رواية قمع المشاعر الفصل الثامن وخمسون 58 - بقلم Rozaya1122

قمع المشاعر.... الرابع عشر من الجزء الثاني...
للكاتبة زهراء ( روزايه)...

مالذي جرى ارى عالمي يقع واستعيد وقفته
بملئ الكهل رغم شبابي ماعساني افعل؟!
وايام سنين عمري التفت كالتفات الافعى حولي
مالذي حل بزماني؟ لاينفع معه الصبر
ولاالرويده ولا الدعاء !! رباه فأني والله قد
هرمت مبكراً تعبت ووقفت وسقطت
....

قبس..لازمة يدة الباب واصرخ بعلو صوتي بشاااار
الحكلي طفلي راااح بشاااار
اجه من برا على صوتي وشافني واكفه وحانيه ظهري
ولازمة بطني ومااكدر اتحرك خطوه
والدم ملطخني ونازل بالكاع..

انفزع من شافني واجه يركض سندني من صوتي
وصريخي والبواجي حته ماسمعته شيحجي
ماجانت عندي كلمه غير طفلي مااات..

اخاف اتحرك ظليت لازمه بالباب ومخليه راسي علي
وابجي بصوت الفاكده ابنهه

اشوفه محتار مايعرف شيسوي
ع السريع لبس قميصه وجابلي عبايه
اسلاميه ولبسني الشال وگادني من ايدي
والدم ويه رجليه حته مااكدر البس الحذاء
لازم اغسلهم

ترك ايدي ولزم وجهي باثنين اديه
وحجه بصوت يرجف والقلق مسيطر علي
قبس تعالي خلي اغسلج شلون تروحين هيج
تعالي حبيبتي!!

صرخت بصوت عالي اخذني خلي الناس تضحك
عليه اكلك ابني مااات احس بي رااح بشار
لاتعذبني اخذني هسه

بشار.. حجه بصوت عالي متشوفين الدم يمشي
وراج شلون اطببج للمستشفى دتعالي خلي اجيبلج
ملابس وجرني بالگوه ماقبلت اريد اروح اريد اوصل

بس حالتي ماتسمح لان الدم بغزاره يمشي وياي
حته البيت ادمر طببني للحمام
واني اتكطع من الالم الم كلبي والم بطني
والم داخلي احسه مثل النار مشتعله..

اغمض عيوني اخاف اباوع
وبس الساني يردد يارب طفلي
حته مااعرف شدعي انت يارب
تعرف البداخلي شنو !!

جابلي ملابس وحاجات نسائيه
احتياطيه اريد ارفع ظهري واستقيم
صرخت اااااخ بصوت عالي
احسه مثل الشجره وانقسم بالنص
بس تعدلهه توكع..

علك الملابس بالتعلاكه وكعدني ع الطبله
وكعد بمستواي لزم اديه ويهدي بيه
نزعني شالي وملابسي الملطخه بالدم وشمرهم
ع جهه وجر الدوش اليدوي
وغسل جسمي كله واني ابجي
ابجي بحرگه والم احس روحي جاي تتكطع,.

كومني مااكدر اوكف ظهري ماجاي يستقيم
كام بي وماينحني
احس رحمي راح ينفجر
لبسني ملابسي وطلعنه برا

ورجع جابلي عبايه اسلاميه
جديده وشال وجر الحذاء من الخانه لبسته..
وهو بدل قميصه ورجع كادني بس كل هذا
هو مانطق ولاحجه غير كلمه لاتخافين الكاتبه الله يصير..

صعدني بالسياره ورا ماكدرت بالصدر اريد امدد
ولزم الشارع العام التفت عليه يحاجيني
اخابر امي تجي ورانه..

قبس.. اااي خابرهه بس انت استعجل بشار
ابنه يموت..
بشار.. قبس شوفي حالتج راح تموتين الله ينطي
والله ياخذه مابيدنه شي وان شاء الله ماكو شي..

