رواية قمع المشاعر الفصل الثاني عشر 12 - بقلم Rozaya1122

قمع المشاعر.... البارت الثالث عشر..
للكاتبة زهراء ( روزايه)....

قبس... شايفين النار من نبدي نخليلهه حطب وتشتعل ويبقه بس الجمر ونرجع نحركهه ونخلي بعد حطب وهم تشتعل وتخفت لحدما نحصل على رماد هيج احس روحي اشتعلت وسكنت ورجعت من جديد لحدما وصلت الى رماد ...

صوت عزيز وهو يغني ويهدد بيه وين تروحين من عندي اليوم  اخذج اخذج اليوم انتي الي ولج هذا الجمال كله وموالي ويكولون مرتك حلوه واني مامحصل من السمج بس الزفره...

كاعده ع طبله بالحمام ولازمه راسي تجيني نوبات هلع جنون اكوم واضرب عزيز بشكو سجينه بالبيت هيج اريد اشوف دمه كدامي اتعس حالات الجنون صابتني...

اباوع ع شاشه تليفوني شوكت يدك احس لحظاتي الاخيره وبعد ما اتحمل اي شي ولا بيه ادافع عن نفسي ..

ضوت شاشه تليفوتي واسم بشار كدامي بسرعه جاوبت الو بشار وينك ما اكدر اطلع اني بالحمام؟؟

بشار.. هدي حالج وظلي ابمكانج والا تسمعين صوتي يله اطلعين؟؟
.. الله عليك استعجل راح افقد اعصابي..
.. تمام تمام هاي راح نوصل..

قبس.. افرك باديه واطك باصابيعي لحظات وسمعت صوت الباب مال المطبخ وساجده ادك بالباب وتصيح ولك عزيز افتح الباب..

ساجده.. شكو ولك شسوت هاي الرعنه بنت الارعن احجي شبيك صافن بوجهي جنك غراب..

عزيز.. ياساجده تعبت ما اتحمل مرتي كدامي وماتخليني اتقرب الهه اريدهه شنو غير شبعان بيهه واني لااا حتلو اني موخوش ادمي بس هي مرتي ..

ساجده.. امداك يالمصخم الف مره كتلك عوفهه وراي واجيبهه غصبا عن راس الخلفوهه بس جانت تنطيك فلوس وتسكتك...

وهاك استلم اجو عمامهه وراح ياخذوهه غصبا عنك وعن شارب ابوك وانت لاحظت برجيلهه ولا اخذت سيد علي ..

ساجده.. قبس وينج اطلعي عيني وراج ظهر جبير ولك عزيز احذرك منهم لاتندك بيهم ترى قبل شكم يوم طلعنه من السجن واسمائنه هناك وبس يشتكون علينه نروح بيهه وهي ربحانه عوفهه وراي..

عزيز.. مرتي ما انطيهه لومو عمامهه وين اكو هيج سجوده بيا قانون ياخذون المره..

ساجده.. دكوم ولك مرته يكول لوبيك حظ جان كسرت خشمهه شكم مره كتلك اني اجيبهه الك وانت مابيك خير تنطيك شكم فلس تشرب بيهن اطير من الفرح ..

هسه عفتهم يحجون ويه رجلي وكلت احذرك بس يدكون الباب تفتحه الهم وتصير خوش رجال وتسكت وكلهم تعاركنه شدكول بتكم ماتخليني ...

قبس..اسمع حديثهم وهاي ساجده ماراح تعوفني بحالي لازم تاخذ حيفهه من عندي شلون كسرت كلمتهه ...

البيت صار هدوء الحمام جوه الدرج وما اسمع شي والظاهر طلعوا برا شويه واجت ساجده تصيح اطلعي قبس عمامج اجو عليج ...

اباوع لروحي شلون اطلع دشداشتي قصيره وربع ردن والفرشه مدري وين شمرتهه واتذكرت كلام بشار كال لا اطلعين الا تسمعين صوتنه...

قبس... ما اطلع روحي اعرف سوالفج انتي وعزيز خلي اسمع صوتهم يله اطلع ..

الحجي.. بويه قبس اني جدج اطلعي وهذوله عمامج وياي محد يسويلج شي ...

