رواية قمع المشاعر الفصل الحادي وأربعون 41 - بقلم Rozaya1122

قمع المشاعر....  التاسع والثلاثون
للكاتبة زهراء ( روزايه)...

‏شَسولفلگ ؟
وأنه البيّه حَچي مكسر مثل گلبي ...
...

قبس.. نايمه بين احظانه وانفاسه الحاره تتغلغل بكل مسامه بجسمي دموعي ماوكفن ابد وهو يبوس بيه وعبالك ضمأن وجاي يروي ضمئه ..

قبس.. ليش هيج سويت بيه اني شفت ايام سوده بغيابك
بشاار.. هاي اني يمج واعوضج الايام السوده وان شاء الله طول ايامج تكون افراح وياي..

قبس.. تعال خليني احضنك حييل وضميت راسه بصدري واني اشم ريحته الفاركتهه صار فوك الشهر هيج حيل اضمه مثل الام وتحضن وتشم  بابنهه وحيدهه الضايع منهه

بشار.. هلكد مشتاقتلي؟؟
قبس.. انت روحي ومن يوم الرحت اخذت روحي وظليت بس جسد وراك وهسه بجيتك ردت روحي الي

بشااار.. شو تعالي كلبي طاك عليج صورتج مافارگت عيوني انام اكعد وانتي كدامي صرت احاول انام واغمض عيوني حته اشبع من شوفتك ولا احد يشوفج بعيني اني ولهان بيج ضحيتلج بسمعتي وبمستقبلي ومستعد اضحي حته بروحي بس اشوف هاي العيون فرحانه

قبس.. سامحني اذيتك واوعدك منا وجاي هاي الشعره ما اضمهه عنك ولا اتصرف من كيفي اوعدك بشااار ماراح اخذلك!!
بشاار.. تعالي ولج لاتاخذيني بسوالف خليني اكلهن هذني الشفايف السلبن حالي وخلني اطخ راس علمودهن..

رفعني من ايدي وخلاني فوكا وهو يبوس برگبتي وشعري نازل على وجهه وكلساع ياخذ نفس عالي ويصعد على شفايفي ويبوس بكل لهفه حسيت باشتياقه وحبه الماينوصف ...

فاديه.. قبس!! قبس !! اكعدي ليش هيج نايمه
قبس.. فزيت واني مخروعه هي فزه هي وكفه ع حيلي واباوع بالغرفه وينه بشاار وينه!!

فاديه.. اسم الله شبيج بشاار شجابه شو تعالي شوفي وجهج اصفر تعالي ننزل جوه
قبس.. اني جنت احلم ببشار وكعدت ع جربايته واتلمس بمكانه كل هذا جان حلم يعني بشار ما اجه ..

فاديه.. راح تتخبلين دكومي دنيا المغرب مايصير قبس اتعوذي من الشيطان وانزلي وياي ترى ماما حيل متاذيه ومتخربطه انزلي يمهه بلكي تشوفج وترتاح

قبس.. اذا تشوفني تتاذى اكثر ولا اني اكدر اشوفهه عزيزي وعزيزهه مفاركينه عوفيني هناا فاديه خليني اشم عطره ع الاقل

فاديه.. براحتج بس شويه واصعدلج تنزلين!! دخيل الله شنو من مصيبه گلبت بيدنه وخلت النار مشتعله بي ليل نهار !! بابا اخذه عمو عامر لان بس يطب للبيت يوكع ويبجي ويصيح البيت اظلم من دون ابني وماما حالهه تبجي العدو .. جدو الحجي ولحيته البيضه تصير تلمع من دموعه وهو رافع ايده يدعي ...

لو عمه بشرى العافت بيتهه ويمنه وضغطهه معلك حته تاخذ علاج وماينزل لو قبس هاي وحدهه بكفه مانعرف شبيهه ساعه تبجي وساعه تصفن ووصلت بيهه تتخيل بشار بكل مكان..

