رواية قمع المشاعر الفصل الثاني وأربعون 42 - بقلم Rozaya1122

قمع المشاعر....  الاربعون
للكاتبة زهراء ( روزايه)...

(بارت طويل استمتعوا بالقراءه)

عمر.. وين الدليل جيبي هسه؟؟
هدى.. هاك اسمع مرتك شدكول اسمعهه زين بهذا التسجيل....
عمر.. انتي متاكده من كلامج هدى؟؟
هدى.. ما احجي قبل ما اتاكد اني موخرابه بيوت وحاقده مثل مرتك وشوف بعينك حته لاتنفضح كدام اليسوه والمايسوه راحت بسمه وبناتهه وحته بيبي دبرتلهه طلعه حته محد يحجي عليك بسببهه !!

بشرى.. اوكفي هدى ع كيفج اعصابج ندري كلبج محترك بس ع كيفج ترى حامل ومابينه مصيبه ثانيه!!
هدى.. هاااا !!! لازم انراعيهه ولازم نعتني بيهه وحتلو سوت غلط بحجه حامل ؟؟ زين وقبس لو مطلكهه بشار وهي يتيمه وماعدهه احد منو يراعيهه ويقدر ويكول مظلومه لوهذيج الساعه الكل راح يكول طالعه ع خالاتهه

عمر.. كافي هدى انطيني التسجيل؟؟
هدى.. هذا اسمعه زين وحقق ويه مرتك كدامنه قبس مرت اخوك الجبير ولازم تاخذ حقهه!!

قبس.. ماادري شصاير وليش هدى ترجف من العصبيه وصابرين ماتحجي بس تبجي !! انطت التسجيل لعمر فتحه كدامنه صوت صابرين وهي تحجي ويه فرح اني ميزته صوته فرح !!

صابرين.. فرح اني مابيه حيل مصايب الله عليج طلعيني من هاي السالفه اذا عرف عمر يذبحني
فرح.. انتي ماعليج محد راح يحجي ولاواحد يشك بيج بالعكس يشكون بيه ومايشكون بيج!!

صابرين.. انتي كلتي ساعديني وساعدتج اني!!
فرح.. وينهه مساعدتج اشفت منهه حته ماضربهه!!

صابرين.. شنو ماساعدتج الليل كله اراقب وانتظرت بشار يصعد ورمشت لعماد يدك عليهه وهي ركضت اخذت التليفون ويكول عماد فتحت خط وحاجي وياهه عود متواعدين وهي حبيبته وموكتلج نزلو اثنينهم وفزيت جنت بالمطبخ انتظرهم وعمر نايم جانت قبس خايفه بس بشار طبيعي وراهه شفتهم من شباك الغرفه كاعدين بالحديقه يسولفون اني العليه سويته !!

فرح.. هسه اني شطالبه من عندج خلي يطلع بشار يله افكر بس اسكتي ولاتبينين ع نفسج ومستحيل يشكون بيج انتي بعيده كل البعد وما اورطج حتلو يسالوني اكول صابرين مالهه علاقه!!

صابرين.. والله يوميه اكول هسه عمر يدري خاصه هدى هالايام موطبيعيه عينهه عليه وين مااروح!!
فرح.. ترى هدى حته اني مراقبتني طنشي لاتهتمين وراح انزل هسه حته لايشكون اني صاعده يمج وكدامهم خلي علاقتنه ضعيفه ...

شجن.. نسمع بالحجي وجسمي كزبر شنو هاي القذاره شنو انتي فرح وانتي صابرين شلون تساعديهه بخرابهم لو مطلكهه بشار لوكاتلهه ذنبهه بركبة منو؟؟

حته ماما تفاجات ماعرفنه ليش هدى خلت عمه بسمه وبيبي يروحن بحجه بيبي تعبانه وخليهه يمج تقريبا طرده بنزاكه واخذت بناتهه وطلعت وبس احنه وعمه بشرى وبنتهه وفجرت القنبله هدى وصدفه دخل عمر !!

قبس متفاجئه وبس تباوع ع صابرين الي احتمت بماما وتتوسل بيهه تحميهه وعمر عيونه صارن بكصته وشمر الموبايل ع هدى وهي طفره هي جرة شعر بحيث عبالك عنده حبل لازم شعرهه ويفر براسهه فر يتخيلي راح ينفصل راسهه من القوه..

صابرين.. عمر الله عليك اسعني ولج ماما الحكيلي !!
عمر.. حاط وحده ساقطه بيتي وتتفق من ورا ظهري وتخابر بزلم ولج صابررررررين!!! وضربهه راشدي وكعهه بالكاع وبطنهه  لخشمهه كلنه صحنه عوفهه خفنه ع الطفل لان هي نهايه الثامن!!