قبس.. جان صوته حنين ودافي وكانو سمعت صوت بابا صوته لامس كل جزء بيه مستحيه من نفسي حيل وما اكدر اطلع..

شعري بدون قراصه ولبسي موحلو وما اعرف هذيج السنين جنت بيهه بدون حجاب شلون كلت بسرعه اطلع واشوف شي اشمره عليه ...

بعدين كلت لساجده جيبيلي شي البسه واطلع جان دكلي غرفتج مقفوله يمه دطلعي اني انطيج وماتوقعت واصله لهدرجه الدنائه الي بيهه...

فتحت الباب وطلعت واشوفهه كدامي بنظره حقيره اول شي ما انطتني كلشي وغرفتي جذب مامقفوله عبالي عزيز قافلهه وصدكتهه وباوعتلي بنظره تهديد وكانو دكلي وراج وراج وما اخليج ترتاحين..

ماكدرت لا اتقدم خطوه ولا اكدر ارجع دنكت راسي واني حاضنه اديه ونزلت دموعي خجلانه حيل من منظري وكلشي عندي بالغرفه بس اتعمدت اطلعني هيج لان تحجبت..

جانو واكفين كدامي وماشفت منو بالضبط لان ظليت منصيه راسي وكتلهه جيبي شي البسه ماكدر امشي كدامهم وهي غيرت الموضوع بسرعه ودكلهم صار سوء فهم بيناتهم...

بس ما احس غير رجلين صارت كدامي ودشداشه بيضه وتتخلى عبايه على راسي والف بيهه مثل الطفل من يطلعو من الحمام ..

رفعت راسي واشوفه جدي نازع عباته مثل البشت هو مايلبس عگال يلبس كله سفاري من هذوله اهل قبل ..

خله ايده ع كتفي وكال امشي يابنتي كتله بس اغير ملابسي وكوه نطقتهه بضعف وخجل ..

بسرعه رحت للغرفه لبست عبايه اسلاميه فوك لبسي ولفيت الشال وطلعت واخذت مستمسكاتي وفلوسي وبهذيج اللحظه نسيت كلشي من الارتباك والهوسه نسيت ملابسي ...

طلعت اباوع عليهم عرفتهم عمو عادل ابو بشار و عامر سلمت عليهم وبشار واكف وكال يله والتفتو ع ساجده وحجه عمو عادل كالهه مثل ماكتلكم راح نكعد وياهه ونشوفهه وبيناتنه المحاكم...

طلعت امشي وعزيز ماكو اي صوت اله مدري وين راح وساجده ورجلهه طلعوا ورانه للباب صعدت ورا بصف عمامي وبشار يسوق وطلعت من هاي الدبونه وبعد ما ادري راح ارجع الهه لولا؟؟

رغم جنت ماخذه علاجي بس احس نفسي كوه متمالكه نفسي اكو شي بداخلي عاصفه وما اعرف شلون اهديهه شسويت اني وين رحت ووين اجيت؟؟

صوت يكلي ليش عذبتي نفسج طول هاي السنين شوفيهم شلون ناس وهذا الصوت ضعيف مقارنه بالصوت الي يكول لا تروحين ابوج شرد من عدهم...

ماحجو اي شي لحدماوصلنه للمنطقه اتذكرتهه وصايره بعد ارقى وبيتهم نفسه بعده وكفت السياره بالباب ونزلو ..

نزلت وياهم والهدوء سيد الموقف اكو رهبه بداخلي شلون اواجه كل الي بالبيت واتذكرهم جانو هوايه وبنات بعمري...

فاتو عمامي وبشار صار بصفي كال يله فوتي شبيج تمشين هيج لان جانت رجليه مقيده واسحل بيهن سحل..

طبيت من باب مباشره للصاله طالع ع الممر تلكتنه مره متوسطه بالعمر كالت هلا حبيبتي ماشاء الله شنو هالجمال؟؟

سلمت عليهه وماعرفتهه منو بس سمعت عامر كالهه ام بشار رايح اني واذا صار شي اتصلو بيه ...

عرفتهه هاي امه ومبينه حبابه حيل اخذتني من ايدي مباشره للغرفه وبشار وابو مادري وينهم مدري منين فاتو...