رجعت راسي ع الحايط واني كاعده ع الدرج ونزلت دموعي واتذكرت اللوعه والنار البگلبي وشلون وكعت عمه بشرى بيومهه ..

بشرى.. هااا ابو حوراء بشرنه راح نموت!! مانسمع شيحجي بس ردة فعل عمه وملامح وجهه ماخلت علينه حيل!!
مانسمع بس شهكه بشرى وهي تصيح لادكولهه يايمه سوده بوجوهنه ولك عمه بشاااااااار وين جانت مضمومه الك!!!!.

ام بشار... صاحت بصوت رجت البيت رج ولك يمه تعال لاتسوي بينه هيج بشرى راح ابني !! كليلي بشرى كولي ابنج جاي بالطريق

هدى.. عمه شكالو احجي تحجي وتبجي
بشرى..يكول القاضي مأجل المحكمه بعد ٦ اشهر بسبب الادله وصايره لغوه بين المدعي العام وبين واحد من جماعه بشار ومتازم الوضع بس هذا الكاله هسه يجي عامر ويفهمنه

فاديه..

. كلنه نبجي ومانحس غير ماما توكع بالكاع وصار صريخنه عالي منين مانهزهه ماتتحرك ركضت ع تليفون خابرت عمر كال جاي جاي بالطريق بس صوته مبحوح وخانكته العبره..

ذبينه عليهه مي ونضرب بخدهه فتحت عيونهه بس مورمه انطيناهه حبايه ضغط وماهدءت ابد موهاي ماما الهادئه مثل الطفل ويبجي على ابو وهي تصيح اريد ابني!!

اجه عمر يركض عليهه شال راسهه بحضنه ويحجي ويهدء بيهه بس ماما ماتسمع ولاتحجي بس اريد ابني !!
عمر.. يمه والله زين وهاج دزلج بوسه من راسج كال بوس امي وكلهه لاتضوج ولاتخاف وخلي تدعيلي

ام بشار.. ااخ يمه يا سندنه كلنه الله لاينطي الجابلك الاذيه حسبي الله ونعم الوكيل
فاديه.. التفتت على قبس ماموجوده وين راحت التهينه بماما بسرعه لبسناهه وراحت وياهه عمه بسمه واخذهن عمر للمستشفى لان ضغطهه ماجاي ينزل..

بس طلعوا ركضت للغرفه اشوف قبس والكاهه حاشكه نفسهه بالزاويه وكاعده بالكاع بين الجربايه وبين الحايط هذا المكان المعتاد مالتهه من تخاف ومن توصل للانهيار ..

تقربت عليهه كعدت كدامهه بس ترجف وتصيح اني السبب كله مني الله ياخذني اكتلوني اخذوني للسجن اني السبب بس جانت تحجيهن بكلمات متقطعه كون اجمع وياهه ...

سحبتهه من ايدهه ماقبلت تكوم ماتبجي بس وجهه اصفر وترجف كلهه بحيث كلساع اكول راح تخرب صدرهن يصعد وينزل من كدما نفسهه عالي ما اعرف اتصرف وياهه ركضت ع علاجهه وجبرتهه تاخذه ماقبلت كوه انطيته الهه وطلعت!!
اجه عمو عامر وجدو وابو حوراء وكعدوا يحجولنه على الصار بالمحكمه

عامر.. ادله ماكو علي لا بصمات لا سلاح الكاتل بي طلب القاضي الادله ماكو بس مشوا ع اعتراف ساجده وع هو سلم نفسه ومانعرف الحقيقه وين ليش ماكو دليل علي يعني موهو الكاتله وليش سلم نفسه ؟؟

بشار مايرضى يشاركنه بيمن يفكر ولايرضى يسولفنه الحقيقه واكو شي مبهم بالقضيه لذلك القاضي ما اقتنع الا دليل وساجدن هاي الساقطه طبت جايبه تقرير طبي تدعي بان احنه رايحيلهه للبيت وكاتليهه وبالدعوه مخليه عمر واني حته ماعرفت شحجي..