عمر.. امشن منا ولا توكفن كدامي !!
ام بشار.. موهيج عمر خلي نفتهم منهه ابنك ابطنهه ع كيفك يمه
عمر.. طبه مرض من هاي الساقطه ماريده احجي ولج لا اذبحج منو هذا عماد احجي كلبه مامن بيج واطعنيني بظهري؟؟

صابرين.. والله احجي بس عوف شعري والله احجي
عمر.. ااااحجي وصاح بيهه وهو لازم شعرهه وشده بقوه اكثر كامت تشهك من البجي وكدامنه كتلهه حته ماما توسلت بي ياخذهه للغرفه ماقبل..

صابرين.. والله فرح كالت ساعديني وهي جابتلي خط واني انطيته لصديقتي انطته لاخوهه وحولتله فرح رصيد واني بس دكيت علي كتله خابر هسه لان بشار موجود والله تندمت والقران تندمت عمر غلطت والله ما اعيدهه بعد!!

شجن.. من خوفهه والمهه كامت تفرفح سحلهه من شعرهه وايدهه مخليتهه ع بطنهه ويسحل بيهه لغرفه اهلي مابرد كلبه يريد يكمل عليهه وسد الباب ماما شكد حاولت ودكت بالباب وماقبل يفتحه!!

نسمع صريخهه حته سديت اذاني عبالك يعذب بيهه وصوتهه رج البيت رج وهي تصيح ابوس ايدك لااا !! ماما كعدت باب الغرفه تبجي وتتوسل بي علمود ابنك بس اذا جان بشار عصبي ولابد مايتفاهم عمر فضيع بلحظه العصبيه يفقد!!

فاديه سحبت ماما وكعدتهه ع التخم وجابتلهه كلاص مي ومن صوت صابرين كلشي مانسمع البنيه راح تموت ماما كومي كسرو الباب اسمعي صوتهه مدري شسوالهه!!

قبس.. رغم السمعته وشفت عمر شلون ضربهه بس ماكدرت اوكف بمكاني واني اسمع صوتهه هذا الصوت يتخيلي من جان بابا يضرب ماما وهي دكله لايسمعوني الجهال وتطلع صايره زركه من الكتل ومن نسالهه دكول لا جنه نتشاقه !!

لو من ضربني بشار وجنت اصيح وابجي اريد واحد يخلصني من ضربه ومحد ادخل!!

تقربت ع الباب كمت ادك بي واصيح عمر الله عليك بداعه بشار عوفهه اذا تحب اخوك عوفهه اني وياهه نتجازه عمر لخاطر اخوك !!

ماجان يسمع وهي الله يسلمهه صوتهه عالي حيل بحيث شكد ما ارفع صوتي ماينسمع من وراهه!! عمر اذا تعزني عوفهه لخاطر ابنك والله يحس بامه لاتاذيهه عمر !!

فجاه سكتت بس صوت بواجيهه واضح ابتعدت عن الباب وكعدت ع التخم اباوع شوكت يفتحه ويطلع شسوالهه ابنهه خطيه!!

شجن.. شويه وفتح الباب وطلع صاير بارود صاح كومي فاديه جيبيلهه عبا تلبسهه اوديهه لاهلهه!!
ام بشار.. ولك فضحتنه مو هيج عوفهه يمي بغرفتي وبعدين نتفاهم

عمر.. ماكو تفاهم المره الماتصوني ارجعهه منين ما اجت اني مغفل نايم ومرتي تسحب نفسهه من فراشي ودكوم تخابر واحد غريب دكله دك ع مرت حمايه حته يطلكهه ؟؟

شمسويتلهه قبس ماخافت الله هاي التسوي هيج دكه وماعدهه مخافه الله كلشي اتوقع منهه وموبعيد باجر اطمس راسي ؟!

بشرى.. عمه فدوه لطولك ع كيفك ورطتهه فرح بعد!!
عمر.. وين عقلهه ؟؟ ما اجتني وحجتلي واني اشك فرح نصين لو ما بكلبهه غل ع قبس ولو عدهه ذره من مخافه الله ! ولو ذره وحده من احترامهه الي ماخطت هيج خطوه؟؟

مااريدهه كدامي ابني اخذهه منهه وغصبا على اكبر واحد وخلي فرح تفيدهه!!

شجن.. نزلت فاديه جايبه عبا الهه طبيت وياهه للغرفه مخليهه جثه الدم ينزل من حلكهه لبستهه فاديه وهي تون وصاح بيهه كومي تريد توكف ع رجليهه ماتكدر راحت ويا فاديه توصلهه واخذهه لاهلهه

ام بشار.. شدعي عليج هدى ماتدرين باخوج مخبل لومخليتنه احنه نحطهه ونتفاهم وياهه!!

