رواية قمع المشاعر الفصل الثالث عشر 13 - بقلم Rozaya1122

قمع المشاعر.... البارت الثالث عشر..
للكاتبة زهراء ( روزايه)....

قبس.. من وكعت شجن دفعت فرح من كدامي واهز بشجن واضرب بخدهه وهي بعدهه بكل صلافه واكفه ودكول شبيج انفزعتي ترى بيهه حاله نفسيه ..

قبس.. اطلعي برا لا اكوم انتف شعرج وحده وحده شلون خلقه زفره تشمتين يابيئه هسه مو وكتي وياج خلي تنتبه شجن وشوفي قبس منو خاف سكتتلج باول مره عبالي خوش ادميه ...

طلعت من الغرفه شفت عمه بشرى واكفه بسرعه صحتهه ع صوتي شجن متخربطه كلهه اجت شكد ذبينه عليهه مي وما انتبهت ابد عبالك خشبه صلبه وهي ولامهتمه واكفه وتباوع بكل صلافه..

ام بشار ادك ع وجهه لج شجونه يمه وتبجي وهدى تصيح كومن من يمهه خلي انشيلهه ناخذهه للمستشفى ...

شالتهه هدى وفاديه ووصلن لباب المطبخ وتلكاهن هذا الي اسمه غيث وانخبصوا خبص وقت العشا وبشار وعمر ماموجودين...

كلمن يكول خطيه شجاهه اكو نسوان ماعرفتهن اسمعهن يكولن هسه تصير بيهه حاله نفسيه ووحده دكول المعوقه شنو حياتهه هاي لازواج ولا خلفه بعد...

كلساع اريد احجي واظل ساكته اكول عيب ياقبس هذا البيت جديد ولمي السانج واسكتي بس داخلي يفور ع هاي الحقيره الي لايمهه ولابكاعهه...

واكفه يم الدرج واجتني هدى كالت تعالي وياي قبس؟؟رحت وياهه لغرفه امهه لان غرفه البنات بيهه بنات عامر..

هدى.. تعالي اكعدي واسمعي من عندي زين!! اني هنا موبس بنت عمج اعتبريني اختج عشتي يمنه فتره وتذكرين شلون جنت قايمه بواجب اخواتي معتبرتهن بناتي ...

كان من يكون ما اسمحله يتمادى ويه اي شخص وهذا البيت اله نظامه الصغيره والجبيره امي موجوده وتحلهه ..

قبس.. مامتماديه ع احد اني واعرف لازم اكون مؤدبه يجوز ماخذين عليه غير نظره بس اعرف حدودي..

هدى.. الكلام ماموجه الج بالذات جاي احجي بصوره عامه حته بنات عامر كتلهن احنه عائله جبيره موكل لمه ومناسبه تصير عدنه لازم مشكله ..

واني اعرف شجن وكعت لان اكيد سمعت كلام ذم ع حالتهه وهي بلاساس متحسسه من هالموضوع...

قبس... قصدج اني اذيت شجن؟؟
هدى.. خلي اكون صريحه وياج كلنه نتجنب نضوج شجن لان وضعهه مايسمح واحد يتذمر عليهه وحسب مافهمت من فرح بان انتي متجاوزه ع فرح وشجن اجت ادافع لفرح وانتي معيرتهه برجلهه..

قبس.. كمت وكفت على حيلي وحجيت بعصبيه هاي هي هيج كالتلج؟؟ شوفي ام علي اني صارلي يوم واحد يمكم واعرف حدودي زين وشجن من صغري اني احبهه وهاي الي اسمهه فرح اني اريد اوكفهه عند حدهه ..

اجتني للغرفه وتهجمت عليه وحته حجت ع ماما الله يرحمهه وهسه ذبت السالفه براسي شنو من قليله ذوق هاي البنيه..

هدى.. ياستار ادري السان لو شنو دكعدي خلي افتهم من عندج منا ناس وعيب ومحد يكول فرح انتي الي يذبون اللوم عليهه شو احجيلي السالفه .

قبس اني وين اعرفهه هاي حته ما اتذكرهه من جنت يمكم اجتني ودكلي لاتلعبين بذيلج واسوي هيج وهيج منو دايسلهه ع طرف لو كل الي يجيكم ضيف لازم تتهجم علي ؟؟ ومن رديتهه سبت ماما وطعنتهه بشرفهه وين عايشه لخاطر الله من اول يوم اجيت وتلكتني ..

