رواية قمع المشاعر الفصل الثامن عشر 18 - بقلم Rozaya1122

قمع المشاعر.... البارت التاسع عشر..
للكاتبة زهراء ( روزايه)....

لا رضينا نعيش چذبه
ولا تونسنا بصـدگ
ولا عشـگناهم واخذنا
ولا اخذنا بلا عشـگ..
....

قبس.. لحظات كلهه تراكم فوك راسي صوت فرح وهي تصيح موكتلكم هي!! وصوت ام بشار دكول لا مستحيل تاكل من خيرنه وتطعنه احس اذاني بدت توش والساني انعكد شلون راح ادافع عن نفسي بوسط هي موقف

بس عيوني الي غرغرت من الدموع باوعت لبشار هو الوحيد الي يكدر يساعدني صح ماوكعت دمعتي بس عيني بدت تلالي وصار غواش عليهه بس هزلي راسه وغمض عينه ...

كلهه اجت للهول الكاعد بي بشار ونظرات الاتهام تصوبت عليه من كل جانب ابتعدت خطوتين ليورا ووكفت كدامهم وحسيت نفسي بمحكمه وجاي يحاكموني نقاشهم واصواتهم الي كلما اجالهه وتعلى..

بسمه.. هاي كدامك شفتو بعيونكم قبس بنت اخوي وماريد اذيتهه بس ام وائل اجتني وطعنت ببنتي ودكلي بنت خربتنه ويه بيت ابوبشار واني بنتي مسولفتلي واضطريت احجي..

عادل.. التفت ع بشار يابه شوف الخط بجهازك شبي رسائل مابي ولازم نتاكد قبس دكول مواني واحنه لكينا عدهه!!

الحجي.. لاتظلمون اي طرف قبل ماتاخذون كل الادله وارفع دعوه وطلع اسم المالك منو والجانت قبس اكلهه مع الاسف !! واذا فرح احط ايدي بيدهه واطردهه

قبس.. الكل ساكت ويباوعلي واني واكفه افرك بايدي لاول مره اخاف هيج خوفه وموقصه خوف بس لا شغله شرف معناتهه راح يخلون عليه علامه ويشبهوني بخالاتي ..

ام بشار.. تعالي قبس يمه اكعدي ليش واكفه الله موجود !!
قبس.. تقربت كعدت يمهه على طرف الكرسي جنت كاعده بالجانب..

بشار.. عمه بسمه قبل كلشي اريد تسمعين هالكلام من عندي فرح تربت بيناتنه ونعرفهه حق المعرفه واني اشهدلج اخلاق بنتج عاليه وبنفس الوقت قبس صارلهه اشهر يمنه وماشفنه شي عليهه ومانعرف شي عن الماضي مالتهه وهذا الشي هم خلاني بلاول اشك بيهه بس لابد ماتنكشف الحقيقه وخاصه الطعن صار لشجن وكلنه نعرف شجن شكد فقيره..

الرسائل الي جابهن الي وائل تاريخ الارسال مالتهن باول يوم اجت بي قبس وصادف نفس اليوم الي مسوين بي سنه ابوهه وجان الكل موجود يعني من بنات عامر لبناتج لبنات بشرى!! تتوقعين بنيه اول يوم اجت بي وماتعرف وائل ادز رسائل لوائل؟؟

شنو معرفتهه بوائل واحنه جبناهه بليل وثاني يوم اندزت الرسائل ؟؟ وشمعنى شجن بالذات ليش موفاديه؟؟ ليش موبنات عامر؟؟

ظليت ورا هاي السالفه صار شكد بحدود ٦ اشهر والرقم اخذته وانطيته لغيث بحكم شغله وظل متابع الرقم بس ماكدرنه نطلع اسم المالك لازم امر من المحكمه بس ظل غيث يراقب بالرقم وطول هاي الفتره ماندزت رساله وحده ولا انفتح الجهاز

صارت عزيمه الحجي وتعمدت اخذ قبس وياي وهم تعمدت اتاخر برجعتنه للبيت حته تبين الحقيقه واني بالسياره وقبس بصفي واجتني رساله من غيث بان الخط انفتح واندزت من عنده رسائل وصدك بعدما تاكد غيث من اخو الرسائل وصلت لوائل