هدى.. عزااا صخم الله وجهه شنو من مره عبالك سياسيه تعرف كل الدروب واللوفات
عامر.. اي والله عمو تالي سامر استأذن من القاضي وانطا تسجيل صوت وهي طابه لبيتنه وتهدد وتغلط بس همزين الكتله والصياح مامسجلته عفيه هداوي..

وتالي صاح بيهه القاضي لان علت صوتهه وطردهه من الجلسه والقاضي عنده قضايا هواي واجلهه ٦ اشهر الا تكمل الادله ويحكم
هدى.. موهواي ٦ اشهر يعني لو شهر شدعوه ٦ اشهر وهو بريء يظل بالسجن

عامر.. هاي الماعرفناهه والله روسنه افترت تالي واحد من جماعه بشار مدري شحجه والمدعي العام اطاول علي وهذا كوم ورد علي وبالمحكمه والقاضي بسرعه كال اخذو للسجن شلون يطاول ع المدعي..

بشرى.. عفيه فوكاهه ابن العالم
عامر.. عفنه ابو اجي واحتمال باجر يطلعوا عمي هم شباب لو نار مشتعله نكله اعتذر من المدعي يكول شنو هالزباله الحرامي وربج ماسمعه ..

ابو حوراء.. بس والله مايلام بي انت تعرفه هذا المدعي واحد ساقط مرتشي ولعلمك هو تعمد يمدد المده يجوز دفعتله ساجده لان شفته شلون متنرفز من كال القاضي الا دليل مااحكم بدون ادله وطلب بصمات ع الحادثه!!

عامر.. يخوي حتلو حرامي بس يبقه مدعي وحاله حال القاضي ويكدرون يخيسو بالسجن كدام الناس ويكله اذا ماعندك كلمه حق اسكت ولو منين تعرف الحق ..

ابو حوراء .. القانون تايه والله كله تزوير ورشاوي حرامات ذاك القاضي المستلم دعوه وائل حقاني بس يكولون منقول وجاي هذا بمكانه!!

بشرى.. هسه وائل يطك اصبعتين وفرحان ومشمت
عامر.. اكيد لان سامر عاف قضية وائل ويركض ويه بشار بس والله مايروح حق واحد يجي يوم وائل ويطلع بشار وياخذ حقه

بشرى.. خلي ندفع فلوس اني ابيع ذهبي وكلنه نتساعد وننطيهه ٨٠ مليون وتتنازل!!
عامر.. موحجينه ويه ابو راس اليابس ماقبل يكول الف ما انطيهه وحذرنه خاف النه نيه ننطيهه والحجي بيناتنه كال عينكم ع قبس لاتتهور وتروح برجلهه لساجده اعرفهه رعنه

بشرى.. صدك رعنه واني متاكده تروح بس حته يطلع بشا بس احنه عينه عليهه ولو هي منيلهه حته عقلهه وكف ماتكدر تفكر

ابو حوراء.. والله ماكو غير حل ننطيهه فلوس ونخلص ترى هاي وراهه واسطات بس من تجي تصفن الهه بشار متاكد من نفسه بريء وحته سامر ماقبل كال لاتنطوهه!!

بشرى.. زين اهل المات وينهم مادرو بابنهم لا اجو لا سالو علي!!
عامر.. ليش مادرو قبل ٣ ايام خابرني سامر ورحنه عليهم
بشرى.. ااي شوساكتين؟؟

عامر.. ناس فقره عنده ابو رجال جبير مريض ومرته و٥ جهال كاعدين بغرفه تجاوز والله من شفتهم دمعت عيني وطلعوا ناس مهجرين من السقوط وعود هو المعين مالتهم..

كعدنه ويه ابو مواكلج شغله مامفهومه اني وعادل ظلينه مثل الاطرش بالزفه!!

كال الرجال لانرفع دعوه ولا نطالب بحق والحق ويه ابنكم وكلوله لايخاف ابني يستاهل الموت والله يطلع برائه ابنكم لحينه علينه انريد نعرف السبب بس كال الله يحب الساترين...