ام علي اذا تشوف اسببلكم مشاكل والله وروح بابا ارجع منين ما اجيت ترى ما اموت من الجوع شنو هالنفاق عليه اني كلبي نار ع شجن واطلع اني هيج مسويه ؟؟

هدى.. استغفر الله ياربي كامت تفتر بالغرفه وايدهه على خصرهه اسمعي قبس لاتحجين اي شي وتعالي وياي لاتبقين وحدج والله عليج طلب اخت لاختهه لاتحجين لبشار..

شوفي بشار عنده شجن روحه ومايقبل اي واحد ياذيهه حته فاديه يرزلهه اذا حاجتهه يعني اذا عرف بهالشي وهي دكول قبس وانتي دكولين فرح والله مايسكت فدوه حبيبه لخاطري..

قبس.. ماجايه اسوي مشاكل هاي كل السالفه تصدكون براحتكم واذا سالوني شبيهه ما اكذب اكلهم فرح اذا هاي المره سترتيهه الهه راح تتمادى..

هدى.. انتي متعرفين عليمن ادوك عوفيهه اني اعلمهه شلون بلوه هاي يله من رخصتج ولاتزعلين عليه وطلعت..

قبس.. استغفر الله شنو من انسانه اريد افتهم شمسويتلهه اني؟؟ وليش هيج ضايجه من وجودي ماطلعت من الغرفه لحد ما اجت شجن...

شجن.. فتحت عيني بالمستشفى وماما يم راسي مخليلي مغذي وتليفون ماما كلساع يدك..

ام بشار.. شجونه يوم سلامات ليش هيج وكعتي كلبي ؟؟
... مابيه شي ماما مادري ووكعت..
... شجن بطلي هاي الحاله وهالطبع الموحلو اني امج ليش تضمين عليه منو سمعج حجايه؟؟ ادري بيج ترى ضجتي وعندج هبوط ونفس كلام الدكتور ..

... مابيه شي محد سمعني هيج وحدي دخت ووكعت بعدني احجي اجه غيث تفاجات بجيته جر كرسي وكعد بصف ماما..

ام بشار.. شفت غيث ماترضى دكول منو؟؟
.. منو وياج شجن؟؟ ترى مو احنه هو الدكتور كال مضوجيهه

جان يحجي وصايره ورا ماما يعني مونفس المستوى مالتهه وغمزلي بضحكه اني ماكدرت بسرعه ابتسمت..

ام بشار.. فوكاهه تضحك الفاهيه ماراح تحجين بس اوصل للبيت اسلمج لبشار وهو يحقق وياج اريد اشوف يا تافهه ضوجتج..

شجن .. سكتت ماحجيت مابيه حيل مشاكل واصلا هاي الحقيقه ليش انكرهه هو اني تك رجل ليش اضوج من واحد يكولهه لازم اتقبلهه...

طلعنه من الطوارىء وماما ساندتني وغيث ويانه كلساع اشوفه يباوع ع خطواتي شلون امشي ولو بيده شالني وركض بيه..

وصلنه للبيت جانو يتعشون تلكاني بابا وعمو عامر باسني كتلهم مابيه شي بس دخت ووكعت خطيه حته مامتعشين..

اخذتني ماما لغرفتي مددت فتحت تليفوني اريد اكتب رساله لغيث احجيله بعدني هستوني فتحت القفل اجتني رساله من عنده..

غيث.. شجون عبالج ما اعرفج تجذبين من عيونج احجيلي منو وياج؟؟ ترى اليوم ما اروح من بيتكم اذا ماحجيتي ...

شجن.. بديت احجيله وهو يكلي ابد ما ارتاحلهه فرح ولاتسكتين سولفي لاخوج لان هي حاطه عينهه علي وهيج تسوي..

شجن.. ظليت حايره مدري اسمع كلامه واحجي لبشار مدري اسكت شويه وانفتح الباب قبس اجت كعدت يمي ولزمت ايدي..

قبس.. شجن اعتذر خاف صار بسببي والله موغايتي اخربط وضعكم بس صدكي اني تعبت ومحد حاس بيه ما اتحملت وضعي بسرعه بجيت ..

اول مره اكعد واشكي لاحد دومه كاتمه بصدري شفت وجودي بهاي الدنيا عبالك انتقام لنفسي من جنت بيت اهل ماما مامرتاحه اتزوجت زاد وضعي اجيت هنا وكلت يجوز ارتاح من اول يوم صار هيج ...

شجن.. لاتبجين قبس انتي شعليج اني اعرفهه ماتحبني وادري بيهه ليش هيج سوت بيج اهمليهه خلي تولي ..