برايج اكدر اكول قبس؟؟ قبس كاعده يمي وحته تليفونهه مالزمته ولادك تليفونهه برايج اكدر اشك بقبس بعد ؟؟ خلاني اشك بالكل بس استبعدت قبس نهائيا ومن رجعنه اجتني فاديه وكالت شفت فرح فاتحه كنتور قبس ومن شايفه فاديه بسرعه سادته مامتعلمه الخصوصيه فرح ليش فاتحه الكنتور ؟؟

فرح... لا بس جنت اعدل....
بسمه.. اسكتي ولاحرف اسمع من عندج فاديه عمه اشفتي بالضبط؟؟

فاديه.. اجيت للغرفه وشفتهه فاتحه الكنتور بس ماكدرت اشوف شسوي لان باب الكنتور مفتوح على جهتي بس من شافتني ارتبكت وسدت الباب وسوت نفسهه تعدل بشالهه واني وصاني بشار قبل لايطلع انتبه ع الكل بلكي نلكه خيط وما انكر اجيت وسولفت لبشار وكالي دوري كنتور قبس وثاني يوم كعدت ادور بغراضهه قطعه قطعه ولكيت شريحه صغيره ملفوفه بورقه وجبتهه لبشار اخذهه!!

وحته كلت لبشار احتمال الشريحه لقبس لانتهم فرح بس كال اني اتاكد بنفسي وبعد انطيتهه اله وما اعرف الصار والشريحه ظلت عند بشار وهسه اني مصدومه شلون طلعت الشريحه بالفراش شجابهه شوصلهه؟؟

بسمه.. بشار من اخذت الشريحه ماعرفتهه باسم منو؟؟
بشار.. اي عندي صاحبي محامي وكدر ياخذ موافقه والشريحه طلعت باسم فرح!! وهاي موجوده عندي بعد منين طلعت الشريحه الثانيه؟؟

بسمه.. هسه تخابر الولد وخلي يطلعلك الشريحه الثانيه هم باسم منو؟؟ بشار اني عمتك وهسه ما اشوف كدامي لاقبس ولافرح اريد الحقيقه حتلو تطلع فرح لاتضم عليه

عادل.. ع كيفج بسمه احنه انريد نعالج الخطا هدي روحج وانتي عندج ضغط
بسمه.. عادل اذا طلعت بنتي يمين عليه اكسر ايدهه الي سوت بيهه هيج ودزت وطعنت شجن
بشار.. راح ادز الرقم لغيث وخاف ماتصدكين روحي فاديه لغرفتي بالمجر ورقه اثبات الرقم باسم فرح من الشركه

قبس..اني ع سكتي بس كلبي يغلي نار رغم الكل دافع عني عمو عادل وبشار وامه وجدو بس يافرح اذا ما اردهه الج اضعاف ولا اتسمه باسمي يعني هيج بنيه حاكت هيج سالفه وذبتهه براسي كلما اصفن اكول لو بيت عمي من النوع الصعب وسمعوا ببنتهم هيج مسويه جان هسه شجن يجوز مزوجيهه غصب عنهه لوكاتليهه لومتاذيه مافكرت بالنهايه لو كل همهه بشار..

اخذت بناتهه وراحت وكالت انتظر منكم خبر ثاني يوم ونفس الكعده جانت بليل واجت تنتظر بشار علمود الخط ولحد ٩ بليل يله اجه وجابلهه الاثبات بان الخطين باسم فرح

بوقتهه عمتي بسمه انهارت اول ماكامت تضرب بوجهه وام بشار لازمتهه وبعدين كامت ع فرح الي تصيح مواني والله واخذتهه للغرفه نسمع بس الضرب والغلط شكد حاولو عمو وجدو يدخلون بس عمه جانت منهاره

نسمعهه تصيح هاي تربيتي الج يايوم قصرت بشي ولج احسن لبس لبستج واحسن عيشه عايشه بشنو قصرنه وادكين هيج درب مال ساقطات ومستمره تضرب بيهه