جذاب وضعه ازيد من وضعي بس
يدري انفعل وخاف تنتكس حالتي
واكوم اضرب بنفسي يحاول يهديني
واله هو جان يسوق بسرعه خياليه وماخله واحد ماسبه بالطريق..

وصلنه للمستشفى واخذوني للصالة
اجت دكتوره فحصتني وسونار.. فوك الالم فوك الفحص
شكد تعذبت بهذا اليوم لسه من اتذكره
ينغزني گلبي..

ابجي واتوسل بيهه دكتوره شبي طفلي؟؟
ردت عليه وهي دكلي الله يعوضج ماما
الطفل ميت ابطنج وفورا لازم ينزل
يأثر ع رحمج عندج نزف قوي
منو جاي وياج؟؟

مااستوعبت كلامهه صار صدى حولي
ذبذبات صوتهه واشوف كلشي يفتر كدامي
اذني انسدت عن سماع اي شي
بس اسمع نبضاته بكل سونار..

هزتني حيل انتبهت وهي تحجي
ويه الممرضه بسرعه وقعوا زوجهه
خاف يتأذى الرحم وحضرولهه دم ..

لزمت ايدهه جانت مره جبيره
حجيت بتوسل ليش مات
بس بعدني ماصحت ولانزلت دموعي
بعدني باثر صدمه؟؟

الله يعوضج ماما الطفل مثل ماواضح بالسونار
ملتف ع رقبته الحبل السري وخانكه

امي انتي تتعاطين علاج وضعج موتمام
انتي مريضه ليش ترعشين؟؟

ماجاوبتهه ابد بس عيوني مفتوحات بصدمه
احس جسمي ينتفض واسمع صوتهه تصيح
ع الممرضات تعالو الزموهه وانتي جهزي ابره مهدئه
حالتهه موتمام..

احساس غريب تملكني وين جنت فرحانه
بي ويوميه احجي وياا وين هسه
يجهزون ينتزعو من عندي مثل ماانتزعوا اخو قبله
وقطعوا قطع صغيره..

دارت بيه الدنيا جنت فراشه واحلق بين
الازهار جنت اكول ماكو وحده مرتاحه مثلي
الساني يلهج بالشكر ليل نهار..

بس هاي الفراشه طلعت من هذيج
الحديقه واخذهه القدر
لحديقه ثانيه ومن نزلت لكتهه حديقه صبار

شلون راح تعيش بوسط الشوك
وشلون راح اقاوم الصبار وحدي
منو الي؟؟ منو يسمعني؟؟

ماحسيت غير روحي بدت تغيب
واشوف كلشي كدامي ظلام دامس
بهاي اللحظه حسيت عقلي انقسم نصين

نص يكول خطيه انتي ويواسيني
والنص الثاني يحثني على كلشي غلط
يكلي اضربي نفسج اذيهه
حسيت دماغي مثل الدود ويمشي بي بصوره سريعه
تاكدت رجعت حالتي للاسوء وهاي
وحده من علامات الانفصام..

فتحت عيني والم ذابحني ذبح
اول اسم نطقت بي بشااار
نسيت اي شي مر بهاي الليله
محتاجته حيل هو الوحيد اليحس بيه..

حسيت بايده وهي تمسح ع راسي ويكلي
الحمدلله على السلامه يمج لاتخافين!!

باوعتله بتركيز عيونه حمر حيل
باجي؟؟ لو من العصبيه
ردت احجي اكله ابنه راح بس خله اصبعه ع شفايفي
وسكتني..

بديت انتبه شويه واستوعب وجودي
هاي خاله ام بشار كدامي تمسح بدموعهه
وصوت شهكتهه واضح

وهاي عمه بشرى كاعده يم رجليه
وتفرك بيهن وهي دكلي الله يعوضج
اهم شي سلامتج..