قبس.. جنت مدنكه امسح بدموعي وانفتح الباب بشار بسرعه كمت وكفت ..

بشار.. اكعدي قبس شلون صرتي شجن خوماتعبانه؟؟
شجن.. شبيكم قابل اول مره اوكع ليش خايفين..
بشار.. لا مو اول مره ولان محذر كان من يكون اوكفه عند حده اذا حجه كلمه موحلوه وياج؟؟ احجي شجن بدون ماتحاولين شصاير؟؟

قبس.. جان يحجي بعصبيه وماباوعلي ابد وكانو مخلي السبب بيه اني سكتت لان هدى كالت لاتحجين وشجن الظاهر ماتكدر تسكت كدامه..

شجن... راح احجيلك بس لاتسوي مشكله وقبس مالهه علاقه وبديت احجيله بالتفصيل وهاي اول مره تطلع من عندي واذم شخص واحجي شي خاص بيه...

قبس.. مدنكه واسمع شجن وهو ساكت جان يلتفت عليه
بشار.. قبس اكثر شي اكرهه البنيه اذا تجذب!! واذا نافقت  هذني اثنين لومو اختي مااسكت عنهه ...

اني سمعت من فرح لان اجت هي وشكتلي عليج واني ما حجيت كتلهه يصير خير راح اجيبهه هنا واريد اطلع هاي السالفه المابيهه خير قال وقيل من اول يوم...

قبس.. لاتحملني المسوؤليه هي تهجمت عليه وعلى شجن بشار ما اقبل انذل كدام اي واحد ولا اسمح لواحد يسب اهلي ..

بشار ... اكعدي هنا وهسه اجي كام طلع واني صدك خفت كتلهه ليش حجيتي ياشجن؟؟
.. الله عليج اسكتي متشوفيهه شلون رايحه وحجتله عليج وطلعتج كدامه بوجه اسود محد يعرف دماراتهه بس هو اكعدي واسكتي والج الصافي!!!

قبس.. ظليت كاعده واكل بروحي سوده بوجهي ع هالحظ العاثر ومنين طلعتي فرح انوب ماخذه رجلهه ؟؟

شويه واجت هدى سدت الباب وكالت اسمعن الي يصير بالغرفه هنا مايطلع مابينه قال وقيل ترى الكاعدات برا كلهن شماته هسه راح اصيح فرح بين مايجي بشار...

بس طلعت اجه بشار كعد ع جربايه فاديه واني كدامه يم شجن واجت هدى جابتله استكان جاي وكعدت كالت هسه تجي فرح...

اني مدنكه وساكته وحيل ضايجه ودمعتي بطرف عيني بس واحد يحاجيني ابجي عمري ماعيرت احد ولا اذيت بشر لان الي شفته كافي عليه...

انفتح الباب وطبت صدك ان لم تستح فاصنع ماشئت مغيره ملابسهه بعد ارقى ولابسه كعب وطبت تتلوى جنهه حيه ام سليمان .

بشار.. تعالي فرح اكعدي
هدى.. فرح احجي الي عندج وشعندج ويه قبس..
فرح.. اني اعرفهه تعرفني طبيت اعدل شالي وشفتهه بالمرايه تعيب عليه التفتت عليهه كتلهه ليش تعيبين كالت لان ماعاجبتني..

ظليت اسال شنو هالتصرف منج بس هي اكلتني بكشوري واجتي شجن بس حاجتهه جان تسمع شجن كلام موحلو !!!

قبس.. رفعت راسي بأسى وين واصله الناس لاول مره انصدم بهيج بشر ملون اجت عيني بعين بشار الي يباوعلي باستفهام ..

هدى.. سمعنه من عندج بس ماراح نسمع من قبس راح نسمع من شجن وتعرفين شجن ماتجذب ...

فرح.. اذا تريدون اطلعوني غلطانه براحتكم مدام صار النفاق علني..

شجن.. منو منافق عليج كدامي صار الحجي وحورتي شنو انتي تدرين لو كايله نفس الكلام اني جان وكفت بجانبج ولا اعرضج لمشكله بس فاجاتيني  بالجذب هذا؟؟

بشار.. فرح انتي بنت عمتي وقبس بنت عمي واثنينجن وشدد ع هاي الكلمه وهز راسه اثنينجن اخواتي لا اقبل قبس تتجاوز عليج ولا انتي..