جدو منع عمو عادل لان راد يكسر الباب ويدخل بس كاله هي ام وتعرف تصرف وبشار صعد لغرفته وكال عوفوهه اذا مانكتلت ماتتعلم

يعني بمعنى الكلمه من كول ملختهه تملخ حته صوت فرح مانسمعه ونحس عمه مو بوعيهه من كدما مصدومه بالصار

فجاه ونسمع صوت فرح وهي تصرخ بصوت عالي وتصيح لاماما والله مواني وعمه دكلهه هاي ايدج الي دزيتي ولعبتي بيهه اليوم اكسرهه

اني ما اعرف شجاني من صغري واني اخاف من العنف من جنت اشوف بابا يضرب ماما جنت حته ادرر ع نفسي بالفراش واظل ايام ما انام لو صارت بيه حاله اكطع بشعري وهسه بس سمعت صوت العياط واتخيل الموقف احس جسمي نمل ولارجليه بعد تساعدني كعدت اباب المطبخ ع جهه الهول وضامه رجليه لصدريه وارجف اخلي ايدي ع اذاني واسدهن ماريد اسمع الصوت

صوت فرح يرن بالبيت لان عمه بسمه متخبله حته ماتعرف شتغلط وبيمن تسب برجلهه الي بعدهه لازمه عده عليه بس فاديه ركضت ع الدرج صاحت بشار لان عمو عادل اخذ جدو وطلعوا برا وام بشار وبيبي وفاطمه اختهه الي تبجي يدكون بالباب ويتوسلون بيهه تعوفهه

نزل بشار وفاطمه تلكته الله عليك بشار ساعدهه ماما هسه تنجلط وتوكع وفرح راح تاذيهه موفرح والله موفرح سوت هيج؟؟تقرب ع الباب دكه وهو يحجي وياهه عمه عوفيهه موهيج تسوين موزين ع صحتج؟؟

بس عمه ماسمعت اي كلمه واصلا جان الصوت ماكو فتحت الباب وهي عركانه وبسرعه وكعت وانغمى عليهه شالوهه وخلوهه بالكاع ورشو عليهه مي انتبهت وهي تبجي وتستغفر ربهه

بسمه.. شسويت ياربي حته هيج تعاقبني ببنتي
بشار.. الله شعلي ترى اساس تربيتج ياعمه شكم مره نبهتج لاتنطين دلال زايد
بسمه.. والله ماقصرت وياهه بكد الشعره ولا ابوهه بعده ترابه اخضر وهيج جازته وكامت ادك ع خدودهه يافضيحتي ولكم هيج تسوي وتشمر بلاويهه ع غيرهه
ام بشار.. حرام عليج داده سبحان المايغلط وفرح غلطت لاتسوين هيج

فرح.. من الغرفه وعاطت بصوت عالي كتلج مواني خطي ضاع هنا وكلش زين تدرين هسه سويتي نفسج ماتدرين مواجيت وسولفتلج خطي ضاع جذبتيني وصدكتي هالكح... قبس
بسمه .. سكتوهه لا اكوم ادوس ببطنهه

قبس.. من كالت الكح... كمت ع حيلي وكفت باب الغرفه جانت شعرهه مكفوش والكحل تارس وجهه من كدما باجيه واختهه حاضنتهه صرت بين باب الغرفه وبين الهول

صدك عديمه اخلاق وتفوو عليج وعلى هاي الخلقه الزفره يمج بكاعج اني الغيره كاتلتج عليمن هااا كومي واجهيني اذا بيج حظ وكليلي لو اني من عندج ع هاي الاهانه الي اكلتهه هسه ما اشيل راسي بعد بس منيلج كرامه وخليهه ابالج كل واحد يشوف الناس بعين طبعه وحرامات امج هاي المسكينه تفوو عليج ياتافهه

عفتهه وطبيت للغرفه وعمه بسمه بسرعه كامت اخذتهن بعد ما ادري اسمع يحجون برا بس اني ماطلعت لحدما اجتني فاديه هي وشجن لكتني كاعده ع جربايتي وحاضنه رجليه

فاديه.. كومي داده اكلت المقسوم فريحه وراحت بس عبالج اتوب لا عيني لا شكم يوم وتشد الهمه وتجيج
قبس.. توقعي كلشي منهه وحده مريضه

فاديه.. اني الي قاهرني لا انتي ولا فرح القاهرني هاي العجينه شجن ولج كل الموضوع عليج اني وحده هيج تسوي بسه واسكت وفوكاهه دكل لعمه بسمه ع كيفج عمه لاتضربيهه امداج ياعوبه شوفي هذا كلبج الطيب وين يوصلج..