هناا حسيت رجعت لعالمي ورجعت اتذكر
من شفت الدم بديت استوعب وكمت اصرخ
واتحرك رغم عمه لزمتني من رجليه
وبشار لازم اديه
بس جنت منهاره !!

دخلت بوسط صراع ويه نفسي منا خسارتي
لطفلي ومنا عقلي المنمل وصدى صوت بي
صوت ضحك صوت بجي مااعرف شجاي يصير..

اجت الممرضه ضربتني ابره مهدئه
واني بس اون لحدماغفيت...

كلما افتح عيوني وابدي اصرخ يضربوني ابر
وتزود حالتي بعدهه المهدئات بالنسبه اليه
دماار لان اتركهه فتره وارجع عليهه
ولان جسمي قبل الحمل تعالج فصار اكو مثبط
الهه داخل جسمي لذلك جاي اتأذى ومحد يحس
بيه بس عبالهم اسكت ويخلصون مني...

خاله تقره ايات قرانيه ع راسي
كمت ارتاح شويه هي تقره واني اقره وياهه
بكلبي واستغفر هوايه بديت شويه اضبط اعصابي..

ثاني يوم كتبولي خروج وطلعنه
رادو ياخذوني لبيت عمو ماقبلت
ردت بيتي ومكاني ..

دخلت لبيتي ودموعي تنزل مثل المطر
جانت ويايه عمه بشرى وخاله طببوني للغرفه
وعمه شالت الفرشه وصعدت ليفوك نزلتني وحده
فرشتهه وساعدني امدد بس خاله ماعافتني ابد

ظلت مستمره وكامت جابت القران وظلت تقره
ساعات حسيت براحه لحدما غفيت..

شجن.. اهلي جانو نايمين الظهر وبابا بعده ماراجع من الدوام
وبس اني واسراء بالمطبخ ودك تليفون ماما ع الشحن
رحت شلته بشار بس كلت الو اجاني صوته وهو
يصيح شجن بسرعه خلي امي تجي للمستشفى عمر راح يجيهه

مالحكت حته اساله شكوو؟؟ لان سده بس عرفته
اكيد قبس بيهه شي
ركضت لماما الي بعدهه هستوهه نامت كعدتهه مفزوعه
تلبس وتردد بردا وسلاما

اجه عمر ونزلت صابرين ع الصوت بوقتهه
كلنه انفزعنه وكلنه ندعي الهه لان عمر كال
صاير عدهه اسقاط..

بس طلعوا كعدت ابجي مولان ابن اخوي راح
ابجي عليهه هي شكد شافت لوعات بحياتهه
شكد تعذبت ومن هسه شافت الراحه
ماكملت فرحتهه وهذا ثاني طفل يموت عدهه

الحجيه.. كافي شجن اسم الله مفاوله ع البنيه
الله ماكاتبه الهم..

شجن.. بيبي ليش الانسان المتعوب من صغره يظل
التعب راكض ورا وليش اكو يجن ع الحاضر ويمشن
بدرب الخباثه والحرام ويشوفن الراحه

الحجيه.. شنو هالحجي استغفري ربج الله
اذا حبه عبدآ ابتلاهه وهذا امتحان من رب العالمين
يختبر بي قوة ايمانهم وصبرهم..

بشار ينطي من ايده هواي وساعد هواي محتاجين
وصايم ومصلي من صغره ومامشه بدرب الحرام

وقبس يتيمه وعانت بحياتهه وشافت الويل
هذا اختبار الهم اثنينهم لان الله يحبهم ..

شجن.. استغفر الله واتوب اليه صابرين خابري هدى
خاف دكول ليش ماانطيتوني خبر
صابرين.. خابرت فاديه وكالت راح تخابرهه
الله يكومهه بالسلامه..

اسراء.. ان شاء الله ماكو شي مسكينه قبس
الله يحفظهه راح اكوم اصلي وادعيلهه
شجن.. اميين..