بشرى..يجوز لان يم ساجده وانكتل الله اعلم يجوز زاني واحتمال بشار من راح يتعارك ويه ساجده لكا يمهه وصارت المصيبه لان مدام ابو ماراضي علي معناتهه شغلته جبيره

عامر.. هسه انريد نهدء الوضع قبس عينكم عليهه طلعه ماتطلع ابد لاتلهون عنهه ماادري بشار خوفني عليهه كال ماتفكر وخاف تاذي نفسهه وهي شو موطبيعيه وصدك حجايته لازم ننتبه عليهه خاف تكتل نفسهه لو تنهزم الواحد يخاف من كلشي!!

بشرى.. اووف ياعمه الاسبوع الجاي رمضان شلون امك وابوكم شراح يصبرهم يابشار وانت صايم بالسجن والله البيت اظلم من دونه..

عامر.. عادل حيل مريض والدكتور كاله حرگه وحده تجلطك يكول بس افوت البيت وهو ماموجود اختنك ولايقبل يجي يمي!!

بشرى.. عامر ابوي هم تعبان ورجال جبير ودموعه ع خده هذا رمضان يوميه تعال عليهم ترى بس عمر يركض ومايعرف المسوؤليه لان جان مخليهه براس بشار هسه حته مايعرف البيت شمحتاج وشلون يديره انت وياهم خليك وجيب البنات يردن الوحشه عليهم وشويه تصير روح بلبيت ابوي يحب اللمه..

عامر.. اليوم حاجتني بسمه كالت ابقه يم اهلي واني استحيت اجاوبهه الصراحه بنات بسمه موراحه ويه قبس وخاف يضغطن عليهه اكثر وهاي روحهه كصيره وماتتحمل وتروح تشمر نفسهه بمصيبه..

بشرى.. لا اني احجي ويه بسمه ماعوزنه قهر يكعدن ويسكتن هله بيهن يسون مشاكلهن اني اسحلهن واطلعهن مالنه خلك...

ابو حوراء.. يله اني راح اروح حوراء وحدهه بالبيت وباجر الصبح اجيبهه هنا واني اطلع لاربيل عندي شغل
بشرى.. الله وياك وطلعت ورا اني راح اخابرهه اتجيبلي ملابس وياهه
ابو حوراء..  مع السلامه

فاديه.. عمو سؤال!! يعني مايصير قبس تروح تشوفه والله متأذيه وحالتهه ماتسر بس تشوفه تسمع صوته جاي تموت

عامر.. هو اكو مواجهه للنساء بس هو مايقبل لان جماعته موجودين ماتعرفين اخوج بس اني هم احجي وياا خطيه شفتهه متاذيه حيل

فاديه.. الله عليك عمو خلي يدبرون حتلو واسطه مو اله بنفس يوم الازدحام تدري بس تشوفه وتحجي ويا ترتاح لان حته من راح ماشافته جانت نايمه ولاترضى تاكل البارحه جبرناهه توزن والله انصدمنه بوزنهه من جان بشار وزنهه ٥٤ والبارحه ٤٧ هاي اذا ظلت هيج تموت نفسهه...

عامر.. هسه خلي اروح وان شاء الله خير اذا احتاجيتو شي خابروني!!
فاديه.. ماشي عمو شكرا وطلعت ورا للباب اخذت نفس وزفرته كلشي بغيابك يابشار يخنك انت موبس اخونه انت عمود البيت صديقنه وابونه اشتاقينالك هواي...

رجعت لليجوه فاطمه تگلب بتليفونهه وفرح ماكو رحت دورتهه ماكو بالغرف هسه جنت برا وهم ماشفتهه وين راحت!؟

صعدت فوك كلت خاف بغرفته شفت باب السطح مفتوح تقربت ع كيفي واشوفهه كاعده ع طابوكه ومخليه راسهه بين رجليهه وتبجي صوتهه وهي تشهك كسر كلبي

معقوله هلكد تحبي يافرح معلقه نفسج بسراب ووهم وجاي تضيعين شبابج وانتي تشوفي خاطب وقريب يتزوج وخطيبته كدامه ويحبهه شنتنظر هاي؟؟

ليش هيج الحب يذل ؟؟ ماتكدر تشوف حياتهه وتزوج بس اريد اعرف شتتأمل من عنده ومتاكده ماعدهه امل بس تحبه حيل لاول مره انقهر عليهه ماحرجتهه عفتهه ونزلت..