شجن.. اسكتي انتي ماشفتي شلون انضربت يمعوده حتلو عدوج ماتتمنين اله هيج
فاديه.. لا والله فرح تستاهل ولو صدك ماتستاهل جان ادخل اخوج وحماهه بس يدري بسوالفهه

قبس شبيج ساكته ترى من غيرتهه سوت هيج وشوفو وكولو فاديه ماكالت راح يجن يسكنن يمنه
شجن.. اسكتي جنج بومه منيلج هالحجي وبعدين بيتنه وين بي مجال وراح نزوج عمر

فاديه.. باعي حسب تحليلي والخبره مالتي عمتج بيتهه راح يتقاسم وماتاخذ من عنده غير تفاليس لان البيت اصلا موباسم رجلهه باسم امه وامه شانه الحرب وراح تنطي لبناتهه وهذا هم راح يقسمو جدو واكيد بشار يشتري الحصص هو وبابا حته لانشيل من عنده وهي راح تخلي فلوسهه ويه فلوس هذا مايجيبلهه قطعه بالبتاوين

واكيد جدو ابو كلب الطيب الحنين راح لو يجيبهه يمنه وع الاغلب راح ينيلهه فد غرفتين بالحديقه وابوكم الله يرحمه واذا جانت فرح تشوفهه بالمناسبات هسه تشوفوهه قبل الاكل وبعد الاكل..

قبس.. تف من حلكج عابت شلون تحليل غير انجلط اذا اجت
فاديه.. لاحبي مانجلطين بس راح تظلين ادخلين بمغامره واطلعين من مغامره
قبس.. كومي فاديه كل سوالفج مابيهه خير راح انام اني
فاديه.. عيوني انتي ليش مابيهن خير ولايمهج هسه احجيلج عن بيشو اخوي ويصير خير وبركه

قبس.. كعدت ع حيلي شتقصدين ولج؟؟
فاديه..  اقصد قلبي انتي!! بس اهم شي هاي العيون ماتبجي ترى يحرك عشيره فرح وخاف يحركنه وياهه وتغامز بحواجبهه

قبس.. كمت من مكاني سديت حلكهه لا احد يسمع ولج اسكتي فضحتينه عوبه وين سمعتي؟؟
شجن.. ولجن فهمني شكو ؟؟
فاديه .. من ورا ايد قبس وتحجي ولج اخوج يتغزل بعيون قبوس..

قبس.. ولج اسكتي الله عليج ماله قصد من حجه!!
فاديه.. اي هاهي وخري ايدج ما احجي وتحركت لباب الغرفه تريد تطلع فتحت الباب جان دكول اخوي واكع ومحد مسمي علي وشردت...

قبس.. ظليت فاتحه حلكي عزا بعيني طلعت مفضوحه ومادري شكد فشله حته ماباوعت بوجه شجن الي ضحكت بوجهي بسرعه تغطيت ونمت..

مرت الايام عاديه وبشار قليل اشوفه اغلب اوقاته دوام لو يطلع وعمه بسمه بعد ما اجت ماشفناهه بس تجي عمه بشرى وتسولفنه عليهه دكول مريضه ويوميه من محكمه لمحكمه من ورا سالفه البيت والورث

جدو انطه كل واحد حصته واحنه هم جان الي حصه وبيومهه جمع الكل يمه بليل حته بيت عامر وكالهم اريد انطيكم حصصكم البيت هلكد وصل الحجيه تنازلت لعادل وهو تنازل لعامر حته محد ينظلم وكال لبشرى الج هلكد وبسمه الج هلكد جان بيومهه امجد ابنهه كاعد مرحله ثانيه كليه يداوم اقسام داخليه بالكوفه