هدى.. يمه كل اليصير بسببج تدرين ليش؟؟ لان عينج مو ع البيت جنتج ادك ادروب من ورا ظهر ابنج ورادت تخرب حياة الجبير وانتي نايمه!! لو هذيج المره جان شجن راحت بيهه وصرنه سالفه بحلوك العارات وانتي هم ماتدرين وادافعين للحق وللباطل..

بشرى.. عزاا بعينج جنج سحير الليل مادكليلي شلون لكفتيهن!!
هدى.. اني كلبي لاعب عليهن اشوفهن يسولفن ومن نجي يسون نفسهن وحده ماتعرف الثانيه ما مرتاحه لفرح وكمت اشوفهه تصعد فوك لازم اكو شي

واعرف اوقاتهه التصعد بس الظهريه بحجه خليت تليفوني بغرفه عمر ع شحن وفتحت تسجيل وعفته وبعدين اخذته اني مااتهم بدون دليل

يمه رحمه لاهلج عينج ع البيت ترى بنات بسمه يهجمنه والله والقران ينهجم بيتج وانتن ظلن فاتحات حلوكجن بس بالسوالف ماتعرفن تراقبن ماتنتبهن شبيجن !!

بشرى.. عمه انتي مشتغله استخبارات كله تعلوم النجر الي بسجن هو علمج ع هاي الدروب يوم سجلت ساجده يوم صابرين !!

هدى.. لعد منو يصدكني اذا حجيت لواكعد احلف بالقران كل وحده تهجم بيت غيرهه عساهه لاتهنت ولاشافت راحه وشوفن اني مامقهوره عليهه بالجير وياهه الماصانت رجلهه !!

ام بشار.. هسه يطلكهه عمر وخطيه الولد بركبتج !
هدى.. ليش بركبتي خاف اني كلت لامي خابري من ظهر رجلج وخربي حياة غيرج اليجي من ايده عسه الله يزيده !!

طبت فاديه تلهث يمه اخذهه تكفخ بس انريد نوصل كلت لااتجيب بالطريق وشمرهه ومدري وين راح !!

ام بشار.. امهه ماطلعتلكم
فاديه.. ليش هو دك الباب اصلا؟؟ سحب الحبل وشمرهه بالطرمه حته ماخلاني اطببهه والله انقهرت عليهه الله لايوفقج فرح تركضين ورانه سمج وصل حته لصابرين الثوله!!

ام بشار .. والله جاهله ولجن شكد عمرهه هو ٢٠ سنه تحب عمر وحته عافت دراستهه وماكملت ادري هو هيج يضربهه

بشرى.. عبالك نافخه عليكم حيه بيت عادل جبتوهه يوميه مشكله موحياة عبالك مغامره

شجن.. كاعده وبصفي فاديه جان دكول اتذكرت ابطال الديجتال
شجن.. عوبه شجابهم
فاديه.. من كالت مغامره جان ع سبيس تون يطلع كوكب مغامراات

شجن.. صايره فطيره!!
فاديه .. تدرين اتمنى عمر يروح يكتل فرح اااخ ام عطوب كلما اقرر انقهر عليهه اغم نفسي ولاتنظف هاي البنيه !!

بشرى.. اكلجن اني عندي راي خلي اخابر بسمه تجي وكدامنه نحط فرح ونواجهه لازم توكف عد حدهه
ام بشار.. وشراح تسوي بسمه هي ادافع عن بتهه

بشرى.. يمه كون عندي هاي الا احميلهه السجينه والسعهه بنت المسموطه !! رجال مايحبج يوميه كامزه عليج اكرصي الدوده واكعدي ..

فاديه..ههههههه ههههههه
شجن..ووجع شبيج ؟؟
فاديه.. ههههههههههههه
شجن.. تخبلتي عليمن تضحكين؟

فاديه.. ولج يمه بطني ههههههه وخربانه ضحك حته دموعهه نزلت وعبالك دكمه وانداست واحنه بس نضحك وياهه حته قبس وماما يضحكن ع ضحكهه!!

بشرى.. ولطم عليمن تضحكين ؟؟
فاديه.. لج عمه اتذكرت الكتله مال بشااااار هههههه

شجن.. هههه امداج ظلي كل مره اتذكريهه
فاديه.. مااكدر انساهه !! شلون ضربنه بالسره وكل وحده واكفه تنتظر دورهه واحنه مثل الارانب

بشرى.. وتضحكين ع اصخام وجهج فوك الكتله؟؟
فاديه .. غير ماشايفه منظرنه اني حته سويت احماء لخدي لراشدي وتالي سوالي مباغته وضربني ع الخد الثاني

بشرى.. البكدج عرسن وجهالهن يركضون وانتي فاكسه مابيج حظ
فاديه.. بهاي صدقتي !!

