رواية قمع المشاعر الفصل التاسع عشر 19 - بقلم Rozaya1122

قمع المشاعر.... البارت العشرون..
للكاتبة زهراء ( روزايه)....

وال حمامات العفتهن جـوه روحي زغار...كلش
كبـرن....وصارن فخـاتـي وعاشگات
عاشگـات...ومامش....انته....!!!

....

شجن.. الايد الي حلكي جانت تضغط حيل حته اختنكت والثانيه ع خصري وتتحرك السجينه يمين يسار ع طول جسمي جان يحجي يم اذاني وسجينته ما اعرف وين تروح تصعد لركبتي لصدري احسهه راح تنغرز بكلبي ولا اكدر اصيح كمت كوه اخذ الهوه

اخر تحذير الج اخر تنبيه اذا ماعفتي غيث هاي السجينه الحاده اكطعج بيهه مثل الذبيحه واحطج بكونيه ومحد اخلي يندل اثرج وعبالج اذا متي تخلصين لاا عندج اخوج عمر وعندج بشار وابوج ما اتردد لحظه بقتلهم ابد بعدج ماتعرفيني خليهه ابالج اني مجرم واكتلج واكتل غيث وشكو واحد يوكف بطريقي وما اهتم صيري حبابه وعوفي سالفه الحب ماتنقهرين على غيث خطيه شنو ذنبه ينقتل بسببج ..

مدري من كد خوفي مدري اني صدك ثوله ماكدرت اميز الصوت هذا وائل لولا صوته يختلف عن وائل بس جنت اهز براسي ودموعي جرت ع ايده الي مخليهه ع حلكي احسه دفن راسه بركبتي ويشم بيهه ورغم مقاومتي ماكدرت افلت من عنده

انتهيت من الخوف وخاصه من بده يسحب بيه يريد ينزلني الحديقه بس هو ضخم حيل ماكدرت كلشي اسوي وما احس غير صوت طلقتين من كدما جانن قريبات حسيت طبله اذاني انثقبت وكعت بالكاع وما ادري بالصار بعد ...

قبس.. الساعه تقريبا ب١ ونص والكل غاط بالنوم كل مره نظل لحد السحور وخاصه عمو عادل يظل يصلي ويقره قران بس لان جانت ليله القدر وهوسه يمنه كالو انام ونكعد ب٢ نحي الليله

اني جنت بين النايمه والكاعده وافز ع حيلي ع صوت الطلقات اريد اكوم من افراشي ما اكدر اسمع بس البيبان مال الغرف انفتحت واحد يسال الثاني شكو

كمزت فاديه وطلعت تركض واني وراهه وام بشار ركضت حافيه ليبرا كلنه وراهه بس مانعرف شجاي يصير بشار فتح باب البيت وجان هو اليرمي طلقات وعمر ركض وراهم بالشارع بس جانو بسياره انهزمو بسرعه

اشوف ام بشار كاعده بالحديقه وتصيح الحكولي ولج يمه شجن انريد انشيلهه من الكاع مانكدر اجه عمو عادل حضنهه وشالهه اخذناهه للهول غركناهه بالمي يله انتبهت جانت اطك سن بسن من الخوف وامهه حاضنتهه

اجه عمر وبشار بيده المسدس والخوف مسيطر ع الكل جنت بدون حجاب وبس دشداشه طويله ربع ردن صيفيه اصلا ما ادري بروحي ع هذيج الهبطه واحد يسال بالثاني شكو وشلون صار وليش شجن برا وشجن بس تبجي ماترضى تحجي..

عادل.. بشار بويه ليش ضربت طلقات اشفت؟؟
بشار.. اني مانايم سمعت حركه برا باوعت من البرده ماكو شي الظاهر السياره جانت حاجبه عني بس ظليت واكف اباوع ماعبالي اكوشي بس ظليت بالشباك شفت حركه سريعه من السياره للحديقه بس ماشفت شجن وضربت طلقات عبالي حرامي...

عمر.. مالحكنه عليهم اثنين هم واحد يسوق واحد صعد ع السريع حته شحاطته وكعت وشخطوا السياره وراحو ع الشارع العام..