طبيت للغرفه كلت السلام عليكم ..
الحجيه.. هلا بريحه رضا حنيتي علينه يابنت تعالي يمه خلي اشمج وكامت بصعوبه وهي تسند نفسهه ع الحايط..

سلمت عليهه ولزمت وجهي باديهه وتبوس بيه منا ومنا وهي دكول شحلاتهه يمه..

اجت ابنيه سلمت عليهه كالت اني فاديه بنت عمج عادل اتذكرتهه من جانت صغيره ..

ووحده واكفه ع عكازات حلوه وبريئه بشكل موسمينه وناعمه وعدهه خدود كلش كبار وعينهه تضحك

اتذكرتهه هاي شجن الجانت قبل شكد تتودلي وتريد اصير صديقتهه واني مثل المخبله بس ليش هيج رجلهه ...

اني تقربت وسلمت عليهه كتلهه انتي شجن هزت راسهه وكالت اهلا وسهلا...

شجن.. شكد احب قبس من جنت صغيره واتودد الهه واريد اصير صديقتهه بغض النظر عن كل تصرفاتهه حته جانو من يحجون عنهه ادافعلهه وشكد اتمنى اشوفهه..

ورا ماكملنه عشا وبشار كال راح اطلع شويه واجي ومثل ماراح مثل مارجع كال لجدي حجي هاي قبس بنت عمي خابرتني تريد اروح اجيبهه ...

وما اكدر اروح وحدي خاف يطلعون حجايه عليهه شلون اخذهه من بيتهه ورجلهه الظاهر عدهه مشكله ..

الحجي.. لاابني مو وحدك اني اروح وياك وابوك وخابر عمك عامر هاي بتنه ويوميه ادعي الله يهديهه وترجع ويه بناتنه وحته ماتصير بوجهك حجايه عاد يكولون عمامهه جابوهه..

طلعو كلهم وبس احنه ظلينه وبنات عمي عامر كلساع يخابرن شكو؟؟ لان سامعات من ابوهن ...

وتاخرو يله اجو وبيبي لازمه السبحه وتسبح كون ماتصير مشكله لحدما اجو والبنيه كاعده بالغرفه واني طلعت لماما للمطبخ...

شجن.. ماما خاف ماماكله شي ماسالتهه مبينه خجلانه؟؟
... اي ماما هاي داسويلهه ..
... شيكولون خوما متصادمين ويه رجلهه؟؟ وليش انهزمت من عنده؟؟

ام بشار.. ابوج يكول طالع الهم سكران اعوذ بالله من شره وكام يهدد وما انطي مرتي وبهالحجي ويكول صوته عالي حته جارهم طالع ع صوته ...

وشتدرين ببشار يسكت متلازم هو ويا وضاربه بوكس ورجل خالتهه ماخذ رجلهه وقافل علي البيت وجايبهه ..

يكول ابوج طلعت حابسه نفسهه بالحمام وبس ترجف خطيه مبينه متعذبه انتن يا امي هم صيرلهه اخوات كسرت خاطري...

شجن.. هاي نرجس كلساع تخابر دكلي بعده شعرهه طويل وحلوه كتلهه لا كاصته بس حلوه ..

ام بشار.. باجر عامر كال اجيبهن حته يشوفنهه بنت عمجن هاي ويتيمه على كيفجن وياهه ...

شجن... رحت للغرفه لكيتهه تسولف ويه بيبي جابتلهه ماما صينيه العشا وحلفت متعشيه بس ماما كالت ابد الاتاكلين وهاي فاديه تاكل وياج..

وفاديه ماصدكت بسرعه كعدت تلف وتاكل وتباوعلي وتحرك بحواجبهه ...

الحجيه.. شبي وياج رجلج؟؟ خومايضربج؟؟
.. لابيبي مايضربني بس هو يشرب واني ما اتحمله بعد..
الحجيه.. يابنتي انتي اختاريتي هالطريق شحلاتج لو ظاله ويانه رحتي مثل الورده المفتحه هستوهه وهسه مبين عليج متعوبه..

قبس.. كلامهه صحيح ظليت مدنكه وكتلهه سوء تصرف ما اعرف شحجي والي سويته صح لوغلط ...