ام بشار.. ولج فاديه وينه وين الضحك
فاديه.. هسه جنتي تضحكين وهسه بدلتي الموجه
بشرى.. التهينه وماسئلنه قبس ع بشار

قبس.. زين يسلم عليكم ؟؟
بشرى.. خدودج مورده لازم حصلتي مغذي
قبس.. وين احصل غير هوبالسجن؟؟

بشرى.. مو هو مايلزمه سجن ؟؟
هدى.. خلي سالم ويتهنه بيهه
بشرى.. اي والله ويوم عيد زواجه ويطلع رافع راسه ونهلهل ونهوس جبنالك برنو ماملعوب بسرگيهه!!

فاديه.. مكسور السرگي انهوسله فوت بيهه وع الزلم خليهه!!
ام بشار.. طايحه الحظ كومي لا املص اذانج!!

فاديه.. شكلت اني محسستني ام ال٩ سنوات لو انخطبت وفسخت الكدامج مطىلقه ترى!!
ام بشار.. شلون راح اكوملهه وافرك حلكهه!!

بشرى.. ع كيفج داده البنات عجايز ترى بعدج الطكه القديمه كومي خابري عادل طمني ع ابنه!! وكامت

فاديه.. هسه نرجع لهواستنه
بشرى.. ولج غبره السرگي بعده اصلي ومجيم متروك !!

فاديه.. بشبوش موشفتينه سود كلتي اهنود قبس متزوجه سابقا لاياخذج الواهس وتهوسين ع البرنو!!

بشرى.. لعد انتن ماتدرن قبس بعدهه بنت بيت ولجن غير متزوجه ع الورق جانت
فاديه وشجن.. كولي والله؟؟
بشرى.. وابو خيمه الزركه قبس بعدهه بالباكيت!!

فاديه.. كمزت ع التخم وتهوس جبنالك برنو ماملعوب بسركيهه !!

طلعت ماما نزعت النعال وركضت ورا فاديه شمرته عليهه ودكلهه ماوكع بيه صايره موخوش تصوبين ام بيشو !!

ام بشار.. شلون تخليني املخهه هسه
بشرى.. دعوفي البنيه غير فرحانه لاخوهه
قبس.. واني سويتوني مزق

بشرى.. ولج غير تفرحين بيوم عرسج نحرك الجو بالطلقات
فاديه.. منيلج طلقات؟؟
بشرى.. عمج ابو حوراء عنده طلقات
فاديه.. خوش يصوب ابو حوراء؟؟

شجن.. ولج فاديه مصخمه لاتسمعج ماما؟
فاديه.. سكتت هي امج لو خزرات هدى راح اطك عيونج يا اختي
هدى.. والله ولايفيد بيج ماتفيد الخزرات!!

شجن.. هدء البيت وكمنه سوينه عشه وعمر مانعرف وين راح مر اليوم بوسط اكشن وناس تاكل بناس ثاني يوم من الصبح اجت بسمه وبناتهه جابن بيبي هن يوميه يجن لوعشه لوغده همزين مايباتن يمنه ...

يجي امجد وياهن بس اشوفه اروح للغرفه اشمئز من شوفته ويذب سمه عليه وعبالك مشمت بيه لازم يعيرني ويسمعني كلام موحلو مع العلم اني مالي علاقه بي ولا مأذيته بس الظاهر كلهم هيج عدهم الحقد ع الناس من صفاتهم السائده..

جنه كاعدين بالهول وعمه بسمه بس تحجي كال غيث وكالت ام وائل حته ماخلت احترام النه ولا قدرت موقفنه المفروض منهه تزعل ويانه بس هي مسويه الدرب سكه رايحه راجعه عليهم

واليقهرني اكثر كلامهه ع غيث هي وبناتهه وعبالك ابن عمهن وعلاقتهن قويه مدري يجذبن مدري صدك كلنه نعرف غيث طالع عنهم ومايجي لاهله وهي كلامهه يوحي غير شي!!

سألن ع صابرين وينهه كالت ماما تعبانه وراحت لاهلهه حملهه ثكيل !! بعدنه كاعدين وقبس ماتكعد ويانه جان ينزل عمر ماندري بي بلبيت البارحه نمنه وهو ماجاي وع اساس اليوم دوام طلع مارايح!!

عمر.. كعد ع التخم كومي فاديه نزلي تليفوني عفته فوك مادري بعمتج هنااا!!!