الحجي.. يابويه هذا حرامي يجوز عرف بسالفه تقسيم البيت واجانه وشجن شسوي جانت برا
عادل.. بويه شجونه احجي ليش خايفه شسوين برا خوما سوالج شي؟؟

قبس.. اشوف بشار يفرك وجهه بعصبيه شلون انداس بيتهم واختهم هيج حالتهه ما انحس غير يندفع الباب ويطبون غيث ووائل وامه وهي تلطم ع صدرهه

ام وائل.. عزاا العزاج خيه كلبي راح وحيل ماعندي والجيران واكفه برا اطلعوا حاجوهم يمه بنيتنه شجونه

ام بشار.. شفتي حظ بنتي يداده هي منا مريضه سوده بوجهي
غيث.. قدر ولطف عمه بس جان ازيد من بشار من يحجي غير هالكلمه ماحجه...

عمو عادل وجدو طلعوا للناس جيرانهم اجو ولان رمضان اغلب الناس تظل كاعده ماتنام للسحور وبشار طلع شويه واجه اني من خبصتي وموبس اني حته فاديه جانت بالمطبخ اثنينه بدون حجاب..

ما احس غير الصوت جفلني انتي شعندج طالعه هيج ماتشوفين ولد خالي هنا ومطلعه زنودج!!

قبس.. هااا ما انتبهت من الخبصه واصلا بس طبو اجيت للمطبخ هسه راح اروح البس جانت فاديه لابسه تراك طويل نص ردن بس جرت اكو شال بالمطبخ خلته ع راسهه واني ردت اطلع اروح للغرفه بس شلون وهم كلهم بالهول

بشار واكف باب المطبخ هستوه فات حاجيته من ورا ماكدر اروح للغرفه شلون افوت من نصهم!؟ التفت ع المطبخ كال فاديه روحي جيبيلهه شي يستر فاديه كامت تسحل بنفسهه ومدري شدردمت...

ظليت بس اني بالمطبخ وهو راح للهول جابتلي عبايه اسلاميه وحجاب لبستهم وطلعنه كعدنه يمهم

هذا وائل وجهه جنه قندره ضاربتهه الشمس وكاعد يحجي والسبحه بيده والمسدس كدامه ويتفيك والله اطلعهم من جوه الكاع لاتبجين بنيتنه كون ماسوالج شي!!

شجن من خوفهه حاشكه نفسهه بحضن خاله بس جاوبه بشار مشكور ابو محمد الداس بيتنه موغريب هذا يعرفنه حق المعرفه

وائل.. طبعا موغريب الي يجي بهيج وقت وماخايف اتوقع من عنده كلشي وهااا هذا يندل بيتكم شبر شبر

ام بشار .. يمه شجن احجي شبيج ساكته
قبس.. مدري شلون اجت عيني بعين شجن خزرتهه واشرتلهه براسي بمعناتهه احجي واشرت ع بشار عود كاعد لاتخافين ظلت كلما تباوعلي اخزرهه اريدهه تحجي اعرفهه جبانه ..

جان تكطع سوالفهم وكالت طلعت اتوضى واحد خلا ايدع ع حلكي وبيده سجينه ويهدد بيه يكلي بس تحجين اكتلج واكتل بشار وعمر وابوج جنت احجي بس ماكدرت اذكر غيث بس من خزرات قبس حجيت ...

من اسولف عيني اجت ع غيث الي جان شاد ع قبضه ايده بقوه بس ماباوعت بوجهه شكد عصبي هسه كملت كلامي وكلت حته عبالي وائل ابن خالي..

مدري شلون طلعت من عندي بحيث حجيتهه ودنكت حته ما اريد اشوف ردة فعل اي واحد وخاصه هو

ام وائل.. شنو هالحجي شجن شنو عبالج وائل يسوي هيج من طكت الطلقات اني وائل اثنينه نقره قران

وائل... ع كيفج يمه هي دكول عبالهه وائل قصدهه مثل الهيئه مالتي ماكالت وائل بس وداعتج ياشجن وع هذا خوفج الا اجيبه سحل...