جابو ماما من المستشفى حاولنه نهديهه وهدى وعماتي يحجون عليهه خالاتي كلساع وحده تخابرهه بس موبيدهه لازمه السبحه وتستغفر بس دموعهه ماتسيطر عليهن حته بيبي حجت عليهه كالتلهه احسبي مسافر هو الواحد بكيفه لويجذب ع نفسه السفر وين والسجن وين؟؟

صار المغرب رحت اريد اكعد قبس ماموجوده بغرفتهه سالت شجن عليهه كالت صعدت لغرفتهم...

قبس... شلون اكدر اعيش واكمل حياتي بوسط تانيب الضمير يوميه احلم بالشخص القتلته لويجي يخنكني لو شكله مرعب ويخوفني بحيث كمت اكره النوم حته لا اشوفه..

وبشار ااااخ ياوجع كلبي شلون افاركك كل كلمه اسمعهه من عدهم عقلي يرفض يصدكهه هو وعدني مايعوفني ومانتفارك ليش استعجلنه ع الفراك عسى رجليه انشلت بهذيج الساعه ولارحت راح اظل طول عمري عايشه بالندم..

اشتاقيتله حيل محتاجته اكثر من الهوه الي اتنفسه محتاجه حنانه وخوفه عليه حته مشتاقه لعصبيته وزعله وصياحه لكلشي بيك مشتاقه.. هم تحس بيه وتحس بلهفتي؟؟ هم كلبك يدك من تذكرني؟؟ ادفع نص عمري بس اشوفك دقايق واباوع بعيونك واكلك اني وياك للموت...

كمت من فراشي وصعدت لغرفته ماطبيتهه من راح لحد هذا اليوم مالي كلب اشتم عطرك بيهه بس اليوم اخذتني رجليه بدون شعور لغرفته..

فتحت الباب ويلفحني عطره وعبالك كام يتلكاني لو اني مجنونه لو صدك عطره مالي المكان...

سديت الباب واني اباوع ع كل ركن وزاويه بيهه هنا كعدنه بيوم دققنه الاوراق؟؟ وهنا صالحني وباسني من كل مكان ضربني بي !! وهنا اول مره يدك كلبي اله يم الميز بعرس عمر من شافني لابسه فستان وكال شرايج نسوي العرس عرسين!!

بكل مكان بهاي الغرفه الي ذكره حلوه تقربت ع الميز اتلمس بعطوره ودموعي تجري!! هاي ساعته نازعهه وشامرهه ع الميز شلتهه بستهه وخليتهه ع كلبي هاي جانت بيده وضميتهه بالمجر!!

فتحت الكنتور وملابسه مصفطه ومرتبه والقمصان مكويه ومعلكه غمرت راسي بيهن واني احس محاوطني باديه ويضمني لصدره لان عطره ملئ صدري وبعدني استنشقه!!

جريت قميصه الابيض مال الحادثه ثاني يوم شمرت ملابسي بالزبل وقميصه غسلته ماكدرت اذبه هنا ضمني وحضني وكال اني وياج ما اعوفج وكال علمودج بكلشي اضحي وصدك ضحيت بكلشي!!

اخذت القميص ورحت كعدت ت الجربايه اتلمس بمكانه هنا نومني ع صدره وباسني من عيوني كالو بوسه العيون فراك بس ماجنت اصدك واكول مستحيل نتفارك !!

رفعت نفسي ونمت بمكانه وع مخدته حاضنتهه ودموعي تجري عليهه واني حاضنه قميصه اااوف ياريحتك المتشبعه بيه وتدخل بكل مسامه بجسمي واحس بعدني محتاجه اشمك من جديد...