بسمه.. شو عمتج ؟؟ ليش موعمتك اني؟
عمر.. عمتي المالهه سلطه ع بناتهه وماعرفت تربيهن موعمتي هاي وقبل لاتحجين خلي اكلج شي ماكو ام سباعيه ماتعرف ببنتهه شتسوي وشتصرف ؟؟ اياما تطلع امهه شريكه الهه

بسمه.. شتحجي انته منتبه ع كلامك اني عمتك ولك احترم شويه ؟؟
عمر.. ماخليتي لنفسج احترام بسبب بنتج قبل سنه بنتج دكت دكه ناقصه ويه قبس وماتابت وهسه شاركت مرتي وياهه!! اذا ماتكدريلهه كولي احنه انربيهه لا انتي لا اخوهه محد كدر يوكفهه عند حدهه

بسمه .. كمت تجاوز شنو هالحجي ماتسمعين ابنج بليتو بناتي بلوه يوميه وكعيهن بمشكله
فاديه.. عمر هذا تليفونك
عمر.. فتحه وكالهه اسمعي قبل ماتحجي بتربيه بنتج..

شجن.. عمه بسمه تسمع وهي تتلفت من فرح لعمر لحدماكمل التسجيل وهي تصيح صدك فرح صدك هالحجي!!

فرح.. عزاا ماما جذب والله هاي يرون يبلوني هي صابرين طلبت من عندي اساعدهه تكره قبس اني مالي علاقه!!

عمر.. شوفي لو الي سلطه عليج اكسر ظهرج هسه وانعل ابو اليكول خطيه كدام الكل اذا شفتج ابيتنه اطيح حظج وحظ تربيتج وحته انتي عمه مااريد اشوف وجهج لام ماعرفتي تربين بنتج وحده صلفه ماتستحي خلي عينج عليهه ترى ادك درب وتجيبلج العار!!

الحجيه.. تطرد عمتك من حجي النسوان الماعاجبه البيت هو يطلع موانت تطرد بنتي
عمر.. اذا انتي تشوفيهه صح هم اطلعي وياهه الكلام موجه للكل اي واحد يدافع عنهم خلي يطلع

الحجيه.. تطردني عمر ولك بيتي هذا تطردني!!
عمر.. مدام ادافعين عنهه وماحجيتي كلمه الحق مره جبيره انتي المفروض تحجين بحكمه واطيحين حظهه لاصار العكس عينك عينك ادافعين عنهه وتتمنين لوبشار يطلك قبس حته ياخذهه

موجنتي تصيحين بنت رضا وخابصه نفسج هسه كمتي تكرهين قبس حته ترضين فرح!! بس اريد اعرف معقوله ماعندج كرامه عينك عينك اريده وامج تحجي بلاخلاق جان علمتج العيب شنو ؟؟

والبيت موبيتج حجيه حصتج انطيتيهه لعامر ماكاعدين بخيرج ولا بخير بسمه كل دمار عائلتي ذمه بركبتكم وكل واحد سكت عن هاي الحقيره عديمه التربيه

شجن.. حجه هيج وطلع بعصبيه واحنه ساكتين كامت بسمه واخذت بناتهه معقوله هاي عمه الكتلت فرح من سمعت بسالفه الخط وهسه دكلهه كومي ماما الحقد والغيره منج مالي كلوبهن خلي تفيدهم بنت سميه امهات البيوت!!

والاكثر من هذا اخذن بيبي وياهن وسوت نفسهه زعلانه رادت ماما تحجي وعمه بشرى ماقبلت كالت خلن امي تزعل حته يجي ابوي واحجيله صايره تخوط بصف الاستكان وتحرض بيهن تخبلت امي شجاهه؟؟

طلعن وهن يدردمن وفاطمه دكلهه امشي هذني غوارات راح يموتن من قهرن لان احنه احسن من عدهن!!

فاديه.. اي صدك انت احسن من عدنه بالصلافه وبالخطوط ماخذات مركز اول

فاطمه.. من غيرتج حبييه عافج غيث وطكيتي رح تموتين!!
فاديه.. ههههه لابربج منو غيث؟؟ هاا طلعتي عندج علاقه بي مبينه تحجين وترعشين مدام تعرفي كليله دكول فاديه اذا رجال خلي يحجيلج منو العاف منو؟؟

طلعت للطرمه وفاديه تركض وراهه فطوم بروح ابوج كليله خلي يسولفلج السحله السحلتهه اله والبوكسيات الاكلهه من اخوتي !!

هدى.. تعالي اكعدي ترى مايستحن همزين خلصنه منهن
فاديه.. ماتخلصين عائله مسحوله هسه شكم يوم ويجن يرضن ابوج وبحجه غلطت وابوج ابو گلب الطيب يقبل ماتخلصين منهن الا يتزوجن بس مااشوفهن يتزوجن لان داعيه امه علي بيوم ممطر الياخذهن!!