بشار.. وائل لاتدخل لاتجيبه ولا اجيبك لاتدخل بهاي السالفه ومنا وانسدت واذا انريد نعرف منو هاي مو مسوؤليتك مسوؤليتنه احنه

وائل.. ليش تحسسني غريب عنكم بشار منتبه ع نفسك اني وياك تربينه سوه؟
بشار.. اي والمطلوب تربينه سوه يعني لازم اخليك براس قائمه عائلتي لاعبالك ناسي الدكه مالتك
وائل.. براحتك واني اترخص بس راح يجي يوم وتتندم ع هذا كلامك لان اني اخوك عضيدك بس الغرور الي عندك مامخليك تشوف شي

بسرعه طلع وائل وبشار حته ماكام ورا بس عمر كام وشويه غيث كال اني هم اروح واخذ امه وراحو رجعوا يحجون ويايه وسولفتلهم كلشي بس ماكدرت اذكر غيث حته بابا يكول هسه غير نفتهم التهديد عليمن بس ماما وجدو نقذوني كالو يجوز لان شافته عباله عرفته ...

قبس.. كمت اسوي سحور اني وفاديه ولو محد يشتهي بس جدو وبيبي كبار وعدهم علاج كملنه السحور وهم قسمين بيبي وجدو وحدهم ومرات يكعدون ويانه واحنه ناكل ع الميز صاحتهم امهم محد قبل ياكل

بس بشار اجه شرب جاي وراد عمو عادل يحجي وماقبل كاله تعبان لاتجيبلي طاري وائل رغم ماجان شكد عصبي بس باله مشغول ومبين علي هادىء بس امه كالت منو يصير هيج بشار ياويله الي ينفجر بوجهه..

اذن الاذان وكل واحد راح لغرفته شجن منطيهه مهدىء ونايمه واحنه هم نمنه ثاني يوم للعشره او ل١١ مرات يله نكعد لان ماعدنه شي وكلهه صايمه ظلوا ورا السالفه وماحصلوا اي نتيجه ورغم هذا وماقبل بشار وائل يدخل...

بعد ٤ ايام ويخلص رمضان فاديه هوست عليهم طلعونه انريد ملابس ويكلولهه انتي صغيره تالي تواسيل بعمر وهو اخذ سياره بشار وكال اخذكم عمو عادل اجه انطاني فلوس بلاول ماقبلت اخذهم استحيت بس كال انتي حالج من حال البنات

افترينه شكد همزين بليل جان متنه عطش وتعب اشتريت فستان بسيط حيل بي لفه ع الصدر وكمر ومن جوه كلوش ورهمت ويا شال ودشداشه مرتبه خاف يجي احد والبنات هم اشترن تقريبا نفس الشي شجن ماطلعت ويانه رغم شكد حاولنه بس ماقبلت كالت ماكدر امشي ع العكازات بنص الناس ..

قبل العيد بيومين كالت فاديه خلي انسوي شيره كل مره نشتري جاهزه ومدري شلونهه سالتني تعرفين كتلهه لااا بس كالت عمه بشرى تعرف راح اخابرهه تعلمنه خابرت ع بشرى علمتنه واني كمت اسويهه

جنه فاطرين ورا الفطور الولد يطلعون والي ينام والي يشوف تلفزيون سويتهه ويمكن صار لان مشيت ع طريقه عمه بس كالت خلوهه بالفريز حته تبرد وكلنه نظل لسحور وصدك ورا ساعه طلعتهه صايره تخبل احسن من الجاهزه ..

بيومهه اني قررت اسوي سحور وام بشار ماكعدناهه وكمت من وقت للمطبخ اسوي ووحدي بالمطبخ واسمع الباب انفتح وصوت سياره بشار اجه لان بس يفطر يطلع ومرات اصلا يفطر برا وبجي ويه السحور..