شلون اجازيك ؟؟ ماراح اوافي حقك لو شما اسوي؟؟ انطيك روحي قليله بحقك بشااار اني مشتاقتلك كلبك ماحس بيه ؟؟ اكيد هسه تحس بيه لان انت كتلي اني احس بيج واحس بلهفتج عليه يعني هسه انت كلبك يدك مثل كلبي وتتمنى تحضني مثل ما اتمنى اني!!

حضنت قميصه ومخليته ع وجهي واني اتخيل نفسي بحضنه وهسه يجي بشار ويكعدني من هذا الكابوس ويطلع كل الشفته بهذا الشهر حلم !!!

فزيت ع صوت فاديه وهي تكعدني كمت ع حيلي ادور علي بالغرفه هو جان هنا!! والله جان حاضني وباسني ويضحك متاكده هو جان يمي بس وينه ؟؟

افتر بالغرفه واصيح وينه بشار هو جان هنا هذا عطره جاي اشتمه بس هو مدا اشوفه !! بعدين انتبهت ع نفسي اني جنت احلم والحقيقه المره بشار مويمي هذا الشفته كله حلم!!!

ظليت كاعده شويه ونزلت كلهه موجوده حته عمو عادل جان الاذان ياذن صليت وقريت قران ما اشتهي عشه نفسي مسدوده  انتظرتهم يكملون العشه وكعدو ورحتلهم

قبس..عمو اريد احجي وياك
عادل.. كولي بنيتي؟؟
قبس.. عمو اني موعندي حصه من ورث بابا اخذهه وانطيهه لساجده حته تتنازل ويطلع بشار اني اعرفهه مال فلوس

عادل.. يابعد بيتي تعالي يمي هنااا !! كمت كعدت بصفه وخله ايده ع اكتافي شوفي يابنتي احنه خير من الله وعدنه فلوس ولو يقبل بشار هسه ابيع واحد من المحلات وادفعهن بس مايقبل ومانكدر نتصرف وحدنه وحته المحامي ماقبل...

قبس.. لعد يظل بالسجن
عادل.. والله يابنتي ماادري خلي نلتقي بي ونشوف كلامه ارتاحي انتي لاتعبين نفسج...

شجن.. جنت كاعده بالمطبخ ويمنه خطار زلم ع جدي وعمر بالدوام وبالهول نسوان ع ماما واني حاطه ايدي ع خدي وصافنه !!

اندك باب المطبخ رفعت راسي اااخ كلبي هذا غيث شيسوي جاي وهو ماطاب لبيتنه من خطوبه فاديه اخذت عكازتي وكمت فتحت الباب صار بوجهي!!

غيث.. شلونج شجن
شجن .. الحمدلله انت شلونك
غيث.. برحمه الله
شجن.. صدك طلعت من اهلك وين عايش هسه؟؟
غيث .. من زمان طلعت وعايش ابيتي

شجن.. ظليت ساكته واباوعله وهو ماخله عينه بعيني جان يكول اجيت اكلكم العصر اجي اخذ قبس لعمر ومناك ياخذهه تشوف بشار

شجن.. شلون العصر وين اكو مواجهه !؟
غيث.. ماادري مرتبيهه ويه الضابط حته ماكو احد
شجن.. شعجب قبل تجي؟؟
غيث.. عمج عامر كايله تعبانه ومريضه وتريد تشوفك. كايله جيبوهه ومرتبهه سامر

شجن.. ماشي هسه اكلهه راح تفرح
غيث.. اني رايح مع السلامه
شجن.. اباوعله مشه لحدما طلع وسد الباب واني مارمشت عيني الله لاينطيك وائل ...

طبيت للغرفه جانت كاعده بس كتلهه كمزت وبينت الفرحه بعيونهه بحيث خبصت نفسهه حته بيومهه تغدت ويانه كالت لان اشتهي اكل..