بيومهه محد اكل بالعشه وحته بابا ارتفع ضغطه
وانقهر وكلهه دكول مقهورين ع قبس
مو ع بشار لان هي العانت اليتم وشافت المر..

ثاني يوم طلعوهه للبيت وهدى خابرت كالت راح اروحلهم
كتلهه مري عليه اخذيني ومرت عليه رحت وياهه
وظلت اسراء هي وصابرين وبيبي بالبيت...

انصدمت من شفتهه موقبس الحلوه
هذيج البنيه الشفافه لااا اشفت وحده محطمه
اذا تكلهه شلونج تبجي خسارتهه جبيره..

ظلينه يمهه اني وماما وعمه بشرى
راحت وهدى كالت باجر امر عليهه
مااكدر اعوف جهالي وكحين باجر اشوف حمزه واجي..

بشار خابروا علي لجنه جايه للشركه وراح
بعدماوصانه عليهه جانت نايمه
صارت الساعه ب١٢ ونص كمت صليت
وماما كاعده يم راسهه

حاجيت ماما كومي صلي؟؟
ام بشار.. تعالي اكعدي بمكاني كلساع تفز بس تكعد اقري
ايات وانفخي بوجهه

شجن.. كعدت يمهه وماما كامت تصلي باوعت
عليهه مكسورة خاطر قبس بسرعه يبين عليهه
اذا زعلت واذا ضاجت بس هالمره حسيتهه مكسوره

باوعت ع غرفتهم شكد حلوه مامركزه عليهه
صورتهم بالزاويه معلكه ع الحايط حاضنهه من
خصرهه ..

حسيت عليهه كعدت كمت صرت كدامهه فتحت عيونهه
ورجعت غمضتهن ساطريهه سطر بالعلاج..
حاجيتهه قبس تسمعيني؟؟

قبس.. اي اسمعج بس راسي
راح ينفجر ؟؟
شجن.. هاي من العلاج اكعدج شويه
قبس.. اي كوميني اريد اتمشى واريد اروح للحمام

شجن.. نسيت حالتي هو اني اريد واحد يكومني
ردت اسندهه ماكدرت ابتسمت بتعب
وكالت خلي تجي خاله اكعدي ارتاحي..

بين ماكملت ماما صلاة اجت كومتهه
حيل متأذيه حته ماتكدر تمشي اخذتهه للحمام
وظلت واكفه تنتظرهه

قبس.. احسن نفسي شويه احسن بس راسي يوجعني
ام بشار.. من العلاج وبجيتي هواي كافي انتبهي ع صحتج
والطفل يجي الله ماكاتبه الكم

قبس.. وين بشار؟
شجن.. خابروا جايه لجنه ومدري شبي صار عصبي
بالتليفون وسمعته يكلهم موكتلكم تنطوني خبر
وراح ع السريع..

قبس.. خاله ماخابرتو يجيب غده انتي من البارحه وياي
ام بشار.. عمج جاي بالطريق وصابرين طابخه دزتلنه
انتي ماماكله وخسرتي دم هوايه عمج جاب معلاك هسه
تاكلي كله شوفي وجهج شلون اصفر..

قبس.. مااشتهي احس معدتي ثكيله
ام بشار.. طبعا تطحن بروحهه فارغه هسه تاكلين
وترجعين قبس الورده المفتحه مايلوكلج تذبلين...