عمو عادل كال اني اشتري البيت لان المنطقه ماعوفهه ودفع الحصص لعماتي وبلاحرى هو وبشار لان عمو كال انتظروني بس بشار كاله اني ادفعلهن وظلت حصتي كال جدو قبس تريدين ننطيهه الج فلوس تريدين تبقه بالسند ويه عمج عادل

ماحجيت ظليت ساكته بس عمو عادل كال لا اني انطيهه فلوس وراح اضمهن الهه بالمصرف حته لاتصرفهن هم وحدهم قررو اني لاحجيت ولا كلت حته لايكولون طمعانه بشي

من خلصت السالفه رحنه للغرفه لان بنات عامر جايات كعدنه نسولف وعدهم اختهن الصغيره سروه هاي بالثاني متوسط يكولن عليهه فتانه كشره ماتضم السالفه شكد يكتلوهه بس ما اتوب

كدامنه الكلاصات ودولكه مال عصير طبيعي برتقال وملتهين انسولف جان تكمز من يمهه وكالت اكلكم شي ؟؟
نرجس.. اكعدي لا اكوم املص اذاناتج
سروه.. الا اكول واذا ماكلت اكول لماما عليج؟؟
نرجس.. دكومي كولي لامج الا ادوس بمصارينج

فاديه.. كولي حب لاتخافين منهه هاي نرجس ماتخوف جلبي!!
سروه.. كامت وكفت بعيد عن نرجس جان دكول نرجس تحب سلام ابن خالي وانهزمت

فاديه.. كامت تصفك ع كبر ايدهه هاي ام الطكه وهي تصيح العب العب نرجس تحب؟؟ ومنو سلام الوسخ ؟؟
نرجس.. انجبي لا اطيح حظج شبي وسخ عوبه يخبل هو بشرته محروكه

فاديه.. لج بربج لوما انتي جنتي دكولين وسخ هسه صار مابي شي
نرجس .. اسكتن لاتفضحني وتدري ماما هاي العوبه سمعتي احجي لمروه ولزمتهه عليه وشابعتني تهديد اشتري وارجع ليورا بس حته تسكت

قبس.. اذا يحبج وناوي يخطبج مابيهه شي بس تاكدي منه لايطلع ناقص غيره مثل وائل موكل ابن خال صدك

نرجس.. والله لاحاجيه ويا ولا اسمحله يراسلني بس هو بيت جدو وكالي يتخرج ويخطبني وهو اخر سنه هاي واحنه تعرفن بابا شكد متشدد لذلك ماريد علاقه وانكشف واروح بيهه

مروه.. وانتي فاديه ماكو ع الطريق
فاديه.. هذا سؤالج ينسال للمتزوجه جديد يكلولهه هيج عود ماصرتي حامل لا والله لسه ما الله سهل !!

قبس.. ضحك وسوالف اتونست وياهن لحدما صارت ب١١ كال عامر يله واني لسه ما احجي ويا وراحو واحنه كل وحده راحت لفراشهه شجن تراسل بغيث يله تنام وحاليا الوضع هادىء ويريدون سالفه وائل تنسي يله يفتح موضوع الخطوبه ...

اليوم اول يوم رمضان وبشهر السابع الجو نار كل وحده بينه لازمتلهه كلاص مجرش وتنتظر الاذان وطبيعتهم يفطرون بلبن وتمر او مي ويصلون يله يتعشون

واكفه يم الكاونتر ولازمه كلاصي بيدي واحس بلاعيمي مثل الخشب اليابس من كد العطش واجه عمر مثل مايكولون الوجه مدخن يريد ياخذ نفس مايكدر دوام والعصر يروح لمحلات الخياطه يتعب حيل

ام بشار.. سوده عليه يمه شحالك بعدك من اول يوم
عمر.. يمه الجو برا نار بعز تموز اجانه شيخلي بينه لعد لوتشوفين هذوله العمال الي كدام محلاتنه الله يساعدهم
ام بشار.. الله يسهله ع امه محمد واخوك سوده عليه يطلعون بالشمس هاي الايام ع التنقيب تلكي العطش موته
عمر.. بشار اليوم مارايح لشركه من الصبح لسه هو بالمصفي عدهم عطل وخابرته كال اتاخر افطر بالشغل