قبس.. مااصدك راح اشوفه صعدت ويه غيث وداني لعمر جان ينتظرنه بمكان وصعدت ويه عمر اعرف بشار يستصعب دخولي للسجن وهو مايقبل اصلا كدام جماعته نمشي!!

عمه بشرى كالت من تنزلين البسي هذا الخمار وطلعي بس عيونج حته مايكولون هاي مرته عبالهم اخته امه كرايبه!! وصدك لبست جبه اسلاميه ومن وصلنه لبست الخمار

عمر.. يله ننزل !! لوظاله بدون خمار احسنلج انوب عيونج برزن
قبس.. عمر بسرعه لايسدو خلي انفوت
عمر.. شيسدون هي مدينه العاب غير محصلين موافقه احنه بالعراق كلشي يرهم بالفلوس حته مستعدين يسجنوج وياا ويسووج ٤ ارهاب بشده!!

قبس.. كلبي يدك سريع ورجليه ماتساعدني امشي واتعثر طبينه للتفتيش اكو مفتشات فتشني كلشي ماعندي حته تليفون ماجايبه ضميته عند هدى شوفتهن الموافقه ودخلنه..

امشي ورا عمر يحاجي هذا ويرجع لهذا وكلساع يشوف ورقه الموافقه لحدما وصلنه لقاعه جبيره بيهه كراسي وشكم ميز صاح بيه عمر اكعدي ما اكدر اكعد اريد اكسر هاي الحواجز واركض احضنه

تقريبا عشر دقايق وانفتح الباب جان يمشي ويا شرطي بس بدون كلبجات مخلي اديه بجيبوبه الظاهر الواسطه قويه لان حته الشرطه طلع وعمر وياا وكفو بالباب..

بسرعه ركضت علي شمرت نفسي بحضنه مثل الطفل تعلكت بركبته اشمه من ركبته وهو يبعد بيه قبس مايصير ولج مخبله كاميرات مراقبه فضحتيني...

لزكت بي رغم شكد دفعني وماانطيته مجال نسيت المكان البي نسيت كلشي دافنه راسي بركبته وهو يحجي يم اذاني قبس موهيج راح تزعليني عليج!!

ابتعدت من عنده واني اباوع بعيونه جنت لابسه الخمار وهو مركز بعيني وبنظره ذوبان شفت كل الحب والخوف والاشتياق واللهفه بعينه..

سحب ايدي كعدنه ع كراسي ردت ارفع الخمار ماخلاني كال عوفي هيج خليني ولهان بهاي العيون!!

قبس.. بشار مشتاقتلك حيل حيل شلونك انت وضعك
بشار.. اني زين عوفج من عندي كليلي انتي شلونج يوصلني حجي موحلو يكولون ماتاكل وتعبانه وخفت عليج وطلبت اشوفج لان مااريد تفوتين هيج مكان

قبس.. اني تعبانه بس شوفتك هي علاجي لاتعتقد ارجع طبيعيه اذا ما اشوفك بنص البيت كلشي اسود بعيني من يوم الرحت

بشار.. اااخ ولج لاتحجين هيج تدرين شكد دفعت ع هاي شوفتج وشكد اخذ الضابط فلوس يله سمح اشوفج وحدي وبالقاعه من كدما قلق عليج حته صرت ما اكدر انام

قبس حبيبي اسمعيني زين اياج تخطين خطوه خارج البيت لاتفكرين بشروط ساجده لان هاي ادك الناقصه وغايتهه واضحه تريد انطيهه الفلوس ودكول انطوني رشوه وانوب تزود القضيه!!