قبس.. اليوم اول يوم رمضان صادف شهر السابع سنه ٢٠١٤ حته سحور ماتسحرت ذاك رمضان اني ويا جنه بعدنه مامخطوبين وبس نظرات بيناتنه جنت انتظره يجي ورا الفطور مرات اني اصبله ومرات يكول متعشي!!

وين جنت ووين صرت باحلامي جنت اكول هذا رمضان متزوجين بس هسه ياريتنه باقين بس نظرات حته الكل جان ضايج وعمو بس شرب جاي وماتعشه!!

بيبي مارجعت ظلت يم بسمه وعمه بشرى هي وحوراء يمنه رجلهه باربيل وجدو عرف بسالفه فرح وماقبل واحد يروح يجيب بيبي كال هاي كبرت وخرفت وماتميز الصح من الغلط..

انقهر على عمر منا بشار اخو وظهره انكسر لان معتمد علي ومنا صابرين يكولون صحتهه تعبانه ونايمه ع ظهرهه واحتمال تصير عدهه ولاده مبكره...

الجانت الساعه ب١ كاعده اقره قران وبعدنه مانايمين بس احنه النسوان بالبيت لان راحو مواجهه لبشار وهاي الايام كل اخبار ماكو عن المحكمه ومخلين املنه ع الله..

مندمجه بكل حرف بالقران واسمع صوت فاديه وهي تصيح ماما عمه اركضوا اجه بشااار!!

لو اذاني بيهن شي لو عقلي تخبل صدقت وخليت القران ع الميز وطلعت جنت متحلفه بفاديه عبالي ناصبه علينه شيجيبه بشار ؟؟

طلعت من الغرفه واشوفهن كلهن ركضن ليبرا يتلكنه وصوت هلاهل عمه بشرى اريد الحك البس نعالي ماكو انعكدت رجليه اطبب النعال ابو الاصبع صفح والتك الثاني طار تالي نزعته وركضت ..

جان بعده هستوه طاب يمشي بالطرمه وامه حاضنته وعمه واكفه تهلهل اتلفتت اريد شي البسه ماكو ركضت علي الكاشي يلسع بعز الحر بس ماحسيت بالحراره من كد فرحتي احس نفسي بحلم..

شمرت نفسي عليه وتعلگت بركبته ورجليه مرفوعه من الكاع وحاضنته وهو لاف ايده على ظهري واسمع صوتهم يضحكون مااريد اوخر عنه مااريد ابتعد خاف هم يطلع حلم!!

بشرى..خنكتي ولج وفوكاهه حافيه الخبله
قبس.. نزلني وباس راسي وهو يحجي بهدوء ع كيفج هاي كدامج اني!!

ام بشار.. الف الحمدلله ربي اشكرك واحمدك ع رجعه بشار تعال يمه فوت !!
قبس.. حسيت بالحراره  ورجليه ماكدر اظل واكفه ركضت كدامهم اريد ابردهن بسرعه للحمام خليت عليهن مي احسهن كالن تششش و اشوفهن صايرات حمر ليش ماحسيت بيهن!!

طلعت لكيته كاعد وعمو عامر وعمر وجدو وعمو عادل يشاقون بام بشار كالو سوينهه مفاجئه ماحجينه!!

من شافني واكفه طبطب ع المكان البصفه رحت كعدت يمه والتفت عليه كال شلونه حبيبي؟؟

قبس.. من شافك صار زين بشار بعد ماترجع مو كول اي الله عليك؟؟
بشار.. وحده وحده هسه تفتهمين من اوعدج لازم اوفي بوعدي وهسه اذا كتلج ماارجع خاف مااوفي ودكولين خاين!!

بشرى..جاي محتام عليهه تعال احجيلنه شلون طلعت عشنه ايام سوده
بشار.. يسولفلكم ابوي تعبان حيل بس اريد انام

بشرى.. احلف عليك ماراح تنام الكاعد بصفك مايخليك تنام !!
بشار.. التفت عليه وكال جنهه بشرى موزينه وياج ؟؟

قبس.. اي موزينه بس تحرمص بيه
بشرى.. هااا ولج هسه طلع صوتج من رحت لسه ضامه راسهه جنهه نعامه وهسه طلع صوتج اني اعلمج كلهه ضحكت وكالو عوفيهم يتهنون!!