ام بشار... كومي حبيبتي ارتاحي بغرفه البنات فدووز انطي جربايتج لقبس اليوم وباجر ابوج يجيبلج وحده..

قبس.. لا خاله انام بالكاع قابل شنو؟؟ ولاتكلفون نفسكم بيه ..

ام بشار.. لا يمه مايصير والغرفه جبيره بس اليوم تنام بالكاع شويه خلي تهز روحهه ام الشحم موتتني..

فاديه.. عفيه بالوالده من هسه انطيتي لقبي اخاف اداوم والكه الي بالكليه واصلهم هاللقب وانفضح..

ام بشار.. دكومي فرشي ونامي باجر وراج دوام واذا احتاجتيو شي صيحوني...

قبس.. كمت وياهن للغرفه نفسهه الغرفه الي عشت بيهه سنتين بس مغير صبغهه والكاشي مالتهه ...

مرتبه حيل بيهه جربايتين لون وردي وكنتور وميز علي شكم شغله عنايه بالبشره وعطر من كدما مركزه بس ع الميز حته الماركه حفظتهه متعجبه ع نفسي شلون خجلانه ...

شجن.. هاج قبس بدلي ع راحتج وباجر عود اطلعي ويه ماما اشتري ملابس..

قبس.. شكرا شجن من العجله نسيت كلشي..
... لا عوفيهن هسه دبري نفسج بشكم قطعه وبعدين روحي جيبيهن علما يهدء الوضع خاف رجلج ياذيج..

قبس.. ابتسمت بوجهه وطلعت جان التراك بعده بالكارتونه مالته جديد ماملبوس نيلي وبي اصفر والبدي مالته فوك الركبه ومستور...

بدلت وظليت كاعده ع الجربايه صافنه بحالي ياربي شراح اسوي ليش هيج حياتي اني اعترف بلساني بيت جدي ما اذوني وكلهم زينين بس ما اكول غير الله يرحمك يارضا...

قبس... مددت ع الجربايه فتحت التليفون لكيت رساله من بشار ما سمعتهه من اجت كاتبلي باجر لا اداومين بس هالكلمتين..

كتبتله شكرا جزيلا تعبتك وياي ماراح انسه وكفتك وياي ودزيتهه وماجاوبني لحد ماغفيت وجنت تعبانه وعلاجي اصلا بي منوم ...

ثاني يوم كعدت الساعه ب٨ ونص فاديه رايحه للدوام وشجن كاعده بفراشهه...

قبس.. صباح الخير ..
شجن.. صباح النور ماظليتي نايمه ليش كعدتي ..
... لا هاهي هو متعوده اكعد هيج وقت ..
.. كومي غسلي اخذي راحتج محد اكو عمر بالدوام وبشار هم وبس احنه ..

قبس.. كمت غسلت والبيت هدوء حيل كل كعدتهم بالمطبخ مشيت للمطبخ كلت صباح الخير..

الحجيه.. هلا بهالصباح تعالي اكعدي تريكي ويه جدج هم صاير ينام للظهر..

الحجي.. يامره وين الظهر انتي غباشه شورانه ونكعد تعالي ياجدي ..

الحجيه.. اليوم راح نسوي عشه هم دورة السنه مال اهلج وهم تتعرفين ع عماتج وعمامج..

قبس.. شلوز نسيت اليوم اتعس يوم مريت بي الخبر الي اجاني واني اصلا جنت مريضه نايمه بالفراش وكالو اهلج كلهم ماتو...

تريكت وكمت احس نفسي غريبه وما اعرف شسوي وحته تصرفاتي وكلامي كوه اكدر اطلعه رحت يم شجن جانت تقره كتاب ...

قبس.. وين وصلتي بالدراسه؟؟
.. بعدني مرحله اولى وصار الحادث وماكملت..
.. ليش ماتكملين ترى عادي هوايه بنات وكملوا؟؟ وين الحادث صار؟؟

شجن.. بلعت ريكي ودنكت بالكتاب كتلهه باب الجامعه مثل كذبه وائل ...
بس بشار كال اقدملج اهلي ماريد قسمي بعد

قبس.. الله يوفقج ان شاء الله اتذكرج جنتي شاطره وجانت بنت عمو عامر نسيت اسمهه اني وياهه كسولات..