شجن.. اجه بابا وكعدنه ناكل وبيده يسوي لفات
وينطيهه ومااكل الا اكلت هي وشبعت وكامت للغرفه ترتاح

قبس.. اخذت تليفوني جان ع الجربايه بصفي
ودكيت ع بشار رغم زعلي علي بس ظل بالي يمه
اني كلهه يمي وطمنونه وحجوا كلام حلو وياي
بس هو من المستشفى للشغل واحتمال اكو مشكله

دك دكه كامله ومارد سديته وظليت مدده ورا
دقايق رجع اتصل فتحت خطت كتله الووو
بشار.. هاحبيبتي شلون صرتي؟؟

قبس.. زينه وين انت؟
بشار.. جايه لجنه واني ماموجود ولحدالان يفترون
وبالي يمج خابرت ع شجن كالت نايمه؟؟

قبس.. جنت نايمه
بشار.. اكلتي خابرني ابوي كال اخذتلهم غده
قبس.. ااي اكلت وانت ؟
بشار.. لا مالحكت خلي تروح لجنه وارجع للبيت

قبس.. ماشي
بشار.. نامي ارتاحي لاتاخذين اي علاج لان هوايه
اخذتي مهدئات وان شاء الله ما اتاخر
قبس.. ماشي مع السلامه..

سديته منه وجريت السبحه مال خالتي يم راسي
كمت استغفر هواي كلش هوايه سبحت
حسيت نفسي مرتاحه رغم اعصابي مشحونه
بس كدرت اضبط نفسي

حاليا اني بحالة صراع محتاجه علاجي
نفسيتي متحطمه اريد افكر
اريد اتذكر الصار وشلون شك بيه
بس من كثر الافكار المتضاربه براسي
مااكدر اوصل لنتيجه..

ام بشار.. عادل اني راح اظل يم قبس لباجر
وشجن ارجعي ويه ابوج اسراء وحدهه
شجن.. ماارجع اريد اظل هنا وشعليهه اسراء هي
بالغرفه وصابرين لازمه البيت

عادل.. لابابا البنيه وحدهه تضوج
قبس.. عمو خليهه يمي اسراء شعليهه
ام بشار.. هاهي عادل هسه اخابر صابرين ادير بالهه
ع البيت وباجر تجي هدى واني اروح

قبس.. للمغرب اجه بشار جنت مدده والسبحه
بيدي رفعت راسي لكيته واكف يباوعلي
عدلت كعدتي واني اتالم

اجه كعد بصفي ولزم ايدي وكال موجوعه؟؟

قبس.. يعني شويه خف الالم ليش عيونك حمر؟
بشار.. ضغطي مامستقر وتعبان مانايم البارحه

قبس.. كوم اسبح وتعال ارتاح جنت احجي طبيعي
مو وقتهه افتح الموضوع لان اكيد متألم مثلي
على ابنه

بشار.. مامبدله ملابسج ماسبحتي؟؟
قبس.. الصبح جنت حيل متأذيه ماكدر اسبح وحدي
واستحي خاله تدخل ويايه بس هسه
احسن اسبح انت واني وراك

بشار.. تكومين وياي اسبحي قبلي خاف توكعين
لان البارحه طلع عندج فقر دم وخاف يهبط ضغطج
قبس.. عيب من خاله خاف تشوفنه

بشار.. ملتهيه تسوي عشه وشجن تقره قران
قبس.. كومني اطلع ملابس بس نزل رجليه واني اكوم
بشار.. متأذيه حيل؟؟

قبس.. اي حيل تأذيت مدري شسولي حته رجلي
احسهه مخلوعه من فوك
بشار.. باجر انروح لسرور وانشوف شدكول

قبس.. سندني وكمت للكنتور طلعت ملابسنه
وهو اخذ الخاولي مشيت قبله وهو اجه وراي
ساعدني سبحت حسيت جسمي ارتخى
ولبست ملابسي وطلعت وهو سبح واجه وراي

لكاني كاعده ع الجربايه وبعدني مامشطه
اخذ الخاولي من ايدي ويجفف بشعري
حسيت اديه قريبه وهي تلامس ركبتي
عكست صورته بالمرايه اخذ خصله شمهه حييل