ام بشار.. احجولنه يله شلون طلعت!!
عادل.. هذا الاسبوع سامر الف رحمه ع اهله سوه المستحيل حته للمحافظات راح وكلساع يجيب محامي وواسطه وكالو ماكو دليل علي وهو بشار كايلهم ساجده هددتني اذا ماتشيل الجريمه افضح اهلك وعرضك ذبينهه براسهه وجيب ورجع وكتابنه وكتابكم طلع كفاله لان ماكو دليل وكال القاضي تظلون نفس موعد المحكمه بعد ٦ اشهر ونحكم لحد الان القضيه بصالح بشار

الله ينطي ابو المقتول هو تنازل عن كلشي وكال ابني موخوش ادمي والرجال بريء اذا تريدون تحاسبون حاسبو ساجده وهسه تقريبا التفت القضيه ع ساجده بس مانخاف عليهه تطلع منهه اذا توكف كله ويه عقيد ولواء ...

ام بشار.. الحمدلله ياربي
عامر.. لعلمك عادل تدري هو القاضي بلحظتهه راد يطلعه كفاله بيوم المحاكمه بس من طرد ساجده هذا المدعي الكلب حاجه القاضي وصارت سالفه صديقه من تجاوز علي واجلهه والله القضيه نظيفه ومابيهه دليل بس شهاده ساجده والقاضي من سال بشار ليش سلمت نفسك كالهم لان هددتني بعائلتي وهي مره تعباته واحتمال تسويهه وفادنه التسجيل مال هدى..

بشار.. ظلو سولفو اني تعبان وعطشان راح اسبح وانام!! جنت كاعده واباوعله من راد يكوم كال شويه واصعديلي!!

قبس.. فرحتي ماتنوصف ركضت للغرفه اكمز واحضن بشجن وفاديه احس نفسي اريد اطير من الفرح شويه وصعدت بس طبيت لفحني هوه بارد شفته غاط بالنوم عود كال اصعدي بس حقه تعبان باوعتله شلون نايم ع ظهره ومخلي ايده ع وجهه سديت الضوه وطلعت...

للفطور كعدنا بس الفرحه بلبيت ماتنوصف بيبي اجت جابهه امجد وراح بس وجهه ثكيل عليه اني ماحاجيتهه التمينه كلنه ع السفره واني كاعده بصفه

ياربي ابدي اخذه من بين الكاعدين واضمه بكلبي عيونه ماتشبع منه شوف كلساع اباوعله وهو يلتفت عليه ويكول خلي نفطر ع خير ...

ورا الفطور حته ماشفته من كد الناس الي اجو واحنه نركض نقدم عصير والي يريد جاي وغير الفواكه عمر خبصنه بس الجكاره ماتوكع من حلكه والحزن والقهر مبين بعيونه...

صارت ب١٢ يله شفت بشار واخيرا اني جنت سابحه ومسويه شعري ظفيره وعمه بشرى هي ادفع بيه اصعدي ورا موطك كلبه..

صعدت لكيته يخابر طبيت وسديت الباب وظليت مرتجيه ع الباب هو يخابر ويتقرب عليه لحدماصار كدامي مندمج بالسوالف ويه واحد يحجون ع الشركه ويحرك اصبعه الجبير ع وجهي وع خدي وبطرف السبابه حركه ع شفايفي

غمضت عيوني مااكدر اقاوم لمساته وايده مستمره بالحركه لحدماسد التليفون وهو يكله مع السلامه فتحت عيني بسرعه سحبني لحضنه وهو يبوس بيه ويشم بركبتي ...

متمدد ع الجربايه واني مخليه راسي ع صدري واتفقنه عرسنه ثاني  يوم العيد سولفنه هواي ماحسيت بالوقت مر بحدنا انتبهت ع موعد السحور نزلت اركض...

مرت الايام مثل العسل يوميه احمد الله الف مره ع وجوده بحياتي وهو كدام عيني التهيت بالتجهيز وكملنه كلشي حته غرفه النوم جابهه وعمو عزم الناس واللهفه والفرحه بلبيت تخبل بيومهه اجانه خبر صابرين جايبه وعمر هو رايح وياهه للمستشفى بس ماكال راحت بشرى وام بشار عليهم وكالن صحتهه تعبانه وبس تبجي حته ابنهه ماياخذ صدرهه من الحرگه ...

رجع لدوامه بالشركه وهذا كله من فضل رب العالمين والموظفين الي دعموا الشركه وماسمحو لاحد يخربهه جان المعاون هو متكفل بكلشي والحمدلله ماخسر وظيفته...

بسمه راضتهم واجت ولاكانو بنتهه مصخمه وخربت العوائل عمر صاح تعارك وعمو عادل وجدو سكتو حته الله مايرضاهه فرح مامهتمه هي واختهه وصابرين تبجي ع رجلهه صار شهر زعلانه وعمر مقرر يطلكهه...

لابسه البدله البيضه مقسمه ع الجسم واردان طويله كيبور وكصه حلوه ماطالع كلشي من عندي!! وفرحتي ماتنوصف الله يرزق كل ابنيه هاي الفرحه ويتمم كل زواج ع خير..