شجن.. اااي نرجس هسه راح تجي رسبت بالسادس وهسه طلعت ويه فاديه وراحت ادبي وانقبلت عربي...

قبس... بالشغل يم بشار تعرفت ع عمتي بسمه هي وبتهه اسمهه فرح شفتهم بالشركه..

شجن.. اي عمه بسمه عدهه اثنين بنات فرح الجبيره واصغر منهه فاطمه ولد واحد اسمه بسام. وعمتي بشرى بس بنيه عدهه واتزوجت قبل شهرين..

قبس.. اختج الجبيره نسيت اسمهه الي جنه نخاف منهه؟؟

شجن.. هدى اتزوجت وعدهه ٢ ولد وبنيه هسه تجي كالتلج ماما اليوم يسوون عشه بكل سنه هيج يوم جدي يعزم كل اقربائه وحته الجيران ...

قبس.. اي كالتلي بيبي وان شاء الله اتعرف بيهم...
شجن... ظليت اقره بالكتاب وحجيت لغيث على قبس كال يله حته ماتضوجين وكال ماكدر اجي اليوم للعشا هم معزوم بعرس بس كتله ازعل عليك اريد اشوفك صار هوايه ماجاي...

غيث.. هو اني اكدر ع زعلج اروح فدوه لحبيبتي..
شجن.. غيث تحبني؟؟ وماتعوفني..
غيث.. عاد بدت رحمة الله يابه احبج واموت عليج وما اعوفج اكو واحد يعوف روحه انتي روحي احبج واحب برائتج ...

شجن.. الوحيد غيث مصبرني على قهري باوعت لقبس جانت صافنه لحد الان ماحجو وياهه جدي وكال خلي ترتاح ...

قبس.. كاعده وصافنه واسمع صوت الهوسه برا وضحك كالت شجن استلمي اجو آل عامر ...

بسرعه اندفع الباب وكلهن نفس الگصه وحده اطول من وحده ...

نرجس ... ولج شكم مره ادك عليج ست شجن والتفتت علي الي كاعده واخير شفتهه جنت معجبه بيهه من اني وصغيره..

شلونج قبس اني نرجس تذكريني؟؟
.. ااي اتذكرج سالت شجن عليج شلونج نرجس ..
.. الحمدلله انتي شلونج صايره بعد احلى هذني اخواتي مروه وسروه ..

قبس... سلمت عليهم وبدن شقه وضحك ويه شجن وحته شجن حسيتهه منتعشه وطلعت من الحزن مالتهه. .

صافنه ع نفسي شسويت بروحي كل هاي السنين دافنه نفسي يم ساجده وهاي العائله الي انهزمت منهه شلون ثقافه وتربيه واني ياكالت ساجده ياكال عزيز...

يمكن راح اظل اكل باصابيعي ندم ع هاي السنين الراحت وضيعت شبابي واني اكل ماشبعانه ...

نرجس.. اسمعن راح تجي فريحه وتتفيك براسي ولادكولن اسكتي وحق  الله اسحلهه واشمرهه بحضن عمه بسمه...

شجن.. مالج علاقهه بيهه هو طبعهه هيج سوي نفسج ولاشفتيهه ..

نرجس.. لوگيه ما اتحملهه وراح دكوم تحجي كله بالماركات وكال فلان موقع ومصطلحات انكليزيه تريديني اسكت..

مروه.. اصلا اني متحلفه بيهه ذاك اليوم جنت لابسه كله اسود وشال ماروني دكلي مروه بعدج ماتعرفين تنسقين يرادلج ادخلج دوره يمي...

وهي ام الخلاگين جانت لابسه بشت جنه مال سعود المخبل وما ذميناهه ولاحجينه بس هي لازم تسمعنه صوتهه..

شجن... ولجن اسكتن عيب  من عمه هي ساعه وتروح؟؟
نرجس.. وين تروح اذا ماتشوف بشار وتتملق شويه وعود شوفني ماراح تروح..

قبس.. ضحكت من كالت التفتت عليه نرجس كالت يااا نسيت وانهديت ما اطلعين السر مو ترى عمتج بسمه عدهه فرح لاكامت ولاكعدت ..