وحاوطني باديه وحضني ظليت على حالي
ماتحركت ولا بادلته
همس يم اذني اسف اذيتج

ماردت اسمع اي شي بخصوص الموضوع
حالتي ماتسمح حته اتناقش
لذلك اكتفيت بالسكوت

سحب المشط من ايدي وبده يسرح بشعري
بهدوء وانطانيا كال لفي مااعرف
وتعالي مددي واني اكوم اصلي

لفيت شعري ومددت وهو فرش السجاده
صلى وشفته طول بصلاته لان كاعد يسبح
ع السجاده لحدما اندك الباب خاله كالت تعالو تعشوا

تعشينه وكعدنه بالصاله خاله وشجن
يسولفن بس هو ساكت ومبين
علي حسبه تاخذه وحسبه ترجعه..

اندك الباب كام فتحه طلع عمو
واسراء  وبيبي وجدو بعدهم يسلمون
اجه عمر وصابرين
شويه ع سوالفهم وضحكهم تغير الجو..

ام بشار.. هاا عادل رحت لبسمه؟
عادل.. اي هسه اجينه منهم طالعه فرح للبيت مجبرين
ايدهه ورجلهه زينه
ام بشار.. وامجد وينه؟

عادل.. امجد طالع من البيت دكول بسمه
يوم خفر ويوم يبات يم صديقه
حجيت وياهه دكول هو متعبنه
يريد كلشي ع مزاجه وفرح لان اكبر منه وتتعارك
ويا وهالمره صار عصبي

قبس.. باوعت لبشار ماحجه ولاعلق ع كلامهم
اسراء ساكته ماتحملت اسكت كتلهه هم رحتي وياهم؟؟

اسراء.. اي رحت لان عمو ماكال نمر عليهم وبعد استحيت
احجي
قبس.. ليش عادي واذا رحتي ليش ماتحبين تروحين
اسراء.. لاا بس اني ردت اجي لهنا اشوفج
قبس.. الله يسلمج حبيبتي

قبس.. ظلوا كاعدين ل١١ وراحو واني كمت للغرفه
نزعت ملابسي لبست تراك خفيف ومددت بفراشي
بشار كال اقفل الابواب واجي
وخاله وشجن ينامن بالغرفه الثانيه..

اجه بشار سد الباب وقفله واندار من الجهه الثانيه
مدد بصفي وخله ايده جوه راسه
ودارني علي اول ماباسني من راسي..

وكال تسمعيني اذا احجي؟؟
قبس.. قبل لاتحجي كلي شلون انطاك كلبك تشك بيه؟
وشلون هذيج الايام تغيرت واني عبالي من الدوام
وتالي طلعت تشك بيه وادور بتليفوني..

بشار.. اول شي اني ماشاك بيج واذا ع تغيري
هذيج الايام مويمج نهائيا اني تعبان عندي مشاكل
بالدوام ومااحب احجي بيهه

قبس قبل اسبوع او اكثر صدفه بالدوام واجتني رساله
ع الفايبر بان فعلتي فايبر تصورت من اجي راح تحجيلي
ماحجيتي وثقي بالله ماخليته ابالي
لان اني سامحلج بكلشي ولا مانعج من شي..

وعادي عبرت الموضوع اكثر من مره كمت افوت ع الفايبر
ماالكاج متصل ابد وع هذا الاساس كلت احتمال سويتي
ولغيتي وكتلج ماانطيت الموضوع اهميه ولاسالتج
ولا حته فكرت

البارحه من اجيت عصبي موعليج والله وداعتج عندي
مو علمودج بسبب الشركه والمنصب الجديد
كل انسان يمر بايام صعبه ويتغير مزاجه

بس من ابدل سمعت رنه تليفونج وهو كدامي
شفت اشعار فايبر فتحته شفت الرساله
وصار الصار تدرين بيه عصبي تدرين بيه
انعمي بلحظتهه

ضجت لان ضميتي عليه موضوع الفايبر
اعرف المكايد مااشك بيج من رساله
وانتي كدام عيني شلون اسمح لنفسي
اشك واني احبج كل هالحب..