دخل للمطبخ لكاني واكفه يم الطباخ جر كرسي وكعد وكال مسويه جاي صبيلي
قبس.. راح نتسحر لو تاكل قبلهم
بشار.. لا ما اشتهي بس جاي انطيني

التفتت اصبله جاي واجاني صوته جان يكول قبس شكد عمرج واتزوجتي ؟؟
قبس.. ٢٠ سنه
بشار.. وشعجب ماصار عندج اطفال طولتي بزواجج
قبس.. بلعت ريكي وكتله اني جنت ماريد
بشار.. وهو جان منطيج ع هواج
قبس.. هذا شرطي الوحيد قبل لا اتزوج واخذت استكان الجاي خليته كدامه اشرلي اكعدي

بشار.. يخوط بلاستكان ويحجي مانعرف شي عن الماضي مالتج لا شلون تعرفتي ع عزيز ولاشلون عشتي مراهقتج...

قبس.. اسالني واجاوبك اذا تريد تعرف شي
بشار.. ممم لا اني اعرف بنفسي
قبس... سكتت مشوار وهو ساكت لحدماكمل الجاي وكام وكال لاتكعدوني بس مبين علي تعبان

اليوم اول يوم عيد الفطر كعدنه ع صوت التكبير وصلاة العيد طلعنه اني وفاديه بس تلكتنه ام بشار عايدناهه وغسلنه ورجعنه للغرفه ما اعرف نظامهم شنو بس فاديه كالت الكل راح يجي ونتريك سوه لذلك خلي انكوم انبدل...

اول وحده شجن بدلت وساعدناهه وحاولنه نخليلهه مكياج خفيف ماقبلت كالت استحي عفناهه ع راحتهه

لبست الفستان حيل حلو بحيث حبيته بشكل جان لونه ماروني ع دموي ولفه الصدر حلوه خليت كحل ابطن عيني ومسكاره وحمره بناتيه حته ماتبين ماعندي لاذهب ولاشي ايدي فارغه بس جنت مقتنعه ومرتاحه لبست الشال وكعدت انتظرهن يكملن احس مثل العرايس بس هي طبيعتهم هيج الكل يبدل ويطلعون يعايدون ...

جنت كاعده اباوع لفاديه الي تلف بالشال وترجع تفتحه حسيت ايد شجن على ايدي وهي تنطيني محبس ذهب ناعم بي شذره ماروني كتلهه شنو هذا؟؟

شجن.. البسي احنه كلنه عدنه مثل هذا المحبس واني عندي اثنين راح البس ابو الشذره الفيروزي وانتي ابو الماروني ويه لبسج؟؟

قبس.. لا شجن مايحتاج وترى اني متعوده ع ايدي فارغه ترى حته حلقه مالبست ولاعبالكم اتحسس او اضوج بس والله اني موكلش ع هاي السوالف

شجن.. ميخالف اخذي احنه مواخوات قابل اكو فرق البسي حته نطلع ٣ نفس الموديل بس كل وحده لون
قبس.. لاحبيبه تسلمين
شجن.. ازعل عليج والله ليش تحسسيني انتي غريبه عنه ترى ماكو فرق بيناتنه موهاي فاديه نلبس اني وياهه
فاديه.. يله قبس اخذي والله يطلع كلش حلو بيدج

قبس.. مديت ايدي اخذته منهه لبسته حلو واجه ويه لبسي وطلعنه من الغرفه محد جاي بس عمو عادل والكل كاعد ماعدا بشار عايدناهم وبيبي تصلي ع محمد ودكول شوف صالح حفيداتك مثل الكيك وهو يكلهه ع جدهن يامره...

صاحتنه ام بشار نحضر وياهه الريوك جان كيمر وكاهي وانواع اجبان واكوابه الجاي والقنديل والقوري من هذني القديمات الحلوات حسب تعليمات جدو الكل يكعد بالحديقه لذلك جنه ننقل بالغراض ومسوين كعده وفارشين بالحديقه الورد وريحه الاشجار تفوح اول مره اعيش هيج اجواء...

اندك الباب وبدت المحطات تتوافد اول محطه بيت عامر وراهه عمه بشرى وبعدهه بسمه وبناتهه وكل الي تفوت كالو الله شلون طالعات البنات لان تقريبا كلنه نفس الموديل ونرجس تضرب بفاديه ليش ماخذتوني وياكم اشتري هيج بابا ماقبل وماما هي طلعت جابت ع ذوقهه ...