وتريد تهدم البنيته وتفرقنه لاتسمحين لهالشي اكو خيط امل قريب وان شاء الله ربج موجود ماينسانه بس فدوه لاتعبيني ولاتحجين باي شي حتلو تهددج؟؟

قبس.. هي ليش ماحجت من اجتنه للبيت؟ وليش كالو ماكو بصمات واني بصماتي موجوده شنو الجاي يصير؟؟

بشار.. حالي من حالج مااعرف سامر كالي كل بصمات ماكو واصلا طالع فريق ياخذ بصمات كلشي مالاكين ماادري ساجده مسحتهم او اكو شخص ثاني ساعدج

قبس اي رقم غريب يدك ماتجاوبي والافضل بهاي الفتره تغلقين التليفون اذا ماتحتاجي مااريد تتعرضين لمشكله واني ماموجود !!

سمعتيني لخاطري تسوين كلشي تاكلين وترجعين طبيعيه وتلتزمين بعلاجج اي شي تحتاجي خلي عمر يخابر ع سامر بس هو الوحيد يدري بسالفه

قبس.. لاتخاف مااغلط بعد واوعدك منا لمن تطلع ماتسمع عليه غير الزين بشار اني احبك حيل اني يوميه يتكطع كلبي عليك من كدما اشتاقلك

بشار.. حضن اديه حيل واني هم احبج وابد لاتفكرين بتانيب الضمير انتي روحي موبس مرتي بالعكس ابد مامتندم ع اي تصرف اوعديني ماتغلطين وماتسوين شي بدون علمي!!

قبس.. اوعدك والله
بشار.. موحرام سابيتني بهاي العيون موجاي تحركين بيه ع البطيء ارحمي حالي واني بالسجن وين انطي وجهي!!

قبس.. لا احد يسمعك
بشار.. كومي يله هسه مكابلين الكاميرات السفله لاترفعين الخمار ابد الا اكلج

قبس.. كمت ويا صار دون الكاميرا بحيث ظهري صار ع جهه التصوير ورفع الخمار اول ماشافني ملامحه تغيرت جان يكول ليش هيج ولج هاي ليش وجهج تعبان وشفايفج يابسه

قبس.. من خوفي عليك
بشار.. يرادلهن جرعات يعيدن نشاطهن يله من اطلع كل ربع ساعه جرعه
قبس.. من تطلع ابوسك الف بوسه هذا وعد!!

بشار.. اووويلي وكلساع اغلط واعيد بالحساب من جديد دخل اطلع واني اعلمج!!

قبس.. ضحكت ويا احس روحي ردت الي خلصت الزياره وسلمت علي وطلعنه رغم الالم بس شويه ارتاحيت حته احس كلبي هدء والالم البداخلي خفت كلامه طمني واكو امل بطلعته وكال بلكي يقدمون المحكمه!!!

رجعنه البيت بعده ماصاير المغرب عمر عاف السياره برا لان سياره بشار بالبيت طبينه اني ويا سوه وهو يتشاقه يكلي ردت روحج...

طبيت للمطبخ قبله وهو ينزع بحذائه برا اسمع صوت عياط وعركه وصوت هدى وامهه تسكت بيهه وكلهه والله وداعت بشار ما اسكت اليوم...

طبيت للهول شكو شصاير اباوعلهن كلهه سكتت من شافني وصابرين تبجي وكاعده بالكاع!!

ماادري بعمر وراي واكف جان دكول هدى عمر اذا ما ادبت مرتك اني اشحطهه اذبهه ع ابوهه يربيهه من جديد!!

عمر.. السانج هدى شبيهه صابرين!!!
هدى.. اسالهه !! جان هدمت حياة بشار وخربت علاقتهم شوف مرتك ويامن متفقه ومخليه واحد يتصل ع قبس وبوجود بشار عود هو عنده علاقه بيهه

عمر.. لج هدى شتحجين علاقتيش صابرييين ؟؟

هدى.. اي مرتك متفقه ويه واحد ومحاوله تخرب بين بشار وقبس وماتقبل دكول منو واني حته دليل عندي اذا ماتادبت والله والقران اروح لابوهه

عمر.. وين الدليل جيبي هسه؟؟
هدى.. هاك اسمع مرتك شدكول اسمعهه زين بهذا التسجيل....

يتببببع... متابعه شيقه
موتحجون على القفله هاي قفلتهه بدون قهر ... احبكم