قبس.. جانو يحجون وسمعنه الاذان اذن عمر مالحك احنه نسوي اللبن بفلينه حته يظل بارد شال الفلينه وشرب وامه دكله موهيج معدتك تتقلص

ايام صعبه حيل ايام رمضان بهذا الحر ظلينه ع هذا المعدل نفطر ونغسل مواعين يله يجي بشار من التعب حته ماياكل هواي ولسحور مايكعد يعني صرت اشوفه بالصدفه مرات اسال شيفتهم من يومه اذا مخلصه كله شغل ..

اليوم جانت ليله القدر وجدو جمع اولاده كلهم واجن بسمه وبناتهه وبشرى وعدهه بنيه وحده مرحله اخيره طب عام فرق بينهه وبين بنات بسمه من ادب من اخلاق ونزاكه وهذنيج مجلوبات

عبالي فرح راح تخجل وراح تتاثر بالصار بس ابو طبع اسأل ع سلامته نفس ماهي مامتاثره بكد الشعره وفوكاهه عود بعدهه حزينه ع ابوهه ومخليه كومه مكياج...

هم حار المطبخ وهم سوالفهه الي تخلي الواحد يشك هدومه ويطلع مصلخ كلساع هدى تسكتهه لو تاخذهه للغرفه وترجع نفس الفيكه والبسامير مالتهه بحيث اعصابي تلفت واني واكفه ع الطباخ..

تقلد ع بنات عامر وساعه تنطي مقترحات ع الاكل داست ببطني ماتحملت بسرعه التفتت عليهه كتلهه اذا ماعندج شغله لوتروحين تكعدين تنتظرين الفطور لو تكرمينه بسكوتج

فرح.. وانتي منو يمج خاف دسنه ع ذيلج وماندري!!
قبس.. منو كالج اني فرح وعندي ذيل مصختيهه وراسنه صاير طبل من الحر والصيام وانتي تكركين يم راسنه وفوكاهه نتحمل اذنوب من وراج

فرح.. عجيب امرج اريد افتهم شبيج مفلفله ع شنو هاي الدوده الي بيج ماتكرصيهه شويه؟؟

قبس.. دوده بعينج جنت لازمه بيدي الجفجير مال التمن هديت عليهه بي كتلهه اذا ماسكتي هذا شوفي انيمه براسج اطلعي منا يالله

هدى.. قبس اعصابج روحي كملي شغلج وانتي فرح بلا لغوه لازم كل مناسبه تصير عدنه رنه روحي يم البنات عافتنه وطلعت وهي تهز بيدهه وتعوج بحلكهه..

هدى.. قبس موكتلج اتجاهليهه ترى تحاول تستفزج وتطلعج موزينه
قبس.. لا وروح بابا اذا سمعتهه حجت الا اشحطهه شحط كافي كلبي طك منهه
هدى.. ادري حاره وصيام اليوم شبيج گابه عندج
قبس.. ام علي ماتنحمل تقلد ع الناس وهي شحالهه

ظليت بالمطبخ ولاطلعت لحدما بدينه نصب وفرشو للزلم وحدهم وهالمره اجه بشار من وقت جان هستوه جاي من الدوام محد بالمطبخ اني وبشرى وفاديه من طب سلم ع عمته وتشاقه ويا

التفتت علي كتله الله يساعدك جان لابس بنطرون اسود وقميص سمائي على لون الغيوم تقريبا داكن ومعبي بالبنطرون والجسم كارثه لا لحمه منا ولا ترهل منا مو رجال عبالك مدري لان دائما يتحرك

دخل ليجوه واسمعه يسلم ع الموجودين وصعد لغرفته هاي راح يصير ٨ اشهر ع جيتي يمهم ومايوم صعدت ليفوك ولاشايفه شكو فوك بس الي ادري غرفه عمر وغرفه بشار ومخزن فوك