فاديه.. حلو لبسج تخبلين وباجر تروحين لبيت خالج وسلام الوسخ يشوفج ويوكع من طوله
نرجس... امشي لج انظف من عندج لان محروك دكولين وسخ فدوه اله شايفه شلون انيق
فاديه.. شوكت صار انيق موجان قبل بنطرونه قماش ومايكوي لوتذبحي
نرجس.. ع الاقل احترميني موكدامي تحجين
فاديه.. الله يجمعكم ويريحكم بس يبقه سلام الوسخ...

قبس... جنه نضحك بالهول واجت فرح هي واختهه فاطمه طبت وتسوي هلو بنوتات كل عام وانتم بخير يارب كلكم متزوجين

ردن عليهه باوعتلهه شلابسه بنطرون جينز وقميص شويه نازل ع البنطرون بس الشهاده لله حلوه وانيقه والاظافر فدشي واختهه نفس اللبس ع غير لون بس اختهه ملاحظتهه ماتحب شجن ...

كعدن يمنه ويه سوالف نرجس وفاديه مندمجين جان ينزل بشار بس شافنه هن كامن اني وياهن ع الواهس بدن يعايدنه والا يمدن اديهن يصافحن اول وحده جانت فرح وتشاقه ويا ودكله يله اتزوج وخلصنه

يسلمن علي واني اباوعله ياربي شنو هاي اليوم صدك عيد لابس دشداشه لونهه هيج على شكري مدري بيجي فاتحه حلكي بس ع اناقته وطوله وجسمه وما احس غير ضربه بخاصرتي

التفتت فاديه وهي دكلي روحي اكلي اخوي شبيج مفضوحه بسرعه انتبهت ورمشت بعيوني بوجهه وكتلهه لا قحط اخوج

فاديه.. لا موقحطت بس تباوعيله بانحراف جنج ولد سايب ويتحرش بالبنات
قبس.. ولي ولج خلي اعايده واني اعلمج بعدين

تقربت بعد ماجانت شجن تبوس بي كتله كل عام وانت بخير
بشار.. وانتي بالف خير بس نظرته جدا عاديه اني جنت اخر وحده اعايده خله وطلع وفرح شالتهه ركضه ورا

رحت للمرايه عدلت شالي وطلعنه كلنه كعدنه بالحديقه وبدينه نتريك ونضحك ونسولف وجدو الله يخلي يشاقه ويداهر بالحجيه صدك ونسه اول مره اعيشهه

بعدنه كاعدين ورا الريوك وشجن بصفي شاورتني كومي اخذيني للغرفه كمت سندتهه واخذتهه مو ع بعضهه سالتهه ماجاوبت عفتهه تخابر بغيث وتعايد بي واني طلعت لكيتهن يجمعن بالمواعين كلت خلي اغسلهن وكفت اغسل بيهن بس المطبخ موفارغ يطبون ويطلعون...

هذني الكوابه والقوري مكانهن فوك بالمخزن كالت فاديه صعديهن لاينكسرن لان جانت تصب جاي اني اخذتهم وصعدت ماادري ببشار فوك

بعدني ماواصله المخزن طلع من غرفته ومبين يريد يطلع لان تليفونه وسويج السياره بيده باوعلي وهو يلبس بساعته وحجه

بشار .. اليوم ب٢ اخذكم للبستان عود اتحضري ويه البنات.
قبس.. عدكم بستان؟؟
... ااي عدنه
قبس.. ماشي اصلا اني اول مره اعيش اجواء حلوه واجواء العيد بهالشكل

بشار.. واني اول مره اكعد الصبح واعيد بهيج وجه
قبس.. فتحت عيني بتعجب كتله اني!!!