قبس.. اطمنو سركم بالحفظ والصون واذا تريدون اخذو راحتكم وعفتهم وطلعت يجوز عدهن اسرار ..

شجن.. ولج نرجس انهديتي كدام البنيه عيب هسه دكول عنصريات...

نرجس.. شجن الله عليج تتوقعين اخوج ينعجب بقبس؟؟

شجن.. عزاا العزاج ولج ثوله مو متزوجه هي وزعلانه من رجلهه كون يسمعج بشار؟؟

نرجس.. يااا ولج نسيت عبالي مثل قبل بعدهه يله عوفينه بس كليلي موجنهه رشيقه زياده عن اللزوم جسمهه منحوت..

شجن.. هي حلوه من زمان كومي ولج جيبي العكازات خلي نطلع برا يم ماما. .

قبس.. جانو ذابحين طلي وجايبين طباخ يطبخ واباوع حالي من حال البنات من الشباك اشوف هوايه ولد شباب وزلم بس كلشي ما اعرف ...

جانت الساعه ب٢ الظهر وعماتي ماجاييات بعدهن بس تعرفت ع مرت عامر وبناتهه ...

راح الرجال الطباخ كالهم اجيب من المحل طباخ واجي وكلهن طلعن وطلعت وياهن...

جنت واكفه ع جهه بالطرمه قريبه ع باب المطبخ انتبهت ع شاب حلو طويل صاحب جسم رياضي عينه اسمه غيث لان سمعت شجن صاحته ...

واكو واحد كاعد ع الدرجات مال الحديقه ومنطيني ظهره ويمه ام بشار والبنات بس اني شويه بعيده وجان يغني بصوت عذب حيل...

جيران نزلو بالطرف يايمه احبهم
شوفيلي اجو من ياكتر شنهو نسبهم
يايمه انه اهواهم واتمنى اعيش وياهم
كلبي بكلبهم يايمه احبهم

يمه شفت ريم الفلا واكفلي بالباب
ماشايفه بكل الطرف يمكنهم اجناب
يايمه سيري عليهم وبحجة تحاجيهم
كلبي بكلبهم يايمه احبهم...

ام بشار.. كوم منا الي يفوت بالشارع ويسمعك شيكول تالي عمرهم صارو بيت الحجي مطربين وفوكاهه اليوم سنه عمك خلي يسمعك جدك..

عمر.. وخلي يكولون شبي المطرب هذا الفن الاصيل لوماعاجبج صوتي العذب ما يحلالج بس صوت ابوي من يغنيلج هذيج اطربين عليهه..

ام بشار.. استحي ولك اني امك تحاجيني هيج شبيك ممذور كلبك رف بس شفت بنيه  ..

عمر.. شنو شفت يمه رحمه لامه محمد صار سنه اوكفلهه باب المدرسه رجليه صارت خيوط ...

واليوم نزلو يمنه وصارو جيرانه وتريديني اسكت لا والله اليوم للصبح الا تروحيلهم ..

ام بشار.. ما اروح وين اعرفهم واروح شحجي وياهم ماتعقل تظل هيج..

عمر.. هي هاي الاصول مويكولون جارك ثم جارك ناس نازلين جدد بالمنطقه روحي سلمي عليهم وادي الواجب

ام بشار.. موقبل شهر نزلو هم ناس جدد شو ماصفكتلهم وغنيت بس هاي المحبوبه من يمهم..
والله ياعمر ماينكدرلك خلي يجي ابوك واكله خاف مايقبل ..

عمر.. مو دكولين عليه ترى اني لاشفت ولاسمعت ..

شجن.. هذا عمر اخويه هو وماما ليل نهار واحد يداهر بالثاني وماما تعرف بي يحب وحده طالبة مدرسه ومايندل بيتهم وين ..

بس الحظ الحلو والصدفه جابتهم يمنه وسكنو بمنطقتنه وهو يتوسل لامي روحي سلمي عليهم وتعرفي بيهم...

قبس.. عمر اتذكره من صغره ابو المشاكل تصيحوله..
شجن.. اي يدرس مرحله اخيره ومانعرفهه الي يحبهه..
قبس.. اكلج شو ما اجتي هدى؟؟
... هسه تجي ويه عمه بشرى لان رجلهه بالدوام...