واني ماعندي وقت اكعد افازع بين النسوان كالت فلانه وكالت علانه ماريد اسمع من قبس اي كلمه سمعت من شجن ومن عندج؟؟

شنو هالسخافه الي عندج يافرح وشنو هالقله الاحترام وعينك عينك اتجذبين انتي بنيه مووو؟؟ ماخفتي بيوم هذا الجذب يطلع عليج شلون انصدكج بيوم هااااا؟؟ جاوبيني ليش ساكته ما احاسبج لا ع تجاوزج لشجن ولا لقبس بس اريد اعرف شنو هاي القابليه الي ابنيه مثلج اتجذب هيج جذب؟؟

فرح.. مامجذبه اني وكامت تبجي هن اتفقن عليه وطلعت بسرعه وطبكت الباب حيل..

هدى.. بشار عوفهه لاتسويلنه سالفه مبينه حاقده اتركهه..
بشار.. لا والله اريد اعلمهه على هالتصرف هذا؟؟
هدى.. هي ضايجه من قبس ؟؟
.. وشمسويتلهه قبس ذاك اليوم بالشركه عديتهه الهه ..

قبس..ظليت ساكته ولاحجيت وحته هو بالجذب ماكال لاتاخذين ع خاطرج طلعوا هو وهدى وظليت كاعده وساكته ...

لامه رجليه ع الجربايه واباوع لساعه ب٩ وشجن جابولهه عشه تعشت واني محد سال عني..

كوه مسيطره ع وضعي واشتت بفكري واكول التهوا وساعه اكول حاسبيج من عدهم شجن نامت واني وحدي بالغرفه واسمع الصوت برا والهوسه بس اني عيني بالسكف...

صارت الساعه ب١١ خليت راسي ع المخده ونزلت دمعه محمله هموم هاي السنين اقسى شعور هو هذا من تحس نفسك وحيد لا ام لا اخت لا احد يذكرك ويسال عنك !!!

انفتح الباب فاديه اسمعهه تحجي ويه شجن دكلهه جوعانه اجيبلج شي؟؟

الله ذب عليه البجي شكد جنت اتحمل واقسى ع نفسي وما ابجي بس مادري شجاني حسيت نفسي محتاجه ام محتاجه اخت تشيل همي...

نمت هذيج الليله بدون عشه موقصه اكل بس هاي الامور البسيطه تحز بالنفس واعرف مالهم اي قصد بيهه بس اني استهظمت عيشتي ...

كعدت الصبح محد بالغرفه باوعت بالمرايه عيني مورمه والجواهه منفوخ رحت غسلت وطلعت محد اكو بس شجن وامهه بالمطبخ وجدي وبيبي رايحين يم عامر...

اتجنبت يشوفن عيوني صبيت جاي وتريكت ودزيت رساله لبشار اريد اداوم رد عليه ماشي كلي لامي تخابرلج السايق مال البيت يجيبج...

اخذت ملابس من فاديه لان نفس جسمي واجه السايق اخذني للشركه بس طبيت حضنت سناء وعاليه نضال جانت مجازه كتلهم مريضه جنت واخذت استراحه...

ماكو شغل هوايه لان لجنه اشراف مختصه هي قايمه بالواجب ظليت بغرفتي ماطلعت ابد لحد نهايه الدوام..

من طلعت تلكاني بشار كال يله تعالي اليوم الي موجود اوصلج واذا ماموجود السايق هو يجيج..

صعدت ويا هدوء اي صوت ماكو بس اناقته وعطره يخلي الواحد مدري شيصير بي ثكيل ورزن والي عجبني بي وكفته ويه اخواته وخوفه عليهن....

من وصلنه نزلت قبله طبيت لكيت البنات بالغرفه بدلت وكعدت بس لكيت علاليك ع جربايتي عبالي لفاديه...

فاديه.. قبس ماما طلعت العصر وجابتلج هذني شوفيهم واي شي تحتاجي اخذي من عندي بدون مدكولين..

.. لا ليش كلفت نفسهه ملابسي هناك اجيبهم ..
... لا دكول اني اشتريتلهه جديد اسكتي يمعوده احنه هم وياج اشترتلنه...

قبس.. طلعت اتشكرتهه ابتسمت بوجهي وكالت تعشي وراح يكعدون عمامج يفتهمون من عندج  صدك تعشيت وصليت جان يصيحوني للاستقبال...

جنت لابسه دشداشه مخصره وحلوه وشال وياهه طبيت لكيتهم كلهم كاعدين ماعدا عمر مااشوفه يكولون هواي يبات برا البيت...