بشار.. انتي شدكولين؟؟
قبس.. ماحجيت دنكت اباوع ع القوري
بشار.. طالعه حلوه حيل

قبس.. ولاكدرت ارفع راسي كتله شكرا
بشار.. يله خليهن بالمخزن وانزلي حجه هيج ونزل كدامي واني اباوعله عيني ع ظهره لحدما نزل خليتهم بالمخزن ونزلت جان بعده بالمطبخ

والموجودين بنات عامر وفاديه واني اجيت طلع المحفظه مالته وانطانه كل وحده ٢٥ عيديه من شفتهن اخذن اخذت من عنده وتشكرته وطلع كالت فاديه ترى هو بشار متعودين علي ينطي عيديه للكل لان شافتنه مستحيه حجت هيج ..

لمه حلوه وفرح هالمره عاقله زياده عن اللزوم صارت ب٢ والكل ينتظر بشار يجي حته ياخذنه للمزرعه شويه تاخر ل٢ ونص واحنه هوايه وشلون السياره تكفينه بيت عامر بسيارتهم وعمر اخذ سياره غيث

بالنسبه لسياره بشار فرح واختهه وفاديه وشجن واني والبقيه ويه عمر اصلا هي سباق اول ماركضن فتحن السياره فرح واختهه وكعدن لذلك اني ماظلي مكان ورحت اريد اصعد ويه عمر

فتحت الباب جانت مقبطه نهائيا وبيهه زياده عمه بشرى وبتهه وام بشار وبسمه وعمو عادل بالصدر وبيبي وجدو ويه عامر ظليت صافنه خاصه من كالو روحي بسياره بشار ماكو مكان واني اصلا رحت وهم مابيهه مجال

مادري ليش انقهرت وحسيت بشعور موحلو ليا سياره اروح يكولون ماكو مكان كلش ضجت ورحت للمطبخ كعدت بس جان عمر يقفل بالبيبان شافني كال ليش كاعده ماتروحين تصعدين؟؟

قبس.. ماكو مجال كلهن مقبطات
عمر.. اي عادي شكلي ويه البنات بسياره بشار كومي وياي
.. لا وين اشكل اصلا هن سدن الباب وكالن روحي وي عمر وانتم بيهه زياده
عمر.. دكومي بابا لاتعززين هي كل طلعه هيج ناس فوك ناس طلعت ويا سد باب المطبخ بشار مدري وينه تالي طلع يسولف بالتليفون..

صاح علي عمر بشار هاي قبس مالهه مجال شكلهه وياكم سيارتنه بيهن زايد
بشار.. يله تعالي ومشه لسياره جانت شجن بالصدر والبقيه ورا فتح الباب ودنك حاجاهن فاديه انزل بصف شجن وخلي قبس تكعد ابمكانج

فاديه.. لا والله ما اكدر اعذرني بشار الا يم الجامه تكوم نفسي تلعب
فرح... عادي اني انزل تعالي حبي قبس
بشار.. لا ابقي ابمكانج شجن انزلي وانتي فاديه انزلي لان شجن رجلهه لازم تاخذ راحتهه

قبس.. افتريت للصدر ادفع بفاديه اصعدي
فاديه.. ما اصعد اصعدي انتي لواجيب فرح
قبس.. ولي ولج عيب اكعد لزك ويه اخوج
فاديه.. عادي فرح تحب تكعد وانتي بكيفح

بشار.. سد الباب واجه وعمر وعامر طلعو كدامنه ودفعتني فاديه رغم بشار كالهه تعالي صعدي كالت ماكدر اختنك الا يم الجامه صعدت اني وصعدت فاديه زينين اثنينه جسمنه موسمين بس فاديه خبيثه تدفع بيه ودكلي راح اطلع من الجامه ..

كعدت ع هاي الي مدري شيسموهه يم الكير ولزمت الكرسي الي ورا فاديه واحاول ما اطخ بشار ع الرغم حته هو جان مركز بالطريق بس اني مدري شبيه دكات كلبي سريعه...

اسمع اوووف وحده تنافخ وراي اكيد فرح هاي ماعجبتهه الوضعيه بس كعدتي جدا كسيفه رجل واصله يم حلكي ورجل يم فاديه ...