قبس.. اني مواجي احجيلك كلشي يصير وياي
ليش ماتحجيلي من. شنو ضايج؟

بشار.. سوالف شغل ماحب اسولف بيهه
وبعدين اذا حجيتلج راح تحليهه وسالتيني
اكثر من مره وكتلج بسبب الشغل
هاج شوفيني اسمع شي عنج اجي اواجهج
اني مو من النوع الي ينهزم من المواجهه

قبس.. منو الدز رساله وهيج سوه بيه
وشلون ماادري بي؟؟
بشار.. اني سالتج منو؟ وتكولين تليفوني محد ماخذه
واذا نشك بفرح شوصل تليفونج يمهه
وهي البارحه بالمستشفى شلون ادز وشلون تدري اني
وصلت للبيت واندزت رساله

البرنامج مخفي بجهازج ومامستخدم بحيث انتي
ماشايفته بس بهاي اللحظه من طبيت للبيت
اجت الرساله
حالي من حالج ياقبس كلشي غامض

المخربين هواي ومااريد اذيج بعصبيتي
وبعدين محملتني مسوؤليه موتت ابني
ضربتج اني؟؟

قبس.. مو جريت شعري؟
بشار.. لعد الطفل براسج؟؟ ليش تباوعيلي هيج
اني احبج اكثر من روحي
واخاف عليج من الهوه خاف يأذيج
شلون اجازف بيج وبابني..

قبس.. ضميت راسي بصدره وحضني حيل
تعبانه نفسيتي حته مالي قدرة اناقشه
وازعل مالي حيل تعبانه

مرت ايام بديت اتحسن وكمت لبيتي
وخاله وشجن راحن واني صرت احسن
بس حالتي النفسيه تحت الصفر

يجي بشار التهي ويا وهو يطلعني يوميه بليل
تفتر بالسياره مجرد مايروح واظل وحدي
تهيج عندي الافكار اريد اضرب نفسي
اريد اذيهه بس كوه مصبره ع وضعي

علاح ما اخذ تاركته واصلا ممنوع عليه
افكر اسوي طفل لازم اتركه واتحمل
راجعت سرور وكالت رحمج نظيف
شهرين وتكونين مستعده للحمل

بس بشار جان قافل يكلي الا تتحسنين
حالتج النفسيه تتحسن ودمج يرجع طبيعي
يله نسوي طفل..

الفايبر مسحه والرقم حاول شكد يعرفه يتصل علي
مغلق وانطا لغيث حته يطلعه من الشركه
وكاله هذا بدون عقد يسمونه كلك
وتاهت علينه وراحت السالفه وماعرف منو السوه بينه هيج..

بده الدوام وماداومت شجن واسراء
داومن وتخابرني شجن اسالهه ع اسراء دكول
اصلا عبالك نمله مانحس بيهه ..

بيوم اجه بشار لح عليه اداوم
كال تتغير نفسيتج  وتغيرين جو
جنت مالي واهس بكلشي حته بشار
هاملته ومايحجي ساكت متحملني..

باشرت بالدوام شويه ع الاقل اشوف
ناس واكدر اتغلب ع حالتي النفسيه
رغم ما اختلط باي مدرسه بس ع الاقل
ع هوسة الطالبات..

بيوم من عدهن طلعت من الدوام واتفقت ويه بشار
اروح لبيت عمو كلت هو بعد فرع واحد اتمشى
وهي حلة مدارس قابل شكووو
بس هو مايدري راح اروح مشي لان كال خابري امي
وكتله ماشي

طلعت من المدرسه امشي عبرت الشارع العام
ولزمت الفرع الياخذني لبيت عمو سمعت صوت
سياره تمشي وراي صرت امشي بالجانب
ماظل شي واوصل للبيت..