بشرى جانت تسوي حلاوه وعوزتج شكر التفتت عليه كالت قبس فوك الشكر روحي جيبلي بهاي الدولكه محد جان اكو بالمطبخ صعدت الدرج واني ما اندل وين المخزن اضحك بيني وبين نفسي كلت يجوز افوت ع غرفهم وما ادري المخزن منو بيهم

وصلت لصاله الفوك مبين المخزن بابه صغير طبيت اخذت شكر وطلعت سديت الباب وراي ويه ماسديته جان يطلع بشار من الحمام ومخلي الخاولي ع راسه وبس بجامه وفانيله سوده ربع ردن

ظليت متبسمره لا اخذ ولا انطي نزلت عيني واريد انزل صاح قبس تعالي !!!

التفتت علي واني خجلانه من منظره بشار ماشايفته ابد هيج واصلا دائما لوملابس الدوام لو نادرا ما اشوفه بتراك البيت لذلك ظليت فاهيه من شفته..

تقربت بخطوات بطيئه كتله هاا بشار!!
بشار.. جان يفرك بشعره بالخاولي جان يكول ترى فرح هنا ما اريد اسمع مشكله اتجنبيهه قدر الامكان!!

قبس.. لا مالي علاقه بيهه واصلا حذرتهه اذا حجت احط هاي الدولكه براسهه
بشار.. اعصابج اكلج تجنبيهه لو تهدين عليهه
قبس.. والله هاي ماتمشي الا بالكتل ماتدري الي يطخ بيه شسويله

من كلتج هيج تقرب عليه واني ارجع ليورا ريحه العطر الرجالي تفوح من عنده لحدما طخيت بالمحجر وتفصل مسافه كلش قصيره بيناتنه

خله اديه اثنينهم منا ومنا وصرت بيناتهم وكال اااي بله سولفيلي الي يطخ بيج شتسويله؟؟

بلعت ريگي وبدت حرارتي ترتفع درت وجهي ما اكدر اقاوم لاعيونه ولاهذا العطر كتله وخر بشار اريد انزل

بشار.. شو باوعيلي خلي اشوفج
قبس.. دايره وجهي واحجي شتشوف ماشايفني؟؟
بشار.. لااا اريد اشوفج عن قريب التفتي شووو!!

قبس.. التفت عليه صارت عيني بعينه لاول مره اركز بعيونه سود حيل وحواجبه بيهن كسره ومحددات يمكن احلى من حواجبي جنت مركزه بعيونه واحس ايدي ارتخت اكثر..

رمشت سريع ودنكت صوته خافت قريب للهمس وقريب على اذاني حيل كالي ليش هلكد حلوات عيونج؟؟؟

ماكدرت اتحمل قربه اكثر غمضت عيوني واحس انفاسه تلهب بوجهي يمكن لاحظ صعفي ابتعد عني واني شلتهه ركضه حته التوت رجلي ع الدرج

حصلت رزاله من بشرى دكلي وين رحتي هلكد راح تخرب الحلاوه!!! شكد مارزلتني بس ما انتبهت شتحجي كلبي احسه راح يطلع من صدري شعور فضيع اول مره احس بهيج احساس ...

جنت فاصله نهائيا عن كلشي يصير حته فرح ماشفتهه ولا انتبهت عليهه جنت بعالم ثاني ع الرغم بعد ماشفته ابد بس كدر يشغل فكري ...

شجن.. فزيت نص الليل اريد اروح لصحيات كلت خطيه اكعد البنات اني كمت ع العكازات وصحياتنه برا ما اخاف لان اكو ضوه وعبالك نهار.

طلعت وحدي دخلت للصحيات وغسلت وكلت خلي اتوضى حته اقره قران جنت شبعانه نوم ...
غسلت واخذت عكازاتي ونزلت الدرجات استندت ع سياره بشار اريد اجفف وجهي

ما احس غير ايد انمدت ع خصري والثانيه ع حلكي ماكدرت لا اتحرك ولا اعيط...

يتبببع..... احبكم

حبايب تابعولي هذا الحساب وادعمو كاتبه جديده لاتفشلوني قصصهه حلوه 😘 haneenali422