتني مالي خلك مريضة وهي راحت كملت طريقه للمشغل

فرح
بس اني بساعتها الدم جمد بعروگي من الخوف على اختي يعني شلون اختي وين راحت دخيلك يارب استر علينا والله اختي فقيرة ومالها احد ربي ادفع عنا السوء

والله ومرت الساعات واخذنا عمو ابو نوال لمركز الشرطة
حتى نقدم بلاغ اختفاء اختي
لكن
ميصير نقدم بلاغ باختفاء شخص الا تمر عليه ٢٤ساعة على اختفاءه

يتبع