اسمع الاغاني والهلاهل خالاتهم وبناتهم احس الكل يحبني ماتوقعت بيوم اعيش هيج فرحه وزواج عن حب راح يزفوني من نفس البيت لان جدو ماقبل كال ماتطلع الا من هذا البيت...

بوسط الهلاهل والهوسات حاضنه ايد بشار بقوه رفعت راسي اباوعله لابس  قاط نيلي غامق ومبينه الفرحه بعيونه بس جان مخبوص لان هوايه ناس عازميين..

جان هو اليسوق ومخليني بالصدر وجماعته كلساع يجون بصف السياره ومدري شيحجون بالالغاز وهو يضحك لحدماوصلنه للفندق...

كاعده ع الجربايه وهو يسلم برا ..خايفه حيل مرتبكه وقلقانه اول مره اجرب هذا الشعور عمه بشرى نشرت الخبر بين الكرايب كلهه بان اني بعدني عذراء اتذكر فرحه عمو عادل بلحظتهه هو وجدو كامو باسوني من راسي وكالو ثاني يوم من تجون نسوي الغده حته النسوان يدرن وينشرنهه ونرفع راسنه...

بشار.. شو وين قبس ام اللسان راح يوكع راسج شوو ارفعي!!
قبس.. بشار الله عليك خليهه مو اليوم
بشار.. هسه اني حجيت شي دخل اشوفج زين ماكدرت اباوع كدام النسوان

قبس.. لمني بحضنه وهو يطبع بوساته ع كل مكان من شفايفي لركبتي لكتفي شكد ماجنت مستمتعه ويا جان كلبي يطبل من الخوف!!

هو هم جان هادىء وياي عافني ع راحتي وبدلنه وصلينه وتليفونه مايسكت اخر شي غلقه والتفت عليه جنت لابسه سيت نوم اوف وايت وافرك باديه بعد ماكو شرده مبين من عيونه اليوم ناويهه...

تقربلي بهدوء ونومني ع جربايه وهمس باذني مااسوي شي بس بوسات خلاني اطمئن لان جنت خايفه وحته مااكدر ابادله بس من كال هيج بادلته بكل انسجام ولهفه..

اريد افتح عيوني مااكدر اسنشق عطره واحس بقربه وكانو داخل قفصي الصدري وكلوبنه انجمعوا بنفس المكان وينبضون نفس النبضه ..

احس بايده وهي تتجول ع جسمي بس جنت مسلوبه الاراده مااكدر امنعه مستلذه بلمساته همس يم اذني كلام حلو خلاني احوطه باديه واضمه لصدري بقوه وعبالك جانت اشاره من عندي..

اجاني صوته وهو يكلي مستعده حبيبتي؟؟ هزيت راسي بقوه وكلي لهفه وشوق لهاي اللحظه!!

.
.

يتبببببع.... متابعه ممتعه .. قفلتهه برومانسيه كولو قفلاتج تجلط شوف شلون مدللتكم اقروا👎

متابعيني الكرام الى هنا اصل الى ختام الجزء الاول من قصتنه !!
اعرف راح الكل يعترض بس صدكو والله العظيم دااضغط ع نفسي بالكتابه لان هاي الايام ملتهيه اواخر رمضان واريد ابدي اجهز لزواجي وقتي ضيق ما الحك ابد
اتمنى تعذروني وتصبرون عليه وتنتظىروني بالجزء الثاني
وان شاء الله ما اطول عليكم ولا اقصر وياكم ..

اتمنى اكون وفيت بحقكم بهاي الفتره رغم التزامي دوام ورمضان بس مايهون عليه اعوفكم واسوي القصه جزئين!! هوايه يسالون القصه مطوله اي مطوله لان صارت احداث جديده بهاي الفتره واني اريد انطيهه حقهه !! ماراح اطول عليكم ورا العيد احدد موعد الجزء الثاني..

تنتظرنه احداث ممتعه وشيقه من حياه قبس بعد هاي الليله !! ولحدالان مابديت بقصه فاديه !! ولاعرفتو نهايه شجن والمصايب التحل ع راسهه انتظروني باحداث اروع من الجزء الاول...

شغله اخيره اكو بنات يسالوني شوكت تفتحين بث يابنات ان شاء الله هاي الايام واحتمال باجر افتح بث.. اني انزل خبر بالكروب والي تريد اتابع البث مالتي افتح بهذا الكروب التابع الي فقط .. راح اخليلكم صوره الكروب وصوره حسابي .. واطلبو انظمام واني تلكوني مربعه بي.... احبكم !!

الكروب👎

حسابي👎