هدوء السياره لان بشار ساكت يصير تبسبس ورا بس مامركزه وياهن لحدما وكفنه بلازدحام صعد الجامات كلهن وفاديه تخبلت دكله اختنكت وهو يكلهه وين اريد بيجن حته الي يشوف السياره يظل صافن عليهه...

تحرك السير وهو مد ايده ع الكير عبالك نتله كهربائيه اجتني ايده لامست فخذي بس هو ماجان متعمد ابد لان يحاول قدر الامكان يبعد ايده...

غير كلما ارفع راسي تجي عيوني بعيونه بالمرايه الطريق الي يأدي للبستان وعر حيل وبي حفر وطسات كل طسه يركع راسي بسقف السياره طسه من عدهن قويه حيل انشمرت بيهه ليكدام حته شجن تاذت رجلهه..

ردت اوكع وماكو شي الزم بي كتله بشار ع كيفك راح اوكع ترى ماكاعده مثلكم
بشار.. مكروهه هاي السياره تطفي مثل ذاك اليوم واظل حاير بيهه لوانزلجن ادفعنهه جان يحجي وطرف عينه بالمرايه عليه..

لحدماوصلنه واني حابسه نفسي كوه بدن ينزلن واني رجلي خدرت من كدما جانت محشوكه من نزلت اخر شي وبس هو يقفل بالسياره هن كدامنه واحنه نمشي وراهن...

بشار.. بالرجعه لاتعكدين هيج اشوفلج مكان بغير سياره
قبس.. اني ما ارتاحيت حته رجلي خدرت
بشار.. واني شعلتي ابو ابوي بكعدتج هاي!!
قبس.. ليش

بشار.. قبس انتي لوغبيه من صدك لوتستغبين؟؟
قبس.. اثنينهن لااا بس انت مدري شبيك صاير غريب
بشار..المهم ورا العيد ترجعين اداومين
قبس.. صدك وين بالشركه ؟؟
بشار.. ااي نفس مكانج لان قبل فتره اللجنه الي اجت حولت من الموظفين يعني تقريبا الكادر تغير
قبس.. شكرا بشار وان شاء الله اكون عند حسن ضنك
بشار.. ان شاء الله

قبس.. الفرحه فرحتين شكد تونسنه بهذا اليوم لحدمارجعنه واني احس براحه موطبيعيه ياربي وفقني بهاي السنين الجايه ع الاقل اكدر انسه السنين الراحت...

مرت ايام العيد والحمدلله اي مشكله ماكو هدى ما اجتنه بالعيد لان يرحون لحماتهه بكركوك اجتنه ورا العيد وهم ظلت يمنه يوم من الصبح لليل وراحت..

واليوم باشرت بالدوام ويه بشار الي خلاني ع الصباحي وفعلا الكادر اغلبه متغير بس العامله ام حسن نفسهه باشرت بدوامي والغرفه الي كاعده بيهه جنت وحدي بس كال راح تجيج عاليه وسناء جنت فرحانه بشوفتهن وهن يسالن وين رحتي وكعدت احجيلهن القصه ...

كمل اليوم ع خير والسايق نفسه ياخذني ويرجعني لان بشار مرات مايجي للشركه ومرات يروح محافظات لذلك ما ارتبطت ويااا بس جان شرط بشار الوحيد هو لبسي فرض عليه البس شي مستور لوتنوره وشي مستور عليهه ماكو ضيك وع الخصر والتزمت بكلامه حته لا اخسر وضيفتي...

بيوم جنت راجعه من الدوام وحاره نار بس طبيت تلكتنه فاديه كالت بسرعه بدلي وروحي للاستقبال يريدوج
قبس.. شكو منو يريدني؟؟

فاديه ... رجلج السابق اسمه عزيز جاي عليج !!!

يتببببع ... احبكم

عيوني انتم ليش الوحده من تسالكم اقره هاي القصه دكليلهه مابيهه احداث ليش هالتسقيط فهموني يعني قصه واصله كذا بارت ودكولين مابيهه احداث منين نجيبلكم لعد ماعاجبكم لاتقرون والي يقهر الي تحجي هيج من ضمن الي يقرن القصه رجاءا يابنات