قبس... شويه وانفتح الباب بشار كالهم شبيكم صوتكم لشارع عدكم عشا لوعركه...

جان لابس بنطرون اسود وقميص ابيض ورباط اسود بس بدون ستره وطب من وصل يمي كال شلونج مرتاحه؟؟

... اي مرتاحه باجر اداوم؟؟
... لااا خلي نحل سالفه رجلج وداومي واصلا هاي الايام الشركه بيهه لجنه حته الموظفين كاعدين شغل قليل..
... هااا زين لعد..
.. اذا احتاجيتي شي كليلي ..
.. شكرا ماتقصر...

قبس... طب ليجوه واني رحت للغرفه لحد العصر واجن عماتي بسمه وبشرى سلموا عليه سلام حار وبناتهم الا فرح الي فاجاني ماسلمت عليه ابد..

شافتني ودارت وجهه جان لبسهه راقي ومنسقه الالوان والظاهر مامرغوبه لان بنات عامر مايحبنهه واجت فاديه من الدوام هم ادردم عليهه ...

اكو نسوان ماعرفهن كالن هاي اخوات جدي والي اخوات الحجيه يعني تاهت عليه واني اريد ابدل اتراكي مامرتاحه بي ...

لحدما اجت هدى هي وجهالهه ورا ماسلمت عليه كالت تعالي وياي طلعتلي علاكه بس ملابس بعلامتهن كالت اعذريني خاف موذوقج بس تاخرت لان رحت اشتريتلج ماما خابرتني وكالت ماجايبه ملابسهه...

قبس.. حيل فرحت وكمت بوستهه وشكرتهه وطلعت فتحت العلاكه تراك طويل وكلابيه حلوه وشالات اثنين وعطر وملابس داخليه وخاولي...

بسرعه بدلت ولفيت شالي وطلعت قلم الكحل من جنطتي حطيت ابطن عيني وظليت كاعده اريد وحده تجي حته اطلع وياهه. .

تالي اجت فاديه وطلعت كلهن يباوعلي وعبالك من غير كوكب بس عمتي بشرى كالت ولج شو عظام وين اللحم بسلا من جماعه الدايت...

... لا والله هو قالب جسمي هيج واكلي قليل لان اتعب من الدوام ..
... يله هنا بيت عادل الي يجي يمهم يطلع فيل كيك ام بشار وحلوياتهه ينفخن الواحد نفخ ..

قبس.. كعدت يمهن دنيا المغرب وينتظرون العشا كله بيد الطباخ هو يصب ويدزلهم فات بشار وصعد ليفوك ونزل بس كالهم راح اروح اجيب العشا اني ورجل عمتي بشرى...

اصلا ماجنت منتبهه علي لان اسولف ويه عمه بشرى ومندمجه بسوالفهه وبعدين كمت للغرفه...

اذن الاذان كلت خلي اروح اصلي نزعت شالي  واريد اروح للمغسله جنت لازمع تليفوني بيدي شفت الساعه ...

ما احس غير الباب ينفتح حيل اباوع هاي فرح ماحجيت كلت يجوز متعودات هيج يفوتن...

وفاجاني كلامهه هي انتي مو عبالج اجيتي هنا وتلعبين بذيلج ترى بعدج ماتعرفيني خلي اعلمج منو اني؟؟

قبس.. منو انتي؟؟ وشنو جايه ابيتج وشنو هالاسلوب؟؟

فرح.. حضرت جنانج تعلميني بالاسلوب يبنت الشريفه الطاهره هم الج عين وتحجين...

قبس..  لح احترمي نفسج لا اكوم ادوس ابطنج امي تشرف راسج سمعتي لواعيد براسج منو يمج انتي واجيتي هاده عليه ...

شجن.. طبيت فجاه واشوف فرح تريد تاكل قبس وقبس عصبيه كتلهن شكو؟؟؟

فرح.. انتي اطلعي منهه مو هم تك رجل وجايه من تالي تتلوكين لبنت عمج...

شجن.. ما اعرف شصار بيه من كالتلي هيج شفت الغرفه افترت بيه وكلشي اظلم صار كدامي ووكعت.....

يتببببع.... متابعه شيقه