صارت السياره تمشي ويه مشيتي
دب الخوف بكلبي مع العلم لو اركض
اوصل بسرعه بس عبالك السياره مراقبتني

قويت نفسب وكلت خلي التفت اشوف
هذا ياناقص غيره وماعنده عرض
التفتت ع الجانب وانصدم بهذا ابو غدير

بسرعه درت وجهي واسمعه يكول
شدعوه ياحلوه ماتنطين مجال
هيج المدير العام حاكمج ..

كمت امشي سريع وهو يمشي وياي
عزه بعيني لا احد يشوفه
وهو بعده مدري شيلغي ماجنت اسمعه

خليته وصل بمستواي وشلت طابوكه من الكاع
والتفتت علي كتله انت حيوان
اشواربك اليشوفهن يكول والنعم منه
مامتعلم العيب شنو وتتعرض البنات الناس

اسمعني خاف عبالك اسكتلك
هاي مرت مدير العام التحجي عنه
هسه افلش راسك بهاي الطابوكه واروح اشتكي عليك
واشوفك شلون تنسحل شكلت هسه؟؟

شخط السياره حيل ومشه سريع حته
سوه عجاجه وراا كبر لفك ولف هاي الشوارب

وصلت للبيت انهد بس ماحجيت
عيني ع الباب شوكت يجي بشار
اريد ارجع لبيتي
حته جنت فاصله عن الكل شكد يسولفن واني بالي مشغول..

اجه عليه المغرب رجعت للبيت
تعشينه وكوه بلعت اللكمه وغسلت مواعين
ورحت افرك باديه خايفه حيل من ردة فعله

وكفت كدامه جان مدنك ع الطبله فاتح الحاسبه
وكدامه اوراق مطشره يشتغل بيهه..

انتبه عليه واكفه وافرك باديه اثنينهم
بعد الصار ومن سقطتت طفلي ورجعت
حالتي النفسيه رجعت عندي الحالات
احك جسمي لو يكوم اصبعي الابهام يرجف ساعات
وما اسيطر علي ابد..

اتعب حيل واحس بنفسي اضعف
واكوم اخاف من خيالي
لو اخاف واحد يعاقبني مثل ماجان بابا يعاقب ماما
ارجع اسيرة الماضي

رفع راسه وكال شبيج حبيبتي صاير شي؟؟
قبس.. اني سويت شي غلط بس لاتصيح اذا حجيتلك!!

فتح اديه وكال تعالي بحضني تعالي !!

رحت كعدت بصفه وحضني وسحب راسي
ع صدره ولزم ايدي واصبعي اليرعش..
وكال

لاتخافين احجي من شنو خايفه وشمسويه؟؟
انتي حبيبتي شلون اذيج..

قبس.. بديت احجيله كلشي شلون تعرض اليه
وشلون حجيت جان يستمع مني وهو هادىء

بشار.. اهدئي حبيبتي هوايه نماذج تعبانه
بس اني موكتلج ماتروحين وحدج
موكتلج الشارع يخوف ليش ماسمعتي الحجايه

قبس.. كلت قريب البيت واني سنين معتمده ع نفسي
شبيه هسه اخاف ..
بشار.. يختلف حبيبتي الزمن العشتي بي يختلف
عن هذا هاي المره سويتيهه بعد لاتعيديهه
حته لو اني اجي اخذج بس ماطلعين وحدج

قبس.. هزيت راسي وظليت بحضنه وهو يلعب
بشعري كمل شغله وشالني وهو يبوس بيه
واني معلگه بركبته اضحك..

ثاني يوم جنت واكفه اسوي غده
واندك الباب شفته بالكاميرا
نفسهه الطفله التجي كل مره

كلت خلي اطلع هالمره انطيهه صدقه
اخذت الشال من الغرفه والفلوس
وطلعت وهي ادك حيل صحت اااي اااي اجيت..

وصلت للباب فتحته اباوع الشارع فارغ ولا طير
وين راحت هاااي .........

.
.
يتبببببع... متابعه شيقه