الحجي.. احجينه يابنتي لاتسكتين واحنه وياج؟؟
قبس.. اريد اطلك؟؟

من كلت هيج رفعو راسهم وبشار كاعد ع التخم بكل اريحيه اجت عيني بعينه ودنكت..

الحجي.. غير نعرف الاسباب انتي اختيارج هذا؟؟
قبس.. جدو اني من اتزوجته ماجان يشرب وامه خوش مره من ماتت امه صار هيج وفوك كل هذا صار يسمع كلام ساجده واني موصلح وياهه ..

عامر.. موخالتج هي وربتج ليش موصلح؟؟
قبس.. ماربتني هي ربيت نفسي وحده لان هي بلاساس تحتاج تربيه بس جنت اكل واشرب عدهه ..

عامر.. شلون وصلتي بالدراسه منو صرف عليج؟
.. اني جنت اسوي كيك واعرف اطبخ وهي عدهه معارف ويجون يشترون ووصلت..

عامر.. انتي تدرين السمعه الي عليهه؟؟
.. اي ادري
... ليش عشتي يمهه موتجيبلج سمعه ؟؟
.. هذاك بيتهه الي بتكريت جنت ماجره منهه غرفه وحمام وفاصل بيناتهم قاطع خشب صغير وادفعلهه ايجار ...

... ليش ماظليتي يم جدج؟؟
..تعرفون جدي شنو ماكو داعي احجي علي ماردت اعيش يمه وبس هي الوحيده قبلت اشتغل وتنطيني غرفه واكمل دراسه؟؟

عامر...من اجينه مو كلتي حامل؟؟
.. دنكت لا موحامل بس كلت هيج حته ما تاخذوني؟؟

بشار.. هسه كلامج النهائي تطلكين؟؟
...ااااي
بشار.. واذا اطلكتي اتبطلين من الدوام وتكعدين بالبيت؟؟

قبس.. فاجاني بكلامه ماعرفت شكول!! بس مدري شلون طلعت من عندي وكتلهم ميخالف ...

بشار.. هاهي باجر انشوفلج محامي ونرفع دعوه واخذي حقوقج؟؟

قبس.. ماعندي حقوق لاغايب ولاحاضر؟؟
عامر.. ليش شلون اتزوجتي؟؟

قبس.. الحاضر جان مليون بس وماعندي غرفه نوم والغايب ميه الف ودنكت ماريد اشرح لان ماراح يفتمهوني..

بشار.. شنو هالحجي بايعج؟؟ وين اكو هيج شلون اتزوجتي ...

الحجي.. بشار هاهي اكو ناس ماعدهه ومهرهم قليل هاهي بنتي الي تريدي يجرالج ومن اليوم انتي معززه مكرمه هنا ....

قبس.. كمت من يمهم كوه اخذ النفس رحت كبل لفراشي نمت ابلع بالمهدئات وماكو ...

ماداومت بعد اني من ذاتي حته بدون مايكول بشار واطلكت خلال اسبوع وانحبست بالغرفه علمود العده.  .

شجن... هاي المره الثالثه الي اسمع من ساره مرت وائل بان غيث يفتح موضوع الخطوبه وتصير مشكله ووائل يمنعه...

لحد اليوم الي جانت ماما يم خاله ومحد بالبيت بس اني وقبس نايمه واسمع باب المطبخ يندك كمت ع العكازات بس اريد اوصل تكسر تكسر ..

فتحته واشوف ام وائل بدون اي سلام هي وبتهه المتزوجه ..

ام وائل..  اسمعي ولج اذا ماابتعدتي عن غيث افضحج واشهرج واخلي اهلج بكسرون رجليج وتبقين كاعده ع ط....

مامتربايه تتمسكنين ويوميه شاحنته ام العلاقات ام الكليات لو ما وائل لازمج بيده تريدين تهجمين بيتي تريدين تخربين بين الاخوه اشرب من دمج ولج وافضح اهلج فضيحه .

خاف عبالج اسكت وحق الله اجي لاخوج واحجيله على علاقتج سايبه ماتستحين مودريتي مانريدج وفوكاهه معوقه وتك رجل وتريدين ابني تاج راسج...

شجن.. ماكدرت اي شي اكول بس اباوعلهه وابجي كرهت نفسي وكرهت ضعفي ليش هيج اني ؟؟؟

ام وائل..  راح اروح هسه بس وحق الله وروح المرحوم ادفنج بمكانج اذا لكفتج وياااا بعد ...

شجن.. حجت هيج وطلعت تركع بالباب واني كعدت ع الكرسي كل جسمي يرجف ما اكدر افكر ما اكدر اسوي شي هاي خالتي هيج ووائل ضدي منو يقبل بيه لغيث...

اسمع تليفوني يدك ماكدرت اروح اشوفه لان رجليه ماتساعدني جابته قبس الي كالت تليفونج ماكاتبه اسم ع رقم غيث بس حافظته ...

٥ مكالمات من عنده راحت قبس ودكيت علي وايدي ترجف بس دكيت فتح خط ..

غيث.. شجن خومابيج شي؟؟
... غيث ؟؟؟
... ياروح غيث احجي بيج شي اني بالدوام بس ما ادري ليش كلبي اوجعني وخفت بيج شي وادك وماتجاوبين قلقت اكثر...

شجن.. دموعي تنزل وكوه كاتمه صوتي لاتسمعني قبس كتله غيث امك اجتني وهيج سوت بيه وحته غلطت عليه..

غيث.. امي!! شبيهه تخبلت لاتهتمين حبيبتي هذا وائل متعارك ويا ويشحن بيهه مالج علاقه بيهم عباله يلويني من ايدي علمود البيت قدمت ع قرض اني وصاحبي لراس الشهر استلمه وطزز بوائل يسوي هيج لان يدري اهلج ماينطوج اذا ماعندي بيت وهو طردني ..

شجن.. غيث امك ماتريدني وماراح توافق الله عليك لاتعوفني اني احبك حيل ما اكدر اعيش من دونك بس انت مصبرني ع وضعي..

غيث.. شتحجين انتي شلون اعوفج ولج انتي روحي شوفي شلون متعلق بيج وكلبي اوجعني عليج شجونه حبيبتي انتي الي احرك الدنيا ع راسه الي ياذيج امي عوفج من عدهه بسرعه تندفع لان تخاف من وائل لاتخافين حبيبتي وهدي حالج ...

شجن.... ظل يحجي ويطمن بيه بس جنت فاصله حته ما ارد علي سديته ورحت لمكاني ضايعه بوسط الظلام ما اعرف شسوي والظاهر اكو عركه جبيره وغيث مايقبل يحجي....

لثاني يوم واني احس روحي تريد تطلع مشتاقه لغيث هوايه ومحتاجته محتاجه اشوف ضحكته وهو يحجي وياي وعيونه الي بيهه الف معنى ...

مشتاقه للغزل مالته وهو يكلي هذني الخدود شوكت اكلهن مو خلص كلبي ومايتجرا يلزم ايدي هذا كله بالصدفه من يجي..

جانت عصريه اكعد يم قبس خطيه لان لازمه عده وماتطلع خاف تضوج لان عمر العصر يجي ويظل بالبيت...

كاعده اقره بكتاب وقبس تشوف تلفزيون وانفتح الباب حيل حسيت كلبي وكع ..

فاديه... ولج شجن بيت خالي وائل تعزو وتصخموا ولج غيث مدري منو الضاربه ؟؟

شجن..  بحركه لا اراديه لطمت ع صدري ولج شتحجين كمت اعيط من الصدمه وين هسه ماااات؟؟؟

فاديه... ما ادري ماما راحت ع صوت الصياح وكالت ابقي يم اختج وتبجي فاديه لا ياربي غيث مثل اخونه لاتسووي بي شي؟؟

شجن... كل مره من اسمع خبر موحلو انهار واوكع اتمنيت اتخربط اتمنيت يغمى عليه حته لا احد يشوفني بس ابجي وكلبي نار ..

حسيت ع ايد قبس تحضني ودكلي ادعيله ماكو شي انتي نظيفه وطاهره الله يستجاب من عندج...

فاديه طلعت تشوف شكو واني بس ابجي واحمد الله اهلي ماموجودين جان كلهه عرفت بيه ...

من اثر الصدمه جانت بس ادموع بديت استوعب الخبر انهاريت كمت الطم ع راسي واصيح غيث ...

دك تليفوني رساله ما ادري شلون فتحتهه عبالي خبر عنه لو فاديه....

جانت من وائل كاتبلي بيهه هااا ارتاحيتي من وراج كتلت اخوي كتلج ابتعدي عنه ماسمعتي انتي ماتصيرين لغيري وكل الي يتقربلج اكتله.

من وراج ياشجن راح اخووووي اني كتلته!!!!

يتبببع .... متابعه ممتعه

شوفو الفيديو يمثل غيث وشجن